35.

Pisikal nga mga Pasilidad

35.1

Katuyoan

Ang Simbahan mopalit og yuta ug mosangkap og mga pasilidad aron mahatagan ang mga miyembro sa Simbahan og mga dapit diin makahimo sila sa pagsimba, pagtudlo, pagkat-on, pag-ampo nga mag-uban, paghimo ug pagbag-o sa mga pakigsaad, ug pagdawat og sagradong mga ordinansa. Ang pasilidad sa Simbahan kinahanglang (1) mohatag og espirituwal nga kahimtang sa pagsimba sa mga miyembro ug (2) mopakita og simbolo sa balaang pagtahod ug kaligdong diha sa komunidad.

35.2

Organisasyon

35.2.1

Departamento sa Meetinghouse nga mga Pasilidad

Ubos sa direksyon sa Tigdumalang Bishopric, ang Departamento sa mga Pasilidad sa Meetinghouse nag-establisar og mga polisiya ug mga pamaagi sa pagpadagan nga moabag sa pagsangkap og mga pasilidad alang sa mga miyembro sa tibuok kalibotan.

35.2.2

Mga Buhatan sa Area

Ang mga Kapangulohan sa Area ug ang mga direktor sa temporal nga mga kalihokan mao ang responsable alang sa pagpamalit ug pagdumala sa kabtangan sa Simbahan. Kining mga kabtangan naglakip sa mga meetinghouse, mga institute of religion, mga mission home ug mga opisina, mga kalihokan sa welfare, ug uban pa.

Ang mga kawani sa lokal nga mga pasilidad moserbisyo ubos sa direksyon sa direktor sa temporal nga mga kalihokan.

35.2.3

Kapangulohan sa Stake

Ang mga sakop sa kapangulohan sa stake mosiguro nga ang mga pasilidad sa Simbahan gigamit og tarong, giatiman, ug giprotektahan. Tudloan nila ang mga lider ug mga miyembro sa ilang mga responsibilidad sa paggamit ug pag-atiman niining mga pasilidad. Sangonan nila ang usa ka high councilor nga mahimong representante sa pisikal nga mga pasilidad sa stake. Makigkita sila kaniya kon gikinahanglan aron marebyo ang mga panginahanglan ug ang mga proyekto.

35.2.4

Representante sa Pisikal nga mga Pasilidad sa Stake

Ang representante sa pisikal nga mga pasilidad sa stake (usa ka high councilor) moabag sa kapangulohan sa stake sa mga butang kalabot sa pisikal nga mga pasilidad sama sa mosunod:

• Motabang siya sa pagtudlo ug pag-implementar sa mga sumbanan sa paggamit ug pag-atiman sa meetinghouse.

• Siya ang mokoordinar sa pagpang-apud-apod ug pagkontrolar sa mga yawe.

• Siya ang mokoordinar sa instruksiyon alang sa mga representante sa gambalay sa ward alang sa ilang mga katungdanan.

• Moapil siya sa tinuig nga mga pag-inspeksyon sa meetinghouse nga ipahigayon sa manedyer sa mga pasilidad, gawas lang kon ang kapangulohan sa stake mopili og lain nga maoy paapilon.

35.2.5

Tinugyanan nga Bishop [Agent Bishop]

Kon adunay sobra sa usa ka ward nga mogamit sa usa ka gambalay, ang kapangulohan sa stake mosangon og usa ka bishop nga mahimong tinugyanan nga bishop. Siya ang mokoordinar sa mga buluhaton sa pagpaapil sa mga miyembro sa pag-atiman ug pagmentinar sa meetinghouse. Siya usab ang mokoordinar sa mga pamaagi sa kasiguroan ug seguridad sa meetinghouse. Agig dugang, siya ang mokoordinar sa pag-eskedyul sa gambalay ngadto sa stake ug sa ubang mga ward nga naggamit niini, apan mahimo siyang mosangon og laing miyembro nga mobuhat sa pag-eskedyul.

