27.

Ordinancat e Tempullit për Të Gjallët

27.0

Parathënia

Që nga kohët e lashta, sa herë që një popull besnik ka qenë në tokë, Perëndia i ka bekuar ata me besëlidhje dhe ordinanca tempulli. Nganjëherë, Ai ka lejuar që ordinancat e Tij të shenjta të administrohen jashtë tempujve kur nuk kishte një tempull të përkushtuar (shihni te Zanafilla 28:12–22; Eksodi 24; Eksodi 25:8–9; Ethëri 3). Por kurdoherë që Zoti e ka themeluar Kishën e Tij, Ai e ka urdhëruar popullin e Vet që të ndërtojë një shtëpi “për emrin [e Tij]”. Atje Ai zbulon ordinancat e Tij dhe lavditë e mbretërisë së Tij dhe jep mësim udhën e shpëtimit. (Shihni te 2 Kronikave 3–5; 2 Nefi 5:16; Doktrina e Besëlidhje 97:10–16; 124:29–39.)

Tempulli është shtëpia e Zotit. Ai na drejton për te Shpëtimtari ynë, Jezu Krishti. Në tempuj ne marrim pjesë në ordinanca të shenjta dhe bëjmë besëlidhje me Atin Qiellor që na lidhin me Të dhe me Shpëtimtarin tonë. Këto besëlidhje dhe ordinanca na përgatitin që të kthehemi në praninë e Atit Qiellor dhe të lidhemi së bashku si familje për përjetësinë.

Në tempull gjithashtu bekime të mëdha vihen në dispozicion për fëmijët besnikë të Perëndisë në këtë jetë. Në besëlidhjet dhe ordinancat e tempullit “fuqia e perëndishmërisë manifestohet” (Doktrina e Besëlidhje 84:20). Tempulli është një vend i shenjtë ku anëtarët mund të adhurojnë, mësojnë dhe marrin udhërrëfim e ngushëllim (shihni te Doktrina e Besëlidhje 109:13–16). Ata që e frekuentojnë tempullin mund të kenë të drejtën për ta përdorur fuqinë e Perëndisë që t’i ndihmojë ta përmbushin punën e Tij (shihni te Doktrina e Besëlidhje 109:22–23; shihni edhe 3.5 në këtë manual).

Besëlidhjet dhe ordinancat e tempullit janë të shenjta. Simbolet që lidhen me besëlidhjet e tempullit, nuk duhet të diskutohen jashtë tempullit. As nuk duhet ta diskutojmë informacionin e shenjtë për të cilin premtojmë në tempull se nuk do ta zbulojmë. Gjithsesi, ne mund të diskutojmë qëllimet bazë dhe doktrinën e besëlidhjeve dhe ordinancave të tempullit, si dhe ndjenjat shpirtërore që kemi në tempull.

Udhëheqësit e lagjeve dhe të kunjeve e diskutojnë informacionin në këtë kapitull me anëtarët që po përgatiten për të kryer ordinancat e dhurimit ose të vulosjes.

27.1

Kryerja e Ordinancave të Tempullit

27.1.1

Përgatitja për të Kryer Ordinancat e Tempullit

Anëtarët duhet të përgatiten shpirtërisht për të kryer ordinancat e tempullit dhe për t’i bërë e nderuar besëlidhjet në tempull.

Prindërit kanë përgjegjësinë kryesore për t’i ndihmuar fëmijët e tyre që të përgatiten për të kryer ordinancat e tempullit. Udhëheqësit e kunjeve dhe të lagjeve, vëllezërit e motrat shërbestare dhe pjesëtarët e rrethit familjar i përkrahin prindërit në këtë rol.

Udhëheqësit e kunjeve dhe të lagjeve i nxitin anëtarët që të përgatiten për të kryer ordinancat e tyre të tempullit. Udhëheqësit gjithashtu theksojnë rëndësinë e nderimit të besëlidhjeve të tempullit dhe të qëndruarit të denjë për një rekomandim tempulli dhe mbajtjen e një rekomandimi tempulli.

Burimet për t’i ndihmuar anëtarët që të përgatiten për të kryer ordinancat e tempullit janë në dispozicion tek temples.ChurchofJesusChrist.org.

Anëtarët që po përgatiten për të kryer ordinancën e dhurimit për veten e tyre ose që të vulosen me një bashkëshort/e, nxiten që të marrin pjesë në një kurs të përgatitjes për frekuentimin e tempullit (shihni 25.2.8).

