34.

Ol Faenens mo Ol Odit

34.0

Fas Toktok

Ol taeting mo ofring i mekem se Jos i save muvum wok blong God blong fasin sevem man mo fasin blong kam olsem god (luk long 1.2). Ol mane ia, oli tabu. Oli ripresentem sakrifaes mo fet blong ol memba blong Jos (luk long Mak 12:41–44).

Sam long ol samting we oli stap yusum taeting mo ofring long hem blong sapotem wok blong Lod i tekem tu ol samting ia:

• Stap bildim mo mentenem ol tempol, ol mitinghaos, mo ol nara bilding blong Jos.

• Stap sapotem ol aktiviti mo ol operesen blong Jos mo ol lokol kongregesen blong hem.

• Stap serem gospel truaot long wol.

• Stap sapotem ol program blong Jos, olsem edukesen mo famli histri.

• Stap givim kaekae, haos, mo ol narafala samting we i nidim blong gat blong ol pipol we oli stap long nid.

Ol stek presiden mo ol bisop oli gat tabu responsabiliti ia blong lukluk ova long ol mane blong Jos (luk long Doktrin mo Ol Kavenan 72:9–0). Ol mane ia, olgeta memba nomo we oli gat raet oli save yusum from ol wok blong Jos. Oli mas lukaotgud blong kaontem evriwan, mo blong protektem olgeta.

34.1

Stek Faenens Lidasip

34.1.1

Stek Presidensi

Stek presiden i gat olgeta responsabiliti ia blong ol faenens blong stek. Hem i givim sam long ol wok ia i go long ol kaonsela mo ol klak blong hem.

Stek presiden:

• Hem i givim insperesen long ol memba blong pem wan ful taeting mo blong oli givim ol gudfala ofring wetem bigfala hat (luk long 34.4).

• Hem i mekemsua se oli lukaotem gud mo kaontem gud evri mane blong stek (luk long 34.5).

• Hem i luklukbak long faenens stetmen blong evri manis mo i mekemsua se oli stretem eni problem we i stap kwiktaem.

• Hem i mekemsua se ol bisoprik, ol lida blong ol oganaesesen, mo ol klak oli lanem responsabiliti blong olgeta long saed blong ol tabu mane blong Jos.

• Hem i rere mo lukaot long yia bajet blong stek (luk long 34.6).

• Hem i mekemsua se oli folem gud ol gaedlaen blong serem bajet insaed long stek (luk long 34.6.2).

• Hem i kaonsel oltaem wetem wanwan bisop oltaem blong toktok raon long ol faenens blong wod.

• Hem i jekem se wanwan wod i kasem ol taeting mo mekem taeting dikleresen evri yia.

• Hem i mekemsua se oli neva serem ol paswod blong aksesem ol faenens sistem blong Jos.

• Hem i mekemsua se hem i oganaesem stek odit komiti mo komiti ia i stap wok gud (luk long 34.7.1).

• Hem i mas stap eni taem blong save ansarem ol kwestin long taem blong ol odit blong ol faenens rekod blong stek (luk long 34.7).

• Hem i luklukbak long ol odit blong ol faenens rekod blong stek mo wod, mo i mekemsua se oli stretem eni problem we i stap kwiktaem (luk long 34.7).

• Hem i mekemsua se stek mo ol wod oli folem gud evri loa long saed blong takis (luk long 34.8).

34.1.2

Ol Stek Klak

Stek presiden i givim wok long stek klak, o wan asisten stek klak blong help wetem wok blong kipim rekod blong faenens blong stek. Ol klak oli lukaotgud blong folem ol apdeit polisi blong mekem se oli putum ol mane blong Jos oli save sef oltaem, mo blong mekemsua we ol rekod blong Jos oli stret evriwan.

Klak i gat olgeta responsabiliti ia:

• Rekodem mo dipositim eni mane we oli kasem wetem wan memba blong stek presidensi.

• Hem i luklukbak long faenens stetmen evri manis mo i mekemsua se oli stretem eni problem we i stap kwiktaem.

• Hem i helpem stek presidensi blong rere long yia bajet blong stek (luk long 34.6.1 mo 34.6.2).

• Hem i jekem se wanwan wod i sendem ol yia taeting dikleresen ripot.

• Hem i tekpat long ol faenens odit we ol stek odita oli mekem, mo i tekem ol aksen blong stretem samting sapos i gat nid from (luk long 34.7).

• Hem i helpem ol bisoprik blong trenem ol wod klak.

Ol klak oli mas holem Melkesedek Prishud mo holem wan tempol rekomen we i laef. Blong gat moa infomesen blong singaotem ol stek klak, luk long 33.3.2 mo 33.3.3.

34.2

Wod Faenens Lidasip

34.2.1

Bisoprik

Bisop i gat olgeta responsabiliti ia long saed blong faenens blong wod. Hem i givim sam long ol wok ia i go long ol kaonsela mo ol klak blong hem.

Bisop:

• Hem i givim insperesen long ol memba blong pem wan ful taeting mo blong oli givim ol gudfala ofring wetem bigfala hat (luk long 34.4).

• Hem i mekemsua se oli lukaotem gud mo kaontem gud evri mane blong wod (luk long 34.5).

