Nakoa n te Mition
Mwakoro 7: Reiakina Taetaen am Mition

“Mwakoro 7: Reiakina Taetaen am Mition,” Tataekina Au Euangkerio: Te Kairi n Tibwaan ana Euangkerio Iesu Kristo (2023)

“Mwakoro 7,” Tataekina Au Euangkerio

te aonaaba ao buraeki

Mwakoro 7

Reiakina Taetaen am Mition

Iangoa Aio

  • N na kanga ni kakorakora au onimaki iroun te Uea bwa e na buokai n reiakina te taetae ae boou?

  • Bukin tera ngkai I riai n reitaanako katamaroan au konabwai n te taetae?

  • N na kanga ni katamaroa au konabwai n taetae ao n anga reirei n taetaen au mition?

  • N na kanga ni karekea te bwaintituaraoi n Neewe ke taetae nako?

Katauraoiko n te Maiu n Tamnei

E taku te Uea, “Aomata ni kabane a na ongo bwaninin te euangkerio n oin neweia, ao n oin aia taetae, rinanoia koraki ake a katabuaki ni mwaakana” (Reirei ao Berita aika Tabu 90:11).

Baika a koreaki ni karinanaki inano bon kawai ake a na kona ni kakorakora am onimaki bwa te Uea e na buokiko n anga reirei ao ni kaota am koaua n taetaen am mition:

  • Kakoaua bwa ko a tia ni weteaki iroun te Atua mairoun te burabeti.

  • Bubuti ana ibuobuoki te Atua rinanon te tataro ae nako man te nano ni koaua.

  • Mwakuri ma te botumwaaka ni kamatebwai, kataneiai, ao kabonganaan taetaen am mition ni katoa bong.

  • Ko riai n tau ibukin ana iraorao te Tamnei ae Raoiroi man kawakinan tuua ao ni maiuakin kainibaire ibukiia mitinare.

  • Kaitiakii am mwakuri man tangiran te Atua ao n tangiriia Natina ao nanom ni kakabwaiaiia.

Kabanea Nanom ao n Nanomwaaka

Reiakinan te anga reirei ae nakoraoi n taetaen am mition e kainnanoa te konabwai ae nanomwaaka ao ana bwaintituaraoi te Tamnei. Tai kubanako ngkana e taraa ni matoatoa te mwakuri. E kainnanoa te tai ae bati. Bwaina te taotaonaki n nano. Ngkai ko kabanea nanom n reiakina te taetae, ko na karekei rabakau aika a tau ni kakoroa nanon am kaantaninga ngkai ko mitinare.

Ko aki maroaa n reiakina taetaen am mition. A na buokiko Tamara are i Karawa ao Iesu Kristo ngkai ko ukora Aia ibuobuoki. Ukora ao tatauraoi nakon ana ibuobuoki toam, membwa, naake ko reireiniia, tabeman mitinare, ao aomata riki tabeman.

Kakauongo raoi ao taetae n te taetae anne ni katoaa reken taina. Tai maaku ngkana ko karaoa te kairua. Aomata nako ake a reiakina te taetae ae boou a karaoi naba kairua. A oota aomata, ao a na butimwaea am kekeiaki ngkai ko reiakina aia taetae.

Kateimatoako ni katamaroa rabakaum n taetae ni karokoa banen am mition. Ngkai e rikirake am konabwai n taetae, a na kan ongora riki aomata n te bwai are ko taekinna nakon arom n taekinna. E na karako raraomam n arom n reitaki ao ni kona raoi ni kaekai kainnanoia ake tabeman.

