Tuua Ake Tebwina

Tebwina tuua ake e anga te Atua rinanon te burabeti ae Mote n tautaekana katei aika riai.

Aran bwai aikai n Ebera bon “Taeka ake Tebwina.” A aranaki naba bwa te Berita (TK 9:9) ke te Kakoaua (Otin. 25:21; 32:15). Anganakin Mote Tuua ake Tebwina iroun te Atua, ao rinanona nakon Iteraera, e kabwarabwaraki n te Otin. 19:9–20:23; 32:15–19; 34:1. Tuua a bon kaaraki i aon baaba n atibu aika uoua, ake a katukaki i nanon te Ati; ngaia are te Ati e aranaki bwa te Ati ni Berita (WI 10:33). Te Uea, n anaitaeka man TK 6:4–5 ao NI 19:18, e a tia ni kakimototoi Tuua ake Tebwina i nanon “uoua tuua aika korakora” (Mat. 22:37–39).

Tuua ake Tebwina a tia ni manga taekinaki ni kaotioti ni boong aika kaitira (ARIT, Otin. 34:1–2, 14 [Abentekiti]; Motiaea 12:32–37; 13:12–24; R&B 42:18–28; 59:5–13).