26.

Ol Tempol Rekomen

26.0

Fas Toktok

Blong stap go insaed long haos blong Lod, i wan tabu spesel janis. Ol lida blong wod mo blong stek, oli leftemap tingting blong evri memba blong oli stap klin inaf blong kasem wan rekomen we i laef i stap, mo blong gat wan iven sapos oli no stap laef kolosap long wan tempol.

Ol lida blong Jos oli traehad fulwan blong luk se, evriwan we i go insaed long haos blong Lod, oli klin inaf blong go insaed (luk long Ol Sam 24:3–5). Ol prishud lida we oli gat raet nomo oli mekem ol intaviu blong tempol rekomen, mo oli givimaot ol tempol rekomen long ol memba we oli stap ansa long ol intaviu kwestin ia i stret mo wetem tru fasin (luk long 26.3 Lod i promesem se, sapos olgeta we oli stap go insaed long haos blong Hem oli klin, bambae Hem tu i stap long ples ia (luk long Doktrin mo Ol Kavenan 97:15–16).

Ol memba oli mas gat wan tempol rekomen we i laef i stap blong save go insaed long wan tempol. Ol pikinini we oli no kasem 8 yia yet, we bae oli sil wetem papa mo mama blong olgeta, o bae oli lukluk siling blong ol brata mo sista blong olgeta long papa mo mama blong olgeta, oli no nidim wan rekomen (luk long 26.4.4).

Japta ia i givim ol instraksen long ol lida we oli stap givimaot ol tempol rekomen. Wan bisop i mas toktok wetem stek presiden blong hem sapos hem i gat ol kwestin abaot fasin blong givim ol tempol rekomen, we oli no faenem ansa insaed long seksen ia. Stek presiden i save kontaktem Ofis blong Fas Presidensi sapos hem i gat ol kwestin.

26.1

Ol Defren Kaen Tempol Rekomen

Wan rekomen we i laef i stap i save letem wan memba i save go insaed long evri tempol. Ol prishud lida oli mekemsua se ol memba oli kasem raet rekomen folem situesen blong olgeta. I gat trifala defren kaen rekomen:

1. Tempol rekomen blong olgeta memba we oli no endao yet. Ol rekomen ia oli blong olgeta memba we oli no endao yet, we bae oli silim olgeta long papa mo mama blong olgeta, o bae oli mekem ol proksi baptaes mo konfemesen. Oli givimaot olgeta tru long sistem blong Ol Risos blong Ol Lida mo Klak (RLK). Blong kasem moa infomesen, luk long 26.4

2. Tempol Rekomen blong ol odinens blong taem wan i laef. Ol rekomen ia blong ol memba we oli stap kasem endaomen blong olgetawan, o oli sil long wan hasban o waef blong olgeta. Oli karemaot olgeta long rekomen buk 2. Rekomen ia blong ol odinens blong wan we i stap laef, i fas wetem nomol tempol rekomen blong ol memba we oli endao (olsem oli tokbaot andanit ia). Tempol i holemtaet rekomen blong odinens blong man we i laef taem we odinens ia, oli mekem finis. Memba i holemtaet nomol rekomen blong hem, mo i yusum taem hem i kambak long tempol.

3. Tempol rekomen blong olgeta memba we oli endao finis. Ol rekomen ia, oli blong ol memba we oli bin endao finis. Oli printim o givimaot olgeta tru long RLK. Oli givim raet long wan memba blong hem i tekpat long evri odinens blong tempol, long bihaf blong wan we i ded finis. Oli stap yusum tu taem wan memba we i endao finis i sil long wan papa mo mama we i laef, o i sil long ol pikinini. Blong kasem moa infomesen, luk long 26.3.

26.2

Stap Kipim Ol Limit Yus Rekomen Oli Stap Sef

26.2.1

Ol Prishud Lida Oli Stap Kipim Ol Tempol Rekomen Oli Stap Sef

Ol prishud lida we oli gat raet blong gat ol tempol rekomen buk, oli mas lukaotemgud olgeta buk ia. I no gat wan moa we i save yusum olgeta. Taem we Jos i apdeitem ol tempol rekomen buk, ol lida oli sakemaot o bonem gud ol buk ia we oli nomo yusum.

