35.

Fale ma Fanua

35.1

Faamoemoega

E faatau e le Ekalesia ia fanua ma saunia fale ina ia maua ai e tagata o le Ekalesia ia nofoaga e mafai ai ona latou tapuai, a’oa’o atu, a’oa’o mai, tatalo faatasi, osia ma faafou feagaiga, ma maua sauniga paia. O fale taitasi o le Ekalesia e tatau ona (1) maua ai se faatulagaga faaleagaga mo tagata o le au paia e tapuai ai ma (2) tuuina atu ai se foliga lelei o le faaaloalo ma le migao i totonu o le afioaga.

35.2

Faalapotopotoga

35.2.1

Matagaluega o Falelotu

I lalo o le taitaiga a le Au Epikopo Pulefaamalumalu, e faia ai e le Matagaluega o Fale ma Fanua ia aiaiga faavae ma faiga faavae o le faatinoga, lea e fesoasoani i le sauniaina o fale e faaaogaina e tagata o le Ekalesia i le lalolagi atoa.

35.2.2

Ofisa o Eria

O Au Peresitene o Eria ma faatonusili mo mataupu faaletino e nafa ma le faatauina ma le faagaoioia o meatotino a le Ekalesia. O nei meatotino e aofia ai falelotu, inisitituti o mataupu faalelotu, fale ma ofisa o le misiona, faagaoioiga o le uelefea, ma isi.

O le aufaigaluega o fale ma fanua i le lotoifale e galulue i lalo o le taitaiga a le faatonusili mo mataupu faaletino.

35.2.3

Au Peresitene o le Siteki

O uso o le au peresitene o le siteki e tatau ona latou mautinoa o loo faaaogaina ma le tatau, ma tausia, ma puipuia ia meatotino a le Ekalesia. Latou te a’oa’oina taitai ma tagata o le au paia i o latou tiutetauave mo le faaaogaina ma le tausiga o nei meatotino. Latou te tofia se fautua maualuga e avea ma sui o le siteki mo fale ma fanua. Latou te fono ma ia pe a manaomia e iloiloa mea e manaomia ma galuega faatino.

35.2.4

Sui o le Siteki mo Fale ma Fanua

O le sui o le siteki mo fale ma fanua (o se fautua maualuga) e fesoasoani i le au peresitene o le siteki i mataupu tau i fale ma fanua e pei o nei:

• E fesoasoani o ia e a’oa’o ma faatulaga le faaaogaina ma le tausiga o falelotu.

• Na te faamaopoopoina le tufatufaina atu ma le puleaina o ki.

• Na te faamaopoopoina le a’oa’oina o sui o uarota mo falelotu i o latou tiute.

• E auai o ia i asiasiga faaletausaga o fale e faatautaia e le pulega o fale, se’i vagana ua tofia e le au peresitene o le siteki se isi e auai atu i ai.

35.2.5

Epikopo e Vaaia le Falelotu

Afai e sili atu ma le tasi le uarota e lolotu i se falelotu, e tofi e le au peresitene o le siteki se epikopo e toatasi e avea ma epikopo e vaaia le falelotu. Na te faamaopoopoina ia tofiga mo le auai o tagata o le au paia i le tausiga ma le faaleleia o le falelotu. Na te faamaopoopoina foi ia auala mo le saogalemu ma le malupuipuia o le falelotu. E le gata i lea, na te faamaopoopoina le faatulagaina o le fale faatasi ma le siteki ma isi uarota o loo faaaogaina, e ui e mafai ona ia tofia se isi tagata e faia le faatulagaga.

35.2.6

Au Epikopo

O uso o le au epikopo e nafa ma le faaaogaina, tausiga, ma le malupuipuia o le falelotu. Latou te a’oa’oina tagata o le uarota i le auala e faaaoga ma tausia ai. Latou te faatulagaina le auai o tagata o le au paia i le tausiga ma le faaleleia o le falelotu, i le faia lea o tofiga e pei ona manaomia ai. Latou te tufatufaina foi ki o le falelotu.

Ia mautinoa e uso o le au epikopo o loo faia ia lapataiga e tatau ai mo le saogalemu i totonu o le falelotu ma le lotoa (tagai i le 35.3.5).

