“29. Ol Miting Insaed long Jos,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2024).
“29. Ol Miting Insaed long Jos,” Jeneral Hanbuk.
29.
Ol Miting Insaed long Jos
29.0
Fas Toktok
Ol Lata-dei Sent oli mit tugeta blong wosip, mekem olgeta oli kam antap moa, mo blong tijim mo lanem gospel (luk long Alma 6:6; Moronae 6:5–6). Sevya i bin promesem se: “From we long weaples we tu o tri man oli joen wanples long nem blong mi, mi mi stap wetem olgeta” (Matiu 18:20 Blong mit tugeta i wan wei we “hat blong [yumi] oli joen tugeta blong kam wan long lav” (Mosaea 18:21).
Ol lidasip miting oli helpem ol lida blong oli kaonsel tugeta mo kodinetem ol efot blong givim seves long ol narawan. Be, blong stap holem wan miting i no mas tekem ples blong fasin blong givim seves mo givhan olsem we Jisas Kraes i bin mekem. Ol wei blong helpem God long long wok blong Hem blong fasin blong sevem man mo blong kam olsem wan god, oli save mekem plan from long wan miting, be plante taem, oli mekem i hapen nao aotsaed long miting.
29.1
Stap Mekem Plan mo Lidim Ol Miting
Ol lida oli mekem plan mo oli lidim ol miting “olsem we Tabu Spirit i stap lidim olgeta, folem ol komanmen mo ol revelesen blong God” (Doktrin mo Ol Kavenan 20:45; luk tu long Moronae 6:9; Doktrin mo Ol Kavenan 46:2). Oli lukaotem ol wei blong stap invaetem paoa blong Spirit i kam insaed long ol miting blong olgeta.
Ol lida oli meksua se namba blong ol miting, mo hamas minit blong holem wan miting, oli no mas putum hevi trabol long ol memba o long famli blong olgeta. Eksampol. Ol miting oli no mas mekem se i had blong ol famli oli gat taem tugeta long Sabat dei.
Ol lida oli meksua se evri miting oli lukluk nomo long wanem we i impoten moa. Eksampol: ol sakramen miting oli mas lukluk nomo long sakramen mo fasin blong stap bildimap fet long Jisas Kraes. Ol presidensi miting mo ol kaonsel miting oli lukluk nomo blong mekem wanwan man, woman, mo famli oli kam strong moa.
Prisaeding ofisa i save lidim miting. O hem i save askem wan kaonsela o wan narawan blong lidim miting anda long daereksen blong hem.
Wanwan taem, wan samting we oli no plan from i save hapen long taem blong miting, we prisaeding ofisa i filim se i gat wan nid blong mekem i klia. Eksampol: maet wan i stap tijim wan doktrin we i no stret. Sapos hemia i hapen, prisaeding ofisa i mas mekem hemia i kam klia, mo i no mekem eniwan i harem nogud from.
29.2
Ol Miting blong Wod
29.2.1
Sakramen Miting
29.2.1.1
Stap Mekem Plan blong Sakramen Miting
Bisoprik i mekem ol plan mo i lidim ol miting ia. Oli meksua se stamba lukluk blong miting ia, i stap long sakramen mo bildimap fet long Jisas Kraes.
Sakramen miting, hem i blong wan aoa taem nomo. Insaed i save gat olgeta samting ia:
-
Fas miusik (luk long 19.3.2 blong kasem ol gaedlaen). Wan kwaet miusik bifo miting i stat i save invaetem wan spirit blong stap wosip.
-
Griting mo welkam.
-
Luksave ol prisaeding atoriti o ol nara lida we oli visit, we oli stap long miting. Ol prisaeding atoriti mo ol hae kaonsela we oli stap visit, oli sapos blong invaetem olgeta blong sidaon antap long stan. Oli save invaetem ol jeneral ofisa tu blong sidaon long stan, be nomo sapos oli stap long homwod blong olgeta.
-
Ol Anaonsmen. Ol anaonsmen ia, oli no mas fulap. Plante, oli save printim olgeta, oli save serem tru long teknoloji, o oli save serem long taem blong ol nara miting.
-
Wod mo stek bisnis, olsem we i stap ia:
-
Stap sastenem mo rilisim ol ofisa mo ol tija (luk long 30.3 mo 30.6).
-
Presentem ol nem blong ol brata we bae oli odenem olgeta long wan ofis long Aronik Prishud (luk long 18.10.3).
-
Luksave ol niu memba blong wod, wetem ol niu konvet. Hem we i lidim miting i talem nem blong niu konvet, mo i askem ol memba blong kongregesen blong leftemap han blong soem se oli welkamem memba ia insaed long wod.
Taem oli mekem baptaes mo konfemesen blong ol pikinini we oli ol memba blong rekod, nao oli luksave olgeta long sakramen miting. Be, oli no nid blong presentem olgeta blong oli welkamem olgeta insaed long wod.
-
-
Stap givim ol nem mo blesing long ol pikinini (luk long 18.6). Plante taem, oli mekem hemia long fas mo testemoni miting (luk long 29.2.2).
-
Konfemem ol niu konvet (luk long 18.8).
-
Sakramen hym mo blesem mo pasem sakramen. Sakramen i ol stamba lukluk blong miting. Ol nara pat blong miting oli no mas pulumaot tingting blong ol memba aot long hemia. Odinens ia, hem i wan janis blong ol memba blong daerektem ol tingting blong olgeta i go long Sevya mo sakrifaes blong Hem from olgeta. Hem i mas stap olsem wan tabu taem blong kam niu bakegen long saed blong spirit.
Tebol blong sakramen, oli mas rere long hem bifo miting i stat. Bisoprik i meksua se oli blesem mo pasem sakramen long wan fasin we i gat bigfala respek mo i gat oda. Olgeta we oli blesem mo pasem sakramen oli stap ripresentem Jisas Kraes.
Blong luk moa long saed blong stap rere, stap blesem mo stap pasem sakramen, luk long 18.9.
Blong kasem moa infomesen abaot fasin blong blesem mo pasem sakramen long ol situesen we oli no nomol, luk long 29.2.1.5 mo 18.9.1.
-
Ol mesej blong gospel mo singsing blong kongregesen, mo ol nara miusik. Ol mesej mo miusik oli mas go stret wetem tabu fasin blong sakramen. Blong kasem moa infomesen abaot fasin blong jusum olgeta blong givim toktok, luk long 29.2.1.4. Blong kasem moa infomesen abaot fasin blong jusum ol spesel miusik namba long sakramen miting, luk long 19.4.2.
-
Las hym mo prea.
-
Las miusik.
Ol help olsem ol pikja mo odiovisuol, oli no mas yusum long ol sakramen miting (luk long 38.8.3).
