Nauvoo, Illinois (USA)

Te kawa ae kateaki irouia Aomata aika Itiaki ni Boong aika Kaitira n te 1839 n te aba ae Illinois. E bon mena i etan te Karaanga are Mississippi, e kaniia 200 te maire (320 kiromita) ni waerake n te karaanga raroana mai St. Louis.

Ibukin te bwainikirinaki n te aba ae Missouri, Aomata aika Itiaki a mwaing 200 te maire nako meang-maeo, n riaon te Karaanga are Mississippi, ao nako nanon Illinois, ike a kunea tamaroan riki aona. N tokina, Aomata aika Itiaki a kaboa te aba ae uakaan ma te kawa ae tuai n rikirake arona ae Commerce. Te aba aei bon te karereua ae aoneinei ma ti tabeua kateitei aika tau aroia. Aomata aika Itiaki a kanakoa te ran man te aba ao a katei mwengaia. Iotebwa Timiti e kamwainga ana utu nakon te auti te kai ae uarereke. Aran te kawa ae Commerce e bitaki nakon Nauvoo, n aron te taetae n Ebera ibukin “tikiraoi.”

A mwaiti mwakoro n Reirei ao Berita aika Tabu ake a koreaki i Nauvoo (R&B 124–129; 132; 135). A tuangaki Aomata aika Itiaki bwa a na katea te tembora i Nauvoo (R&B 124:26–27). A katea te tembora ao a barongai ana Titeiki Tion i mwaain ae a kakionakoaki man mwengaia n te 1846. Mai mwiin te bwainikirinaki aio, Aomata aika Itiaki a kitana te aono aei ao a mwananga nako maeo.