27.

Mga Ordinansa sa Templo alang sa mga Buhi

27.0

Pasiuna

Sukad sa karaang panahon, sa dihang adunay matinud-anong katawhan sa yuta, ang Dios mipanalangin kanila sa mga pakigsaad ug mga ordinansa sa templo. Siya usahay mitugot sa Iyang balaan nga mga ordinansa nga ipangalagad sa gawas sa mga templo sa dihang wala pay gipahinungod nga templo (tan-awa sa Genesis 28:12–22, Exodo 24, Exodo 25:8–9, Ether 3). Apan sa dihang ang Ginoo nakaestablisar sa Iyang Simbahan, Siya misugo sa Iyang katawhan sa pagtukod og usa ka balay “ngadto sa [Iyang] ngalan.” Didto Siya mopadayag sa Iyang mga ordinansa ug mga himaya sa Iyang gingharian ug motudlo sa paagi sa kaluwasan. (Tan-awa sa 2 Cronicas 3–5, 2 Nephi 5:16, Doktrina ug mga Pakigsaad 97:10–16, 124:29–39.)

Ang templo mao ang balay sa Ginoo. Nagtudlo kini kanato ngadto sa atong Manluluwas, nga si Jesukristo. Sa mga templo, kita moapil sa sagrado nga mga ordinansa ug mohimo og mga pakigsaad uban sa Langitnong Amahan nga nagbugkos kanato ngadto Kaniya ug ngadto sa atong Manluluwas. Kini nga mga pakigsaad ug mga ordinansa moandam kanato sa pagbalik ngadto sa atubangan sa Langitnong Amahan ug mahiusa nga maselyo isip mga pamilya alang sa kahangtoran.

Sa templo, daghang panalangin ang nagpaabot ngadto sa matinud-anong mga anak sa Dios niini nga kinabuhi. Sa mga pakigsaad ug mga ordinansa sa templo, “ang gahom sa pagkadiosnon gipakita” (Doktrina ug mga Pakigsaad 84:20). Ang templo mao ang usa ka balaan nga dapit diin ang mga miyembro makasimba, makakat-on, ug makadawat og giya ug kahupayan (tan-awa sa Doktrina ug mga Pakigsaad 109:13–16). Kadtong kinsa motambong sa templo makagamit sa gahom sa Dios aron sa pagtuman sa Iyang buhat (tan-awa sa Doktrina ug mga Pakigsaad 109:22–23; tan-awa usab sa 3.5 niini nga tamdanan nga basahon).

Ang mga pakigsaad ug mga ordinansa sa templo sagrado. Ang mga simbolo nga may kalabotan sa mga pakigsaad sa templo kinahanglang dili hisgotan sa gawas sa templo. Ni hisgotan nato ang balaang impormasyon nga atong gipakigsaad sulod sa templo nga dili ibutyag. Hinoon, mahimo kita nga maghisgot sa sukaranang mga katuyoan ug doktrina sa mga pakigsaad sa templo ug mga ordinansa ug sa espirituwal nga mga pagbati nga atong gibati diha sa templo.

Ang mga lider sa ward ug stake mohisgot sa impormasyon niini nga kapitulo uban sa mga miyembro kinsa nag-andam sa pagdawat sa mga ordinansa sa pagtuga ug pagselyo.

27.1

Pagdawat og mga Ordinansa sa Templo

27.1.1

Pag-andam sa Pagdawat sa mga Ordinansa sa Templo

Ang mga miyembro kinahanglang moandam sa ilang kaugalingon sa espirituwal nga paagi sa pagdawat sa mga ordinansa sa templo ug sa paghimo ug pagtahod sa mga pakigsaad sa templo.

Ang mga ginikanan adunay nag-unang responsibilidad sa pagtabang sa ilang mga anak nga makaandam sa pagdawat sa mga ordinansa sa templo. Ang mga lider sa stake ug ward, tigpangalagad nga mga igsoong lalaki ug mga igsoong babaye, ug ang kabanay sa mga sakop sa pamilya mosuporta sa mga ginikanan niini nga tahas.

Ang mga lider sa stake ug ward kanunay nga moawhag sa mga miyembro sa pag-andam sa pagdawat sa ilang kaugalingong mga ordinansa sa templo. Ang mga lider mopasabot usab og maayo bahin sa kaimportante sa pagtahod sa mga pakigsaad sa templo ug sa pagpabiling takos ug paghupot og rekomend sa templo.

Ang mga kapanguhaan aron sa pagtabang sa mga miyembro nga makaandam sa pagdawat og mga ordinansa sa templo anaa sa temples.ChurchofJesusChrist.org.

Ang mga miyembro kinsa nag-andam sa pagdawat sa ilang kaugalingong pagtuga o maselyo ngadto sa kapikas giawhag sa pag-apil sa kurso sa pagpangandam alang sa templo (tan-awa sa 25.2.8).

Ang mga miyembro makigkita sa ilang bishop ug presidente sa stake aron makakuha og rekomend sa mga ordinansa alang sa mga buhi kon sila:

• Modawat sa ilang kaugalingong pagtuga.

