28.

Sauniga o le Malumalu mo Augatama

28.0

O Le Faatomuaga

E tatau i se epikopo ona feutagai ma lana peresitene o le siteki pe afai e i ai ni ana fesili e uiga i malumalu ma galuega o le malumalu e le o taliina i lenei mataupu po o le 38.4. E mafai e le peresitene o le siteki ona auina sao atu ia fesili i le Ofisa o le Au Peresitene Sili.

E fesoasoani peresitene o siteki ma epikopo i tagata o le au paia ia maua ni aafiaga lelei i le faataunuuina o sauniga mo o latou tuaa ua maliliu. Latou te faia lenei mea i le aoaoina o vasega faaleaoaoga faavae o galuega faalemalumalu ma ia mautinoa ia malamalama tagata o le au paia i taimi e faatalitali ai ma isi aiaiga e faatatau i galuega faalemalumalu.

28.1

Taiala Lautele

O le mea masani, e mafai e tagata o le au paia ona faatino sauniga o le malumalu mo tagata ua maliliu pe a atoa le tausaga talu ona tuanai aso na maliu ai. Afai o le tagata ua maliu sa fanau i totonu o le 110 tausaga ua te’a, ma o le tagata o loo manao e faataunuu ia sauniga e le o se aiga vavalalata (toalua e le’i tatala le faaipoipoga, fanau matutua, matua, tei), e tatau ona ia talosagaina se faatagaga mai se tagata vavalalata o le aiga ona faatoa faatonu ai lea o sauniga o le malumalu.

O sauniga e faatinoina mo e ua maliliu e faatoa aoga pe afai e filifili le tagata ua maliu e talia i latou ma agavaa e taliaina (tagai i le Mataupu Faavae ma Feagaiga 138:19, 32–34).

Mo aiaiga faavae o faamauga, tagai i le 38.4.

28.2

Faatinoina o Sauniga mo e ua Maliliu

28.2.1

O Ai e Mafai Ona Auai i le Faatinoga o Sauniga mo e ua Maliliu

O tagata o le ekalesia ua talafeagai tausaga ma ua i ai se pepa faataga o le malumalu e tapulaa le faaaogaina, e mafai ona auai i papatisoga ma faamauga mo e ua maliliu (tagai i le 26.4.3). O tagata o le ekalesia ua maua faaeega paia o loo i ai se pepa faataga o loo aoga o le malumalu e mafai ona auai i sauniga uma mo e ua maliliu (tagai i le 26.5).

O tagata o le au paia e i ai manaoga faapitoa, e mafai ona latou faia galuega faalemalumalu mo e ua maliliu pe afai:

• E lava le malosi o le mafaufau e malamalama ai i le sauniga.

• E mafai ona latou vaaia i latou lava pe o o mai faatasi foi ma tauaiga po o ni uo o i ai se pepa faataga o le malumalu ma e mafai ona tuuina atu le fesoasoani pe a manaomia.

28.2.2

Papatisoga ma Faamauga mo Ē ua Maliliu

O vaega faatulagaina, e pei o aiga, uarota, ma siteki, o e mananao e auai i sauniga i le potu mo papatisoga, e masani ona vave faia ni feutanaiga ma le malumalu. E tatau ona i ai se tagata matua se toatasi pe sili atu e o atu faatasi ma vaega faatulagaina, ia mautinoa o talafeagai se aofai o taitai e fai ma sui o itupa taitasi i le vaega. O nei tagata matutua e tatau ona i ai ni pepa faataga o aoga o le malumalu.

O uso ma tuafafine o e fesoasoani i le potu mo papatisoga e le tau manaomia ona vaetofiaina e avea o ni tagata e galulue i sauniga o le malumalu. O uso ua maua faaeega paia, o e umia le Perisitua Mekisateko e le’i maua faaeega paia, ma ositaulaga i le Perisitua Arona, e mafai ona faatinoina papatisoga.

E na’o uso ua maua faaeega paia e mafai ona taitai i faamauga ma avea o se tusitalafaamaumau i le faatanoa po o totonu o le potu o faamauga.

