“31. Mga Interbiyo ug Pagtambag,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2020).

“31. Mga Interbiyo ug Pagtambag,” Kinatibuk-ang Tamdanan nga Basahon.

Mga Interbiyo ug Pagtambag

31.1

Mga Interbiyo

Ang matag presidente sa stake ug bishop mao ang “maghuhukom sa Israel” (Doktrina ug mga Pakigsaad 107:72). Pinaagi niini nga awtoridad mopahigayon siya og mga interbiyo sa katakos ug mga interbiyo sa pagkapari. Nagrepresentar siya sa Ginoo sa pagpahigayon niining mga interbiyo. Sumala niana, siya kinahanglang maninguha sa pagpanalangin sa mga miyembro ug sa pagtabang kanila sa pagsunod sa ebanghelyo ni Jesukristo.

31.1.1

Kinatibuk-ang mga Instruksiyon alang sa mga Interbiyo sa Katakos

Ang mga presidente sa stake, mga bishop, ug (kon tugotan) ang ilang mga magtatambag mopahigayon sa mga interbiyo sa katakos sigon sa gilatid niini nga seksiyon. Sila kinahanglang mangandam sa espirituwal nga paagi aron sila magiyahan sa Espiritu atol niining mga interbiyo. Kinahanglan usab sila nga maninguha nga makabaton sa gahom sa pag-ila. Kini usa ka espirituwal nga gasa nga makatabang kanila sa pag-ila sa kamatuoran, ingon man usab sa mga panginahanglan sa miyembro (tan-awa sa Doktrina ug mga Pakigsaad 46:27–28).

Ang mga interbiyo sa katakos kinahanglan nga pribado. Hinoon, ang tawo nga giinterbiyo mahimong modapit og laing hamtong nga motambong.

Ang mainampingon nga pagpaminaw importante sa panahon sa mga interbiyo sa katakos. Ang sakop sa kapangulohan sa stake o bishopric kinahanglang mohatag sa hingpit ug sinsero nga pagtagad ngadto sa tawo nga giinterbiyo. Ang nag-interbiyo mosiguro usab nga ang miyembro nakasabot sa mga pangutana nga gipangutana. Siya mogahin og igong panahon sa pagpahigayon sa interbiyo sa usa ka matarong, dili dinali-dali nga paagi.

31.1.2

Kinatibuk-ang mga Instruksiyon alang sa mga Interbiyo sa Pagkapari

Ang mga presidente sa stake, ang mga bishop, ug ang ilang mga magtatambag mointerbiyo kanunay sa mga lider sa pagkapari kinsa mo-report ngadto kanila. Usa ka katuyoan niining mga interbiyo mao ang pagdawat sa mga report mahitungod sa mga responsibilidad sa lider. Lain nga katuyoan mao ang pagtabang sa lider sa pagtakda og mga tumong ug sa paghimo og mga plano aron makab-ot kini. Kon mahimo, ang mga badyet ug mga gasto rebyohon usab sa panahon niining mga interbiyo.

Ang tawo nga mopahigayon sa interbiyo sa pagkapari kinahanglang motudlo, moawhag, ug modasig sa mga lider sa ilang mga paningkamot sa pagtuman sa ilang mga calling. Kinahanglan usab siya nga mopasalamat ug molig-on sa lider sa iyang personal nga kinabuhi ug sa pamilya.

31.1.3

Mga Interbiyo nga Ipahigayon sa Presidente sa Stake

Ang presidente sa stake mopahigayon sa mosunod nga mga interbiyo sa mga miyembro sa stake:

Alang sa mga rekomend sa templo alang niadtong modawat sa ilang kaugalingong pagtuga o magminyo o magpasilyo diha sa templo (tan-awa sa 26.3.1).
Alang sa rekomendasyon sa full-time nga mga misyonaryo (tan-awa sa 24.4.2).
Alang sa pag-release sa full-time nga mga misyonaryo human makapauli (tan-awa sa 24.8.2).
Alang sa mga calling nga moserbisyo isip mga magtatambag sa kapangulohan sa stake, isip mga patriyarka, ug isip mga bishop, kon gitugotan.
Alang sa mga calling nga moserbisyo isip mga presidente sa korum sa mga elder, presidente sa Relief Society sa stake, ug mga klerk sa stake.
Alang sa pagtabang sa mga miyembro nga maghinulsol sa seryoso nga mga sala (tan-awa sa kapitulo 32).

Ang presidente sa stake kanunay usab nga mointerbiyo sa matag bishop aron sa pag-awhag ug pagtudlo kaniya. Mointerbiyo siya sa patriyarka sa stake sa dili mominos kaduha sa matag tuig (tan-awa sa 6.6.4).

