23.

Wasei ni Kosipeli kei na Nodra Vaqaqacotaki na Lewenilotu Vou kei ira era Sa Lesu Tale Mai

23.0

Ai Vakamacala Taumada

Na nodra sureti na tamata kecega me ra ciqoma na kosipeli e tiki ni Nona cakacaka ni veivakabulai kei na bula vakacerecerei na Kalou (raica na 1.2 ena ivoladusidusi oqo; Maciu 28:19–20). E oka kina na:

• Vakaitavi ena cakacaka ni kaulotu kei na veiqaravi vaka-daukaulotu.

• Vukei ira na lewenilotu vou kei ira era sa lesu tiko mai mera rawaka voli ena salatu ni veiyalayalati.

23.1

Wasea na Kosipeli

23.1.1

Loloma

Eda sa luvena kece na Tamada Vakalomalagi, E lomani ira vakalevu na luvena o Koya. Sa solia vei ira kece na madigi me ra vakasinaiti ena Nona loloma maivei Jisu Karisito kei na Nona kosipeli (raica na Joni 3:16; 2 Nifai 26:24–28; Alama 26:37; Yavu ni Vakabauta 1:3).

E dua na sala eda vakaraitaka kina na noda lomana na Kalou sai koya ena noda lomana ka qaravi ira na Luvena (raica na Maciu 22:36–39; 25:40). Eda sa saga meda loloma ka veiqaravi me vaka a cakava o Jisu Karisito. Na loloma oqo e vakauqeti keda meda dodoliga yani vei ira na tamata kece ena veimatalotu, duikaikai, kei na itovo vakavanua (raica na Cakacaka 10:34; 2 Nifai 26:33).

23.1.2

Wasea

Baleta ga ni da lomana na Kalou kei ira na Luvena, sa lomada sara me da wasea na veivakalougatataki sa solia vei keda o Koya (raica na Joni 13:34–35) ka veivuke ena vakasoqoni o Isireli. Eda segata me da vukei ira na tamata me ra vakila na reki eda vakila tiko (raica na Alama 36:24). Ni da sa tisaipeli i Jisu Karisito, eda sa taura cake na Nona rarama (raica na 3 Nifai 18:24–25). Eda tukuna e matanalevu na iVakabula kei na Nona veivakauqeti ki na noda bula (raica na Vunau kei na Veiyalayalati 60:2).

Eda wasea yani na loloma, dina ni kosipeli, gauna, veika e sotavi, kei na parokaramu ni Lotu me vakalougatataki ira kina na luve ni Kalou ka vukei ira mera toro voleka vua na iVakabula. Eda wasea na veika oqo ena sala tudei ka matau me tiki ni tamata yadua, initaneti, kei na veimaliwai tale eso.

23.1.3

Sureta

Sa sureti ira na tamata kecega na iVakabula me ra ciqoma na Nona kosipeli ka vakavakarau ki na bula tawamudu (raica na Alama 5:33–34). Ni da sa Nona tisaipeli, eda na muria na Nona ivakaraitaki, ka sureti ira na tamata kecega me ra “lako mai vei Karisito, ka mo dou vakataucokotaki vua” (Moronai 10:32).

Eda masuta na veivakauqeti kei na veituberi ena sala me ra sureti kina na tamata me:

• Lako mai ka raica na veivakalougatataki sa vakarautaki tu maivei Jisu Karisito, Nona kosipeli, kei na Nona Lotu (raica na Joni 1:37–39, 45–46).

• Lako mai ka qaravi ira na vakaleqai tu.

• Lako mai ka taukeni ena Lotu i Jisu Karisito sa vakalesuimai.

Ni yavutaki na noda veisureti ena gagadre kei na malele ni dua na tamata, ena rawa ni ciqoma o koya na veisureti oqori. E vakavuqa, na veisureti sa kena ibalebale me okati kina na noda matavuvale, itokani, kei ira na tiko tikivi keda ena veika eda sa cakava tiko. Me vakataka, noda rawa ni sureti ira mera mai:

• Duavata kei keda ena noda itikotiko me baleta na itaviqaravi.

• Tomani keda ena sokalou kei na vulici ni kosipeli.

• Tiko ena soqo digitaki eso, me vaka na vakalougatataki ni gone se papitaiso.

