28.

Ol Tempol Odinens blong Olgeta we Oli Ded

28.0

Fas Toktok

Blong stap yunaetem ol famli blong taem we i no save finis, i pat blong wok blong God blong fasin blong sevem man mo fasin blong kam olsem wan god (luk long 1.2). Ol odinens we oli mekem insaed long ol tempol i mekem i posibol blong ol famli oli stap tugeta blong taem we i no save finis, mo eksperiensem wan glad we i fulwan long ples we God i stap long hem.

Blong ol pikinini blong Papa long Heven oli gobak long Hem, wanwan long olgeta i mas sakem sin, kam klin inaf blong kasem ol odinens blong fasin blong sevem man mo kam olsem wan god, mo givim ona long ol kavenan we i kam wetem wanwan long ol odinens ia. Ol odinens blong fasin blong sevem man mo kam olsem wan god oli:

• Baptaes.

• Konfemesen mo presen we i Tabu Spirit.

• Pasem Melkesedek Prishud mo odinesen long wan ofis (blong ol man).

• Tempol endaomen (i tekem tu fasin blong stap redi).

• Tempol siling.

Papa long Heven i save se plante long ol pikinini blong Hem bae oli no kasem ol odinens ia long laef blong olgeta long wol. Hem i mekem wan narafala wei blong olgeta blong oli kasem ol odinens mo mekem ol kavenan wetem Hem. Long ol tempol, wan proksi i save mekem ol odinens. Hemia i minim se wan man o woman we i laef, i kasem ol odinens long bihaf blong wan we i ded finis. Long spirit wol, olgeta man o woman we oli ded finis, oli save jusum blong akseptem o blong sakemaot ol odinens ia we oli bin mekem long bihaf blong olgeta (luk long Doktrin mo Ol Kavenan 138:19, 32–34, 58–59).

Olgeta we oli no akaontebol, i no nidim blong oli mekem ol odinens blong fasin blong sevem man mo blong fasin blong kam olsem wan god, long laef ia (luk long 18.1, 28.3.2, mo 28.3.3).

Oli stap leftemap tingting blong ol memba blong Jos blong oli faenem nem blong ol famli blong olgeta we oli ded finis, we oli no kasem ol odinens blong fasin blong sevem man mo kam olsem wan god. Ol memba oli mekem ol odinens ia long bihaf blong ol famli blong olgeta. (Luk long Malakae 4:5–6; 1 Korin 15:29; Doktrin mo Ol Kavenan 2:1–3; 128:15–18; luk tu long 25.1 long hanbuk ia.)

Sapos ol memba oli no rere yet long ol nem blong ol famli blong oli mekem tempol wok blong olgeta (luk long 28.1.1), bae oli givim ol nem blong ol man mo woman we oli ded finis, we oli nidim blong oli mekem ol odinens blong olgeta, long tempol.

Oli leftemap tingting blong ol memba blong go long tempol plante taem olsem we ol situesen blong olgeta i letem, nomata sapos oli stap mekem ol proksi odinens blong ol famli blong olgetawan o blong ol man mo woman we oli givim ol nem blong olgeta long tempol.

Ol memba blong Jos oli kasem blesing taem oli mekem ol tempol odinens blong olgeta we oli ded finis. Taem oli stap mekem ol proksi odinens, oli save luklukbak long ol tempol kavenan blong olgetawan mo komitmen blong olgeta blong kipim ol kavenan ia.

Ol stek presiden mo ol bisop oli helpem ol memba blong oli kasem ol gudfala eksperiens taem oli stap mekem ol tempol odinens. Oli mekem hemia taem oli stap tijim ol memba long saed blong doktrin we i stamba blong tempol wok mo oli stap meksua se ol memba oli andastanem ol gaedlaen we i go wetem wok ia. Luk long japta 25 blong gat moa infomesen.

28.1

Ol Jeneral Gaedlaen blong Mekem Ol Proksi Odinens

Ol man mo woman we oli ded, we oli gat 8 yia o moa long taem we oli ded, oli save gat ol proksi odinens we oli mekem long bihaf blong olgeta. Be, olsem we oli talem long 28.3, oli save mekem ol proksi odinens blong evri man o woman we i ded, taem 30 dei pas afta long deit we hem i ded long hem, sapos wan long ol samting ia i aplae:

• Wan memba we i kolosap long hem we i ded (hasban o waef we oli no divos, adalt pikinini, papa o mama, o brata o sista) i givim nem blong olgeta blong oli mekem tempol odinens blong hem.

