“25. Wok blong Tempol mo Famli Histri insaed long Wod mo Stek,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2024).
“25. Ol Risos blong Tempol mo Famli Histri insaed long Stek,” Jeneral Hanbuk.
25.
Wok blong Tempol mo Famli Histri insaed long Wod mo Stek
25.0
Fas Toktok
Tempol hem i haos blong Lod. Ol odinens mo kavenan blong tempol oli blesem ol pikinini blong Papa long Heven. Papa long Heven i invaetem evriwan long ol pikinini blong Hem blong oli kwalifae mo blong oli kasem ol odinens blong tempol.
Blong stap yunaetem ol famli blong taem we i no save finis, i pat blong wok blong God blong fasin blong sevem man mo fasin blong kam olsem wan god (luk long 1.2). Wok blong tempol mo famli histri, i wei ia blong yunaetem mo silim ol famli blong taem we i no save finis (luk long Matiu 16:19). Wok ia i tekem tu:
-
Stap mekem ol kavenan taem yumi kasem ol tempol odinens blong yumiwan (luk long Aesea 55:3; Doktrin mo Ol Kavenan 84:19–23).
-
Blong stap faenemaot ol bubu blong yumi we oli ded mo blong stap mekem ol odinens long bihaf blong olgeta insaed long tempol blong mekem se oli save mekem ol kavenan wetem God (luk long Malakae 4:5–6; 1 Korin 15:29; Doktrin mo Ol Kavenan 128:15–18).
-
Blong stap go long haos blong Lod oltaem, taem i posibol, blong wosipim God mo mekem ol odinens blong ol bubu we oli ded finis (luk long Luk 24:52–53; Doktrin mo Ol Kavenan 109:13–14).
Japta ia i lidim ol lida blong Jos mo ol memba abaot olsem wanem blong mekem ol famli oli kam wan blong taem we i no save finis tru long tempol mo wok blong famli histri. I gat moa infomesen long “Temples,” “Proxy Baptism,” mo “Family History” (Topics and Questions, Gospel Library).
25.1
Wok blong Memba mo Lida blong Tekpat long Wok blong Tempol mo Famli Histri
Ol memba blong Jos oli gat spesel janis mo responsabiliti ia blong help blong yunaetem ol famli blong olgeta blong taem we i no save finis. Oli rere olgetawan blong mekem ol kavenan taem oli kasem ol tempol odinens. Oli traehad blong kipim ol kavenan ia.
Mo tu, oli helpem ol memba blong famli blong oli andastanem, oli kasem, mo oli traehad blong kipim ol kavenan blong tempol. Ol papa mo mama, oli gat fasfala wok ia blong helpem ol pikinini blong olgeta blong oli gat ol eksperiens blong kasem ol blesing blong givim seves long wok blong tempol mo famli histri, hemia long bihaf blong ol memba blong famli blong olgeta we oli ded finis.
Oli stap leftemap tingting blong ol memba blong Jos blong oli faenem nem blong ol famli we oli ded finis, we oli no kasem ol odinens blong tempol yet. Afta, ol memba oli mekem ol odinens ia long bihaf blong ol famli blong olgeta (luk long Doktrin mo Ol Kavenan 128:18). Long spirit wol, olgeta man o woman we oli ded finis, oli save jusum blong akseptem o blong sakemaot ol odinens ia we oli bin mekem long bihaf blong olgeta.
Mo tu, ol memba oli stap invaetem ol famli mo ol fren blong oli lanem moa abaot ol bubu blong olgeta mo blong oli faenemaot stori blong olgeta.
I gat ol tul i stap blong helpem ol memba long wok blong olgeta long tempol mo famli histri. Sam long olgeta tul ia oli tokbaot insaed long 25.4.1 mo 25.4.2.
Ol lida blong Jos oli sapotem ol memba long ol traehad blong olgeta long tempol mo famli histri olsem we oli tokbaot insaed long 25.2 mo 25.3.
25.1.1
Responsabiliti blong Wanwan Man o Woman blong Wosip long Tempol
Ol memba, oli disaed olgetawan se, wetaem, mo hamas taem blong oli wosip insaed long tempol. Ol lida oli no mas stanemap wan ripot sistem blong jekem ol memba we oli stap wosip long tempol.
Wanwan memba mo famli we oli gat ol tempol rekomen we oli laef, oli save go long eni tempol we oli wantem. Oli save putum taem blong wan apoenmen wetem tempol. Luk long temples.ChurchofJesusChrist.org blong kasem kontak infomesen blong wanwan tempol.
