“Mwakoro 3: Te Kakao nakon te Bwabetitoaki ao te Kamatoaaki,” Tataekina Au Euangkerio: Te Kairi nakon Tibwaan Ana Euangkerio Iesu Kristo (2023)
“Te Kakao nakon te Bwabetitoaki ao te Kamatoaaki,” Tataekina Au Euangkerio
Mwakoro 3
Te Kakao nakon te Bwabetitoaki ao te Kamatoaaki
Aan Reirei
Ngaira ni kabane bon natin Tamara are i Karawa. Ti roko nakon te aonaaba ni karekea ara tai n reiakinaki, rikirake, ao n riki n ai Arona bwa ti aonga ni kona n okirikaki Nakoina (taraa Motes 1:39). Ti aki konaa n riki n ai Arona ke n okirikaaki Nakoina n akean te buoka mairoun te Atua. Tamara are i Karawa e kanakoa Natina te Mwaane, Iesu Kristo, bwa e na karaoa te mwakuri ni kamaiu ibukira ao n urua ana kabaebae te mate (taraa 3 Nibwaai 27:13–22).
Ti karekea te kabooaki man mwaakan Kristo man kammwakuran te onimaki Irouna n te rairannano, ni bwabetitoaki, karekean te Tamnei ae Raoiroi rinanon te kamatoaaki, ao n te teimatoa ni uaa te toki. Kawakinan berita aika tabu n te bwabetito bon te moan mwaneka n kabaeakira nakon te Atua n te aro bwa te Tamnei ae Raoiroi e na kona ni kaitiakira, kakorakoraira, ao ni bitii aroarora nakon te tamaroa. Te rinanon te kakairi ae tabu aei e aranaki bwa te manga bungiaki n te tamnei. (Taraa 2 Nibwaai 31:7, 13–14, 20–21; Motiaea 5:1–7; 18; 27:24; 3 Nibwaai 27:20; Ioane 3:5.)
Te manga bungiaki n te tamnei e moanaki ngkana ti bwabetitoaki n te ran ao te Tamnei. Te bwabetito e bon kakimwareirei ao te otenanti ae kantaningaaki. Ngkana ti bwabetitoaki ma nanora ae uruaki ao tamneira ae raraoma, ti moana maiura ae boou ma mwaakan te Atua ni kamatoa. I mwiin are ti a tia ni bwabetitoaki ao ni kamatoaaki, ti kona n reitinako ni kakorakoraaki man arora n tau n kanakin te toa. (Taraa 2 Nibwaai 31:13; Motiaea 18:7–16; Moronaai 6:2; Reirei ao Berita aika Tabu 20:37.)
Anga te Kakao
Ngkana ko namakina kairam mairoun te Tamnei, kaoiia aomata bwa a na bwabetitoaki ao ni kamatoaaki. E na kona n riki aei i nanon tain te reirei.
Angareirei n reirein te bwabetito ao buokiia aomata bwa a na mataata n ana reirei Kristo (taraa reirei 3). Reireia taekan kakawakin ao te kimwareirei n te berita ae tabu n te bwabetito, man kabwaraan buure, ao karekean ana bwaintituaraoi te Tamnei ae Raoiroi rinanon te kamatoaaki.
Katauraoiia aomata ibukin te kakao nakon te bwabetitoaki man kakoauaa raoi bwa a mataata ni bwaai ake ko reireiniia ao te berita ae tabu ake a na karaoi. Te berita ae tabu n te bwabetitoaki bon aikai:
-
I kukurei ni katokaa i aou aran Iesu Kristo.
-
Kawakin Ana tua te Atua.
-
Beku ibukin te Atua ao ibukiia tabeman.
-
Teimatoa ni karokoa te toki. (Taraa reirei 4.)
Ko kona n tibwai aikai:
“Ngkana ti bwabetitoaki, ti kakoaua i matan te [Atua] bwa [ti] rin n te berita ae tabu ma Ngaia, are [ti] na beku irouna ao ni kawakin ana tua.’ Ngkai ti karaoa te berita ae tabu aei, E berita bwa E na kabwaroa nako Tamneina [iaora]’ (Motiaea 18:10).”
Am kakao nakon te bwabetito e na riai n onoti ao ni kaineti. Ko kona n taekina:
“Ko kukurei n iriira ana banna ni katooto Iesu Kristo man bwabetitoam iroun temanna are e a tia ni katabuaki ni karaoa te otenanti aei? Ti na buokiiko ni katauraoiko ibukin te bwabetito. Ti onimaki bwa ko na bon tauraoi n te [bongin namakaina]. Ko kona n tauraoi ni bwabetitoaki n te bong anne?”
N aron taian kakao ake ko kanakoi, berita ibukin korakoran kakabwaia ake a na karekea aomata ngkana a butimwaea te kakao nakon te bwabetito ao ni kawakin berita aika a tabu. Tibwaa am koaua i aon kakabwaia aikai.
Anga te reirei bwa te bwabetito ao te kamatoa bon tiaki tokin te kawai. Ma, bon oin te kantaninga n te kawai n rairaki are e uota te kaantaninga, te kimwareirei, ao mwaakan te Atua ae korakora riki i nanon maiun te aomata (taraa Motiaea 27:25–26). I mwiin bwabetitoaia ao kamatoaakia aomata, a konaa ni ingainga nanoia ni katabuaki iroun te Tamnei ngkai a rikirake i aon kawain te berita ae tabu.
Ngkana e riai, kaoia naake ko reireinia bwa a na ira te bootaki ibukin te bwabetito ao bootakin te toa n te tai are e na kamatoaaki temanna.
Iango ibukin te Kakao nakon te Bwabetitoaki
Iangoia warekan koroboki aika tabu n rongorongon Iesus Kristo ngke e bwabetitoaki (taraa Mataio 3:13–17). Ko kona naba ni kaota te witeo n tamnein te Baibara are e kaota tamnein te Tia Kamaiu ngke e bwabetitoaki ke te witeo n tamnein Ana Boki Moomon n bwabetitoakiia ana reirei te Tia Kamaiu.
Ko kona naba ni wareka ana rongorongo Nibwaai ni bwabetitoan Iesu (taraa 2 Nibwaai 31:4–12). Warekan rongorongon bwabetitoan Iesu Kristo e konaa ni kakorakoraia koraki ake a reireinaki.
Kamatebwaian Koroboki aika Tabu
Kamatebwaian booki aika tabu aikai:
Koroi kimototon te rongorongo n bwaai ake ko a tia n reiakin.