Anëtarët takohen me peshkopin dhe presidentin e tyre të kunjit që të marrin një rekomandim për ordinanca për të gjallët kur:

• Kryejnë ordinancën e dhurimit për veten e tyre.

• Vulosen me një bashkëshort/e.

Për informacion mbi lëshimin e rekomandimeve të tempullit në këto rrethana, shihni 26.1 dhe 26.3.1.

27.1.2

Planifikimi i Ordinancave të Tempullit

Anëtarët që po planifikojnë të kryejnë ordinancën e dhurimit për veten e tyre ose të vulosen apo martohen, duhet ta caktojnë orarin e ordinancës që më parë me tempullin që kanë në plan të frekuentojnë. Normalisht ata e bëjnë këtë pasi të kenë marrë një rekomandim për ordinancat për të gjallët. Shihni tek temples.ChurchofJesusChrist.org për informacion kontakti për secilin tempull.

27.1.3

Anëtarët që Kanë Aftësi të Kufizuara Fizike

Anëtarët e denjë që kanë aftësi të kufizuara fizike, mund t’i marrin të gjitha ordinancat e tempullit (shihni 38.2.5). Këta anëtarë inkurajohen që ta frekuentojnë tempullin bashkë me familjarë apo miq të së njëjtës gjini që e kanë kryer ordinancën e dhurimit, të cilët mund t’i ndihmojnë. Ata që ndihmojnë duhet të kenë një rekomandim aktual tempulli. Nëse anëtarët nuk mund të frekuentojnë me një pjesëtar të familjes ose një mik, ata mund të marrin në telefon tempullin që më parë për të kuptuar se çfarë rregullimesh mund të bëhen. Shihni tek temples.ChurchofJesusChrist.org për informacion kontakti për secilin tempull.

Kafshë shërbimi dhe kafshë për mbështetje emocionale nuk lejohen në tempuj. Presidentët e kunjeve mund të vihen në kontakt me Sektorin e Tempullit tek [e-mail], në qoftë se kanë pyetje.

27.1.4

Ndihma për Përkthimin ose Interpretimin

Nëse anëtarët kanë nevojë për ndihmë lidhur me përkthimin ose interpretimin në tempull, ata duhet të vihen në kontakt me tempullin që më parë për të kuptuar nëse një ndihmë e tillë është në dispozicion. Shihni tek temples.ChurchofJesusChrist.org për informacion kontakti për secilin tempull.

27.1.5

Veshjet që Vishen në Tempull

Kur shkojnë në tempull, anëtarët duhet të veshin llojin e veshjeve që zakonisht veshin në mbledhjen e sakramentit. Ata duhet të shmangin veshjen e rrobave që janë joformale ose nuk i mbulojnë veshjet e brendshme të tempullit. Ata gjithashtu duhet të shmangin veshjen e rrobave që janë tepër formale, si smokingët. Ky udhëzim jepet mësim më së miri nga prindërit, vëllezërit e motrat shërbestare dhe udhëheqësit e lagjeve dhe të kunjeve teksa anëtarët përgatiten për të adhuruar në tempull.

Shihni 27.3.2.6 për informacion rreth veshjeve që vishen për një martesë ose vulosje në tempull.

Shihni 38.5 për informacion rreth:

• Veshjeve për t’u veshur gjatë ordinancave të dhurimit dhe vulosjes.

• Marrjes, veshjes dhe përkujdesjes për veshjet ceremoniale dhe veshjet e brendshme të tempullit.

27.1.6

Kujdesi për Fëmijët

Fëmijët duhet të kenë mbikëqyrjen e një personi në moshë madhore, në qoftë se janë në mjedisin përreth tempullit. Punonjësit e tempullit janë në dispozicion për të mbikëqyrur fëmijët vetëm në rrethanat vijuese:

• Nëse fëmijët po vulosen te prindërit

• Nëse fëmijët po shohin vulosjen e vëllezërve dhe motrave të gjalla, të fëmijëve të njerkut/ës ose gjysmëvëllezërve e gjysmëmotrave të tyre te prindërit e tyre

27.1.7

Takimi me Anëtarët pasi i Kryejnë Ordinancat e Tempullit

Anëtarët shpesh kanë pyetje pasi kryejnë ordinancat e tempullit. Pjesëtarë të familjes që e kanë kryer dhurimin, peshkopi, udhëheqës të tjerë të lagjes dhe vëllezërit e motrat shërbestare mund të takohen me anëtarët për të diskutuar për përvojën e tyre në tempull.

