Timoteo, Reta nakon

E korea ana moan reta Bauro i mwin moan kabureakina. E katuka Timoteo i Ebeto, ao e kantaningaia bwa e na oki rimwi (1Tim. 3:14). E ngae n anne, Bauro e namakinna bwa e na waereme, ngaia are e koroboki nakon Timoteo, tao mai Maketonia (1Tim. 1:3), n anganna reirei ao kaunganano ni kakoroan nanon ana beku.

Mwakoro 1 kanoana bon ana kamauri Bauro ao ana kaetieti naba i aon kario iango aika nanobaba ake a tabe ni kunea kawaia n rin n te Ekaretia. Mwakoro 2–3 a anga kairiiri i aon aia tataro aomata ao anuaia ao aroia minita. Mwakoro 4–5 kanoana bon kabwarabwaraan kitanan te koaua ni boong aika kaitira ao te taeka n reirei nakon Timoteo bwa e na kanga ni karaoi mwakuri ni ibuobuoki nakoia naake e kairiia. Mwakoro 6 bon te kaunga nano bwa ana kakoauaki aia kakaonimaki ao ni kitan kaubwain te aonaba.

E korea ana kauoua n reta Bauro n ana tai ni kabureaki te kauatai, te tai ae aki maan i mwain tiringana ibukin ana koaua. Kanoana bon ana kabanea n taeka te Abotoro ao e kaota kamiimin ninikoriana ao ana onimaki are e kaitara iai te mate.

Mwakoro 1 kanoana bon ana kamauri Bauro ao mwioko nakon Timoteo. Mwakoro 2–3 a anga kauring aika kakaokoro ao kairiiri, ma te kakaewenako bwa e na kaitarai kaangaanga ake a na roko. Mwakoro 4 bon te rongorongo nakoia raon Bauro, are kanoana bon taeka n reirei bwa a na kanga ni tabeakinia taan kitana te koaua.