“Mwakoro 12: Buokiia Aomata ni Katauraoiia ibukin te Bwabetito ao te Kamatoaaki,” Tataekina Au Euangkerio: Te Kairi n Tibwaan Ana Euangkerio Iesu Kristo (2023)

“Mwakoro 12,” Tataekina Au Euangkerio

Mwakoro 12

Buokiia Aomata ni Katauraoiia ibukin te Bwabetito ao te Kamatoaaki

Iangoa Aio

N na kanga ni buokiia aomata ni katauraoiia ibukin te bwabetito ao te kamatoaaki.?
N na kanga ni kaira te marooro n titiraki ibukin te bwabetito?
E kanga bairean ao kairan te bootaki n te bwabetito ae anainano?
Bukin tera e kakawaki katiaan ao karinan te booma ibukin te Bwabetito ao te Kamatoa?
N na kanga ni boutokaiia membwa aika a boou?

Te bwabetito bon te otenanti ae kakimwareirei are e uota mwaakan te Atua nako nanon maiun te aomata. Te mwaaka anne e roko rinanon karekean ana bwaintituaraoi te Tamnei ae Raoiroi. E na reitinako ngkana te aomata e teimatoa ni karokoa te toki ni kawakin ana berita aika tabu n te bwabetitio.

Oin te kantaninga n am angareirei bon buokaia tabeman ni karikirakei aia onimaki iroun Iesu Kristo, rairannano man aia bure, ao ni bwabetitoaki ma nanona ni koaua n iriira Kristo. N aron ana reirei Moomon, “moan uaan te rairannano bon te bwabetito” (Moronaai 8:25). Ngkana aomata ake ko reireiniia a kawakin motinnano are ko kaoiia bwa a na karaoi, a na bon katauraoiia ni karaoi ao ni kawakin berita aika tabu ma te Atua ao ni kukurei n taian kakabwaia ake a beritanaki.

Te bwabetito ao te kamatoaaki bon tiaki tokin te kawai. Ma, otenanti aikai bon te mataroa are a rin iai natin te Atua ni kawain berita aika tabu. Te kawai aei e kairiiri nakon taian otenanti, berita aika tabu, ao kakabwaia aika a kakukurei man te tembora—ao n tokina nakon te maiu ae akea tokina (taraa 3 Nibwaai 11:20–40).

Te tau ibukin te Bwabetito ao te Kamatoaaki

Te Atua e kaoiia Natina ni kabane bwa a na roko Nakoina rinanon te bwabetito ao te kamatoaaki (taraa 2 Nibwaai 26:33; 3 Nibwaai 27:20). Te tau ibukin te bwabetito bon tii te arona ni kabane.

Man Reirei ao Berita aika Tabu 20:37:

Kananorinanoko i matan te Atua.
Te nano ni kan bwabetitoaki.
Nakomai ma te nano ae e uruaki ao te tamnei ae raraomwa.
Rairananom man am bure ni kabane ao tataro ibukin kabwaraan am bure.
Ko na kukurei ni katokaa i aom aran Kristo.
Karekea te nanomwaaka ni beku ibukin Kristo ni karokoa te toki.
Kaota am mwakuri bwa ko a tia ni karekea Tamnein Kristo nakon kabwaraan am bure.

Man te Moan Beetitentii ao te Kooram n Abotoro n Tengaun ma Uoman:

Kaeka raoi nakon taian titiraki n te marooro n titiraki n te bwabetito.
Butimwaai ni kabane aia reirei mitinare.
Boowi ma te beretitenti n te kooram ni unimwaane, beretitenti n te Bootaki n Aine, ao te bitiobi.
Iriii bootaki n toa tabeua.

Aroaro aikai bon kaotakin mwakurin te tamnein n te rairaki. Ngkana iai aroaro aikai irouia aomata, a bon tauraoi nakon otenanti aika a tabu n te bwabetito ao te kamatoa.

Ngkana e a tia te aomata ni kamatoa te bong ibukin bwabetitoana:

Manga rinanon raoi ana rekooti teuanne ke neienne i nanon te app ae Tataekina Au Euangkerio ni kakoauaa bwa ko a tia n reireiia reirei aika riai ao tuua.
Karekea te tai ibukin taai ake e na kainanoaki ibukin te katauraoi nakon te bwabetito ao te kamatoaaki. Manga rinanon te tiketuo ma te aomata.
Ngkana e angaraoi, kaoa te aomata n roko nakon te bootaki n te bwabetito i mwain oin aia tai teuanne ke neienne ni bwabetito.