• Hem i luklukbak long faenens stetmen evri manis mo i mekemsua se oli stretem eni problem we i stap kwiktaem.

• Hem i mekemsua se ol lida blong ol oganaesesen mo ol klak oli lanem responsabiliti blong olgeta long saed blong ol tabu mane blong Jos.

• Hem i rere mo lukaot long yia bajet blong wod (luk long 34.6).

• Hem i mekemsua se oli folem gud ol gaedlaen blong serem bajet insaed long wod (luk long 34.6.2).

• Hem i mit wetem ol memba blong wod evri yia blong kasem taeting dikleresen blong olgeta.

• Hem i mekemsua se oli neva serem ol paswod blong aksesem ol faenens sistem blong Jos.

• Hem i mas stap eni taem blong save ansarem ol kwestin long taem blong ol odit blong ol faenens rekod blong wod mo i mekemsua se oli stretem eni problem we i stap kwiktaem (luk long 34.7).

34.2.2

Ol Wod Klak

Bisop i givim wok long wod klak, o wan asisten wod klak blong help wetem wok blong kipim rekod blong faenens blong stek. Ol klak oli lukaotgud blong folem ol apdeit polisi blong mekem se oli putum ol mane blong Jos oli save sef oltaem, mo blong mekemsua we ol rekod blong Jos oli stret evriwan.

Klak i gat olgeta responsabiliti ia:

• Rekodem mo dipositim eni mane we oli kasem wetem wan memba blong bisoprik.

• Hem i luklukbak long faenens stetmen evri manis mo i mekemsua se oli stretem eni problem we i stap kwiktaem.

• Hem i helpem bisoprik blong rere long yia bajet blong wod (luk long 34.6.1 mo 34.6.2).

• Hem i mekemsua se ol memba oli gat akses long ol stetmen blong kontribusen blong olgeta mo help olsem we i nid.

• Hem i helpem bisop blong rere mo rekodem ol taeting dikleresen.

• Hem i tekpat long ol faenens odit we ol stek odita oli mekem, mo i tekem ol aksen blong stretem samting sapos i gat nid from (luk long 34.7

Ol klak oli mas holem Melkesedek Prishud mo holem wan tempol rekomen we i laef. Blong gat moa infomesen blong singaotem ol wod klak, luk long 33.4.2 mo 33.4.3.

34.3

Ol Kontribusen

Ol lida blong Jos oli mas tijim ol memba long saed blong ol prinsipol blong taeting mo ol nara ofring, mo oli mas leftemap tingting blong ol memba blong laef folem olgeta prinsipol ia. Olgeta man mo woman we oli no memba blong Jos, oli save mekem ol kontribusen tu. Be, ol memba blong Jos nomo oli save pem taeting.

Oli leftemap tingting blong ol memba blong mekem ol kontribusen blong olgeta onlaen taem i posibol (luk long donations.ChurchofJesusChrist.org). Ol memba oli save givim taeting blong olgeta wetem wan fom we oli fulumap blong Taeting mo Ol Narafala Ofring, i go long bisop o wan long ol kaonsela blong hem (luk long 34.5.2 Sapos wan memba i yusum wan jek, oli mas mekem ol jek i kam long nem blong Jos Ia blong Jisas Kraes Ia blong Ol Lata-dei Sent.

34.3.1

Taeting

Taeting i wan donesen i go long Jos blong God, we i wan aot long ten long mane we wan man i kasem (luk long Doktrin mo Ol Kavenan 119:3–4; intres i minim mane we oli kasem). Evri memba we oli gat wan salari, o oli winim mane, oli mas pem taeting.

Ol kavenan pipol blong Lod oli bin laef folem loa blong taeting stat long ol olfala taem bifo (luk long Jenesis 14:18–20; Levitikas 27:30–32). Lod i bin talem, “Ol pipol blong mi oli pem taeting … mo hemia bae i wan loa we bae i stap blong oli folem blong oltaem” (Doktrin mo Ol Kavenan 119:3–4).

Ol taeting oli tabu long Lod, mo ol memba oli givim ona long Hem taem oli pem taeting. Hemia i wan fasin blong soem fet long God mo ol promes blong Hem. Olgeta we oli pem taeting oli kasem promes ia long Lod: “Sipos yufala i mekem olsem, bambae yufala i luk paoa blong mi, we bambae mi openem skae, mi letem olgeta gudgudfala samting i kam long yufala we i plante we i plante” (Malakae 3:10).

34.3.1.1

Yus blong Mane blong Taeting

Oltaem oli stap yusum ol taeting donesen blong ol stamba tingting blong Lod, folem daereksen blong Kaonsel we i Lukaotem Mane blong Taeting (luk long Doktrin mo Ol Kavenan 120). Sam long ol stamba tingting ia oli talemaot long 34.0.

34.3.1.2

Taeting Dikleresen

Bisop i mit wetem wanwan memba long ol las las manis blong evri yia blong kasem taeting dikleresen blong olgeta. Long ol situesen we i no stap hapen tumas taem bisop i no stap, stek presiden i save givim raet long wan long ol kaonsela blong bisop blong mekem responsabiliti ia.

Oli invaetem evri memba blong mit wetem bisop blong:

• Diklerem long bisop sapos hem i stap pem wan ful taeting.