Udhëheqësit gjithashtu i nxitin anëtarët të kërkojnë përgjigje për pyetjet e tyre nëpërmjet frymëzimit nga Fryma e Shenjtë. Në tempull, Shpirti mund të japë përgjigje ndaj shumë prej pyetjeve që anëtarët mund t’i kenë rreth përvojës së tyre në tempull.

Burime për t’i ndihmuar që t’u japin përgjigje pyetjeve, janë në dispozicion tek temples.ChurchofJesusChrist.org.

27.2

Dhurimi

Fjala dhurim do të thotë dhënie e “një dhurate”. Ordinanca e dhurimit në tempull është në mënyrë të mirëfilltë një dhuratë nga Perëndia nëpërmjet së cilës Ai i bekon fëmijët e Tij. Ordinanca e dhurimit mund të kryhet vetëm në tempujt e shenjtë. Disa nga dhuratat që anëtarët i marrin nëpërmjet ordinancës së dhurimit në tempull, përfshijnë:

• Njohuri më të madhe për qëllimet dhe mësimet e Zotit.

• Fuqi për të bërë gjithçka që Ati Qiellor dëshiron që të bëjnë fëmijët e Tij.

• Drejtim hyjnor kur u shërbejnë Zotit, familjeve të tyre dhe të tjerëve.

• Shpresë, ngushëllim dhe paqe më të madhe.

Të gjitha bekimet e premtuara të ordinancës së dhurimit janë në fuqi si në këtë jetë ashtu edhe për përjetësinë. Përmbushja e këtyre bekimeve varet nga besnikëria ndaj ungjillit të Jezu Krishtit.

Dhurimi merret në dy pjesë. Në pjesën e parë, një person kryen një ordinancë paraprake të quajtur nistorja. Nistorja gjithashtu njihet si larja dhe vajosja (shihni tek Eksodi 29:4–9). Ajo përfshin bekime të veçanta që lidhen me prejardhjen dhe potencialin hyjnor të personit.

Gjatë nistores, anëtari/ja autorizohet të veshë veshjet e brendshme të tempullit. Veshjet e brendshme të tempullit përfaqësojnë marrëdhënien e tij ose të saj vetjake me Perëndinë dhe zotimin për t’iu bindur besëlidhjeve të bëra në tempull. Kur anëtarët janë besnikë ndaj besëlidhjeve të tyre dhe i veshin siç duhet veshjet e brendshme të tempullit gjatë gjithë jetës së tyre, ato gjithashtu shërbejnë si mbrojtje. Për informacion rreth veshjes dhe përkujdesjes për veshjet e brendshme të tempullit, shihni 38.5.5.

Në pjesën e dytë të dhurimit jepet mësim plani i shpëtimit, përfshirë Krijimin, Rënien e Adamit dhe të Evës, Shlyerjen e Jezu Krishtit, Braktisjen dhe Rivendosjen. Anëtarët gjithashtu marrin udhëzim lidhur me mënyrën se si të kthehen në praninë e Zotit.

Në ordinancën e dhurimit anëtarët ftohen të bëjnë besëlidhje të shenjta që:

• Të jetojnë ligjin e bindjes dhe të përpiqen fort që t’i zbatojnë urdhërimet e Atit Qiellor.

• T’i binden ligjit të sakrificës, që do të thotë sakrifikimin për ta përkrahur veprën e Zotit dhe pendimin me një zemër të thyer dhe një shpirt të penduar.

• T’i binden ligjit të ungjillit të Jezu Krishtit, që është ligji më i lartë që Ai e dha mësim ndërkohë që ishte në tokë.

• Ta mbajnë ligjin e dëlirësisë, që do të thotë se një anëtar/e ka marrëdhënie seksuale vetëm me personin me të cilin ai ose ajo është martuar zyrtarisht dhe ligjërisht në përputhje me ligjin e Perëndisë.

• Ta mbajnë ligjin e përkushtimit, që do të thotë se ia përkushtojnë kohën, talentet e tyre dhe gjithçka me të cilën Zoti i ka bekuar, ndërtimit të Kishës së Jezu Krishtit në tokë.

