“24. Te Rekomenteition Ibukiia Mitinare ao te Beku,” Aeniboki ni Kabuta: Ana Ekaretia Iesu Kristo ibukiia Aika Itiaki ni Boong aika Kaitira (2024).
“24. Te Rekomenteition Ibukiia Mitinare ao te Beku,” Aeniboki ni Kabuta: Ana Ekaretia Iesu Kristo ibukiia Aika Itiaki ni Boong aika Kaitira.
Tamnei
a nakonako mitinare
24.
Te Rekomenteition Ibukiia Mitinare ao te Beku
24.0
Kabwarabwaraana
N taai ake rimoa, te Uea e anga te mwioko ni ikotiia Iteraera mai ibuakoia, “botanaomata ni kabaneia, ni bwabetitoia nako nanon aran te Tama, ma te Nati, ma te Tamnei ae Raoiroi.” (Mataio 28:19; taraa naba kibu 20). Te Uea e a tia ni kabooua te mwioko anne ni boong aikai (taraa Reirei ao Berita aika Tabu 39:11; 68: 6–8; 112:28–30). Ni kabane membwa n te Ekaretia a berita n tain aia babetito bwa a na kakoaua iroun te Atua ao ni ibuobuoki nakoia tabeman (taraa Motiaea 18:8–10).
Te beku ibukin te Uea n riki bwa te mitinare bon te tibwanga ae tabu. E uota te kakabwaia ae akea tokina nakon te aomata ao naake a beku ibukin teuanne ke neienne (taraa Reirei ao Berita aika Tabu 18:14–16).
Te weewete n te mition e raonaki ma te katabeaki n reirei te euangkerio, boutokai taabo ni mwakuri n te Ekaretia ke iunite, ke ni beku n te komiunite n te tabo.
E tua te Uea bwa ni kabane ataeinimwaane, ake a tau a na katauraoi ibukin te beku n te mition. Ataeinimwaane aika kaain te Ekaretia, bon tabeia n te nakoanibonga te mwakuri ni mitinarei (taraa Reirei ao Berita aika Tabu 36:1, 4–7).
Te Uea e butimwaiia naba ataeinaine aika a konaa ao n tau, ni beku n te mition ngkana a tangiria. Ibukiia ataeinaine, te mwakuri ni mitinare bon te tai ae tamaroa, ma e bon nakoimi, baireana. Te katauraoi nakon te mition e na kakabwaiaia ataeinnaine bwa tao a iangoa te beku bwa te mitinare ke a na aaki.
Mitinare aika a ikawai a kainnanoaki naba ao a kaungaaki bwa a na katauraoiia ni beku.
24.1
Te Wewete Nakon te Beku
Mitinare n tatabemaniia a weteaki bwa a na buoka Tamara are i Karawa ao Iesu Kristo n Aia mwakuri. Mitinare a tei ibukin Iesu Kristo ao Ana Ekaretia ae kaokaki. Aanga nanoia ni beku ibukin te Uea inanon te mwakuri n tangira ibuakoia Natina. Te anga reirei ao te ibuobuoki n te mition e kakabwaiaia mitinare ao aomata tabeman. (Taraa Mataio 16:25, 22:36–40.)
E karabwabwa nako ana weewete n te mition nakoiai membwa ake iai nanoia ni kan beku, a tau, ao a konabwai. Membwa aikai a kekeiaki ni beku ibukin te Uea ma “nanoia, marurungiia, aia iango ao korakoraia ni kabane.” A karikirakea “te onimaki, te kantaninga, te tangira ae kororaoi ao te tangira.” A teimatoa ni “kaineta aia taratara nakon mimitongin te Atua.” Ngkai a karaoi bwaai aikai, te Uea e na karikiia bwa a tau nakon te mwakuri. (Reirei ao Berita aika Tabu 4:2, 5; taraa mwakoro 1– 7.)
Mitinare a tei ibukin te Uea ao a riai ni weteaki man te kariaiakaki ae eti (taraa Reirei ao Berita aika Tabu 42:11; Taekan te Onimaki 1:5). Te weewete ni beku n te mition e aki toki n nanako mai iroun Te Beretitenti n te Ekaretia. Ibukiia kaara ake mitinare n ibuobuoki, te wewete e kanakoaki mai iroun te titeiki beretitenti.
24.2
Tabeia Mitinare
Te weewete ni beku bwa te mitinare e raonaki ma katabeaki aika onoti. Katabeaki aikai a mwaiti aekakiia. Aki toki n raonaki ma:
Te katabeaki n aron te mitinare n anga reirei ke te mitinare ni ibuobuoki.
Te tabo.
Maanin tain te mwakuri ni ibuobuoki.
Katabeaki nako a kairaki man te kaotioti bwa e na nakoraoi nakon te mitinare ao nakon kainnanoia natin te Atua.
E kona ni bitaki te katabeaki man te kaotioti ae reitinako n ira aron te bibitaki ae riki. Te katabeaki ae e onoti e kakawaki. Ma e ngae n anne, bon te kauoua ni bwai nakon te wewete ni beku bwa te mitinare. (Taraa Reirei ao Berita aika Tabu 80:3.)
24.2.1
Kairake ni Mitinare aika a Anga Reirei
Mitinare aika a kairake a katabeaki bwa a na reirei te euangkerio n raroa ma mweengaia. Katabeaki aikai a karaoaki mairouia Abotoro rinanon te kaotioti. Mitinare aikai a beku iaan ana kairiiri te beretitenti n te mition.
Mwaane aika a tuai n iein aika 18–25 aia ririki a kona ni beku bwa mitinare aika taan anga rerei. Ni bon arona a beku inanon 24 te namakaina.
Aine aika a tuai n iein aika 19–29 aia ririki a kona ni beku bwa mitinare aika taan anga rerei. Ni bon arona a beku inanon 18 te namakaina.
24.2.2
Kairake ni Mitinare ni Ibuobuoki
Mitinare aika a kairake a katabeaki ni beku n te Ekaretia ao n te komiuniti ngkai a maeka ni mweengaia. Katabeaki aikai a karaoaki mairouia Abotoro rinanon te kaotioti. A anganaki koraki ake a tamaroa man tau ibukin te beku n te mition (taraa 24.3.3).
Koraki aikai a rinanon naba te kainibaire ae tii te arona ibukin te katauraoi ao te tau ma naake a katabeaki nakon te mition bwa taan anga reirei. Ni kabane kairake ni mitinare ake a tauraoi a rekomentenaki rinanon te waaki naba aei.
Mitinare ni ibuobuoki a na beku n aia tabo iaan ana kaetieti te mition beretitenti, ma te boutoka n tararua mairouia taan kairiiri n te mition ni ibuobuoki. Te beretitenti n te titeiki e katauraoi boutoka man te ekaretia ake a kainnanoak (taraa 24.7.3).
Man te buoka mairouia aia taan kairiiri n te mition, mitinare ni ibuobuoki n tatabemaniia a na karekea te katabeaki are e kangaraoaki ma nakon aron teuanne ke neienne. Katabeaki akanne a bon boboto naba i aon mwakuri ni ibuobuoki (taraa 24.7.1). Mitinare aikai a beku nakon tokin aia konabwai.
Mwaane aika a tuai n iein aika 18–25 aia ririki a kona ni beku bwa mitinare ni ibuobuoki. Ni bon arona a beku inanon 24 te namakaina.
Aine aika a tuai n iein aika 19–29 aia ririki a kona ni beku bwa mitinare ni ibuobuoki. Ni bon arona a beku inanon 18 te namakaina.
Te mwakuri n te mition ibukiia kairake ni mitinare n ibuobuoki e tuai moa n tauraoi n taabo nako n te aonaba. Ibukin araia taabo are e tauraoi iai te mwakuri ibukiia mitinare ni ibuobuoki n te mition, taraa ChurchofJesusChrist.org/service-missionary. Te webutiaite e katauraoi riki rongorongo iaon te mwakuri irouia mitinare n ibuobuoki n te mition. Taabo are akea iai mitinare ni ibuobuoki, membwa aika kairake a kona ni beku n aron aia konabwai mitinare ni ibuobuoki aika kaara (taraa 24.2.4).