• Mekemsua se ol rekod blong kontribusen blong olgeta oli stret.

Long eni taem we i posibol, evri memba blong wan famli we i tekem ol pikinini tu, oli sapos blong go long intaviu ia tugeta.

Long taem blong ol taeting dikleresen, bisop i soem tangkyu long ol memba from fasin blong olgeta blong stap fetful. Hem i tijim tu prinsipol blong taeting, leftemap tingting blong olgeta blong givim wan gudfala fas ofring donesen wetem bigfala hat, mo toktok raon long ol nara mata we i nid.

Ol instraksen blong taeting dikleresen i kam long ol hedkwota blong Jos, o eria ofis we i lukaotem ples ia.

34.3.2

Ol Fas Ofring

Ol lida blong Jos oli leftemap tingting blong ol memba blong stap laef folem loa blong livim kakae. Hemia i tekem tu blong stap givim wan gudfala amaon blong mane i go long fast ofring (luk long 22.2.2).

Long samfala wod, bisop i save givim raet blong olgeta we oli holem Aronik Prishud blong oli kolektem ol fast ofring. Taem hem i mekem desisen ia, bisop i tingting long namba blong olgeta we oli holem Aronik Prishud i stap, we oli fri, sefti blong olgeta, mo blesing blong ol memba we bae oli no save givim samting long nara wei.

Olgeta we oli holem prishud ia, oli go tutu taem oli go tekem ol fas ofring. Oli givim ol fast ofring kwiktaem i go long wan memba blong bisoprik.

Ol memba oli no mas givim ol nara kontribusen, olsem taeting, long olgeta we oli stap karem ol fast ofring.

Ol gaedlaen blong fasin blong yusum ol fast ofring, oli stap long 22.5.2

34.3.3

Mane Basket blong Ol Misinari

Ol kontribusen i go long wod misinari fand, oli yusum nomo blong mitim ol kimitmen we ol fultaem misinari blong wod oli stap givim. Ol mane we i ova insaed long wan wod, oli save yusum blong lukluk long ol komitmen blong ol nara misinari insaed long stek. Ol mane we i ova insaed long wan stek, oli save yusum blong ol nara stek insaed long kodineting kaonsel olsem we Eria Seventi we i prisaed ova long kaonsel, i daerektem.

Ol wod misinari fand, oli no mas sendem i go stret long wanwan misinari. Mo oli no save yusum ol mane ia long eni aktiviti blong ol misinari insaed long wod o long stek.

Ol kontribusen i go long Jeneral Misinari Fand, Jos i stap yusum blong lukluk long evri misinari wok.

Ol stek presiden mo ol bisop oli mas sendem ol misinari fand, we oli ova long stret amaon blong stek mo wod, i go long Jeneral Misinari Fand long ol hedkwota blong Jos, o long eria ofis.

Blong gat moa infomesen abaot ol basket mane blong ol misinari mo fasin blong givim mane blong go long wan misin seves, luk long 24.3.4.

34.3.4

Sam Moa Kontribusen

Ol memba oli save kontribiut long saed blong faenens long sam moa grup ia we oli apruvum. Sapos ol man we i stap givim mane i stap yusum fom blong Taeting mo Ol Nara Ofring, bae oli raetem nem blong grup ia long seksen blong “Ol Nara Samting” long fom.

Ol stek mo wod oli no mas putumap ol grup long seksen blong “Ol Nara Samting” blong askem, kolektem o spendem mane from ol projek we Eria Presidensi i no apruvum. Blong wan lis blong ol grup we oli apruvum, ol memba oli mas kontaktem wod klak.

34.3.5

Ol Filantropi

Ol Filantropi blong Jos Ia blong Jisas Kraes blong Ol Lata-dei Sent i wan dipatmen blong Ofis blong Prisaeding Bisoprik. Dipatmen ia kodinetem mo i lukluk long ol volontia filantropi kontribusen i go long Jos mo ol jareti mo aktiviti we i joen wetem Jos, we i no taeting o ol narafala ofring. Blong kasem sam help blong givim ol kontribusen, wan i save kasem taem hem i kontaktem ofis blong Ol Filantropi:

Ol Filantropi

1450 North University Avenue

Provo, UT 84604-6080

Telefon: [phone] o 1-800-525-8074

Imel: [e-mail]

34.3.6

Donesen wetem Samting, i Tekem Taeting Tu

Plante taem Jos i no leftemap tingting blong mekem ol kontribusen blong ol samting (we i no mane) olsem taeting mo ol narafala ofring. Hem i moa gud blong ol memba oli salem ol samting ia olgetawan, mo afta, oli pem taeting mo ol nara donesen long mane. Be, oli save akseptem ol donesen blong ol samting long samfala kes nomo. Ol donesen olsem i save kam wan nomol praktis long sam pat blong wol.

Jos i akseptem (1) ol stok, ol bond, mo ol nara sekiuriti donesen we oli save salem kwik, mo (2) sam propeti we oli save salem. Ol memba oli sapos blong imelem [e-mail] blong gat moa instraksen long olsem wanem blong yusum ol samting we oli givim olsem donesen. Sapos ol memba oli wantem kontribiut long ol narafala aetem, stek presiden i kontaktem ol hedkwota blong Jos o eria ofis blong askem raet bifo hem i givim raet long bisop blong akseptem ol samting ia.