Unimwaane Jeffrey R. Holland

“Ti … kantaningaia bwa mitinare n tatabemaniia nako ake a reiakina … te taetae ae boou a na kona ni kanakoraoia n aanga aika a mwaiti. … Ao ngkai ko karaoia aei, rabakaum n [anga reirei] ao ni kakoaua a na rikirake. Ko na butimwaeaki raoi ao n tangiraki n am anainano riki n tamnei irouia [aomata ake ko reireiniia]. …

“Ko na aki onimakina te bwai are ti aranna bwa tii aia wokaburare mitinare. Kabanea nanom n te taetae, ao kona anganaki te kona ae moan te korakora ni karoko irouia ao inanoia aomata” (Jeffrey R. Holland, missionary satellite broadcast, Aokati. 1998).

Teimatoa ni kabongana taetaen am mition imwiin okim nakon mweengam. E a tia te Uea ni kabanea ana tai iroum, ao E na kona ni kabongana rabakaum n taetae rimwi riki inanon maium.

Reiakina te Taetae n Imatang

Ngkana ko babanga n taetae n Imatang, ko riai ni kamatebwaia ngkai ko mitinare. Aei e na bon kakabwaiako inanon am mition ao inanon maium ni kabane. Reiakinan te Taetae n Imatang e na kakabwaiaiia am utu.

Ibukin buokam riki n reiakinan te taetae n Imatang, taraa EnglishConnect for Missionaries.

e koroboki te aine inanon te tienoo

Reirei ibukin Reiakinan te Taetae

Karaoa Mwiokoam

Katea am kouru ibukin katamaroaan am konabwai n taetae, kataneiako kakaraoi ni katoa bong. Karaoa bairean kamatebwaian te taetae. Kabongana te taetae ni katoa reken taina.

Kamateraoa Raoi Karaoan Am Kamatebwai

Kamwakuri baike ko kamatebwai ni bwaai aika a riki inanon te maiu ao inanon am waaki ake ko karaoi ni katoa bong. Kabanea nanom iaon te taetae are e na buokiko n taekina te bwai are ko na riai n taekinna.

Kakaea Angam n Reitaki

Taetae ma toam ni mwaitin te tai are ko kona. Kabongana raoi te tai ae reke n reiakinna ao ni kataneiaiko. Te katooto, ko kona n titiraki te membwa are e a okira te aro ke temanna are ko reireinna bwa e na buokiko n te taetae. Bon akea te bwai n onomwi ibukin taetaem ma ake bon kaain te aba.

Tai Kakabotau

Tai kabotaua rabakaum n taetae ma ake toam ke mitinare tabeman. Te kakabotau e na kairiko nakon te kainikatonga ke te bwarannano.

Reiakin Raoi Iango aika a Boou

Manga rinanoi ake ko a tia ni kamatebwaia n taai nako, ao kataneiako karaoia inanon waaki aika a boou. Aei e na buokiko ni manga uringi ao ni kamwakuri baike ko reiakin.

te mwaane ae taraa te boki

Karaoa Bairean Kamatebwaian te Taetae

Karaoan te baire ibukin kamatebwaian te taetae e na uaia ni buokiia mitinare aika a boou ao ake a mwatai ni kabanei nanoia iaon baike a kona ni karaoi ni katoa bong ni katamaroa aia konabwai ni kakarabakau n taetaen aia mition. N am baire e na iai inanona baike ko na karaoi n tain am kamatebwai n te taetae ao inanon te bong anne.

Mwaneka aika imwiina a kaotia bwa ko na kanga ni karaoa bairean am kamatebwai n te taetae man kabonganaan karaoan te kouru man mwakoro 8. Kataneiako n te waaki aei n aron kainanoana.

  1. Tataromwaaka katei am kouru ao karaoi am babaire. Katea am kouru ni katoa wiiki ao ibukin te bong ae koraki ni katamaroa am konabwai n reitaki ao n reireia te euangkerio. Kairii bwaai ake ko motinnanoi ni kan karaoi nakon am ururing, n aron taeka, kibuntaeka, booki aika tabu, ao mwakoro.