29.2.1.2
Stap Prisaed long Sakramen Miting
Bisop i stap prisaed long sakramen miting, be hem i no prisaed sapos wan memba blong stek presiden, wan Eria Seventi long eria blong hem, o wan Jeneral Atoriti i kam long atendem miting ia. Sapos bisop mo ol kaonsela blong hem, evriwan oli no stap, nao stek presiden i jusum huia i prisaed long sakramen miting. Plante taem, bae hem i jusum presiden blong kworom blong ol elda. Be, hem i save invaetem wan nara wan we i holem Melkesedek Prishud.
29.2.1.3
Taem Bifo long Sakramen Miting
Bifo we miting i stat, ol memba blong kongregesen oli rere long saed blong spirit, from sakramen. Oli save mekem hemia tru long wan kwaet prea, mo fasin blong tingting hevi. Ol lida oli soem eksampol blong fasin blong stap revren, o stap kwaet.
Wan memba blong bisoprik i invaetem ol klas presidensi blong Ol Yang Woman blong oganaesem ol yut blong givhan taem oli stap welkamem ol visita mo ol memba taem oli stap kam insaed long japel. Ol yut oli wok blong save mo tingbaot ol nem blong ol memba taem oli welkamem olgeta. Oli help blong mekem ples i kwaet taem oli stap ansarem ol kwestin mo helpem ol pipol blong faenem ol jea olsem we oli nidim.
29.2.1.4
Stap Jusum Ol Spika
Bisoprik nao i jusum ol spika blong toktok long sakramen miting. Plante taem, oli invaetem ol memba blong wod, we i tekem tu ol yut mo ol pikinini (luk long 38.8.18). Stek presiden i save givim wok long ol hae kaonsela, o ol memba blong presidensi blong ol oganaesesen blong stek blong givim toktok. Stek presiden nao i talemaot hamas taem bae oli go givim toktok.
Bisoprik i sendem invitesen ia blong givim toktok, plante taem bifo miting i stat. Ol spika oli talem testemoni blong olgeta abaot Jisas Kraes mo oli tijim gospel blong Hem taem oli yusum ol skripja (luk long Doktrin mo Ol Kavenan 42:12; 52:9). Ol mesej oli mas bildimap fet mo oli mas stret wetem tabu fasin blong sakramen.
Blong kasem moa infomesen abaot taem we ol misinari we oli jes singaotem olgeta, mo ol riten misinari oli toktok long sakramen miting, luk long 24.5.2 mo 24.8. 3.
Bisoprik i putum taem blong wan sakramen miting long yia blong i gat wan presentesen we i kam long ol pikinini blong Praemeri. Blong kasem moa infomesen abaot presentesen ia, luk long 12.1.6.
29.2.1.5
Ol Sakramen Seves long Ol Situesen we I No Nomol
Evri memba i nidim ol spirit blesing we i kam taem wan i tekem mo kakae sakramen. Be, samfala memba, oli no save kam long sakramen miting from se oli stap nomo long hom blong olgeta, o long wan hospital, o wan kea senta. Bisop i save givim wok long sam we oli holem prishud blong oli pasem sakramen long olgeta memba ia (luk long 18.9.1).
Long sam kes, bisop i save givim raet blong olgeta ia we oli no save kam long sakramen, blong oli tekpat onlaen. Blong kasem moa infomesen, luk long 29.7.
Taem we ol memba oli travel, o oli go stap long wan ples longwe long hom blong sot taem, oli mas atendem sakramen miting long wan wod kolosap sapos i posibol. Oli no mas holem ol sakramen seves long ol ples we i gat wan famli kam tugeta, holidei, o ol nara aktiviti we Jos i no sponsarem.
29.2.2
Fast mo Testemoni Miting
Long wan fast mo testemoni miting, oli no givim wok long ol spika blong givim toktok, mo i no gat wan spesel miusik namba. Be, hem we i lidim miting, i talem wan sot testemoni. Afta long hemia, hem i invaetem ol memba blong kongregesen blong oli talem testemoni blong olgeta. Blong talem testemoni, hem i minim blong talemaot ol trutok blong gospel olsem we Tabu Spirit i givim insperesen long yu. Ol testemoni oli sot nomo, blong mekem se i save gat plante pipol oli tekpat long hem.
Oli save welkamem ol yang pikinini tu blong kam talemaot testemoni blong olgeta long ol fast mo testemoni miting. Maet bae i gud moa blong oli lanem blong mekem hemia long hom, kasem taem oli save talemaot testemoni blong olgeta olgetawan we i no gat wan narawan i helpem hem.
Anda long daereksen blong bisop, plante taem oli stap blesem ol pikinini long taem blong fast mo testemoni miting (luk long 29.2.1.1).
29.2.3
Wod Konfrens
Wod konfrens ia, oli mekem plan blong hem blong i go stret wetem ol lokol nid. Hem i gat sakramen miting we stek presiden i plan from. Plante taem, stek presiden nao i prisaed long miting ia, mo i gat wan memba blong bisoprik we i stap lidim.
Long taem blong miting ia, wan memba blong stek presidensi o hae kaonsel i presentem nem blong ol jeneral, stek, mo wod lida blong oli sastenem olgeta. Hem i yusum fom ia, Ol Ofisa we Oli Sastenem, we klak blong wod i rere long hem. Bisop mo stek presiden, plante taem oli toktok long taem blong miting ia.
Wod i holem ol nomol prishud mo oganaesesen miting olsem pat blong wod konfrens. Ol lida blong stek oli save givim instraksen mo help long ol miting ia. Oli givhan long ol lida mo ol memba blong wod.
Blong go wetem wod konfrens, stek presidensi i mit wetem bisoprik. Tugeta, oli luklukbak long progres, insaed long wod, abaot wok blong God blong fasin blong sevem man mo fasin blong oli kam olsem wan god. Miting ia, oli save holem long Sandei blong wod konfrens o long wan nara taem.
29.2.4
Bisoprik Miting
Bisop i mekem plan mo i lidim bisoprik miting. Ol poen blong lukluk long ol, i save gat:
-
Kodinetem wok blong God blong fasin blong sevem man mo fasin blong kam olsem wan god, we i stap hapen insaed long wod.
-
Stap mekem wanwan man, woman mo famli insaed long wod oli kam strong moa—speseli ol yut mo ol pikinini.
-
Faenemaot ol memba we oli save rere blong kasem ol odinens, mo tu, ol prishud odinesen.
-
Faenemaot nem blong ol memba blong singaotem blong holem ol posisen insaed long wod.
-
Faenemaot nem blong ol memba we oli save givim long stek presiden blong oli givim seves olsem ol misinari.
-
Luklukbak long ol instraksen we oli stap long ol skripja, we oli kam long ol lida blong Jos, mo olgeta we oli stap insaed long hanbuk ia.
Long ol nara poen blong save tokbaot, i gat ol oganaesesen blong wod mo ol program, bajet blong wod, ripot long ol asaenmen, mo ol plan blong ol miting mo ol aktiviti we oli stap kam antap.