35.2.7

Sui o le Uarota mo le Falelotu

E tatau ona tofu uarota taitasi ma se sui o le uarota mo le falelotu. E mafai ona tofi e le epikopo se tasi o le au epikopo e galue ai i lenei tofiga, pe valaauina foi e le au epikopo se isi tagata o le au paia na te faia.

O le sui o le uarota mo le falelotu e fesoasoani i le au epikopo i tiutetauave mo le falelotu e pei o le faasaoina o le eletise, saogalemu, malupuipuia, aveeseina o le kiona (pe a tatau ai), ma le auai o tagata o le au paia i le faamamaina ma le faaleleia. Na te taulimaina mea e manaomia i le fale i le taimi o sauniga, gaoioiga, ma faalavelave faafuasei. Afai e manaomia, na te mauaina mai ia aoaoga mai le sui o le siteki mo fale ma fanua i le faagaoioia o le faaleotele leo, masini faavevela, masini ea malulu, ma isi masini o le fale.

35.2.8

Tagata o le Ekalesia

E faamamafa atu e taitai perisitua faapea o le auai o tagata o le au paia i le faatinoga, o se vaega autu lea mo le tausiga ma le faaleleia o le falelotu. E faamalosiauina tagata o le au paia ina ia tuuina atu ni auaunaga taitoatasi pe fai vaega, e fuafua lava i o latou tomai ma le gafatia.

35.3

Pulega o Fale ma Fanua

35.3.1

Faaaogaina ma le Tausiga o Falelotu

O taitai o le Ekalesia i le lotoifale ma tagata o le au paia ua i ai le tiutetauave mo le faaaogaina ma le tausiga o falelotu. E lagolago atu ia i latou le aufaigaluega o fale ma fanua i le lotoifale. E taumafai taitai e faamautinoa e teuteu lelei, mama, matagofie, ma lelei i taimi uma ia falelotu ma lotoa. E tatau ona atagia atu i fale ma fanua o le Ekalesia le tausiga lelei ma le faaaloalogia i soo se itu.

E tatau i tagata o le Ekalesia, e aofia ai le autalavou ona fesoasoani e faamama ma tausi faalelei falelotu. A o tuuina atu e tagata o le au paia na auaunaga, o le a faatupula’ia lo latou ava ma le migao i le fale o le Alii. O nofoaga e mafai ai, e ao i tagata o le au paia ona faataunuuina lenei tiutetauave e avea ma se vaega o mea e fai i vaiaso taitasi, pe a i ai i le falelotu. E mafai foi ona talosagaina tagata o le au paia e fesoasoani e faamama isi fale ma fanua o le Ekalesia.

35.3.2

Tausiga ma le Asiasiga o Falelotu

E asiasia e le pulega o fale ma fanua falelotu taitasi faaletausaga. O le sui o le siteki mo fale ma fanua po o se isi e tofia i ai e le peresitene o le siteki, e auai i nei asiasiga. E tatau ona ia te ia le faatagaga atoa e galue ai e fai ma sui o le au peresitene o le siteki i le tulaga lenei. O i latou o e auai i nei asiasiga e faailoaina atu mea e fia faaleleia o le fale ma faia ni fuafuaga mo le toe faaleleia pe faafou ona masini ma totoga ma le faia o nisi mea e moomia ona faaleleia.

35.3.3

Fuafuaina o Falelotu

E tuuina atu e le au peresitene o le siteki ia faamatalaga i le Au Peresitene o le Eria, lea o le a fesoasoani ai i le faatonusili o mataupu faaletino i le sauniaina ma le faafouga o se fuafuaga autu o manaoga fuafuaina mo tulaga o fale i le lumanai, faatasi ai ma falelotu fou po o ni faaopoopoga.

35.3.4

Faasaoina o le Malosiaga Faaeletise ma le Vai

O le Ekalesia e totogiina tau uma mo mea e faaaoga i le falelotu. E mafai ona matua fesoasoani taitai i le faaitiitia o nei tau e ala i le a’oa’oina o tagata ia tapē moli ma masini pe a lē o manaomia, ma mulimuli i isi faiga e faasao ai le malosiaga faaeletise ma le suavai. E faamautinoa e taitai e faaaogaina ma le magumagu ia moli, masini faamafanafana, masini faamalulu, masini, ma le suavai.