24.2.3
Mitinare Ake Kaara
Membwa ake a tia ni mare ae 40 te ririki ni waerake a kona ni weteaki bwa mitinare kaara aika taanga ngkana akea natiia ae a tararuaia.
Aine ake a tuai ni iein ae 40 te ririki ni waerake a kona naba ni weteaki bwa kaara ni mitinare ngkana akea natiia ae maeka ni mweengaia.
Mwaane aika a tuai n iein ae 40 te ririki ni waerake a kona ni beku bwa te mitinare ae kara. Ma irarikina, a kona ni beku bwa kaara ni mitinare n ibuobuoki. (Taraa 24.2.4.)
Ni kabane mitinare ake kaara a kaungaaki bwa a na kakaeiia aomata n reireiniia ao ni buokiia n tauraoi ibukin te bwabetito. A kona naba mitinare ake kaara n katabeaki bwa a na boutokaia:
Membwa ao taan kairiiri n te aono ao n te tabo.
Aono, ana tabo ni mwakuri te Ekaretia, ao autin te Ekaretia.
Bootaki ake a tabe ma te ibuobuoki.
Mitinare ake kaara ni bon arona a beku inanon 6–23 te namakaina. Naake a beku itinanikun abaia are a maemaeka iai ni bon arona a beku tao inanon 18 te namakaina.
Mitinare ake kaara a aki tuangaki bwa a na mwakuri n aoa aika tii te arona, karaoi mwakuri aika titebo, ke ni karaoa are e kaantaningaaki mai irouia mitinare aika kairake. Ma irarikin anne, aia mwakuri e bon matoatoa. Ao ibukin anne, e riai n rangi n tau marurungiia ni beku. A riai naba n tauraoi ni kaaitarai kainnanoia n te mwane (taraa 24.3.4.2).
Bitiobi, titeiki beretitenti, ao taan kairiiri ake tabeman a tataro mwaaka n rineia bwa antai ae kona ni beku. Bitiobi, ke titeiki beretitenti a kona n intawiu ma membwa aikai n nora aron tauraoia ao ni kaoiia bwa a na katauraoi nakon te beku.
Katabeaki ibukiia mitinare aika kaara a karekeaki man te kaotioti nakoia Abotoro. Taan kairiiri a kona n rekomente aekakin katabeaki aika onoti ibukiia mitinare aika a kara. E ngae n anne, taan kairiiri a riai n aki kamatoaa raoi bwa anne te katabeaki ae a na karekea. Naake a katauraoi a kona ni kaota aekan te katabeaki are a tangiria ma a na kukurei ni butimwaai aekan nako katabeaki.
Irarikin are weteaia ni bon aia uoote ke titeiki n aia tabo, membwa a kona ni beku ibukin te Uea bwa mitinare ni ibuobuoki aika kaara. Mitinare aikai a anga ibuobuoki aika kakawaki n ana tabo ni mwakuri te Ekaretia, kateitei, ao mition (taraa 24.7.1). A maeka ni mweengaia.
Mwaane ao aine ae 26 te ririki ni waerake a kona ni weteaki bwa mitinare ni ibuobuoki aika a kara.
Irarikina, ataeinimwaane aika 18–25 aia ririki ao ataeinaine aika 19–25 aia ririki a kona ni beku n aron aia konabwai mitinare ni ibuobuoki aika a kara ngkana a maeka n te tabo are e aki tauraoi iai te mition ni ibuobuoki ibukiia mitinare aika kairake. A kona naba ni beku ngkana a iein ke a tia ni kaman beku bwa kairake ni mitinare aika taan anga rerei ke mitinare ni ibuobuoki.
Mitinare n Ibuobuoki aika kaara a weteaki iroun aia beretitenti n te titeiki. A beku iaan ana tararua. Mwaitin aia tai ni beku ni katoa wiiki e bon nakon aia konabwai, tauraoin te mwakuri n aia aono, ao te kairiiri man te Beretitentii n te Aono.
Katabeakiia mitinare n Ibuobuoki aika kaara a kariaiakaki iroun aia beretitenti n te titeiki. E anga taeka n reirei ma mitinare ao tabeman ao e tataromwaaka n ukorii kaotioti iaon taian katabeaki nako. E kona n rinanoa SeniorMissionary.ChurchofJesusChrist.org ngkana e bairei katabeaki.
Ibukin riki rongorongo iaoia mitinare n ibuobuoki aika kara, taraa 24.7.
24.2.5
Kabwarabwaraan Tabeia Mitinare
Te taibora ae imwiina e kabwarabwarai aekakin katabeaki ibukiia mitinare.
Kairake ni Mitinare aika taan anga Rerei (taraa 24.2.1)
Kairake ni Mitinare n Ibuobuoki (taraa 24.2.2)
Mitinare aika Kaara (taraa 24.2.3)
Mitinare n Ibuobuoki aika Kaara (taraa 24.2.4)
A weteaki Iroun
Kairake ni Mitinare aika taan anga Rerei (taraa 24.2.1)
Beretitenti n te Ekaretia
Kairake ni Mitinare n Ibuobuoki (taraa 24.2.2)
Beretitenti n te Ekaretia
Mitinare aika Kaara (taraa 24.2.3)
Beretitenti n te Ekaretia
Mitinare n Ibuobuoki aika Kaara (taraa 24.2.4)
Titeiki beretitenti
Anganaki katabeaia iroun
Kairake ni Mitinare aika taan anga Rerei (taraa 24.2.1)
Te Abotoro
Kairake ni Mitinare n Ibuobuoki (taraa 24.2.2)
Te Abotoro
Mitinare aika Kaara (taraa 24.2.3)
Te Abotoro
Mitinare n Ibuobuoki aika Kaara (taraa 24.2.4)
Titeiki beretitenti
A kaokoroaki iroun
Kairake ni Mitinare aika taan anga Rerei (taraa 24.2.1)
Titeiki beretitenti
Kairake ni Mitinare n Ibuobuoki (taraa 24.2.2)
Titeiki beretitenti
Mitinare aika Kaara (taraa 24.2.3)
Titeiki beretitenti
Mitinare n Ibuobuoki aika Kaara (taraa 24.2.4)
Te titeiki beretitenti ke te kauntira
A maeka
Kairake ni Mitinare aika taan anga Rerei (taraa 24.2.1)
N raroanako man te mweenga
Kairake ni Mitinare n Ibuobuoki (taraa 24.2.2)
N te mweenga
Mitinare aika Kaara (taraa 24.2.3)
N raroanako man te mweenga ke n tiku n te mweenga
Mitinare n Ibuobuoki aika Kaara (taraa 24.2.4)
N te mweenga
Te tia kairiri n te Ekaretia
Kairake ni Mitinare aika taan anga Rerei (taraa 24.2.1)
Te beretitenti n te mition ke te beretitenti n te tabo n rongorongon rimoa
Kairake ni Mitinare n Ibuobuoki (taraa 24.2.2)
Titeiki beretitenti
Mitinare aika Kaara (taraa 24.2.3)
Te beretitenti n te mition, tembora, ke te beretitenti n te tabo n rongorongon rimoa; ke Beretitenti n Aono
Mitinare n Ibuobuoki aika Kaara (taraa 24.2.4)
Titeiki beretitenti
Ribooti nakon
Kairake ni Mitinare aika taan anga Rerei (taraa 24.2.1)
Te beretitenti n te mition ke te beretitenti n te tabo n rongorongon rimoa
Kairake ni Mitinare n Ibuobuoki (taraa 24.2.2)
Beretitenti n te mition, rinanon taan kairiiri n te mition ni ibuobuoki
Mitinare aika Kaara (taraa 24.2.3)
Te beretitenti n te mition, tembora, ke te beretitenti n te tabo n rongorongon rimoa; Beretitenti n te Aono; tarekita n te tienta ni kaakawari; ke te manatia n ana tabo ni mwakuri te Ekaretia ke te kateitei
Mitinare n Ibuobuoki aika Kaara (taraa 24.2.4)
Te manatia ni kanakoan katabeaki n te mwakuri n ibuobuoki
Te ririki ae katauaki
Kairake ni Mitinare aika taan anga Rerei (taraa 24.2.1)
18–25 (mwaane) 19–29 (aine)
Kairake ni Mitinare n Ibuobuoki (taraa 24.2.2)
18–25 (mwaane) 19–29 (aine)
Mitinare aika Kaara (taraa 24.2.3)
40 ke are iaona ngkana e mareaki ke ngkana te aine ae tuai n iein
Ira te waaki n te tieminari ke te intitute (ibukiia kairake ao ikawai).