31.1.4

Mga Interbiyo nga Ipahigayon sa Presidente sa Stake o sa Gisangonan nga mga Magtatambag

Ang presidente sa stake o ang gisangonan nga mga magtatambag mopahigayon sa mosunod nga mga interbiyo sa mga miyembro sa stake. Sa dili pa mointerbiyo sa usa ka tawo alang sa bisan unsa sa mosunod nga mga katuyoan, ang sakop sa kapangulohan sa stake mosiguro nga ang tawo nainterbiyo na o gitugotan [cleared] na sa bishop o sa gisangonan nga magtatambag sa bishopric.

Alang sa pagbag-o sa mga rekomend sa templo (tan-awa sa 26.3.1).
Alang sa ordinasyon ngadto sa mga katungdanan sa elder o high priest (tan-awa sa 38.2.5.1).
Alang sa mga calling sa pagserbisyo sa mga katungdanan sa Simbahan sigon sa gipakita sa 30.8.
Alang sa pag-endorso aron ma-enrol sa unibersidad o kolehiyo sa Simbahan (tan-awa sa 15.3).
Alang sa pag-endorso nga moapil sa programa sa pagpanghulam sa Makanunayong Pundo sa Edukasyon [Perpetual Education Fund], kon ang programa giaprobahan (tan-awa sa 22.13).

Kon ang usa ka magtatambag sa kapangulohan sa stake makasugat og seryoso nga mga butang atol sa usa ka interbiyo, sama sa mga kalapasan nga nagkinahanglan og pagkumpisal, iyang paadtoon ang miyembro ngadto sa bishop sa walay paglangan.

31.1.5

Mga Interbiyo nga Ipahigayon sa Bishop

Ang bishop mopahigayon sa mosunod nga mga interbiyo sa mga miyembro sa ward:

Alang sa mga rekomend sa templo alang niadtong modawat sa ilang kaugalingong pagtuga o magminyo o magpasilyo diha sa templo (tan-awa sa 26.3.1).
Alang sa mga rekomend nga adunay limitasyon ang paggamit alang sa bag-ong mga kinabig (tan-awa sa 26.4.2).
Alang sa rekomendasyon sa mga kandidato sa pagka-misyonaryo (tan-awa sa 24.4.2).
Alang sa ordinasyon ngadto sa mga katungdanan sa elder ug high priest, kon tugotan sa kapangulohan sa stake (tan-awa sa 38.2.5.1).
Alang sa tinuig nga paghusay sa ikapulo (tan-awa sa 34.4.1.5).
Alang sa mga calling nga moserbisyo isip mga presidente sa organisasyon sa ward.
Alang sa ordinasyon ngadto sa katungdanan sa priest (tan-awa sa 38.2.5.2).
Alang sa ordinasyon sa lalaki nga mga kinabig ngadto sa mga katungdanan sa Aaronic nga Pagkapari (tan-awa sa 38.2.5.2).
Alang sa mga calling nga moserbisyo isip mga kaabag diha sa korum sa mga priest.
Sa kabatan-onan (tan-awa sa 31.1.7).
Alang sa tabang sa halad sa puasa (tan-awa sa 22.2.2).
Alang sa pag-endorso aron ma-enrol o magpadayon sa unibersidad o kolehiyo sa Simbahan (tan-awa sa 15.3).
Alang sa pagtabang sa mga miyembro nga maghinulsol sa seryoso nga mga sala (tan-awa sa kapitulo 32).

Ang bishop kanunay usab nga makigkita sa presidente sa korum sa mga elder ug sa presidente sa Relief Society sa tinagsa-tagsa ug dunganon (tan-awa sa 8.3.1 ug 9.3.1).

31.1.6

Mga Interbiyo nga Ipahigayon sa Bishop o sa Gisangonan nga mga Magtatambag

Ang bishop o ang gisangonan nga mga magtatambag mopahigayon sa mosunod nga mga interbiyo sa mga miyembro sa ward. Ang bishop lamang ang mosulbad sa mga problema mahitungod sa kaputli ug may kalabotan sa moral nga mga butang, ug sa ubang seryoso nga mga kalapasan niini nga mga interbiyo. Kon ang usa ka magtatambag makasugat og seryoso nga mga butang, sama sa mga sala nga nagkinahanglan og pagkumpisal, iyang paadtoon ang miyembro ngadto sa bishop sa walay paglangan.