25.1.2
Ol Tempol Trip blong Ol Wod mo Ol Stek
Wanwan yunit blong Jos i stap anda long wan tempol distrik. Ol tempol visit we wod o stek i oganaesem blong go long wan tempol aotsaed long tempol distrik blong olgeta, oli no sapotem tumas.
Evri tempol trip blong wod mo stek, oli mas putum taem blong hem wetem tempol. Luk long temples.ChurchofJesusChrist.org blong kasem kontak infomesen blong wanwan tempol.
25.2
Stap Oganaesem Wok blong Tempol mo Famli Histri insaed long Wod
Ol lida blong wod oli gat olgeta responsabiliti ia blong lukaotem wok blong tempol mo famli histri insaed long wod:
-
Helpem wanwan memba blong redi blong mekem ol kavenan wetem God taem oli kasem ol tempol odinens (luk long 27.1).
-
Leftemap tingting blong ol memba blong wosip insaed long haos blong Lod, plante taem olsem we situesen blong olgeta i letem.
-
Leftemap tingting blong wanwan man, woman mo famli blong i lanem doktrin mo blesing blong wok blong tempol mo famli histri.
-
Mekemsua se oli tijim ol doktrin mo ol blesing blong tempol mo famli histri wok oltaem long ol miting blong Jos. Wok ia i mekem ol famli oli kam wan blong taem we i no save finis.
-
Leftemap tingting blong ol memba blong oli lanem abaot ol bubu blong olgeta mo blong oli mekem ol odinens blong tempol long bihaf blong olgeta.
-
Sapotem ol papa mo mama blong stap helpem ol pikinini blong olgeta blong tekpat long wok blong tempol mo famli histri.
-
Leftemap tingting blong evri yut mo ol adalt memba, we i tekem tu ol niu memba, blong oli gat wan tempol rekomen we i laef i stap.
Luk long japta 26 blong kasem ol Infomesen blong ol tempol rekomen.
25.2.1
Bisoprik
Bisoprik i kodinetem ol wok wetem presidensi blong kworom blong Ol Elda mo hemia blong Rilif Sosaeti taem we oli stap lidim ol wok blong tempol mo famli histri insaed long wod. Ol lida ia, oli kaonsel tugeta oltaem abaot ol efot ia.
Bisoprik tu i gat sam moa responsabiliti ia blong lukaotem wok blong tempol mo famli histri:
-
Kodinetem ol wok wetem presidensi blong kworom blong Ol Elda mo hemia blong Rilif Sosaeti taem we oli stap lidim ol wok blong tempol mo famli histri insaed long wod (luk long 25.2.2).
-
Oli mekemsua se wok ia blong tempol mo famli histri, oli stap kodinetem olgeta insaed long wod kaonsel mo wod yut kaonsel miting.
-
Oli luklukbak mo apruvum plan blong wod long saed blong wok blong tempol mo famli histri wok (luk long 25.2.6).
-
Lukluk ova long wok blong oganaesem ol klas blong rere blong go long tempol (luk long 25.2.8).
-
Givimaot ol tempol rekomen (luk long japta 26).
Bisoprik i toktok wetem stek presiden blong faenemaot sapos i nid blong singaotem wan wod misin lida (luk long 23.5.3 blong kasem moa infomesen).
25.2.2
Presidensi blong Kworom blong Ol Elda mo Presidensi blong Rilif Sosaeti
Presidensi blong Ol Kworom blong Ol Elda mo presidensi blong Rilif Sosaeti oli responsibol long ol evri dei efot blong misinari wok mo tempol mo famli histri long wod (luk long 8.2.4 mo 9.2.4). Presidensi blong kworom blong ol elda i lidim ol efot ia blong ol memba blong kworom blong ol elda. Presidensi blong Rilif Sosaeti i lidim ol efot ia blong ol memba blong Rilif Sosaeti. Oli wok tugeta blong lidim ol efot ia insaed long wod kaonsel, anda long kodinesen blong bisop.
Ol lida ia, oli gat sam moa responsabiliti ia:
-
Askem wan wod tempol mo famli histri konsalten blong helpem ol memba blong wod we oli bin kasem ol misin kol blong olgeta i no longtaem i pas, blong faenem mo rere long ol nem blong bubu we oli ded finis, blong save mekem ol tempol odinens blong olgeta.
-
Helpem wod kaonsel blong developem mo yusum wan plan blong wok blong tempol mo famli histri (luk long 25.2.6).
-
Mekemsua se wok ia blong tempol mo famli histri, oli mekem plan from mo oli givim ripot from long ol wod kaonsel miting, mo long ol wod tempol mo famli histri kodinesen miting.