Ol prishud lida oli meksua tu se ol pipol we oli no gat raet, oli no save luk o ridim ol infomesen blong tempol rekomen we i stap insaed long RLK.

26.2.2

Ol Rekomen we Oli Lus o Oli Stilim

Bisop i mas askem ol memba blong oli talemaot long hem kwiktaem sapos wan rekomen i lus, o oli stilim. Sapos memba ia i klin inaf yet, bisop o kaonsela we oli givim wok ia long hem o klak, bae i go insaed long LCR blong printim rekomen ia bakegen. Niufala rekomen bae i ekspae long semmak deit olsem orijinol deit.

Samtaem wan memba we i bin lusum o oli bin stilim rekomen blong hem, i nomo stap laef folem ol standet blong stap klin inaf. Long ol situesen olsem, bisop bae i kanselem rekomen blong olgeta kwiktaem (luk long 26.2.3).

26.2.3

Olgeta we Oli Holem Rekomen we Oli No Stap Laef Folem Ol Standet blong Klin Laef

Sapos bisop i faenemaot se wan memba we i gat wan rekomen i stap i no stap laef folem ol standet blong fasin blong stap klin inaf (luk long 26.3), hem i askem rekomen ia long memba. Hem i yusum RLK blong kanselem rekomen ia. Sapos i no gat kompiuta program ia i stap, bisop i kontaktem tempol ofis blong oli kanselem rekomen ia.

26.3

Ol Jeneral Gaedlaen blong Givimaot Ol Tempol Rekomen

Ol prishud lida we oli gat raet oli holem ol intaviu bifo wan memba i kasem wan tempol rekomen. Ol instraksen oli stap insaed long RLK. Ol prishud lida oli sapos blong givimaot wan rekomen, sapos nomo memba ia i ansarem ol kwestin blong tempol rekomen long wan fasin we i stret.

Ol intaviu blong tempol rekomen i letem ol memba blong oli soem se oli gat wan testemoni mo oli stap traehad blong stap obei long ol komanmen blong God, mo oli stap folem ol profet blong Hem. Ol prishud lida, tru long intaviu ia, oli talem se i tru se memba ia i klin inaf. Luk long 26.3.3 blong kasem sam moa infomesen olsem wanem blong lidim ol tempol rekomen intaviu.

Long ol stek, wan memba blong stek presidensi o wan stek klak i mekem tempol rekomen i laef insaed long RLK afta we oli givimaot. Long ol distrik, wan memba blong misin presidensi o wan misin klak nao i mekem rekomen ia i laef long sistem. Ol rekomen blong ol baptaes mo ol konfemesen blong olgeta we oli ded finis, oli stap mekem olgeta oli laef taem wan memba blong bisoprik, o branj presiden i printim olgeta. Hem i yusum RLK blong printim rekomen ia.

26.3.1

Ol Tempol Rekomen Intaviu blong Ol Memba long Ol Wod mo Branj

Long wan wod, Bisop o wan kaonsela we hem i mekem ol intaviu mo givimaot ol rekomen long olgeta we oli klin inaf. Long wan branj, branj presiden nomo i mekem ol tempol rekomen intaviu mo givimaot ol rekomen.

Long wan wod, bisop hemwan, i mekem intaviu long ol memba we:

• Oli stap kasem endaomen blong olgeta (luk long 27.1 mo 27.2).

• Oli sil long hasban o waef blong olgeta (luk long 27.3).

Long kes we i ejen, we bisop i no stap, hem i save givim raet long wan long ol kaonsela blong hem blong lidim ol intaviu ia.

Long ol bigfala wod blong ol yang singgel adalt, ol bisop oli save givim raet long ol kaonsela blong olgeta we oli gat eksperiens blong oli holem ol intaviu ia.