29.2.5
Wod Kaonsel Miting
Bisop i mekem plan blong holem, i prisaed, mo i lidim ol wod kaonsel miting. Sapos hem i no stap, hem i save givim wok ia long wan kaonsela blong hem i prisaed mo lidim miting. Be, kaonsel i no save tekem ol bigfala desisen sapos i no gat bisop.
Ol memba blong wod kaonsel oli lukaotem ol wei blong helpem evri memba blong wod blong oli bildimap paoa long saed blong spirit, kasem ol odinens we i sevem man, kipim ol kavenan, mo kam ol man mo ol woman we oli givim evri samting blong stap folem Jisas Kraes (luk long Moronae 6:4–5). Long taem blong ol wod kaonsel miting, ol memba blong kaonsel oli save mekem ol plan mo kodinetem wok ia. Tugeta, oli save faenemaot olsem wanem ol skil mo ol samting we oli memba blong wod oli save mekem i save blesem olgeta we oli stap long nid. Oli lukaotem blong Spirit i soem rod long olgeta taem oli joen wan wetem lav mo wari long ol memba blong wod.
Ol lida blong ol oganaesesen blong wod oli go long ol wod kaonsel miting anda long tufala hat ia:
-
Olsem ol memba blong wod kaonsel we oli help blong blesem evri memba blong wod.
-
Olsem ol ripresentativ blong oganaesesen blong olgeta.
Taem we oli mit tugeta, ol memba blong wod kaonsel oli toktok raon long ol poen we bae i blong gud blong wan kombaen wok blong ful kaonsel. Oli leftemap tingting blong wanwan memba blong kaonsel blong serem ol tingting blong olgeta, mo blong tekem insperesen blong olgeta long saed blong ol poen ia.
Ol wod kaonsel miting, oli no sapos blong stap ova long wan aoa. Oli stat wetem wan prea, mo ol sot ripot long saed blong ol wok we oli bin givimaot long las miting. Long lis andanit ia, i gat ol poen blong save toktok raon long olgeta. I no gat inaf taem blong toktok raon long evriwan long olgeta long evri miting. Bisop i givim taem i go long ol poen we i rili nid blong toktok raon long olgeta blong blesem wanwan man, woman mo famli.
-
Stap laef folem gospel blong Jisas Kraes. Stap helpem ol memba blong oli rere blong bildimap fet, kasem ol odinens blong tempol we i sevem man, mo blong oli kipim ol kavenan blong olgeta.
-
Stap kea long olgeta we oli stap long nid. Stap serem ol risos mo ol skil blong blesem wanwan man, woman, famli mo komuniti. Stap helpem ol memba blong wod blong oli dipen long olgetawan. (Luk long japta 22.)
-
Stap invaetem evriwan blong akseptem gospel. Stap luklukbak long progres blong olgeta we oli stap lanem abaot gospel, mo tu, ol memba we oli niu mo stap kambak long jos. Stap toktok raon long ol wei we ol memba oli save serem gospel wetem ol narawan. (Luk long japta 23.)
-
Stap joenem ol famli blong taem we i no save finis. Luklukbak long progres blong ol memba we oli stap rere blong kasem ol odinens blong tempol. Stap mekem plan blong ol wei blong helpem moa memba blong stap klin inaf blong holem wan tempol rekomen. Blong toktok raon long ol wei we ol memba oli save tekpat long tempol famli histri wok. (Luk long japta 25.)
Taem ol memba blong wod kaonsel oli stap toktok raon long ol poen ia, oli lukluk mo skelem ol nid blong ol memba mo wanem ol memba oli strong long hem. Oli save lanem abaot ol nid ia mo wanem samting oli strong long hem insaed long ol presidensi miting, taem oli toktok raon wetem ol memba blong oganaesesen blong olgeta (mo tu long taem blong ol givhan intaviu), mo tru long ol givhan hadwok blong olgeta. Antap long hemia, Ol Risos blong Ol Lida mo Klak (RLK) i gat ol tul mo ol ripot we oli save helpem ol lida blong oli savegud progres blong ol memba. Ol memba blong kaonsel oli mas kipim konfidensiol eni praevet infomesen, o eni infomesen we i no blong serem (luk long 4.4.6).
Wod kaonsel i mas save ol pikinini mo ol yut insaed long wod mo hom situesen blong olgeta. Oli mas luklukgud long olgeta we oli no gat gospel sapot long hom.
Afta long wan toktok storian, bisop i save disaed blong tekem wan aksen, o i save disaed blong mekem wan desisen afta, mo save go lukaotem moa infomesen mo help blong Lod. O, hem i save sendem wan poen i go long wan defren kaonsel blong oli lukluk long hem, olsem bisoprik. Luk long 4.4.3.
Samtaem, wod kaonsel i save disaed blong gat wan wod aktiviti we i save help blong lukluk long ol nid blong ol memba. Wod kaonsel i save lukluk ova long plan blong ol wod aktiviti. Be, plante long ol plan ia, oli mekem bifo o afta long ol kaonsel miting. Blong gat moa infomesen abaot ol aktiviti, luk long japta 20.
Afta we ol fultaem misinari oli kambak hom, oli save invaetem olgeta blong givim ripot long saed blong misin blong olgeta insaed long wod kaonsel (luk long 24.8.3).
Blong stap andastanem ol prinsipol we oli stap lidim ol kaonsel miting insaed long Jos, evri memba blong kaonsel oli mas stadi long 4.3 mo 4.4.
29.2.6
Wod Yut Kaonsel Miting
Bisop i save lidim ol wod yut kaonsel miting. O hem i save givim wok ia long wan narawan blong mekem, olsem wan long asisten blong hem long kworom blong ol pris, o presiden blong klas blong ol yang woman we yia blong olgeta i moa hae. Ol miting blong wod yut kaonsel oli givim ol janis blong ol yut oli tekem lid. Bisoprik o ol nara lida oli save helpem olgeta blong oli rere from ol miting ia, hemia long taem blong presidensi miting blong kworom o hemia blong klas presidensi.
Bifo long wanwan miting, bisop mo hem we i stap lidim miting, i luklukbak long ol poen blong toktok raon long olgeta. Ol poen ia, oli save go olsem:
-
Wok blong God blong fasin blong sevem man mo fasin blong oli kam olsem wan god.
-
Ol nid blong ol yut insaed long wod mo ol wei blong lukluk long olgeta.
-
Ol efot blong go faenem o lukaotem ol yut we oli lesaktiv, o ol niu memba.
-
Ol aktiviti, wetem ol janis blong givim seves long olgeta we oli stap long nid. Plante long ol wok blong mekem plan, oli mekem insaed long presidensi miting blong kworom o klas (luk long japta 20).
-
Wok blong Givhan (luk long japta 21).
-
Blong stap trenem ol niu presidensi blong kworom o blong klas.