Kamatebwaian Koroboki aika Tabu

Kamatebwai koroboki aika tabu aikai. Ko na kanga ni buokiia naake ko reireiniia ni katauraoi ibukin te bwabetito ao te kamatoaaki? Koroia bwa tera ae ko a tia n reiakinna man am kamatebwai.

Buokiia Aomata ni Katauraoiia ibukin te Bwabetito ao te Kamatoaaki

Te marooro n titiraki ibukin te bwabetito bon te mwaneka ae kakawaki ni kakoaua bwa te aomata iai irouna tauna ibukin te bwabetito. Karaoa bairean te marooro n titiraki ibukin te bwabetito tii ngkana te aomata e a tauraoi.

Buokiia aomata ni katauraoi ibukin te marooro n titiraki aei n te aro bwa a na namakina te mwengaraoi iai. Kabwarabwara bwa aekakira. Tuangiia bwa a na kaitibo ma mitinare tabeman n ai aromi.

Kabwarabwara te kantaninga i aon te marooro n titiraki. Bon te tai ibukiia ni kakoaua bwa a tia n “rairiinanoia man aia bure [ao] kaotaki man aia mwakuri are a tia ni karekea Tamnein Kristo nakon kabwaraan aia bure” (Reirei ao Berita 20:37).

Tibwai taian titiraki are e na anga te tia titiraki (taraa naano). Aio are e buoka te aomata ni katauraoia ni kaekai.

Kakoaua raoi bwa te aomata e na mataata bwa tera ae ko a tia n reireia ao te berita ae tabu are e na karaoia teuanne ke neienne n te bwabetito. Te berita ae tabu aei e na:

E na kukurei ni katokaa i aona teuanne ke neienne aran Iesu Kristo.
Kawakin Ana tua te Atua.
Beku ibukin te Atua ao ibukiia tabeman.
Teimatoa ni karokoa te toki. (Taraa Reirei 4.)

Kaota te kakoaua i aon kakabwaia aika a korakora are a roko man te bwabetito ao te kamatoaaki ao kawakinan berita aika tabu n te bwabetito. Kakabwaia aikai ni ikotaki ma kabwaraan buure ao ana bwaintituaraoi te Tamnei ae Raoiroi.

Kairakin te marooro n titiraki n te Bwabetito

Aomata n tatabemaniia ake a tauraoi ni bwabetitoaki a na titiraki iroun te tia kairiiri ae iai irouna te kariaiakaki n te nakoanibonga. N te mition, te aomata aio bon te tia kairiiri n te mwaanga ke te tioun. E kairii marooro n titiraki ibukin:

Aomata n te ririki 9 ao ni waerake are a tuai ni bwabetitoaki ao ni kamatoaaki.
Ataei n te ririki ae 8 ao iaona riki ake tiaki kaain te Ekaretia aia karo.
Ataei n te ririki ae 8 ao iaona riki ake a tia naba aia karo ni bwabetitoaki ao ni kamatoaki.

Kainibaire ibukin te tia anga te titiraki a katauraoaki i nano.

Karaoa te marooro n titiraki i nanon te tabo ae kamweraoi, te tabo ae onoti ike konaa n namakinaki iai te Tamnei.
Ngkana e titirakinaki te ataei, te kairake, ke te aine, toan te tia anga te titiraki e riai ni kaan i nanon reitan te ruu, te katangaina, ke te tabo ae bubura. Ngkana te aomata e tangiria bwa, temanna te ikawai e na kona ni kaoaki n iri i nanon te tai ni marooro n titiraki. Mintinare a na totokoi aroaro ni kabane ake a na kona ni karekea te aki oota.
Moanna ma te tataro.
Buoka te aomata n namakina te mwengaraoi.
Karaoa te marooro n titiraki bwa te taneiai n tamnei ae kaunganano.
Taraia raoi bwa te aomata e na mataata raoi ibukin karaoan te marooro n titiraki.
Aanga titiraki ibukin te bwabetito n aron aika a kaotaki i nano. Kangaraoi taian titiraki nakon ana ririki te aomata, ikawaina, ao aroaro nako ngkana a kainanoaki.
Kaeka nakon ana titiraki te aomata.
Manga rinanon rongorongon te Booma ibukin te Bwabetito ao Kamatoaaki bwa a na nakoraoi. Ngkana te aomata te ataei, te karo ke taan tararua a kainanoaki n tiaina te booma i mwain te bwabetito (taraa te “Bwabetito ao Kamatoaaki: Titiraki ao Kaekaana” te tiekition i nanon te mwakoro aei).
Kaoa te aomata ni kaota ana koaua ke n tibwa ana namakin.
Kaota am kakaitau ibukina ngkai kam kona ni kaitibo ma te aomata anne.

