“Mwakoro 2: Ukoukori Koroboki aika a Tabu ao Katoka iaom ana Otanga te Atua,” Tataekina Au Euangkerio: Te Kairi ibukin Tibwauan ana Euangkerio Iesu Kristo (2023)

“Ukoukori Koroboki aika a Tabu ao Katoka iaom ana Otanga te Atua, ” Tataekina Au Euangkerio

Mwakoro 2

Ukoukori Koroboki aika a Tabu ao Katokaa i aom ana Otanga te Atua

Iangoa Aio

Bukin tera e kakawaki kateimatoaan kamatebwaian ana taeka te Atua i nanon booki aika tabu?
N na kanga ni karika kamatebwaian koroboki aika tabu bwa e na uaana?
N na kanga ni kabonganai rabakau aika boou n te aro ae raoiroi ni buokai ni kakoroa nanon au kantaninga?
Tera ae nanonaki ni katokai iaora ana otanga te Atua?

Ukorii Booki aika tabu

Iesu Kristo bon “te maiu ao ootan te aonaaba. Nooria, ngaia taekan te koaua ao te raoiroi” (Aramwa 38:9; taraa naba Ioane 1). Kamatebwaian ana taeka te Atua i nanon booki aika tabu e na uota te maiu ae korakora nakon maium (taraa Ioane 10:10). Ko na kaonaki n Ana taeka—ao naake ko reireiniia—ma te oota ao te koaua. A na buokiko—ao naake ko reireiniia—ana maiu i nanon te raoiroi ao ni karekea te kamanoaki ao te korakora mai i karawa ao te korakora. A na buokiko ni kinaa raoi ao ni katoonga Ana tangira, ae moan te karewe nakon riki bwaai aika a karewerewe. A na taeka a na kaona tamneim ma te kimwareirei (1 Nibwaai 8:11–12; taraa kiibu 1–34).

Koroboki aika tabu bon bwaintangira mai karawa. Teuana te kakabwaia ae rangi ni korakora n am mition bon reken te tai ni kamatebwai ni katoa bong.

Kamatebwaian te euangkerio bonteuana te mwakuri ae anganiko te kakabwaia n te maiu n tamnei ae ko kona ni karaoia. E bon anga te unganano ae korakora nakon te iango ao te maiu n tamnei. N aron are e reireia Aramwa, ngkana ko “unika” ana taeka te Atua i nanom, e na moanna ni kaotaa riki oot[am]” ao ni moanna ni kangkang iroum (Aramwa 32:28; taraa naba Enoti 1:3–4). Ngkai ko reitaanako am kamatebwai ao ni kamwakura ana taeka te Atua, e na karika wakaana; ao … n riki bwa te kai ae bwebwerake nakon te maiu ae aki totoki” (Aramwa 32:41; taraa naba kiibu 42–43). A na rikirake am atatai ao am koaua n te euangkerio. Nanom ao am konabwai n tibwaua te euangkerio e na rikirake naba.

E kakawaki reiakinam mairoun te tia reirei ae tamaroa, ma e kakawaki naba ae e na bon reke reiakinam i bon iroum man kamatebwaian koroboki aika tabu. Aio e bon koaua naba ibukiia aomata ake ko reireiniia.

Te mataata ni koroboki aika tabu e konaa n aanga te kakaewenako n te moan tai. Ma, ngkai ko teimatoa n tataonakinnano ni kamatebwaian Ana taeka te Atua, e na rikirake mataatam. E na reke ae ko na rangi n tatangira am tai ma koroboki aika tabu. Ko na ingainga ni kan ataia bwa tera ae ko na reiakinna ao ko na rinanona.

Karekean te atatai ao tangiran koroboki aika tabu e kona n riki bwa te kakabwaia ae teimatoa n am makuri ni mitinare. Ngkai ko rinanon kakabwaia ni kamatebwaian koroboki aika tabu n am tai ni beku ni mitinare, ko na tangiria n reitinako ni karaoia inanon nako maium.