24.3.2
Kakoroa Nanon te Kainibaire n te Kororaoi
Mitinare ake a tauraoi a kekeiaki ni kokororaoiia ibukin raonakiia iroun te Tamnei. Aio e kainanoaki ibukin nakoraoin te mwakuri ni mitinare (taraa Reirei ao Berita aika Tabu 42:13–14). Taum ibukin raonakim iroun te Tamnei e ikotaki ma kaitiakam man te bure (taraa Ereman 4:24; Reirei ao Berita aika Tabu 38:42).
24.3.2.1
Rairannano
Te rairannano ao te kabwarabure bon bwaintangira aika tauraoi nakoia ni kabane natin te Atua. Bwaintangira aikai a kona n reke rinanon mwaakan ana mwakuri ni kamaiu Iesu Kristo. Te rairannano e kainnanoa kamwakuran te onimaki iroun Kristo, ma nanom raoi, ao ni kaawakin tuua. E raonaki ma kaotan am bure ao n aki manga karaoa te bure. Ibukin buure aika a rawawata, e kainanoa te rairannano ni kabwarabure nakon te bitobi ke te beretitenti n te titeiki (taraa 32.3 ao 32.4 inanon te aeniboki aei).
Membwa ake a tangiria ni beku n te mition a riai n rairaki nakon te Tia Kamaiu ngkai a rairii nanoia ao ni katauraoi ni beku. A kona naba n ukori ibuobuoki ni mwamwannano man aia utu ao taan kairiiri n te Ekaretia n te tabo.
Te mitinare are e tauraoi e riai n tia n raira nanona man buure aika kaakaiaki imwaain ae te titeiki beretitenti e kanakoa te rekomente iaon teuanne ke neiene (taraa 32.6–32.8; taraa naba 24.4.4). Te waaki n rairannano e kaairaki ma te tai ae tau ibukin te aomata bwa e na kaotia teuane ke neiene rinanon maiuakinan te raoiroi bwa e karekea tamnein Kristo nakon kabwaraan buure. (taraa Reirei ao Berita aika Tabu 20:37). Te titeiki beretitenti e na marooro ma te Beretitentii n te Aono (ke te Kaitingaun n te Aono are e katabeaki) ngkana iai ana titiraki teuanne iaon mwaanin te tai are kainanoaki ibukin te rairannano.
24.3.2.2
Te Kaotibure Ae Rangi n Rimwi
Te aomata are e karekea te wewete n te mition ke e moana te mwakuri ni mitinare n aki raira nanona man te bure ae kakaiaki e na riai n tiku ni mweengana ke n okira abana. Ni kaeineti nakon te bwai are e riki, teuaanne ke neienne e kona ni beku imwiin ana rairanano (taraa 24.6.3.2).
24.3.3
Marurungin te Rabwata, te Iango ao te Namakin
Te mwakuri ni mitinare bon te kakaewenako. Korakain te rabwata, te iango ao te namakin a kona ni karekea te barannano. Mitinare a aki toki ni mwamwakuri rinanon waaki aika aki taneiai iai. Marurungiia e kona n rotaki man bitakin kanaia, angin te aba, ke tein aron te maeka. Aron waakin aia tai mitinare e rangi ni matoatoa naba. (Taraa Aramwa 17:5; 26:27–28, 30.)
Kairake ni mitinare aika taan anga rerei a riai n nanomatoa ao ni marurung n rabwataia, aia iango, ao aia namakin ni kona ni kaitaraa bwaninin aia tai ni mwakuri mitinare. (Taraa Aia Kainibaire Mitinare n te Riki bwa Ana Reirei Iesu Kristo [2019], 2.4.)
Kairake ni mitinare n ibuobuoki a mwakuri n aia tai ae baireaki nakon bwaninin aia taarena, rabakauiia, ao konabwaia.
Mitinare ake a tauraoi a katauraoiia ni beku man kakorakoraakin marurungin rabwataia, aia iango ao aia namakin. A mwakuri naba ni karikirakea te konabwai ni kona n okira aroia ao n riki n toronibwai.
Taan kairiiri a riai n anga marooro aika aki ekaanako ana namakin temanna are e tauraoi iaon kakaewenako ni marurungin teuanne ke neienne imwaain kanakoan te rekomente. Tabeman a na riai ni karekei buoka mai irouia taan rabakau ibukin kuakua ibukin kakaewenako ni kaineti ma marurungiia (taraa 31.3.6). Naake a tauraoi ake iai bwainaoraki aika a anganaki a riai n teimatoa n anai n ana tai ni mwakuri teuanne ke neienne n aron tuangakina mai iroun te tia rabakau n te kuakua.
Tamnei
a anga reirei mitinare nakon te utu
24.3.4
Te Mwane
Te anga nano n te mwane bon mwakoron te mwakuri ni mitinare (taraa Mareko 1:17–18; Aramwa 15:16). Mitinare ao aia utu iai moan katabeaia ni karaoi anganano n te mwane nakon te mwakuri ni mitinare. A riai n karaoi katauraoi aika riai ao n anganano. A riai n tau n aia kareke mwane ni boni kona ni kaitarai kabane mwane ake a tia n anga nanoia iai.
24.3.4.1
Mwanenakiia Kairake ni Mitinare ake a Beku n Raroa ma Mweengaia
Kairake ake a tauraoi ake a tia ni katauraoiia ni kaineti nakon korakoraia a riai n aki katokaki man te mwakuri tii ibukin te mwane. Naake a kainnanoa te buoka n te mwane ni kaitarai anganano n te mwane ake a bon riai a kona ni karekei mai irouia aia utu ao raoraoia.
Ngkana e teimatoa kainnanoana, te bitiobi ke te titeiki beretitenti a kona ni butiia membwa n te uoote ke te titeiki ni karaoi anganano nakon te mwane ni mitinare n te uoote.
Kataumwane n te iunite n te tabo ao mwanen te aki mamatam a na aki kabonganaaki.
Motinnano n te Angamwane ni katoa namwakaina. Kairake ni mitinare aika taan anga rerei ao aia utu a anga te mwaiti ae baireaki ni katoa namwakaina ni buoka kaitaraan te kabanemwane n ana burokuraem te mitinare. Te mwaiti ae kateaki bon teuana man kawai aika uoua:
Mitinare ake man aaba tabeua a ira buakon te burokuram ae ti tetikina mwaitin te anganano iai. Aio e nanonaki bwa te mwaiti are e kabwakaaki bon titebo mwaitina ibukiia mitinare nako n aki taraaki bwa e mwakuri iia teuanne ke neienne. Te mwaiti ibukin bwakamwane a kaotinakoaki n ana etekuata te Ekaretia. Taan kairiiri a kona n reitaki ma te Tabo ni Mwakuri ni Mitinare (taraa 24.9.3) ke aobitin te aono ibukin araia aaba ake a mena n te burokuraem aei ao te mwaiti ni kabwakamwane ae tabangaki.
