Enoka

Te burabeti are kairiia aomata n te kawa ae Tion. Ana mwakuri ni ibuobuoki e maroroakinaki n te O Tetemanti ao te Bwaeao ae Bati Bona naba. Bon ngaia te kaitiman n tamanuea i mwin Atam. Bon natin Iareta te mwaane ao taman Metutera (KB 5:18–24; Ruka 3:37).

Enoka bon te aomata ae kakannato ao e kakawaki riki ana mwakuri nakon rongorongona ae kimototo are kaotaki n te Baibara. Te Baibare e taekinna bwa e aki nora te mate (Ebera 11:5) ma akea taekan ana mwakuri ni ibuobuoki ae anga. Iuta 1:14 kanoana bon te anaitaeka man te taeka ni burabeti are e taekinna. Kaotioti ni boong aika kaitira e mwaiti riki ana kabwarabwara ibukin Enoka, moara riki i aon ana kabwarabwara, ana kaawa are arana Tion, ana mi ni burabeti, ao ana taeka ni burabeti (R&B 107:48–57; Mote 6–7). Tion e anaaki nako karawa ibukin raoiroia naake a maeka iai (Mote 7:69).