• Oli kasem raet blong mekem ol odinens long wan famli we i kolosap blong hem we i ded (hasban o waef we oli no divos, adalt pikinini, papa o mama, o brata o sista).

Sapos i no gat wan long ol kondisen antap ia i aplae, bae oli save mekem ol proksi tempol odinens afta long 110 yia blong man o woman ia i bon.

Blong gat moa infomesen, luk ol atikol ia long FamilySearch.org (blong aksesem ol atikol ia i nidim blong yu log in long FamilySearch.org):

• “Wanwan man mo woman we mi save askem blong mekem ol tempol odinens blong olgeta”

• “?Wanem i 110 yia polisi ia, mo from wanem oli mekem olsem?”

28.1.1

Stap Rere long Ol Nem blong Ol Man mo Woman We Oli Ded blong Mekem Ol Tempol Odinens blong Olgeta

I gat plante risos i stap blong helpem ol memba blong oli faenem ol famli blong olgeta we oli nidim blong mekem ol odinens long bihaf blong olgeta (luk long 25.4 mo 28.3). Ol lida ia oli helpem ol memba blong lanem olsem wanem blong rere long ol nem blong ol memba blong famli we oli ded finis blong mekem ol tempol odinens blong olgeta:

• Ol wod presidensi blong kworom blong Elda mo Rilif Sosaeti (luk long 25.2.2)

• Wod lida blong tempol mo famli histri (luk long 25.2.3)

• Ol wod konsalten blong tempol mo famli histri (luk long 25.2.4)

Taem i posibol, oli mas putum infomesen we i talemaot ol memba blong famli we oli ded finis i go long FamilySearch.org bifo oli mekem ol tempol odinens (luk long 25.4.2).

28.1.1.1

Stap Givim Ol Nem blong Ol Memba blong Famli

Taem oli stap givim nem blong ol proksi tempol odinens, ol memba oli mas givim nem blong ol man mo woman we oli famli nomo wetem olgeta.

28.1.1.2

Stap Givim Ol Nem blong Ol Popula Pipol mo Ol Grup We Oli No Givim Raet long Hem

Plante taem, ol memba blong Jos oli no mas givim ol nem i go long FamilySearch.org we oli kamaot long ol grup ia:

• Ol popula pipol

• Ol nem we oli tekem aot long ol projek we oli no apruvum olgeta.

• Ol man we oli ded long Holokos blong Ol Man Jiu

Blong gat moa infomesen, luk ol atikol ia long FamilySearch: “Can I do temple work for victims of the Jewish Holocaust?”

28.1.2

Huia I Save Tekpat long Ol Odinens long Bihaf blong Ol Dedman

Evri memba we oli gat wan tempol rekomen we i laef, oli save tekpat long ol baptaes mo ol konfemesen blong olgeta dedman. Ol memba we oli endao mo oli gat wan tempol rekomen we i laef i stap, oli save tekpat long evri odinens long bihaf blong olgeta dedman. Luk long 26.3.

28.1.3

Ol Memba we Oli Tekpat we Oli Gat Disabiliti long Bodi mo Tingting

Ol memba we oli gat ol disabiliti oli save mekem ol tempol wok blong olgeta we oli ded finis sapos:

• Oli gat wan tempol rekomen we i laef i stap (luk tu long 28.1.2).

• Tingting blong olgeta i inaf blong andastanem odinens ia.

• Oli save lukaotem olgetawan, o oli gat wan famli o fren we oli gat semmak seks, i kam wetem olgeta mo oli gat wan tempol rekomen, mo oli save givim help sapos i nid.

Luk long 27.1.3 mo 27.2.1.3.

28.1.4

Mekem Taemtebol

Ol memba oli mas mekem wan apoenmen blong mekem ol odinens long bihaf blong wan we i ded finis. Luk long temples.ChurchofJesusChrist.org blong kasem kontak infomesen blong wanwan tempol mo ol samting we oli nidim blong putum wan taem.

28.1.5

Translesen o Intepretesen Help

Luk long 27.1.4.

28.1.6

Ol Klos blong Werem blong Go long Wan Tempol

Luk long 27.1.5.

28.1.7

Lukaotem Pikinini

Luk long 27.1.6.