-
Lidim wok blong wod lida we i lukaot long wok blong tempol mo famli histri. Sapos oli no singaotem lida ia, wan memba blong presidensi blong kworom nao i mekem rol ia (luk long 25.2.3
Ol presiden blong kworom blong ol elda mo blong Rilif Sosaeti, wanwan long tufala i givim wok long wan memba blong presidensi blong help blong lidim wok blong tempol mo famli histri insaed long wod. Tufala memba ia blong presidensi, tufala i wok tugeta. Oli go long ol kodinesen miting blong wod long saed blong wok blong tempol mo famli histri (luk long 25.2.7).
25.2.3
Ol Wod Lida we Oli Lukaotem Wok blong Tempol mo Famli Histri
Bisoprik i toktok wetem stek presiden blong faenemaot sapos i nid blong singaotem wan wod lida blong lukaot long wok blong tempol mo famli histri. Sapos oli disaed blong givimaot koling ia, nao bisoprik i kaonsel wetem presiden blong kworom blong ol elda, mo presiden blong Rilif Sosaeti blong faenemaot huia blong singaotem. Hem i mas wan man we i klin inaf mo i holem Melkesedek Prishud. Sapos oli no singaotem wan lida, wan memba blong presidensi blong kworom blong ol elda oli mekem rol ia.
Wod tempol mo famli histri lida i sapotem ol presidensi blong kworom blong ol elda, mo blong Rilif Sosaeti long responsabiliti blong olgeta long saed blong tempol mo famli histri. Mo tu, hem i gat olgeta responsabiliti ia:
-
I Kodinetem ol efot blong tempol mo famli histri wetem ol lida blong ol oganaesesen, we i tekem tu kworom blong ol yut, mo ol presidensi blong ol klas.
-
I lidim wod kodinesen miting blong tempol mo famli histri (luk long 25.2.7).
-
I go long wod kaonsel miting taem oli invaetem hem.
-
I helpem wod kaonsel blong developem mo yusum wan plan blong wok blong tempol mo famli histri (luk long 25.2.6).
-
I givim instraksen long ol konsalten blong wod tempol mo famli histri wok. Kodinetem ol wok blong olgeta blong helpem ol memba blong faenem ol nem blong ol bubu blong olgeta we oli ded finis mo mekem ol odinens blong tempol long bihaf blong olgeta.
-
I wok wetem wod misin lida mo ol misinari blong helpem olgeta we oli stap lanem gospel, ol niu memba, mo ol memba we oli stap kambak blong oli wok long tempol mo famli histri wok(luk long 23.2 mo 23.3).
-
25.2.4
Wod Tempol mo Famli Histri Konsalten
Ol wod tempol mo famli histri wok konsalten oli mekem wok anda long daereksen blong wod lida blong tempol mo famli histri wok. Bisoprik i singaotem ol memba blong givim seves. Oli save singaotem ol adalt mo ol yut. Presiden blong kworom blong ol elda mo Presiden blong Rilif Sosaeti, mo Presiden blong Ol Yang Woman oli save givim nem blong olgeta we oli save givim seves.
Ol konsalten oli tijim ol narawan long ol simpol wei abaot olsem wanem blong tekpat long tempol mo famli histri wok. Oli gat olgeta responsabiliti ia:
-
I helpem ol memba blong oli rere blong kasem ol odinens blong tempol mo blong oli mekem ol kavenan blong tempol.
-
Oli helpem ol memba blong oli gat eksperiens long ol blesing blong faenemaot ol bubu blong olgeta, mo tu, blong mekem ol odinens blong tempol long bihaf blong olgeta. Ol eksperiens ia, oli impoten speseli long olgeta we oli stap lanem gospel, ol niu memba mo ol memba we oli kambak, mo olgeta we oli stap rere blong kasem wan tempol rekomen blong kasem baptaes mo konfemesen.
-
I tekpat long tempol mo famli histri kodinesen miting blong tempol mo famli histri (luk long 25.2.7
-
I givim seves long wan lokol FamilySearch senta, taem we oli givim wok ia long hem (luk long 25.3.6).
Oli mekem lis blong ol risos blong helpem ol tempol mo famli histri konsalten insaed long 25.4.1 mo 25.4.2.
25.2.5
Wod Kaonsel
Ol memba blong wod kaonsel, tru long prea, oli developem mo yusum wan plan blong wok blong tempol mo famli histri. Blong kasem moa infomesen abaot plan ia, luk long 25.2.6.
Bisop i save invaetem wod tempol mo famli histri lida blong i atendem wod kaonsel miting.
