Eria

Te burabeti n te O Tetemanti are oki ni boong aika kaitira bwa e na anga kiingin te mwaaka ni kabaebae nakon Iotebwa Timiti ao Oliver Cowdery. N ana bong, Eria e mwakuri ni ibuobuoki n Abanuean Iteraera i Meang (1Uea 17–22; 2Uea 1–2). E korakora ana onimaki iroun te Uea ao e kinaki ibukin kakai aika bati. Ibukina bwa e bubuti, ao te Uea e tuka bwakan te karau i nanon 3½ te ririki. E kamaiua te teinimwaane man te mate ao e wetea ni karuoa te ai mai karawa (1Uea 17–18). Aomata aika Iutaia a teimatoa n tataninga Eria bwa e na oki, n aron are e taetae ni burabetiia Maraki bwa e na oki (Maraki 4:5). E teimatoa bwa te irua ae kaoaki n aia Toa ae te Riao Iutaia, ike e kaukaki te mataroa ao te kaintekateka ae akea kaaina e tataningaia n tai nako.

Te Burabeti ae Iotebwa Timiti e taku bwa Eria e taua kiingin te mwaaka n kabaebae n te Nakoanibonga ae te Merekitereka ao bon te kabanea ni burabeti n taua te mwaaka ni kabaebae i mwaain ana tai Iesu Kristo. E kaoti i aon Maungan te Onikaki ma Mote ao e anga kiingin te nakoanibonga nakon Betero, Iakobo, ao Ioane (Mat. 17:3). E manga kaoti riki, ma Mote ao tabeman riki, n Eberi 3, 1836, n te Kirtland Ohio Tembora ao e anga te kiing ae ti te arona nakon Iotebwa Timiti ao Oliver Cowdery (R&B 110:13–16). Ni kabane aikai bon te katauraoi ibukin Kauaokin te Uea, n aron are e taekinaki ni Maraki 4:5–6.

Mwaakan Eria bon te mwaaka ni kabaebae n te nakoanibonga are bwaai aika a kabaeaki ke a kabwaraaki i aon te aba a kabaeaki ke a kabwaraaki i karawa (R&B 128:8–18). Ana taan mwakuri te Uea aika rineaki i aon te aonaba n te bong aei iai irouia te mwaaka ni kabaebae aio ao a karaoi otenanti ni kamaiu n te euangkerio ibukiia aika maiu ao maate (R&B 128:8).