Si këmbim, Ati Qiellor premton se ata që u qëndrojnë besnikë besëlidhjeve të tyre të tempullit, do të dhurohen me “fuqi nga lart” (Doktrina e Besëlidhje 38:32, 38; shihni edhe te Lluka 24:49; Doktrina e Besëlidhje 43:16).

27.2.1

Kush Mund ta Kryejë Ordinancën e Dhurimit

Të gjithë anëtarët e përgjegjshëm në moshë madhore të Kishës ftohen të përgatiten për ordinancën e dhurimit për veten e tyre dhe ta kryejnë atë. Të gjitha ordinancat paraprake duhet të kryhen dhe shënohen përpara se anëtarët të mund të kryejnë ordinancën e dhurimit (shihni 26.3.1). Shihni 27.2.2 për informacion rreth vendimit se kur ta kryeni ordinancën e dhurimit.

27.2.1.1

Anëtarët e Sapopagëzuar

Anëtarët e rinj [në anëtarësi] që janë në moshë madhore dhe të denjë mund ta kryejnë ordinancën e dhurimit për veten e tyre të paktën pas një viti të plotë nga data e konfirmimit të tyre (shihni 26.5.2).

27.2.1.2

Anëtarët që Kanë një Bashkëshort/e që Nuk e Ka Kryer Ordinancën e Dhurimit

Një anëtar/e i/e denjë bashkëshortja/i e/i të cilit nuk e ka kryer ordinancën e dhurimit, mund ta marrë dhurimin e vet kur plotësohen kushtet vijuese:

• Bashkëshorti/ja që nuk e ka kryer ordinancën e dhurimit, e jep miratimin e vet.

• Anëtari/ja, peshkopi dhe presidenti i kunjit kanë vetëbesim se përgjegjësia e marrë me besëlidhjet e tempullit nuk do të jetë një problem për martesën.

Këto kushte gjejnë zbatim qoftë nëse bashkëshorti/ja është anëtar/e i/e Kishës apo jo.

27.2.1.3

Anëtarët që Kanë Aftësi të Kufizuara Intelektuale

Anëtarët që kanë aftësi të kufizuara intelektuale, mund ta kryejnë ordinancën e dhurimit për veten e tyre në qoftë se:

• Ata i kanë kryer të gjitha ordinancat paraprake (shihni 26.3.1).

• Ata kanë aftësinë intelektuale për t’i kuptuar, bërë dhe mbajtur besëlidhjet që lidhen me to.

Peshkopi këshillohet me anëtarin/en dhe, atje ku gjen zbatim, prindërit e tij ose të saj. Ai gjithashtu kërkon drejtimin e Shpirtit. Ai mund të këshillohet me presidentin e kunjit. Presidenti i kunjit mund t’i drejtojë pyetje Zyrës së Presidencës së Parë nëse është e nevojshme. Shihni 38.2.4.

27.2.2

Vendimi se Kur të Kryhet Ordinanca e Dhurimit

Vendimi për të kryer ordinancën e dhurimit është vetjak dhe duhet të bëhet plot lutje. Dhurimi është një bekim fuqie dhe zbulese për të gjithë ata që përgatiten për ta kryer atë. Anëtarët mund të zgjedhin që të kryejnë ordinancën e dhurimit për veten e tyre, kur i plotësojnë të gjitha kushtet vijuese:

• Janë të paktën 18 vjeç.

• E kanë përfunduar ose nuk po vazhdojnë më një shkollë të mesme, një shkollë profesionale apo një të barasvlershme me to.

• Një vit i plotë ka kaluar që nga konfirmimi i tyre.

• Ndiejnë dëshirë për t’i marrë dhe nderuar besëlidhjet e shenjta të tempullit gjatë gjithë jetës së tyre.

Anëtarët që kanë marrë një thirrje misioni ose po përgatiten për t’u vulosur në tempull, duhet ta kryejnë ordinancën e dhurimit. Peshkopi gjithashtu këshillohet me anëtarë të tjerë në moshë madhore që dëshirojnë ta kryejnë ordinancën e dhurimit.