  2. Korea Mwiina ao Bairea Taina. Baireia bwa tera bwaai ni ibuobuoki ibukin te taetae ae a na buokiko ni karokoko n am kouru. Bwaai ni ibuobuoki ibukin te taetae bon booki aika tabu, rekitionari, booki ibukin te kuramwa, te app ae te TALL Embark, ao tabeua riki. Bairei taai ake ko nakaraoa raoi iai am kamatebwai ao ni kabongana te taetae. Te katooto, ko kona ni bairea am tai ni wareware ni kabaibati man ana Boki Moomon inanon 15 te miniti ni katoa bong n tain te katawanou.

  3. Mwakuria are ko baireia. Te Uea e tangira te kekeiaki, ngaia are nanomwaaka ni kakoroi bukin am kouru. Kamanoa am tai ni kamatebwaia te taetae ao manga bairea riki taina ngkana iai kangaanga aika a kaoti.

  4. Manga rinanona ao ririmwiina. Kakaraoa n taai nako manga rinanoan am babaire ibukin am kamatebwai n rinanoia ngkana e nakoraoi. Kaoa toam, am tia kairiiri n te mition, membwa, ao tabeman riki man am aono bwa a na anga aia kawai bwa e aonga n tamaroa riki am kekeiaki. Irii waaki n tutuo n taai nako iaon te taetae n taina are e baireaki bwa ko na taua mwiin am kekeiaki ao kakaei aanga are ko na katamaroa riki iai.

Kabaeranta tain am kamatebwai n te taetae imarenan kouru aika teimaan ibukin katean aan rabakau ibukin kabonganaan te taetae ao kouru ibukin te tai aei iaon waaki ni kakukurei aika a onoti ao aomata ake ko reireiniia.

N am tai ni kamatebwaia te taetae, kabaeranta am kouru ao am baire ae kaineti ma taabo aika a tau ibukin taetae n aron ae kaotaki ikai. Baireia bwa tera ae ko na reiakinna n te bong ae bwanin.

rabakaum ni kakauongo

rabakaum ni wareware

te kuramwa

rabakaum n taetae

rabakaum ni koroboki

wokaburare

Am Kamatebwai ke Ibukim ma Toam

Karekea am tai ni katoa wiiki n tuoa am kamatebwai n te taetae man titirakiniko titiraki aikai:

  • I kamatebwaia taetaen au mition ni katoa bong n te wiiki aei? Tera ae I kona ni karaoia bwa e na reitinako n tamaroa taetaen au mition?

  • Au baire a buokai ni kunea, n reirei, ao ni kanakoraoa au mwakuri ma membwa? Tera bitaki ae I riai ni karaoi ni karaoan au babaire?

  • Terana ae I kukurei riki ni karaoia ibukin au kamatebwai n te taetae? Tera ae I kukurei riki ni kan karaoia?

  • Mwaitira te tai ae N na kabanea ni kataneiai ni kakauongo, ni wareware, ni koroboki, ao n taetae? N na kanga ni kamatebwaia raoi te wokaburare, kuramwa, ao atongan te taeka?

  • Tera waaki ni kakukurei ao bwaai n ibuobuoki aika I kabonganai ni kamatebwaia te taetae? Angara mai buakon aikai ae N na buokaki riki iai? Baikara bwaai n ibuobuoki riki tabeua ke waaki ni kakukurei aika a na rangi n ibuobuoki?

  • Baikara riki bwaai aika a kainnanoa nanora nako iai?

Imwiin kaekaan titiraki aikai, kangaraoia ma am baire ibukin am kamatebwai ao n nooria ngkana iai mwiina ae nakoraoi. E na kairiko te Tamnei ngkai ko teimatoa ni kakaenako ibukin kanakoraoan am kamatebwai iaon te taetae.

Reirei ma Toam

Buokiia toam bwa a na namakina te tokanikai ao ni karekea te onimaki n reiakinan taetaen te mition ke n reiakinan te taetae n Imatang. Anga am taeka ni kaunganano ae bati nakoia toam ao tabeman mitinare ngkai a tabe n rikirake.

