Karikani Bwai

Te taeka n Erene are nanona “oin rikina” ke “moana.” Te boki ae Karikani Bwai bon te moan boki n te O Tetemanti ao e koreaki iroun te burabeti ae Mote. E anga rongorongon moanakin bwaai aika mwaiti n ai aron karikan te aonaba, katukaia maan ao te aomata i aon te aba, bwakan Atam ao Ewa, kaotakin te euangkerio nakon Atam, ao moanikin taian baronga ma reeti, oin rikin taetae aika kakaokoro i Bwabera, ao moanakin ana utu Aberaam are e waaki nako ni katea te bata are Iteraera. Nakoan Iotebwa ni kateimatoa Iteraera e katuruturuaki ni Karikani Bwai.

Kaotioti ni boong aika kaitira a kakoauai ao a kamatata te rongorongo ni Karikani Bwai (1Nib. 5; Ita 1; Mote 1–8; Abe. 1–5).

N te boki ae Karikani Bwai, mwakoro 1–4 a taekina karikan te aonaba ao rikiraken ana utu Atam. Mwakoro 5–10 e taua mwiin rongorongon Noa. Mwakoro 11–20 a taekina Aberaam ma ana utu ni karokoa ana bong Itaaka. Mwakoro 21–35 a toua mwiin ana utu Itaaka. Mwakoro 36 e taekina Etau ao ana utu. Mwakoro 37–50 a taekina ana utu Iakobwa ao e anga rongorongon Iotebwa ngke e kaboaki nako Aikubita ao nakoana ni kamaiua te bata are Iteraera.