35.2.6

Bishopric

Ang mga sakop sa bishopric mao ang responsable sa paggamit, pag-atiman, ug seguridad sa meetinghouse. Ilang tudloan ang mga miyembro sa ward kon unsaon sa paggamit ug pag-atiman niini. Mo-organisar sila og pagpaapil sa miyembro sa pag-atiman ug pagmentinar sa meetinghouse, mohimo og mga buluhaton kon gikinahanglan. Moapud-apod usab sila og mga yawe sa meetinghouse.

Siguroon sa mga sakop sa bishopric nga ang tukmang mga pasidaan kalabot sa kasiguroan gihimo diha sa meetinghouse ug sa mga nataran (tan-awa sa 35.3.5).

35.2.7

Representante sa Gambalay sa Ward

Ang matag ward kinahanglang adunay representante sa gambalay sa ward. Ang bishop mahimong motudlo og usa ka sakop sa bishopric nga moserbisyo niini nga posisyon, o ang bishopric mahimong motawag og laing miyembro nga mobuhat sa ingon.

Ang representante sa gambalay sa ward motabang sa bishopric sa mga responsibilidad sa meetinghouse sama sa pagdaginot sa kuryente, kasiguroan, seguridad, pagpanangtang sa snow (kon anaa), ug sa pagpaapil sa miyembro sa pagpanglimpyo ug pagmentinar. Atimanon niya ang mga panginahanglan nga may kalabotan sa gambalay atol sa mga miting, mga kalihokan, ug mga emerhensiya. Kon gikinahanglan, makadawat siya og instruksiyon gikan sa representante sa pisikal nga mga pasilidad sa stake sa pagpatukar sa sound, pangpainit [heating], pangpabugnaw [air conditioning], ug ubang mga kagamitan sa gambalay.

35.2.8

Mga Miyembro

Ang mga lider sa pagkapari mohatag og klarong pagpasabot nga ang pag-apil sa miyembro usa ka mahinungdanong butang sa pag-atiman ug pagmentinar sa meetinghouse. Ang mga miyembro giawhag nga mohatag og indibidwal o naka-grupo nga mga pagserbisyo, depende sa ilang mga kahanas ug mga abilidad.

35.3

Pagdumala sa Pisikal nga mga Pasilidad

35.3.1

Paggamit ug Pag-atiman sa mga Meetinghouse

Ang lokal nga mga lider ug mga miyembro sa Simbahan mao ang responsable sa paggamit ug pag-atiman sa mga meetinghouse. Abagan sila sa lokal nga mga kawani alang sa mga pasilidad. Maningkamot ang mga lider sa pagsiguro nga ang mga meetinghouse ug mga nataran kanunay nga hapsay, limpyo, madanihon, ug maayo ang pagkaatiman. Ang mga pasilidad sa Simbahan kinahanglang magpakita sa husto nga pag-atiman ug pagtahod sa tanang paagi.

Ang mga miyembro sa Simbahan, lakip na ang kabatan-onan, kinahanglang motabang sa paglimpyo ug pag-atiman sa mga meetinghouse. Kon mohatag ang mga miyembro sa ingon niana nga serbisyo, ang ilang pagtahod sa balay sa Ginoo mas molambo. Kon posible, ang mga miyembro kinahanglang motuman niining responsibilidad isip kabahin sa senimana nga mga kalihokan kon anaa na sila sa meetinghouse. Ang mga miyembro mahimo usab nga hangyoon nga motabang sa paglimpyo sa ubang mga pasilidad sa Simbahan.

35.3.2

Pagmentinar ug Pag-inspeksyon sa Meetinghouse

Ang manedyer sa mga pasilidad moinspeksyon sa matag meetinghouse kada tuig. Ang representante sa pisikal nga mga pasilidad sa stake, o ang ikapuli nga gipili sa presidente sa stake, moapil niini nga mga pag-inspeksyon. Siya kinahanglang adunay hingpit nga pagtugot sa paglihok alang sa kapangulohan sa stake niini nga kapasidad. Kadtong kinsa moapil niining mga pag-inspeksyon motino sa mga panginahanglan sa pagmentinar sa gambalay ug mohimo og mga plano alang sa pag-ayo o pagbag-o sa mga kagamitan niini ug sa mga butang ug sa paghimo sa ubang gikinahanglan nga mga ayohonon.