Pe a manaomia ai, e mafai e le au peresitene o le siteki po o se fautua maualuga ua tofia ona valaauina se tagata tomai faapitoa o fale o le siteki mo le faasaoina o le suavai ma le malosiaga faaeletise mo falelotu taitasi ma vaega mo faafiafiaga i totonu o le siteki. O nei tagata tomai faapitoa e galulue i lalo o le taitaiga a le sui o fale ma fanua o le siteki.

E fautuaina foi taitai ina ia mulimuli i taumafaiga a le malo i le faasaoina o le eletise ma le suavai.

35.3.5

Saogalemu ma le Puipuiga

E faatonu e taitai ia tagata o le au paia,—aemaise ia tamaitai ma le autalavou—ia aua nei tuua na o i latou i fale o le Ekalesia.

E tatau i taitai ona faia ia fuafuaga uma ina ia tausisia le leai o ni mea e faalavelave i poletito, faasitepu, faitotoa e ulufafo ai, potu e faaaogaina i soo se mea, ma auala savali ma isi mea matautia. Ia faamautinoa foi e taitai e le o faaaogaina pe teuina i le falelotu ia mea matautia po o ni mea e faigofie ona mu e pei o mea e faaaoga ai suauu po o penisini, vao mago, ma vaoutuutu po o ofe (tagai foi i le 35.4.2).

E pulea e taitai le tufatufaina atu o ki ma faavaeina ni faiga faavae mautu o le lokaina o le fale. Latou te vaai foi i potu aoga i totonu ma isi potu e le o i ai ni mea taua, e le lokaina.

Ia faamautinoa e taitai ua faapipii numera o telefoni mo faalavelave faafuasei i le atunuu mo leoleo, fuimu, ma le taavale a le falemai e latalata ane i telefoni taitasi faatasi ai ma ni faatonuga pupuu. Latou te vave lipotiina atu i leoleo ni tagata osovale.

35.3.6

Lipotiina o Faalavelave

O gaoioiga a le Ekalesia e tatau ona matua itiiti se tulaga lamatia o tagata auai e manunu’a pe mama’i ai, pe faaleagaina ai foi ia meatotino. I le taimi o gaoioiga, e faia e taitai taumafaiga uma ia mautinoa ai le saogalemu. O le fuafuaina ma le mataalia ma mulimuli i lapataiga o le saogalemu, e mafai ai e taitai ona faaitiitia le tulaga lamatia o ni faalavelave.

E tatau ona vave logo le epikopo ma le peresitene o le siteki pe afai:

• E tulai mai se faalavelave, manu’a, po o se ma’i i nofoaga o le Ekalesia po o le taimi foi o se gaoioiga e lagolagoina e le Ekalesia.

• Ua misi se tagata sa auai i se gaoioiga e lagolagoina e le Ekalesia.

• E faaleagaina se meatotino a se tagata, meatotino faitele, po o le Ekalesia i le taimi o se gaoioiga na lagolagoina e le Ekalesia.

Afai na manu’a tuga se tagata pe ua misi foi, afai ua matua faaleagaina se meatotino, pe ua taufaamata’u mai se tagi i le tulafono pe faamoemoe foi e faia, e faia loa lava e le peresitene o le siteki (po o se epikopo i lalo o lana faatonuga) se tasi o mea nei:

• I le Iunaite Setete po o Kanata, na te faafesootaia le Risk Management Division Vaega o le Pulega o Faalavelave i le laumua o le Ekalesia (1-801-240-4049 po o le 1-800-453-3860, laina 2-4049; i le taimi ua manava galuega po o faaiuga o vaiaso, valaau le 1-801-240-1000 po o le 1-800-453-3860, ma o le a vave ona faafesootai e le talitelefoni se tagata).

• I fafo atu o le Iunaite Setete ma Kanata, na te faafesootaia le ofisa o le eria.

E lipoti foi e taitai manu’aga ma fale po o meatotino a le Ekalesia ua faaleagaina, i le pulega o fale ma fanua.

E tatau i taitai ona iloilo le faaaogaaga o le Polokalama o Fesoasoaniga Faafomai mo Gaoioiga a le Ekalesia pe afai na tupu mai le manu’aga i le taimi o se gaoioiga, o se mea na fai, po o se tofiga e lagolagoina e le Ekalesia. Mo faamatalaga e uiga i le inisiua, tagai i le 20.6.9.