Ol risit we oli mekem i go long ol memba we oli givim samting olsem donesen oli kam nomo long hedkwota blong Jos, o oli kam long eria ofis.

34.3.7

Oli No Save Givimbak Ol Kontribusen

Taem we oli givim ol taeting mo ol nara ofring i go long Jos, oli blong Lod nao. Oli givim i go long Hem. Evri kontribusen olsem oli ol ofring we oli givim long fri tingting mo hat. Oli givim mo no gat wan tingting i stap biaen long hem, mo no gat raet blong holemtaet o kontrolem, o onem long eni wei, o i no ting se bae hem i kasem wan samting aot long hem, be bae i kasem ol blesing blong Lod nomo.

Ol stek presiden mo ol bisop oli mas givim infomesen long olgeta we oli givim ol taeting mo ol nara ofring, se ol kontribusen ia, oli no save givimbak long olgeta. Oli no save givimbak tu basket mane blong ol misinari we oli pem bifo misinari i go long misin.

34.4

Taeting mo Ol Narafala Ofring Oli Konfidensiol

Amaon blong taeting mo ol nara ofring we wan i stap pem, hem i konfidensiol. Bisop nomo mo olgeta we oli gat raet blong handelem mo luk ol kaen kontribusen olsem oli sapos blong gat akses long infomesen ia. Ol stek presidensi, ol bisoprik, mo ol klak oli mas neva tokbaot sapos wan memba i stap pem wan ful taeting o no, long wan wei we i no stret. Oli mas neva tokbaot tu amaon blong taeting o ol narafala ofring we oli stap kasem.

34.5

Stap Handelem Mane blong Jos

Stek presiden mo bisop oli mekemsua se evri mane blong Jos, oli handelem long wan stret wei. Hemia i wan tabu responsabiliti long koling blong olgeta. Ol jeneral prinsipol oli putumaot i stap long ol seksen ia. Oli leftemap tingting blong ol bisop mo ol klak blong luklukbak long vidio ia “Ol Tabu Mane, Ol Tabu Responsabiliti” wan taem o moa evri yia.

34.5.1

Kompanionsip Prinsipol

Kompanionsip prinsipol i nidim tu man—wan memba blong bisoprik mo wan klak, o tu memba blong bisoprik—blong oli stap mo rekodem mo givimaot ol mane blong Jos. Prinsipol ia i impoten tumas blong kipim ol tabu mane i stap sef mo protektem ol lida blong Jos.

Ol lida oli mas protektem mo neva serem paswod blong olgeta (luk long 33.9.1.1).

34.5.2

Taeting mo Ol Narafala Ofring

Lod i givim long ol bisop, tabu tras o wok ia blong kasem mo kaontem ol taeting mo ol nara ofring blong olgeta Sent (luk long Doktrin mo Ol Kavenan 42:30–33; 119). Bisop mo tufala kaonsela blong hem nomo, oli save kasem ol taeting mo ol nara ofring. I no mas gat wan taem nating we ol waef blong olgeta, ol nara memba blong famli blong olgeta, ol klak, o ol nara memba blong wod oli risivim ol kontribusen ia. Wan taem ia nomo we oli gat raet blong no folem rul, i taem wan we i holem Aronik Prishud i kasem wok ia blong kolektem ol fast ofring (luk long 34.3.2).

Ol lida blong Jos mo ol memba oli no mas lego ol donesen i stap mo no lukluk long hem.

34.5.3

Jekem mo Rekodem Taeting mo Ol Narafala Ofring

Oli mas jekem mo rekodem ol kontribusen long semmak Sandei we oli kasem olgeta. Wan memba blong bisoprik mo wan klak, o tu memba blong bisoprik, oli openem wanwan envlop tugeta. Tufala i jekem se ol mane ia we oli stap insaed oli semfala amaon we oli raetem long fom blong Taeting mo Ol Narafala Ofring. Tufala i rekodem wanwan donesen long stret wei. Sapos ol mane ia mo amaon we oli raetem i defren, oli mas kontaktem hem we i mekem donesen kwiktaem, blong stretem wanem we i stap.

34.5.4

Dipositim Taeting mo Ol Narafala Ofring

Oli mas rere long wan diposit afta we oli mekemsua se ol amaon we oli rekodem i semmak long mane we oli kasem.

Long ol ples we i gat wan 24 aoa bank diposit sistem we i open i stap, bisoprik memba wetem wan narawan we i holem Melkesedek Prishud, i dipositim ol mane ia long bank long sem dei ia we oli openem mo jekem ol mane ia.

Long ol ples we i no gat wan 24 aoa bank diposit sistem we i open i stap, mo bank i klos long Sandei, bisop i jusum wan we i holem Melkesedek Prishud, blong mekem diposit ia long bank long nekis bisnis dei. Plante taem, man ia i mas wan memba blong bisoprik. Hem i akaontebol long ol mane ia. Hem i mas:

• Mekemsua se, ol mane ia, oli putum i stap long wan ples we i sef gud, kasem taem oli dipositim.

• Karem wan diposit risit we i soem deit mo amaon blong diposit.