Alang sa pagbag-o sa mga rekomend sa templo ug sa mga rekomend nga adunay limitasyon ang paggamit (tan-awa sa 26.3, 26.4, ug 26.5).
Alang sa mga calling sa pagserbisyo sa mga katungdanan sa Simbahan sigon sa gipakita sa 30.8.1.
Alang sa bunyag ug kompirmasyon sa nag-edad og 8 anyos nga mga bata kinsa mga miyembro nga anaa na sa rekord o, kon sila dili mga miyembro nga anaa na sa rekord pero adunay usa ka ginikanan o tigbantay nga miyembro (tan-awa sa 38.2.3.3).
Alang sa mga calling nga moserbisyo isip presidente, mga magtatambag, ug secretary sa korum sa mga deacon; presidente, mga magtatambag, ug secretary sa korum sa mga teacher; secretary sa korum sa mga priest; ug mga presidente sa klase, mga magtatambag, ug mga secretary sa Young Women. Hinoon, ang bishop lamang ang mo-set apart sa mga presidente sa korum sa mga deacon ug mga teacher.
Alang sa 11 anyos samtang sila mag-uswag gikan sa Primary. Atol niini nga interbiyo, ang bishop o ang iyang gisangonan nga magtatambag mointerbiyo usab sa mga batan-ong lalaki aron sa pagtino kon sila takos ug andam ba nga modawat sa Aaronic nga Pagkapari. Iyang interbiyohon ang mga batan-ong babaye agi og pagpangandam sa pagsulod sa programa sa Young Women.
Alang sa ordinasyon ngadto sa katungdanan sa deacon o teacher (tan-awa sa 38.2.5.2).
Alang sa kabatan-onan ug mga young single adult (tan-awa sa 31.1.7 ug 31.1.8).
Alang sa patriyarkal nga mga panalangin (tan-awa sa 38.2.12).
Alang sa naghupot sa pagkapari nga nagtinguha nga mao ang molitok sa mga pulong sa usa ka ordinansa sa pagkapari sa laing ward apan walay rekomend sa templo. Kon ang tawo takos, ang sakop sa bishopric mosulat ug mopirma sa porma sa Rekomend sa Pagpahigayon og Ordinansa.
Alang sa mga miyembro nga mosulod sa serbisyo sa militar (tan-awa sa 38.9.2).
Alang sa pag-endorso nga moapil sa programa sa pagpanghulam sa Makanunayong Pundo sa Edukasyon [Perpetual Education Fund], kon ang programa giaprobahan (tan-awa sa 22.13).

31.1.7

Mga Lagda alang sa mga Interbiyo sa Kabatan-onan

31.1.7.1

Tahas sa mga Ginikanan

Ang mga ginikanan adunay nag-unang responsibilidad sa pagtudlo sa ilang mga anak sa ebanghelyo ni Jesukristo. Tabangan nila ang ilang mga anak nga molambo sa espirituwal nga paagi ug mangandam sa paghimo ug pagtuman sa sagradong mga pakigsaad. Ang mga ginikanan motambag usab sa ilang mga anak kalabot sa katakos ug motabang kanila nga maghinulsol ug molambo. Ang mga bishop ug ubang mga lider sa Simbahan mosuporta sa mga ginikanan niining mga paningkamot.

31.1.7.2

Ang Komunikasyon sa Bishop mahitungod sa mga Interbiyo

Samtang ang usa ka batan-ong babaye mangandam nga mahimong kabahin sa organisasyon sa Young Women ug samtang ang usa ka batan-ong lalaki mangandam sa pagdawat sa Aaronic nga Pagkapari, ang bishop mopaambit sa kabatan-onan ug sa ilang mga ginikanan sa mosunod nga impormasyon mahitungod sa mga interbiyo. Mahimo niya kining buhaton isip kabahin sa tinuig nga miting sa Pagpangandam alang sa Templo ug sa Pagkapari o sa laing mga higayon kon gikinahanglan.

Ang mga ginikanan adunay nag-unang responsibilidad sa pagtudlo ug pag-amuma sa ilang mga anak.
Ang bishop o usa sa iyang mga magtatambag mointerbiyo sa batan-ong lalaki o batan-ong babaye sa dili mominos kaduha sa usa ka tuig alang sa mga rason nga gilatid diha sa 31.1.7.3. Usa ka sakop sa bishopric ang mahimo usab nga makighimamat sa kabatan-onan aron pagtubag sa mga pangutana, mohatag og suporta, o mohatag og mga buluhaton.
Aron matabangan ang kabatan-onan nga maandam sa espirituwal nga paagi, ang mga interbiyo gikinahanglan alang sa sagradong mga butang sama sa mga rekomend sa templo, mga ordinasyon sa pagkapari, ug mga tawag nga magmisyon. Ang mga lider makigtambayayong sa mga ginikanan sa pagtabang sa kabatan-onan nga maandam alang niining mga interbiyo.
Ang mga ginikanan moawhag sa ilang mga anak nga makigkita sa bishop kon magkinahanglan sila sa iyang tabang sa espirituwal nga giya o sa paghinulsol.
Kon gusto sa usa ka batan-on, mahimo niyang dapiton ang usa ka ginikanan o laing hamtong nga maanaa kon makigkita sa bishop o usa sa iyang mga magtatambag.