25.2.6
Wod Tempol mo Famli Histri Plan
Wanwan wod i mas gat wan simpol tempol mo famli histri plan. Plan ia, i blong helpem ol memba blong wod, we i tekem tu ol pikinini mo ol yut, blong oli rere blong wosip insaed long haos blong Lod mo tekpat long wok blong famli histri plante taem olsem we ol situesen blong olgeta i letem.
Presiden blong kworom blong ol elda mo presiden blong Rilif Sosaeti oli helpem wod kaonsel blong developem plan ia. Wod lida blong tempol mo famli histri i save help tu. Taem oli developem plan ia, oli:
-
Tingting long ol nid blong ol memba wetem prea, mo ol risos we i gat i stap.
-
Faenemaot wanem stret aksen nao blong tekem long wan ful yia.
-
Disaed olsem wanem blong stap kareaot plan ia, mo oli givimaot ol wok folem plan ia.
Ol eksampol blong wanem i save stap insaed long plan, oli stap long lis andanit ia:
-
Helpem ol spesifik memba blong oli rere blong kasem ol odinens blong tempol.
-
Helpem ol memba blong oli bildimap ol famli tri blong olgeta long FamilySearch.org o wetem FamilySearch Tree ap (luk long 25.4.1).
-
Helpem ol memba blong yusum pat blong Ordinances Ready long FamilySearch.org o long FamilySearch Family Tree ap blong karem nem blong wan bubu i go long tempol.
-
Yusum ol niu memba mo ol memba we oli stap kambak, yut, mo ol pikinini insaed long tempol mo wok blong famli histri.
Tempol mo famli histri plan blong wod i no mas stanemap wan ripot sistem blong jekem tempol wosip (luk long 25.1.1).
Bisop i luklukbak mo i apruvum plan ia. Ol memba blong wod kaonsel oli tekem lid blong kareaot plan ia. Oli ripotem progres blong olgeta long ol wod kaonsel miting. Mo tu, oli apdeitem plan sapos i nid.
25.2.7
Ol Wod Tempol mo Famli Histri Kodinesen Miting
Oli mas holem ol miting we oli sot mo i simpol blong lukaotem wok blong tempol mo famli histri; ol miting ia oli hapen oltaem. Wod lida blong tempol mo famli histri i lidim ol miting ia.
Olgeta narawan we oli save invaetem olgeta, i gat:
-
Ol memba blong Rilif Sosaeti mo ol memba blong kworom blong ol elda we oli givimaot wok ia long olgeta.
-
Wan asisten long kworom blong pris (presiden blong ol tija o blong ol dikon, sapos i no gat pris long wod).
-
Wan memba blong presidensi blong yia grup blong klas blong ol yang woman we oli moa olfala.
-
Tempol mo famli histri konsalten.
Evriwan we i kam long miting ia, we i tekem tu ol yut, oli kaonsel tugeta olsem we evriwan oli semmak. Stamba tingting blong ol miting ia, hem i blong:
-
Kodinetem ol efot blong kareaot plan blong wod long saed blong wok blong tempol mo famli histri wok (luk long 25.2.6).
-
Mekem plan blong helpem ol spesifik wod memba blong oli rere blong kasem ol odinens blong tempol.
-
Plan blong wei blong helpem ol spesifik memba blong wod wetem tempol mo famli histri wok blong olgeta.
Ol miting ia, oli save holem fes tu fes, o onlaen. Kodinesen ia tu, i save tekem ples tru long ol defren wei, olsem telefon kol, teks, mo imel.
25.2.8
Kos blong Rere blong Go long Tempol
Anda long daereksen blong bisop, oli save oganaesem wan kos blong rere blong go long tempol blong helpem ol memba blong oli rere blong mekem ol kavenan taem we oli stap kasem ol tempol odinens. Ol kos ia, oli stap holem olgeta aotsaed long ol nomol Sandei miting long wan taem we i stret long ol memba. Oli save holem kos ia long mitinghaos o insaed long wan hom.
Ol wod kaonsel memba oli prea mo jusum ol memba blong invaetem olgeta long wanwan kos. Ol kos, bae oli save helpem olgeta pipol olsem:
-
Ol niu memba
-
Ol memba we oli stap rere blong kasem endaomen, o blong oli sil
-
Ol memba we oli kambak aktiv long Jos
-
Ol endao memba we oli no riniu tempol rekomen blong olgeta blong wan longfala taem
Bisoprik i singaotem wan, o moa long wan tija blong klas blong rere blong go long tempol. Ol lesen mo ol instraksen blong oganaesem kos oli stap long Kasem Endaomen we I Kam long Antap: Klas blong Mekem Rere blong Go long Tempol Buk blong Tija. Olgeta we oli tekpat long kos, oli givim olgeta ol kopi blong smol buk ia: Mekem Rere blong Go Insaed long Tabu Tempol Blong stadi blong yuwan mo moa lesen risos, luk long temples.ChurchofJesusChrist.org.