Blong stap andastanem ol prinsipol we oli stap lidim ol kaonsel miting insaed long Jos, evri memba blong kaonsel oli mas stadi long 4.3 mo 4.4.
29.2.7
Ol Nara Miting mo Klas long Wod
Ol miting blong presidensi blong ol kworom blong prishud, mo ol presidensi blong olgeta, oli tokbaot olgeta insaed long japta 8 mo10.
Ol miting blong ol sista blong Rilif Sosaeti mo ol lida blong olgeta, oli tokbaot long japta 9.
Ol miting blong ol yang woman mo ol lida blong olgeta, oli tokbaot long japta 11.
Ol miting blong ol pikinini blong Praemeri mo ol lida blong olgeta, oli tokbaot long japta 12.
Ol Sandei Skul klas, oli tokbaot olgeta insaed long 13.3.
Ol miting blong kaonsel blong ol tija, oli tokbaot insaed long 17.4.
Ol kodinesen miting blong wok blong stap serem gospel mo mekem ol niu memba mo ol memba we oli stap kambak oli kam strong moa, oli tokbaot olgeta long 23.4.
Ol kodinesen miting blong tempol mo famli histri wok, oli tokbaot long 25.2.7
29.2.8
Program blong Ol Sandei Miting
Ol wod oli yusum wan long ol taemtebol ia, blong tu (2) aoa blong yusum long ol miting long Sandei.
Plan 1
|
60 minit |
Sakramen miting |
|---|---|
|
10 minit |
Muv i go long ol klas mo ol miting |
|
50 minit |
Evri Sandei: Praemeri, wetem neseri (luk long 12.2.1.2) Fas mo nambatri Sandei long manis: Sandei Skul (luk long 13.3) Nambatu mo nambafo Sandei: prishud kworom miting (luk long 8.2.1.2 mo 10.2.1.2), Rilif Sosaeti miting (luk long 9.2.1.2), mo Ol Yang Woman miting (luk long 11.2.1.2) Nambafaef Sandei: miting blong ol yut mo ol adalt. Bisoprik i disaed long topik, mo i givimaot wok ia long ol tija (plante taem, oli ol memba blong wod o blong stek). Mo tu, oli disaed sapos ol man mo woman, yut mo ol adalt, oli mit seperet o tugeta. |
Plan 2
|
50 minit |
Evri Sandei: Praemeri, wetem neseri (luk long 12.2.1.2) Fas mo nambatri Sandei long manis: Sandei Skul (luk long 13.3) Nambatu mo nambafo Sandei: prishud kworom miting (luk long 8.2.1.2 mo 10.2.1.2), Rilif Sosaeti miting (luk long 9.2.1.2), mo Ol Yang Woman miting (luk long 11.2.1.2) Nambafaef Sandei: miting blong ol yut mo ol adalt. Bisoprik i disaed long topik, mo i givimaot wok ia long ol tija (plante taem, oli ol memba blong wod o blong stek). Mo tu, oli disaed sapos ol man mo woman, yut mo ol adalt, oli mit seperet o tugeta. |
|---|---|
|
10 minit |
Muv i go long sakramen miting |
|
60 minit |
Sakramen miting |
Taem we 2 wod oli mit long semfala bilding, mo wan, o tugeta, oli no gat tumas pikinini o yut, bae i gud sapos ol pikinini mo ol yut oli atendem Sandei klas tugeta. Ol miting taemtebol blong Sandei Miting blong ol wod ia oli save joen olsem we oli soem andanit ia:
Plan ia, oli save tekem sapos tugeta wod oli yusum ol defren lanwis be ol pikinini mo ol yut oli toktok long sem lanwis.
Blong save yusum plan ia, bae i nidim se stek presiden i apruvum. Sapos hem i apruvum, bisop blong wanwan wod i mit wetem oganaesesen lida blong i askem kaonsel blong olgeta abaot wei mo taem blong stat yusum.
Tufala bisoprik oli mit tugeta blong faenemaot wijwan memba blong wanwan wod bae oli singaotem blong givim seves long ol kworom mo ol oganaesesen. Wanwan bisop i stap olsem presiden blong pris kworom blong hem, be tufala bisop i tekem wanwan Sandei blong prisaed long Sandei kworom miting. Bisop blong tufala wod oli atendem kombaen wod yut kaonsel miting. Afta we oli stat yusum plan ia, ol lida oli gohed blong mit oltaem blong kodinetem ol hadwok blong olgeta.
29.2.9
Ista mo Krismes
Long Ista Sandei, oli mekem sakramen miting nomo. Hemia i semmak taem Krismes Dei i foldaon long wan Sandei. Taem Krismes i foldaon long wan nara dei blong wik, bae oli mekem Sakramen miting nomo long wan Sandei we i kolosap long Krismes—plante taem hem i Sandei bifo Krismes—olsem we stek presidensi bae i talem.
Long sam eria, wan bigfala holidei we i no blong ol Kristin man, i save gat bigfala mining long saed blong kalja. Taem wan holidei olsem i foldaon long wan Sandei, Eria Presidensi i save givim raet long ol bisop blong mekem sakramen miting nomo long dei ia.
Ol stek presidensi oli save toktok wetem ol bisop blong talem sapos bae oli nidim blong jenisim ol taem blong statem ol sakramen miting long ol Sandei ia.
29.3
Ol Miting blong Stek
29.3.1
Stek Konfrens
Presiden blong Kworom blong Olgeta Twelef Aposol nao i putum taemtebol blong ol stek konfrens. Plante taem, stek presiden i prisaed long wan konfrens long wan yia, mo wan Eria Seventi o Jeneral Atoriti we i kasem wok ia, i prisaed long narawan.
Prisaeding ofisa nao i givim daereksen blong mekem evri plan blong konfrens ia. Hem i apruvum evriwan we bae i tekpat long konfrens, mo ol miusik namba longtaem bifo konfrens i tekem ples. Blong gat moa infomesen abaot miusik long taem blong stek konfrens, luk long 19.3.4.
Taem wan Eria Seventi o Jeneral Atoriti i prisaed, hem i save invaetem stek presiden blong givim ol tingting blong ol topik blong givim instraksen long hem long konfrens. Taem we stek presiden i prisaed, hem mo ol kaonsela blong hem oli jusum ol topik. Stek presidensi i save toktok raon long ol posibol topik wetem stek kaonsel. Taem hem i mekem ol joes ia, stek presidensi i tingting long ol topik we Fas Presidensi i poenemaot bigwan i no longtaem i pas.
Taem we stek presiden i stap mekem ol arenjmen blong stek konfrens, hem i save askem ol kworom blong prishud, mo ol nara oganaesesen, wanwan man, woman mo famli blong oli save help. Eksampol, oli save givim wok blong oli setemap ol jea, jusum olgeta we bae oli welkamem mo mekem ol pipol oli sidaon, mo klinim bilding.
