Etira
Te ibonga ao te tia koroboki n te O Tetemanti are kaokiia tabeman Iutaia nako Ierutarem man te tautoronaki i Bwaburonia (Etira 7–10; Neem. 8; 12). N 458 I.K. e karekea te kariaia mai iroun Atatokititi, uean Botia, bwa e na kairia nako Ierutarem Iutaia ake a kanakoaki ngkana a kan nako (Etira 7:12–26).
I mwaain ana tai Etira, ibonga e kuri n tabwanin irouia tauan aron warekan koroboki aika tabu ake a ikoikotaki ni koreaki are aranaki bwa te “tua.” Etira e buoka karaoan koroboki aika tabu bwa a na kona n reke irouia Iutaia ni kabane. Warekan “te boki n tua” nakoia aomata e riki i mwina bwa boton maiua te botanaomata aika Iutaia. Tao ana reirei Etira ae moan te korakora e reke man oin ana banna ni katoto ni kataea nangin nanoa bwa e na ukoukora ana tua Iehova, ma n toua mwina, ma n reirei nakoia tabemwang (Etira 7:10).
Ana boki Etira
Mwakoro 1–6 e kabwarabwarai bwaai aika riki ake a riki man onobwi nakon wanibui ririki i mwaain rokon Etira i Ierutarem—ana tua Tairati n 537 I.K. ao okia Iutaia i aan Terubwabera. Mwakoro 7–10 e kaota aron Etira ngke e nako Ierutarem. Ngaia, ma ana koraki, a aki mamatam ao a tataro ibukin kamanoaia. I Ierutarem a kuneia Iutaia aika mwaiti ake a kaman nako Ierutarem i aan Terubwabera ao a mare ma aine i tinanikun te berita ae tabu ao n te aro aei a kamwaraia. Etira e tataro ibukiia ao ni katikuia i aan te berita ae tabu bwa a na buraure ma buuia akekei. Rongorongon Etira ake i mwina a kuneaki n ana boki Neemia.