• Vakaitavi ena itaviqaravi se veiqaravi ni tabanalevu kei na itikotiko, oka kina na cakacaka e tuvai ena JustServe.org ena veivanua e tiko kina).

• Vakaitavi ena parokaramu kei na itaviqaravi ni Lotu. Oqo e rawa ni oka kina na itaviqaravi ni Lalai, itaviqaravi ni itabagone, tuva kawa, vuli ni bula rawati koya, BYU–Salatu e Vuravura Raraba, kei na vuli ni wilivola kei na vosa Vakavalagi.

• Sotavi ira na daukaulotu tudei ka rogoca na nodra itukutuku.

Me baleta na vakasama kei na ivurevure tale eso, raica na:

• share.ChurchofJesusChrist.org.

• “Wasei ni Kosipeli” ena Valenivola Vakosipeli.

• Na “Duavata kei Ira na Lewenilotu” na wase 9 ni Vunautaka na Noqu Kosipeli: E Dua na iDusidusi ni Wasei ni Kosipeli i Jisu Karisito.

Na tabanalevu kei na iteki e rawa ni tauyavutaka e dua na madigi matau vei ira na lewenilotu me ra sureti ira na tani. Na sala me caka kina oqo e oka kina na soqo ni veiqaravi kei na itaviqaravi kei na wasei ni ivurevure ni Lotu kina itikotiko raraba.

Era na veivakasalataki vata na iliuliu ni tabanalevu kei na iteki me kilai (1) na gagadre eso ena itikotiko raraba ka (2) ivurevure ni Lotu me wasei. Me baleta na ikuri ni ivakamacala, raica na “Wasei ni iVurevure ni Lotu” ena Gospel Library.

Na ivakavuvuli ni loloma, veiwasei, kei na veisureti sa baleta talega na nodra vaqaqacotaki na lewenilotu vou kei ira era sa lesu tale mai.

23.2

Nodra Vaqaqacotaki na Lewenilotu Vou

Na lewena na Lotu e ka totoka ka veibolei talega vei ira e vuqa. E kauta mai na veivakalougatataki cecere, ia e gadrevi talega kina na veisau ki na vakabauta vou, itovo vou, kei na veimaliwai vou (raica na 1 Cesalonaika 1:6).

Na lewenilotu vou yadua ena gadreva na veitokani, madigi ni veiqaravi, kei na veivakani vakayalo. Ni da sa lewe ni Lotu, eda solia vei ira na lewenilotu vou na noda loloma kei na veitokoni (raica na Mosaia 18:8–10). Eda vukei ira me ra vakila e dua na yalo ni ra sa taukeni ena Lotu. Eda vukei ira mera toso cake ena salatu ni veiyalayalati ka yaco me titobu sara na nodra “saumaki vua na Turaga” (Alama 23:6). Eda vukei ira me ra “vakani ena vosa vinaka ni Kalou, me ra tiko ga kina ena sala dodonu, … ka vakararavi tabakidua ki na loloma i Karisito” (Moronai 6:4).

E rawa talega ni da vukei ira na lewenilotu vou mera:

• Vulica ka vakila na reki ni ra sa tisaipeli i Jisu Karisito.

• Vulica me ra kila vakacava na veivakauqeti ni Yalotabu.

• Tauyavutaka e dua na ivakarau ni nona masu na tamata yadua kei na masu vakamatavuvale kei na vuli ivolanikalou.

• Wasea na kosipeli vei ira na nodra matavuvale kei na itokani.

• Vaqara na yacadra na nodra qase e liu ka vakavakarau mera ciqoma na cakacaka vakalotu ni valetabu ena vukudra.

• Tubu ena kena qaravi vakavinaka na ilesilesi ni Lotu ka vakaitavi ena vuqa tale na madigi e solia na Lotu.

23.3

Nodra Vaqaqacotaki na Lewenilotu Era Sa Lesu Mai

Eso na lewenilotu era digitaka me ra sa kakua ni vakaitavi ena Lotu. “(O ira oqo),” e kaya na iVakabula, “mo ni qaravi koya tikoga, ni dou sa sega ni kila de ra na saumaki mai ka veivutuni ka lako mai vei au ena lomadra taucoko, kau na vakabulai ira, ia dou sa vu ni nodra vakabulai” (3 Nifai 18:32). Na veimalanivosa oqo e baleti ira kece, ena inaki cava ga, e gadrevi me tomani tikoga na nodra qaravi.