Insaed long wanwan stek konfrens, plante taem i gat olgeta miting ia:
-
Wan miting blong Eria Seventi o Jeneral Atoriti (sapos oli givim wok long wan) mo stek presidensi. Stek klak mo stek eksekutiv sekretari tu oli mas stap long miting ia.
-
Wan stek prishud lidasip miting (luk long 29.3.3). Prisaeding atoriti i jusum sapos miting ia, oli holem long Satedei o long Sandei. Wan memba blong stek presidensi i lidim.
-
Wan Satedei naet sesen blong evri memba blong stek, we oli gat 18 yia i go antap. Folem ol lokol situesen we i stap, miting ia, oli save holem long Sandei, sapos prisaeding atoriti i apruvum. Wan memba blong stek presidensi i lidim.
-
Oli holem wan jeneral sesen long Sandei, blong evri memba mo ol narawan we oli wantem blong kam. Stek presiden i lidim mo i toktok long miting ia. Oli save holem moa long wan Sandei jeneral sesen sapos i no gat stret bilding blong mekem evriwan i sidaon long semfala sesen. Ol pikinini blong Praemeri oli kam long sesen ia wetem famli blong olgeta, oli no stap long wan seperet miting.
Sapos i nid, ol sesen blong konfrens, oli save soem tru long onlaen brodkas i go long ol narafala mitinghaos, i go long ol nara ples insaed long stek. Blong sam memba, bae oli nid blong konfrens i onlaen brodkas i go kasem hom blong olgeta. Blong kasem moa infomesen abaot ol miting blong soem tru long brodkas o onlaen, luk long 29.7.
Ol spika long wan jeneral sesen oli no mas yusum ol samting olsem visuol help o ol odiovisuol tul (luk long 38.8.3).
Sapos ol Jeneral Ofisa, tempol presiden mo metron, misin presiden mo waef, o stek petriak oli kam, oli mas sidaon long stan. I semmak long ol kaonsela blong tempol mo misin presidensi (wetem waef blong olgeta) sapos oli kam long bihaf blong tempol o misin presiden.
Long wan stek konfrens long wanwan yia, wan memba blong stek presidensi i presentem ol jeneral, ol eria, mo ol stek ofisa, blong oli sastenem olgeta. Hem i yusum fom ia, Ol Ofisa we Oli Sastenem, we klak blong stek i rere long hem. Plante taem, oli mekem hemia long fasfala stek konfrens blong yia.
Sapos oli singaotem o rilisim ol ofisa blong stek bitwin tufala stek konfrens ia, bae oli presentem olgeta blong oli sastenem olgeta, o blong oli soem tangkyu blong olgeta long nekis stek konfrens, tru long vot. O oli save mekem hemia long sakramen miting blong wanwan wod. Luk long 30.3 mo 30.6.
Ol brata we oli bin sendem nem blong olgeta blong oli odenem olgeta blong kam ol elda mo hae pris, plante taem oli stap presentem olgeta blong oli sastenem olgeta insaed long wan stek konfrens. Sapos i nid blong oli odenem wan brata bifo long nekis stek konfrens, bae oli save sastenem hem insaed long sakramen miting blong wod we hem i stap long hem. Bae nem blong hem, bae oli presentem blong oli mekem i kam ofisol, insaed long wan stek konfrens (luk long 18.10.3).
29.3.2
Stek Jeneral Prishud Miting
Stek presidensi i mekem plan mo i lidim stek jeneral prishud miting. Wetem prea, oli jusum ol topik mo ol spika.
29.3.3
Stek Prishud Lidasip Miting
Stek presidensi i mekem plan mo i lidim stek prishud lidasip miting. Wanem i stap insaed hapen insaed long ol miting ia, i save jenis. Evri brata oli save stap tugeta long ful miting. O, afta we oli holem sam jeneral Instraksen, nao oli save seperetem olgeta i go long ol smol grup blong kasem sam spesifik instraksen, hemia folem ol koling blong olgeta, o folem ol asaenmen blong olgeta.
Stek presidensi mo ol nara stek lida nao, plante taem, bae oli givim instraksen ia. Ol wod lida, wetem ol woman lida, oli save invaetem olgeta blong givim instraksen wanwan taem.
29.3.4
Ol Stek Okseleri Lidasip Miting
Ol stek oganaesesen presidensi i mekem plan mo i lidim ol stek lidasip miting. Wanem i stap insaed hapen insaed long ol miting ia, i save jenis. Evri lida oli save stap tugeta long ful miting. O, afta we oli holem sam jeneral instraksen, nao oli save seperetem olgeta i go long ol smol grup blong kasem sam spesifik instraksen, hemia folem ol koling blong olgeta, o folem ol asaenmen blong olgeta.
Ol lida blong ol oganaesesen, ol memba blong stek presidensi mo ol nara lida blong stek nao, plante taem, bae oli givim instraksen ia. Ol wod lida wetem ol oganaesesen oli save invaetem olgeta blong givim instraksen wanwan taem.
Stek Yang Man presidensi i no save holem wan stek lidasip miting. Instraksen blong olgeta ia we oli gat responsabiliti blong lukaot long ol kworom blong Aronik Prishud, oli givim long ol stek prishud lidasip miting (luk long 29.3.3).
29.3.5
Stek Presidensi Miting
Stek presiden i mekem plan mo i lidim stek presidensi miting. Ol poen blong lukluk long ol, i save gat:
-
Wok blong fasin blong sevem man mo fasin blong kam olsem wan god, insaed long stek.
-
Mekem wanwan man, woman, mo famli long stek, i kam strong moa.
-
Ol nid mo ol ples we i gat paoa insaed long ol wod, ol kworom blong ol elda, mo ol nara oganaesesen long stek.
-
Nem blong ol brata we bae bisop i sendem i go blong oli odenem olgeta oli kam elda.
-
Ol memba blong singaotem olgeta long ol posisen long stek mo long sam posisen long wod, olsem we i stap long aotlaen long 30.8.
-
Nem blong ol brata we bisop i sendem i go blong oli odenem olgeta blong oli go long misin.
-
Instraksen we i kamaot long ol skripja, ol lida blong Jos, mo hanbuk ia.
Ol nara poen, i save gat, ol aktiviti mo ol program blong stek, bajet blong stek, ol ripot blong ol asaenmen, mo ol plan blong ol wik we oli stap kam.
29.3.6
Hae Kaonsel Miting
Stek presidensi i mekem plan mo i lidim ol hae kaonsel miting. Ol miting ia, insaed i save gat:
-
Kasem instraksen long stek presidensi long saed blong doktrin mo ol asaenmen.
-
Stap kaonsel tugeta abaot fasin blong mekem wanwan man, woman mo famli insaed long stek i kam strong moa. Ol Risos blong Ol Lida mo Klak (RLK) i gat ol tul mo ol ripot we oli save helpem ol lida blong oli savegud progres blong ol memba.