Bifo hem i givimaot wan rekomen long ol situesen we i stap long lis antap ia, bisop i mas luklukbak long rekod blong memba ia blong jekem sapos i no gat wan not i hang i stap abaot sam strong kondisen we i stap long Jos membasip blong memba ia. Blong ol memba we oli stap kasem endaomen blong olgetawan, o oli sil long wan hasban o waef blong olgeta, bisop i mekemsua se:

• Baptaes mo konfemesen blong man o woman ia, oli bin rekodem long membasip rekod.

• Ol brata oli bin kasem Melkesedek Prishud.

Samtaem, oli no rekodem daon baptaes mo konfemesen blong wan memba, o oli no bin rekodem Melkesedek Prishud odinesen. Long ol situesen olsem, ol odinens ia, oli mas jekem mo rekodem olgeta, oli mas pasem o oli mas mekem bakegen (luk long 38.2.6).

Afta long wan intaviu we memba blong bisoprik o branj presiden i mekem, wan memba blong stek presidensi i intaviu long man o woman ia we i stap long stek ia. Hem i saenem rekomen blong olgeta we oli klin inaf. Wan memba blong misin presidensi i holem wan nambatu intaviu blong ol memba we oli laef long wan distrik. Hem tu i saenem ol rekomen blong olgeta ia nomo we oli klin inaf. Wan distrik presiden i no holem ol intaviu blong tempol rekomen, be nomo, sapos Fas Presidensi i givim raet long hem.

Stek o misin presiden, hemwan i intaviu ol memba we:

• Oli stap kasem endaomen blong olgeta.

• Oli sil long hasban o waef.

Sapos stek presiden i no stap, hem i save givim raet long wan long ol kaonsela blong hem blong holem ol intaviu ia.

Misin presiden i save givim raet long wan long tufala kaonsela blong hem blong mekem ol intaviu ia, sapos i nid.

Long wan yang singgel adalt stek, stek presiden i save givim raet long ol kaonsela blong hem blong i holem ol intaviu ia.

26.3.2

Ol Tempol Rekomen Intaviu blong Ol Memba we Oli Stap long Ol Ples we Oli Longwe Tumas

Sam memba oli stap laef long wan ples we i stap hemwan, we bae memba i spenem bigfala mane blong transpot, o bae i had tumas long memba blong mit wetem wan memba blong stek o misin presidensi. Long ol situesen olsem, wan memba blong stek o misin presidensi i save mit tugeta onlaen wetem memba ia blong mekem tempol rekomen intaviu (luk long 31.4). Lida ia bae i saenem rekomen tru long kompiuta, sapos memba ia i klin inaf. Wan memba blong bisoprik o branj presiden bae i printim rekomen ia mo givim long memba.

Polisi ia i go tu long ol memba long militeri, we oli stap long ol ples we i stap hemwan o i longwe tumas.

26.3.3

Stap Kondaktem wan Tempol Rekomen Intaviu

Tempol hem i haos blong Lod. Blong stap go insaed long tempol mo stap tekpat long ol odinens insaed long hem, i wan tabu spesel janis. Janis ia i blong olgeta nomo we oli rere long saed blong spirit mo stap traehad blong laef folem ol standet blong Lod, olsem we ol prishud lida we oli gat atoriti oli talem.

Blong luksave strong tingting ia, ol prishud lida oli intaviu long memba mo yusum ol kwestin andanit ia. Ol lida oli no mas ademap o karemaot eni samting we i nidim blong gat we i stap. Be, oli save jenisim kwestin folem yia mo ol situesen blong memba.

Samtaem, ol memba oli gat ol kwestin long taem blong wan tempol rekomen intaviu. Prishud lida i save eksplenem ol besik prinsipol blong gospel. Hem i save helpem tu ol memba blong oli andastanem ol kwestin blong tempol rekomen sapos i nid. Be, hem i no mas presentem ol bilif blong hemwan, ol samting we hem i laekem, o fasin blong hem blong andastanem samting olsem se hemia i wan doktrin o polisi blong Jos.

Oli no mas hariap blong mekem ol intaviu blong tempol rekomen. Oli ol praevet intaviu. Be, hem we oli stap intaviu long hem, i save invaetem hasban o waef blong hem, papa o mama, o wan nara adalt blong i stap long taem ia.