“Oin te kantaninga ni koroboki aika tabu ni kabane bwa a na kaona nanora n te onimaki iroun Tamara ae te Atua ao iroun Natina, Iesu Kristo—te onimaki ae bon iai Ngaiia; te onimaki n Ana babaire te Tama ni maiura ae aki mamate ao te maiu ae akea tokina; te onimaki n Ana Mwakuri ni Kamaiu ao Mangautin Iesu Kristo, are e karika mwakurin te babaire ni kakukurei aei; te onimaki ni karika ana euangkerio Iesu Kristo bwa kawaira n te maiu; ao te onimaki n roko n ataakin ‘ae te Atua ae ti temanna ae koaua, ao Iesu Kristo, ae [E a tia] ni kanakomaia’ (Ioane 17:3)” (D. Todd Christofferson, “The Blessing of Scripture,” Riaona, Meei 2010, 34).

Am Kamatebwai

Taraa tamnein Iotebwa Timiti are ni moan te mwakoro aei. Wareka Iotebwa Timiti—Rongorongo 1:11–13. Kaekai titiraki aikai i nanon am tieno ni kamatebwai.

E kanga ana wareware ao ana iango Iotebwa Timiti n Iakobo 1:5 ni kairia ni karekea te kaotioti?
Tera ae e reke i mwiin ana kamatebwai nakoia k te roro ake imwiina?
Tera ae e reke ni maium man mwiin ana babaire ni kamatebwai ao n ukeuke?
E kanga mwiin am kamatebwai n te euangkerio ni iai n roota maium ao maiuia aomata tabeman?

Kamatebwaian Koroboki aika Tabu

Tera ae ko kona n reiakinna man kiibu aikai bwa e kanga aron wakinan kamatebwaian te euangkerio?

Ukora te Tamnei

Reiakinan te euangkerio e riao riki nakon karekean te rongorongo. Bon aron naba te waaki n te maiu n tamnei ni kamwakurii koaua aika akea tokiia iaan ana kairiiri te Tamnei ae Raoiroi (taraa Iakowa 4:8; Reirei ao Berita aika Tabu 50:19–25). Ukora ao onimakina te Tamnei bwa e na reireiniko ngkai ko kamatebwai ni koroboki aika a tabu. Aio e na riki n te aro ae ko na karekean tangiran koroboki aika tabu iroum ma te nano ni koaua ni karaoi ko reiakin (taraa 1 Nibwaai 19:23; Moronaai 10:4; Iotebwa Timiti—Rongorongo 1:18).

Kamatebwaian koroboki aika a tabu ma te tataromwaaka e na kauka wintoon te kaotioti ibukin te Tamnei bwa e na taetae nakon am iango ao nanom. E na kakabwaiako ma te kairiiri, kaantaninga mai ieta, ao kaeka nakon am titiraki. Rinanon am kamatebwai ni koroboki aika tabu, e na kakorakorako ao n anganiko te rau te Tamnei ae Raoiroi. E na anganiko te ataibwai ao te iango are e na kakabwaia maium ao n anganiko te konaa ni kakabwaiaia aomata tabeman n akea tokina.

Kamatebwaian Koroboki aika Tabu

Tera mwiokoan te Tamnei ae Raoiroi ni buokan te aomata n reiakinan te euangkerio?

Kakaei Kaekaan Titiraki

Ngkai te mitinare ngkoe, ko na ongo titiraki aika a mwaiti. Ana iai naba ae bon oin am titiraki. Kakaae n koroboki aika tabu ao ni bwaai ni ibuobuoki riki tabeua ake a tia ni kariaiakaki bon te kawai ae nakoraoi n te kamatebwai. Korei taian titiraki ao tera are ko reiakinna i nanon am tieno ni kamatebwai.

Kabonganai rongorongo aika a eti, ao ni koaua n am kamatebwai—riki koroboki aika tabu, aia taeka burabeti aika maiu, ao Tataekina Au Euangkerio. Kabonganai bwaai ni ibuobuoki n te Gospel Library, n aron Bwai ni Kairi nakon Koroboki aika Tabu, Bible Dictionary, index to the triple combination, Gospel Topics, ao Gospel Topics essays. Reiakinna bwa baikara bwaai ni ibuobuoki aika a tauraoi n aia taetae aomata ake ko reireiniia.

