Bwaeao ae Bati Bona

Uean te Atua i aon te aonaba e kabotauaki nakon te “bwaeao ae bati bona” (Mat. 13:45–46).

Te Bwaeao ae Bati Bona bon te ara are e anganaki teuana te boki ni booki ake aua ni booki aika tabu are a aranaki bwa “booki aika tabu” n Ana Ekaretia Iesu Kristo ibukiia Aika Itiaki ni Boong aika Kaitira. Moan bokin te Bwaeao ae Bati Bona e boretiaki n te 1851 ao kanoana bon tabeua rongorongo ake a mena ngkai i nanon Reirei ao Berita aika Tabu. Bokina aika boretiaki man te 1902 kanoana bon (1) koroboki man ana rairairi Iotebwa Timiti i aon Karikani Bwai, are e aranaki bwa ana boki Mote, ao i aon Mataio 24, are aranaki bwa Iotebwa Timiti—Mataio; (2)Ana rairairi Iotebwa Timiti i aon tabeua koroboki n te taetae n Aikubita aika koreaki i aon ba ni koroboki ae karaoaki man te uteute ake e karekei n te 1835, ae aranaki bwa ana boki Aberaam; (3) te koroboki man ana rongorongo Iotebwa Timiti ibukin te Ekaretia are e koroia n te 1838, ae aranaki bwa Iotebwa Timiti—Rongorongo; ao (4) Taekan te Onimaki, tebwi ma teniua koroboki i aon koaua ao reirei.