26.3.3.1

Ol Tempol Rekomen Intaviu Kwestin

1. ?Yu yu gat fet long, mo yu yu gat wan testemoni abaot God, Papa we I No Save Finis; abaot Pikinini blong Hem, Jisas Kraes; mo abaot Tabu Spirit?

2. ?Yu yu gat wan testemoni abaot Atonmen blong Kraes mo wok blong Hem olsem Sevya mo Ridima?

3. ?Yu yu gat wan testemoni long saed blong Kambak blong gospel blong Jisas Kraes?

4. ?Yu yu sastenem Presiden blong Jos Ia blong Jisas Kraes blong Ol Lata-dei Sent olsem profet, sia mo reveleta, mo olsem wan man ia nomo long wol ia we i gat atoriti mo i gat raet blong yusum evri prishud ki?

   ?Yu yu sastenem ol memba blong Fas Presidensi mo Kworom blong Olgeta Twelef Aposol olsem ol profet, sia, mo reveleta?

   ?Yu yu sastenem ol nara Jeneral Atoriti mo ol lokol lida blong Jos?

5. Lod i bin talem se, evri samting, oli mas “mekem long klin fasin” long fored blong Hem ((Doktrin mo Ol Kavenan 42:41).

   ?Yu yu traehad blong stap laef long klin fasin long ol tingting mo long ol aksen blong yu?

   ?Yu yu stap obei long loa blong jastiti?

6. ?Yu yu stap folem ol tijing blong Jos Ia blong Jisas Kraes long ol praevet mo pablik aksen blong yu wetem ol memba blong famli blong yu, mo wetem ol nara man?

7. ?Yu yu stap sapotem o promotem eni tijing, praktis, o doktrin we i agensem hemia blong Jos Ia blong Jisas Kraes blong Ol Lata-dei Sent?

8. ?Yu yu stap traehad blong kipim Sabat dei i tabu, tugeta long hom mo long jos; yu stap go long ol miting blong yu; yu stap rere blong, mo yu stap klin inaf blong tekem mo kakae sakramen? ?Yu yu stap laef i stret wetem ol loa mo ol komanmen blong gospel?

9. ?Yu yu stap traehad blong stap ones long evri samting we yu stap mekem?

10. ?Yu yu stap pem ful taeting?

    Blong ol niu memba we oli stap wantem wan rekomen blong mekem ol baptaes mo konfemesen blong olgeta we oli ded: ?Yu yu wantem blong stap obei long komanmen ia blong pem taeting?

11. ?Yu yu andastanem mo stap obei long Tok blong Waes?

12. (Kwestin ia, oli no askem taem oli stap intaviu long ol pikinini o ol yut.) Yu yu gat sam mane o sam narafala samting we yu mas pem i go long hasban/waef blong yu blong fastaem, o yu yu gat eni mane blong pem long saed blong ol pikinini blong yu?

    Sapos yes, yu yu stap pem gud ol mane ia, o yu yu stap mekem ol samting we yu mas mekem long olgeta?

13. (Kwestin ia, oli no askem taem oli stap intaviu long ol pikinini o ol yut.) Yu yu stap kipim ol kavenan we yu bin mekem insaed long tempol?

14. (Kwestin ia, oli no askem taem oli stap intaviu long ol pikinini o ol yut.) Yu yu stap onarem tabu janis blong yu ia blong werem gamen olsem we oli bin givim instraksen long yu long taem we yu bin kasem odinens ia? (Ridim toktok ia, “Stap Werem Tempol Gamen” we i stap daon ia, i go long wanwan memba.)

15. ?I gat eni series sin, o nogud fasin insaed long laef blong yu we yu nidim blong stretem wetem ol prishud atoriti olsem pat blong yu blong sakem sin?

16. ?Yu yu ting se yu yu klin inaf blong go insaed long haos blong Lod mo tekempat long ol odinens blong tempol?

