Mwakoro 3

Kamatebwaia ao Reireia ana Euangkerio Iesu Kristo

Reirei n te mwakoro aei iai inanona te reirei ae kakaawaki, moan tua, ao tua ibukin ana euangkerio Iesu Kristo. Bon akanne ake a kairiko nako iai burabeti ma abotoro bwa ko na reiakin ao n reirei iaona. A katauraoaki ikai bwa ko aonga ni kona ni buokiia aomata bwa a na ota raoi n ana reirei Kristo.

Te moan itera n te mwakoro aei bon te kakao nakon te bwabetito. Nikiran kanoan te mwakoro aei iai aua reirei inanona:

• Te Rongorongo ni Kaokan Bwaninin Ana Euangkerio Iesu Kristo

• Ana Babaire ni Kamaeu Tamara are i Karawa

• Ana Euangkerio Iesu Kristo

• N Riki ni Kabanea Maium bwa Ana Reirei Iesu Kristo

Kamatebwaia booki aika tabu ao taua ni kawakin reirei n tatabeua nako. Ngkai ko karaoia, te Tamnei e na kaota te kakoaua n taian koaua ake ko kamatebwai. E na buokiko n ataia bwa tera ae ko na taekinna ao ni karaoia ni buokia tabeman bwa a na karekea te kakoaua ibukin te koaua. (Tara Reirei ao Berita aika Tabu 84:85.)

A na ataa riki te tia Kamaiu aomata ngkai a karaoi bwaai ake E tia ni kaoia bwa ana karaoia. Kanakoi kakao inanon tain te reirei n tatabeua nako, ao buokiia aomata bwa a na kawakin aia motinnano. Ngke a kawakin aia motinnano aomata, a moana maeuakinan ana euangkerio Iesu Kristo ao ni katauraoia nakon karaoan berita aika tabu ma te Atua.

Reireia ni kabane taian reirei imwain ao imwiin te bwabetito. Mitinare ake a bwanin aia tai a kaai ni kairi reirei iaon reirei n taai akanne. Mitinare n te uoote ke membwa tabeman a iri ngkana e angaraoi. Taraa mwakoro 10 ao 13 ibukin rongorongo iaon karinakiia membwa n te reirei.

Katauraoi n Angareirei

Ngkai ko katauraoi n angareirei, manga noori riki rongorongo ibukiia aomata n tatabemania nako inanon Tataekina Au Eungakerio app. Karaoa bairean te reirei ae boboto iaon kainnanon te aomata. Iangoia bwa tera ae e na riai n ataia teuanne ke neienne ao n namakinna inanon tain kawarana ibukin te reirei. E na kakorakora am mwakuri te Tamnei n am kekeiaki ni katauraoi ao ni babaire.

Aikai titiraki tabeua ibukim ao toam ibukin iangoana ma te tataro mwaaka ngkai kam katauraoi n angareirei.

• Tera te kakao ae ti na riai ni kanakoa ni buoka te aomata ni karikirakean ana onimakin iroun Kristo ao n rikirake? Kakao ake ana kangaa ni buokiia aomata n raira nanoia ao ni namakina “mwaakan te Tia Kabooira” (Ereman 5:11). Iangoa rikiraken te aomata, te bwai ae mena inanona, ao kainanona. Ngkanne karina teuana te kakao ke e mwaiti riki inanon am kanoa n reirei.

• Tera reirei ao tuua ake a konaa ni buoka te aomata ni kawakin kabaeakina ake ti kaoia iai bwa e na karaoi? Iangoia ma te tataro mwaaka bwa tera reirei ao tuua ake ana buokiia aomata n oota raoi bwa e aera kawakinan aia motinnano e rangi ni kakawaki ibukiia ao nakon te Uea.

• Tina kanga ni buokiia aomata bwa a na reiakina te reirei? Ni katauraoiko n anga te reirei, barongai ao kauarerekei angareirei ake ko na kabongana n angareirei reirei 1-4. Kinai titiraki, booki aika a tabu, katootoo, ao bwaai n anga reirei tabeua aika a tau are ana konaa ni buoka te aomata n oota raoi ni baike ko reirei iai. Taraa mwakoro 10 ibukin rongorongo bwa ko na kanga ni katamaroaan am angareirei.

• Tera kakabwaia ake e a tia ni beritanna te Atua ibukin butimwaean ao kawakinan motinnano? Ngkai ko kamatebwaia reirei, kinaa raoi ana kakabwaia te Atua ake ea tia ni beritanna. Ngkai ko angareirei, beritani kakabwaia ao kaota am koaua ibukiia.

• Antai membwa ae a kona ni iria? N te bowi are e karaoaki ni katoa wiiki, kakaea raoi bwa antai te membwa ae e kona ni buokiko n angareirei ao ni boutoka te aomata temanna. Imwaain te reirei, maroroakina ibukin irakin te reirei irouia. Taraa mwakoro 10.

• Tera ae ti kona ni karaoia ni buokiia aomata bwa ana kawakina aia motinnano imwiin nakora? Ruruamwiin rinanon karaoan te reitaki ae kimototo ni katoa bong ni buokiia aomata bwa a na kawakini aia motinnano. Tarai kawai ni kariniia membwa ni buokiia naake ko reireiniia ibukin kawakinan aia motinnano. Te reitaki aei e kona n iai inanona warekan te mwakoro man ana Boki Momoon ke booki aika a tabu riki tabeua. Ngkana temanna e aki kawakina te motinnano are mai imwaaina, tao e na raoiroi riki ngkana ko ibuobuoki n anne imwaain ae kona manga anganna riki teuana. Taraa mwakoro 11.