N tabeua aaba, te bitiobi, titeiki beretitenti, mitinare, ao utu a uaia ni marooro iaon mwaitin te bwakamwane n anganano ni katoa namakaina. Te bitiobi ao titeiki beretitenti a tarai kainibaaire man te Beretitentii n te Aono. A kaungaa te anganano n anga mwane ao te toronibwai ae boboto i aon aroaro are e rinanona te mitinare ao ana utu teuanne ke neienne. A boraoi i aon te mwaiti n annganano ao a rekootinna iaon ana rekomente te mitinare. Te mitinare ao ana utu a motinanoia bwa a na kakabwaka te mwaiti anne. Tabeman a kona naba n angamwane nakon te mwaiti aei ti ngkana a maeka n te aba are e maeka iai te mitinare (taraa “Mwaane Ibukiia Mitinare n te Uoote” ae imwiina n te tiekition aei).
Angamwane a kabwakaaki nakon te kataumwane ni mitinare n te uoote. Bitiobi a kakoauaa bwa te mwane a kabwakaaki ni katoa namakaina. Te mwane are e riaon te mwaiti are e kakabwakaaki e riai n aki kabwakaaki imwaain taina. Mwaane ake a kabwakaaki imwaain taia a aki kona ni kaboaki mwiia ngkana e oki ni waekoa te mitinare nakon abana.
Kabanemwane n tain te mwakuri. Ni katoa namwakaina, te kairake ni mitinare e karekea te mwane ae tau man te mition ni buokia ibukin te amwarake, bao ni mwamwananga, ao boon bwaai ake e kainnanoi tabeua. Mwaane aikai a tabu. Mitinare a kabonganai ti ibukin bwaai ake a irekereke ma te mwakuri ni mitinare. A riai n aki kabonganaaki ibukin kabanemwane nakon are a tangiria, karinimwane, ke ni kaokaki nakoia kaain aia utu ke tabeman. Mitinare a kaoki nakon te mition mwaane ake aki kainanoia.
A kabonganai bon oin aia mwane mitinare ni kaitarai kabanemwane riki tabeua. Kabanemwane ake ibon ibukiia e riai n bon tau mwaitina. (Taraa Kainibaire ibukiia Mitinare n riki bwa Ana Reirei Iesu Kristo,, 4.8.)
24.3.4.2
Mwanenakiia Mitinare ake a Kara ake a Beku n Raroa ma Mweengaia
Motinnano n te Angamwane ni katoa namwakaina. Mitinare ake a kara ake a beku n raroa ma mweengaia a kakabwakaa aia angamwane nakon te mwane ibukiia mitinare n aia uoote ni katoa namwakaina. Angamwane aikai a buoka kabwakaan boon auti ao kabanemwane n te kaa (taraa naba “Kabanemwane riki tabeua” imwiina n te tiekition aei). Te mwaiti are anga ibukin te auti e boboto i aon ikotan boona inanon te mition nako. Te mwaiti aikai a kona n raka ke ni kee iaan nakon are katauraoia te Ekaretia ibukin boon auti.
Mitinare ake a kara man aaba ake a ira buakon te burokuraem ni mwaitin te angamwane ae ti tearona e anga te mwaiti are e katauaki are e koreaki inanon te bakete n tain weteaia.
N aaba tabeua, te bitiobi, titeiki beretitenti, ao mitinare a uaia ni marooro iaon mwaitin te bwakamwane n anganano ni katoa namakaina. Taan kairiiri a kaungaa te anganano n te mwane ni boboto i aon aroaroia nako mitinare. A boraoi i aon te mwaiti ao a taua mwiina i aon ana rekomente te mitinare. Te mwaiti aei e na riai ni kaan ma te mwaiti are e kateaki ibukiia mitinare aika kara iroun te Beretitentii n te Aono (n rinanoakina ma te Tabo ni Mwakuri ibukiia Mitinare). Tabeman ake a maeka n te aba are e maeka iai te mitinare e kona naba n anga nakon te mwaiti aei.
Bitiobi a kakoauaa bwa te mwane a kabwakaaki ni katoa namakaina. Te mwane are e riaon te mwaiti are e kakabwakaaki e riai n aki kabwakaki imwaain taina.
Kabanemwane riki tabeua. Irarikin anganano n angamwane n te namwakaina, are e buoka kabwakaan boon auti ao kaa, mitinare aika a kara a riai ni bon kaitarai kabanemwane riki tabeua, ni ikotaki ma te amwarake, bwaai ake a kainnanoi, ao boon bwaan te kaa.
24.3.4.3
Mwanenakiia Mitinare ake a Beku ni bon Abaia
Mitinare ake a beku ni bon mweengaia bon tabeia kabanemwane ni kabane ibukin kainnanoia. Naake a kainnanoa te buoka n te mwane a kona ni karekei mai irouia aia utu ao raraoia. Kataumwane n te uoote ke titeiki ibukia mitinare a aki kona ni kabonganaaki ibukin bwaai ake a irekereke ma waakin te mition.
24.3.4.4
Intiuarenti ibukin te Aoraki ao Kabanemwane
E korakora kaungaakiia ni kabane mitinare bwa a na kateimatoai intiuaranti ibukin bwain aoraki n aia tai ni mitinare ngkana e riai.
Mitinare ake a beku ni bon abaia a riai ni katauraoi boon aia intuarenti ibukin te aoraki ao kamanomano riki tabeua. Mitinare ake kaara ake a beku n raroanako ma mweengaia a riai naba ni katauraoa te kamanomano aei. Mitinare ake kaara ake a na beku itinanikun abaia a kona naba ni karekea te intuarenti rinanon te Senior Service Medical Plan.
24.3.5
Tabeia Kaain te Utu ao Taan Kairiiri ni Katauraoaia Mitinare
Kaain te utu, bitiobi, ao taan kairiiri tabeman a buokiia kairake n tauraoi ni beku n te mition. Bitiobi a kaoia ataeinimwane n tatabemaniia bwa a na mitinare, n ai aroia naba ataeinaine ake iai nanoia ni kan beku.
Buokiia n riki bwa membwa ni mitinare aika nakoraoi n tibwaa te euangkerio imwain ae a karekea te wewete ni beku.
Katauraoi taai ibukiia bwa a na beku ao n anga reirei.
Baairea aia tai n raoniia mitinare ake a bwanin aia tai.
Kaoiia mitinare ake a mwakuri ngkai ke tabeman ake a tia ni beku n te mition n tibwaa aia taneiai n reirei ao ni beku.
Tangiriia ao kaungaia n tatabemaniia nako ni katauraoi ni beku n te mition.
Kaungaia bwa a na karaka riki aia tai n tataro ao ni kamatebwai koroboki aika a tabu, riki ana Boki Moomon.
Bairea te kooti iaon te katauraoi nakon te mitinare.
Kaain te utu ao taan kairiiri a kaungaia membwa aika a kara ni iangoa te beku bwa mitinare aika a kara. Aio e kona n ae ko buokiia n:
Rinanon aia konabwai ni marurungiia ao n aia kataumwane bwa a na beku n te mition, tao n ae e raroanako ma mweengaia ke n tiku ni mweengaia.
Rinei waaki ni mitinare ake a kona ni karaoi.
N riki bwa membwa ni mitinare aika nakoraoi n tibwaa te euangkerio imwaain ae a karekea te wewete ni beku.
Kaain te utu ao taan kairiiri a buokiia ni kabane ake a tauraoi ni motinnanoia ni iriira aia kainibaire mitinare. A kaungaia naake a tauraoi ni kamatebwaia aia aeniboki mitinare ibukin kainibaaire are e kaineti nakon tibwangaia are a na kona ni katabeaki iai:
Ibukiia kairake ni mitinare ni ibuobuoki: Kainibaire ibukiia Mitinare n riki bwa Ana Reirei Iesu Kristo—Mition ni Ibuobuoki
Ibukiia ni kabane mitinare: te tiekition “Use Technology Righteously” inanon mwakoro 2 n Taetaekina Au Euangkerio.