Katauraoi kaeka aika a bebete ao ni karaoia ma te akoi. Anganiia te tai ae mwaiti bwa a na anga reirei ao ni kakoaua n te aro ae nakoraoi. Ataia bwa e kanga te mitinare ae mwaatai ni buoka toana iriira te rongorongo ae koaua aei.

I a bon tibwa roko n au kauoua n tabo ngke e a tuangai naba toau bwa au tai n tibwaa au kibu ibukin kanan tamneira ni kaitibora n tain te katairiki. Moan toau e rangi ni kukurei n taainako n anga te reirei, ao I a taneiai n anga mwakoron teutana te reirei ao imwiina ai te ongorongora.

I kataia n anaa nanon toau bwa e riai n anga ana kibu ibukin kanan tamneira, ma e kaungaai bwa N na karaoa mwiokoau. I kataneiaai ni karaoia ma ana ibuobuoki.

Ngke e a roko te tai, I kauka au boki ae tabu ao ni wareware man 3 Nibwaai 5 ao 7. Kanga I bon rootaki ma I kataa au kona ni kabwarabwaraa bwa tera bukina ngkai I namakinna bwa iai bonganan kiibu ake I rinei, ao e rauaki nanou ngke I a tia ni karaoia. Ngke e tabekaki te titiraki, I taraa toau bwa e na kaeka, ma e kaina wiina n aki kan taetae. Anne ngkanne ngke I a bon miimi i bon irou ngke e a bon reke naba au kaeka n te taetae ni Buranti ae mataata raoi. I a bon rangi ni miimi riki ngke te aomata anne akea namakinan ae kanga I aki mweengaraoi n aron au konabwai n reitaki. I karekea nanomwakau ao n ataia bwa au taetae ni French e tamaroa nakon ae N na aga kamoamoakiu iai.

E nako te wiiki ma kanoana, ao toau e teimatoa ni kariaia bwa N na anga te reirei—e ngae ngke I taku bwa I aki kona ni karaoia ao e ngae ngke tao e bon miimi ngkana I kona ni karaoia. I namakinna bwa I a tia n riki bwa te bwai ni mwakuri iroun Tamara are i Karawa ma tiaki ae N na riki bwa te rao ae aoriorioa n aki karongoa.

Am Kamatebwai ke Ibukim ma Toam

Mwakuri ma mitinare ake tabeman bwa a na buokiko n reiakina taetaen am mition.

  • Ngkana ko mwakuri ma te mitinare ae boou, ko na kanga ni buoka raoi toam n reiakina te taetae ke n reiakina te taetae n Imatang?

  • Ngkana ngke te mitinare ae boou, aekakira te ibuobuoki ae ko na tangiria mairoun toam?

mitinare a reireia te aine

Reiakinan te Katei ao te Taetae

Te Katei ao taetae iai rekerekeia. Ataakin kateia aomata e na ibuobuoki ni kamatata n te anga are e kabonganaaki iai te taetae. Te atatai aei e na buokiko naba ni maroroakina rongorongon Kaokan te Euangkerio n te kawai ae onoti ma ni mataata nakoia aomata.

Teuana mai buakon bwaai aika moan te kakawaki ae ko kona ni karaoia bon karekean aia kakoaua ma aia tangira aomata ni karinea ao ni kawakin aia katei n anga aika a riai. Angiina mitinare aika a rianako a tia ni karaoa aei (taraa 1 I-Korinto 9:20–23).

Am Kamatebwai ke Ibukim ma Toam

Kabongana te iango ae inano bwa e na buokiko n tauraoi n reireina te aomata temanna ae kaokoro ana katei ao arona.

  • Iangoi taekan aia katei ma aia aaro aomata ake ko reireiniia. Ko na ataa rongrongoia ae e kona ni karekea kangaangan otaia n reirein te euangkerio. Bairei kawai n anga te reirei iaon aei n ae mataata raoi.