Titiraki ibukin te n te Bwabetito

Taian titiraki ibukin te bwabetito a kaotaki i nano:

Ko kakoaua bwa te Atua bon Tamara ae Akea Tokina? Ko kakoaua bwa Iesu Kristo bon Natin te Atua ao te Tia Kamaiu ao te Tia Kabooa te aonaaba?
Ko kakoaua bwa ana Ekaretia ao ana euangkerio Iesu Kristo e a tia ni kaokaki rinanon te Burabeti Iotebwa Timiti? Ko kakoaua bwa [te Beretitenti n te Ekaretia ngkai] bon ana burabeti te Atua? Tera nanon aio iroum?
Tera ae nanonaki iroum n te rairannano? Ko namakinna bwa ko a tia n raira nanom man am bure ake rimoa?
Ko a tia n reiakinaki bwa te riki bwa te membwa n Ana Ekaretia Iesu Kristo ibukiia Aika Itiaki ni Boong aika Kaitira e irianaki ma maiuakinan ana kainibaire te euangkerio. Tera ootam n aron kainibaire aika imwiina? E tauraoi nanom bwa ko na iri nanoia?
- Tuan te itiaki, are katabua te wenenibure i tinanikun te kabaebae n te mare ae e kinaaki i aan te tua i marenan te mwane ao te aine
- Tuan te kabwianibwai
- Tuan te Mauri
- Kawakinan te bong ae te Tabati ni katabua, ni ikotaki ma kanakin te toa ni katoa wiki ao n ibubuoki nakoia tabeman
Ko a tia ni karaoa te bure ae kakaiaki? Ngkana ngaia, ko mena ngkai i aon te tarataraaki ke ni kabureaki i tinaniku?
Ko a tia n irekereke ma kabwakaan te teei? (Taraa Aeniboki ni Kabuta, 38.6.1.)
Ngkana ko bwabetitoaki, ko berita iai ma te Atua bwa e tauraoi nanom ni katoka i aom aran Kristo, ni beku ibukiia tabeman, n tei bwa ana tia kakoauaa te Atua n taai nako, ao ni kawakin Ana tua i nanon maium. Ko a tauraoi ni karaoa te berita aio ao ni kakorakorako ni kakaonimaki nako iai?

Ibukin kaetieti ngkana e bon koaua raoi te aomata n ana kaeka nakon te titiraki 5 ke 6, taraa Aeniboki ni Kabuta, 38.2.8.7 ao 38.2.8.8.

Kataneiako ma taian kaetieti ao kainibaire n irekereke ma te bwabetito ao te kamatoaaki i nanon Aeniboki ni Kabuta, 38.2.8. Tabeua mai buakon kaetieti aikai a irekereke ma bwaai aika a onoti are ko na bon kaitarai.

Imwiin te marooro n titiraki, te mitiare ao te tia titirakinaki, a manga reitaki ma mitinare ake tabeman. Ngkana e tauraoi te aomata nakon te bwabetito, te mitinare e na kabwarabwarai bwaai aika a na riki n tain te bootaki ni bwabetito. A na kabwarabwara naba bwa te kamatoaaki n taainako e karaoaki i nanon te bootaki n te toa n te uoote are e maeka iai te aomata.

Ngkana e na Taonaki te Bwabetito

N tabetai e na taonaki te bwabetito ibukin kangaanga ma kakoaua ke tauiia. Ngkana e riki aei, tobwaa raoi te kanoan te waaki ma te karaurau ao n kainaki taekana. Buoka te aomata bwa e na oota n aron te katauraoi ibukin te bong ni bwabetito ae baireaki ibukin te tai ae na roko.

Kaunga the aomata ao anganna te kantaninga iroun Kristo ao Ana Mwakuri ni kamaiu. Butiia kaain te uoote ni kakaota te iraorao. Reitinako n angareirei ni moan tuua man te euangkerio ni karokoa e bon tauraoi te aomata ni bwabetitoaki ao ni kamatoaaki. Tataninga ni karokoa bairean te tai ae boou n te bwabetito.