25.3
Stap Oganaesem Wok blong Tempol mo Famli Histri insaed long Stek
Ol lida blong stek oli sapotem ol lida mo ol memba blong wod long hadwok blong olgeta blong mekem wok blong tempol mo famli histri.
25.3.1
Stek Presidensi
Stek presiden i holem ol ki blong wok blong God blong fasin blong sevem man mo fasin blong kam olsem wan god. Hem mo ol kaonsela blong hem oli gat olgeta responsabiliti ia long saed blong wok ia blong tempol mo famli histri:
-
Oli helpem ol memba oli rere blong mekem ol tabu kavenan taem oli kasem ol tempol odinens blong olgeta (luk long 27.1).
-
Leftemap tingting blong ol memba blong wosip insaed long haos blong Lod, plante taem olsem we situesen blong olgeta i letem.
-
Oli mekemsua se oli tijim ol doktrin mo ol blesing blong tempol mo famli histri wok oltaem insaed long ol miting blong stek. Wok ia i mekem ol famli oli kam wan blong taem we i no save finis.
-
Leftemap tingting blong ol memba blong oli lanem abaot ol bubu blong olgeta mo blong oli mekem ol odinens blong tempol long bihaf blong olgeta.
-
Oli holem ol intaviu blong tempol rekomen (luk long japta 26).
Long nomol miting blong hem wetem presiden blong kworom blong ol elda, wan memba blong stek presidensi i toktok raon long wok blong tempol mo famli histri insaed long wod (luk long 8.3.1). Ol kaonsela insaed long presidensi blong kworom blong ol elda mo hae kaonsela we oli givim wok blong lukaot long kworom oli save stap long miting ia.
25.3.2
Stek Adalt Lidasip Komiti
Stek adalt lidasip komiti, insaed long hem i gat:
-
Stek presidensi.
-
Stek Rilif Sosaeti presidensi.
-
Ol hae kaonsela we oli givimaot ol wok ia long olgeta blong wok wetem ol kworom blong ol elda.
Ol memba blong stek adalt lidasip komiti oli givim instraksen mo oli sapotem presidensi blong kworom blong ol elda mo hemia blong Rilif Sosaeti long responsabiliti blong olgeta long saed blong wok blong tempol mo famli histri (luk long 25.2.2). Instraksen ia i save tekem ples long wan grup, o wetem wanwan. Oli save invaetem ol wod tempol mo famli histri lida blong oli kasem instraksen ia.
Blong kasem moa infomesen abaot ol miting blong komiti ia, luk long 29.3.8.
25.3.3
Ol Hae Kaonsela
Stek presidensi i save givim wok long ol hae kaonsela blong oli givim instraksen mo sapot long olgeta pipol ia wetem ol responsabiliti blong olgeta long saed blong wok blong tempol mo famli histri.
-
Ol presidensi blong kworom blong ol elda
-
Ol wod lida blong tempol mo famli histri wok
-
Ol stek konsalten blong tempol mo famli histri wok
-
Ol kodineta blong FamilySearch Senta
Oli save givim wok long wan o moa long wan hae kaonsela blong lidim ol bigfala wok ia. Be, evri hae kaonsela oli gat ol responsabiliti ia blong lukaot long ol wod mo kworom blong ol elda we oli bin givim long wanwan long olgeta blong lukaotem.
Ol hae kaonsela oli save helpem ol wod lida blong tempol mo famli histri wok blong oli givim instraksen long ol wod konsalten blong tempol mo famli histri wok. Ol stek konsalten blong tempol mo famli histri oli save helpem olgeta hae kaonsela ia.
Stek presidensi i save givim wok long wan hae kaonsela blong hem i kodinetem ol wok blong famli histri volontia blong stek (luk long 25.4.3). Hem o wan nara hae kaonsela i save kasem wok ia blong lukluk ova long wok we i stap tekem ples long ol FamilySearch senta (luk long 25.3.6).
25.3.4
Stek Rilif Sosaeti Presidensi
Anda long daereksen blong stek presiden, stek Rilif Sosaeti presidensi i givim instraksen mo i sapotem ol wod Rilif Sosaeti presidensi long ol responsabiliti blong olgeta blong tempol mo famli histri wok (luk long 9.2.4).
25.3.5
Stek Tempol mo Famli Histri Konsalten
Ol stek tempol mo famli histri konsalten oli sapotem wok blong tempol mo famli histri raon long ol stek. Oli givim seves anda long daereksen blong stek presidensi mo wan o moa long wan hae kaonsela we oli givim wok ia long hem blong lukaot long tempol mo famli histri wok.
