N Erene, Abotoro nanona bon “temanna ae kanakoaki.” Bon te ara are e anga Iesu nakoia ake Tengaun ma Uoman ake E rineia ao E katabuia bwa Ana taan reirei aika kaan ma ngaia ao taan ibuobuoki n Ana tai ni mwakuri i aon te aonaba (Ruka 6:13; Ioane 15:16). E kanakoia bwa a na tei ibukina ao ana mwakuri ni ibuobuoki ibukina i mwin waerakena nako karawa. N tai ake ngkoa ao n te Koram n Abotoro n te Tengaun ma Uoman n te Ekaretia ae manga kaokaki ngkai, te Abotoro bon te tia kakoaua ae onoti ibukin Iesu Kristo n te aonaba ni kabane bwa e na taekina koauan arona n atua ao mangautina man te mate (Mwak. 1:22; R&B 107:23).