31.1.7.3

Mga Katuyoan sa mga Interbiyo

Ang mga bishop ug ang ilang mga magtatambag adunay sagradong responsibilidad aron mangulo, motudlo, ug modasig sa kabatan-onan. Ang epektibong personal nga mga interbiyo usa ka importante nga paagi nga ila kining mabuhat. Atol niining mga interbiyo, ang bishop ug ang iyang mga magtatambag motudlo sa kabatan-onan mahitungod sa pagkahimong mga disipulo sa Manluluwas. Tabangan nila ang kabatan-onan nga mokonsiderar kon unsa kamaayo ang ilang pagsunod sa Manluluwas ug sa Iyang mga pagtulon-an. Ang mga interbiyo kinahanglan nga makapadasig nga espirituwal nga mga kasinatian.

Ang mga interbiyo makahatag og oportunidad aron mapamatud-an ang walay limitasyon nga potensyal sa kabatan-onan isip anak sa Dios. Ang mga interbiyo makahatag usab og oportunidad sa pagdasig sa kabatan-onan nga maghimo og mga plano aron mas mahiduol sa Langitnong Amahan ug aron molambo sa tanang aspeto sa ilang kinabuhi.

Isip mga representante sa Manluluwas, ang mga bishop gipili sa balaanong paagi nga mga maghuhukom sa Israel. Niini nga tahas, mopahigayon sila og mga interbiyo aron sa pagtino sa katakos ug sa pagtabang sa kabatan-onan nga maghinulsol sa mga kalapasan.

Kadtong mopahigayon sa mga interbiyo mopahayag og gugma ug maminaw og maayo. Dasigon nila ang kabatan-onan sa pagsulti kay sa sila mismo ang kanunay nga mosulti.

31.1.7.4

Kasagad sa mga Interbiyo

Ang bishop mointerbiyo sa matag batan-ong lalaki ug batan-ong babaye sa dili mominos kausa matag tuig. Kon mahimo, siya mointerbiyo sa matag 16 ug 17 anyos kaduha matag tuig. Kon dili kini mahimo, sangonan niya ang usa ka magtatambag sa pagpahigayon sa pipila niining mga interbiyo.

Human sa tinuig nga interbiyo uban sa bishop, ang matag batan-ong lalaki ug batan-ong babaye nga nag-edad og 11 hangtod sa 15 kasagaran adunay laing interbiyo sa laing panahon niana nga tuig uban sa magtatambag sa bishopric kinsa nagdumala sa korum sa Aaronic nga Pagkapari o klase sa Young Women nga giapilan sa batan-on.

Molihok uban sa inspirasyon ug kaalam, ang mga bishop mahimong mopahiangay sa kasagad sa mga interbiyo. Ang ubang mga batan-on tingali nagkinahanglan og dugang nga pagtagad, samtang ang uban wala kaayo magkinahanglan og kanunay nga mga interbiyo kay sa gisugyot, hinoon ang tanan kinahanglang interbiyohon dili mominos kausa matag tuig. Ang gidak-on sa ward, hiyograpiya, mga eskedyul, ug ubang mga sirkumstansiya makaapekto usab sa kasagad sa mga interbiyo.

31.1.7.5

Mga Butang alang sa Panaghisgot

Ang mahinungdanong mga butang nga panaghisgotan naglakip sa kalamboan sa pagpamatuod sa usa ka batan-on mahitungod sa Langitnong Amahan, sa misyon ug Pag-ula ni Jesukristo, ug sa gipahiuli nga ebanghelyo. Ang bishop ug ang iyang mga magtatambag mohatag og gibug-aton sa kaimportante sa pagtuman sa mga pakigsaad sa bunyag. Tudloan nila ang kabatan-onan nga mangandam sa paghimo ug pagtuman sa mga pakigsaad sa templo pinaagi sa matarong nga pagpuyo kada adlaw. Ang mga sakop sa bishopric moawhag sa kabatan-onan nga mag-ampo kanunay sa pribado ug uban sa ilang pamilya ug magtuon sa mga kasulatan. Moawhag usab sila sa kabatan-onan nga magpabiling suod sa ilang mga ginikanan.

Kon maghisgot sa pagkamasulundon sa mga sugo, ang bishop ug ang iyang mga magtatambag mohimo og tukma nga paggamit sa mga pangutana alang sa rekomend sa templo nga adunay limitasyon ang paggamit ug sa mga sumbanan ug mga pagpasabot diha sa Alang sa Kalig-on sa mga Kabatan-onan. Ipahaom sa mga lider ang panaghisgotan ngadto sa panabot ug mga pangutana sa kabatan-onan. Siguroon nila nga ang panaghisgotan mahitungod sa moral nga kalimpyo wala mag-awhag og pagkakuryoso o pag-eksperimento.