O le peresitene o le siteki (po o se epikopo i lalo o lana taitaiga) e faasino atua ia fesili e uiga i faafitauli po o tagi e faasaga i le Ekalesia i le Vaega o le Pulega o Faalavelave Faafuasei po o le ofisa o le eria.

Tagai i le 20.6.20 mo faatonuga faaopoopo i le auala e faagasolo ai pe afai e tulai mai se faalavelave po o se tulaga faafuasei.

35.4

Aiaiga Faavae mo le Faaaogaina o Fale ma Isi Meatotino a le Ekalesia

O fale o le Ekalesia ma isi meatotino e faaaogaina mo tapuaiga, aoaoga o mataupu faalelotu, ma isi gaoioiga e lagolagoina a le Ekalesia. O isi faaaogaaga o falelotu ua lē fautuaina. I mea e lē masani ai e mafai e le peresitene o le siteki ona faatagaina ia vaega faatuatuaina, e le ni o le Ekalesia, e le faapisinisi e faaaogaina se falelotu po o ona laufanua i se taimi e le tumau (tagai i le Taiala o le Pulega o Fale ma Fanua mo Falelotu ma Isi Meatotino a le Ekalesia, 2). O le lisi lea o loo tuuina atu ai faataitaiga o le faaaogaaga e le faamaonia:

• Lisiina atu o fale ma meatotino a le Ekalesia mo faamoemoega faapisinisi.

• Faalauiloaina o ni pisinisi po o ni kamupani faaputu tupe, e aofia ai le faapipiiina o ni faasalalauga faapisinisi po o le lagolagoina o ni faafiafiaga faapisinisi.

• Faatauina mai, faatauina atu, po o le faalauiloaina o oloa, tautua, faasalalauga, po o galuega taulima, po o le faaaliina atu o ni oloa gaosi.

• Faia o gaoioiga o sailiga-tupe e le faatagaina (tagai i le 20.6.8).

• Taliaina o ni failauga po o ni faiaoga e totogi se tau, o e faafaigaluegaina tagata auai, o e faatauanauina i latou e auai a o tuuina atu semina, lesona, vasega faamalositino, ma isi mea faapena. E mafai ona faia ni tuusaunoaga i le faaaogaina o piano ma okeni i falelotu mo ni aoaoga patino e totogiina (tagai i le 19.7).

• O le faia o ni mea faifai pea a nuu po o kalapu e le lagolagoina e le Ekalesia, e pei o fonotaga ma gaoioiga a Sikauti, po o mea faatulagaina tau afeleti ma a’ogamea.

• Faia o ni fonotaga faapolokiki po o ni faiga faatosina. O se faatagaga faapitoa, e mafai ona faaaogaina ia fale o le Ekalesia mo le lesitalaina o tagata palota ma avea foi ma se fale palota pe a talosagaina e ofisa fai palota pe afai:

  • Ua leai lava se isi mea e tua i ai.

  • E tausisia e au ofisa ma tagata palota ia tulaga faatonuina o le Ekalesia i totonu o le fale.

  • O le gaoioiga o le a le tula’i mai ai se tulaga matautia faaletino i le fale.

  • O le gaoioiga o le a le afaina ai le foliga vaaia o le Ekalesia.

O le faaaogaina o meatotino a le Ekalesia e le tatau ona i ai se tulaga matautia pe lamatia ai i latou e auai po o meatotino foi. E le tatau foi ona i ai se tulaga e lavelavea ai le Ekalesia pe avea ma faasoesa i tuaoi tau lalata ane.

Mo nisi faamatalaga auiliili i le faaaogaina ma le tausiaina o fale o le Ekalesia ma isi meatotino, tagai i le Taiala o le Pulega o Fale ma Fanua mo Falelotu ma Isi Meatotino a le Ekalesia pe faafesootai le laumua o le Ekalesia po o le ofisa o le eria ua tofia.

35.4.1

Galuega Tau Faatufugaga

E maua atatusi mo falelotu ua faamaonia e le Ekalesia e ala atu i pulega o fale ma fanua e faaaoga ai le lisi taiala o le Church Facilities Artwork . E mafai foi e le pulega o fale ma fanua ona maua mai galuega tau ata e talafeagai mo falelotu e ala mai i Faletusi o le Ekalesia.

