Te taeka are e kabonganaki n te moan koroboki n Erene nanona bon “kateboa” ke “kateboa i nanon”. Te bwabetito ni kateboa i nanon te ran iroun temanna ae iai te kariaiakaki irouna bon te moan otenanti n te euangkerio ao e kainnanoaki ibukin te riki bwa kaain Ana Ekaretia Iesu Kristo ibukiia Aika Itiaki ni Boong aika Kaitira. E rimoana te onimaki iroun Iesu Kristo ao te rairannano. E riai n rimwiaki ni karekean te bwaintituaraoi ae te Tamnei ae Raoiroi bwa e aonga n tabwanin (2Nib. 31:13–14). Te bwabetito n te ran ao te Tamnei e bon kainnanoaki i mwain ae kona te aomata n rin n te abanuea ae te tiretio. Atam bon te moan ni bwabetitoaki (Mote 6:64–65). Iesu naba e bwabetitoaki ni kakoroa bukin te raoiroi ni kabane ao ni kaota te kawai ibukiia botanaomata ni kabaneia (Mat. 3:13–17; 2Nib. 31:5–12).
Ibukina bwa a aki bane kaain aonaba n reke aia tai ni butimwaea te euangkerio i nanon aia tai ni maiu, te Uea e a tia ni kariaia te bwabetito bwa e na karaoaki iroun temanna ibukia maate. Ngaia are, naake a butimwaea te euangkerio n te aonaba n tamneai a kona n tau n rin i nanon abanuean te Atua.