Te Kabwarabwara nakon Tataekina Au Euangkerio

E anga te kaetieti te Uea nakoia Ana toro “kam na tataekina au euangkerio mai iroun te Tamnei, are te Tia Karaunano are e kanakoaki bwa e na reireia te koaua” (Tuua ma Berita aika Tabu 50:14).

Tataekina Au Euangkerio e karaoaki bwa ena buokiko ni kakoroa nakon tibwangam bwa te mitinare. E boboto i aon baika a kainanoaki ibukin te mwakuri ni mitinare. E aki kaekai titiraki ni kabane ke ni katauraoi kawai ibukin waaki ake ko kaitara ma ngaai. Ma e ngae n anne, bon te bwai ni ibuobuoki ae e rangi ni bongana ibukim ngkai ko rikirake i nanon mwaakan te tamnei ma ana konabwai. Kamatebwaia ao maiuakini tuua ma aron waakin te euangkerio are e kuneaki i nanon booki aika tabu ao i nanon naba te boki aei.

Tataekina Au Euangkerio e barongaaki bwa e na buokiko rinanon kawai aikai:

• Ataakin te kaantaninga ibukim ngkai te Mitinare

  • Mwakoro 1: Kakoroa Nanon Bukinakim ni Mitinare

• Reiakin ao reirei taian tua

  • Mwakoro 3: Kamatebwaia ao Reireia ana Euangkerio Iesu Kristo

• Rikirake i nanon karikirakean tamneim ao rairakim

  • Mwakoro 2: Ukoukori Koroboki aika a Tabu ao Katokaa i aom ana Otanga te Atua

  • Mwakoro 4: Ukora ao Katan iroun te Tamnei

  • Mwakoro 5: Kabonganaa Mwaakan ana Boki Moomon

  • Mwakoro 6: Ukoukora Anuan Maiun Kristo

• Katamaroaa am kona ni kaoiia ao ni buokiia aomata bwa a na karekea bwainin te euangkerio

  • Mwakoro 7: Reiakina Taetaen am Mition

  • Mwakoro 8: Kakoroan Bukin te Mwakuri rinanon Kouru ao Babaire

  • Mwakoro 9: Kakaeia Aomata aika Ko na Reireiniia

  • Mwakoro 10: Reirei ni Karikirakea te Onimaki iroun Iesu Kristo

  • Mwakoro 11: Buokiia Aomata ni Karaoi ao ni Kawakin baike a Kabaeaki iai

  • Mwakoro 12: Buokiia Aomata ni Katauraoia ibukin te Bwabetito ao te Kamatoa

  • Mwakoro 13: Reitaki n te Nano Teuana ma taan Kairiiri ao Membwa ni Katea te Ekaretia

Kakaraoa kamatebwaia taian mwakoro rinanon am mition. Rinanoa Mwiin Am Mwakuri. Katei kouru ao ni karaoi babaaire ni kakoroi bukiia. Mitinare ake a tauraoi raoi ni katoa bong ao ni katamaroai aroia a na konaa ni kakabwaiai maiuia naake a reireiniia ao ni beku ibukiia. A na karekei naba kakabwaia i nanon maiuia.

Reken te Tai ibukin te Kamatebwai ao Reirei

Te kamatebwai ae korakora i nanon am tai ni mena n te mition e na buokiko ni kakorakora am koaua n te Euangkerio ao n riki bwa a na reirei te Uea ae e kakaonimaki.

Kamatebwaia booki aika tabu ao Tataekina Au Eungkerio e na ibuouboki n reirei ma mwaakan te tamnei. E na buokiko naba ni karaoa am reirei are e kaineti raoi nakon kainanoia aomatan tatabemaniia nako.

Kamatebwai aika a bongana ao taai n reirei ni ikotaki ma:

• Am kamatebwai.

• Kamatebwai ma toam.

• Kaibibiti Toa.

• Boowi ni kauntira n te mwakoro.

• Maungatabu n te tioun.

• Aia kauntira taan kairirii n te mition (ibukiia taan kairiiri irouia mitinare aika kairake).

Angiin te bong, kanoan am tai ni mitinare iai i nanona am tai ni kamatebwai ma toam. Taraa Aroia Mitinare ae Tau ibukin Rikiia n Riki bwa Ana Reirei Iesu Kristo,, 2.4, ibukin rongorongon am tietura ni katoa bong.

Tera are ko reiakinna i nanon am tai ni kamatebwai e na kona ni buokiko n am kamatebwai ma toam ao ibukin reiakinam riki tabeua n aron are ae koreaki ieta. N teina aei ao “reiakini i marenami reirein te abanuea” (Reirei ao Berita aika Tabu 88:77).