24.4
Rekomentenakiia Mitinare
Tabeman ake a tauraoi a tia n reitinako n aki maeka n te Uoote tao n te maan ae teuana te ririki. N aekaki aikai, te bitiobi e moantaai n reitaki inanon waakin te rekomente ma ana bitiobi te aomata n ana uoote are mai imwaaina.
24.4.1
Rinanoan te Marurung
Te mwakuri ni mitinare e kainnanoa korakoran te rabwata, n te iango, ao n te namakin. Ni kabane naake a tauraoi a kantaningaaki bwa e na iai te tia rabakau man te kuakua ae rinanon tauraoia iaon marurungiia.
Mwiin te tutuo iaon marurungiia a rinanoaki n aobitin te aono ao te Tabo ni Mwakuri ibukiia Mitinare. N tabetai, te raraoma iaon marurungin temanna e kona n roota ana konabwai te aomata ni beku n ae raroanako ma mweengana. Ngkana e reke anne, e kona ni kaokaki te rekomenteition ma te kaetieti bwa e na kangaa teuanne ke neienne ni katamaroaa tauraoina ni marurungina.
24.4.2
Te Booma ibukin te Intawiu ao te Rekomenteition
Te bitiobi ao te titeiki beretitenti a karaua ni karaoa, te kakae ma te tamnei, ao te intawiu ae kaunganano ma naake a tauraoi n tatabemaniia. A kabongana te titiraki n te intawiu n te rekomenteition ibukiia mitinare. A marooro ma are e tauraoi n ana:
Koaua iaon Iesu Kristo ao Ana euangkerio ae kaokaki (taraa 24.3.1).
Kakoroa nanon te kainibaire n te kororaoi (taraa 24.3.2).
Te katauraoi n te marurung n te rabwata, te iango ao te namakin (taraa 24.3.3).
Te bitiobi ao titeiki beretitenti a rinanoi naba rongorongo iaon te kainibaire n te katauraoi n te kororaoi ao te marurung n te Onrain Mitinare Rekomenteition Tititem. Ngkana te titeiki beretitenti n te United State ke Canada iai aia titiraki, e na reitaki ma te Tabo ni Mwakuri ibukiia Mitinare (taraa 24.9.3). N taabo ake tabeua, e reitaki ma aobitin te aono. Te bitiobi ao te titeiki beretitenti a aki karinii riki kainibaire ibukin te karinrin. Ke ni bitii titiraki n te intawiu.
Rongorongo ake iaon te booma n rekomenteition a anga ae mwaiti nakon te waaki ae kairaki n te kaotioti n te wewete nakon te mition. Taan kairiiri a na kakoauaa bwa ni kabane rongorongo ake a tangiraki a bane ni kaotaki.
Ngkana te bitiobi ke te titeiki beretitenti iai aia nano kokoraki iaon te aomata are e tauraoi ni kakoroa nanon te kainibaire ibukin te kororaoi ke iaon tauraoin teuanne ke neienne ni marurungina, a uaia ni maroroakinna ma te aomata anne. Man ana kariaia te kairake are e tauraoi, a kona naba n uaia ni marooro ma ana karo teuanne ke neienne. Te bitiobi ao te titeiki beretitenti a aki kanakoa te rekomente ni karokoa e a tia te aomata anne n raira nanona man te bure ae kakaiaki (taraa 24.3.2.1). Ni kaineti ma marurungin te aomata anne n rabwatana, ana iango, ke n ana namakin, a kona ni maroroakina te kawai naba n anganakina katabeana bwa te mitinare ni ibuobuoki.
Ni keiti aika kataweaki ngkana akea te bitiobi ke te titeiki beretitenti, e kona ni kariaia temanna ana kauntira ni karaoi intawiu aikai.
N taian mwakoro, te mition beretitenti ke te kauntira are e mwiokoaki e karaoa te intawiu ao n rekomente te mitinare are e tauraoi. Te beretitenti n te mwakoro e aki karaoi intawiu aikai.
Tamnei
a taetae mitinare nakon te mwaane
24.4.3
Kanakoan Taian Rekomentaition
Te titeiki beretitenti e kona ni kanakoa te bubuti i aon taekan te kairake ni mitinare ae tauraoi inanon 150 te bong imwaain are bon ana tai n nako teuanne ke neienne. Te titeiki beretitenti e kona ni kanakoa te rekomentation ibukin te mitinare are e kara ae tauraoi inanon ruaiwa namwakaina imwaain are bon ana tai n nako teuanne ke neienne. Te tai raoi n nako e riai n riki ngkana a bane raoi ni koro nanon bwaai aika:
Te aomata e a tia ni koro ana ririki are e katauaki ibukin te mwakuri.
Te aomata e a tia ni kamatoaki bwa te membwa n te Ekaretia n te maan ae teuana te ririki.
Te aomata e a tia ni kabanea ke e a aikoa reirei n te moanrinan, te kauarinan, ke reirei ae titebo ma akanne. (Aio are e tii kaeineti nakoia kairake ake a tauraoi ni mitinare are a koro 19 aia ririki ni bwakara raoi aia namwakaina.)
Kairake ni mitinare ake a tauraoi ao aia titeiki beretitenti a baireia bwa ningai ae te titeiki beretitenti e riai ni kanakoa te rekomentation. A kona ni kabonganaa te Submission Planning Tool ao te Mission Release Date Planning Tool ibukin buokaia.
Te rekomenteition ibukiia mitinare ni bon arona e kanakoaki rinanon te uoote ao titeiki. Bitiobi n te uoote are e mena iai te kairake n ikawai ae tuai iein ae raroanako ma ana uoote, e kona ni waakina karaoan te rekomenteition ibukin te mitinare. A riai moa n reitaki ma te bitiobi are man ana uoote ni mweengana. Te uoote are man mweengana e riai ni koreaki bwa te uoote ae e na mwanenna.
24.4.4
Naake Aki Kona ni Beku bwa Mitinare aika a Bwanin aia Tai
N tabetai te membwa are e tangiria ni kan beku ao e kainnanoaki ibukin te mwakuri ni mitinare n aki weteaki n aron are mitinare n anga reirei ke mitinare ni ibuobuoki. Aio e na riki tao man kangaanga nakon marurungina, n aki kakoroa nanon te kainibaire n te kororaoi, kangaanga iaon te tua, ke tabeua riki bwaai ae e rinanona. Te bitiobi ao te titeiki beretitenti a na kaota aia tangira ao aia kakaitau ibukin tauraoin te membwa ni kan beku. Taan kairiiri a na uotirake titiraki nakon te Missionary Department at 801-240-2179 ke Missionary.Prefield@ChurchofJesusChrist.org.
Te titeiki beretitenti ao te bitiobi a kaungaa te membwa ni waaki rake iaon kawain te berita n riki bwa ana reirei Iesu Kristo i nanon nako maiuna. A kaungaa naba ukoran bwaai aika a kakawaki ae a na kakoroi nanoia, n aron te reirei ke te mwakuri ibukiia membwa aika kairake.
24.5
Imwiin Karekean te Wewete nakon te Mition
Mitinare aika tibwa weteaki a kaungaaki bwa a na wareka ke ni manga wareka riki Ana Boki Moomon imwaain ae a nako ni mitinare. A ira ana taeka n reirei te Uea Beniamina n “taratarai ngkami, n ami iango, ao ami taeka, ma aroaromi” (Motiaea 4:30).
A waekoa ni kaeka nakon kaetieti ake a roko ma te wewete. A kamatebwai reirei ao moan reirei inanon koroboki aika tabu ao inanon Tataekina Au Euangkerio, giving emphasis to mwakoro 3. A riai naba n rinanoa te boki ae uarereke Adjusting to Missionary Life ke Adjusting to Service Missionary Life: Resoure Booklet. Ngaiia ao kaain aia utu a riai naba ni kamatebwaia aron te tabo are a na beku iai.