• Magpaselyo ngadto sa usa ka kapikas.

Alang sa impormasyon mahitungod sa pag-isyu og mga rekomend sa templo niini nga mga sirkumstansiya, tan-awa sa 26.1 ug 26.3.1.

27.1.2

Pag-eskedyul og mga Ordinansa sa Templo

Ang mga miyembro nga nagplano sa pagdawat sa ilang kaugalingong pagtuga o magpaselyo kinahanglang magpa-eskedyul daan sa ordinansa ngadto sa templo nga ilang giplanohan nga tambongan. Tan-awa sa temples.ChurchofJesusChrist.org alang sa impormasyon sa pagkontak sa matag templo.

27.1.3

Mga Miyembro Kinsa Adunay Pisikal nga mga Kakulangan

Ang takos nga mga miyembro kinsa adunay pisikal nga mga kakulangan mahimong modawat sa tanang ordinansa sa templo (tan-awa sa 38.2.5). Kini nga mga miyembro giawhag sa pagtambong sa templo uban sa natugahan nga mga kabanay o mga higala nga susama og sekso kinsa makaabag kanila. Kadtong kinsa moabag kinahanglang adunay balido nga rekomend sa templo. Kon ang mga miyembro dili makatambong uban sa usa ka sakop sa pamilya o higala, sila mahimong motawag sa templo daan aron maseguro kon unsa ang mahimong han-ayon. Tan-awa sa temples.ChurchofJesusChrist.org alang sa impormasyon sa pagkontak sa matag templo.

Ang alalay nga mga iro ug emosyonal nga pangsuporta nga mga hayop wala itugot diha sa mga templo. Ang mga presidente sa stake mahimong mokontak sa Departamento sa Templo diha sa [e-mail] kon sila adunay mga pangutana.

27.1.4

Tabang sa Paghubad o Interpretasyon

Kon ang mga miyembro nagkinahanglan og tabang sa paghubad o interpretasyon, sila kinahanglan nga mokontak daan sa templo aron masusi kon kini anaa ba. Tan-awa sa temples.ChurchofJesusChrist.org alang sa impormasyon sa pagkontak sa matag templo.

27.1.5

Sinina nga Isul-ob diha sa Templo

Kon moadto sa templo, ang mga miyembro kinahanglang magsul-ob og matang sa sinina nga ilang isul-ob sa panagtigom alang sa sakramento. Sila kinahanglan nga maglikay nga magsul-ob og sinina nga kaswal o dili makatabon sa garment sa templo. Sila kinahanglang maglikay usab nga mosul-ob og sinina nga sobra ra ka pormal, sama sa mga tuxedo. Kini nga instruksiyon matudlo pag-ayo sa mga ginikanan, sa tigpangalagad nga mga igsoong lalaki ug mga igsoong babaye, ug sa mga lider sa ward ug stake samtang ang mga miyembro mangandam sa pagsimba diha sa templo.

Tan-awa sa 27.3.2.6 alang sa impormasyon mahitungod sa sinina nga isul-ob sa pagselyo diha sa templo.

Tan-awa sa 38.5 alang sa impormasyon mahitungod sa:

• Sinina nga isul-ob atol sa mga ordinansa sa pagtuga ug pagselyo.

• Pag-angkon, pagsul-ob, ug pag-atiman alang sa sinina sa seremonya sa templo ug sa mga garment.

27.1.6

Pag-atiman sa Bata

Ang mga bata kinahanglan nga adunay hamtong nga mag-atiman kon sila anaa sa mga nataran sa templo. Ang mga worker sa templo moatiman lamang sa mga bata sa mosunod nga mga sirkumstansiya:

• Kon sila iselyo ngadto sa ilang mga ginikanan

• Kon sila motan-aw sa pagselyo sa ilang buhi nga mga igsoon, mga anak sa ama-ama o ina-ina, o mga igsoon diha sa amahan o inahan lamang, ngadto sa ilang mga ginikanan

27.1.7

Pagpakigtagbo uban sa mga Miyembro human Sila Modawat sa mga Ordinansa sa Templo

Ang mga miyembro kasagaran adunay mga pangutana human makadawat sa mga ordinansa sa templo. Ang natugahan nga mga sakop sa pamilya, ang bishop, ubang mga lider sa ward, ug ang tigpangalagad nga mga igsoong lalaki ug mga igsoong babaye mahimong magmiting uban sa mga miyembro aron hisgotan ang ilang mga kasinatian sa templo.

Ang mga lider moawhag usab sa mga miyembro sa pagpangita sa mga tubag sa ilang mga pangutana pinaagi sa inspirasyon sa Espiritu Santo. Sa templo, ang Espiritu makahatag og mga tubag sa daghan nga mga pangutana sa miyembro mahitungod sa ilang kasinatian sa templo.

Ang mga kapanguhaan sa pagtabang sa pagtubag sa mga pangutana anaa sa temples.ChurchofJesusChrist.org.