O ira na lewenilotu era sega ni taucoko tiko na nodra vakaitavi era na rawa ni lesu tale mai kevaka e kaukauwa na nodra veimaliwai kei ira na lewe ni Lotu. Na noda loloma kei na veitokoni e rawa ni vukei ira me ra ulabaleta na bolebole eso. Me vakataki ira na lewenilotu vou, era gadreva na veitokani, madigi ni veiqaravi, kei na veivakani vakayalo. Na kilai vakamatata ni kedra ituvaki kei na bolebole ena rawa ni vukei keda meda qaravi ira ena yalodei kei na loloma.

23.4

Vakayacora na Bose ni Veivakacokotaki Vakamacawa

Ena veimacawa, sa dau vakayacori na soqoni lekaleka me vakacokotaki kina na sasaga ni kena wasei na kosipeli ka vaqaqacotaki ira na lewenilotu vou kei ira era sa lesu tale mai. Kevaka sa kacivi e dua na iliuliu ni kaulotu ena tabanalevu, ena liutaka o koya na veisoqoni oqori. Kevaka e sega, na lewe ni mataveiliutaki ni kuoramu ni italatala qase e vakatawana na ilesilesi oqo.

Eso tale era sureti e oka kina na:

• Lewe ni mataveiliutaki ni iSoqosoqo ni Veivukei kei na kuoramu ni italatala qase sa lesi.

• Daukaulotu ni tabanalevu

• E dua na ivukevuke ena kuoramu ni bete (se peresitedi ni kuoramu ni ivakavuvuli se dikoni kevaka e sega na bete ena tabanalevu).

• E dua na lewe ni mataveiliutaki ni kalasi ni Goneyalewa qase duadua.

• Daukaulotu tudei.

Na soqoni ni veivakacokotaki vakamacawa e vakanamata ki na nodra gagadre na tamata yadua. Na soqoni oqo e dau kovuta na va na ulutaga oqo:

• Vukei ira vakcava era vakavulici tiko mai vei rau na daukaulotu. Oqo e rawa ni oka kina na vakaitavi ena veivakavulici, vukei ira na tamata me ra cakava ka maroroya na yalayala, ka tokona na lotu ni papitaiso e roro tiko mai.

• Na sala mera vukei kina o ira era se qai papitaiso oti ga

• Na sala mera vukei kina na lewenilotu era sa lesu tiko mai

• Na sala me ra vukei kina na lewenilotu me ra kunea e levu cake na tamata me ra vakavulici.

Na veisoqoni oqo e rawa me vakayacori vakatamata se vakatikitiki. Na veivakacokotaki e rawa talega ni yaco ena veisala tale eso, oka kina na qiri ena talevoni, tex, kei na imeli.

23.5

Veiliutaki ena iTeki

23.5.1

Mataveiliutaki ena iTeki

E tu vei peresitedi ni iteki na idola ena iteki ni kena wasei na kosipeli kei na nodra vaqaqacotaki na lewenilotu vou kei ira sa lesu tale mai. O koya kei rau na nona daunivakasala eratou na veidusimaki raraba yani ena sasaga oqo. Ena vakadeitaka me na veivosakitaki tiko vakawasoma ena bose ni iteki na cakacaka oqo.

Ena veivula, ena veivosaki tiko o peresitedi ni iteki kei na peresitedi ni kaulotu me vakacokotaki kina na sasaga ena kedrau maliwa na iliuliu ni iteki kei na tabanalevu kei ira na daukaulotu tudei. Eso tale e rawa ni tiko kina:

• O iratou na daunivakasala ena mataveiliutaki ena iteki kei na tabana ni kaulotu.

• Lewe ni matabose e cake e lesi

• Peresitedi ni iSoqosoqo ni Veivukei ena iteki

• O ira na daukaulotu era lesi mai vua na peresitedi ni kaulotu.

23.5.2

Komiti ni Veiliutaki ni Qase ena iTeki

Na komiti ni veiliutaki ni qase ena iteki e oka kina na:

• Na mataveiliutaki ni iteki.

• Na mataveiliutaki ni iSoqosoqo ni Veivukei ena iteki.