Bwaintituaraoi n Neewe

Ana bwaintituaraoi te Tamnei a bon koaua. Bwaintituaraoi n neewe ke taeka ao te raitaeka n taeka nako a mwaiti kaotioti iai. Tabeua mai buakon aikai bon te taetae, te atatai, ao rairan taian taetae. Ni boong aikai bwaintituaraoi n neewe n taainako ao a kaotaki iroun te Tamnei-ae kanakoraoa aron te reirei ao te kamatebwai bwa e na buokiia mitinare n reiakina taetaen aia mition.

Te Tamnei ae Raoiroi e kona ni kaota koauan am kakoaua e ngae ngke iai te kangaanga ae na kaoti n aron te reitaki n te taetae imarenam ao naake ko reireiniia. N ai arona naba, te Tamnei ae Raoiroi e kona anganiko taeka ao kibuntaeka ni kauringko ao ni buokiko n oota ni baike a taekin aomata mai inanoia.

Ao riki, aki kona n reke bwaintituaraoi aikai iroum ngkana bon akea am kakamwakuri. Ko riai ni kakaonimaki n ukori bwa aonga ni kabwaiaki iai tabeman (taraa Reirei ao Berita aika Tabu 46:8–9, 26). Irarikin ukoran bwaintituaraoi n neewe bon te mwakuri ao ni karaoa am kabanea ni kona n reiakina te taetae. Bwaina te taotaonaki n nano ngkai ko kamatebwai mwaaka ao ni kataneiako n te taetae. Onimaki bwa e na buokiko te Tamnei ngkai ko nanomatoa n am kekeiaki. Onimaki bwa ko na kona ni karekei bwaintituaraoi n neewe are a na buokiko ao naake ko reireiniia.

Ngkana e kangaanga iroum bwa ko na kabwarabwarako raoi n aron ae ko tangiria, uringnga bwa te Tamnei e kona n taetae nako nanoia natin te Atua. E reirei Beretittenti Thomas S. Monson:

“Bon iai teuana te taetae …ae a taneiai iai mitinare ni kabane—ana taetae te Tamnei. E aki reke man booki n reirei ae koreaki irouia aomata, ke e reke rinanon te wareware ke te kamatenano. E roko ana taetae te Tamnei nakon te aomata are e ukeuke ma nanona ni kabane ni kan ataa te Atua ao ni kawakin Ana tua. Rabakaum iaon te taetae aei e angan te aomata te kariaia ni kaitarai baike a totoko, n tokanikai iaon kangaanga, ao n ringii nanoia aomata” (“The Spirit Giveth Life,” Ensign, Tuun 1997, 2).

Am Kamatebwai ke Ibukim ma Toam

Kabonganai taeka aikai n tuoa am kekeiaki ibukin ukoran bwaintituaraoi n neewe. Korei am namakin ao am kouru bwa a na buokiko ni kanakoraoa am kamatebwai iaon te taetae.

Iango ibukin te Kamatebwai ao Karaoana

Am Kamatebwai

  • Rinanon bwaai n ibuobuoki ibukin te taetae iaon te Missionary Portal. Ataa te bwai ae ko tuai karaoia, ao katea te kouru ibukin boong akana imwiina.

  • N am boowi ni kauntira ibukin te mwakoro n are imwiina, butiia te mitinare ae rangi ni mwaatai ibukin nakoraoin ana konabwai iaon te taetae bwa tera ae karaoia teuanne ke neienne n arona n reiakinan te taetae.

Kamatebwai ma Toam ao te kaibibiti Toa

  • Kataneiai reireini ngkami i bon imarenami taetaen ami mition. N te moan tai, ao e na rangi ni bebete aron aia anga reirei mitinare aika a boou, tibwaa am koaua ae bebete, ao kamatenanoi koroboki aika tabu. Ngkai e tabe n rikirake aia onimaki ao aia konabwai, a na kona riki n iriira waakin te anga reirei ae bwanin.