27.2

Ang Pagtuga

Ang pulong nga pagtuga nagpasabot nga “usa ka gasa.” Ang pagtuga sa templo sa pagkatinuod usa ka gasa gikan sa Dios diin Siya mopanalangin sa Iyang mga anak. Ang pagtuga mahimong madawat lamang diha sa balaan nga mga templo. Ang pipila sa mga gasa nga madawat sa mga miyembro pinaagi sa pagtuga sa templo naglakip sa:

• Mas dako nga kahibalo bahin sa mga katuyoan ug mga pagtulon-an sa Ginoo.

• Gahom sa pagbuhat sa tanan nga gusto sa Langitnong Amahan nga buhaton sa Iyang mga anak.

• Balaan nga direksyon kon magserbisyo sa Ginoo, sa ilang mga pamilya, ug sa uban.

• Dugang nga paglaom, kahupayan, ug kalinaw.

Ang tanang gisaad nga mga panalangin sa pagtuga mapahinabo niini nga kinabuhi ug sa kahangtoran. Ang katumanan niini nga mga panalangin magdepende sa kamatinud-anon ngadto sa ebanghelyo ni Jesukristo.

Ang pagtuga sa templo madawat sa duha ka bahin. Sa unang bahin, ang usa ka tawo modawat og pasiuna nga mga ordinansa nga gitawag og initiatory. Ang initiatory naglangkob sa tulo ka ordinansa: paghugas, pagdihog, ug pagsul-ob sa bisti (tan-awa sa Exodo 29:4–9). Naglakip kini og espesyal nga mga panalangin nga may kalabotan sa balaang kabilin ug potensiyal sa usa ka tawo.

Atol sa initiatory, ang miyembro sultihan nga magsul-ob sa garment sa templo. Ang garment usa ka sagrado nga simbolo ni Jesukristo. Usa usab kini ka pahinumdom sa mga pakigsaad sa templo. Kon ang mga miyembro motuman sa ilang mga pakigsaad, lakip sa sagrado nga pribilihiyo sa pagsul-ob sa garment sigon sa gitudlo, sila adunay mas dako nga akses sa kaluoy, proteksiyon, kalig-on, ug gahom sa Manluluwas. Alang sa dugang nga impormasyon mahitungod sa garment, tan-awa sa 38.5.

Sa ikaduhang bahin sa pagtuga, ang plano sa kaluwasan gitudlo, lakip ang Paglalang, ang Pagkapukan ni Adan ug ni Eva, ug ang Pag-ula ni Jesukristo. Ang mga miyembro modawat usab og instruksiyon kon unsaon nga makabalik ngadto sa atubangan sa Ginoo.

Diha sa pagtuga, ang mga miyembro gidapit sa paghimo og sagrado nga mga pakigsaad sama sa mosunod:

1. Pagpuyo sa balaod sa pagkamasulundon ug maningkamot sa pagtuman sa mga sugo sa Langitnong Amahan.

2. Pagsunod sa balaod sa sakripisyo, nga nagpasabot nga magsakripisyo sa pagsuporta sa buhat sa Ginoo ug paghinulsol uban sa masulub-ong kasingkasing ug mahinulsulon nga espiritu.

3. Pagsunod sa balaod sa ebanghelyo ni Jesukristo, nga nagpasabot nga:

   • Magpakita og hugot nga pagtuo diha ni Jesukristo.

   • Maghinulsol matag adlaw.

   • Maghimo og mga pakigsaad uban sa Dios pinaagi sa pagdawat sa mga ordinansa sa kaluwasan ug kahimayaan.

   • Molahutay hangtod sa kataposan pinaagi sa pagtuman sa mga pakigsaad.

   • Maningkamot sa pagsunod sa duha ka dagkong sugo. Kini mao ang “higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabotan” ug “higugmaa ang imong silingan sama sa imong kaugalingon” (Mateo 22:37, 39).

4. Tumana ang balaod sa kaputli, nga nagpasabot sa pag pagpugong gikan sa sekswal nga mga relasyon gawas sa kaminyoon tali sa usa ka lalaki ug usa ka babaye, sumala sa balaod sa Dios.

5. Pagtuman sa balaod sa pagpahinungod, nga nagpasabot nga ang mga miyembro mopahinungod sa ilang panahon, mga talento, ug sa tanan nga gipanalangin sa Ginoo kanila sa pagpalig-on sa Simbahan ni Jesukristo dinhi sa yuta.

Agi og balos, ang Langitnong Amahan misaad nga kadtong kinsa magpabilin nga matinud-anon sa ilang mga pakigsaad sa templo pagatugahan “uban sa gah[o]m gikan sa kahitas-an” (Doktrina ug mga Pakigsaad 38:32, 38; tan-awa usab sa Lucas 24:49; Doktrina ug mga Pakigsaad 43:16).