Përpara se të lëshojnë një rekomandim tempulli për një anëtar që të kryejë ordinancën e dhurimit, peshkopi dhe presidenti i kunjit duhet të ndiejnë se personi po përgatitet për të kuptuar dhe mbajtur besëlidhje të shenjta tempulli. Ky kualifikim përcaktohet individualisht për secilin person. Udhëheqësit nuk përdorin kritere të përgjithësuara, të tilla si ato që renditen më poshtë, kur përcaktojnë nëse një person po përgatitet për të kryer ordinancën e dhurimit ngaqë po:

• Arrin në një moshë të caktuar

• Largohet nga shtëpia për në kolegj, për punësim ose shërbim ushtarak

• Dëshiron të shikojë vulosjen në tempull të një pjesëtari të familjes ose një miku apo mikeje

27.2.3

Planifikimi dhe Caktimi i një Takimi për Ordinancën e Dhurimit

27.2.3.1

Marrja e një Rekomandimi për Ordinancat për të Gjallët

Një anëtar duhet të marrë një rekomandim për ordinanca për të gjallët që të shkojë në tempull dhe të kryejë ordinancën e dhurimit. Për informacion rreth këtyre rekomandimeve, shihni 26.5.1.

27.2.3.2

Vënia në Kontakt me Tempullin

Anëtarët që po planifikojnë të kryejnë ordinancën e dhurimit, duhet të vihen në kontakt me tempullin përpara se të caktojnë një takim për ordinancën (shihni 27.1.2). Tempulli do të japë udhëzime, përfshirë informacionet rreth veshjeve të tempullit, kur të caktohet takimi.

27.2.3.3

Shoqëruesit për Anëtarët që po Kryejnë Ordinancën e Dhurimit

Anëtarët që kryejnë ordinancën e dhurimit për veten e tyre, mund të ftojnë një anëtar të së njëjtës gjini që e ka kryer ordinancën e dhurimit, që të veprojë si shoqërues/e dhe t’i ndihmojë gjatë sesionit të ordinancës së dhurimit. Shoqëruesi/ja duhet të ketë një rekomandim aktual tempulli. Tempulli mund të sigurojë një shoqërues/e nëse nevojitet.

27.3

Vulosja e Bashkëshortit dhe Bashkëshortes

“Familja shugurohet nga Perëndia. Martesa midis burrit dhe gruas është thelbësore në planin e Tij të përjetshëm” (“Familja: Një Proklamatë drejtuar Botës”). Një vulosje në tempull i lidh një bashkëshort e një bashkëshorte së bashku për kohën dhe gjithë përjetësinë, në qoftë se janë besnikë ndaj besëlidhjeve që bëjnë në tempull. Çifteve që vulosen në tempull, u premtohen lavdi dhe gëzim gjatë gjithë përjetësisë (shihni te Doktrina e Besëlidhje 132:19–20). Nëpërmjet kësaj ordinance, fëmijët e tyre gjithashtu mund të jenë pjesë e familjes së tyre të përjetshme.

Udhëheqësit e Kishës i nxitin anëtarët që të përgatiten për t’u martuar dhe vulosur në tempull. Atje ku martesat në tempull nuk njihen ligjërisht, udhëheqësit e autorizuar të Kishës ose të tjerë mund të kryejnë martesa civile të cilat pasohen nga një vulosje në tempull (shihni 38.3). Ky model mund të ndiqet edhe kur një martesë në tempull mund të bënte që prindërit ose pjesëtarët e afërt të familjes të ndihen të lënë jashtë ngaqë nuk mund të frekuentojnë ceremoninë e tempullit.

27.3.1

Kush Mund të Vuloset në Tempull

Të gjithë anëtarët e përgjegjshëm, të pamartuar të Kishës ftohen të përgatiten për një vulosje në tempull. Ata që janë të martuar me martesë civile, nxiten që të vulosen për kohën dhe përjetësinë në tempull sapo të përgatiten. Anëtarë duhet ta kenë kryer ordinancën e dhurimit përpara se të mund të vulosen (shihni 27.2).

Çiftet që po vulosen në tempull, duhet të jenë ose 1) të martuar me martesë civile përpara se të vulosen, ose 2) të martohen dhe vulosen në të njëjtën ceremoni në tempull. Shihni 27.3.2.

27.3.1.1

Anëtarët që Ishin Vulosur me një Bashkëshort/e të Mëparshëm/e

Shihni 38.4.1.

27.3.1.2

Anëtarët që Kanë Aftësi të Kufizuara Intelektuale

Anëtarët që kanë aftësi të kufizuara intelektuale, mund të vulosen me bashkëshortin/en ose të fejuarin/ën e tyre, në qoftë se:

• Ata i kanë kryer të gjitha ordinancat paraprake përfshirë dhurimin (shihni 27.2.1.3).