O ata tusi ma isi galuega tau ata e mafai ona tuuina i ni nofoaga talafeagai i totonu o le falelotu. Ae peitai, e le mafai ona tuuina i totonu o le falesa pe tuu latalata i le vai papatiso. O faatagata, ata vali i luga o puipui, po o ata e fai i ta’ega tioata e le faatagaina. O lenei tulafono e le faatatau i galuega tau ata ua leva ona faaalia mo le tele o tausaga i totonu o falesa o falelotu o loo i ai nei.

O galuega tau ata i totonu o falelotu e tatau ona faavaa faalelei.

35.4.2

Teuteuga

O teuteuga mo le Kerisimasi, o isi aso faamanatu, ma isi faatasiga faapena e mafai ona tuuina mo sina taimi puupuu i le faapaologa po o le fale faafiafia o se falelotu, pe a faamaoniaina ai i lalo o le taitaiga a le au peresitene o le siteki. Sei vagana ai o fugalaau, ae le mafai ona tuuina ni teuteuga i totonu o vaega o le falesa o le falelotu. E le tatau foi ona teuteuina fafo o le falelotu po o le lotoa.

O teuteuga e tatau ona faigofie ma aua ne’i taugata ma e le tatau ona mu gofie. O vao mago, ofe, launiu, o isi mea mamago, ma moliga’o e tutuina e le mafai ona faaaogaina. Afai e faaaogaina ia laau Kerisimasi, e tatau o ni laau palasitika pe malupuipuia foi mai le mu gofie ma ia faaalia e aunoa ma ni moli e alu i le eletise po o ni moliga’o. E tatau ona mulimulitaia ia faatonuga mo mu ma le saogalemu i le lotoifale faapea ma tulafono mai se pulega faalemalo.

35.4.3

Faapaiaina o Fale

O falelotu fou uma, e faapea foi i faaopoopoga tetele e aofia ai se falesa, se fale faafiafia, po o se vaega e tele atu nai lo le fale o loo i ai, e tatau ona faapaiaina i se taimi vave lava pe a maea le galuega.

O fale e laiti ifo e pei o fale o le misiona, inisitituti, seminare, ma potu aoga po o faaopoopoga o ofisa i falelotu e mafai foi ona faapaiaina pe afai e mananao i ai taitai i le lotoifale.

O le faamaoniga mulimuli mo le faapaiaga e tuuina atu e le Au Peresitene o le Eria i se feutagaiga ma le faatonusili o mataupu faaletino. E galulue le Au Peresitene o le Eria ma le peresitene o le siteki po o le misiona ma faailoa atu i ai po o ai e nafa ma le faapaiaina o le fale.

O le polokalama mo le sauniga o le faapaiaga e tatau ona ogatasi ma le faamoemoega o le faatasiga. E le tatau ona umi pe aofia ai foi ni faatinoga faamusika se tele. E tatau ona lava le taimi e tuuina atu i le taitai ua tofia e saunoa ma faapaia ai le fale. A maea le tatalo o le faapaiaga, e tatau ona i ai se viiga talafeagai po o se musika filifilia ma se tatalo puupuu e faaiu ai le sauniga.

O tatalo o le faapaiaga o fale e mafai ona pueina pe a faatagaina e le taitai pulefaamalumalu.

O falelotu e lisi e mafai ona faapaiaina pe afai e ausia tulaga uma nei:

1. O avanoa uma e lisiina, e le aofia ai eria masani e tatau ai (e pei o faitotoa e ulufale mai ai, faapaologa, ma fale le ta’ua), e faaaogaina lava e le Ekalesia e le tauaofia ai.

2. O le lisi e mo le silia ma le tasi le tausaga.

3. E faamaonia e le Au Peresitene o le Eria le faapaiaga o le falelotu e lisi.

Afai e ausia nei tulaga ma ua faapaiaina le falelotu, e tatau ona aofia i le tatalo le gagana o loo faapaiaina ai le falelotu “mo le vaitau o le lisi.”

35.4.4

Faalavelave Faafuasei

I le taimi o se faalavelave faafuasei, e fuafua e le au peresitene o le siteki le faia ma le le faia o sauniga masani a le uarota.

