Ibonga ae Rietata

Te nakoa n te nakoanibonga. Koroboki aika tabu a taekina te “ibonga ae rietata” n nanona aika uoua: (1) te nakoa n te Nakoanibonga ae te Merekitereka; ao (2) i an ana tua Mote, te tia tararua n te Nakoanibonga ae te Aaron.

Nanona are te moan e kaineti nakon Iesu Kristo ngkai te Ibonga ae Rietata ae kakannato. Atam ao ni kabane tamanuea bon ibonga aika rietata naba. Ngkai, teniman ibonga aika rietata aika tararua a riki bwa te Beretitentii n te Ekaretia ao a tararua i aoia ni kabane taan taua te nakoanibonga ake tebemwang ao kaain te Ekaretia. Mwaane riki tabeman aika tau a katabuaki bwa ibonga aika rietata n aron riaina n te Ekaretia ni kabuta ngkai. Ibonga aika rietata a kona ni weteaki, ni kaokoroaki, ao ni katabuaki bwa bitiobi (R&B 68:19; 107:69–71).

N nanona are te kauoua, i an ana tua Mote, te tia tararua n te Nakoanibonga ae te Aaron e weteaki bwa te ibonga ae rietata. Te nakoa e bon anga te karo nakon natina ao e roko rinanon te moan nati i buakoia ana utu Aaron, Aaron ngaia bon te moan ibonga ae rietata n te karinan ae te Aaron (Otin. 28–29; NI 8; R&B 84:18).