• Ata kanë aftësinë intelektuale për t’i kuptuar, bërë dhe mbajtur besëlidhjet që lidhen me to.

Peshkopi këshillohet me anëtarin/en dhe bashkëshorten/in ose të fejuarin/ën e vet. Ai gjithashtu kërkon drejtimin e Shpirtit. Ai mund të këshillohet me presidentin e kunjit. Presidenti i kunjit mund t’i drejtojë pyetje Zyrës së Presidencës së Parë nëse është e nevojshme. Shihni 38.2.4.

27.3.2

Planifikimi dhe Caktimi i një Takimi për një Martesë ose Vulosje në Tempull

27.3.2.1

Marrja e një Rekomandimi për Ordinancat për të Gjallët

Një anëtar/e duhet të marrë një rekomandim për ordinanca për të gjallët që të vuloset me bashkëshorten/in e vet. Për informacion rreth këtyre rekomandimeve, shihni 26.3.

27.3.2.2

Vënia në Kontakt me Tempullin

Anëtarët që po planifikojnë të martohen ose vulosen me një bashkëshort/e, duhet të vihen në kontakt me tempullin përpara se të caktojnë një takim për ordinancën (shihni 27.1.2). Tempulli do të japë udhëzime kur të caktohet takimi.

27.3.2.3

Marrja e një Leje për Martesë

Përpara se të martohen, një çift duhet të marrë një leje të ligjshme për martesën, që është e vlefshme në vendin ku do të kryhet martesa. Nëse çifti planifikon që të martohet dhe vuloset gjatë së njëjtës ceremoni, ata duhet të sjellin në tempull një leje të vlefshme për martesë.

Çiftet që po vulosen pas një martese civile, nuk nevojitet që të sjellin në tempull një leje për martesë. Në vend të kësaj, ata japin datën dhe vendin e martesës së tyre civile si pjesë të procesit të verifikimit të dokumentit.

27.3.2.4

Shoqëruesit për Nusen dhe Dhëndrin

Një motër që e ka kryer ordinancën e dhurimit, mund të shoqërojë nusen që ta ndihmojë në dhomën e veshjes. Një vëlla që e ka kryer ordinancën e dhurimit, mund të bëjë të njëjtën gjë për dhëndrin. Një shoqërues/e duhet të ketë një rekomandim aktual tempulli. Tempulli mund të sigurojë një shoqërues/e nëse nevojitet.

27.3.2.5

Kush e Kryen një Martesë ose Vulosje në Tempull

Një martesë ose vulosje në tempull zakonisht kryhet nga një vulosës që është i caktuar në tempullin ku do të martohet ose vuloset çifti. Në qoftë se një pjesëtar ose i njohur i familjes mban autoritetin vulosës dhe është i caktuar në tempullin ku do të martohet ose vuloset çifti, ata mund ta ftojnë që të kryejë martesën ose vulosjen.

Një vulosës gjithashtu mund t’i kërkojë Presidencës së Parë miratim për të kryer një vulosje për pasardhësit e linjës së tij (fëmijë, nipër, mbesa, stërnipër e stërmbesa) në një tempull tjetër nga tempulli në të cilin është caktuar. Ai duhet të marrë një letër autorizimi nga Presidenca e Parë për secilën vulosje të tillë. Ai e paraqet letrën në tempull.

Anëtarët nuk nxiten që t’u kërkojnë Autoriteteve të Përgjithshme që ta kryejnë martesën ose vulosjen e tyre në tempull.

27.3.2.6

Veshja e Duhur për një Martesë ose Vulosje në Tempull

Fustani i Nuses. Fustani që një nuse e vesh në tempull, duhet të jetë i bardhë, i thjeshtë në model e pëlhurë dhe pa zbukurime të ndërlikuara. Gjithashtu, duhet të mbulojë veshjet e brendshme të tempullit. Pëlhura e tejdukshme duhet të ketë shtresë të brendshme.

Që të përputhet me fustanet e tjera të veshura në tempull, një fustan nuseje duhet të ketë mëngë të gjata ose treçerekëshe. Fustanet nuk duhet të kenë bisht, në qoftë se bishti nuk mund të ngjitet me gjilpëra ose të hiqet për ceremoninë e vulosjes.