35.3.3

Pagplano sa Meetinghouse

Ang kapangulohan sa stake mohatag og impormasyon ngadto sa Kapangulohan sa Area nga moabag sa direktor sa temporal nga mga kalihokan sa pag-andam ug pag-update sa kinatibuk-ang plano [master plan] sa gihunahuna nga mga panginahanglan alang sa umaabot nga mga luna sa mga gambalay ug sa bag-o o sa dugang nga luna alang sa meetinghouse.

35.3.4

Pagdaginot sa Kuryente ug Tubig

Ang Simbahan naggasto og dako-dako nga kantidad sa tubig ug kuryente sa mga meetinghouse. Ang mga lider makatabang nga maminosan og dako-dako kining nagasto nga kantidad pinaagi sa pagtudlo sa mga miyembro sa pagpalong sa mga suga ug ekipo kon kini wala kinahanglana ug sa pagsunod sa laing mga paagi sa pagdaginot sa kuryente ug tubig. Siguroon sa mga lider nga ang mga suga, pangpainit [heating], pangpabugnaw [air conditioning], ekipo, ug tubig gigamit sa madaginoton nga paagi kutob sa mahimo.

Kon gikinahanglan, usa ka sakop sa kapangulohan sa stake o gisangonan nga high councilor mahimong motawag og espesyalista sa gambalay sa stake alang sa pagdaginot sa tubig ug kuryente alang sa matag meetinghouse ug dapit nga kalingawan sa stake. Kining mga espesyalista motrabaho ubos sa direksyon sa representante sa pisikal nga mga pasilidad sa stake.

Ang mga lider giawhag usab nga mosunod sa mga inisyatibo sa lokal nga pangagamhanan sa pagdaginot sa kuryente ug tubig.

35.3.5

Kasiguroan ug Seguridad

Ang mga lider motudlo sa mga miyembro—ilabi na sa mga babaye ug kabatan-onan—nga dili mag-inusara sa mga gambalay sa Simbahan.

Ang mga lider kinahanglang mohimo og makatarunganong mga paagi nga ang mga agianan sa gambalay, mga hagdanan, mga gawasanang pultahan, mga kwarto sa mga gamit, ug mga agianan sa kilid nga walay mga ali ug ubang kuyaw nga butang. Ang mga lider mosiguro usab nga ang kuyaw nga mga materyal o mga butang nga dali mosilaob sama sa kagamitan nga may lana, dagami, mga uhot, ug mga punoan sa mais dili gamiton o dili tipigan sa mga meetinghouse (tan-awa usab sa 35.4.2).

Ang mga lider mokontrolar sa paghatag sa yawe ug mohimo og epektibo nga mga paagi sa pagkandado. Tan-awon usab nila nga ang sulod sa mga klasehanan ug ang ubang mga kwarto nga walay bililhon nga mga butang ang ipabiling dili kinandadohan.

Siguroon sa mga lider nga ang lokal nga mga numero sa telepono nga pang-emerhensiya alang sa pulis, departamento sa bombero, ug ambulansiya gibutang o anaa duol sa matag telepono nga may mubo nga mga instruksiyon. I-report dayon nila sa pulis ang mga mosulod nga walay pagtugot.

35.3.6

Pag-report sa Aksidente

Ang mga kalihokan sa Simbahan kinahanglang minos ra og risgo sa pagkaangol o sa sakit ngadto sa mga partisipante o kadaot sa kabtangan. Atol sa mga kalihokan, ang mga lider mohimo sa tanang paningkamot nga masiguro nga luwas ang mga tawo. Pinaagi sa epektibong pagplano ug pagsunod sa mga pasidaan aron mahimong luwas, maminosan sa mga lider ang risgo sa mga aksidente.

Ang bishop o ang presidente sa stake kinahanglang mapahibalo dayon kon:

• Ang usa ka aksidente, kadaot, o sakit nahitabo diha sa kabtangan sa Simbahan o atol sa usa ka kalihokan nga gipasiugdahan sa Simbahan.

• Ang usa ka tawo nga miapil sa kalihokan nga gipasiugdahan sa Simbahan nawala.

