Tuea ao te Berita ae Tabu n te Nakoanibonga

Te tuea bon te taetae ni kamatoa bwa e na koaua ao ni kakaonimaki te aomata nakon ana berita. Te berita ae tabu bon te berita ni koaua i marenaia ua koraki. Te Nakoanibonga ae te Aaron e karekeaki n te berita ae tabu n ti ngaia. Taan taua te Nakoanibonga ae te Merekitereka a karekea te nakonibonga man te tuea ae aki taekinaki ni ikotaki naba ma te berita ae tabu. Ngkana taan taua te nakoanibonga a kakaonimaki ao a karikirakea nakoaia n aron ana kaetieti te Atua, E kakabwaiaia. Naake a kakaonimaki n ua te toki ao a karaoi ni kabane baike E tangiria mai irouia a na kaerekei bwaai ni kabane ake iroun te Tama (R&B 84:33–39).