Olgeta konsalten ia, oli sapotem ol hae kaonsela mo stek Rilif Sosaeti presidensi long ol efot blong olgeta blong givim instraksen long ol narawan long saed blong wok blong tempol mo famli histri (luk long 25.3.3 mo 25.3.4). Oli save givim long olgeta ol wok ia:
-
Help blong tijim mo sapotem ol memba insaed long ol koling blong wod long saed blong tempol mo famli histri.
-
Help blong kodinetem ol volontia efot blong stap yusum FamilySearch.org o FamilySearch Tree ap (luk long 25.4.3).
-
Givim seves long ol FamilySearch senta (luk long 25.3.6).
25.3.6
Ol FamilySearch Senta
Sapos i gat ol risos i stap, stek i save oganaesem wan o moa FamilySearch senta. Olgeta senta ia, oli blong helpem ol visita blong faenem, putum tugeta infomesen abaot, mo yunaetem olgeta memba blong famli we oli stap laef yet wetem olgeta we oli ded finis tru long ol tempol odinens. Eniwan i welkam blong yusum ol senta ia.
Stek presiden i singaotem wan FamilySearch senta kodineta blong lukluk long ol wok blong wanwan FamilySearch senta. Wanwan senta, plante taem, olgeta we oli wok insaed, oli ol wod konsalten blong tempol mo famli histri wok, we stek i givim wok ia long olgeta. Ol FamilySearch senta oli sapos blong open long ol taem we i stret long evriwan. Ol FamilySearch senta we oli stap kolosap long ol tempol, bae oli nidim blong stretem ol taem tebol blong olgeta folem taem tebol blong lokol tempol.
Olsem wan eksepsen, sam bigfala FamilySearch senta, Eria Presidensi nao i lukluk ova long olgeta.
25.3.7
FamilySearch Senta Kodineta
FamilySearch senta kodineta i oganaesem ol evri dei wok blong FamilySearch Senta. Hem(man o woman) i givim seves andanit long daereksen blong stek presiden o wan hae kaonsela we oli givimaot wok ia long hem. Ol responsabiliti ia i tekem tu olgeta ia we oli stap long lis andanit ia:
-
Helpem ol memba blong oli rere long ol nem blong famli mekem se oli save mekem ol odinens blong olgeta long haos blong Lod.
-
Kodinetem ol aktiviti blong senta blong helpem ol memba blong Jos mo ol komuniti visita blong faenem ol bubu blong olgeta we oli ded finis.
-
Wok wetem (1) hae kaonsela we oli givim wok ia long hem blong sapotem tempol mo famli histri wok mo (2) stek teknoloji speselis blong lukluk long ol nid blong wok blong senta mo gohed blong kipim ol risos blong hem.
FamilySearch Center Operations Guide i givim gaed long olsem wanem blong lukaotem wan FamilySearch senta.
25.3.8
Eria Wod Tempol mo Famli Histri Advaesa
Ol Eria Presidensi oli save singaotem ol advaesa blong tempol mo famli histri. Sapos ol situesen oli letem, oli save singaotem wan man, o wan woman, o wan kapol blong i stap long wanwan kodineting kaonsel. Plante taem ol advaesa oli givim seves blong tri kasem faef yia.
Eria Presidensi i save givim wok long Ol Eria Seventi blong oli kodinetem wok blong ol advaesa ia long ol kodineting kaonsel. Wok blong ol advaesa i mas go stret wetem eria fokas.
Olsem we Eria Presidensi mo Ol Eria Seventi oli daerektem, ol advaesa oli helpem ol stek presiden blong oli mekem ol responsabiliti blong olgeta long saed blong tempol mo famli histri wok. Ol advaesa oli helpem ol stek presiden blong tijim ol pipol we oli stap givim seves long ol koling ia, abaot ol responsabiliti blong olgeta:
-
Ol Hae kaonsela
-
Ol Stek Rilif Sosaeti presidensi
-
Ol stek adalt lidasip komiti
-
Ol stek konsalten blong tempol mo famli histri wok
-
Ol kodineta blong FamilySearch Senta
Oli save givim wok long ol advaesa blong oli helpem ol stek presidensi blong oli mekem ol memba oli rere blong wosip long ol tempol we oli jes anaonsem olgeta insaed long eria. Long saed blong ol nara responsabiliti, i gat hemia blong givim instraksen long ol stek lida long saed blong ol prinsipol mo ol praktis blong wok blong tempol mo famli histri. Olgeta ia, i gat:
-
Olsem wanem blong helpem ol memba wetem fas eksperiens blong olgeta wetem ol proksi baptaes mo konfemesen (luk long 23.2).