“Teuana te bwai ae I reiakinna n te maiu bwa aekakira waekoan te Uea nikaekai ara titiraki ao n anganiira reirei rinanon koroboki aika tabu. … Ti a nakon te Uea n te tataro, ni bubuti buokara ke kaekaan ara titiraki; ao kaeka akanne a na roko ngkana ti kaukii koroboki aika tabu ao ni moana ara kamatebwai iai. N tabetai bon rinanon taai aika bubua ke ngaa te ririki n nako ae a koreaki ti ibukin kaekaan ara titiraki” (M. Russell Ballard, “Be Strong in the Lord, and in the Power of His Might” [Brigham Young University fireside, Mar. 3, 2002], 5, speeches.byu.edu).

Maiuakin Bwaai Ake Ko Reiakin

Ngkai ko namakina te kimwareirei are roko man ootam ae rikirake n te euangkerio, ko na tangiria ni kan maiuakin baike ko reiakin. Kataia maiuakina te rau ma baike ko reiakin. Karaoan aei e na kakorakora am onimaki, ataibwai, ao koaua. Mwakuriia te bwai ae ko reiakinna ao e na kabatia ao ni kateimatoa mataatam. (Taraa Ioane 7:17.)

“Te reirei ae koaua, ae e mataata raoi, e bitii anua ao aroaro. Kamatebwaian [reirein] te euangkerio e na kanakoraoa te aroaro n te aro ae waekoa nakon riki ae kamatebwaian aroaro e na kanakoraoa te aroaro“ (Boyd K. Packer, “Little Children, Ensign, Nobembwa 1986, 17).

Am Kamatebwai

Tera ae e reiakin koroboki aika tabu aikai iaon reiakinan te euangkerio?

Kabongana te Gospel Library

Te Gospel Library bon te bwai ni ibuobuoki i aonrain ae kona n rangi ni katamaroa am kamatebwai ao anga reirei. Kataneiaiko ni bwaai aika mwaiti i nanona. Tabeua buokam ni kabonganaan te Gospel Library bwa mwakoron am kamatebwai ao anga reirei a karinanaki i nano.

E karekea nakoim koroboki aika tabu, aia taeka burabeti aika maiu, ao tabeua koroboki man te Ekaretia n taetae aika mwaiti aika a koreaki, aika a kona ni katangaki, ao n te witeo.
Ngkana ko tau mwiin baike ko reiakin ao taian namakin ake ko karekei n te Gospel Library, ko kona n teimatoa ni karekei ao ni kakorakoraaki man taian rongorongo akanne imwiin am mition.
E anganiko te kona n tibwauai koroboki aika tabu, taetae mai irouia burabeti aika maiu, ao ni witeo ma naake ko reireiniia.
Angiia aomata ake ko reireiniia ao ni bwabetitoiia a na kabongana te Gospel Library ni karekei bwaai ni ibuobuoki man te Ekaretia. Kamwataua raoi aron bwaai n te Gospel Library bwa ko aonga ni kona ni buokiia n reiakiniia aron kabonganaana.

Am Kamatebwai

Karaua rinanoa kanoan te “Gospel Library User Guide.” Rinea te bwai teuana n te Gospel Library ni kataa arona n am tai ni kamatebwai i bon iroum ke ma toam. E kanga aron te bwai aei ni buokiko n am kamatebwai? Tera ae ko na kataia n ataa arona nakon are i mwiina? Reireiniia mitinare ake tabeman te bwai ae ko reiakinna.

Kabonganai Bwaai n Rabakau aika Boou ma te Kokoaua

Te Uea ao Ana burabeti a tia n anganiko te onimakinaki ma bwaai n rabakau aika boou ni buoka kakoroan nanon Ana mwakuri. Rabakau aika boou a kona ni kanakoraoa am kamatebwai ni koroboki aika tabu ao n Tataekina Au Euangkerio. Bwaai ni ibuobuoki aika a tii kona n reke i aonraain a kona naba n buokiko ni karaoa am babaire. A kona ni buokiko n am anga reirei ao n am kekeiaki ni kakaiia aomata aika ko na reireiniia.

