Tawita

Te uea i Iteraera are ngkoa n te O Tetemanti.

Tawita bon natin Iete n ana barong Iuta. Bon te ataeinimwaane ae ninikoria are tiringa te raian, te bea, ao te I-Biritia are te aintoa ae Koria (1Tamu. 17). Tawita e rineaki ao e kabiraki bwa e na uea i Iteraera. N aron Tauro, i nanon maiuna ngke ikawai e karaoi bure aika korakora, ma, tiaki n aron Tauro, e bon kona n raraoma ni koaua ibukin ana bure. Ma ngaia are e a kona ni karekea kabwaraan ana bure, ma e aki n tiringan Uria (R&B 132:39). Maiuna e kona n tibwauaki nakon aua mwakoro: (1) i Beterem, ike bon ngaia te tia kawakin tiibu (1Tamu. 16–17); (2) n ana tabo te Uea ae Tauro (1Tamu. 18:1–19:18); (3) ngke e birinako ni karabaraba (1Tamu. 19:18–31:13; 2Tamu. 1); (4) ngke e uea i aon Iuta i Eberon (2Tamu. 2–4), ao rimwi riki ngke e uea i aon Iteraera ni kabuta (2Tamu. 5–24; 1Uea 1:1–2:11).

Ana bure Tawita are e wenenibure ma Batateba e rimwiaki n kaangaanga aika bati ake a kabuakaka nikiran maiuna ake uabwi te ririki. Te aba ae bwanin e rikirake kaubwaina n ana tai n tautaeka, ma ngaia ae Tawita e karawawataki man tuaan mwiin ana bure nako. E aki toki te un n te utu, are, n te bwai are e ririki iroun Abetaroma ao Atonia, n tokina e riki bwa te itabarara ae ataaki. Bwaai aika riki aikai bon kakoroan nanon ana taeka Natan are te burabeti i aon Tawita ibukin ana bure (2Tamu. 12:7–13).

E ngae ngke iai kaangaanga aikai, ana tautaeka Tawita bon te kabanea n tamaroa n rongorongon ngkoa Iteraera, bukina (1) e katiteuanaia baronga nakon teuana te botanaomata, (2) e kamatoa bwa e na aki burebureaki ana bwai te aba, (3) e kabotoa te tautaeka i aon te aro ae koaua n te aro are nanon te Atua bon tuan Iteraea. Ibukin bwaai aikai, ana tautaeka Tawita e taraki i mwina bwa bongin te aba ae koora ao aekan boong aika mimitong riki ngkana e roko te Mesia (Itaia 16:5; Iere. 23:5; Etek. 37:24–28).

Maiun Tawita e kamatata kainanoakiia aomata ni kabane bwa a na teimatoa n te raoiroi n ua te toki. Ngke te kairake, e taekinaki bwa te mwaane ae ririmwiin “oin nanaon” te Uea (1Tamu. 13:14); ngke e a mwaane, e taetae mai iroun te Tamnei ao e karekei kaotioti aika mwaiti. Ma e rawawata are kabwaka bwa boon mwiin ana aki ongeaba nakon ana tua nako te Atua (R&B 132:39).