Iango ni Kanakoraoa Am Kamatebwai n Tataekina Au Euangkerio

Tataekina Au Euangkerio e reitii koroboki aika tabu ma aroia n te Euangkerio ni kabane ni buokiko bwa kona ataa te Tia Kamaiu ao Ana euangkerio. E kananonaaki bwa e na kaniiko nakon booki aika tabu ao ni kakorakora am kamatebwai i aoia. Kamatebwaia kiibu man koroboki aika tabu ni katoai mwakoro aikai rinanon am mition.

Ni katoai mwakoro i nanon Tataekina au Euangkerio iai ibuakona iango ao waaki ake ana buokiko ni kamatebwaia ao ni maiuakina te bwai are ko reiakinna. Kabonganai aikai inanon am kamatebwai i bon iroum ao am kamatebwai ma toam (taraa Kainibaire ibukiia Mitinare, 2.4). Ko konaa ni kabongai naba i nanon tain boowin te kauntira n te Mwakoro ao maungatabu n te tioun. E na rangi ni bongana riki am kamatebwai ngkana ko kakaei kawai ni kabonganai baike koa tia n reiakin.

E ibuobuoki riki ngkana iai am babaire ibukin am kamatebwai i bon iroum. Ko konaa ni karaoa am babaire are e na moanibwaia reirein tuua n te euangkerio are ko tangiria bwa ko na ota riki iai. Ko konaa naba ni katea tamnein am kamatebwai n te mwakoro anne i nanon Tataekina Au Euangkerio. N te katooto, ko konaa ni kabonganaa te reirei inanon mwakoro 3 ni kaira am kamatebwai iaon Reirei ma moan tuaa ake kona reireia. Ko riai n atai raoi reirei aikai bwa ko aonga ni konaa n anga te reirei mairoun te Tamne ni bon oin am taetae.

Korei rongorongo ngkai ko kamatebwai. Kabonganaa te beeba ke te tieno are maeu man te iti (n aron te Gospel Library) ni buokiko bwa kona oota raoi, mataata, ao ni uringa bwa tera are ko a tia n reiakinna.

Moana am kamatebwai ma te tataro ibukin te Tamnei ae Raoiroi bwa e na buokiko n reiakin bwaai. E na anganiko te ataibwai te oota, ao te koaua are e na kakabwaiaa maium ao ni konaa naba ni kakabwaiaia tabeman. Kauka am iango ao nanom nakon namakin ao nonoori ake ko karekei mai Irouna. Karinii nonoori aikai n am rongorongo ake ko koroi.

Manga rinanon riki am tieno ni kamatebwai ni katoatai ni kauringa are ko a tia n rinanona ma te tamnei, taarai nonoori aika boou, ao kinaa rikirakem.

Tataekina Au Euangkerio Application

Kabonganaa te app i aon Tataekina Au Euangkerio ni buokiko bwa ko na kanga ni kabonganai reirei aika ko reiakinna. Te app aei e tauraoi naba iaon am tareboon. Iai i nanona baika a kona ni buokiko ni kakoroa nanon am kaantaninga ni mitinare. Bwaai aikai bon:

• Rongorongo ibukin kainanoia ao rikirakeia aomata ake ko reireiniia.

• Te tabo n tauan mwiin am kakamwakuri ni kaineti ma kouru.

• Te karentare are ko na taua iai mwiin am baire ao bairean am waaki.

• Mwaben am aono ao tabeua riki rongorongo aika a kakawaki ake a na buokiko ni kakoroa nanon am kouru.

Tataekina Au Eungakerio iai naba i nanona iango ibukin kabonganaan te app ni buokiko ni karekea reireiniia, ao ni babetitoiia aomata.

Kabonganaa te Tataekina Au Euangkerio irouia Membwa n te Ekaretia

Tataekina Au Euangkerio bon te bwai ae e rangi ni bongana tiaki tii ibukiia mitinare ma ibukiia naba membwa ni kabane n te Ekaretia. Te katooto, kamatebwaiana e na buokiia membwa:

• Reiakina ao n reireia ana euangkerio Iesu Kristo (kamatebwaia mwakoro 1, 2, 3, ao 10).

• Kaekai titiraki ibukin te euangkerio (kamatebwaia chapters 3 ao 5).

• Kaotako riki i aon ukoukoran ao katan iroun te Tamnei ae Raoiroi (kamatebwaia mwakoro 4).

• Ataa mwaakan ana Boki Momoon (kamatebwaia mwakoro 5).

• Ukora Anuan maiun Kristo (kamatebwaia mwakoro 6).

• Kakoroi nanon aia berita aika tabu n tibwaa te euangkerio man maiuakinan te anua n tangira, tibwatibwa, ao kakao (kamatebwaia mwakoro 9 ao 13).

• Katea te nano teuana ma mitinare ake a bwanin aia tai (kamatebwaia mwakoro 13).

Kamatebwaia Taetaekina Au Euangkerio—moara riki mwakoro 3—e na konaa n rangi ni ibuobuoki nakoia kairake ao ikawai ake a kakatauraoi ibukin te mwakuri ni mitinare.