Antap long hemia, wan memba blong bisoprik mo wan klak, o tu memba blong bisoprik, oli mas finisim wok ia long nekis Sandei bifo oli gohed wetem eni donesen blong dei ia:

• Komperem risit blong diposit wetem ol rekod blong las wik blong jekem se amaon we oli dipositim i stret.

• Saenem risit blong diposit mo putum i stap gud wetem donesen infomesen blong las wik.

34.5.5

Kipim Mane blong Jos long Sef Ples

Ol memba we oli responsibol blong lukaotem ol mane blong Jos, oli neva mas livim olgeta i stap long mitinghaos ovanaet, o oli neva mas livim olgeta mane ia i stap we i no gat man i lukaot long eni taem, olsem long ol taem blong ol miting mo ol aktiviti.

34.5.6

Ol Donesen Stetmen

Ol Dona Stetmen blong Ol Kontribusen i stap blong evri memba long donations.ChurchofJesusChrist.org. Ol lida oli mas leftemap tingting blong ol memba blong stap luklukbak long ol dona stetmen blong olgeta oltaem. Taem i gat, ol ofisol takis stetmen tu oli stap long donations.ChurchofJesusChrist.org, we i kam long lokol yunit, o eria ofis.

34.5.7

Manejem Ol Peimen blong Stek mo Wod

Evri mane blong ol stek, oli manejem insaed long ol faenens sistem blong Jos. Stek presiden i manejem ol faenens blong stek. Ol kaonsela blong hem mo ol klak oli save helpem hem. Kaonsela we i stap olsem jeaman blong stek odit komiti, plante taem bae i no stap insaed long wok blong lukaotem o kipim rekod blong faenens blong stek.

Evri mane blong stek, oli manejem insaed long ol faenens sistem blong Jos. Bisop i manejem ol faenens blong wod. Ol kaonsela blong hem mo ol klak oli save helpem hem.

Plante taem oli mekem ol peimen tru long lektronik transfea blong mane o tru long jek. Long sam eria, oli apruvum ol yunit blong yusum ol bank kad.

I no gat wan mane blong stek o wod we oli save spendem o pem, sapos i no gat raet blong prisaeding ofisa.

Tu lida we oli kasem raet, oli mas apruvum wanwan peimen. Wan long tufala i mas wan memba blong stek presidensi o bisoprik. Nomata we ol kaonsela oli gat raet blong apruvum ol peimen, stek presiden o bisop i mas luklukbak long wanwan peimen. Ol lida oli no mas apruvum ol peimen we i gobak long olgetawan.

I nid blong gat apruvol long raeting, we i kam long stek presiden, bifo wan bisop i save yusum fas ofring, o bifo hem i apruvum wan oda blong bisop we i stap long nem blong hemwan o famli blong hem. I nid blong gat apruvol long raeting, we i kam long wan memba blong Eria Presidensi, bifo wan bisop i save yusum fas ofring, o blong apruvum oda blong bisop blong stek presiden o famli blong hem. Luk long 22.5.1.2 blong luk ol gaedlaen.

Wan memba we i stap askem blong oli givimbak mane blong hemwan i mas givim eni kopi blong pepa o lektronik risit o invoes. Hem i mas putum tu stamba tingting, amaon mo deit we hem i mekem peimen.

Sapos oli givim ol mane fastaem, memba i mas givim wan peimen rikwes fom, we i talemaot stamba tingting, amaon mo deit. Afta we oli pem ol samting blong pem, memba ia i mas (1) givim ol risit o invoes blong ol mane we oli spendem, mo (2) i mas givimbak ol mane we hem i no spendem. Ol mane we oli no spendem, oli mas dipositim bakegen long bank.

Ol lida we oli gat raet mo ol klak oli no mas apruvum ol peimen taem oli no lukluk gud bakegen ol samting we oli spendem mane long hem wetem ol risit mo invoes.

Ol stek mo wod oli no save openem ol bank akaon blong olgetawan o holemtaet wan peti kas mane.

34.5.7.1

Ol Lektronik Peimen

Sapos stek o wod i yusum ol lektronik peimen, oli leftemap tingting blong ol memba blong oli putum ol bank akaon ditel blong olgetawan insaed long seksen blong Expense Reimbursement Account we i stap andanit long Settings long Online Donations long donations.ChurchofJesusChrist.org. Wod o stek i no mas kipim ol kopi blong pepa o lektronik bank akaon infomesen ditel blong ol memba.

34.5.7.2

Ol Jek

Sapos stek o wod i stap yusum ol jek, oli no mas saenem wan jek kasem taem oli fulumap jek ia fulwan. Ol jekbuk mo ol jek we oli waet i stap, oli mas putum gud olgeta insaed long wan fael o kabinet we i lok i stap. Oli no mas lego ol samting ia oli stap olbaot taem we oli no lokem olgeta long wan sef ples. Sapos i gat eni waet jek we oli go lus, stek presiden o bisop i ripotem ol namba blong ol jek ia i go long hedkwota blong Jos o eria ofis.

34.5.7.3

Ol Peimen Kad

Sapos stek o wod i yusum ol peimen kad blong pem ol samting blong lokol yunit, oli save yusum blong pem ol samting stret long taem ia o blong karemaot mane. Ol samting we oli pem long kad mo kas we oli karemaot long kad, bae i kamaot otomatik long ol faenens sistem blong Jos. Evri samting we oli yusum kad ia blong mekem peimen, oli mas rekodem kwiktaem. Sapos oli no rekodem ol samting we oli yusum kad long hem, bae oli save stopem kad.