Kabonganaan terabakau ae boou ma te wanawana ao te etieti e kona ni buokiko ni kakoroa nanon am kantaninga ni mitinare ao ni kabonganaan raoi am tai. E kona naba ni buokiko n totokoi bwaai tabeua aika aki tau.

Iriira te Tamnei bwa ningai ao ko na kanga ni kabonganai rabakau aika boou n te aro are e na buokiko ni kakorakora am onimaki iroun Iesu Kristo ao aia onimaki naake ko beku ibukiia ao n reireiniia.

Iriira aron te Kamanomano ibukin Kabonganaakin Rabakau aika Boou

Aua kamanomano aika a koreaki i nano a na buokiko ni kabonganaan raoi bwaai ni mwakuri aika boou. Iriiran waaki ni kamanomano aikai bon te kawai ae kakawaki ibukim ni “karin ana ootanga te Atua buaka, bwa kam aonga ni kona n teimatoa n eki nako ana bwai ni kamwamwane te riaboro” (I-Ebeto 6:11).

Niim Ma ana Wirikiriki te Tamnei

E berita Nibwaai, “Ngkana ko rin n te kawai aio, ma ni karekea te Tamnei ae Raoiroi, ao e na kaoti nakoim bwaai ni kabane aika ko riai ni karaoi” (2 Nibwaai 32:5). E a tia Tamam are i Karawa n anganiko uoua bwaai n tituaraoi aika korakora are a na buokiko: i naomatam n rinerine n ae e riai ao ana bwai n tituaraoi te Tamnei ae Raoiroi. Iai mwaakam n rineia bwa ko na ira ana kairiri te Tamnei ae Raoiroi. E rangi ni kakawaki ana kairiiri ni buokam ni karaoa ae tamaroa ngkai ko kabonganai bwaai ni mwakuri aika a boou. E buokiko naba ni kamanoko man te buakaka.

Kabanea nanom nakon Tabem ni Mitinare

Ao e taku te Uea, “Ao ngkana kam mata teuana nakon mimitongiu, ni kabane rabwatami e na kaonrakeaki n te ota, ao a na akea te ro iroumi; ao te rabwata anne are e kaonaki n te ota e na atai bwai ni kabane” (Reirei ao Berita aika Tabu 88:67). Ni mata teuana nakon mimitongin te Atua nanona bon kabanean nanom ae bwanin n ana kantaninga te Atua, are bon oin bukin rokom ngkai ko mitinare.

Kamanenakin rabakau aika boou e riai ni kabotoaki n am kantaninga. Kamaeua am bwai ni mwakuri i mwiin ataakin kaantaningaam n am mwakuri ni mitinare are ko na kabonganaa iai. Kamatea ngkana e a tia are e kaantaningaaki.

E na bon rereke ae ko na nori bwaai n te intanete aika aki raraoi ngkana ko anaa am tai ni mamataku iaon taabo tabeua n te intanete n akea raoi bukina.

Reireiaki Raoi

E koreia Moomon: “Bon ngai ana reirei Iesu Kristo, are Natin te Atua. I a tia ni weteaki irouna bwa N na taekina ana taeka i buakoia ana botanaomata, bwa e aonga n reke irouia te maiu are aki totoki” (3 Nibwaai 5:13). N ai aron Moomon, ngkoe naba ana reirei Kristo. Te beku bwa te mitinare ae bwanin ana tai bon te tai ae onoti ni kamatoaa rikim bwa Ana reirei.

Taeka aika reirei ao boaaki a roko man te oi n taeka are nanona “tia reiakinaki” ke “ataein te reirei.” Te riki bwa Ana reirei Kristo nanona bwa ko ukoria ni iriira te Tia Kamaiu ao ni kawakin Ana tua. E nanonaki bwa ko teimatoa ni reiakina ao n reirei iaon taekan Kristo.