28.2

Stap Mekem Ol Tempol Odinens blong Olgeta we Oli Ded

Ol seksen ia i eksplenem ol odinens we wan we i laef i mekem long bihaf blong wan we i ded finis long ol tempol. Taem hem i stap mekem ol proksi odinens, wan memba i save stap olsem wan proksi nomo blong hem we i ded finis we i gat semmak seks olsem memba ia taem hem i bon.

Plante taem oli mekem ol tempol odinens blong olgeta we oli ded, long oda ia:

• Baptaes

• Konfemesen

• Ol Melkesedek Prishud Odinesen (blong ol man)

• Odinens blong Rere

• Endaomen

• Ol Siling

Sapos oli mekem ol odinens blong ol dedman ia finis mo oli no mekem folem oda ia, i nomo nid blong oli mekem bakegen. Oli kam laef. taem oli mekem evri odinens we i mas hapen fastaem.

28.2.1

Ol Baptaes mo Ol Konfemesen blong Olgeta Dedman

Eni memba we i gat wan tempol rekomen we i laef i stap, oli save invaetem hem blong givim seves long wan o moa wok blong baptaes. Sam long ol wok ia i save tekem tu:

• Blong stap olsem wan proksi long bihaf blong dedman blong ol baptaes.

• Blong stap olsem wan witnes blong ol proksi baptaes.

• Blong stap olsem wan proksi long bihaf blong dedman blong ol konfemesen.

• Helpem ol petron (olgeta we oli help insaed long tempol).

• Givimaot ol klos mo tawel.

• Help blong rekodem ol odinens blong baptaes mo konfemesen long kompiuta sistem.

Sapos oli wantem, ol memba we oli stap olsem ol proksi, oli save jusum blong mekem ol baptaes nomo o ol konfemesen nomo.

Oli save invaetem olgeta we oli holem Melkesedek Prishud, mo ol pris insaed long Aronik Prishud, blong mekem baptaes blong ol dedman. Oli save invaetem olgeta we oli holem Melkesedek Prishud blong mekem ol konfemesen blong ol dedman.

Oli save invaetem nomo ol man we oli endao blong:

• Givim seves olsem raeting rekoda.

• Givim seves olsem konfemesen rekoda.

Ol grup we oli oganaes, olsem ol famli, ol wod mo ol stek, we oli wantem tekpat long ol odinens long ol odinens blong baptaes, plante taem bae oli putum wan taem i stap wetem tempol, bifo oli kam (luk long 28.1.4). Wan o moa adalt we oli gat tempol rekomen i mas kam wetem ol grup ia.

28.2.2

Endaomen (We i tekem tu Odinens blong Rere)

Taem oli stap mekem ol proksi endaomen blong ol dedman, oli mekem mo rekodem odinens blong rere mo endaomen, i seperet (luk long 27.2). Eni memba we i endao wetem wan tempol rekomen we i laef, i save stap olsem wan proksi blong kasem ol odinens ia.

28.2.3

Silim Hasban long Waef mo Silim Ol Pikinini long Papa mo Mama

Long tempol, oli save silim ol dedman i go long hasban o waef blong olgeta we oli bin maredem long laef ia (luk long 38.4.1.3 sapos hasban o waef i laef yet mo 38.4.1.8 sapos tugeta, hasban mo waef i ded). Oli save silim ol pikinini we oli laef o ded, blong olgeta we oli ded, i go long olgeta (luk long 38.4.2.2). Wan memba we i endao wetem wan tempol rekomen we i laef, i save stap olsem wan proksi blong ol siling odinens.

Ol odinens blong siling, konfemesen, blong rere mo endaomen, plante taem oli mekem long laef ia o tru long wan proksi, bifo wan ded man o woman i sil i go long hasban o waef blong hem o long papa mo mama blong hem (luk long 28.2). Be, wan dedman we i ded bifo 8 yia mo i no akaontebol long laef ia, i no nidim blong kasem eni narafala odinens bifo oli silim hem i go long papa mo mama blong hem (luk long 18.1, 28.3.2, mo 28.3.3).

28.3

Ol Spesel Situesen

Seksen ia i eksplenem ol situesen we sam long ol gaedlaen insaed long 28.1 i no aplae long hem.