• Ti na kanga ni buokiia nakon ae e tamaroa riki imwiin aei? Imwiin te reirei ni katoa tai, tuoa are a tia n rinanona aomata ake ko reireiniia. E rikirake aia onimaki iroun Kristo? A namakina te Tamnei? A rairinanoia ao ni karaoi mani kawakin motinnano? A tataro, kamatebwaia ana Boki Momoon, ao ni iriira te taromauri? Karaoa am babaire ni buokiia.

Angareirei mai Nanom ngkai e Kairaki iroun te Tamnei

Marooro nakoia mitinare mwaane ao mitinare aine ni kabane, a kamataata te Moan Beretitentii ao te Kooram n te Tengaun ma uoman:

“Tabera bon te angareiei n rongorongon kaokan te euangkerio n te aro are te Tamnei e na kairiia mitinare ao naake a tia n reiakinaki. E rangi ni kakawaki reiakinan te kaantaninga ake n taian [reirei], ma aikai a riai n aki reiakinaki ni karaoan te kaotioti. A riai mitinare ni kabongana oin aia taeka n aron are a anganaki mairoun te Tamnei. E riai n aki anga aia taeka tabeman ae e kamatenikuna, ma e taetae mai inanona n oin ana taeka. E kona n aki ira are e karinanaki n taian reirei, ma e na anga are e kairaki iroun te tamnei bwa e na karaoia, nakon are e tangiria ao e kainanoia te [aomata]. Ana taeka are e nako mai inanona ao n oin ana taeka, e riai n kaota ana kakoaua n koauan ana angareirei.”

Uaan te Kamatenikuna

Motinnanoia bwa kona uringa rinanin bwaai aika a kakawaki n te reirei ni kabane inanon kanoan anga reirei n tatabeua. Tai kamatenikunai reirei n taekana teuana imwiin teuana.

Ngkana ko reiakina te kauoua n taetae, kabotoa am kamatebwai n te taetae ni katauraoiko nakon te angareirei. Kamatenikunai taeka, mwakoro n taeka, tein kibuntaeka, ao rongorongon reirei ake a na oti inanon te angareirei. Kamatenikunaakin kanoana inanon reirei 1–3 e kona naba n ibuobuoki. Tera are ko kamatenikunaa e na iai nanona ae e rangi n raoiroi ibukim.

Iangoa kamatenikunaa oin reirei man booki aika tabu ni kabonganai inanon am angareirei ao inanon maium. Te mwaaka ae e korakora e konaa n roko man kamatenikunaakin booki aika tabu. Booki aika tabu aikai a kona ni kakorakorako ao n anganiko te ungannano ao te mweengaraoi. A kona ni kairiko nakon te bitaki. Ngkana ko kamatenikunai booki aika tabu, e konaa te Tamnei ni karokoa n am iangon te tai are ko kainanoia iai.

Angareirei ao Kakao ni kaineti ma Kainanoana irouia Aomata n tatabemania nako

A mwaiti kawai iroum n anga te reirei are e na buokiia aomata bwa ana tauraoi raoi imwain te bwabetito ao kamatoakiia. Tera te reirei are ko anga, ningai ae ko anga reirei iai, ao maanra te tai ae ko anga nako iai a bon bane ni kaineti ma kainanoana irouia aomata ake ko reiakiniia ao ana kairiiri te Tamnei. Te katooto, ngkana ko reireiniia aomata are akea ataakin te maiu ni Kiritian irouia, ko konaa ni moanna ma te ibuobuoki nakoia ni karikirakea aia reitaki ma Tamaia are i Karawa ao ni kaotaiia n Ana babaire (taraa “Teaching People Who Do Not Have a Christian Background” inanon mwakoro 10).

Kariaia te Tamnei bwa e na kairiko inanon karababaan kakao ao ningai are kona kanakoa iai. Te kakao ae moan te eti n te tai ae eti e kona ni buokiia aomata ni karaoi bwaai aika e na karikirakea aia onimaki. Waaki aikai e na konaa ni kairiiri nakon bitakin naano aika a korakora (taraa Motiaea 5:2; Aramwa 5:12–14).

Aanga taian reirei aika a beebete, oota raoi ao a kimototo. N oina raoi, te kakawari n angareirei e na riai n aki raka iaon 30 te miniti, ao ko konaa n reireina te aomata n tibwatibwaia inanon kaka 5 te miniti.

Ko na bon bae n tangira te bowi ni katoatai n reiakin tuua inanon teuana te reirei. Aomata ana bon oota raoi n am reirei are ko anga ngkana ko reiakinniia ni kauarerekei am reirei, kataata am reirei, ao reiakiniia mwakorokoro aika uarereke n am anga reirei.

Kamatebwaian Koroboki aika tabu

Tera ae ko kairaki bwa kona angareirei iai?

• Motiaea 18:18–20

• Reirei ao Berita aika Tabu 43:15-16; 52:9

Bukin tera e kakawaki bwa ti na reiakina ana reirei inanon ara tai n angareirei?

• 1 Nibwaai 15:14

• Aramwa 12:32; 17:2–3; 31:5

• Reirei ao Berita aika Tabu 84:85