26.3.3.2

Stap Werem Tempol Gamen

Fas Presidensi i bin givim gaed ia abaot fasin blong stap werem gamen:

“Ol gamen blong tabu prishud oli rimaenem yumi long vel we i stap insaed long tempol, mo vel ia hem i simbol we i ripresentem Jisas Kraes. Taem yu stap putum gamen blong yu, yu stap putum gamen ia olsem wan tabu saen blong Jisas Kraes. Blong stap werem ol gamen, hem i wan saen blong soemaot komitmen blong insaed blong yuwan blong folem Sevya Jisas Kraes. Ol gamen oli rimaenem yu tu, long ol tempol kavenan blong yu. Yu mas werem gamen long dei mo long naet long ful laef blong yu long wol ia. Taem yu karemaot gamen blong ol aktiviti we bae hem i no stret blong werem gamen, yu mas putum bak kwik taem afta we ol aktiviti i finis. Taem we yu kipim ol kavenan blong yu, we i tekem tu tabu janis ia blong werem gamen folem ol instraksen we oli givim longtaem yu mekem odinens ia blong fastaem, bae yu kasem bigfala akses long bigfala sore,proteksen mo paoa we i kam long Sevya.”

Sapos ol memba oli gat ol kwestin abaot fasin blong stap werem gamen, gaedem olgeta i go long 38.5.

26.3.3.3

Sam Moa Daereksen

Prishud lida i talemaot long memba, hamas hem i impoten blong memba ia i kipim rekomen blong hem i stap sef oltaem. Neva bae oli mas givim long wan narawan, mo oli mas ripotem kwiktaem long huia i givim rekomen, sapos tempol rekomen i lus o oli stilim.

26.4

Stap Givim Ol Tempol Rekomen I Go long Ol Memba we Oli No Endao

26.4.1

Jeneral Gaedlaen

Long wan wod, bisop o wan kaonsela we hem i givim wok ia long hem i intaviu ol memba we oli no endao blong oli kasem ol tempol rekomen. Long wan branj, branj presiden nomo i holem ol tempol rekomen intaviu. Lida i folem ol gaedlaen we oli stap long 26.3. Hem i stap givimaot wan rekomen sapos man o woman ia i klin inaf.

Ol rekomen oli givimaot long ol memba we oli no endao long wei ia:

• Blong ol memba we oli gat 11 yia i go antap, blong oli save kasem baptaes mo konfemesen blong olgeta dedman. (Ol yang woman, mo ol yang man bae oli save kasem wan tempol rekomen stat long manis Jenuware blong yia ia we bae oli kasem 12 yia.)

• Blong ol memba we oli gat 8 kasem 20 yia, blong oli sil long papa mo mama blong olgeta. Ol pikinini we oli no kasem 8 yia yet, oli no nidim wan rekomen blong oli sil long papa mo mama blong olgeta (luk long 26.4.4).

• Blong ol memba, stat long 8 i go kasem 20 yia, blong oli save lukluk ol siling blong ol brata mo sista blong olgeta we oli laef i stap, ol step brata mo sista blong olgeta, o ol haf brata mo sista blong olgeta i go long papa mo mama blong olgeta.

Ol memba we oli bin endao bifo, oli no stap givim ol tempol rekomen we oli eksplenem olgeta insaed long seksen ia.

Wan memba blong Jos we i wan man, mo oli olfala inaf blong holem prishud, bae oli odenem hem i go long wan ofis blong prishud bifo hem i save kasem wan tempol rekomen.

Taem hem i stap givimaot wan tempol rekomen, wan memba blong bisoprik, o branj presiden i mekem intaviu long wanwan man o woman, hemwan. Be, sapos hem we oli stap intaviu long hem i wantem, hem i save invaetem wan papa o mama, o wan nara adalt blong i stap wetem hem.

26.4.2

Ol Tempol Rekomen blong Ol Memba we Oli Jes Baptaes

Bisop i intaviu long ol niu memba we oli kasem yia we i stret blong oli kasem wan tempol rekomen, blong ol baptaes mo konfemesen blong ol dedman nomo. Hem i holem intaviu ia stret afta long konfemesen blong memba, we plante taem, hem i afta wan wik (luk long 26.4.1). Blong ol brata, intaviu ia we oli holem i save pat blong intaviu blong kasem Aronik Prishud. Ol memba blong Jos we oli ol man, oli mas odenem olgeta long wan ofis long prishud bifo hem i kasem wan tempol rekomen.

