I-Tamaria

Aomata ni bongin te baibara ake a maeka i Tamaria i mwin tauakin abanuean Iteraea are i meang irouia kaain Aturia. I-Tamaria bon I-Iteraera n te itera teuana ao Tientaire n te itera teuana. Aia aro e bon irengan ma aia koaua ao aia waaki Iutaia ao bekan. Te taetae ni kaikonaki ibukin te I-Tamaria ae raoiroi n Ruka 10:25–37 e kaota aia kairiribai Iutaia are a tia ni karikirakea ibukia I-Tamaria ibukina bwa I-Tamaria a tia ni kitana te koaua man aia aro Iutaia. Te Uea e kairia Abotoro bwa a na reireia te euangkerio nakoia I-Tamaria (Mwak. 1:6–8). Biribi e tokanikai n tataekina ana euangkerio Kristo nakoia aomatan Tamaria ao ni karaoi kakai aika bati i buakoia (Mwak. 8:5–39).