I se faalavelave faafuasei po o se mafatiaga o aafia ai se afioaga, e mafai e le peresitene o le siteki ona lagolago atu i sui faaletulafono fesoasoani mo le faalavelave e ala i le faatagaina o falelotu e faaaoga e fai ma malutaga mo le faalavelave. O le Ekalesia lava e umia le pule. E faamautinoa e taitai o siteki ma uarota e tausia e tagata o loo faaaogaina ia fale, tulaga faatonuina a le Ekalesia o le amio, e aofia ai le Upu o le Poto, a o latou i ai i totonu o ia fale. Mo nisi faamatalaga e uiga i faalavelave faafuasei, tagai i le 22.9.1.3.

35.4.5

Auupega Malolosi

O falesa e faapaiaina mo tapuaiga i le Atua ma o se malutaga mai popolega ma atugaluga o le lalolagi. Faatasi ai ma le tuusaunoaga o alii malu o le malo, e tauaveina auupega malolosi i luga o fanua totino o le Ekalesia, e nanaina a leai, e faasaina.

35.4.6

Afi ma Moliga’o

E le tatau ona faaaogaina ni afi ma moliga’o i totonu o fale o le Ekalesia.

35.4.7

Fu’a

E mafai ona sisi le fu’a a le malo i lotoa o le Ekalesia i soo se taimi pe afai e tusa ai ma tu ma aga a le atunuu. E mafai ona faaali le fu’a a le malo i totonu o fale o le Ekalesia i faatasiga faapitoa, e pei o polokalama faalotonuu. O le lotonuu moni e le moomia ai le faaalia o le fu’a a le malo i taimi uma i nofoaga o tapuaiga.

35.4.8

Sauniga o le Suatiaina o le Eleele

A maea ona faamaonia se galuega o se fale fou, e mafai e taitai o le siteki i le lotoifale ona faataunuuina se sauniga o le suatiaina o le eleele e sauniuni ai mo le galuega. O lenei sauniga e le faia i le Aso Sa.

35.4.9

Vaega Taua e Faasaoina

O fesili uma e faatatau i le tuuina o meatotino po o fale e umia e le Ekalesia i luga o lisi o vaega taua i le lotoifale po o le atunuu e faasaoina po o lesitala, e tatau ona tuuina atu i le laumua o le Ekalesia e auala atu i le Au Peresitene o le Eria. Mo fesili e uiga i le faailogaina, faamanatuina, po o le faasaoina o isi nofoaga, oloa gaosi, galuega o faatufugaga, po o pepa o faamatalaga, ia faafesootai le Matagaluega o Talafaasolopito o le Ekalesia i le 1-801-240-2272 po o le 1-800-453-3860, laina 2-2272.

35.4.10

Fauga, Lisiina, po o le Faatauina o Falelotu

Mo aiaiga faavae e uiga i le fauga, lisiina, po o le faatauina o falelotu, tagai i le Taiala a le Pulega o Fale ma Fanua mo Falelotu ma Isi Meatotino a le Ekalesia pe faafesootai le faatonusili mo mataupu faaletino.

35.4.11

Ata o Falelotu

Ua sauniaina e le Ekalesia ni ata faatulagaina eseese o falelotu ina ia fetaui ma tulaga ma manaoga o tagata i le lalolagi atoa. Afai o le a fausia se falelotu fou, e filifilia se ata ua faatulagaina e fetaui i ai. E otooto mai i lena ata ia aiaiga faavae mo potu, o mea e i ai i totonu, ma masini o loo aofia ai i le falelotu.

35.4.12

Po o Aso Gafua

Tagai i le 20.6.10.

35.4.13

Apitaga po o Tolauapiga e Alu ai ma le Po

O meatotino o falelotu o le Ekalesia e le mafai ona faaaoga mo malologa i le po, tolauapiga, po o pati e alu faasoloatoa ma le po.

35.4.14

Nofoaga e Paka ai Taavale

O le faaaogaaga o nofoaga a le Ekalesia e paka ai taavale e tatau ona ogatusa ma taiala o loo i le amataga o le vaega 35.4. E faaopoopo atu i ai, o nofoaga a le Ekalesia e paka ai taavale e le tatau ona faaaogaina e paka ai taavale a i latou e malaga mamao mai mo galuega e aunoa ma se faatagaga mai le faatonusili mo mataupu faaletino.