Soo se tagata o le Ekalesia o loo umiaina se pepa faataga o loo aoga o le malumalu, e aofia ai se pepa faataga e tapulaa le aoga, e mafai ona avea o se molimau i se papatisoga sui. O nei tagata matutua ma talavou e mafai foi ona fesoasoani i tofiga i le potu mo papatisoga e pei o le fesoasoani i tagata sui, tufaina atu o lavalava ma solotaele, ma, i tulaga e mafai ai, faamaumauina o sauniga o le papatisoga ma faamauga i le polokalama komepiuta.

28.3

Tulaga Patino

28.3.1

O Tagata o le Ekalesia e Lei Mafai Ona o i le Malumalu a o lei Maliliu

O le tausaga e tasi e faatalitali ai mo sauniga sui o le malumalu e le faatatauina i tagata agavaa ua maliliu o e na semanu e o atu i se malumalu ae na taofia mai le faia o lea mea i le olaga nei ona o mafuaaga e le oo i ai la latou pule. E mafai ona aofia ai tamaiti ua ta’i 8 tausaga ma luga atu, ma talavou sa agavaa i le taimi na maliliu ai ae lei mauaina o latou faaeega paia ona latou te lei aulia le tausaga talafeagai (tagai foi i le 28.3.4). O na tamaiti ma talavou e le falelauasiina i laei o le malumalu.

Ina ia faatinoina le sauniga, e tatau i tagata o le aiga ona i ai le pepa faataga o loo aoga o le malumalu a le tagata ua maliu i le taimi na maliu ai, po o se tusi mai le epikopo o lē ua maliu e faamaonia ai le agavaa o le tagata. O le pepa faataga o le malumalu po o le tusi e tatau ona tauaao atu i le malumalu a o le’i faia le sauniga.

28.3.2

O Tagata o le Ekalesia o e na Maliliu i Totonu o le Tausaga e Tasi Talu Ona Papatiso

Afai e maliu se tagata agavaa i totonu o le tausaga talu ona papatiso ma faamauina lona papatisoga, e mafai ona faamaea sauniga o le malumalu pe a mavae le tausaga e tasi mai le aso na faamau ai lona papatisoga (tagai 28.3.1).

28.3.3

O Tamaiti e Maliliu a o Le’i Fananau Mai (Maliliu i le manava ma Tamaiti e Fafano).

E le tau faia ni sauniga o le malumalu mo tamaiti e maliliu a o lei fananau mai. E le faafitia ai la le avanoa o nei fanau e mafai ai ona avea o se vaega o le aiga i le faavavau. E fautuaina matua e faalagolago i le Alii ma saili atu i Lana faamafanafanaga. Mo nisi faamatalaga, tagai i le 38.7.3.

28.3.4

Tamaiti E Maliliu a o lei Atoa le Valu Tausaga

E leai se papatisoga po o se faaeega paia e faatinoina mo se tamaitiiti na maliu a o lei aulia le 8 tausaga. E na o le faamauga i matua e faatinoina mo ia tamaiti. Afai na faamauina le tamaitiiti i matua a o ola pea o ia, pe na fanau foi le tamaitiiti i le feagaiga, e leai ni sauniga e faia e sui ai mo ia.

28.3.5

O Tagata Ua Maliliu E Le Atoatoa le Malosi Faaleatamai

E faia sauniga o le malumalu mo tagata nei ua maliliu e le atoatoa le malosi faaleatamai:

• O tagata ua iloa e mafai ona tali atu mo i latou lava (tagai i le Mataupu Faavae ma Feagaiga 20:71)

• Tagata e le o iloa le tulaga o lo latou tali atu mo i latou lava.

Ua iloa manino o se tagata ua maliu e le atoatoa le malosi faaleatamai ma e le mafai ona tali atu mo ia lava, na pau le sauniga e faatino o le faamauina lea i matua pe afai e lei fanau mai le tagata i totonu o le feagaiga. E le manaomia pe faatinoina isi sauniga o le malumalu tusa lava pe sa soifua le tagata i le 8 tausaga pe matua atu (tagai i le Mataupu Faavae ma Feagaiga 137:10).