Ol niu adalt memba we oli klin inaf, oli save kasem endaomen blong olgeta afta wan ful yia we oli bin konfem i kam wan memba blong Jos (luk long 27.2.1.1).

26.4.3

Ol Tempol Rekomen blong Ol Proksi Baptaes mo Konfemesen Nomo

Ol Tempol rekomen we oli stap givimaot blong ol proksi baptaes mo konfemesen, bambae oli save yusum nomo from stamba tingting ia. Ol rekomen ia, oli printim olgeta taem oli yusum RLK. Oli nidim nomo signeja blong wan memba blong bisoprik o branj presiden.

Blong kasem moa infomesen blong putum taem blong mekem ol baptaes mo ol konfemesen blong olgeta dedman, luk long 28.2.1.

26.4.4

Ol Tempol Rekomen blong Silim Ol Pikinini we Oli Stap Laef i Go long Papa mo Mama blong Olgeta

Ol memba we oli no endao, we oli gat 8 kasem 20 yia, oli save kasem ol limit yus rekomen blong oli tekpat long ol siling, folem ol wei ia:

• Blong oli sil long papa mo mama blong olgeta

• Blong luk brata o sista, step brata mo sista, mo haf brata mo sista blong olgeta we oli laef i stap, oli sil wetem papa mo mama blong olgeta.

Olgeta ia we oli kasem ol tempol rekomen blong tekpat long ol siling ia, wan memba blong bisoprik nao, o branj presiden i mekem intaviu long olgeta. Wan memba blong stek o misin presidensi tu i mekem intaviu long olgeta.

Wan memba blong bisoprik o branj presiden i printimaot ol limit yus rekomen ia taem hem i yusum RLK. Oli save givimaot ol tempol rekomen blong yusum long ol siling long wanwan pikinini o blong wan grup blong ol pikinini insaed long semfala famli. Semfala rekomen ia, oli save yusum blong raetem lis blong ol pikinini we bae oli sil, mo lis blong ol pikinini we bae oli lukluk nomo.

Ol pikinini we oli no kasem 8 yia yet, oli no nidim wan rekomen blong oli sil long papa mo mama blong olgeta. Mo tu, oli no nidim wan rekomen blong luk siling blong brata o sista, blong ol step brata mo sista, mo blong ol haf brata mo sista blong olgeta we i laef i stap, wetem papa mo mama blong olgeta.

Ol memba we oli gat 21 yia i go antap, bae oli save silim olgeta long papa mo mama blong olgeta, o oli save lukluk wan siling sapos nomo (1) oli endao, mo (2) sapos oli gat wan tempol rekomen we i laef i stap.

Luk long 27.4.4 mo 38.4.2 blong luk moa polisi long saed blong rod blong sil i go long papa mo mama, mo blong stap luk ol siling ia.

26.5

Givim Ol Tempol Rekomen long Ol Spesel Situesen

26.5.1

Ol Memba we Oli Stap Kasem Endaomen blong Olgetawan

Ol instraksen blong givimaot wan rekomen long wan we i stap kasem endaomen blong hem, oli stap insaed long buk 2 blong tempol rekomen. Ol memba we oli klin inaf, we oli wantem blong kasem endaomen blong olgeta bae oli save kasem sapos oli mekem evri samting ia we oli askem:

• Oli mas gat 18 yia i go antap.

• Oli mas finisim, o oli nomo go long hae skul, o sekendri skul, o wan level blong skul we i semmak.

• Wan ful yia i pas, stat long taem ia we oli kasem konfemesen.

• Oli filim se oli wantem kasem mo givim ona long ol tabu kavenan blong tempol long ful laef blong olgeta.

Antap long hemia, wan memba we i wan man, i mas kasem Melkesedek Prishud bifo hem i save kasem endaomen blong hem. Blong kasem moa infomesen abaot ol memba we oli stap rere blong kasem endaomen blong olgetawan, luk long 25.2.8. Blong kasem moa infomesen abaot huia i save kasem endaomen, luk long 27.2.1.