-
Olsem wanem blong helpem ol memba we oli stap rere blong kasem endaomen blong olgetawan o blong oli sil, (luk long 25.2.8, 27.2, 27.3, mo 27.4).
-
Olsem wanem blong oganaesem wok blong tempol mo famli histri insaed long stek mo ol wod (luk long 25.3 mo 25.2).
-
Olsem wanem blong sapotem ol presidensi blong kworom blong ol elda, mo Rilif Sosaeti long saed blong ol responsabiliti blong olgeta (luk long 25.2.2).
-
Olsem wanem wok blong tempol mo famli histri i save blesem ol pikinini mo ol yut (luk long 10.2.4, 11.2.4, mo 12.2.4).
-
Olsem wanem blong helpem ol memba blong gat wan eksperiens we i gat mining long saed blong famli histri (luk long Tempol mo Famli Histri Lidasip Instraksen
-
Olsem wanem blong holem ol kodinesen miting we i wok gud long saed blong wok blong tempol mo famli histri (luk long 25.2.7).
-
Olsem wanem blong helpem ol lida blong wod blong mekem plan mo putum ol gol (luk long 25.2.6).
25.4
Ol Famli Histri Risos
25.4.1
FamilySearch.org, Ol Odinens blong Rere, mo Ol Ap blong FamilySearch
FamilySearch.org hem i websaet blong Jos blong helpem ol memba blong faenem mo rere long ol nem blong ol bubu blong olgeta blong mekem ol tempol odinens blong olgeta. Ol Odinens blong Rere hem i wan pat long FamilySearch.org we i givim wan isi wei blong kasem ol nem blong famli o ol narawan, blong tekem i go long tempol.
Websaet ia i givim tu sam moa nara risos. Hemia i tekem tu blong stap faenem, serem, mo putumgud ol stori mo foto blong ol bubu.
Ol risos ia oli stap tu long FamilySearch Family Tree ap mo FamilySearch Memories ap. Luk long ol FamilySearch ap blong evri ap we i gat i stap.
25.4.2
Famli blong Mi: Ol Stori we Oli Karem Mifala I Kam Tugeta
Smol buk blong Famli blong Mi: Ol Stori We I Karem Mifala I Kam Tugeta i helpem ol pipol blong kam tugeta mo kipim gud ol nem mo stori blong famli. Hem i save helpem ol memba tu blong stat blong rere long ol nem blong famli blong mekem ol tempol odinens blong olgeta.
Ol kopi blong smol buk ia we oli printim, oli save odarem olgeta long store.ChurchofJesusChrist.org.
25.4.3
Ol Volontia Aktiviti blong Famli Histri
Baten blong “Get Involved” long FamilySearch.org i letem ol volontia blong tekpat long ol aktiviti ia:
-
Indeksing, we i wan wok blong putum infomesen we oli raetem long wan histri rekod i go long wan ples onlaen we oli save lukluk tru long hem; i stap long FamilySearch.org.
-
Stap luklukbak long ol rekod blong mekem sua oli stret mo semsemmak.
-
Stap mekem sua se ol Famli Tri oli stret mo semsemmak.
Olgeta we oli tekpat long ol aktiviti ia oli mekem i posibol blong ol narawan blong oli faenem ol bubu blong olgeta, mo blong oli save mekem ol tempol odinens long bihaf blong olgeta.
Eniwan i save tekpat long ol volontia aktiviti long FamilySearch.org. Hemia i save kam wan eksperiens we i save mekem wan i harem gud tumas, speseli olgeta ia:
-
Yut
-
Ol yang adalt
-
Ol memba we oli no save kam long ol miting blong Jos oltaem
-
Ol niu memba
-
Jeneral pablik
Stek presidensi i save givim wok long wan stek konsalten blong tempol mo famli histri wok, o wan hae kaonsela blong i kodinetem wok ia.
25.5
Stap Givim Nem mo Singaotem Ol Wokman blong Tempol
25.5.1
Stap Givim Nem blong Ol Wokman blong Tempol
Olgeta we maet oli save kam ol wokman blong tempol, oli stap faenemaot olgeta long ol wei olsem:
-
Bisop o wan nara lida blong wod i talemaot nem blong memba
-
Ol memba we oli kam luk Bisop from se oli wantem givim seves
-
Ol memba we tempol presiden, metron (waef blong presiden), o wan nara lida blong tempol i givim nem blong olgeta
-
Ol memba we oli stap rere blong mekem wan misin, o oli jes kambak long misin seves (luk long japta 24).