• Lewe ni matabose e cake e lesi me cakacaka vata kei ira na kuoramu ni italatala qase.

O ira na iliuliu oqo era na veidusimaki ka tokona na mataveiliutaki ni kuoramu ni italatala qase kei na iSoqosoqo ni Veivukei ena cakacaka ni kena wasei na kosipeli kei na nodra vaqaqacotaki na lewenilotu vou kei ira era sa lesu tale mai (raica na 23.6.2). Na veidusimaki e rawa ni vakayacori ena dua na ituvaki vakailawalawa se tamata yadudua. E rawa ni ra sureti na iliuliu ni kaulotu ena tabanalevu me ra ciqoma na veidusimaki oqo.

Me so tale na ka baleta na veibose ni komiti oqo, raica na 29.3.8.

23.5.3

Lewe ni Matabose e Cake

Sa rawa vei iratou na mataveiliutaki ni iteki me ratou lesi ira na lewe ni matabose e cake mera veidusimaki ka tokoni ira na mataveiliutaki ni kuoramu ni italatala qase kei ira na iliuliu ni kaulotu ena tabanalevu. Sa rawa me lesi e dua se sivia na lewe ni matabose e cake me liutaka na sasaga oqo. Ia, o ira kece na lewe ni matabose e cake e tiko na nodra itavi oqo me baleta na tabanalevu kei na kuoramu era sa lesi kina.

23.5.4

Mataveiliutaki ni iSoqosoqo ni Veivukei ena iTeki

Ena ruku ni veidusimaki nei peresitedi ni iteki, na mataveiliutaki ni iSoqosoqo ni Veivukei ena iteki e dusimaka ka tokoni ira na mataveiliutaki ni iSoqosoqo ni Veivukei ena tabanalevu ena nodra itavi ena wasei ni kosipeli kei na nodra vaqaqacotaki na lewenilotu vou kei ira era sa lesu tale mai.

23.6

iLiuliu ena Tabanalevu

23.6.1

Matabisopi

Ena cakacaka vata na matabisopi kei na mataveiliutaki ni kuoramu ni italatala qase kei na iSoqosoqo ni Veivukei ni ra liutaka na sasaga ni tabanalevu ena kena wasei na kosipeli kei na nodra vaqaqacotaki na lewenilotu vou kei ira era sa lesu tale mai. Era na dau veivakasalataki vakawasoma na iliuliu oqo.

Me ratou raica na matabisopi me veivosakitaki ka semati vata na sasaga oqo ena matabose ni tabanalevu kei na bose ni matabose ni itabagone ni tabanalevu. Eratou na railesuva ka vakadonuya talega na matabisopi na ituvatuva ni tabanalevu ena kena wasei na kosipeli kei na nodra vaqaqacotaki na lewenilotu vou kei ira era sa lesu tale mai (raica na 23.6.6).

Ena na veivosaki na matabisopi kei na peresitedi ni iteki me navuci kina se me kacivi e dua na iliuliu ni kaulotu ena tabanalevu (raica na 23.6.3 me baleta na ikuri ni ivakamacala).

Ena veivakatarogi o bisopi vei ira na lewenilotu vou ena yabaki ni bula e veiganiti me dua kina na ivolatara ni valetabu me ra caka papitaiso kina kei na veivakadeitaki vakaveisosomitaki (raica na 26.4.2). Ena vakatarogi ira talega na veitacini ena yabaki e veiganiti mera ciqoma kina na Matabete i Eroni (raica na 38.2.9.1). E kena ivakarau me dau vakayacora o koya na veivakatarogi oqo ena loma ni dua na macawa ni nona vakadeitaki na lewenilotu.

Ena dau veivakacokotaki vata kei ira na iliuliu tale eso na matabisopi me vakadeitaka ni sa tu na madigi vei ira na lewenilotu vou kei ira era lesu mai me ra veiqaravi kina. Na veimadigi vakaoqori e rawa ni vukei ira na lewenilotu oqo me ra tubu vakayalo ka vakila na kaukauwa ni Turaga ena nodra bula. Na veiqaravi e rawa talega ni vukei ira na lewenilotu me ra vakila na reki ka tara cake na veimaliwai voleka vata kei ira tale eso ena tabanalevu.