-
Toktok raon long hao blong help blong mekem wok blong God blong fasin blong sevem man mo fasin blong kam olsem wan god, i hapen.
-
Givim ripot long saed blong ol wok we oli bin givimaot (ol asaenmen).
-
Stap kaonsel wetem stek presidensi, mo sastenem desisen blong olgeta blong odenem ol brata oli kam elda mo hae pris.
-
Stap kaonsel wetem stek presidensi mo sastenem desisen blong olgeta blong givimaot ol koling.
-
Stap help blong mekem plan blong ol stek prishud lidasip miting (luk long 29.3.3).
-
Stap harem ol ripot we oli kam long ol riten misinari (luk long 24.8.3).
Samtaem, bae i save gat wan sot hae kaonsel miting, mo stret afta, i gat wan stek kaonsel miting (luk long 29.3.7). Hemia i save daonem namba blong ol miting blong ol lida oli kam atendem.
Blong stap andastanem ol prinsipol we oli stap lidim ol kaonsel miting insaed long Jos, evri memba blong kaonsel oli mas stadi long 4.3 mo 4.4.
Blong kasem moa infomesen long saed blong fasin blong tekpat long miting tru long intanet o nara wei, luk long 29.7
29.3.7
Stek Kaonsel Miting
Stek presiden nao i mekem plan mo i lidim ol stek kaonsel miting. Long ol miting ia, ol memba blong kaonsel oli:
-
Kasem instraksen long stek presidensi long saed blong doktrin mo ol asaenmen.
-
Kaonsel tugeta abaot fasin blong mekem wanwan man, woman, mo famli long stek, i kam strong moa. RLK i gat ol tul mo ol ripot we oli save helpem ol lida blong oli savegud progres blong ol memba.
-
Toktok raon long ful visen blong wok blong God blong fasin blong sevem man mo fasin blong kam olsem wan god, insaed long stek.
-
Toktok raon long ol nid, blong laef long wol ia, blong ol memba blong stek, mo olsem wanem blong helpem olgeta blong oli dipen long olgetawan. Faenemaot ol risos we oli stap long komuniti mo long stek. Sam eksampol: i gat ol lokol skul, mo i gat BYU–Pathway Worldwide. (Luk long 22.12 mo 22.13.)
-
Developem mo holemtaet wan simpol plan blong stek i yusum blong fesem ol imejensi (luk long 22.9.1.3).
-
Mekem plan blong ol memba blong stek oli givim seves long komuniti (luk long 22.9.1). Long weaples we i gat, JustServe.org i givim sam janis blong mekem komuniti seves.
-
Givim ripot long saed blong ol oganaesesen, ol aktiviti mo ol program blong stek.
Samtaem, bae i save gat wan sot hae kaonsel miting, mo stret afta, i gat wan stek kaonsel miting (luk long 29.3.6). Hemia i save daonem namba blong ol miting blong ol lida oli kam atendem.
Blong stap andastanem ol prinsipol we oli stap lidim ol kaonsel miting insaed long Jos, evri memba blong kaonsel oli mas stadi long 4.3 mo 4.4.
Blong kasem moa infomesen long saed blong fasin blong tekpat long miting tru long intanet o nara wei, luk long 29.7
29.3.8
Stek Adalt Lidasip Komiti Miting
Stek adalt lidasip komiti i sapotem ol presidensi blong kworom blong ol elda, mo presidensi blong wod Rilif Sosaeti long wok blong olgeta. Ol memba blong komiti oli tokbaot bigwan ol hadwok long wod long saed blong wok blong givhan, stap serem gospel, mekem ol niu memba mo olgeta we oli kambak oli kam strong moa, mo tekpat long tempol mo famli histri wok.
Antap long hemia, komiti ia i kodinetem ol hadwok blong stek we i go wetem welfea (gudlaef) mo indipenden laef, we i tekem JustServe.org long weaples we i gat i stap) mo BYU–Pathway Worldwide (luk long 22.13).
Stek presidensi i mekem plan mo i lidim ol miting ia blong stek adalt lidasip komiti. Ol miting ia, oli save kam pat blong stek kaonsel miting, mo mekem i kam wan moa bigfala miting. Eksampol: long en blong sam stek kaonsel miting, adalt lidasip komiti i save mit blong gohed blong toktok raon long sam spesifik mata.
29.3.9
Stek Yut Lidasip Komiti Miting
Stek yut lidasip komiti i sapotem ol bisoprik, Ol Yang Woman presidensi mo advaesa, mo ol advaesa blong Kworom blong Aronik Prishud, long wok blong olgeta wetem ol yut. Ol adalt lida long komiti oli givim ol spesel tingting blong tokbaot bigwan, blong mekem ol yut oli putum olgeta fulwan insaed long wok blong God blong fasin blong sevem man mo kam olsem wan god.
Stek yut lidasip komiti i gat sam moa long olgeta responsabiliti ia:
-
Mekem plan blong ol seves mo aktiviti Olgeta ia i save gat ol yut konfrens, ol danis, ol divosen, ol seves projek, mo ol bigfala maltistek taem. ((Blong gat ol aedia blong givim seves, luk long JustServe.org long ples we i gat i stap.) Ol yut oli mas lidim wok blong mekem ol plan, mo kareaot ol aktiviti ia. Ol aktiviti blong stek oli no mas hapen oltaem blong mekem se i no hevi tumas long ol wod. Ol aktiviti ia oli sapos blong kam sapotem ol aktiviti blong wod, be i no blong kompit wetem olgeta. Oli mas talemaot long ol lida blong wod abaot ol stek aktiviti, longtaem bifo oli hapen.
-
Mekem plan blong sam wei blong sapotem ol Blong Ol Yut Oli Kam Strong Konfrens.
-
Kodinetem ol hadwok blong stek we oli go wetem program blong Ol Pikinini mo Ol Yut
Wan memba blong stek presidensi i lukluk long ol miting blong stek yut lidasip komiti. Hem i save lidim, o hem i save givim wok ia long wan narawan blong i mekem, we i save tekem ol yut tu. Ol miting ia, oli save kam pat blong stek kaonsel miting, mo mekem i kam wan moa bigfala miting. Eksampol: long en blong sam stek kaonsel miting, yut lidasip komiti i save mit blong gohed blong toktok raon long sam spesifik mata.
29.3.10
Stek Kaonsel Miting blong Ol Bisop
Ol poen blong lukluk long ol, i save gat:
-
Stap helpem ol yut blong progres long saed blong spirit.
-
Stap yusum ol fast ofring blong kea long olgeta we oli stap long nid. Stap helpem ol memba blong oli bildimap wan indipenden laef (luk long japta 22, speseli 22.11). Stap serem infomesen abaot ol risos we oli stap insaed long ol komuniti.
-
Stap helpem ol memba blong sakem sin mo gat eksperiens blong gat wan jenis insaed long hat (luk long japta 32).