Te Bwabetito ao te Kamatoaaki: Titiraki ao Kaekaaia

N na kainnanoa te kariaia ni bwabetitoan te ataei? Te Ekaretia e bon tabeainga ibukin maiu-raoia ataei ao te rau n aia otabwanin ni mweengaia. Te ataei ae uarereke, are e taekinaki n tuan te aba, e na bwabetitoaki ngkana a uaia ni kakoroaki nanon bwaai aikai:

Te karo(kaaro) aika taan nabenabe ke te tia (taan) tararua anga aia kariaia n te koroboki. A riai ni iai ootaia i aon reirei are e na reireinaki natiia ngkai ngaiia membwa n te Ekaretia. A riai naba n kukurei ni boutokaa te ataei ni karaoi ao ni kawakin berita aika tabu n te bwabetito.
Te aomata are e kaira te marooro n titiraki e karekea ana kairi te tamnei bwa te ataei aei e ataa te berita n te bwabetito. E na onimakinna raoi bwa te ataei aei e na kekeaiki ni kawakina te berita ae tabu aei man te ongotaeka ni kawakinan tuua, n irianaki ma kakaean ana bootaki te Ekaretia.

N na kainanoa te kariaia mairouia buiia ake a na bwabetitoa te buumwaane ke buuaine? Eng. Te aomata ae e a tia ni iein e na riai ni iai ana kariaia buun teuanne ke neienne i mwaain bwabetitoakina.

Ngkana te karo n te utu e aki tauraoi ibukin te bwabetito, e riai bwa N na bwabetitoia tabeman kain te utu ke n tataninga ni karokoa te karo e tauraoi? E bon tangiraki bwa kaain te utu a na bwabetito n ikotaki. Ma, ngkana tabeman aki tauraoi, kain te utu tabeman a kona ni bwabetito ngkana iai kariaia ae karekeaki.

E riai bwa e na iremwe bwabetitoaia kain te utu ni karokoa te karo e karekea te Nakoanibonga ae te Aaron ao ni karaoa te bwabetito boni ngaia? E aki. Mwaane ake a tibwa bwabetitoaki aki karekea te Nakoanibonga ae te Aaron n te bong are a bwabetitoaki iai. A riai moa n titirakinaki iroun te bitiobi ao ni kamatoaaki irouia membwa n te uoote.

N na kona n reireina ao ni bwabetitoa te aomata are e buuta ana arana te Ekaretia ke e bon buutaki? Aomata ake a buuta aia araia man kaainakin n te Ekaretia ke koraki ake a bon buutaki a konaa ni manga kaokaki man te bwabetito ao te kamatoaaki. Ngkana a tangiraki ni manga reireinaki, marooro ma taan kairiiri n te nakoanibonga n am tabo ao te beretitenti n te mition i aon katabeam are ko na anganaki.

I nanon te titeiki, manga karaoan te bwabetito e tiku i aan aia kaetieti te bitiobi ao te beretitenti n te titeiki. I nanon te mition, manga karaoan te bwabetito e tiku i aan ana kaetieti te mition beretitenti. Taan kairiiri aika a na karekea te kairaki mairoun te Moan Beretitentii ni kainanoana. Mitinare aki karaoi marooro n titiraki ibukin te bwabetito aikai ke ni kanoai Booma ibukin Bwabetito ao te Kamatoaaki. E ngae n anne, te mitinare e kona ni kaoaki bwa e na karaoa te bwabetito.

Membwa ake a maan n te Ekaretia ake a manga oki bon tiaki aika a manga rairaki. N aki taraa anne, mitinare a kona n tabetai ni karekea tabeia ae kakawaki ni buokiia ni kukurei n taian kakabwaia mairouia kaain n te Ekaretia.

Ma ngkana arona bwa te aomata iai ana tai ibukin ana bwabetito ma e aki kawakin ana motinnano? Tataninga nakon baairean te tai ibukin te marooro n titiraki ni karokoa te aomata e kawakin ana motinnano ao ni kawakin tauna ibukin te bwabetito. Taraa “Ngkana te Bwabetito E Kainnanoa Taonakina” i nanon te mwakoro aei.

Tera ngkana taanga a tangira bwabetitoaia ma a maeka n ikotaki? Taanga aika a maeka n ikotaki n tuai ni mare n te tua i marenan te mwaane ao te aine aki kona n bwabetitoaki ni karokoa a maiu ni kawakina tuan te itiaki. E nanonaki n aei bwa a bon aki maeka n ikotaki—tao bwa bon taanga ke taanga irouia mwaane ma mwaane ao aine ma aine—ke, ibukin te mwaane ao te aine, e nanonaki bwa a na mareaki. E raonaki naba ma kammwakuran te onimaki nakon te rairannano n aron ae kabwarabwaraaki i nanon Reirei ao Berita aika Tabu 20:37. Te mare i marenan te mwaane ao te aine e bon kakawaki n Ana babaire te Atua.