• Adunay kadaot sa pribado, publiko, o kabtangan sa Simbahan nga nahitabo atol sa kalihokan nga gipasiugdahan sa Simbahan.

Ang usa ka tawo nahiagom og grabe nga kadaot o nawala, kon ang kabtangan grabe nga naguba, o kon ang legal nga aksiyon gihulga o gipaabot, ang presidente sa stake (o usa ka bishop ubos sa iyang direksyon), mohimo dayon sa usa sa mosunod nga mga aksiyon:

• Sa Estados Unidos o Canada, siya mopahibalo sa Risk Management Division sa punoang buhatan sa Simbahan (1-801-240-4049 o 1-800-453-3860, ekstensiyon 2-4049; human sa oras tingtrabaho o sa tapos sa semana, motawag sa 1-801-240-1000 o 1-800-453-3860, ug ang operator mokontak dihadiha dayon og usa ka tawo).

• Sa gawas sa Estados Unidos ug Canada, siya mopahibalo sa buhatan sa area.

Mo-report usab ang mga lider sa mga pagkaangol ug kadaot nga naglambigit sa mga pasilidad o kabtangan sa Simbahan ngadto sa manedyer sa mga pasilidad.

Kinahanglang rebyohon sa mga lider ang paggamit sa Activity Medical Assistance Program sa Simbahan kon adunay mahitabo nga pagkaangol atol sa gipasiugdahan sa Simbahan nga kalihokan, o buluhaton. Alang sa impormasyon mahitungod sa insurance, tan-awa sa 20.7.3.

Ang presidente sa stake (o usa ka bishop ubos sa iyang direksyon) mopadangat sa mga pangutana mahitungod sa mga isyu sa kasiguroan o mga pasangil batok sa Simbahan ngadto sa Risk Management Division o ngadto sa buhatan sa area.

Tan-awa sa 20.7 alang sa dugang nga mga instruksiyon kon unsaon sa pagpadayon sa higayon nga adunay aksidente o emerhensiya.

35.4

Mga Polisiya sa Paggamit sa mga Gambalay sa Simbahan ug sa Ubang Kabtangan

Ang mga gambalay sa Simbahan ug ang ubang mga kabtangan pagagamiton alang sa pagsimba, relihiyoso nga panudlo, ug ubang mga kalihokan nga may kalabotan sa Simbahan. Ang ubang mga paggamit sa meetinghouse wala itugot. Sa panagsa nga mga okasyon ang presidente sa stake motugot sa kasaligan, dili pang-Simbahan, wala magpaginansya nga mga grupo sa temporaryong paggamit sa meetinghouse o sa mga nataran niini (tan-awa sa Mga Sumbanan sa Facilities Management alang sa mga Meetinghouse ug Uban pang Kabtangan sa Simbahan, 2). Ang mosunod nga lista naghatag og mga ehemplo sa paggamit nga wala itugot:

• Pagpaabang sa mga pasilidad sa Simbahan alang sa komersyal nga mga katuyoan.

• Pagpasiugda og panimpalad sa negosyo o mga kompaniya sa pamuhonan [investment], lakip sa pagbutang og komersyal nga pahinumdom o pagpasiugda og komersyal nga kalingawan.

• Pagpamalit, pamaligya, o pagpalambo sa mga produkto, mga serbisyo, mga publikasyon, o mga mamugnaon nga buhat o mga pasundayag sa galamiton.

• Paghimo og wala tugoti nga mga kalihokan aron makakolekta og pundo (tan-awa sa 20.6.5).

• Pagdapit og mga mamumulong o mga magtutudlo nga binayran, kinsa moagni og mga partisipante, o kinsa mangita og mga kustomer o mga kliyente samtang nagseminar, nagleksiyon, nagklase og aerobics, ug uban pa. Ang mga eksepsiyon mahimong himoon sa paggamit sa mga piano o mga organ sa meetinghouse alang sa binayran nga pribado nga panudlo (tan-awa sa 19.7).

• Paghimo og regular nga mga kalihokan sa komunidad o club nga wala pasiugdahi sa Simbahan, sama sa mga miting ug mga kalihokan sa Scout, o sa organisado nga mga kalihokan ug mga pagbansay nga pang-atleta.