Kaain te utu ao taan kairiiri a boutokaia mitinare n mwakuri aikai. A katuruturua kakawakin karaoan ae raoiroi ao n teimatoa n tau ibukin te Tamnei.
24.5.1
Entaumente n te Tembora ao Mwakuri n te Tembora
Mitinare aika a boou a kaungaaki ni karekea aia entaumente n te tembora n te tai ae waekoa ao rin n te tembora ni kamwaita rorokoia n aron are a konaa (taraa Reirei ao Berita aika Tabu 43:15–16; 105:33). Aio are e kaeineti nakoia mitinare n anga reirei ao nakoia mitinare ni ibuobuoki ngkana e angaraoi n aroaroia nako. Ibukin rongorongona ni karekean te entaumente, taraa 27.2.
Mitinare ake a tibwa weteaki ake a tia n entaute a kona ni beku bwa taan mwakuri n te otenanti n te tembora imwaain ae a moana te mwakuri ni mitinare ngkana e konaa (taraa 25.5).
24.5.2
Bootaki n Toa
Te bitiobiriki e kaoia mitinare aika a tibwa weteaki bwa a na taetae n tain bootakin te toa imwaain moanakin aia mition. Aio are bon aron te bootaki n toa are e kakaraoaki. E riai ni boboto iaon te toa ao te Tia Kamaiu. Te mitinare e riai ni kaoaki bwa e na taetae iaon Iesu Kristo, Ana euangkerio ae kaokaki, ao te kimwareirei n tibwaan te euangkerio ao ni beku ibukiia tabeman.
Ana utu te mitinare ao raoraona ni bon arona aki kaoaki bwa a na taetae. Te tai are e bon bwainaki n te bootaki n toa e na aki kabwaabwakaki.
Membwa ao taan kairiiri a riai n totokoi waaki ake a kona ni kakerikaaka aron tabun te wewete ni mitinare ke ni karaoi kabanemwane aika aki riai. Te katooto, a riai n aki:
Boretiia te burokuraem ni bootakin te toa ae onoti.
Katea te rain ni butimwai imwiin te bootaki n toa.
Ni karaoi kaukuuki nakon auti, ma bon ti te botaki n te utu. Ngkana e karaoaki te botaki n te utu, te kaetieti iaona bwa e na aki untaba ma taian bootaki n te Tabati.
24.5.3
Kaokoroaia Mitinare
Te titeiki beretitenti e kaokoroiia mitinare n tatabemaniia n te tai are e a uakaan ana tai n nako teuanne ke neienne nakon ana mition. Ni keiti aika kataweaki ngkana akea te titeiki beretitenti, e kona ni kariaia temanna ana kauntira ni karaoa kaokoroakia mitinare. E kona naba n tibwaa nako te katabeaki ibukin kaokoroaia mitinare ni ibuobuoki aika a kara nakon te kauntira.
Te mition beretitenti ke ana kauntira e kaokoroia mitinare ake a weteaki man mwakoro inanon ana mition. Te beretitenti n te mwakoro e aki kona ni kaokoroia mitinare.
Te tari are e na beku n raroanako ma mweengana e na riai ni kaman karekea te Nakoanibonga ae te Merekitereka imwaain kaokoroana bwa te mitinare. Te tari are e na beku bwa te mitinare ni ibuobuoki e riai ni iai irouna te Nakoanibonga ae te Merekitereka ngkana e riai ni kaineti nakon te bwai are e rinanona. Ibukin kaetieti n te katabu nakon te aobiti n te Nakoanibonga ae te Merekitereka, taraa 18.10.
Tabeua te tai imwaain kaokoroan te mitinare, te titeiki beretitenti ke te kauntira are e mwiokoaki e intawiuna teuanne ke neienne. Ngkana te mitinare e aaki kakoroa nanon te kainibaire n te kororaoi ke ngkana iai bitaki iaon marurungina are e na roota mwakurina ni mitinare, teuanne ke neienne e na aki kaokoroaki. Te titeiki beretitenti e reitaki ma Aobitin te Tabo ni Mwakuri ibukiia Mitinare (taraa 24.9.3) ke aobitin te aono ibukin kairakina.
Te kaokoroaki e riai n riki bwa te bwai ae onoti ae e rinanona temanna. A kona n iri kaain te utu ao raoraona aika e rangin ni kinaiia. Te titeiki beretitenti e buokiia ni kamataataia ao n namakina tabun ao kakawakin te wewete n nako ni beku bwa te tia tei ibukin Iesu Kristo ao Ana Ekaretia ae kaokaki.
Te kaokoroaki ao kakabwaia ake a taekinaki a riai n aki raweaki. Ma irarikina, e kaungaaki te mitinare bwa e na korei n oin ana tienoo te taneiai anne ao n taui mwiin tabeua mwakoron te kakabwaia ake a rangi ni bongana.
Te titeiki beretitenti e kabwarabwaraa bwa te aomata e riai n irii kainibaaire ibukiia mitinare imwiin kaokoroana.
Kaokoroan te mitinare bon ibukin te wewete ibukin te beku, tiaki ibukin te katabeaki ae onoti ibukin te mitinare. Ngkana e bitaki katabeakin te mitinare, teuanne ke neienne e aki manga kaokoroaki. Ngkana e kamotirawaki te mitinare ao imwiina e a manga kariaiakaki ni mwakuri (taraa 24.6.3.2), teuanne ke neienne e manga kaokoroaki riki bwa te mitinare.
24.6
Te Beku n Raroanako man te Mweenga
24.6.1
Te Mwananga nakon te Tabo ni Mwakuri n te Mition
Te Ekaretia e kabwakaa te kabanemwane ni mwanangan te mitinare nakon ao man aia tabo ni kataneiai mitinare (MTC) ao nakon katabeaia inanon te mition. Te Ekaretia e kabwakai naba kabwanemwane aikai ibukiia mitinare ake a kara ake a beku n raroanako ma mweengaia n te maan ae riaon teuana te ririki.
Ana utu ni kaan te mitinare a kona n nikiria n te MTC. Ma, a bon aki kantaningaaki bwa a na karaoia. N te MTC akea iai te bootaki ibukiia utu ibukin taeka ni karaaure nakoia aia mitinare.
Ibukin te tararua n te tabo ni wanikiba ao bukina riki tabeua, te utu ao tabeman a aki kaungaaki bwa a na kaitibo ma te mitinare n te marae ngkana a kitana te MTC mitinare nakon aia mition.
Tamnei
taanga ni mitinare a reireiniia aine
24.6.2
Inanon te Tabo ni Mwakuri
24.6.2.1
Katukaia Mitinare n te Tabo
Beretiteinti n titeiki ao mition a maroroakina aron kainnanoakiia mitinare n uoote ao mwaanga aika onoti. E aki kantaningaaki bwa mitinare a na katabeaki n taian iunite nako. Tabeua iunite e kona ni iai ae e raka iaon teuana te kambaniontibu iai. Te mition beretitenti e bairea aron neia mitinare.
24.6.2.2
Aia Mwakuri Membwa ao te Komiunite
Beretiteinti n titeiki ao mition a maroroakinna bwa a na kanga mitinare ni katauraoa te mwakuri nakoia membwa ao te komiunite. A kona ni kabongana JustServe.org n te tabo are e tauraoi iai.
24.6.2.3
Te Auti, Amwarake, ao Bao ni Mwamwananga
Beretitenti n titeiki ao mition a baireia ngkana ke a na kanga membwa n te tabo ni katauraoa te auti ao te amwarake ibukiia mitinare. Karekean te auti ke te amwarake e na aki karawawataia membwa n te tabo.