27.2.1

Kinsa ang Mahimong Modawat sa Pagtuga

Ang tanang may tulubagon nga hamtong nga mga miyembro sa Simbahan gidapit sa pag-andam ug pagdawat sa ilang kaugalingong pagtuga. Ang tanang gikinahanglan nga mga ordinansa kinahanglang ipahigayon ug i-rekord sa dili pa ang mga miyembro makadawat sa pagtuga (tan-awa sa 26.3.1). Tan-awa sa 27.2.2 alang sa impormasyon mahitungod sa paghukom kon kanus-a modawat sa pagtuga.

27.2.1.1

Bag-ong Nabunyagan nga mga Miyembro

Ang takos nga hamtong nga bag-ong mga miyembro mahimong modawat sa ilang pagtuga dili mominos sa usa ka tuig gikan sa petsa sa ilang kompirmasyon (tan-awa sa 26.5.2).

27.2.1.2

Mga Miyembro Kinsa Adunay Wala Matugahi nga Kapikas

Ang usa ka takos nga miyembro kansang kapikas wala matugahi mahimong modawat sa iyang kaugalingong pagtuga kon ang mosunod nga mga kondisyon natuman:

• Ang wala matugahi nga kapikas mohatag sa iyang pagtugot.

• Ang miyembro, bishop, ug presidente sa stake masaligon nga ang responsibilidad nga nadawat uban sa mga pakigsaad sa templo dili makabungkag sa kaminyoon.

Kini nga mga kondisyon magamit bisan ang kapikas usa ka miyembro sa Simbahan o dili.

27.2.1.3

Mga Miyembro Kinsa Adunay Intelektuwal nga mga Kakulangan

Ang mga miyembro kinsa adunay intelektuwal nga mga kakulangan mahimong modawat sa ilang kaugalingong tuga kon:

• Sila nakadawat sa tanang gikinahanglang mga ordinansa (tan-awa sa 26.3.1).

• Sila adunay intelektuwal nga kapasidad nga makasabot, makahimo, ug makatuman sa nag-uban nga mga pakigsaad.

Ang bishop motambag sa miyembro ug, kon mahimo, sa iyang mga ginikanan. Siya usab magtinguha sa direksyon sa Espiritu. Siya mahimong magpatambag sa presidente sa stake. Ang presidente sa stake mahimong mopadangat sa mga pangutana ngadto sa Buhatan sa Unang Kapangulohan kon gikinahanglan. Tan-awa sa 38.2.4.

27.2.2

Paghukom Kon Kanus-a Modawat sa Pagtuga

Ang desisyon nga modawat sa pagtuga personal ug kinahanglang himoon sa mainampoong paagi. Ang pagtuga usa ka panalangin sa gahom ug pagpadayag ngadto sa tanan kinsa andam nga modawat niini. Ang mga miyembro mahimong mopili nga modawat sa ilang kaugalingong pagtuga kon ilang natuman ang tanan nga mosunod nga mga kondisyon:

• Sila dili mominos sa 18 anyos.

• Sila nakakompleto o wala na mag-eskwela sa high school, secondary school, o katugbang niini.

• Usa ka tuig na ang milabay sukad sa ilang kompirmasyon.

• Sila mobati sa tinguha nga modawat ug motahod sa sagrado nga mga pakigsaad sa templo sa ilang tibuok kinabuhi.

Ang mga miyembro kinsa nakadawat og tawag og misyon o nag-andam nga maselyo diha sa templo kinahanglang modawat sa pagtuga. Ang bishop motambag usab sa ubang hamtong nga mga miyembro kinsa nagtinguha nga modawat sa pagtuga.

Sa dili pa moisyu og rekomend sa templo alang sa usa ka miyembro nga modawat sa pagtuga, ang bishop ug ang presidente sa stake kinahanglang mobati nga ang tawo andam nga mosabot ug motuman sa sagrado nga mga pakigsaad sa templo. Kini nga pagkatakos tinoon sa indibidwal nga paagi alang sa matag tawo. Ang mga lider dili mogamit og kinatibuk-ang kriterya, sama niadtong gilista sa ubos, sa pagtino kon ang usa ka tawo andam ba nga modawat og pagtuga:

• Miabot sa pihong edad

• Mobiya sa panimalay aron moeskwela sa kolehiyo, motrabaho, o moserbisyo sa militar

• Gusto nga motan-aw sa pagselyo sa usa ka sakop sa pamilya o higala diha sa templo

27.2.3

Pagplano ug Pag-eskedyul sa Pagtuga

27.2.3.1

Pagdawat og Rekomend sa mga Ordinansa alang sa mga Buhi

Ang usa ka miyembro kinahanglan gayod nga modawat og rekomend sa mga ordinansa alang sa mga buhi sa pagsulod sa templo ug modawat sa tuga. Alang sa impormasyon mahitungod niini nga mga rekomend, tan-awa sa 26.5.1.

27.2.3.2

Pagkontak sa Templo

Ang mga miyembro nga nagplano nga modawat sa pagtuga kinahanglang mokontak sa templo daan aron ma-eskedyul ang ordinansa (tan-awa sa 27.1.2). Ang templo mohatag og mga instruksiyon, lakip sa impormasyon mahitungod sa sinina sa templo, kon ang appointment na-eskedyul.