Titiraki 5 ao 6 i nanon te marooro n titiraki ibukin te bwabetito titirakina te aomata bwa e a tia ni karaoa te bure ae rawawata ke ni karaoa kabwakaan te nati. Tera ae N na karaoia ngkana temanna e kaeka “eng” nakon titiraki aika uoua aikai? Ngkana ko atai teuana man aroaro aikai i nanon te marooro n titiraki ibukin te bwabetito, tai titiraki ibukin taekana. Tai berita bwa te aomata anne e na kariaiakaki ibukin te bwabetito. N oneamwina, kaota am tangira ao am kabwarabwara ma te akoi bwa iai temanna ae e mwaatai man atatai riki e na marooro ma te aomata ao ni buokiia.

Kanakoa am bubuti i aon te marooro n titiraki ibukin te bwabetito nakon am mition beretitenti. Teuanne ke temanna ana kauntira e na marooro ma te aomata. Taraa Aeniboki ni Kabutak, 38.2.8.7 ao 38.2.8.8.

Tera ae N na karaoia ngkana te rekooti i aon kainakin te Ekaretia e a kaman karaoaki i mwain ae I kanakoa te Booma ibukin te Bwabetito ao te Kamatoaaki? Reitaki ma am beretitenti n te mition ibukin te kaetieti.

Am Kamatebwai

Iangoia bwa e tera aron am namakin ngke arona bwa ko rinanon te titirakinaki. Iangoi titiraki aikai ao koroi mwiin am namakin.

E na kanga te marooro n titiraki n taraa n aki kamweraoi nakoim? Tera ae kona ni karaoia ke n taekinna te tia titiraki ni kabebeteko?
Ko na kanga n tangira te tia anga te titiraki bwa e na reitaki ma ngkoe?
Ko na kanga n tangira ana kaeka te tia anga te titiraki ngkana ko kabwarabwarai nanououa ke ngkana ko kaotii bure aika a rawawata?

Te Bootaki ibukin te Bwabetito

Te bootaki ibukin te bwabetito ao te kamatoaaki e riai n taraa n onoti n tamnei ibukin te membwa ae boou. Te bootaki ibukin te bwabetito e riai ni baireaki n te tai ae waekoa ngkai te aomata e a tau ibukin te bwabetito. Kabwarabwara bwa tera ae baireaki ao bukin tera. Marooro ibukin te kunikai ae riai, n ikotaki bwa e na kanga n anganaki te kunikai ae mainaina ni bwainna ibukin te bwabetito.

Bootaki ibukin te bwabetito ibukiia ake a rairaki e bon baireaki i aan ana tararua te bitiobi. Te tia kairiiri ibukin ana mition te uoote (ngkana iai ae e a tia ni weteaki) ke temanna kaain te kooram n unimwaane are e kaira te mwakuri ni mitinare e bairea ao e kaira te taromauri. E babaire ma mitinare ake a bwanin aia tai. Te bootaki ibukin te bwabetito e riai n bebete, ni kimototo, ao n korakora iai te tamnei.

Kaoa te membwa man te bitiobiriki, te membwa man te beretitentii n te Bootaki n Aine ao te membwa n te beretitentii n te kooram n unimwaane (ngkana e aki kairia) bwa a na roko te taromauri ibukin te bwabetito. Ngkana e riai, kaoiia tabeman taan kairiiri man rabwata, taan kairiiri irouia kairake, ao taari ma titita n mwakuri n Ibuobuoki (ngkana iai). Mwakuri ma te aomata are e a tia ni bwabetitoaki ni kaoiia raoraona ao ana koraki n roko n te bootaki ibukin te bwabetito ao te kamatoaaki.

Iangoia ni kaoiia tabeman aomata ake ko reireiniia. Taneiai aikai a kona ni buokiia n namakina te Tamnei ao n reiakina riki taekan te euangkerio. Imwiin te bootaki, ririmwina ni maroroakin aia taneiai ao kaoiia bwa a na rereinaki.

Te bootaki ibukin te bwabetito e na kaairaki ma aikai:

Katangitang i mwain ae waaki
Te marooro ae kimototo mairoun te tia kairiiri n te nakoanibonga are e kaira te taromauri (te membwa n te bitiobiriki e riai ni kairia ngkana e kona)
Te anene ni kaukuki ao n tataro
Teuana ke uoua taetae aika a uarereke i aon botoniango n te euangkerio, n aron te bwabetito ao te Tamnei ae e Raoiroi
Rinean Anene
Te bwabetito
Te tai n rau ngkai koraki ake a na ira te bwabetito a oneiia nakon kunikai aika a mwau. (Anene n taromauri ke kunan te Moanrinan a kona ni katangaki ke n aneneaki n te tai aei. Ke te mitinare a kona n anga te marooro ae kimototo i aon te euangkerio.)
Kaotan koaua irouia membwa aika a boou, ngkana a tangiria
Te anene ni kainiin ao te tataro
Te katangitang i mwiin bwaran te taromauri

Ngkana e baireaki tain te bwabetito n te Tabati, rinea te tai are angaraoina ma bootakin te Tabati are a bon kakaraoaki.