Karekea kaetakim ao karaoi rinerine aika eti bwa ko na kangaa ni kabonganaibwaai n mwakuri man rabakau aika boou. Rineia bwa ko na irii taian kamanomano. Ngkana ko marooro n itaramata ma aomata, tai tuoi taian rongorongo ke ni kaekaa te tareboon. Taraia raoi bwa ko na kanga ni kabonganai bwaai ni mwakuri aikai. Tai kariaia bwa a na tautaekana arom.

E taekinna te Uea, “Ane e karekea au tua ao n ongeaba nako iai, boni ngaia naba au tia reirei; ao ane e taku bwa e karekea ao e aki ongeaba nako iai, bon tiaki ngaia au tia reirei, ao e na teweaki nako mai i buakomi” (Reirei ao Berita aika Tabu 41:5). Ngkai bon akea temanna ae kororaoi, e kantaningaa te kekeiaki ae reitinako te Uea, ae te teimatoa n Iriiria.

Tamaroan te euangkerio bwa a kona ni kabwaraaki ara bure ngkana ti rairi nanora—ao e tangiriira te Uea bwa ti na rairii nanora n aki waeremwe (taraa Reirei ao Berita aika a Tabu 109:21). Ngkana ko karaoa te kairua, ni ikotaki ma kabonganaan rabakau aika boou n ae aki riai, raira nanom n te tai anne ao kataia keiaki ni maiuakina Ana tua. Aio mwakoron te riki bwa ana reirei Kristo.

Katiteuanaaki

E taku te Uea, “Katiteuanaaki; ao ngkana kam aki katiteuanaaki; tiaki au bwai ngkami” (Reirei ao Berita aika Tabu 38:27). Buoka am mition ni karikirakea te katei n te katiteuanaaki, n onimaki, n ongeaba, ao n nanoanga bwa ko aonga ni kakorakoraki ao ni boutokai ngkami imarenami.

A riai mitinare ni kabane n namakina ae a mwengaraoi ni bubuti buokaia ngkana a kainnanoia. Te mitinare ae korakora n te Tamnei e kona ni buoka te aomata temanna are e namakina te mamara (taraa Reirei ao Berita aika Tabu 84:106). Ngkana ko namakinna te kariiriaki, karekea buokam iroun toam ke te tia kairiiri n te mition ibukin te buoka.

Angiin ni kabane taian kakaewenako ake a irekereke ma te intanete ke n tamnei aika a tangako a riki ngkana ti kan titiku i bon iroura. Kabonganai bwaai aika a maiu man te iti ngkana kam uaia ni kona n nori ami tikuriin. Karekea te unga ao te ongeaba i marenami.

Iai te onimaki iroun te Uea irouia mitinare n tatabemaniia ake E weteia, ni ikotaki ma ngkoe. E a tia ni katauraoiia toam ao taan kairiiri bwa a na buokiko ni kawakiniko ao ni boutokaiko. N ai aron Aramwa ae e boutoka toana ae Amureki, n ukora kakorakoraaia i bon imarenaia (taraa Aramwa 15:18).

Tera ae Ko Riai ni Karaoia Ngkana Ko Namakina te Konaaki ke n Rootaki?

Reiakinan aron irakin kamanomano aika aua aikai e kainanoa te kekeiaki, kaetakim, ao te kataneiai. E ngae ngke i mwiin kamanomano a riki bwa mwakoron bwaai aika a bon riki n arom n iango ao ni mwakuri, e na reke te tai ae ko na manga namakina ae ko konaaki ke n rootaki. Tao a na iai aroarom aika buakaka iaonrabakau aika boou i mwaain am mition are e kaangaanga totokoana iroum. Tabeman mitinare a korakai ma tamnei aika tangako i mwaain weteaia ao tao ni kariiriaki ni manga okiri anuan kateia ake mai i mwaaina.