27.2.3.3

Mga Kauban alang sa mga Miyembro nga Modawat sa Pagtuga

Ang mga miyembro nga modawat sa ilang kaugalingong pagtuga mahimong modapit sa usa ka natugahan na nga miyembro nga pareha og sekso nga mahimong kauban ug motabang kanila atol sa sesyon sa pagtuga. Ang kauban kinahanglang adunay balido nga rekomend sa templo. Ang templo makahatag og kauban kon gikinahanglan.

27.3

Pagselyo sa Bana ug Asawa

“Ang pamilya gi-orden sa Dios. Ang kaminyoon tali sa lalaki ug babaye mahinungdanon ngadto sa Iyang walay katap[o]san nga plano” (“Ang Pamilya: Usa ka Pamahayag ngadto sa Kalib[o]tan”). Ang pagselyo diha sa templo mohiusa sa usa ka bana ug asawa alang sa karon ug sa tibuok kahangtoran. Ang mga magtiayon kinsa naselyo diha sa templo gisaaran og himaya ug kalipay sa tibuok kahangtoran (tan-awa sa Doktrina ug mga Pakigsaad 132:19–20 Sila makadawat niini nga mga panalangin kon sila magmatinud-anon sa mga pakigsaad nga ilang gihimo diha sa templo. Pinaagi niining ordinansa, ang ilang mga anak mahimo usab nga kabahin sa ilang mahangtorong pamilya.

Ang mga lider sa Simbahan moawhag sa mga miyembro nga mangandam nga maminyo ug maselyo diha sa usa ka templo. Kon ang mga kaminyoon diha sa templo wala itugot sa legal nga paagi, ang gitugotan nga mga lider sa Simbahan o ang uban makapahigayon og sibil nga mga kaminyoon nga pagasundan sa pagpaselyo diha sa templo (tan-awa sa 38.3). Kini nga sundanan mahimo usab nga sundon kon ang kaminyoon diha sa templo maoy hinungdan nga ang mga ginikanan o duol nga mga sakop sa pamilya mobati nga wala maapil tungod kay sila dili makatambong sa seremonya sa templo.

27.3.1

Kinsa ang Mahimong Iselyo diha sa Templo

Ang tanang may tulubagon nga wala maminyo nga mga miyembro sa Simbahan gidapit sa pag-andam alang sa pagpaselyo diha sa templo. Kadtong naminyo sa sibil giawhag nga magpaselyo alang karon ug sa kahangtoran diha sa templo kon andam na sila. Ang mga miyembro kinahanglang natugahan sa dili pa sila mahimong maselyo (tan-awa sa 27.2).

Ang mga magtiayon nga giselyo sa templo kinahanglan nga (1) sibil nga naminyo sa dili pa iselyo o (2) minyoon ug iselyo sa sama nga seremonya sa templo. Tan-awa sa 27.3.2.

27.3.1.1

Mga Miyembro Kinsa Naselyo ngadto sa usa ka Kapikas Kaniadto

Tan-awa sa 38.4.1.

27.3.1.2

Mga Miyembro Kinsa Adunay Intelektuwal nga mga Kakulangan

Ang mga miyembro kinsa adunay intelektuwal nga mga kakulangan mahimong maselyo ngadto sa ilang kapikas, pamanhonon, o pangasaw-onon kon:

• Sila nakadawat sa tanang gikinahanglan nga mga ordinansa, lakip sa pagtuga (tan-awa sa 27.2.1.3).

• Sila adunay intelektuwal nga kapasidad nga makasabot, makahimo, ug makatuman sa nag-uban nga mga pakigsaad.

Ang bishop motambag sa miyembro ug sa iyang kapikas, pamanhonon, o pangasaw-onon. Siya usab magtinguha sa direksyon sa Espiritu. Siya mahimong magpatambag sa presidente sa stake. Ang presidente sa stake mahimong mopadangat sa mga pangutana ngadto sa Buhatan sa Unang Kapangulohan kon gikinahanglan. Tan-awa sa 38.2.4.

27.3.2

Pagplano ug Pag-eskedyul sa Pagselyo diha sa Templo

27.3.2.1

Pagdawat og Rekomend sa mga Ordinansa alang sa mga Buhi

Ang usa ka miyembro kinahanglang makadawat og rekomend sa mga ordinansa alang sa mga buhi aron maselyo ngadto sa iyang kapikas. Alang sa impormasyon mahitungod niini nga mga rekomend, tan-awa sa 26.3.

27.3.2.2

Pagkontak sa Templo

Ang mga miyembro nga nagplano nga magpaselyo ngadto sa usa ka kapikas kinahanglang mokontak daan sa templo aron maeskedyul ang ordinansa (tan-awa sa 27.1.2). Ang templo mohatag og mga instruksiyon kon ang appointment na-eskedyul na.