Ang bishop ug iyang mga magtatambag mahimo usab nga mohisgot sa mga butang nga gilista sa ubos:

Pag-orden sa pagkapari. Uban sa mga batan-ong lalaki, ilang hisgotan ang mga panalangin ug mga katungdanan sa paghupot sa Aaronic nga Pagkapari (tan-awa sa Doktrina ug mga Pakigsaad 20:46–60; 84:31–48; mga pakigpulong sa bag-ong kinatibuk-ang komperensiya bahin sa hilisgotan; ug 10.1.1 ug 10.1.2).

Seminary. Alang sa kabatan-onan nga naa sa tukma nga pangedaron, ilang i-awhag ang pagtambong kanunay sa seminary ug hatagan og gibug-aton ang mga panalangin nga magagikan sa kanunay nga pag-apil.

Misyonaryo nga pagserbisyo. Hatagan nila og espesyal nga pagtagad ang pag-andam sa mga batan-ong lalaki nga moserbisyo og full-time nga misyon (tan-awa sa 24.4.2). Ang mga batan-ong lalaki giawhag nga moserbisyo, ug ang mga batan-ong babaye, kon gusto nila, mahimong marekomendar nga moserbisyo (tan-awa sa 24.0). Hisgotan nila ang pag-andam sa espirituwal nga paagi pinaagi sa pagkahimong takos, pagtuon sa ebanghelyo, ug pag-ugmad og pagpamatuod. Hisgotan usab nila ang pag-andam sa pisikal, mental, emosyonal, ug pinansyal nga paagi.

Ang sumbanan nga mga pangutana sa pag-interbiyo alang sa mga kandidato sa pagka-full-time nga misyonaryo anaa sa ChurchofJesusChrist.org/mss. Rebyohon sa bishop kining mga pangutana ngadto sa mga kandidato ug sa ilang mga ginikanan sa dili pa ang interbiyo alang sa misyon.

Ang mga sakop sa bishopric kinahanglang sensitibo sa mga kahimtang diin ang mga batan-ong lalaki sa madungganong paagi dili makaapil sa full-time nga misyonaryo nga pagserbisyo (tan-awa sa 24.3.3). Hisgotan sa bishop ang mga oportunidad alang sa pangserbisyo nga mga misyon ngadto sa mga batan-ong lalaki ug mga batan-ong babaye, kon anaa (tan-awa sa 24.2.2).

Templo. Siguroon nila nga ang kabatan-onan nakasabot sa mga panalangin sa mga pakigsaad sa templo ug sa kaminyoon sa templo ug sa mga kinahanglanon alang sa pagdawat niining mga panalangin. Sa pag-isyu o pagbag-o sa rekomend sa templo, ipangutana nila ang sumbanan nga mga pangutana alang sa rekomend sa templo nga adunay limitasyon ang paggamit. Kon gikinahanglan, ilang ipahaom ang mga pangutana ngadto sa pangedaron ug mga kahimtang sa kabatan-onan.

31.1.8

Mga Interbiyo sa mga Young Single Adult

Ang bishop o ang gisangonan nga magtatambag mointerbiyo sa matag usa ka young single adult. Kining mga interbiyo kasagaran himoon kada tuig. Hinoon, uban sa inspirasyon ug kaalam, ang bishopric mahimong mopahiangay sa kasagad niining mga interbiyo.

31.1.9

Mga Interbiyo sa mga Tawo nga Dawaton Pag-usab pinaagi sa Bunyag ug Kompirmasyon

Alang sa mga panudlo mahitungod sa pag-interbiyo sa mga tawo nga gibakwian sa ilang pagkamiyembro sa Simbahan ug miluwat sa pagkamiyembro ug gustong dawaton pag-usab pinaagi sa bunyag ug kompirmasyon, tan-awa sa 32.16.2.

31.2

Pagtambag

31.2.1

Kinatibuk-ang mga Lagda

Ang mga presidente sa stake ug mga bishop motambag sa mga miyembro sa stake ug sa ward kinsa nagtinguha og espirituwal nga giya, kinsa adunay bug-at nga personal nga mga problema, kinsa adunay doktrinal nga mga pangutana, o kinsa nakabuhat og dagkong mga kalapasan. Ang mga presidente sa stake ug mga bishop mahimong modelegar sa pipila niining pagtambag ngadto sa ilang mga magtatambag, apan dili mahimo kon ang miyembro nakabuhat og dagkong mga kalapasan. Sa angay nga mga sitwasyon, sama sa panahon nga ang pamilya naglisod sa pinansyal, ang bishop o ang presidente sa stake mahimo usab nga modelegar sa pipila ka pagtambag ngadto sa mga naghupot og Melchizedek nga Pagkapari kinsa kwalipikado nga moabag. Ang tawo nga gisangonan sa bishop o sa presidente sa stake nga motambag sa usa ka miyembro mo-report kanunay sa lider nga mihatag sa buluhaton. Ang tawo mopabilin usab sa pagkakompidensiyal niini.

