Nakoanibonga ae te Merekitereka

Te Nakoanibonga ae te Merekitereka bon te nakoanibonga ae rietata riki ke korakora riki; te Nakoanibonga ae te Aaron bon te nakoanibonga ae karako riki. Te Nakoanibonga ae te Merekitereka e kairaki iai kiingin kakabwaia n te tamnei n te Ekaretia. Rinanon taian otenanti n te nakoanibonga ae rietata riki e kaotaki mwaakan te aro n atua nakoia aomata (R&B 84:18–25; 107:18–21).

Te Atua e moan kaota te nakoanibonga ae rietata riki aio nakon Atam. Tamanuea ao burabeti n te mwioko n tararua ni kabane iai te kariaiakaki aio irouia (R&B 84:6–17). E aranaki moa bwa te Nakoanibonga ae Tabu, n aron ana karinan te Atua te Nati. I mwina e a ataki bwa te Nakoanibonga ae te Merekitereka (R&B 107:2–4).

Ngke aikoa kona ni maiuakini kabwaiaia ao berita aika tabu n te Nakoanibonga ae te Merekitereka tibun Iteraera, te Uea e ana te tua ae rietata riki ao e angania te nakoanibonga ae karako riki ao te tua ae karako riki (R&B 84:23–26). Baikai ake a aranaki bwa te Nakoanibonga ae te Aaron ao ana tua Mote. Ngke e roko Iesu i aon te aonaba, E manga kaoka te Nakoanibonga ae te Merekitereka nakoia Iutaia ao ni moana katean te Ekaretia i buakoia. E ngae n anne, te nakoanibonga ao te Ekaretia a manga bua rinanon kitanakin te koaua. A manga kaokaki rimwi rinanon Iotebwa Timiti te Ataei (R&B 27:12–13; 128:20; IT—R 1:73).

I nanon te Nakoanibonga ae te Merekitereka iai nakoa aika unimwaane, ibonga ae rietata, tamanuea, Itingaun ao Abotoro (R&B 107). Te Nakoanibonga ae te Merekitereka e na riki bwa kanoan mwakoron uean te Atua i aon te aonaba n tai nako.

Te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira bon te beretitenti n are e rietata ke te Nakoanibonga ae te Merekitereka, ao e taui ni kabane kiing are a irekereke nakon uean te Atua i aon te aonaba. Te nakoa ae te Beretitenti e tauaki iroun ti temanna te aomata n te tai teuana, ao bon ti ngaia te aomata n te aonaba ae kariaiakaki ni kamwakuri kiingin nakoanibonga ni kabane (R&B 107:64–67; 132:7).