27.3.2.3

Pagkuha og Lisensiya sa Kaminyoon

Sa dili pa minyoon, ang magtiayon kinahanglang mokuha og legal nga lisensiya sa kaminyoon nga balido diin ipahigayon ang kaminyoon. Kon ang magtiayon nagplano nga maminyo ug maselyo atol sa samang seremonya, sila kinahanglang magdala og balido nga lisensiya sa kaminyoon ngadto sa templo.

Ang mga magtiayon nga magpaselyo human sa usa ka sibil nga kaminyoon dili magkinahanglan nga magdala og lisensiya sa kaminyoon ngadto sa templo. Hinoon, sila mohatag sa petsa ug lugar sa ilang sibil nga kaminyoon isip kabahin sa proseso sa pagsuta sa rekord.

27.3.2.4

Mga Kauban alang sa Pangasaw-onon ug Pamanhonon

Ang usa ka natugahan nga igsoong babaye mokuyog sa pangasaw-onon aron sa pag-abag kaniya didto sa ilisanan nga kwarto. Ang usa ka natugahan nga igsoong lalaki mohimo sa sama alang sa pamanhonon. Ang kauban kinahanglang adunay balido nga rekomend sa templo. Ang templo makahatag og kauban kon gikinahanglan.

27.3.2.5

Kinsa ang Mopahigayon sa Pagselyo diha sa Templo

Ang pagselyo diha sa templo sa kasagaran ipahigayon sa usa ka tigselyo kinsa gisangon ngadto sa templo diin ang magtiayon iselyo. Kon ang usa ka sakop sa pamilya o kaila naghupot og awtoridad sa pagselyo ug gisangon sa templo diin ang magtiayon iselyo, sila mahimong modapit kaniya sa pagpahigayon sa pagselyo.

Ang usa ka tigselyo mangayo usab og pagtugot sa Unang Kapangulohan sa pagpahigayon og usa ka pagselyo alang sa iyang direkta nga kaliwatan (mga anak, mga apo, ug mga apo sa tuhod) sa usa ka templo nga lahi kay sa gisangon kaniya. Siya kinahanglang makadawat og sulat sa pagtugot gikan sa Unang Kapangulohan alang sa matag usa sa maong pagselyo. Siya mopakita sa sulat ngadto sa templo.

Wala giawhag sa mga miyembro nga mohangyo sa Kinatibuk-ang mga Awtoridad sa pagpahigayon sa ilang pagselyo diha sa templo.

27.3.2.6

Angay nga Sinina alang sa Pagselyo diha sa Templo

Sinina sa Pangasaw-onon. Ang sinina nga sul-obon sa pangasaw-onon sa templo kinahanglan nga puti, ligdong ang desinyo ug panapton, ug walay daghang dayan-dayan. Kinahanglan usab nga motabon kini sa garment sa templo. Ang sihag nga mga panapton kinahanglang sapawan.

Aron mapareho sa ubang mga sinina nga gisul-ob diha sa templo, ang sinina sa pangasaw-onon kinahanglan adunay taas og bukton o lapas sa siko ang gitas-on. Ang mga sinina kinahanglang walay taas kaayo nga nagbitay gawas kon mahigtan o makuha kini alang sa seremonya sa pagselyo.

Ang templo makapagamit og sinina kon gikinahanglan o gitinguha.

Sinina sa Pamanhonon. Ang pamanhonon magsul-ob og normal nga sinina sa templo atol sa seremonya sa pagselyo (tan-awa sa 38.5.1 ug 38.5.2). Siya mahimong magsul-ob og pormal nga sinina sa gawas sa templo alang sa mga paglitrato human sa seremonya.

Sinina sa mga Bisita. Kadtong kinsa motambong og seremonya sa pagselyo kinahanglang magsul-ob og sinina susama sa unsay ilang isul-ob sa panagtigom alang sa sakramento. Sila kinahanglan nga maglikay nga magsul-ob og sinina nga kaswal o dili makatabon sa garment sa templo. Sila kinahanglang maglikay usab nga mosul-ob og sinina nga sobra ra ka pormal, sama sa mga tuxedo.

Ang mga miyembro nga mosulod sa usa ka pagselyo direkta gikan sa sesyon sa pagtuga mahimong magsul-ob sa sinina sa seremonya alang sa templo.

Ang magtiayon kinahanglang mopakigbahin niini nga impormasyon ngadto sa mga bisita sa dili pa ang pagselyo.

Mga Bulak. Ang magtiayon ug ang ilang mga bisita kinahanglang dili magbutang og mga bulak atol sa seremonya sa pagselyo. Ang mga bulak mahimong gamiton sa gawas sa templo alang sa mga paglitrato human sa seremonya. Ang magtiayon kinahanglang mopakigbahin niini nga impormasyon ngadto sa mga bisita sa dili pa ang pagselyo.