28.3.1

Ol Pikinini we Oli Ded Bifo Oli Bon (Ol Pikinini we Oli Bon mo Ded, mo Olgeta we Oli Ded Insaed long Bel blong Mama)

I nidim blong mekem ol tempol odinens blong ol pikinini we oli ded insaed long bel blong mama. Blong kasem moa infomesen, luk long 38.7.3

28.3.2

Ol Pikinini we Oli Ded Bifo Oli Kasem Eit Yia

Atonmen blong Jisas Kraes i pemaot ol pikinini mo “i sevem olgeta oli go long selestial kingdom blong heven” (Doktrin mo Ol Kavenan 137:10). From hemia, oli no mekem baptaes o endaomen blong wan pikinini we i ded bifo hem i gat 8 yia. Be, oli save mekem ol siling blong ol pikinini we oli no bon insaed long kavenan, o oli no kasem odinens ia long laef (luk long 18.1).

28.3.3

Olgeta we Oli Ded mo Oli Bin Gat Disabiliti long Tingting

Oli save mekem ol tempol odinens blong ol dedman we oli save se oli bin save akaontebol long laef blong olgeta (luk long Doktrin mo Ol Kavenan 20:71). Oli save mekem tu ol tempol odinens blong ol man mo woman we oli save sapos oli akaontebol o no.

Sapos wan i save klia se wan we i ded finis, i bin gat disabiliti long tingting mo i no bin save stap akaontebol, wan odinens ia nomo we bae oli mekem i blong silim hem i go long papa mo mama blong hem (luk long 38.2.4). Hemia oli mekem nomo taem man o woman i no bon insaed long kavenan o i no bin sil i go long papa mo mama blong hem taem hem i laef. I no nid blong mekem ol narafala odinens blong tempol, iven sapos hem i bin laef kasem 8 yia o ova long 8 yia.

28.3.4

Olgeta we Oli Talem se Maet Oli Ded

Oli save mekem tu ol tempol odinens blong wan man mo woman we oli ting se i ded finis. Oli no save mekem ol odinens blong olgeta kasem 10 yia i pas stat long taem we oli ting se man o woman ia i ded o loa i talemaot se hem i ded. Polisi ia aplae long ol man mo woman we:

• Oli lus i stap o lus long solwota.

• Oli lus anda long ol situesen we i posibol blong oli ded be oli no faenem bodi.

Long evri narafala situesen blong ol man o woman we oli lus, bae oli save mekem ol odinens blong tempol blong olgeta afta 110 yia i pas stat long taem we man o woman ia i bon.

Ol stek presiden oli save kontaktem Tempol Dipatmen sapos hem i gat ol kwestin abaot polisi ia:

Imel: [e-mail]

28.3.5

Ol Man o Woman we Oli Karemaot Jos Membasip long Olgeta, o Oli Sakemaot Membasip

Sapos oli karemaot membasip blong wan man o woman o oli sakemaot membasip blong olgeta bifo oli ded, i nidim blong Fas Presidensi i apruvum bifo oli save mekem ol tempol odinens blong olgeta, mo oli save putumbak ol blesing blong olgeta tu taem i nidim. Wan memba blong famli i save askem long wan leta i go long Ofis blong Fas Presidensi blong oli apruvum, wan yia afta we man o woman ia i ded. Leta ia i mas eksplenem ol situesen. I no nidim wan fom. Bisop o stek presiden i save help wetem rikwes ia sapos i gat nid.

28.3.5.1

Putumbak Olgeta we Oli Ded We Oli No Endao

Ol dedman we oli no endao be oli karemaot o sakemaot Jos membasip blong olgeta, oli save kam joen bakegen tru long baptaes mo konfemesen. I nidim blong Fas Presidensi i apruvum mo olsem we oli putum long 28.3.5. Ol dedman ia oli no nidim blong sil long ol papa mo mama blong olgeta bakegen sapos oli bin bon insaed long kavenan o sil i go long papa mo mama blong olgeta taem oli laef.

28.3.5.2

Restoresen blong Ol Tempol Blesing blong Ol Dedman We Oli Endao

Ol dedman we oli karemaot Jos membasip blong olgeta, o oli bin sakemaot membasip blong olgeta, mo afta oli karembak olgeta tru long baptaes mo konfemesen, oli save kasem ol prishud mo tempol blesing nomo tru long odinens blong putumbak ol blesing. Olgeta olsem ia, oli no odenem olgeta long ofis blong prishud, o oli no mekem endaomen blong olgeta bakegen, from se oli putumbak ol blesing ia tru long odinens ia.

Olsem we oli putum long 28.3.5, i nidim blong Fas Presidensi i givim raet blong wan i mekem ol odinens ia long bihaf blong ol dedman. Blong kasem moa infomesen abaot wei blong mekem odinens ia blong olgeta we oli laef i stap, luk long 32.17.2