• Paghimo og politikanhon nga mga miting o mga kampanya. Isip usa ka eksepsiyon, ang mga pasilidad sa Simbahan mahimong gamiton alang sa pagparehistro sa botante ug isip botaranan nga mga dapit sa hangyo sa opisyales sa pagbotar kon:

  • Walay resonable nga alternatibo.

  • Ang opisyales ug mga botante mosunod sa mga sumbanan sa Simbahan diha sa gambalay.

  • Ang kalihokan dili makahatag og pisikal nga kakuyaw ngadto sa gambalay.

  • Ang kalihokan dili makadaot sa reputasyon sa Simbahan.

Ang paggamit sa kabtangan sa Simbahan kinahanglan nga dili makahatag og dako nga risgo sa kadaot ngadto sa mga partisipante o ngadto sa kabtangan. Ni kini makahatag sa Simbahan sa dili angay nga tulubagon o makadisturbo sa naglibot nga kasilinganan.

Alang sa mas detalyado nga mga instruksiyon sa paggamit ug pag-atiman sa mga gambalay sa Simbahan ug ubang kabtangan, tan-awa sa Mga Sumbanan sa Facilities Management alang sa mga Meetinghouse ug Uban pang Kabtangan sa Simbahan o kontaka ang punoang buhatan sa Simbahan o ang buhatan sa area.

35.4.1

Artwork

Ang giaprobahan nga artwork sa Simbahan alang sa mga meetinghouse makuha pinaagi sa manedyer sa mga pasilidad gamit ang Church Facilities Artwork nga catalog. Ang manedyer sa mga pasilidad mahimo usab nga makakuha sa artwork nga angay sa mga meetinghouse pinaagi sa Church Distribution Services.

Ang mga litrato ug ubang artwork mahimong ibutang sa angay nga mga dapit diha sa meetinghouse. Hinoon, dili kini ibutang sa chapel o duol sa bunyaganan. Ang mga estatuwa, mga mural [painting] ug mga mosaic [litrato sa daghang piraso sa bildo, bato o seramiko] wala itugot. Kini nga polisiya dili magamit sa mga buhat sa arte nga gibutang na sulod sa daghang mga tuig diha sa mga chapel sa karon nga mga meetinghouse.

Ang artwork sa mga meetinghouse kinahanglan nga gitarong sa pagkwadro.

35.4.2

Mga Dekorasyon

Ang mga dekorasyon sa pasko, sa ubang mga holiday, ug ubang susama nga mga okasyon mahimong temporaryong ibutang sa hawanan o sa cultural hall sa usa ka meetinghouse, sumala sa giaprobahan ubos sa direksyon sa kapangulohan sa stake. Gawas sa mga bulak, ang mga dekorasyon dili ibutang sa dapit sa chapel sa meetinghouse. Ni ang gawas sa meetinghouse o ang mga nataran butangan og dekorasyon.

Ang mga dekorasyon kinahanglan nga yano ug dili mahal ug kinahanglan nga dili kuyaw sa sunog. Ang dagami, uhot, mga lukay, ubang gipauga nga materyal, ug gidagkotan nga mga kandila dili mahimong gamiton. Kon mogamit og mga Christmas tree, kinahanglan nga kini artipisyal o dili masunog ug giplastada nga walay mga suga o mga kandila. Ang lokal nga mga lagda ug mga ordinansa bahin sa sunog ug kasiguroan kinahanglang tumanon.

35.4.3

Pagpahinungod sa mga Gambalay

Ang tanang bag-o nga mga meetinghouse, ingon man ang dagko nga mga pagdugang nga anaa sa chapel, sa cultural hall, o usa ka dapit nga mas dako kay sa kasamtangang gambalay, kinahanglang ipahinungod dayon kutob sa mahimo human makompleto ang proyekto.

Ang mas gagmayng mga gambalay sama sa mga mission home, mga institute, mga seminary, ug klasehanan o opisina nga gidugang sa mga meetinghouse mahimo usab nga ipahinungod kon ang lokal nga mga lider nagtinguha niini.