Kamatoaaki

Te aomata e karekea te otenanti ni kamatoaaki i mwiin bwabetitoan teuanne ke neienne (taraa Reirei ao Berita aika Tabu 20:41). Te aomata ae e a tibwa rairaki e na riki bwa te membwa n te Ekaretia i mwin tian karaoan ao tauan mwiin taian otenanti n te bwabetito ao te kamatoaki.

Te kamatoaaki a bon mena i aan aia kaetieti bitiobiriki. Ma, e aki kaira te marooro n titiraki ae okoro ibukin te kamatoaaki.

Mwakuri ni kaan ma te bitiobi ao te tia kairiiri n te mition ibukin te uoote (ngkana e weteaki) ni kakoaua raoi bwa taan rairaki ake a boou a na bon kamatoaaki. Te kamotoaaki e riai ni karaoaki naba ni waekoa n riaina i mwin te bwabetito, e riai te Tabati are i mwiina. Ma, te bitiobi e kona ni kariaia bwa karaoaki te kamatoaki n tain aia bwabetito ngkana e riai. (taraa Aeniboki ni Kabuta, 18.8).

Koraki ake a rairaki a karaoaki kamatoaakiia n bootakin te toa n te uoote are a maeka iai. Te bitiobi e ti kaoiia mitinare unimwaane ake a beku i nanon te uoote n ira te kamatoa. Ngkana e karaoa te kamatoa te mitinare, e kainnanoa naba te kariaia mairoun te beretitenti n te mition (taraa Aeniboki ni Kabuta, 18.8.1). E na iai temanna kaain te bitiobiriki are e na iri.

Kabwanina kanoakin te Booma ibukin te Bwabetito ao te Kamatoa

E bon kakawaki bwa te rekooti ibukin te membwatibu e karaoaki i mwin bwabetitoan ao kamatoaakin te aomata. Ni kaineti ma aron rekooti i nanon ana bong, Moronaai e koroia bwa membwa aika a boou “a warekaki ibuakoia aomatan ana ekaretia Kristo, ao a tauaki araia, bwa aonga n uringaki ao ni kamwarakeaki man ana taeka te Atua ae raoiroi, ni waaki n te kawai ae eti” (Moronaai 6:4).

Ngkana ko reireina temanna are e a tauraoi ni bwabetitoaki, moanna ni kanoa te Booma ibukin te Bwabetito ao te Kamatoa i nanon te app ae Taetaekina Au Euangkerio. Kabwarabwara bwa te booma aei e na kabonganaaki ni karaoan te rekooti ibukin kaainakin te Ekaretia. Te rekooti aei kanoana rongorongo aika a kakawaki i aon taian otenanti are e karekei te aomata. Ngkana a mwaing membwa n te Ekaretia, tauan mwiin araia a kanakoaki nakon aia uoote ae boou n te aro are taan kairiiri n te tabo a na konaa ni boutokaiia.

N te tai ae waekoa te membwa ae boou e bwabetitoaki ao ni kamatoaaki, kanoa raoi te booma ma rongorongo i aon otenanti n tatabeua, n ikotaki bwa antai ae a karaoia. Ngkana ko a tia ni katabwanina kanoan te booma, koroi rongorongona i nanon te app Taetaekina Au Euangkerio ao uotiarake nakon te kiraaka n te uoote n tauii mwina n te kombiuta. N te tai ae waekoa te kiraaka e karekei booma, e rinanona ao e karaoa kawakinan tauan mwiin kaainakin te Ekaretia.

Imwiin karaon tauan mwiin aran te aomata ae kaaina te Ekaretia, te kiraaka e katauraoa te Beba ni Kakoaua i aon te Bwabetito ao te Kamatoa. Te beba ni kakoaua aei e bon tiainaaki iroun te bitiobi ao n anganaki te aomata.

Te ara ao te mwaane ke te aine i aon tauan mwiin te membwa ao te beba ni kakoaua a riai n titebo ma beeba ni kakoaua n ana bong ni bung, n aobitin te tabo ni bung, ke arana ae kinaaki n te tua.

