Karea

Ni boong ake ngkoa, te anga karea nanoa bwa e na karaoaki te bwai teuana ke te aomata temanna bwa e na tabu. Ngkai e a ataaki n nanona ae ko na taona nanom man ke kariaia bwa ko na kaakeai bwain te aonaba ibukin te Uea ao abanueana. Kaain Ana Ekaretia te Uea a riai ni kukurei ni kareani bwaai ni kabane ibukin te Uea. Iotebwa Timiti e reirei bwa “te aro ae aki kainnanoa kareanakin bwaai ni kabane e na bon akea mwaakana ae tau ni karika te onimaki are kainnanoaki nakon te maiu ao te kamaiuaki.” N te taratara ae akea tokina, kakabwaia ake a karekeaki man te anga karea a korakora riki nakon bwaai nako ake ko anga nako.

I mwin kanakoan Atam ao Ewa man te Nne n Aroka are Eten, te Uea e angania te tua ibukin te anga karea. Te tua aio e kaairaki ma kareanakin te karimoa man aia nanai. Te karea aio bon bannan te karea are e na karaoia Natin te Atua ae te Rikitemanna (Mote 5:4–8). Te waaki aio e reitinako ni karokoa maten Iesu Kristo, are e katoka kareanakin te man bwa te otenanti n te euangkerio (Aram. 34:13–14). N te Ekaretia ngkai kaaina a kana te toa ae te kariki ao te ran ni kauringa ana karea Iesu Kristo. Kaain ana Ekaretia Kristo ngkai a tuangaki naba bwa ana anga te karea ae te nano ae uruaki ao te tamnei ae raraoma (3Nib. 9:19–22). Nanon aei bwa a nanorinano, a raira nanoia, ao a kukurei ni kan ongeaba n ana tua nako te Atua.