Ang kataposan [final] nga pagtugot alang sa pagpahinungod ihatag sa Kapangulohan sa Area pinaagi sa pakig-koordinar sa direktor sa temporal nga mga kalihokan. Ang Kapangulohan sa Area makigtambayayong sa presidente sa stake o sa misyon ug motudlo kon kinsa ang responsable alang sa pagpahinungod sa gambalay.

Ang programa alang sa tulumanon sa pagpahinungod kinahanglang pinasubay sa katuyoan sa maong kalihokan. Kinahanglang dili kini tas-on o maglakip og taas nga mga pasundayag sa musika. Igo nga panahon ang kinahanglang ihatag alang sa gisangonan nga lider sa pagpamulong ug sa pagpahinungod sa gambalay. Human sa pagpahinungod nga pag-ampo, kinahanglang adunay tukma nga himno o pinili nga musika ug mubo nga pag-ampo sa pagtapos sa tulumanon.

Ang pagpahinungod nga mga pag-ampo sa mga gambalay mahimong i-rekord uban sa pagtugot gikan sa tigdumalang awtoridad.

Ang giabangan nga mga meetinghouse mahimong ipahinungod kon ang tanan nga mosunod nga kondisyon matuman:

1. Ang tanang giabangan nga lugar, walay labot sa gikinahanglan nga komon nga dapit (sama sa pultahan, hawanan, ug mga kasilyas), gamiton lang sa Simbahan.

2. Ang pag-abang sobra kay sa usa ka tuig.

3. Ang Kapangulohan sa Area motugot sa pagpahinungod sa giabangan nga meetinghouse.

Kon matuman kini nga mga kondisyon ug ang meetinghouse ipahinungod, ang pag-ampo kinahanglang maglakip sa pinulongan nga ang meetinghouse gipahinungod “sulod sa tagal sa pag-abang.”

35.4.4

Mga Emerhensiya

Atol sa mga emerhensiya, ang kapangulohan sa stake motino kon maghimo ba o dili sa naandan nga mga miting sa ward.

Sa usa ka emerhensiya o katalagman sa tibuok komunidad, ang presidente sa stake mahimong motabang sa tinuod nga mga ahensya sa kahupayan sa katalagman pinaagi sa pagtugot sa mga meetinghouse nga gamiton isip emerhensiya nga mga dangpanan. Ang Simbahan mao ang magkontrolar. Ang mga lider sa stake ug ward mosiguro nga ang mga tawo nga mogamit sa mga gambalay mosunod sa mga sumbanan sa kinaiya sa Simbahan, lakip sa Pulong sa Kaalam, samtang sila anaa sa mga gambalay. Alang sa dugang nga impormasyon mahitungod sa mga emerhensiya, tan-awa sa 22.9.1.3.

35.4.5

Mga Armas

Ang mga Simbahan gipahinungod sa pagsimba sa Dios ug dangpanan gikan sa mga kabalaka ug mga kahadlok sa kalibotan. Gawas sa kasamtangang tigpatuman sa balaod nga mga opisyal, ang pagdala og makamatay nga mga hinagiban diha sa Simbahan, gitago o wala, gidili.

35.4.6

Mga Kalayo ug mga Kandila

Ang mga kalayo ug gidagkotan nga mga kandila dili mahimong gamiton sa mga gambalay sa Simbahan.

35.4.7

Mga Bandila

Ang nasudnong bandila mahimong ipataas diha sa mga nataran sa luna nga gipanag-iya sa Simbahan bisan kanus-a kon nagsubay kini sa lokal nga kostumbre ug patakaran. Ang nasudnong bandila mahimong ipasundayag sulod sa mga gambalay sa Simbahan sa espesyal nga mga okasyon, sama sa bayanihon nga mga programa. Ang tinuod nga pagkabayani wala magkinahanglan nga ipakita kanunay ang nasudnong bandila sa mga dapit sa pagsimba.

35.4.8

Mga Tulumanon sa Groundbreaking

Human maaprobahi ang bag-ong proyekto sa gambalay, ang lokal nga mga lider mahimong mopahigayon og tulumanon sa groundbreaking agi og pagpangandam alang sa pagtukod. Kini nga tulumanon dili himoon sa Dominggo.