Ang mga miyembro sa Simbahan kinahanglang mohimo og makugihong paningkamot, lakip na ang tinud-anay nga pag-ampo ug pagtuon sa kasulatan, aron sila mismo sa ilang kaugalingon makakita og mga solusyon ug mga tubag. Kon nagkinahanglan gihapon sila og tabang, sila kinahanglang magpatambag pag-una sa ilang bishop. Kon gikinahanglan, mahimo niya silang paadtoon sa presidente sa stake. Ang lokal nga mga lider kinahanglang dili moawhag sa mga miyembro sa pagtawag, pagbisita, o pagsulat ngadto sa punoang buhatan sa Simbahan mahitungod sa personal nga mga butang (tan-awa sa 38.8.26).

Ang presidente sa stake ug bishop gihatagan og katungod sa pag-ila ug sa inspirasyon nga gikinahanglan aron mahimong espirituwal nga mga tigtambag ug temporal nga mga magtatambag sa mga miyembro sa ward kinsa nagkinahanglan sa ingon nga tabang. Kinahanglan nga mangandam sila sa espirituwal nga paagi sa dili pa motambag sa miyembro pinaagi sa pagtinguha sa gahom sa pag-ila ug sa giya sa Espiritu. Kini nga giya sa kasagaran moabot isip mga ideya, mga hunahuna, o mga pagbati. Ang Espiritu sa kasagaran moaghat sa mga lider sa paghinumdom sa mga pagtulon-an gikan sa mga kasulatan ug gikan sa mga propeta sa ulahing mga adlaw.

Kinahanglang gamiton kanunay sa mga lider ang mga kasulatan ug ang mga pulong sa mga propeta sa ulahing mga adlaw sa paghatag nila og tambag. Kining dinasig nga mga pulong kinahanglang gamiton uban sa pagkasensitibo, gugma, ug kadasig. Kinahanglang gamiton kini sa pagdasig ug pag-awhag, dili sa pagpugos o pagpanghadlok.

Ang mga lider kinahanglang moeskedyul og igong panahon alang sa mga pagsultihanay [appointment]. Ang mga miyembro kinahanglang dili mobati nga ang mga lider daghan kaayo og buluhaton ug makahatag lamang og pipila ka minuto ngadto kanila. Ang mga lider kinahanglan usab nga motabang sa mga miyembro nga mobati nga komportable samtang magsugod na ang panagsultihanay.

Kon ang presidente sa stake o bishop mobati nga dili andam sa pagtambag sa miyembro, moeskedyul siya og lain nga panahon sa pagsultihanay. Sa dili pa ang panagsultihanay siya magtinguha og giya pinaagi sa pagtuon, pag-ampo, ug, kon gikinahanglan, pagpuasa. Mahimo usab siyang makigsulti sa iyang lider sa pagkapari.

31.2.2

Espirituwal nga Pagbarog pinaagi sa Kinaugalingong Paningkamot

Ang mga lider moawhag sa mga miyembro nga mopalambo og espirituwal nga pagbarog pinaagi sa kinaugalingong paningkamot. Ang mga lider maglikay sa paghimo og mga desisyon alang niadtong ilang gitambagan. Hinoon, motabang ang mga lider kanila sa paghimo sa ilang kaugalingong mga desisyon uban sa giya sa Ginoo.

Ang presidente sa stake o bishop kinahanglang maglikay usab sa pagtanyag dayon og mga solusyon niadtong iyang gitambagan. Kutob sa mahimo, siya motabang kanila sa pag-analisar ug pagsulbad sa ilang kaugalingong mga problema o mga pangutana diha sa konteksto sa mga doktrina sa ebanghelyo ug sa plano sa kaluwasan. Ang pinakamaayo, iyang tudloan ang mga miyembro unsaon sa pagpangita og mga solusyon ug kalig-on gikan sa mga kasulatan sa ilang kaugalingon.

31.2.3

Mga Pangutana ug Pagpaminaw

Kon magtambag, ang presidente sa stake o bishop mangutana og mga pangutana nga makatabang kaniya nga makasabot sa sitwasyon sa miyembro. Maglikay siya sa wala kinahanglana nga pag-usisa. Ang mga pangutana sa kasagaran kinahanglang mopagawas og mga pagbati ug mga hunahuna imbis nga oo o dili nga mga tubag. Kinahanglan nga ang mga miyembro maoy magsulti kanunay.