Na veimadigi oqo ni veiqaravi e dodonu me yavutaki ena veika e gadreva ka rawata na lewenilotu. Ena so na gauna, e veidonui na veikacivi. Vei ira tale eso, ena vinaka duadua na ilesilesi lailai ga.

23.6.2

Mataveiliutaki ni Kuoramu ni iTalatala Qase kei na iSoqosoqo ni Veivukei

Na mataveiliutaki ni kuoramu ni italatala qase kei na iSoqosoqo ni Veivukei ena liutaka na sasaga ni tabanalevu ena veisiga me wasei na kosipeli ka vaqaqacotaki ira na lewenilotu vou kei ira era sa lesu tale mai (raica na 8.2.3 kei na 9.2.3). Ena liutaka na sasaga oqo na mataveiliutaki ni kuoramu ni italatala qase ena vukudra na lewe ni kuoramu ni italatala qase. Na mataveiliutaki ni iSoqosoqo ni Veivukei e liutaka na nodra sasaga na lewe ni iSoqosoqo ni Veivukei. Era na cakacaka vata me liutaki na sasaga oqo vata kei na matabose ni tabanalevu, ena veivakacokotaki nei bisopi.

Oqo na nodra itavi na iliuliu oqori:

• Vukea mera vakauqeti na lewenilotu me ra lomani ira na luve ni Kalou, me ra wasea na kosipeli, ka sureti ira na tamata me ra ciqoma na veivakalougatataki ni iVakabula (raica na 23.1).

• Veivakasalataki vata kei ira na lewe ni kuoramu se iSoqosoqo ni Veivukei me baleta na ivakarau ni kena wasei na kosipeli. Veivosakitaka na sala me ra kunei kina na tamata me ra vakavulica na daukaulotu kei na sala mera tokoni kina na tamata era vakavulici tiko. Veivakasalataki vata baleta na nodra gagadre na lewenilotu vou kei ira era sa lesu mai kei na sala me ra tokoni kina.

• Lesia na turaga kei na marama veiqaravi vei ira na lewenilotu vou kei ira era sa lesu tale mai (raica na 21.2.1). Sa rawa talega vei ira na turaga kei na marama dauveiqaravi mera lesi kivei ira na tamata era vakavulica tiko na daukaulotu (oqo e vakayacori ena veicokonaki vata kei ira na daukaulotu). Kevaka e rawa, me ra lesia na iliuliu vei ira na lewenilotu e tiko vei ira se rawa ni ra tara cake na veitokani voleka kei ira na tamata yadua oqo. Era na veivakayaloqaqataki na iliuliu vei ira na turaga kei na marama veiqaravi me ra solia na loloma kei na veitokoni Vakarisito.

• Solia vei ira na lewenilotu vou kei ira sa lesu tale mai na lotu na madigi eso me ra veiqaravi vakamarama se turaga dauveiqaravi. Na ikuri ni ivakamacala ni dauveiqaravi, raica na wase 21

• Vukea na matabose ni tabanalevu me tauyavutaki e dua na ituvatuva ni kena wasei na kosipeli kei na nodra vaqaqacotaki na lewenilotu vou kei ira era sa lesu tale mai (raica na 23.6.6).

• Liutaka na cakacaka nei iliuliu ni kaulotu ena tabanalevu. Kevaka e sega ni kacivi na iliuliu oqo, ena vakatawana na ilesilesi oqo e dua na lewe ni mataveiliutaki ni kuoramu ni italatala qase (raica na 23.6.3).

Sa nodrau itavi na peresitedi ni kuoramu ni italatala qase kei peresitedi ni iSoqosoqo ni Veivukei me rau lesia e dua na lewe ni mataveiliutaki me veivuke ena kena liutaki na veisasaga oqo. Erau cakacaka vata na lewe ni mataveiliutaki e rua oqo. Erau na tiko ena soqoni ni veivakacokotaki vakamacawa (raica na 23.4

23.6.3

iLiuliu ni Kaulotu ni Tabanalevu

Ena veivosaki na matabisopi kei na peresitedi ni iteki me vakadeitaki na kena kacivi e dua na iliuliu ni kaulotu ena tabanalevu. Kevaka era nanuma me ra vakayacora na veikacivi oqo, me ratou veitalanoa na matabisopi kei ira na peresitedi ni kuoramu ni italatala qase kei na iSoqosoqo ni Veivukei ena kena navuci o cei me kacivi.