Nem blong olgeta we oli save kam ol tempol wokman taem oli yusum Recommend Temple Worker tool, o Tul blong Givim Nem blong Ol Wokman blong Tempol Tul ia i stap wetem ol bisop, ol stek presiden, mo ol tempol presidensi. Rod blong sendem ol nem, i putum long aotlaen daon ia.
Taem ol memba blong wan tempol presidensi i faenem nem blong wan we i save kam wan wokman blong tempol, oli sendem nem ia i go long bisop blong hem, mo yusum Tul blong Givim Nem blong Ol Wokman blong Tempol.
Taem wan bisop i faenem wan we i save kam wan wokman blong tempol, o i kasem wan nem we i kam long wan tempol presiden, hem i kaonsel wetem memba abaot janis ia blong givim seves. Hem i luklukbak long wanem ol wokman blong o ol tempol wokman oli mas kasem (luk long 25.5.2). Sapos tugeta, bisop mo memba oli filim se janis ia i wan stretwan, bisop i komplitim mo i sendem ol nem mo i yusum Tul blong Givim Nem blong Ol Wokman blong Tempol. Memba i mas andastanem se wan nem we oli sendem i go, i no minim se bambae oli singaotem o givim wok long hem olsem wan wokman blong tempol.
Nem ia, bae stek presiden i lukluk long hem bakegen. Sapos stek presiden i apruvum nem ia, hem i sendem i go long tempol presiden blong i luklukbak long hem, mo i yusum Tul blong Givim Nem blong Ol Wokman blong Tempol.
Ol memba we oli singaotem olgeta, o oli givim wok ia long olgeta blong stap olsem wokman blong tempol, plante taem oli komitim sam taem long wan wik blong givim seves long tempol. Ol lida oli mas traem blong no givim ol nara koling we bambae oli stopem ol memba blong save givim seves insaed long tempol.
Tul blong Givim Nem blong Ol Wokman blong Tempol i stap soem tu long ol bisop mo ol stek presiden wan lis blong evri memba we i stap long wod mo stek blong olgeta, we oli stap givim seves olsem ol wokman blong tempol.
25.5.2
Ol Samting We Ol Wokman blong Tempol Oli Mas Kasem o Mekem
Ol tempol wokman, oli help blong mekem ol odinens o oli help wetem ol administresen wok insaed long tempol. Blong oli givim nem blong wan olsem wan tempol wokman, wan memba i mas mekem o kasem olgeta samting ia:
-
I mas laef insaed long tempol distrik blong tempol we bae hem i givim seves long hem.
-
I mas kasem endaomen finis, i mas ona long ol tempol kavenan blong hem, mo i mas gat wan tempol rekomen we i laef i stap.
-
I mas gat wan strong testemoni abaot gospel ia blong Jisas Kraes, we i kambak.
-
I mas gat paoa long bodi blong mekem ol odinens hemwan, we i no gat wan i helpem hem.
-
I mas wan we oli respektem hem insaed long Jos mo insaed long komuniti.
-
I wok gud wetem ol nara pipol.
-
I wan we oli save dipen long hem, mo i gat gudfala helt.
-
I no mas gat wan not i hang long membasip rekod blong hem.
Antap long hemia, ol bisop oli mekemsua ol samting ia i hapen:
-
Sapos membasip blong wan memba i bin gat kondisen long hem bifo, bae oli save putum hem blong i stap olsem wan tempol wokman, be i mas moa long faef yia afta we oli karemaot ol kondisen long membasip blong hem. (Luk long 32.11.3 mo 32.16.1.)
-
Sapos wan memba we i no endao mo oli karemaot membasip blong hem, o sapos memba ia i sakemaot membasip blong hem, oli save putum hem olsem wan tempol wokman, be i mas moa long faef yia afta we oli karemaot ol kondisen long membasip blong hem. (Luk long 32.11.4, 32.14.9, 32.16.1, mo 32.16.2.)
-
Sapos wan memba we i no endao mo oli karemaot membasip blong hem, o sapos memba ia i sakemaot membasip blong hem, oli save putum hem olsem wan tempol wokman, be i mas moa long faef yia afta we oli putumbak ol blesing ia. (Luk long 32.11.4, 32.14.9, mo 32.17.2.)
25.5.3
Koling mo Set Apat blong Ol Tempol Wokman
Afta we tempol presiden i sendem nem blong wan blong i givim seves olsem wan tempol wokman, wan memba blong tempol presidensi, o wan we hem i jusum i mekem intaviu long man o woman ia. Olsem we hem i kasem insperesen, hem we i lidim intaviu ia i singaotem olgeta we oli save givim seves olsem ol tempol wokman, mo i setem olgeta apat.