35.4.15

Atapu’e, Pu’eina o Vitio, ma Faasalalauga i Falelotu

Ona e paia falelotu, o le pu’eina o ata po o le pue’ina o ni vitio i totonu o falesa e le faatagaina. Mo nisi faamatalaga e uiga i le faasalalauina [e ala i le initoneti] o fonotaga ma isi taualumaga e faia i totonu o le falelotu, tagai i le 29.7.

35.4.16

Aia Tatau i Meatotino ma le Umiaina

O meatotino uma ua tuuina atu pe o teuina mo le manuia o iunite i alaalafaga o mea ia a le Ekalesia, ae le o iunite. Ae ui i lea, ua i ai i iunite i alaalafaga le saolotoga i le faaaogaina o meatotino a le Ekalesia, e aofia ai fale, laueleele, ma isi meatotino, e tusa ai ma le pule ma aiaiga faavae a lē e ana, o le Ekalesia.

35.4.17

Pulega o Meatotino mo Gaoioiga Faafiafia

Mo faamatalaga e uiga i le faatautaiga o meatotino e faafiafia ai, tagai i le Taiala o le Pulega o Fale ma Fanua mo Falelotu ma Isi Meatotino a le Ekalesia pe faafesootai le faatonusili o mataupu faaletino.

35.4.18

Vaega e Tautuaina Ai

O le vaega e tautuaina ai i totonu o falelotu o le Ekalesia, e le o faamoemoe e fai ai ni gasesega po o ni kuka sei vagana o se vaega o se lesona, se faata’ita’iga, po o isi aoaoga. Afai e tatau ona fai ni meaai i totonu o le fale po o le lotoa, e tatau ona saunia i se isi mea ona aumai ai lea i le falelotu, i se mea e mafai ona tumau ai le mafanafana po o le malulu foi seia oo ina laulau.

35.4.19

Faailoga

E ao ona faailoa atu le igoa o le Ekalesia i falelotu uma ma isi fale o le Ekalesia i gagana ua faamaonia faapea le tagavai. E ao ona faapipiiina i le tino o le fale. I lalo o ni tulaga patino, e mafai foi ona faapipiiina le igoa o le Ekalesia i lotoa i luga o se faailoilo e tu na o ia.

35.4.20

Potu e Teu Ai Mea

E na o le pau le potu e teu ai mea e faatagaina i falelotu e mo mea e faaaoga mo le tausiga ma le teuina o le fale ma isi mea ua faamaonia mo le faaaogaina. O oloa o le uelefea ma isi mea faapena e le mafai ona teuina i falelotu.

O mea e pei o penisini, kesi, afitusi, ma meafaigaluega e faaaoga i tolauapiga e tatau ona teuina i isi fale e ese mai le falelotu.

O taavale, o taavale mo faafiafiaga, ma isi masini a le tagata lava ia e le mafai ona teuina i totonu o fanua o le Ekalesia.

35.4.21

Faaaogaina o Falelotu i fafo atu o Tuaoi o le Siteki

O falelotu uma i totonu o le mamao talafeagai o se uarota e tatau ona faatumuina e tusa ai ma lo latou telē na fuafuaina ai a o le’i tuuina atu nisi faaopoopoga i fale. Afai e tatau ai, e mafai e le au peresitene o siteki i le feutagai ai ma le Au Peresitene o le Eria, ona tofia uarota e faaaogaina ia falelotu o se siteki o loo sosoo ane ai. E mafai e ni siteki e sili atu ma le tasi ona faaaogaina se fale autu o se siteki pe afai e talafeagai le tulaga o loo tu ai.

35.4.22

Faaipoipoga ma Taumafataga o Faaipoipoga

E mafai ona faia se sauniga o se faaipoipoga po o se taumafataga i se fale o le Ekalesia pe afai e le faalavelave i le faasologa masani o gaoioiga faale-Ekalesia. Ae peitai, o nei taumafataga e le tatau ona faia i le falesa se’i vagana o se vaega tatala mo le mau faamoemoega. E le tatau ona faia ni faaipoipoga ma ni taumafataga o faaipoipoga i le Sapati po o afiafi o Aso Gafua.

E le faatagaina e le Ekalesia ona faletapuai po o isi meatotino e faaaoga mo sauniga, taumafataga, po o isi gaoioiga e faasino i faaipoipoga a le itupa e tasi.

O i latou o e faatautaia le faaipoipoga po o le taumafataga e nafa ma le faamamaina o vaega o le fale latou te faaaogaina.