Tempulli mund të japë një fustan nëse nevojitet ose dëshirohet.

Veshja e Dhëndrit. Dhëndri vesh veshje normale tempulli gjatë ceremonisë së martesës ose vulosjes (shihni 38.5.1 dhe 38.5.2). Ai mund të veshë veshje formale jashtë tempullit për fotografi pas ceremonisë.

Veshjet e të Ftuarve. Njerëzit që marrin pjesë në ceremoninë e një martese ose vulosjeje, duhet të veshin veshje të ngjashme me ato që do t’i vishnin në një mbledhje sakramenti. Të ftuarit nuk duhet të vishen me të bardha, në qoftë se nuk iu duhet të hyjnë në dhomën e vulosjes nëpërmjet dhomës çelestiale. Anëtarët që vijnë në një vulosje drejtpërsëdrejti nga një sesion dhurimi, mund të veshin veshjet ceremoniale të tempullit.

Çifti duhet t’ua japë këtë informacion të ftuarve shumë kohë përpara martesës ose vulosjes.

Lulet. Çifti dhe të ftuarit nuk duhet të kenë lule në veshjet e tyre gjatë ceremonisë së martesës ose vulosjes. Lulet mund të vihen në veshjet jashtë tempullit për fotografi pas ceremonisë. Çifti duhet t’ua japë këtë informacion të ftuarve shumë kohë përpara martesës ose vulosjes.

27.3.2.7

Shkëmbimi i Unazave pas një Martese ose Vulosjeje në Tempull

Shkëmbimi i unazave nuk është pjesë e ceremonisë së vulosjes në tempull. Megjithatë, çiftet mund të shkëmbejnë unaza pas ceremonisë në dhomën e vulosjes. Çiftet nuk duhet të shkëmbejnë unaza në ndonjë kohë ose vend tjetër brenda në tempull ose në territorin përreth tempullit. Bërja e kësaj gjëje mund ta largojë vëmendjen nga ceremonia.

Çiftet që martohen dhe vulosen në të njëjtën ceremoni, mund të shkëmbejnë unaza në një kohë të mëvonshme për t’ua mundësuar pjesëmarrjen gjatë këtij veprimi pjesëtarëve të familjeve që nuk janë në gjendje të marrin pjesë në një martesë në tempull. Shkëmbimi i unazave duhet të jetë në përputhje me dinjitetin e një martese në tempull. Shkëmbimi nuk duhet të jetë një kopje e ndonjë pjese të ceremonisë së martesës ose vulosjes në tempull. Çifti nuk duhet të shkëmbejë zotime pasi të jetë martuar ose vulosur në tempull.

Çiftet që martohen në mënyrë civile përpara vulosjes së tyre në tempull, mund të shkëmbejnë unaza në ceremoninë e tyre civile, në vulosjen e tyre në tempull ose në të dyja ceremonitë.

27.3.3

Martesa në Tempull Vetëm për Kohën

Qëllimi i tempullit është që të administrojë ordinancat për përjetësinë. Për këtë arsye, martesat vetëm për kohën nuk kryhen më në tempuj.

Për rregulloren mbi vulosjen e një çifti që ishin martuar në tempull vetëm për kohën, shihni 38.4.1.6.

27.3.4

Kush Mund të Jetë i Pranishëm në një Martesë ose Vulosje në Tempull

Çiftet duhet të ftojnë vetëm pjesëtarë të afërt të familjes dhe miq të ngushtë në një martesë ose vulosje në tempull. Anëtarët e përgjegjshëm duhet të kenë kryer ordinancën e dhurimit dhe të kenë një rekomandim aktual tempulli që të marrin pjesë.

Presidenti i kunjit mund të autorizojë një person që nuk është pagëzuar ose nuk e ka kryer ordinancën e dhurimit për shkak të aftësive të kufizuara intelektuale, që ta shohë martesën ose vulosjen në tempull të vëllait ose motrës së vet të gjallë. Personi duhet:

• Të jetë të paktën 18 vjeç.

• Të jetë në gjendje që të qëndrojë nderues gjatë ceremonisë.

Presidenti i kunjit shkruan një letër që shpreh se personi autorizohet që ta shohë vulosjen. Kjo letër paraqitet në tempull.

Anëtarët duhet të kenë kryer ordinancën e dhurimit dhe të kenë një rekomandim aktual tempulli që të shohin vulosjen e prindërve të tyre.