28.3.6

O Tagata Ua Manatu ua Maliliu

O sauniga o le malumalu e mafai ona faatinoina mo se tagata ua manatu ua maliu pe a mavae le 10 tausaga talu mai le taimi na manatu ua maliu ai. O lenei tulafono e faatatau i (1) tagata o e na le mafai ona mauaina i le taua, leiloloa i le sami, pe ua faailoa mai faaletulafono ua maliliu; ma (2) tagata o e na mou ese atu i tulaga ua manino ua oti ae e le’i maua se tino.

O isi tulaga uma o tagata e leiloloa, e le mafai ona faatinoina ni sauniga o le malumalu seiloga ua mavae le 110 tausaga talu le taimi na fanau mai ai le tagata.

28.3.7

O Tagata e Pule i O Latou Lava Ola

O tagata e pule i o latou lava ola e mafai ona faatinoina sauniga o le malumalu mo i latou pe a mavae le tausaga e tasi po o le sili atu foi talu mai le aso na maliu ai.

28.3.8

O Tagata Na Soloia Mai le Avea Ai ma Tagata o le Ekalesia pe Ua Faamavae Mai le Avea Ai ma Tagata Auai

E manaomia le faamaoniga a le Au Peresitene Sili e faatino ai sauniga o le malumalu mo tagata ua maliliu o e, i le taimi na maliliu ai, sa soloia pe na i ai se faamavaega o le avea ai ma tagata o le Ekalesia. E tatau i se tasi o le aiga ona tusi atu se tusi i le Ofisa o le Au Peresitene Sili. E le manaomia ai se fomu. E mafai e le epikopo po o le peresitene o le siteki ona fesoasoani i lenei talosaga pe a manaomia ai.

28.4

Faamaoniaina o Sauniga Ina ia Mauaina ai le Faaeega Paia

O nisi taimi e le mafai ai ona faamaoniaina le papatisoga ma le faamauga sa faia o se tagata ua maliu a o soifua, i le mavae ai o se sailiiliga mae’ae’a. Afai ua maua e se tagata le faaeega paia ae le’i mafai ona faamaonia le papatisoga ma le faamauga, e tatau ona toe papatisoina ma faamauina le tagata e ala lea i se tasi e sui ai. E le toe manaomia ona faatinoina le faaeega paia ma faamauga pe a ua uma se papatisoga ma se faamauga sui.

28.5

Toefuataiga o Faamanuiaga o le Malumalu

O tagata na maua faaeega paia o e na soloia le avea ai ma tagata o le Ekalesia po o e na aveeseina o latou igoa mai pepa faamaumau o le Ekalesia ma na toe faaulufaleina mai mulimuli ane e ala i le papatisoga ma le faamauga e faatoa mafai ona mauaina o latou faamanuiaga o le malumalu ma le perisitua e ala i le sauniga o le toefuataiga o faamanuiaga. O na tagata e le faauuina i soo se tofi o le perisitua pe toe faia faaeega paia, talu ai o nei faamanuiaga e toefuataiina e ala i lenei sauniga. Mo faamatalaga e uiga i le faatinoina o lenei sauniga mo e o loo ola, tagai i le 32.17.2.

E moomia le faamaoniga a le Au Peresitene Sili ina ia faatinoina ai lenei sauniga mo e ua maliliu. O tagata o le aiga o le tagata ua maliu e mafai ona talosagaina se toefuataiga o faamanuiaga o le perisitua ma le malumalu mo le tagata o le aiga ua maliu e ala i le tusi atu o se tusi i le Ofisa o le Au Peresitene Sili. E mafai e le epikopo po o le peresitene o le siteki ona fesoasoani i lenei talosaga pe a manaomia ai.

O nisi tagata e lei maua faaeega paia ae na fananau i totonu o le feagaiga pe faamauina i matua a o lei soloia lo latou avea ai ma tagata o le ekalesia pe a o lei faamavae mai le avea ma tagata auai. O tagata nei e le manaomia ona toe faamauina pe a mavae ona toefaaulufale mai e ala i le papatisoga ma le faamauga.