Evri balens blong peimen kad i mas kasem siro wan taem long evri yia.

34.5.8

Ol Kas Bokis

Eria ofis i givim ol stret gaedlaen blong ol yunit we oli no gat akses long wan bank akaon we Jos i givim.

34.5.9

Holem Ol Faenens Rekod

Wanwan stek mo wod i mas holem i apdeit i stap, wan stret rekod blong faenens. Ol rekod ia, i helpem ol stek presiden mo ol bisop blong kaontem, o stap akaontebol, mo protektem ol tabu mane blong Jos. I nidim tu blong gat ol stret rekod blong:

• Mekem rere ol bajet.

• Manejem hamas mane we bae oli kasem long wan bajet.

• Givim infomesen long ol memba abaot kontribusen blong olgeta long saed blong faenens.

• Stap ansa long ol odit.

Blong gat infomesen abaot fasin blong yusum mo holemtaet ol rekod mo ol ripot, ol klak oli mas gobak long ol instraksen we i kam long ol hedkwota blong Jos, o long eria ofis. Ol faenens rekod, oli mas holemtaet olgeta blong wan taem blong tri yia, plas yia we i stap gohed. Maet ol lokol loa oli askem blong oli mas holemtaet ol rekod ia i longtaem moa.

34.6

Bajet mo Mane we Oli Spendem

Bajet mane program i givim ol jeneral mane blong Jos blong pem wanem i nid blong pem blong ol aktiviti mo ol program blong ol stek mo ol wod. Program ia i karemaot nid blong kasem ol bajet kontribusen we i kam long ol memba. Fetful peimen blong ol taeting i mekem se i gat bajet mane blong serem i go.

Sapos i nid, ol lida oli mas daonem mo mekem ol aktiviti oli simpol, blong i fit, i inaf long mane we oli kasem. Plante long ol aktiviti, oli mas ol simpolwan mo oli gat smol mane nomo, o nogat mane blong spendem.

34.6.1

Ol Bajet blong Stek mo Wod

Evri stek mo wod oli rere mo wok wetem wan yia bajet. Stek presiden i manejem bajet blong stek, mo bisop i manejem bajet blong wod. Oli save givim wok long wan kaonsela blong lukaotem bajet anda long daereksen blong olgeta. Oli save givim wok tu long wan klak blong help blong rere mo jekem bajet.

Ol stek presidensi mo ol bisoprik oli stat blong rere long bajet blong olgeta longtaem bifo stat blong wanwan yia. Ol gaedlaen oli stap long lis andanit ia:

• Luklukbak long ol amaon we oli bin spendem long yia bifo blong mekemsua se ol ol mane we oli spendem evri yia, oli teknot long olgeta.

• Oli askem ol oganaesesen blong oli skelem bajet nid blong olgeta long ditel.

• Putum tugeta bajet mo yusum ol praktis blong ol bajet we oli apruvum. Ol bajet oli mas mekemsua se ol mane blong spendem long fiuja i no ova long mane we oli ting blong kasem olsem pat blong bajet blong olgeta.

Ol tul we i stap tu insaed long ol faenens sistem blong Jos, oli mas yusum taem i gat i stap.

34.6.2

Bajet Mane

34.6.2.1

Serem Mane blong Bajet

Ol mane blong bajet oli stap seremaot long evri kwota folem atendens blong ol defren seksen ia:

• Sakramen miting

• Ol Yang Man

• Ol yang woman

• Ol praemeri pikinini, 7–10 yia

• Ol Yang Singgel Adalt

Hem i impoten blong ripotem atendens long stret wei mo long stret taem (luk long 33.5.1.1).

Bifo oli serem mane blong wanwan kwota, stek presiden i kasem infomesen long amaon we bae oli seremaot. Afta bae hem i talemaot hamas mane aot long basket ia bae i go long ol wod. Hem i wok wetem ol bisop long wan fasin we i wan, blong mekemsua se stek mo ol wod oli kasem inaf mane mo i stret. Sapos i gat sam jenis we oli no luk se bae i hapen, we i wan gud risen blong jenisim orijinol bajet, stek presiden i mekemsua se ol jenis ia oli stret, mo i mekem ol jenis ia.

Bisop i lukluk ova long hamas mane blong bajet oli givim i kam long wod blong hem. Hem i mekemsua se ol oganaesesen insaed long ol wod oli gat inaf mane mo i stret.

Ol prishud lida oli mekemsua se hamas bajet we oli kasem mo ol aktiviti blong ol yang man mo ol yang woman oli inaf mo oli stret mo ol mane blong ol pikinini long Praemeri hem i inaf.

34.6.2.2

Yusum Bajet long Stret Wei

Ol stek presiden mo ol bisop oli mekemsua se mane we oli serem, oli spendem wetem waes. Oli mas yusum ol mane ia blong blesem ol pipol, mo mekem ol stamba tingting blong gospel oli hapen. Ol lida oli mekemsua se evri mane we oli spendem, oli fit insaed long bajet.