Samtang nagsulti ang miyembro, ang presidente sa stake o ang bishop kinahanglan nga maminaw pag-ayo, maghatag og hingpit ug sinsero nga pagtagad. Ang pagpaminaw mahinungdanon alang sa pag-establisar og kompiyansa ug pagsalig. Sa kasagaran ang mga tawo nagkinahanglan og usa ka tawo nga ilang kasaligan nga maminaw kanila samtang sila nanglimbasog sa ilang mga hagit ug mga problema.

31.2.4

Paghinulsol ug Pagbuntog sa Tentasyon

Kon ang usa ka miyembro nakahimo og seryoso nga sala, ang presidente sa stake o ang bishop lig-on ug mahigugmaong motabang kaniya nga maghinulsol. Motudlo siya nga ang paghinulsol maglakip sa pagpakita og hugot nga pagtuo kang Jesukristo, pagbaton og masulub-on nga kasingkasing ug mahinulsolon nga espiritu, pag-ila ug pagsalikway sa sala, pagtinguha og kapasayloan, paghimo sa mga pag-uli, ug pagpakita sa gibag-o nga pasalig sa pagsunod sa mga sugo. Kon gikinahanglan, siya mohatag og dili pormal nga restriksiyon sa pipila ka pribilehiyo sa pagkamiyembro diha sa Simbahan. Kinahanglang sinati siya sa mga sirkumstansiya nga posible nga nagkinahanglan nga maghimo og konseho sa pagkamiyembro sa Simbahan ug sa mga paagi sa pagsugod niini (tan-awa sa kapitulo 32).

Kon magtambag sa mga miyembro, ang mga lider motabang kanila sa pagpangandam sa pagpakigbatok sa mga tentasyon. Pananglitan, ang mga miyembro nga nangulitawo, adunay kalisod sa ilang mga kaminyoon, nagkabulag o nagdiborsiyo, o nagsagubang sa ginagmayng moral nga mga problema mahimong mapanalipdan ug mapalig-on pinaagi sa pagtambag nga gihimo aron sa pagtabang kanila nga magbantay batok sa kalapasan. Ang tigdumalang mga opisyal dili kinahanglang maghulat sa mga miyembro nga mangayo sa ingon niana nga tabang apan mohangyo nga makigsulti kanila aron makatambag.

31.2.5

Kaminyoon, Diborsiyo, ug Panagbulag

Walay opisyal sa pagkapari nga motambag sa usa ka tawo kon kinsa ang minyoan. Dili usab siya motambag sa usa ka tawo nga idiborsiyo ang iyang kapikas. Kana nga mga desisyon kinahanglang magagikan gayod ug iya ra sa indibidwal.

Kon ang kaminyoon mosangpot sa pagdiborsiyo, o kon ang bana ug asawa magbulag, kinahanglan nga kanunay silang makadawat og tambag gikan sa mga lider sa Simbahan. Ang mga konseho sa pagkamiyembro sa Simbahan tingali gikinahanglan kon sila nakahimo og seryoso nga sala nga konektado sa diborsiyo o panagbulag (tan-awa sa kapitulo 32).

Ang miyembro nga nabulag sa iyang kapikas o magdiborsiyo kinahanglang tambagan nga dili makig-date hangtod nga ang hukom sa diborsiyo nahingpit na sumala sa balaod.

31.2.6

Propesyonal nga Pagtambag ug Pagtambal

Agi og dugang sa dinasig nga tabang sa mga bishop ug sa uban nga iyang gitugyanan, ang mga miyembro makabenepisyo gikan sa propesyonal nga pagtambag kon kini anaa. Kini nga pagtambag o pagtambal makatabang sa mga miyembro nga makasabot ug makatubag sa mga hagit sa kinabuhi sa himsog nga mga paagi.

Ang pagpakigkita og propesyonal nga magtatambag aron makaangkon og pagsabot ug mga kahanas nga makasalmot ngadto sa emosyonal nga pagbarog sa kaugalingon pinaagi sa kinaugalingong paningkamot dili timailhan sa kahuyang. Hinoon, kini mahimong timailhan sa pagkamapainubsanon ug kalig-on.

Ang mga miyembro kinahanglan nga magmabinantayon sa pagpili og inila nga propesyonal nga mga magtatambag kinsa adunay tukma nga lisensya. Ang mga magtatambag kinahanglang motahod sa kabubut-on, mga hiyas, ug mga pagtuo niadtong nagtinguha og tabang. Ang pag-apil niini nga mga hiyas angay sa propesyonal nga pagtambag.