27.3.2.7

Pagbayloay og mga Singsing human sa Pagselyo diha sa Templo

Ang pagbayloay og mga singsing dili kabahin sa seremonya sa pagselyo diha sa templo. Hinoon, ang magtiayon mahimong magbayloay og mga singsing human sa seremonya diha sa lawak sa pagselyo. Ang magtiayon kinahanglan nga dili magbayloay og mga singsing sa bisan unsa pa nga oras o dapit sa templo o sa mga nataran sa templo. Ang pagbuhat sa ingon makabalda sa seremonya.

Ang mga magtiayon nga naminyo ug naselyo sa samang seremonya mahimong magbayloay og mga singsing sa laing oras aron makakita ang mga sakop sa pamilya nga dili makahimo sa pagtambong sa pagselyo diha sa templo. Ang pagbayloay og singsing kinahanglang nagsubay sa kaligdong sa pagselyo diha sa templo. Ang pagbayloay kinahanglang dili mokopya sa bisan unsa nga bahin sa seremonya sa pagselyo. Ang magtiayon kinahanglang dili magbayloay og panumpa human maselyo diha sa templo.

Ang magtiayon kinsa naminyo sa sibil sa dili pa ang ilang pagselyo diha sa templo mahimong magbayloay og singsing sa ilang sibil nga seremonya, sa ilang pagselyo diha sa templo, o sa duha ka seremonya.

27.3.3

Kaminyoon diha sa Templo nga alang Niining Kinabuhia Lamang

Ang katuyoan sa templo mao ang pagpangalagad sa mga ordinansa alang sa kahangtoran. Tungod niini nga rason, ang kaminyoon alang sa karon lamang dili na ipahigayon diha sa mga templo.

Alang sa palisiya sa pagselyo og usa ka magtiayon nga naminyo diha sa templo alang niining kinabuhi lamang, tan-awa sa 38.4.1.7.

27.3.4

Kinsa ang Mahimong Motambong sa Pagselyo diha sa Templo

Ang mga magtiayon kinahanglang modapit lamang sa suod nga mga sakop sa pamilya ug mga higala sa usa ka pagselyo diha sa templo. Ang may tulubagon nga mga miyembro kinahanglang natugahan ug adunay balido nga rekomend sa templo aron makatambong.

Ang uban nga mga miyembro sa rekord wala mabunyagi hinungdan sa intelektuwal nga kakulangan, ug ang uban gibunyagan apan wala matugahi tungod sa samang rason. Ang presidente sa stake mahimong motugot kanila sa pag-obserbar sa pagselyo diha sa templo sa ilang buhi nga mga igsoon kon sila:

• Dili momenos sa 18 anyos ang pangidaron.

• Makahimo sa pagpabilin nga matinahoron atol sa seremonya.

Ang presidente sa stake mosulat og usa ka sulat nga nagpahayag nga ang tawo gitugotan nga motan-aw sa pagselyo. Kini nga sulat ipresentar diha sa templo.

Ang mga miyembro kinahanglan nga natugahan ug adunay balido nga rekomend sa templo aron makatan-aw sa pagselyo sa ilang mga ginikanan.

Alang sa impormasyon kon kinsa ang mahimong motambong sa pagselyo sa buhi nga mga anak ngadto sa mga ginikanan, tan-awa sa 27.4.5.

27.3.5

Mga Salo-salo sa Kasal

Tan-awa sa 38.3.4 alang sa impormasyon mahitungod sa pagpahigayon og mga salo-salo sa kasal diha sa mga gambalay sa Simbahan.

27.4

Pagselyo sa Buhi nga mga Anak ngadto sa mga Ginikanan

Ang mga anak nga natawo human naselyo ang ilang inahan ngadto sa usa ka bana diha sa templo natawo sa pakigsaad niana nga pagselyo. Dili sila kinahanglan nga modawat pa sa ordinansa sa pagselyo ngadto sa mga ginikanan.

Ang mga anak nga wala matawo diha sa pakigsaad mamahimong kabahin sa mahangtorong pamilya pinaagi sa pagpaselyo ngadto sa ilang tinuod nga mga ginikanan o sa nagsagop nga mga ginikanan. Kini nga mga anak may katungod sa samang mga panalangin niadtong kinsa natawo sa pakigsaad.

Tan-awa sa 38.4.2 alang sa mga palisiya mahitungod sa pagselyo sa mga anak ngadto sa ilang mga ginikanan.

27.4.1

Pag-isyu og Rekomend alang sa Pagselyo sa Buhi nga mga Anak ngadto sa mga Ginikanan

Ang may tulubagon nga mga miyembro nga nag-edad og 8 ug pataas nagkinahanglan og rekomend aron maselyo ngadto sa ilang mga ginikanan. Sila usab nagkinahanglan og rekomend sa pag-obserbar sa pagselyo sa buhi nga mga igsoon, mga igsoon sa gawas, o mga igsoon diha sa amahan o inahan lamang, ngadto sa ilang mga ginikanan (tan-awa sa 27.4.4). Ang mga bata nga nag-edad og 8 ug pataas kinahanglan gayod nga nabunyagan ug nakompirmahan aron makadawat og rekomend sa templo. Ang mga lalaki nga dili mominos sa 11 anyos ug mag-12 anyos nianang tuiga nga himoon ang ordinansa kinahanglan nga naghupot og pagkapari.