Membwa a aki kantaningaaki bwa a na katauraoi ni katoa tai bao ibukiia mitinare, naake a reireiniia, ke naake a tibwa tia ni bwabetitoaki.
Te Beretitentii n te Aono e kona n anga te kairiiri ibukin katauraoan auti, amwarake, ao bao ibukiia mitinare n te aono.
Bwaai aika aki bati n riiriki, mitinare ake a beku n raroanako ma mweengaia a kona n anganaki katabeaia ni beku n nakoa n te mwaanga. Ngkana te mwaanga e mena inanon te titeiki, te mitinare e kaokoroaki iaan ana kairiiri te titeiki beretitentii, man ana kariaia te mition beretitenti.
Ngkana te mwaanga e mena inanon te mwakoro, te mitinare e aki kaokoroaki. Te kariaiakaki ni mwakuri inanon te iunite are e mena iaan te mition e bon karinaki n tain te kaokoroaki bwa te mitinare. Ngkana taian elders a karaoi mwakuri are e kainnanoa te kiing n te nakoanibonga, a karaoia iaan te kariaia are anganaki mai iroun te mition beretitenti.
24.6.2.5
Karekean te Kariaia ni Boutokaia Tabeman n te Mwane ke te Reirei ke te Mwananga nakon te Aba Teuana
Mitinare ao aia utu a riai n aki katauraoi buoka n te mwane ibukiia naake a maeka n te tabo are e beku iai te mitinare, ni ikotaki ma boutoka n te mwane ibukin te reirei. Ke mitinare ao aia utu a riai n aki kabwakaa te mwane ibukin te aomata are e tangiria ni mwaing nakon aaba ake tabeua (taraa 38.8.19).
24.6.2.6
BwainAoraki
Mitinare a katabeaki ni bon karekei bwai n aoraki ake a kainnanoi. Kaain te utu ke tabeman a riai n aki kanakoi ke n nikirii bwai n aoraki nakoia mitinare. Ngkana te bwai n aoraki e aki tauraoi n te mition, te mitinare e marooro ma te mition beretiteinti.
24.6.2.7
Maten ana Utu ni Kaan te Membwa
Ngkana e mate ana utu ni kaan te mitinare, te mitinare anne e kona n rineia bwa e na oki nakon mweengana tabeua te tai ibukin te taunimate. Ma irarikina, te mitinare e aki toki ni bon arona e reireinaki bwa e na tiku n ana tabo ni mwakuri. Ngkana e kona, teuanne ke neienne e kona ni mataku n rawean te taunimate rinanon te intanete ae maiu.
Ngkana te mitinare e rineia bwa e na oki nakon mweengana ibukin te taunimate, te mition beretiteinti e reitaki ma te Tabo ni Mwakuri ibukiia Mitinare.
24.6.2.8
Membwatibu Rekooti ao Kabwianibwai
Ana uoote ni mweengana te mitinare e taua te membwatibu rekooti. Te uoote ni mweengana e taua naba mwiin ana kabwianibwai teuane ke neiene. Mitinare a aki kabwaka aia kabwianibwai man te mwane ni buoka are a karekea man te mition. Ma e ngae n anne, a kabwaka aia kabwianibwai ngkana iai ae bon oin aia karekemwane.
24.6.3
Okiran Mweengam Man te Mition
24.6.3.1
Okiran Mweengam n te Tai Raoi are e Baireaki
Mitinare ao kaain aia utu a riai n aki bubuti te moantaai ke kanaanauan te mwakuri n nakon angaraoina iroun te mitinare.
Kairake ni mitinare a riai ni mwananga ni kaineti n okira mweengaia man aia mition. Mwamwananga riki tabeua a kona ni kariaiakaki tii ngkana e raonaki te mitinare iroun temanna te karo ke te tia kaawakinna.
Mitinare a aki kainaomataaki ni karokoa a kawara aia titeiki beretitenti. A irii kainibaire ibukiia mitinare ni karokoa te tai anne.
24.6.3.2
Okiran Mweengam ni Moantaai
Tabeman mitinare ake a anga reirei a kamotirawaaki ni moantaai ibukin marurungiia, kororaoia, ke tabeua riki bukina. Bitiobi ao titeiki beretitenti a anga te boutoka ae onoti nakoia mitinare aika a oki aikai. Taan kairiiri a buokiia ni mwakuri ni kaoka marurungiia ke n oki nako ni mwakuri ngkana e konaa.
Ibukiia mitinare ake a tauraoi ni manga oki ni mwakuri, te titeiki beretitenti e reitaki ma te Tabo ni Mwakuri ibukiia Mitinare ni bubuti taekan aio (taraa 24.9.3). Tabeman mitinare ake a manga oki ni mwakuri a kona ni manga bitaki katabeaia nakon te mition n anga reirei ke nakon te mition ibukin te ibuobuoki.
Ngkana e aki riai te manga oki ni mwakuri, taan kairiiri a kaungaa te membwa ni waaki rake iaon kawain te berita bwa ana reirei Iesu Kristo i nanon nako maiuna. Taan kairiiri a kaungaa naba ukoran bwaai aika a kakawaki ae a na kakoroi nanoia, n aron te reirei ke te mwakuri ibukiia mitinare aika kairake.
Tamnei
tamneiia mitinare
24.7
Mition ake Ibukin te Ibuobuoki
24.7.1
Kaotakin Mwakuri ibukiia Mitinare ni Ibuobuoki
Ibukiia mitinare n ibuobuoki aika kaara, te bitiobi, te titeiki beretitenti, ao mitinare a ikotaki ni marooro ni noorii aanga ni mwakuri n te tabo ake a tauraoi ibukin te beku.
Ibukiia kairake ni mitinare n ibuobuoki, taan kairiiri n te mition ibukin te mwakuri n ibuobuoki a noorii aanga ni mwakuri ni ibuobuoki aika riai. Aia karo ke taan tararua ibukiia mitinare a na ira te marooro.
Te mwakuri ni ibuobuoki e kona n ae e bon karaoia te aomata ke man te tabo ae raroa ni kabonganakin bwaai n rabakau aika boou. Taan kairiiri a kona ni kabonganai bwaai n ibuobuoki n aron aikai ni kakaai rongorongo iaon mwakuri aika a kona ni karaoaki:
Mitinare ni ibuobuoki a maeka ni bon oin mweengaia ke ma kaain te utu ake a kariaiakaki man Aobitin te Mition ni Ibuobuoki. A katauraoi ke ni bairea aron baoia nakon aia tabo are a na karaoa iai te mwakuri n ibuobuoki ngkana e kainanoaki.
Mitinare ni ibuobuoki aika kairake a riai n aki kabanea te tairiki ni maeka n aia auti mitinare ake anga reirei.
24.7.3
Te Kataneiai ao Te Tararua
A kataneiaaki ao n tararuaaki taian mitinare ni ibuobuoki te tabo are a na beku iai. A karekei kairaia n te bong teuana ma teuana mai iroun te tia kairiiri n te mition ni ibuobuoki, buoka ao kataneiai i aon nakoaia mairoun taan kairiiri mition ni ibuobuoki (ibukiia kairake ni mitinare n ibuobuoki) ke te manatia are a karekea katabeaia mai irouna (ibukiia mitinare ni ibuobuoki aika kaara).
Te beretitenti n te titeiki bon te tia kairiiri n te ekaretia ibukiia mitinare aika kaara ao aika a kairake. Ngaia ao te bitiobi a karaoa te intawiu n taainako i aon tauiia mitinare ni ibuobuoki ake a kairake. A karaoa naba te intawiu ibukin rekomente ibukin te tembora, nakoanibonga, ao ana kakabwaia te tamanuea ngkana e riai.
Te beretitenti n te mition ao kainabana a karaoa te anua n tamnei ae kantaningaki man te mition. A marooro n taainako ma taan kairiiri n te mition ni ibuobuoki ake a taraa babairean aia tai mitinare, katabeaia, ao aron marurungiia. A ikotaki ni buoka te mitinare ni mataata ao tou mwiin ana kainibaire te mitinare ni ibuobuoki.