26.5.2

Ol Memba we Oli Jes Baptaes

Ol adalt memba we oli klin inaf, oli save kasem endaomen blong olgeta afta wan ful yia we oli bin konfem i kam wan memba blong Jos (luk long 27.2.1.1). Ol prishud lida oli meksua se deit we memba bambae i kasem endaomen, i mas wan ful yia afta long deit blong konfemesen, be i no deit blong baptaes. Fas Presidensi nomo i save givim raet blong ol eksepsen.

Ol niu memba we oli klin inaf, oli mas givim wan tempol rekomen long olgeta blong oli mekem ol baptaes mo ol konfemesen blong olgeta dedman nomo (luk long 26.4.2).

26.5.3

Ol Yang Misinari we Oli Kambak long Seves we Oli Mekem Longwe long Hom

Bifo wan yang misinari we i mekem seves blong hem longwe long hom i finisim seves blong hem, misin presiden i holem wan tempol rekomen intaviu wetem hem. Sapos misinari ia i klin inaf, hem i givimaot wan rekomen. Misin presiden i putum deit mo i mekem rekomen ia i laef blong mekem se bae i finis tri manis afta long deit ia we misinari i gobak hom.

Bisop i intaviu ol riten misinari blong i givimaot wan niu tempol rekomen kolosap long en blong ol trifala manis ia. Long kes we i ejen, we bisop i no stap, hem i save givim raet long wan long ol kaonsela blong hem blong lidim ol intaviu ia.

Long ol bigfala wod blong ol yang singgel adalt, ol bisop oli save givim raet long ol kaonsela blong olgeta we oli gat eksperiens blong oli holem ol intaviu ia.

Afta long hemia, ol riten misinari oli mit wetem wan memba blong stek blong stek presidensi blong olgeta blong hem i kasem wan intaviu blong tempol rekomen.

Long ol intaviu ia blong tempol rekomen, bisop mo wan memba blong stek presidensi oli luklukbak long kaonsel we oli bin givim long misinari long taem blong rilis intaviu blong hem (luk long 24.8.2). Oli toktok raon long progres, mo gudlaef blong riten misinari ia, mo wanem koling hem i gat i stap. Mo tu, oli leftemap tingting blong hem blong gohed long longfala rod ia blong laef blong groap long saed blong spirit, mo long saed blong seves.

Sapos riten misinari ia i no gat wan koling long Jos, bisop mo stek presiden i mekemsua se oli givim wan long hem. Oli save sendem nem blong ol riten misinari blong oli mekem wok olsem ol odinens wokman long tempol, o oli volontia long tempol, sapos i gat wan tempol i stap kolosap (luk long 25.5).

26.5.4

Ol Memba we Oli No Bin Stap Laef long Wan Semfala Wod blong Kolosap Wan Yia

Sapos wan memba i no bin laef long semfala wod oltaem blong wan ful yia, nao bisop i luklukbak long rekod blong memba ia blong jekem se i no gat wan not we oli putum abaot samfala strong kondisen long Jos membasip long rekod blong memba ia.

Bisop o wan kaonsela we hem i givim wok ia long hem, i kontaktem bisop blong las wod we memba i bin stap long hem, bifo hem i holem wan intaviu blong tempol rekomen. Sapos wan kaonsela i faenemaot se i gat konfidensiol infomesen i stap, nao hem i stopem storian ia. Hem i talemaot long bisop blong hem blong kontaktem bisop blong fastaem bifo hem i mekem intaviu.

26.5.5

Afta long Divos, Seperesen, o Afta we Oli Kanselem Mared

Bisop mo stek presiden i save filim blong mas intaviu long wan memba we i bin divos, o i bin seperet folem loa, o i mekem se oli kanselem mared blong hem stat long las taem we hem i kasem wan tempol rekomen. Long taem blong intaviu ia, oli helpem memba ia blong hem i kam strong long saed blong spirit. Mo tu, oli jekem se memba ia i bin gohed blong stap klin inaf blong go long tempol.