  • Rinanon iango inanon te mwakoro aei ao bwaai n ibuobuoki ibukin te taetae iaon te Missionary Portal. Maroroakinna tera taian kaoti ake ko kona ni kabonganai n am tai ni kamatebwai ma toam n te wiiki are imwiina.

  • Butiia toam bwa e na kakauongo bwa e kanga atongan taeka iroum ni buokiko bwa ko aonga n nakoraoi riki. Butiia teuanne ke neienne bwa e na korei bwaai ake ko aki oota iai. Korei rinanin taeka, kibuntaeka, ke te kuramwa are e na kona n ibuobuoki. Kamataata ao kataneiaiko bwa ko na kanga ni kabonganai rinanin am taeka akanne ni waaki ake a na karaoaki rimwii.

  • Kakaonimaki kataneiaiko ni kakauongo. Bairea am tai inanon te ngaina ni kakauongo n ataa te taeka ao kanikina ake ko a tia n reiakin. Ngkana ko ongo te mwakoro n taeka ae kaokoro kabwarabwaraana n aron are ko taneiai n taekinna, koreia ao kataneiako taekinna.

  • Korei rinanin bwaai ake a taekinna aomata n te bong anne. Babaire ao kataneiaiko n aanga ake ko na kona ni kaeka iai.

Kauntira n te Mwakoro, Maungatabu n te Tioun, ao Kauntira ibukiia Taan Kairiiri n te Mition

  • Kaoiia taan taetae aika kaain te aba bwa a na nako n ira teuana mai buakon boowi aikai. Baireia ma mitinare bwa a na reireiniia inanon kurubu aika a uarereke. Butiia ake bon kaain te aba bwa a na korei mwiin bwai ao n anga aia kaeka iaon aia kekeiaki mitinare iaon te taetae.

  • Moantaai mwiokoa temanna ke uoman mitinare bwa a na taekina materaoin aia kekeiaki are e reke inanon kamatebwaian te taetae.

  • Mwiokoa te mitinare ae e mwaatai bwa e na taetae ni kakimototoi tabeua mwakoron taeka are a kangaanga ibukiia mitinare. Tuanga teuanne ke neienne bwa e na kaoti tabeua katooto ni kabonganaa taeka aika a tamaroa, ao tuangiia mitinare bwa a na kataneiaia ni kakaraoia.

  • Tuangiia mitinare ake bon kaain te aba ma aia katei bwa a na tibwaa aia nonoori.

Taan Kairiiri n te Mition ao Kauntira n te Mition

  • Katuruturua kakawakin te nanomatoa ni kamatebwaia te taetae ni katoa bong.

  • Kaungaia mitinare bwa a na kabongana taetaen te mition n te tai ae mwaiti n aron ae a kona.

  • Katauraoi bwaai ibukin bairean te tai ni kamatebwai n taetaen te mition n angana are e na baireaki iai. Manga rinanoa aei n te boowi ni kauntira n te mwakoro.

  • Kakaei tibwanga ni marooro ma mitinare n te taetae are a reiakinna. N te tai teuana ma teuana ao karaoa te intawaiu mangaiia n te taetae aei.

  • Butiia taan kariiri n te aba ao membwa aia iango bwa na kanga mitinare ni katamaroa aia konabwai iaon te taetae.

  • Anga te kaetieti n te maungatabu n te tioun ke n te boowi ni kauntira ibukiia taan kairiiri n te mition iaon kairua ake a okioki ake aki toki ni kakaraoi mitinare ake a reiakina taetaen am mition.

  • Reireiniia mitinare taekan ana bwaintituaraoi te tamnei.

  • Kamwataua n taraia raoia mitinare ngkana anga reirei n taetaen te mition.