Te Otinako

Te boki ae koreaki iroun Mote n te O Tetemanti are kabwarabwara kitanan Aikubita irouia I-Iteraera. Moan rongorongon ngkoa Iteraera n aron are e koreaki i nanon Te Otinako e kona ni tibwatibwaaki nakon teniua mwakoro: (1) tautoronakiia aomata i Aikubita, (2) kitana Aikubita i aan ana kairiiri Mote, ao (3) aia kakaonimaki nakon te mwakuri ibukin te Atua ni maiuakinan te aro ao ni maiuia n tautaeka.

Moan mwakorona, Te Otinako 1:1–15:21, a kabwarabwarai rawawataia Iteraera i Aikubita; rongorongon ngkoa ao weteakin Mote; te Otinako ao katean te Toa ae te Riao; ao te mwananga nakon Taari are Uraura, tiringakin ana taanga ni buaka Bwarao, ao ana anene n tokanikai Mote.

Kauouan mwakorona, Te Otinako 15:22–18:27, a taekina kaboakin Iteraera ao bwaai aika riki i aon mwanangaia man Taari are Uraura nako Tinai; ranin Mara, anganakiia man ni kiba aika kuere ao berena, kawakinan te Tabati, bwaintituaraoi ae te kakai n te ran i Rebirim, ao te buaka ikekei ma tibun Amareka; rokon Ietero n umwaia, ao ana reirei i aon te tautaeka ae kabuta ibukiia aomata.

Kateniuan mwakorona, mwakoro 19–40, a tabe ma katabuan Iteraera nakon te mwakuri ni ibuobuoki iroun te Atua n tain bwai aika riki i Tinai. Te Uea e kaokoroia aomata bwa te abanuea ibukiia ibonga ao te botanaomata ae tabu; E anga Tua ake Tebwina; ao E anga kaetieti ibukin umwan te Atua, bwain nanona, ao te taromauri i nanona. E rimwiaki n rongorongon aia bure aomata n taromauria te kao te teei ae te koora, ao n tokina rongorongon katean umwan te Atua ao aron karaoan mwakuri iai.