Te Ota, Otan Kristo

Te korakora mai iroun te Atua, te mwaaka, ke te kairi are e nako mai iroun te Atua rinanon Kristo ao e anga te maiu ao te ota nakon bwaai ni kabane. Bon te tua are a tautaekanaki iai bwaai ni kabane i karawa ao i aon te aonaba (R&B 88:6–13). E buokiia naba aomata ni kaotaia ni koaua n te euangkerio ao e buokiia ni kairiia nakon kawain te euangkerio are e kaineti nakon te kamaiuaki (Ioane 3:19–21; 12:46; Aram. 26:15; 32:35; R&B 93:28–29, 31–32, 40, 42).

Otan Kristo e riai n aki kairuaki ma te Tamnei ae Raoiroi. Otan Kristo bon tiaki te aomata. Bon te kairi are roko mai iroun te Atua ao e katauraoa te aomata bwa e na butimwaea te Tamnei ae Raoiroi. Bon te kairi ibukin ae raoiroi i nanon maiuia aomata ni kabaneia (Ioane 1:9; R&B 84:46–47).

Teuana kaotiotan Otan Kristo bon mataniwin te nano, are e buoka te aomata n rinerine i marenan ae eti ao ae kairua (Moro. 7:16). Ngkana a reiakina ae bati riki aomata i aon te euangkeerio, mataniwin aia iango e na kai namakinaba riki (Moro. 7:12–19). Aomata aika kakauongo nakon Otan Kristo a kairaki nakon ana euangkerio Iesu Kristo (R&B 84:46–48).