Am Kamatebwai ke Ibukim ma Toam

Kamatebwaia Motiaea 6:1–3 ao Moronaai 6:1–4. E kanga rongorongo aika a kimototo aikai n irekereke nakon kawakinan rekooti aika booraoi ibukin te bwabetito ao te kamatoa?

Imwiin te Bwabetito ao te Kamatoa

Reitinako n Ibuobuoki

Teimatoa n raoraoniia ao boutokaia membwa akana a boou i mwiin bwabetitoaia ao kamatoaakia. Buokiia n roroko n taromauri ao karikirakea aroia ni iraorao ma membwa. Wareka Ana Boki Moomon ma ngaiia, ao buokiia n tibwa te euangkerio ma kaain aia utu ao raoraoia. Kabwarabwara nakoia My Covenant Path te boki ae uarereke. Reitinako kabongana te app Taetaekina Au Euangkerio ni koroi mwiin aia waaki, n aron rorokoia ni bootak n toa ao te reirei are a karekea.

Imwiin te kamatoaaki, reirei ni manga reita ana reirei ma mitinare. Ko na kaira te angareirei. Ma, ibuobuoki ma taan kairiiri n te uoote bwa a aonga mitinare n te uoote ke tabeman membwa n iri. Ngkana ko reirei, kaungaiia membwa aika boou ni kawakin aia motinnano ni kabane i nanon te reirei.

I nanon boowi n ibuobuoki ni katoa wiiki, marooro i aona bwa a na kanga membwa ni kona ni boutokaia membwa aika boou ao ni buokiia n teimatoa ni kabaeaki i nanon te Ekaretia. Baireia bwa antai are e na kabwarabwaraia nakon te kooram ke taan kairiiri n rabwata nako. Ibuobuoki n rorokoia tabeman membwa ngkai ko a manga anga te reirei riki. Tuatua katabeaia taari n ibuobuoki(ao titita n ibuobuoki ibukiia aine).

Imwiin kamatoaakin te mwaane, e a kona ni karekea te Nakoanibonga ae te Aaron ngke e koro 12 ana ririki ni maiu i mwaain banen te ririki. Te Nakoanibonga ae te Aaron a bane ni mena i aan ana kairiiri te bitiobi (taraa Aeniboki ni Kabuta, 38.2.9.1).

N riaina, reitaki ma te koraki ake ko a ti n reireiniia n reitinako i nanon maium. Boutokaiia ni karekei ni kabane kakabwaia man ana euangkerio Iesu Kristo.

“Ngkana ti namakina te nano ae uruaki ao te tamnei ae raraoma, ti karekea bwanaan Iesu Kristo, ni katobibiaki ni bain te mweengaraoi. Otenanti aika tabu e anga te bwaibwai n te berita ae tabu ao e ‘kaotaki mwaakan te aro n Atua’ ni kaitiaki nanora ao ara mwakuri ake ti karaoi [Reirei ao Berita aika Tabu 84:20]. Ma Ana tatangira n akoi ao abwakin rawawatana, Ana Ekaretia e riki bwa ara Auti n Iruwa” (Gerrit W. Gong, “Te Ruu n te Auti n Iruwan,” Riaona, Meei 2021, 27).

Buokiia Membwa aika Boou ni Karekei Kakabwaia man te Tembora

Membwa aika boou n aia ririki ae riai a kona ni karekea te rekomente n te tembora are e na anganiia te kariaia ni bwabetitoiia aia utu ake a tia ni mate (taraa Aeniboki ni Kabuta, 26.4.2). A na karekea te kariaia aei mairoun te bitiobi. Kaungaiia ao buokiia membwa aika boou ni karekea te kariaia ibukin te tembora ni waekoa n aron riaina. Ngkana e kaan te tembora, iangoia ni karababa te kakao ibukin te tai ae onoti ibukiia membwa aika boou ni karaoa te bwabetito ibukiia bakatibu ake a mate.

I nanon boowi n ibuobuoki ni katoa wiiki, baireia bwa antai ae e na kabwarabwaraia membwa aika boou nakoia taan kairiiri n te tembora ibukin te uoote ao n rongorongon te utu. Te tia kairiiri aei e na kona ni buokiia ni katauraoi ni karekei taian kakabwaia n te tembora man karaon oin aia berita aika tabu n te tembora.