Ol mane blong stek mo wod oli mas yusum olgeta blong pem spending blong evri aktiviti, program, lesenbuk, mo saplae. Ol memba oli no stap pem blong save tekpat long ol aktiviti. Mo tu, oli no sapos blong karem ol tul, ol saplae, o pem rent o admisen fi, o ol transpot blong go longwe, wetem mane blong olgetawan nomo. Ol memba oli save karem kaekae i kam, sapos i no hevi long olgeta (luk long 20.6.1).

Ol memba we oli wantem givim sam mane i go long Jos, oli no save talem se i blong bajet blong stek, o blong wod. Be, ol lida oli leftemap tingting blong olgeta blong givim mane long fast ofring, ol misinari mane basket, yumaniterian help o ol nara donesen seksen we oli givim raet from.

Folem ol gaedlaen we i stap naoia, ol samting blong pem blong bildim ol bilding, lukaotem ol bilding, telefon, ol bil, kompiuta, mo travel blong prishud lida, oli pem ol samting ia aot long mane blong Jos.

34.6.2.3

Bajet We I Ova

Ol mane blong bajet we i ova, oli no mas spenem. Ol mane blong wod we oli no spendem, oli sendem i gobak long stek. Ol mane blong stek we oli no spendem, oli sendem i gobak long Jos.

Wan taem nomo we oli gat raet blong no folem rul, i we, taem ol stek mo ol wod oli wantem holemtaet mane we oli no spendem sapos oli nidim ol mane ia blong sam spesifik aktiviti we oli plan from long nekis yia, olsem wan yut konfrens. Be, ol bigfala pat blong stek o wod bajet ia, oli no save holemtaet long wan yia i go kasem nekis yia.

34.6.3

Givim Mane from Ol Spesel Aktiviti mo Ol Tul blong Yusum

34.6.3.1

Ol Stek mo Maltistek Aktiviti

Oli leftemap tingting blong ol lokol lida blong oli holem ol stek mo maltistek aktiviti we i givim ol janis blong developem yuniti mo frensip, speseli long medel blong ol yut mo ol yang singgel adalt. Ol lida oli meksua se oli putum bajet we i gat inaf mane blong sapotem wan stret namba blong stek mo maltistek aktiviti.

Mane blong yusum long ol maltistek aktiviti ia oli kam long ol mane blong bajet blong olgeta stek we oli tekpat long aktiviti. Mane blong ol aktiviti, oli save kam long ol bajet blong eria, o blong Jos hedkwota taem oli apruvum.

34.6.3.2

Ol Spesel Aktiviti mo Ol Tul blong Yusum

Blong gat moa infomesen abaot ol spesel aktiviti mo tul, luk long japta 20.

34.7

Ol Odit

34.7.1

Stek Odit Komiti

Stek presiden i jusum wan long stek odit komiti. Komiti i mekemsua se ol faenens blong stek mo wod oli handelem folem polisi blong Jos. Komiti ia, i gat wan long ol kaonsela blong stek presiden olsem jeaman, mo tu nara memba blong stek we oli andastanem ol samting long saed blong faenens, o oli save trenem olgeta long saed blong faenens. Ol brata o sista ia, oli mas gat ol tempol rekomen we oli laef i stap.

Kaonsela we i stap olsem jeaman, plante taem bae hem i no apruvum ol peimen o i no stap insaed long wok blong lukaotem o kipim rekod blong faenens blong stek.

Ol memba blong komiti oli no mas stap olsem ol stek odita. Mo tu, oli no sapos blong lukaotem o kipim ol rekod blong faenens blong stek.

34.7.2

Ol Stek Odita

Stek presiden o wan long ol kaonsela blong hem, we i jeaman blong stek odit komiti, i singaotem tu (2) stek odita. Ol brata o sista ia, oli mas gat ol tempol rekomen we oli laef i stap. Sapos i posibol, oli mas gat eksperiens long wok blong akaonting o odit. Bae stek presidensi mo hae kaonsel oli mas apruvum nem blong olgeta. Be, oli no sastenem olgeta. Stek presiden nao i talemaot sapos bae oli set apat long olgeta.

Ol hae kaonsela oli save stap tu olsem ol stek odita. Be, klak blong stek o ol asisten stek klak, oli no save singaotem olgeta olsem ol odita. Olgeta we oli givim seves olsem ol odita, oli save holem ol nara koling tu.

34.7.3

Faenens Odit

Ol stek odita oli mekem odit blong ol faenens rekod blong stek, blong ol wod mo blong ol FamilySearch senta, tu taem long wan yia. Oli save mekem odit tu blong ol faenens rekod blong ol propeti we oli stap blong yusum olsem ol ples blong pleiplei, wan taem long wan yia. Hemia ol janis blong leftemap tingting, sapotem, mo stap trenem olgeta we oli bin singaotem olgeta wetem kaen fasin, blong handelem ol mane blong Jos blong Lod.

Ol odita oli mekemsua se:

• Oli rekodem taeting mo ol narafala kontribusen long stret wei.

• Ol mane blong Jos oli yusum long stret wei, oli kaontem evriwan, mo oli protektem.

• Ol faenens rekod oli fulwan mo stret.