Ang Simbahan supak sa bisan unsa nga pagtambal, lakip sa pag-usab o pag-ayo nga pagtambal alang sa sekswal nga kahimtang o pag-ila sa gender, kana nagpahimutang sa usa ka tawo ubos sa pang-abuso nga mga binuhatan. (Tan-awa sa “Pagkaibog sa Sama og Sekso” ug “Transgender nga mga Indibidwal.”)

Sa Estados Unidos ug Canada, ang mga bishop ug ang mga presidente sa stake mahimong mokontak sa Family Services aron sa pagpangita og mga kapanguhaan sa paghatag og propesyonal nga tambag nga nagsubay sa mga baroganan sa ebanghelyo. Ang impormasyon sa pagkontak gipakita sa ubos:

1-801-240-1711

1-800-453-3860, ekstensiyon 2-1711

FamilyServices.ChurchofJesusChrist.org

Sa ubang mga dapit, ang mga lider mahimong mokontak sa kawani sa Family Services o sa manager sa welfare ug self-reliance diha sa buhatan sa area alang sa pagpangonsulta.

Kon ang mga miyembro dili makabayad alang sa propesyonal nga pagtambag sa ilang kaugalingon o pinaagi sa insurance, ang mga bishop adunay kapilian sa pagtabang sa mga balayranan pinaagi sa mga halad sa puasa. Tan-awa sa 22.4 alang sa mga baroganan sa paghatag og tabang gikan sa Simbahan.

31.2.7

Mga Panalangin sa Pagkapari

Ang presidente sa stake o bishop mahimong mohatag og panalangin sa pagkapari kon ang miyembro nga gitambagan matinguhaon gayod niini.

31.3

Pagtipig sa Pagkakompidensiyal

Sa panahon ug human sa ilang termino sa pagserbisyo sa usa ka calling, ang mga lider kinahanglang padayon nga himoong kompidensiyal ang mga butang nga gihisgotan sa dihang nag-interbiyo ug nanambag. Ang pagbutyag og kompidensiyal nga impormasyon makadaot sa pagsalig, sa mga pagpamatuod, ug sa hugot nga pagtuo. Ang usa ka lider dili gayod mohisgot sa kompidensiyal nga mga butang ngadto sa uban, lakip na sa iyang mga magtatambag ug asawa, gawas lang kon siya gitugotan sa tawo nga iyang gi-interbiyo o gitambagan.

Kon ang usa ka magtatambag sa bishopric o kapangulohan sa stake makasugat og mga butang nga kinahanglang hisgotan ngadto sa bishop o presidente sa stake, siya kinahanglang mopasabot niini ngadto sa miyembro ug mopaadto kaniya sa bishop o sa presidente sa stake sa walay paglangan.

Kon ang tawo mobalhin sa bag-ong ward o stake, ang tigdumalang opisyal sa yunit diin siya gikan kinahanglang mopaambit sa impormasyon mahitungod sa mga aksiyon sa pagkamiyembro o sa ubang seryoso nga butang nga wala masulbad ngadto sa bag-ong tigdumalang opisyal sa tawo (tan-awa usab sa 32.4.4). Ang pagbuhat sa ingon dili makonsiderar nga kalapasan sa pagkakompidensiyal niini. Hinoon, ang tigdumalang opisyal kinahanglang dili mopaambit sa impormasyon mahitungod sa mga sala nga nasulbad na.

31.4

Pagpanalipod batok sa mga Dili Pagsinabtanay

Kon ang usa ka sakop sa bishopric o kapangulohan sa stake o laing gisangonan nga lider makigkita sa usa ka bata, batan-on, o babaye, kinahanglan siyang mohangyo sa usa ka ginikanan o laing hamtong nga moadto sa tupad nga kwarto, sa agianan, o sa hawanan. Kon gusto sa tawo nga gi-interbiyo, laing hamtong ang pwede nga dapiton nga motambong atol sa interbiyo. Ang mga lider kinahanglang maglikay sa tanang kahimtang nga tingali lainon sa pagsabot.

31.5

Pagtubag sa Pag-abuso

Samtang mag-interbiyo o magtambag sa usa ka tawo, ang lider sa pagkapari posible nga makahibalo sa mga panghitabo sa pag-abuso sa usa ka bata, kapikas, o sa laing tawo. Ang pag-abuso dili mahimong tugotan sa bisan unsa nga matang. Ang mga lagda alang sa pag-report ug pagtubag sa pag-abuso gihatag diha sa 38.6.2.1.

Alang sa impormasyon mahitungod sa pagtambag sa mga biktima sa lugos o sa ubang sekswal nga pag-ataki, tan-awa sa 38.6.18.2.