27.3.5

Festat e Dasmave

Shihni 35.5.15 për informacion rreth mbajtjes së festave të dasmave në ndërtesat e Kishës.

27.4

Vulosja te Prindërit e Fëmijëve që Janë të Gjallë

Fëmijët që linden pasi nëna e tyre është vulosur me një bashkëshort në tempull, linden në besëlidhjen e asaj vulosjeje. Ata nuk kanë nevojë të marrin ordinancën e vulosjes te prindërit.

Fëmijët që nuk linden në besëlidhje, mund të bëhen pjesë e një familjeje të përjetshme duke u vulosur te prindërit e tyre biologjikë ose birësues. Këta fëmijë kanë të drejtën për të njëjtat bekime sikurse ata që kishin lindur në besëlidhje.

Shihni 38.4.2 për rregulloret rreth vulosjes së fëmijëve te prindërit.

27.4.1

Lëshimi i një Rekomandimi për Vulosjen te Prindërit të Fëmijëve që Janë të Gjallë

Anëtarëve të përgjegjshëm të moshës 8 vjeç e lart u nevojitet një rekomandim që të vulosen te prindërit e tyre. Atyre gjithashtu iu nevojitet një rekomandim që të shohin vulosjen e vëllezërve dhe motrave të gjalla, fëmijëve të njerkut/ës ose gjysmëvëllezërve e gjysmëmotrave te prindërit e tyre (shihni 27.4.4). Fëmijët e moshave 8 vjeç e lart duhet të jenë të pagëzuar dhe të konfirmuar që të marrin një rekomandim tempulli. Meshkujt që janë të paktën 11 vjeç dhe do të mbushin 12 vjeç gjatë vitit të ordinancës, duhet të mbajnë edhe priftërinë.

Anëtarët që janë 21 vjeç e lart, duhet të kenë kryer ordinancën e dhurimit dhe të mbajnë një rekomandim aktual tempulli që të vulosen te prindërit e tyre.

Presidenti i kunjit mund të autorizojë persona që nuk janë pagëzuar ose nuk e kanë kryer ordinancën e dhurimit për shkak të aftësive të kufizuara intelektuale, që të vulosen te prindërit e tyre. Presidenti i kunjit shkruan një letër që shpreh se personi autorizohet që të vuloset. Kjo letër paraqitet në tempull.

Shihni 26.4.4 për informacion rreth lëshimit të rekomandimeve për fëmijët.

27.4.2

Vënia në Kontakt me Tempullin

Një çift që dëshiron që fëmijët e tyre të vulosen tek ata, ose fëmijët që dëshirojnë të vulosen te prindërit e tyre të vdekur, duhet të vihen në kontakt me tempullin përpara se të caktojnë një takim për ordinancën (shihni 27.1.2). Në disa raste, ordinanca të tjera të tempullit mund të nevojitet të kryhen përpara se të ndodhë vulosja.

27.4.3

Kujdesi për Fëmijët

Shihni 27.1.6.

27.4.4

Kush Mund të Jetë i Pranishëm në një Vulosje te Prindërit të Fëmijëve që Janë të Gjallë

Për të vëzhguar vulosjen te prindërit e tyre të vëllezërve dhe motrave të gjalla, fëmijëve të njerkut/ës ose gjysmëvëllezërve e gjysmëmotrave, anëtarët që nuk e kanë kryer ordinancën e dhurimit, nën moshën 21 vjeç, duhet të jenë të lindur në besëlidhje ose të vulosur te prindërit e tyre. Përveç kësaj, fëmijët e moshave 8 vjeç e lart duhet të jenë të pagëzuar e të konfirmuar dhe duhet të kenë një rekomandim tempulli (shihni 26.4.4). Meshkujt që janë të paktën 11 vjeç dhe do të mbushin 12 vjeç gjatë vitit të ordinancës, duhet të mbajnë edhe priftërinë.

Anëtarët që janë 21 vjeç e lart, duhet të kenë kryer ordinancën e dhurimit dhe të mbajnë një rekomandim aktual tempulli që të shohin vulosje të tilla.

Anëtarët e martuar që janë nën moshën 21 vjeç, nuk nevojitet të kenë kryer ordinancën e dhurimit në tempull që të shohin vulosje të tilla. Sidoqoftë, ata duhet të kenë një rekomandim tempulli (shihni 26.4.4).