Ang mga miyembro nga 21 pataas kinahanglan nga natugahan ug adunay balido nga rekomend sa templo aron maselyo ngadto sa ilang mga ginikanan.

Ang presidente sa stake mahimong motugot og mga tawo kinsa wala mabunyagi o matugahi tungod sa intelektuwal nga mga kakulangan nga maselyo ngadto sa ilang mga ginikanan. Ang presidente sa stake mosulat og usa ka sulat nga nagpahayag nga ang tawo gitugotan nga maselyo. Kini nga sulat ipresentar diha sa templo.

Tan-awa sa 26.4.4 alang sa dugang nga impormasyon mahitungod sa pag-isyu og mga rekomend ngadto sa mga anak.

27.4.2

Pagkontak sa Templo

Ang magtiayon kinsa gusto nga ang ilang mga anak maselyo ngadto kanila, o ang mga anak kinsa nagtinguha nga maselyo ngadto sa ilang patay nga mga ginikanan, kinahanglan nga mokontak sa templo daan aron ma-eskedyul ang ordinansa (tan-awa sa 27.1.2). Sa pipila ka sitwasyon, ang ubang mga ordinansa sa templo kinahanglan tingaling himoon sa dili pa mahitabo ang pagselyo.

27.4.3

Pag-atiman sa Bata

Tan-awa sa 27.1.6.

27.4.4

Kinsa ang Mopahigayon sa usa ka Pagselyo sa Buhi nga mga Anak ngadto sa mga Ginikanan

Ang pagselyo sa buhi nga mga anak ngadto sa mga ginikanan sa kasagaran ipahigayon sa usa ka tigselyo nga gisangon ngadto sa templo diin ang pagselyo mahitabo. Kon ang usa ka sakop sa pamilya o kaila naghupot og awtoridad sa pagselyo ug gisangon ngadto sa templo diin ang pagselyo mahitabo, ang pamilya mahimong modapit kaniya sa pagpahigayon sa pagselyo.

Ang usa ka tigselyo mangayo usab og pagtugot sa Unang Kapangulohan sa pagpahigayon og usa ka pagselyo sa buhi nga mga anak ngadto sa mga ginikanan alang sa iyang direkta nga kaliwatan (mga anak, mga apo, ug mga apo sa tuhod) diha sa usa ka templo nga lahi kay sa gisangon kaniya. Siya kinahanglang makadawat og sulat sa pagtugot gikan sa Unang Kapangulohan alang sa matag usa sa maong pagselyo. Siya mopakita sa sulat ngadto sa templo.

Wala giawhag ang mga miyembro nga mohangyo sa Kinatibuk-ang mga Awtoridad sa pagpahigayon sa ilang pagselyo sa buhi nga mga anak ngadto sa mga ginikanan.

27.4.5

Kinsa ang Mahimong Motambong og usa ka Pagselyo sa Buhi nga mga Anak ngadto sa mga Ginikanan

Aron makatan-aw sa pagselyo sa buhi nga mga igsoon, mga humabdos [step sibling], o mga igsoon lang sa amahan o inahan ngadto sa ilang mga ginikanan, ang wala matugahi nga mga miyembro nga ubos sa edad og 21 kinahanglang natawo diha sa pakigsaad o naselyo ngadto sa ilang mga ginikanan. Agi og dugang, ang mga anak nga nag-edad og 8 pataas kinahanglang nabunyagan ug nakompirmahan ug kinahanglan nga adunay balido nga rekomend sa templo (tan-awa sa 26.4.4). Ang mga lalaki nga dili mominos sa 11 anyos ug mag-12 anyos nianang tuiga nga himoon ang ordinansa kinahanglan nga naghupot og pagkapari.

Ang mga miyembro nga 21 pataas kinahanglan nga natugahan ug adunay balido nga rekomend sa templo aron makatan-aw sa maong mga pagselyo.

Ang minyo nga mga miyembro nga nag-edad og 21 paubos dili kinahanglan matugahan aron makatan-aw sa maong mga pagselyo. Hinoon, sila kinahanglan gayod nga adunay balido nga rekomend sa templo (tan-awa sa 26.4.4).

Ang uban nga mga miyembro sa rekord wala mabunyagi hinungdan sa intelektuwal nga kakulangan, ug ang uban gibunyagan apan wala matugahi tungod sa samang rason. Ang presidente sa stake mahimong motugot nila nga motan-aw sa pagselyo sa ilang buhi nga mga igsoon, mga anak sa ilang ama-ama o ina-ina, o mga igsoon diha sa amahan o inahan lamang, ngadto sa ilang mga ginikanan. Ang presidente sa stake mosulat og usa ka sulat nga nagpahayag nga ang tawo gitugotan nga motan-aw sa pagselyo. Kini nga sulat ipresentar diha sa templo.