-
Stap lukaotem faenens blong Jos (luk long japta 34).
Stek presiden i lidim miting ia. Hem i helpem ol bisop blong lanem mo mekem ol stamba responsabiliti blong olgeta (luk long 7.1). Hem i invaetem tu ol bisop blong oli kaonsel abaot instraksen we i kam long ol Jos lida.
Miting ia, i no tekem ples blong ol nomol intaviu we stek presiden i gat wetem wanwan bisop (luk long 6.2.1.2).
Blong stap andastanem ol prinsipol we oli stap lidim ol kaonsel miting insaed long Jos, evri memba blong kaonsel oli mas stadi long 4.3 mo 4.4.
29.3.11
Ol Nara Miting
Ol miting blong stek stek singgel adalt komiti, mo stek yang singgel adalt komiti, oli tokbaot olgeta long 14.1.1.2.
29.4
Ol Kodineting Kaonsel Miting
Eria Seventi i lidim ol miting mo i lidim ol toktok storian insaed long ol miting ia. Evriwan we i kam long miting ia, oli kaonsel tugeta olsem we evriwan oli semmak (luk long Doktrin mo Ol Kavenan 88:122).
Long ol miting ia, olgeta we oli tekpat oli:
-
Invaetem revelesen abaot bes wei blong yusum ol tijing mo daereksen blong Fas Presidensi mo Kworom blong Olgeta Twelef Aposol, mo Eria Presidensi.
-
Kodinetem wok blong God blong fasin blong sevem man mo fasin blong oli kam olsem wan god, insaed long kaonsel blong olgeta.
-
Kaonsel tugeta abaot welfea, long laef ia mo long saed blong spirit, blong ol memba, mo olsem wanem blong helpem olgeta blong oli kam ol man we oli tru blong folem Jisas Kraes.
-
Givim instraksen mo mekem wanwan i kam antap.
-
Kodinetem wok blong maltistek.
29.5
Ol Fenerol Seves mo Ol Nara Seves blong Wan Ded
Taem wan memba blong Jos i ded, bisop i save go talem se hem i save mekem seves blong help blong givim kamfot long olgeta we oli laef i stap, mo blong givim ona long hem we i ded. Ol seves blong ol pipol, oli defren, mo oli folem relijin, kalja, tradisen mo ol lokol loa. Olgeta instraksen ia oli save helpem ol bisop blong oli mekem plan blong holem ol seves we i lukluk long gospel, blong wan we i ded, mo semtaem, respektem ol defren pat ia.
29.5.1
Ol Jeneral Prinsipol
Ded i wan pat we i nid blong stap insaed long plan blong fasin blong sevem man blong Papa long Heven (luk long Alma 12:24–27). From Jisas Kraes, bambae evriwan i laef bakegen long ded. Wan impoten stamba tingting blong ol seves blong Jos long saed blong ol dedman, i blong testifae abaot plan blong fasin blong sevem man, speseli Atonmen mo Laef Bakegen long Ded blong Sevya. Ol seves ia, oli mas gat bigfala respek long hem, mo ol eksperiens long saed blong spirit.
Ol memba blong Jos oli mas soem respek long ol praktis blong ol nara relijin, long taem blong ded. Be, oli no mas joenem ol seremoni o ol kastom we oli agensem ol komanmen, o ol standet blong Jos. Ol lida blong Jos oli no mas putum ol seremoni blong ol nara relijin o ol nara grup i kam insaed long ol seves blong Jos we oli holem blong ol memba we oli ded.
Kaonsel i go long ol memba se oli no mas folem ol praktis o ol kastom we oli stap olsem wan hevi trabol blong olgeta we oli laef i stap. Ol praktis ia, oli ol longfala travel, bigfala pablik anaonsmen, ol peimen i go long famli, ol kaekae we oli stap blong longtaem, mo ol aniveseri selebresen we i bigwan tumas.
Ol memba blong Jos we oli tekpat long ol seves blong ol dedman, oli no mas akseptem ol peimen.
Ol lida blong Jos, mo ol memba, oli obei ol lokol loa abaot wanem blong mekem taem wan i ded.
29.5.2
Givim Help long Famli
Olsem ol disaepol blong Jisas Kraes, ol lida mo ol memba blong Jos oli “krae sore wetem olgeta we oli krae sore, … oli leftemap tingting blong olgeta we oli nidim fasin blong leftemap tingting” (Mosaea 18:9). Taem wan memba i ded, bisop i visitim famli blong dedman, blong leftemap tingting blong olgeta. Hem i save askem wan long tufala kaonsela blong hem blong go wetem hem. Bisop i talemaot tu long presiden blong kworom blong ol elda, mo presiden blong Rilif Sosaeti, taem wan i ded.
Bisop i save talem se ol memba blong wod oli save help, mo kworom blong ol elda mo Rilif Sosaeti tu oli save help. Eksampol: ol memba blong wod oli save:
-
Talemaot long ol fren mo ol famli.
-
Help blong rere long wan notis, o ded mesej.
-
Help blong mekem plan blong fenerol, o wan nara seves.
-
Help blong mekem ol wok long ples blong dedman, mo long ples blong berem ol dedman, olsem we i stret blong mekem.
-
Dresemap bodi blong dedman blong save berem (luk long 38.5.10).
-
Rere long kaekae.
29.5.3
Taem blong Luk Bodi (long Ples we Kastom i Letem)
Samtaem, oli putum wan taem blong lukluk bodi blong dedman long mitinghaos blong Jos, bifo oli holem fenerol seves. Ol lida oli mas openem mitinghaos blong fenerol daerekta i yusum, wan aoa o moa bifo taem blong lukluk bodi.
Afta taem blong lukluk bodi, oli save mekem wan famli prea sapos famli i wantem. Oli mas sarem gud kofin bifo fenerol seves i tekem ples.
29.5.4
Fenerol Seves (long ol ples we hemia i kastom)
Sapos oli mekem fenerol blong wan memba insaed long wan bilding blong Jos, bae bisop nao i lidim fenerol seves ia. Sapos oli holem fenerol long wan hom, long ples blong dedman, o long gref nomo, bae famli i save askem bisop blong i lidim. Wan long tufala kaonsela blong bisop i save lidim fenerol seves ia sapos bisop i no save mekem. Blong gat infomesen abaot ol seves we i stap tekem ples insaed long wan Jos bilding, blong wan man o woman we i no wan memba blong Jos,luk long 29.5.6.
Taem we bisop i stap lidim wan fenerol, i nomata se i stap long bilding blong Jos o long wan narafala ples, hem i wan miting blong Jos mo i wan seves blong relijin. Hem i wan taem blong filim Spirit. Bisop i askem gud long olgeta we oli tekpat blong holemtaet wan filing blong stap revren mo bigfala respek.