Tuua aika i nano aikai e na buokiko ni kataneiako ni maiuakin kamanomano ao ni kataniko ni kaitaraa te kariiri:

Taratara raoi n am iango, namakin, ao anuam. Ataia bwa a kanga ni karika ae ko na rootaki riki n aki kabonganaakin raoi bwaai ni mwakuri aika a boou .
Rineia bwa ko na mwakuriia. Kaekaeka n ae raoiroi, ni kawai aika nakoraoi nakon baike ko namakini.
Reiakinna, rairannano, ao kanakoraoia. Kabonganai taneiai ake ko rinanona n teimatoa n reireinaki ao ni kanakoraoaki.

Ko aki riai n tokanikai i aon kaangaanga i bon iroum. Onimaki n te korakora are e roko rinanon te Tia Kamaiu ao berita aika tabu ake ko karaoi ma Ngaia. Te Uea e atai kaangaanga ake ko kaitara ma ngaia, ao E na buokiko n ana mwakuri ae korakora aei.

Uringnga n tainako bwa te Tia Kamaiu e kona ni buokiko ni kabonganai bwaai ni mwakuri n rabakau aika boou n ae raoiroi. Kokoaua nakon te onimakinaki are E anganiko. Motikia n “nakonako ma te eti i matana” (Aramwa 53:21; taraa naba kibu 20). Namakina te kakaitau ibukin bwaai ni kabane ake Ngaia ao te Tama a tia ni karaoia ibukim a na buokiko ni karaoi rinerine aika tamaroa bwa ko na kanga ni kabonganai bwaai ni ibuobuoki ake a maiu man te iti.

Am mition bon te tai ae tamaroa n reiakina aron kabonganaan rabakau aika boou ma te wanawana. Te motinano ao aroarom ae tamaroa ake ko karikirakei n tain am mition a na kakabwaiako i nanon nikiran nako maium.

Katokaa Iaom ana Bwai ni Buaka Nako te Atua

Konabwaim n totokoi kariiri e na rikirake ngkai ko kamatebwaia ao ni kamwakuri koroboki aika tabu, aia taeka burabeti aika maiu, Tataekina Au Euangkerio, Kainibaire ibukia Mitinare ibukia Ana reirei Iesu Kristo, ao te kamanomano are e kabwarabwaraaki n te mwakoro aei.

Man katokaan “ana ootangani buaka te Atua ae bwanin,” ko na kona iai n ataa te koaua man te kaairua. A na rabunaki waem ma te tatauraoi n te “euangkerio n raoi.” Katokaan “otangan te bwabwa ae te raoiroi” e na kamanoko. Ao ma te “otanga are te onimaki,” ko na kona ni katoki ana kai ni katebe aika ura te tia kakaitara. Ko na uota “ana kabaang Tamnei[na]” n reirei te koaua ma te mwaaka ao te kariaiakaki. Ko na kamatoaaki ni kaitarai kaririin te aonaaba ake a na kona ni kararoako, tiku n okoro, ao ni katikuko n ti ngkoe. (Taraa I-Ebeto 6:10–18; taraa naba 1 Nibwaai 8:20, 30; 15:24–25; Ereman 3:29–30; Reirei ao Berita aika Tabu 27:15–18; Iotebwa Timiti—Mataio 1:37; 2 Timoteo 3:15–17.)

Am Kamatebwai

Tataromwaaka n rinea teuana man te kamanomano ni kabanea am iango iaona n te wiiki aei. Ukoukora ana Buoka te Uea. Korea mwiin am namakin ao tera are ko reiakinna.