Iango ibukin te Kamatebwai ao Karaoana

Am Kamatebwai

Koroi kangaanga ake a na kona ni kaaitarai koraki ake a tibwa bwabetitoaki. Bukin tera e kakaawaki bwa te aomata anne e na namakina te tangira ao te iraorao mairouia membwa n te Ekaretia?
Kamatebwaia Moronaai 6 ao Reirei ao Berita aika Tabu 20:68–69. Tera ae ko reiakinna man kiibu aikai n taekan buokakiia aomata ni katauraoi ibukin te bwabetito ao te kamatoa? Koroi bwa tera ae ko reiakinna. Tibwaa am iango ma toam i nanon am kamatebwai ma toam.

Kamatebwai ma Toam ao Toam are Kaibibitaki

Beretitenti Henry B. Eyring e kabwarabwara bwa bukin tera ana kainibaire te euangkerio a bon kakawaki. Maroroakin reirei aikai. Ko na kanga ni kaungaia aomata bwa a na kukurei ni kakoroi nanon kainibaire aikai?

Te Uea e katei Ana kainibaire n te aro bwa E na konaa ni kakabwaiaiira. Iangoi taekan kakabwaia akanne: E berita bwa koraki ake a kakoroi nanon kainibaire a na buokaki iroun te Tamnei ae Raoiroi. E beritana te rau i ibukim. E beritan ara tai ni karekei taian otenanti aika tabu i nanon Ana auti. Ao E berita bwa koraki ake a teimatoa ni maiuakin Ana kainibaire a na karekea te maiu ae akea tokina. …

“Ibukina ti tangiriia aomata ake ti mwakuri ni buokiia, ngaira ni kabane ti tangiria ni karaoa ae tamaroa n tabekiirake natin Tamara are i Karawa nakon te kakaonimaki ao te itiaki ike a kainnanoia ni karekei ni kabane ana kakabwaia te Uea. …

“… Ko moanna n taua ieta ana kainibaire te Uea ni mataata ao akean te kabwara bure. Ao ni mwaitin mwaingin te aonaaba mairouia ao ni kaenaenaia, ti riai n tiku iai ni karaoa arei” (“Kainibaire n te Kororaoi,” First Worldwide Leadership Training Meeting, Tianuare. 2003, 10–11).
Manga rinanon taian titiraki ibukin te bwabetito. Iangoia bwa ko na kanga n tobwai aroaro n aron aikai:
- Te aomata e aki tuangko bwa e bon tarataraaki ibukin te bure.
- Te aomata e tuai karekei kaeka nakon te tataro are Iotebwa Timiti bon te burabeti.
- Te aomata e moko n te tikareti uoua te bong n nako.
- Te aomata e aki koaua raoi bwa te aine e tia ni karekea te kaeka nakon ana tataro.
- Te utu a namakina te kukurei mairouia raoraoia ao aki rangi ni koaua ngkana a tauraoi ibukin te bwabetito.
Manga Rinanon te Booma ibukin te Bwabetito ao te Kamatoaaki. Bukin tera rongorongo ake ko katauraoi a na eti raoi ao a bane n tia?

Marooro ni Kauntira, Maungatabu n te Tioun, ao Marooro ni Kauntira ibukiia Taan Kairiiri n te Mition

Manga rinanon kakawakin marooro n titiraki ibukin te bwabetito. Maroroakinna bwa a kanga mitinare ni kona ni buokiia aomata ni katauraoi ibukin te marooro n titiraki.
Maroroakinna bwa a kanga kakaean taai aika a angaraoi ni kabonganaaki ibukin mwakuri n ibuobuoki n te bwabetito ao te kamatoaaki.

Taan Kairiiri n te Mition ao Kauntira n te Mition

Mwakuri ma nakoanibonga n te tabo ao taan kairiiri n rabwata n kakoaua raoi bwa a kabonganai ribooti i aon Rikirake ni Kawain Beritai aika Tabu i aon taina.
Reireiniia taan kairiiri, taan kairiiri n te tioun, ao taan kairiiri n te kataneiai ibukiia titita ibukin te marooro n titiraki ibukin te bwabetito. Kaoiia n anganiia mitinare te kataneiai ni katauraoaia aomata ibukin te intawiu.
Reireiniia taan kairiiri n te mwakoro ao tioun bwa a na kanga ni karaoa te marooro n titiraki ibukin te bwabetito.
Reirei bwa ko na kanga ni kaeka i nanon te intawiu ibukin te bwabetito ngkana te aomata e kaotia bwa teuanne ke neienne e karaoa te bure ae kakaiaki.
Ngakana e riai, rooko n te taromauri ibukin te bwabetito ibukiia membwa aika boou. Taetae ma membwa aika a boou ao karekea rongorongon rairakiia. Tibwaia bwa tera ae ko reiakinna ma toam ao ma mitinare.