26.5.6

Ol Memba we Famli blong Olgeta we Oli Kolosap Oli Agensem Jos o Oli Pat blong Ol Grup blong Mekem Apostasi

Ol bisop mo ol kaonsela blong olgeta oli mas lukaotgud taem oli stap givimaot ol rekomen long ol memba we famli blong olgeta, o ol nara famli we oli kolosap long olgeta oli stap agensem Jos, o oli pat blong ol grup we oli stap mekem apostasi. Ol memba we oli stap long ol situesen ia, oli no mas mekem se oli filim se oli no save gat wan tempol rekomen from wei we famli blong olgeta oli joen long sam grup. Oli mas leftemap tingting blong olgeta blong oli holemtaet wan rilesensip blong lav wetem ol famli ia blong olgeta. Oli save givim wan tempol rekomen long olgeta sapos oli ansarem evri kwestin blong tempol rekomen long wan fasin we i stret mo wetem tru mo ones fasin.

26.5.7

Wanwan Man o Woman we Oli Talem se Oli Ol Transjenda

Ol tempol odinens oli kasem folem seks we wan i gat taem hem i bon i kam long wol ia. Ol memba we oli klin inaf, mo oli no tekem meresin, o oli no kasem operesen, o oli no gat sosol jenis long laef blong olgeta we i mekem olgeta i defren long seks we oli bon wetem, oli save kasem wan tempol rekomen mo ol odinens blong tempol. (Blong kasem mining blong gat sosol jenis long laef, luk long 38.6.23.)

Ol memba we oli bin tekem ol step blong jenis i go long nara seks be afta oli jenisim olgeta i gobak long seks we oli bon wetem, mo oli klin inaf mo oli komitim olgetawan blong stap obei long ol komanmen blong God, oli save kasem wan tempol rekomen mo ol odinens blong tempol.

Ol bisop oli kaonsel wetem stek presiden blong tokbaot wanwan situesen wetem bigfala kea, mo wetem lav blong Kraes. Ol stek mo misin presiden oli mas lukaotem kaonsel we i kam long Eria Presidensi.

Blong kasem moa infomesen, luk long 38.6.23

26.5.8

Ol Memba we Oli Bin Mekem Wan Series Sin

Wan memba we i bin mekem wan series sin, bae i no save kasem wan tempol rekomen kasem taem we hem i sakem sin blong hem (luk long 32.6). Taem blong wet bitwin taem we hem i mekem sin mo taem we bae oli givim wan rekomen long hem, bae i dipen nomo long tingting blong bisop mo stek presiden. Bae hem i longtaem inaf blong faenemaot sapos man o woman ia i bin sakem sin long wan tru fasin.

26.5.9

Ol Memba we Oli Karembak Olgeta tru long Baptaes mo Konfemesen Afta we Oli Karemaot Jos Membasip o Afta we Oli Sakemaot Membasip

26.5.9.1

Ol Memba we Oli No Bin Endao Bifo

Afta we wan memba we i no bin endao bifo, i kambak long Jos tru long baptaes mo konfemesen, bisop i save intaviu long hem blong hem i kasem wan tempol rekomen blong ol proksi baptaes mo konfemesen (luk long 26.4.2). Intaviu ia, plante taem bae i tekem ples afta wan wik we memba i kasem konfemesen bakegen. Olgeta memba blong Jos we oli ol man, bae oli mas odenem olgeta long wan ofis blong prishud bifo oli save kasem wan tempol rekomen.

Ol memba ia, oli no save givim ol rekomen long olgeta blong oli kasem endaomen blong olgetawan kasem wan ful yia afta long deit we oli kambak fulwan bakegen long Jos tru long baptaes mo konfemesen.

26.5.9.2

Ol Memba we Oli Bin Endao Bifo

Ol memba we oli bin endao bifo oli no save kasem eni kaen tempol rekomen kasem taem we oli putumbak ol tempol blesing blong olgeta tru long odinens blong putumbak ol blesing (luk long 32.17.2). Taem oli putumbak ol blesing ia, bambae oli save givim wan tempol rekomen long ol memba we oli bin endao.