1 Ao ngkai I taetae ni kaineti ma te bwabetito. Nooria, unimwaane, ibonga ao tia reirei a bwabetitoaki; ao a bon aki bwabetitoaki ni karokoa ae a nooraki uaaia ae oti iai bwa a bon tau ni butimwaia.

2 Ao a bon aki butimwaeaki naba tabeman nakon te bwabetito ni karokoa ae a roko ma te nano ae uruaki ao te tamnei ae raraoma, ma ni kakoaua nakon te ekaretia bwa a bon rairinanoia ni koaua man aia bure.

3 Ao bon akea ae butimwaeaki nakon te bwabetito ni karokoa moa ae a katoka aran Kristo i aoia, ma n iai irouia te nanomatoa bwa a na toro irouna ni karokoa te toki.

4 Ao i mwin are a tia ni butimwaeaki nakon te bwabetito, ma n rotaki ma ni kaitiakaki ni mwaakan te Tamnei are e Raoiroi, a bon warekaki i buakoia aomatan ana ekaretia Kristo; ao a tauaki araia, bwa aonga n uringaki ma ni kamwarakeaki n ana taeka te Atua ae raoiroi, bwa a na waaki n te kawai ae eti, bwa a na aki toki n teimatoa n tataro, n ti onimakina ana mwakuri aika a raraoi Kristo, are bon te tia karika ao te tia karokoa n te toki aia onimaki.

5 Ao te ekaretia e bon aki toki ni botaki, n aki mamatam man tataro, man taetae imarenaia ni kaineti ma maiuraoin tamneia.

6 Ao a bon aki toki ni botaki n anaa te kariki ma te wain, ni kauringa te Uea are Iesu.

7 Ao a bon matoatoa n tarataraia bwa a na akea te bure i buakoia; ao akana a kuneaki ni karaoa te bure mai buakoia, ao teniman ana tia kakoaua te aro a bon kabuakakaia imataia unimwaane, ao ngkana aki rairinanoia, ma ni kaoti aia bure, a kamaunaki araia, ao a bon aki warekaki i buakoia ana aomata Kristo.

8 Ma ngkana aki toki n rairinanoia ma n ukoukora kabwaran aia bure ma nanoia ni koaua, a bon kabwaraki aia bure.

9 Ao aia botaki a bon waakinaki n te ekaretia n aron ana mwakuri te Tamnei, ao ma ni mwaakan te Tamnei are e Raoiroi; bwa ngkana mwaakan te Tamnei are e Raoiroi e kairiia bwa tao a na kabwarabwara, ke a na kaungaia aomata, ke a na tataro, ke a na bubuti, ke a na anene, ao e a bon karaoaki.