Te beretitenti n te mition e kanakoi taekan kororaoin te mitinare nakon ana beretitenti n te titeiki.
Mitinare ni ibuobuoki aika a kairake a na aki rin n te MTC. A na karekea te kataneiaia ae tamaroa, n airi ma te kataneiai n aia tabo ni mwakuri n ibuobuoki.
Ibukin kataneiai i aon riki te kairiiri n tararua, taraa Kainibaire ibukiia Mitinare n riki bwa Ana Reirei Iesu Kristo—Mition ni Ibuobuoki.
24.7.4
Weteaia Mitinare ni Ibuobuoki inanon Uoote ke Titeiki
Te bitiobi ke titeiki beretitenti e kona n anga wewete inanon uoote ke titeiki nakoia mitinare ni ibuobuoki ngkana te wewete e aki kaitara ma te katabeaki man te mition ke ma aia tai. Ibukiia kairake ni mitinare ni ibuobuoki, taan kairiiri aikai a reitaki ni mwakuri ma te tia kairiiri n te mition ni ibuobuoki.
24.7.5
Roko n Tokina te Mition ni Ibuobuoki
Mitinare aika kairake a tataneiai ni weteaki bwa a na beku n te maan ae 18 ke 24 te namwakaina. E bon kantaningaaki bwa mitinare n tatabeman a na kabanea aia tai ni beku ae katereaki ni katabeakin teuanne ke neienne.
N aroaro tabeua, imwin karekean weteana, te mitinare, kaaro, ao taan kairiiri n te mition n ibuobuoki a na ikotaki ni marooro n ataa raoi bongi te namakaina are e na kamotirawaaki iai. Taan kariiri n te mition n ibuobuoki a na uotarake te iango ake a bitaki i aon ana bong ni kamotirawaaki nakon te beretitenti n te mition. Ngkana e kariaia te bitaki, te tia kairiiri n te mition ni ibuobuoki e na kaongoa ana beretitenti te titeiki ibukin te mitinare ana bong ni kamotirawaaki ae boou.
N tabetai te mitinare ni ibuobuoki e kainnanoa tokin ana mition teuanne ke neienne ibukin te aoraki, kororaoia, ke tabeua riki. Inanon aekaki aikai, te beretitenti n te titeiki e na kaongoa te beretitenti n te mition, taan kairiiri n te mition ni iboubuoki, ao mition ni ibuobuoki ae mwaatai n te aono. Te beretitenti n te titeiki ngkanne e na reitaki ma te tia tei are e katabeaki n te Missionary Department ni karekea waekoan te kamotirawa n rinanoaki ao ni kariaiakaki mairoun te Mataniwi ni Kabuta.
Te mition ni ibuobuoki ibukiia kairake ni mitinare e aki riaon 24 namakaina ibukiia mwaane. Mition aikai a aki riaon 18 namwakaina ibukiia aine.
Mitinare ni ibuobuoki aika kaara a kona ni kananaua aia mwakuri nakon te bong are a nanoraoi iai te titeiki beretitenti, te manatia ni bairean aia mwakuri mitinare, ao mitinare.
Tamnei
te aine e taetae iaon te bwai n taetae
24.8
Imwiin te Mwakuri ni Mitinare
24.8.1
Beeba ni Kariaia nakon te Tembora
24.8.1.1
Kairake ni Mitinare ake a Beku n Raroa ma Mweengaia
Ibukin kaetieti iaon te rekomente nakon te tembora ibukiia kairake ni mitinare ake a okira mweengaia, taraa 26.5.3.
24.8.1.2
Mitinare ni Ibuobuoki aika Kaara ake a Beku n Raroa ma Mweengaia
Te mition beretitenti e kona ni karaoa te intawiu ibukin te rekomente nakon te tembora ngkana e kainanoaki. Ngkana e tau te mitinare, te mition beretitenti e anga te rekomente ae boou ae e na bane taina inanon uoua te ririki.
24.8.1.3
Mitinare ni Ibuobuoki
Mitinare ni ibuobuoki ake a kara ao ake a kairake a riai ni bairea te tai n intawiu rinanon te tia kairiiri n te tabo ibukin kabouan te rekomente nakon te tembora (taraa 26.3.1).
24.8.2
Te Intawiu ni Kamotirawaiia Mitinare
Te titeiki beretitenti e kamotirawaia mitinare ake anga reirei ao ake mwakuri ni ibuobuoki ao e karaoa te intawiu ibukin te kamotirawaaia. Temanna man ana kauntira e kona ni kamotirawaia mitinare ni ibuobuoki aika kaara. N taian mwakoro, bon te mition beretitenti ke te kauntira are e mwiokoaki ae kamotirawaia mitinare. Ibukin kariaia tabeua, taraa 6.3.
Kainibaire aikai ibukin te intawiu aei a kona ni ibuobuoki.
Kaitauiia ibukin aia beku n te mition.
Kaoiia bwa a na tibwaa aia taneiai n te mition.
Kaungaia bwa a na reitinako inanon maiuia bwa ana reirei Iesu Kristo.
Anganiia reirei bwa a na kateitei iaon anua aika raraoi ake a karikirakei n aia tai ni mitinare.
Kaungaia bwa a na iriira te tamnei ni katoa bong ao ni maiu ma karineaia.
Kaoiia bwa a na iangoa ao ni katauraoi ibukin taai aika a na roko, n raonaki ma te reirei ke te mwakuri ibukiia mitinare aika kairake. Buokiia ni katei kouru ao ni karaoi babaire ngkana e kainnanoaki. Rinanoa aron rikirakeia iaon Au Babaire ma te kairake ni mitinare.
Totokoa tangiran kakabwaia aika a onoti bwa boon mwiin aia mwakuri n ibuobuoki n te mition.
Kaungaia bwa a na aki toki n maiu bwa a na tau ibukin te rekomente nakon te tembora.
24.8.3
Aia Ribooti Mitinare ao te Taetae n te Bootaki n Toa
Beretitenti n titeiki ao mwakoro a kaoiia mitinare ake a tibwa kamotirawaaki n ribooti iaon aia mwakuri n tain te boowi n te kauntira ae rietaata ke te boowi ni kauntira n te mwakoro. Bitiobi a kona naba ni kaoiia mitinare ake a tibwa kamotirawaaki n ribooti n tain te bowi ni kauntira n te uoote.
Ngkana e riai ibukin te raroa ke inanon bwaai aika riki, mitinare ake a tibwa kamotirawaaki a kona ni katauraoi aia ribooti ni kabonganai bwaai n rabaku aika boou ke n ti tain te bowi ni kauntira n te uoote.
Te bitiobiriki a bairea te tai ibukin te mitinare are e a tibwa kamotirawaaki n taetae n tain te bootaki n toa. Te bootaki n toa bon aron are e kakaraoaki. Te bitiobiriki e kakoauaa bwa tuua ake a kabwarabwaraaki inanon 24.5.2 a iraki.
Mitinare ake a tibwa kamotirawaaki a kona n taetae ni bootakin te toa n uoote ake tabeua ngkana a kaoaki iroun te membwa n te titeiki ke te beretitentii n te mwakoro. A kona naba ni kaoaki iroun te membwa n te kauntira ae rietaata ke te kauntira n te mwakoro.
24.8.4
Wewete
Taan kairiiri a na waekoa n anga te katabeaki n te mwakuri n ibuobuoki ao taian wewete nakoia mitinare are a tibwa kamotirawaaki. Aio n raonaki ma tarakina bwa te tia mwakuri n te otenanti n te tembora ngkana e riai (taraa 25.5).
24.9
Bwaai ni Ibuobuoki n te Rekomentation Ibukiia Mitinare ao te Beku