Iango ibukin te Kamatebwai ao Karaoana

Am Kamatebwai

Katai iango aika tabeua aikai ni katamaroaa rikiraken am kamatebwai:
- Warekii koroboki aika tabu ma te titiraki ao te tabeaianga n am iango.
- Tibwauai bwaai ake ko reiakin ma mitinare tabeman ao naake ko reireiniia. Kamataataan te tua ke te reirei e na buokiko n uringii ao ni karekea riki te ota.
- Kamatebwai man atuun rongorongo. Kabanea nanom i aon atuun reirei ake a na buokiko ao aomata ake ko reireiniia.
- Titirakiniko, “Tera ae e taekinna te tia korea te rongorongo? Tera raoi oin te rongorongo? E kanga aio ni kaineti nakoiu? E na kanga aio ni buoka temanna are ti reireinna?”
- Katamneia n am iango ke korea tamnein te bwai are ko kamatebwaia. Te katooto, iangoia bwa tao aekakira aron Amon n tei i matan aia uea Reimwanaite.
- Koreia bwa tera raoi oin te iango n taekan te kibuntaeka ke n te rongorongo ae e uarereke aei.
- Kamatenanoi kiibu aika tabu ake a kabwarabwarai ke ni boutokai tuua ake ko anga reirei iai.
Tuoko bwa ko uara n aikai (1=I tuai, 3= n taai tabetai, ao 5=bon angiin te tai).
- I rikirake i nanon au onimaki ao ni moanna n ataa riki Tamara are i Karawa ao Iesu Kristo.
- I iangoia naake I reireiniia ngkana I kamatebwai.
- I nanon te bong, I iangoa ae I a tia ni kamatebwaia ngke e ingabong.
- Ngkai I kamatebwai, a roko iango nakon au iango ake aki rereke irou mai i mwaaina.
- I korei mwiin namakin n tamnei ao iango n taabo aika a bon riai.
- I tiku n uti matau ngkai I kamatebwai.
- I ingainga nakon te kamatebwai i bon irou.
- I ingainga nakon te kamatebwai ma toau.
Rinanoa mwiin am kaeka. Tera ae nakoraoi karaoana iroum? Ko na kanga ni kanakoraoia? Katea teuana ke uoua te kouru ni katamaroa aron raoiroin am kamatebwai.

Kamatebwai ma Toam ao Tibwauai Am Iango ma Toam

Uaia wareki kiibu aika a mwaiti aikai. Marooroakin kakabwaia aika a roko man kamatebwaian ana taeka te Atua. Te mwakoro raa ae e na rangi ni buokiia naake ko reireiniia?

Bowi ni Kauntira n te Mwakoro, Maungatabu n te Tioun, ao Bowi ni Kauntira ni Kairiiri n te Mition

Tuangiia mitinare bwa a na korea teuana ke uoua titiraki i aon te euangkerio man te reirei i nanon mwakoro 3. Titiraki aikai a kona n ae e bon onoti ibukiia ke mai irouia aomata ake a reireiniia. Kaoiia mitinare bwa a na tibwaua aia titiraki ma te kurubu. Ibukin taian titiraki nako, maroroakin aikai:
- E na kanga kaekaan te titiraki aio ni kakabwaia maiun te mitinare?
- E na kanga ni kakabwaiai maiuia aomata are e reireiniia teuanne ke neienne?
- E na kanga te mitinare ni kunea te kaeka?
Kamaenakoia mitinare i nanon kurubu, ao anganiia kurubu n tatabeua bwa a na kamatebwaia teuana man ake aua te kamanomano ao koroboki aika tabu ake a irekereke ma ngaiia. Kaoiia mitinare bwa ana tibwaua te bwai are a tia n reiakinna ao e kanga te kamanomano n tia ni buokiia.

Taan Kairiiri n te Mition ao Kauntira n te Mition

N taai tabetai ira aia kamatebwai mitinare ni kaitoatoa.
N tain te intawiu ke te marooro n titiraki, anga tabeua taian titiraki aikai:
- Tera namakin ae a tia n reke iroum n tain am kamatebwai ni koroboki aika tabu?
- Tera mwakoro ke tiekition n Taetaekina Au Euangkerio ae e a tia n rangi ni buokiko riki inanon uoua te wiiki n nako? E kanga n tia ni buokiko?
- Tera ae ko karaoia n am tai ni kamatebwai i bon iroum ae e buokiko n reiakiniko?
N te marooro n titiraki, iangoia n rinanoa te kamanomano ibukin kabonganaakin rabakau aika boou ao titirakiniia mitinare bwa tera ae a reiakinna ngkai a kamwakurii.
Tibwaua am nonori man am kamatebwai ibon iroum. Tibwaua baike ko korei man am tieno ni kamatebwai ao am koaua ni kakawakin kamatebwaian te euangkerio.