Prisaeding ofisa blong yunit, mo klak we i gat wok blong lukaot long ol faenens, tufala i mas stap blong stap ansarem ol kwestin blong ol odit.

Stek presiden mo stek odit komiti oli luklukbak long evri odit. Afta we oli luklukbak, jeaman blong stek odit komiti mo stek presiden, oli saenem ol odit. Oli save saenem mo sendem ol odit bifo oli stretem evri eksepsen. Stek presiden mo stek odit komiti oli meksua se evri taem oli mas stretem eni eksepsen long odit, long stret fasin.

34.7.4

Ol Eria Odita mo Ol Asisten Eria Odita

Eria Presidensi i folem ol gaedlaen insaed long Gaed long Eria Odit Program taem oli singaotem wan eria odita o wan asisten eria odita.

34.7.5

Lus, Stil, Fasin blong Karem o No Yusum Gud Mane blong Jos

Oli mas talemaot kwiktaem long stek presiden o jeaman blong stek odit komiti sapos:

• Oli bin lusum o stilim ol mane blong Jos.

• Wan lida i no bin stil o no yusum gud mane blong Jos.

Stek presiden o jeaman blong stek odit komiti i talemaot long Jos Odit Dipatmen. Hem i talemaot long eria kontrola sapos yunit ia i stap aotsaed long Yunaeted Stet mo Kanada.

Jos Odit Dipatmen (o eria kontrola) i sendem wan ripot fom blong mane we i lus i go long stek presiden, o jeaman blong odit komiti. Anda long daereksen blong Jos Odit Dipatmen ( o eria kontrola), stek presiden o jeaman blong odit komiti i mekemsua se oli investigetem gud problem ia. Hem i mekemsua tu se oli fulumap lus fom mo sendem i go.

Afta we oli finis blong lukluk long problem ia, sapos Jos Odit Dipatmen i talemaot se wan lida o wokman blong Jos i bin stilim mane o propeti blong Jos, bae oli mas lukluk blong tekem aksen long membasip blong man ia. Ol gaedlaen oli stap insaed long 32.6.3.3.

Sapos oli faenem se i gat wan bigfala misyus blong ol mane, nao stek presiden o jeaman blong odit komiti i talem tu long Eria Presidensi.

34.7.6

Stek Klak, o Asisten Stek Klak we I Lukaot long Faenens

Stek odit komiti i save givim wok long stek klak o asisten stek klak we oli givim wok long hem long saed blong faenens, blong givim instraksen long ol wod lida abaot ol stret polisi long saed blong faenens. Hem i givim instraksen tu long olgeta abaot ol wei blong wok we i go wetem ol eksepsen we odit i mekem.

34.7.7

Blong Kasem Moa Infomesen

Blong gat moa infomesen long saed blong ol odit komiti, ol odita mo ol fasin blong i stap long ol odit, luk long Help Center long ChurchofJesusChrist.org. Stek odit komiti mo ol odita, oli save sendem ol kwestin blong olgeta long asisten eria odita.

34.8

Ol Takis

Takis infomesen insaed long seksen ia, i blong olgeta nomo we oli stap long Yunaeted Stet mo Kanada. Sapos ol prishud lida insaed long Yunaeted Stet mo Kanada oli nidim moa infomesen, oli mas kontaktem Takis Administresen Seksen:

Tax Administration

50 East North Temple Street, Room 2276

Salt Lake City, UT 84150-0022

Telefon: [phone] o 1-800-453-3860, ekstensen 2-4405

Ol prishud lida aotsaed long Yunaeted Stet mo Kanada oli kontaktem eria ofis blong i ansarem ol kwestin long saed blong ol takis.

34.8.1

Raet blong Fri long Takis

Plante taem, Jos i no pem ol takis blong ol samting we hem i salem, ol propeti, ol salari, mo ol nara takis, from se hem i wan oganaesesen blong relijin. Ol bilding blong Jos mo ol nara propeti, oli yusum from stamba tingting ia blong wosip, tijing blong relijin, mo ol nara aktiviti blong Jos. Ol lida blong stek mo ol wod oli mekemsua se ol bilding blong Jos, oli no yusum blong ol samting olsem politik, bisnis, o invesmen olsem we i stap long ol eksampol insaed long 35.5.6.1 mo 35.5.6.3. Blong mekem olsem, bae i agensem ol loa we i letem blong Jos i no pem takis long ol propeti blong Jos.

Hem i impoten blong ol lida blong stek mo wod oli folem ol gaedlaen ia blong holemtaet rod blong Jos i fri mo i no pem ol takis. Sapos wan stek o wan wod i no yusum gud rod ia blong Jos i no pem ol takis, bae i save spolem tu ol nara yunit blong Jos.

34.8.2

Salem Samting mo Yusum Takis

Ol loa blong fasin blong salem samting mo yusum ol takis, mo olsem wanem Jos i benefit long hem, oli defren folem ol kantri mo ol stet. Ol lida oli kontaktem Jos Takis Administresen Seksen, o administresen ofis blong luk sapos Jos i no pem takis, o i mas pem ol takis.

34.8.3

Propeti Takis

Jos Takis Administresen Seksen i sendem evri rikwes blong no pem takis long evri propeti, mo i pem ol takis we i nid blong pem. Ol lokol lida oli no nid blong lukluk long hemia.