Na iliuliu ni kaulotu ena tabanalevu e dodonu me lewe ni Matabete i Melikiseteki. Kevaka e sega ni kacivi na iliuliu daukaulotu ena tabanalevu, ena vakatawana na ilesilesi oqo e dua na lewe ni mataveiliutaki ni kuoramu ni italatala qase.

Na iliuliu ni kaulotu ena tabanalevu e tokoni iratou na mataveiliutaki ni kuoramu ni italatala qase kei na mataveiliutaki ni iSoqosoqo ni Veivukei ena nodratou itavi ni kaulotu. Sai koya talega oqo na nona ilesilesi:

• Cokonaka na nodra cakacaka na lewe ni tabanalevu kei na iliuliu, daukaulotu ni tabanalevu, kei ira na daukaulotu tudei. Oqo e rawa ni oka kina na vakacokotaki ni sasaga ni veivakavulici, lotu ni papitaiso, kei na sasaga ni nodra vaqaqacotaki na lewenilotu vou. E rawa talega ni oka kina na tuvai ni sala eso me ra vukei kina na lewe ni tabanalevu me ra wasea na kosipeli.

• Liutaka na soqoni ni veivakacokotaki vakamacawa (raica na 23.4).

• Tiko ena bose ni matabose ni tabanalevu kevaka e sureti.

• Vukea na matabose ni tabanalevu me vakatorocaketaki ka vakayagataki na ituvatuva ni tabanalevu ena kena wasei na kosipeli kei na nodra vaqaqacotaki na lewenilotu vou kei ira era sa lesu tale mai (raica na 23.6.6).

• Vakasaqara na madigi eso mera vukei kina na daukaulotu tudei me ra vakayacora na nodra inaki ena kena wasei na kosipeli kei na tarai cake ni veimaliwai vata kei ira na lewenilotu. Ena vanua e vakadonui kina, oqo e rawa ni oka kina na kana vata kei ira na lewenilotu (e vinaka vei ira na matavuvale lewenilotu vakatikina kei ira na lewenilotu vou kei ira era sa lesu tiko mai ena gauna e rawa kina; raica na 24.6.2.3).

• Cakacaka vata kei na iliuliu ni valetabu kei na tuvakawa kei na daunivakasala me vukei ira era sa vulica tiko na kosipeli, lewenilotu vou, kei ira era sa lesu tale tiko mai mera vakaitavi ena cakacaka ni valetabu kei na tuva kawa.

23.6.4

Daukaulotu ni Tabanalevu

Era na veivuke na daukaulotu ni tabanalevu vei ira na lewe ni tabanalevu mera vakila na reki ni kena wasei na kosipeli me vaka e vakamacalataki ena 23.1. Era veiqaravi ena ruku ni veidusimaki ni iliuliu ni kaulotu ena tabanalevu se na lewe ni mataveiliutaki ni kuoramu ni italatala qase e vakatawana na itavi oqo. E rawa ni rau vakatura na peresitedi ni kuoramu ni italatala qase kei na iSoqosoqo ni Veivukei o ira na lewenilotu era rawa ni veiqaravi.

Era veivakavulici na daukaulotu ena tabanalevu ena vosa kei na ivakaraitaki ni ivakarau ni nodra lomani ira na tamata, wasea na nodra vakabauta, ka sureti ira na tamata me ra ciqoma na veivakalougatataki ni kosipeli. Era na vukei ira talega na lewe ni tabanalevu me ra qaravi ira na lewenilotu vou kei ira era sa lesu tale mai.

Era na vakaitavi na daukaulotu ni tabanalevu ena soqoni ni veivakacokotaki vakamacawa (raica na 23.4).

23.6.5

Matabose ni Tabanalevu kei na Matabose ni iTabagone ni Tabanalevu

Me dau veivosakitaki wasoma ena bose ni tabanalevu na wasei ni kosipeli kei na nodra vaqaqacotaki na lewenilotu vou kei ira era sa lesu tiko mai. Sa rawa vei bisopi me kerea na peresitedi ni kuoramu ni italatala qase se peresitedi ni iSoqosoqo ni Veivukei me liutaka na veivosaki oqo, ka dodonu me vakanamata ki na tamata yadua. Sa rawa vei bisopi me sureti iliuliu ni kaulotu ena tabanalevu me tiko ena bose ni matabose ni tabanalevu.