Taem we bisop i lidim wan fenerol, hem, o wan long tufala kaonsela blong hem, i lukluk ova long plan blong seves ia. Hem i lukluk long wanem we famli i wantem, mo i meksua se fenerol i simpol mo i tabu, wetem miusik mo ol sot tabu tok we oli lukluk nomo long gospel. I gud blong tokbaot bigwan tu kamfot we i kam tru long Jisas Kraes from Atonmen mo Laef Bakegen long Ded blong Hem. Ol famli oli no mas filim se oli mas givim toktok, o tekpat long eni wei long seves ia.
Ol fenerol oli ol janis blong givim ona long laef blong hem we i ded. Be, ol ona ia oli no mas tekova long fenerol seves. Bae wan spesel famli kam tugeta, we i seperet long fenerol seves ia, plante taem bae i wan gudfala taem sapos famli i wantem moa taem blong serem ol ona o ol memori.
Ol vidio presentesen oli no mas pat blong wan fenerol seves we oli holem long wan japel.
Ol fenerol oli mas stat long taem. Plante taem, oli no mas stap moa long 1 aoa haf, hemia blong respektem olgeta we oli kam atendem fenerol.
Sapos i gat wan memba blong stek presidensi, wan Eria Seventi we i stap long eria blong hem, o i gat wan Jeneral Atoriti we i kam long fenerol ia, hem nao i prisaed. Hem we i stap lidim seves, i toktok wetem hem longtaem bifo seves i tekples, mo i luksave hem long taem blong seves. Oli save invaetem prisaeding ofisa blong i givim las toktok sapos hem i wantem.
Ol fenerol seves ia, oli no save holem long Sandei.
Long sam kes, ol bisop oli save arenjem blong olgeta we oli gat wok blong berem ol dedman, blong oli mekem wan seves blong berem man long wan fasin we i gat respek, sapos bisop i pem mane blong fenerol ia wetem mane blong fas ofring.
Blong gat moa infomesen abaot ol misinari we oli kambak hom blong stap long wan fenerol, luk long 24.6.2.7. Blong kasem ol gaedlaen abaot ol fenerol we oli soem tru long intanet mo rekodem, luk long 29.7.
29.5.5
Berem Bodi o Bonem Bodi
Sapos i posibol, ol man o woman ia oli endao finis, oli save putum ol tempol klos long olgeta blong berem olgeta, o bonem ded bodi blong olgeta. Blong kasem moa infomesen abaot ol tempol klos blong berem ol dedman, mo fasin blong dresemap ol dedman, luk long 38.5.10.
Sapos i posibol, i mas gat wan memba blong bisoprik i go wetem grup blong ol man mo dedbodi i go long beregraon. Sapos oli dediketem gref, bae memba blong bisoprik ia i toktok wetem famli, mo i askem wan we i holem Melkesedek Prishud blong mekem dedikesen ia. Ol instraksen oli stap long 18.16. Sapos famli i wantem, oli save mekem nomo wan prea long saed blong gref.
Blong gat infomesen abaot fasin blong dediketem ples we bae oli putum ol asis blong bodi long hem, luk long 18.16.2. Blong luk ol nara gaedlaen abaot fasin blong bonem dedbodi blong man, luk long 38.7.2.
29.5.6
Ol Seves blong Olgeta we Oli No Ol Memba blong Jos
Bisop i save givim tingting blong oli yusum wan Jos mitinghaos blong wan fenerol seves blong wan man o woman we i no wan memba blong Jos. Sapos hem we i ded i blong wan nara jos, bae seves ia i folem fasin we jos ia i stap folem. Sapos famli i wantem, seves ia, wan haeman blong Jos ia i save lidim, sapos wei blong lidim seves ia i wan fasin we i gat respek mo i stret. Be, ol seremoni blong ol nara jos, o blong ol oganaesesen aotsaed, bae oli no save mekem insaed long mitinghaos blong Jos.
29.6
Ol Prea insaed long Ol Miting blong Jos
Ol prea long ol miting blong Jos oli mas sot, simpol, mo olsem we Spirit i talem. Eni memba blong Jos we i baptaes, i save givim fas mo las prea. Ol pikinini we oli no baptaes yet oli save prea long Praemeri. Ol lida oli mas traem blong no mekem se hasban mo waef i prea long sem miting.
Ol memba oli sapos blong prea mo yusum ol toktok we oli talemaot lav mo respek long Papa long Heven. Long Inglis, oli yusum ol toktok ia, Thee, Thy, Thine, mo Thou taem oli toktok long Hem.
29.7
Soem Ol Miting tru long Intanet o Holem Ol Onlaen Miting
Ol memba blong Jos oli mas traehad blong go long stret ples blong miting. Hem i blong gud blong evriwan blong kam tugeta we i mekem wosip i moa spesel mo i help blong mekem ol memba oli kam wan (luk long 29.0).
Taem i no posibol from ol helt o nara risen, blong holem ol miting we oli soem tru long intanet o onlaen, bae i mekem i posibol blong tekem tu olgeta we oli no save kam. Blong gud blong ol memba ia mo ol narawan, bisop i save givim raet blong oli soem ol sakramen miting (luk long 29.2.1.5), ol seves blong baptaes, ol fenerol, mo ol nara miting blong wod, tru long intanet. Stek presiden i save givim raet blong soem stek konfrens (luk long 29.3.1) mo ol nara miting blong stek, tru long intanet. Blong kasem gaed abaot fasin blong stap soem sakramen mo ol nara odinens tru long intanet, luk long 38.2.3.
Long semmak fasin, taem ol memba oli no save kam long ol klas long Sandei o long ol lidasip miting, bisop o stek presiden i save givim raet long ol memba ia blong tekpat onlaen.
Ol teknoloji speseli blong wod mo stek, oli save helpem ol lida blong setemap ol miting tru long intanet mo onlaen (luk long 33.10). Olgeta man o woman ia, oli save helpem tu ol memba blong oli save luk ol miting ia.
Ol rekoding tru long intanet blong ol miting blong wod mo stek, oli mas dilitim stret bifo en blong nekis dei blong miting ia.
29.8
Ol Foto mo Vidio Rekoding blong Ol Miting
Blong kipim tabu fasin blong ol miting blong Jos, i no mas gat wan i tekem ol foto, o mekem ol vidio rekoding blong ol sakramen miting o ol stek konfrens.
Blong kasem moa infomesen abaot ol laef rekoding blong ol miting, luk long 29.7.
29.9
Stap Intepret blong Ol Miting
Lod i wantem evriwan blong andastanem gospel long lanwis blong hemwan (luk long Doktrin mo Ol Kavenan 90:11). Long ol stek we ol memba oli toktok moa long wan mama lanwis, wan memba blong stek presidensi i save singaotem wan stek intepretesen kodineta. Bisop i save singaotem ol wod intepreta.
Blong gat moa infomesen, luk long Church Interpretation Training and Best Practices long ChurchofJesusChrist.org.