E rawa ni veivosakitaka na matabose na ituvatuva ni tabanalevu ena wasei ni kosipeli kei na nodra vaqaqacotaki na lewenilotu vou kei ira era sa lesu tale mai. Era na veivosakitaka talega na ilesilesi ka gadrevi me na vakacokotaki ena veimataisoqosoqo raraba. Na veivurevure me vakaoqo e rawa ni veivuke ena veivosaki oqo:

• Noqu Salatu ni Veiyalayalati. Na ivurevure oqo ena vukei ira na lewenilotu vou kei ira era sa lesu tiko mai ena salatu ni veiyalayalati ena imatai ni 12 ki na 24 na vula ni oti na papitaiso se ni sa lesu tale tiko kina vakaitavi ena kosipeli. Na Noqu Salatu ni Veiyalayalati sa vakarautaki tu ena Valenivola Vakosipeli.

• iVolatukutuku ni Toso ni Salatu ni Veiyalayalati. Era na vakayagataka na ivurevure oqo o ira na iliuliu ni tabanalevu kei ira na daukaulotu tudei me ra vola ka sarava na nodra toso na lewenilotu vou kei ira era sa lesu tale tiko mai kei ira na tamata era vakavulici tiko mai vei ira na daukaulotu. Na Toso ni Sala ni Veiyalayalati sa vakarautaki tu vei ira na iliuliu ni tabanalevu ena app ni iYaya ni Cakacaka ni Lewenilotu kei na iVurevure ni iLiuliu kei Vunivola (VLV). Era rawa ni raica ka wasea na daukaulotu tudei na itukutuku mai na Salatu ni Veiyalayalati ena app ni Vunautaka na Noqu Kosipeli.

Na ikuri me baleta na matabose ni tabanalevu, raica na 29.2.5

Na matabose ni itabagone ni tabanalevu e vakabibitaki kina na (1) itabagone vou kei ira na lewenilotu sa lesu tale mai kei ira (2) na itabagone era vakavulici tiko mai vei rau na daukaulotu. E veivosakitaka tale ga na matabose na sala eso e rawa nira vakaitavi kina na itabagone ena ituvatuva ni tabanalevu ena kena wasei na kosipeli kei na nodra vaqaqacotaki na lewenilotu vou kei ira era sa lesu tale mai. Na ikuri me baleta na matabose ni itabagone ena tabanalevu, raica na 29.2.6

23.6.6

iTuvatuva ni Tabanalevu me Wasei na Kosipeli kei na Nodra Vaqaqacotaki na Lewenilotu Vou kei ira era Sa Lesu Tale Mai

Sa dodonu me tiko ena tabanalevu yadua e dua na ituvatuva rawarawa me wasei kina na kosipeli kei na nodra vaqaqacotaki na lewenilotu vou kei ira era sa lesu tale mai. E rawa ni veivuke na ituvatuva oqo me veidusimaki ki na soqoni, veiqaravi, kei na itaviqaravi. E rawa ni oka kina na ituvatuva kei na vakasama ni:

• Nodra vukei na tamata mera vakila ni ra sa kidavaki ena soqoni kei na itaviqaravi ni tabanalevu.

• Vukei ira na lewenilotu me ra vakila na reki ni kena wasei na kosipeli.

• Nodra tokoni na tamata era vakavulici mai vei rau na daukaulotu.

• Nodra vukei na lewenilotu vou kei ira era sa lesu tiko mai me ra toso vakayalo.

Erau na veivuke na peresitedi ni kuoramu ni italatala qase kei na iSoqosoqo ni Veivukei ki na matabose ni tabanalevu me tauyavutaki na ituvatuva. Ena veivuke talega o iliuliu ni kaulotu ena tabanalevu. Ena railesuva ka vakadonuya o bisopi.

Era na veiliutaki na lewe ni matabose ni tabanalevu ena kena vakayagataki na ituvatuva. Era na ripotetaka na toso ena bose ni matabose ni tabanalevu. Era na vakavouya talega na ituvatuva kevaka e gadrevi.