35.4.9

Pagpreserbar sa Makasaysayanong Dapit

Ang tanang pangutana mahitungod sa pagbutang sa gipanag-iya sa Simbahan nga kabtangan o mga gambalay diha sa mga listahan o mga talaan sa nasyonal o lokal nga pagpreserbar sa makasaysayanong dapit kinahanglang idirekta ngadto sa punoang buhatan sa Simbahan pinaagi sa Kapangulohan sa Area. Alang sa mga pangutana mahitungod sa pagmarka, pagsaulog, o pagpreserbar sa ubang mga dapit, mga artifact, mga buhat kalabot sa art, o mga dokumento, kontaka ang Church History Department sa 1-801-240-2272 o 1-800-453-3860, ekstensiyon 2-2272.

35.4.10

Pagtukod, Pag-abang, o Pagpalit og Meetinghouse

Alang sa mga polisiya mahitungod sa pagtukod, pag-abang, o pagpalit og mga meetinghouse, tan-awa sa Mga Sumbanan sa Facilities Management alang sa mga Meetinghouse ug Uban pang Kabtangan sa Simbahan o kontaka ang direktor sa temporal nga mga kalihokan.

35.4.11

Mga Plano sa Meetinghouse

Ang Simbahan adunay giandam nga nagkalain-lain nga sumbanan sa mga plano sa meetinghouse aron ipahiangay sa mga kahimtang ug mga panginahanglan sa mga miyembro sa tibuok kalibotan. Kon ang usa ka bag-ong meetinghouse pagatukoron, usa ka haom nga sumbanan nga plano ang pilion. Kana nga plano naglatid sa polisiya alang sa mga kwarto, mga mahinungdanong bahin, ug ekipo nga ilakip diha sa meetinghouse.

35.4.12

Mga Gabii sa Lunes

Tan-awa sa 20.5.3.

35.4.13

Tibuok Gabii nga Pagpuyo o Kamping

Ang mga kabtangan sa meetinghouse dili gamiton alang sa tibuok gabii nga pagpuyo, kamping, o mga party nga adto mangatulog.

35.4.14

Mga Parkinganan

Ang paggamit sa mga parkinganan sa Simbahan kinahanglang magsunod sa mga lagda sa sinugdanan sa seksiyon 35.4. Agig dugang, ang mga parkinganan sa Simbahan kinahanglan nga dili gamiton alang sa parkinganan sa kada adlaw nga mga tigbiyahe nga walay pagtugot sa direktor alang sa temporal nga mga kalihokan.

35.4.15

Mga Litrato, mga Pagrekord og Video, ug mga Sibya diha sa mga Chapel

Tungod kay ang mga chapel sagrado, ang pagkuha og mga litrato o paghimo og mga pagrekord og video diha sa mga chapel wala itugot. Alang sa impormasyon mahitungod sa pagsibya sa mga miting ug sa ubang mga kalihokan nga gihimo diha sa chapel, tan-awa sa 29.7.

35.4.16

Mga Katungod ug Pagpanag-iya sa Kabtangan

Ang tanang kabtangan nga gitugyan o gihimo alang sa kaayohan sa lokal nga mga yunit iya sa Simbahan, dili iya sa mga yunit. Hinoon, ang lokal nga mga yunit adunay dakong kagawasan sa paggamit sa kabtangan nga gipanag-iya sa Simbahan, lakip sa mga gambalay, yuta, ug ubang kabtangan, ubos sa pagpanag-iya ug mga polisiya sa Simbahan.

35.4.17

Pagdumala sa Kabtangan nga Pangkalingawan

Alang sa impormasyon mahitungod sa pagdumala sa kabtangan nga pangkalingawan, tan-awa sa Mga Sumbanan sa Facilities Management alang sa mga Meetinghouse ug Uban pang Kabtangan sa Simbahan o kontaka ang direktor alang sa temporal nga mga kalihokan.

35.4.18

Mga Luna nga Kadalitan og Pagkaon [Serving Areas]

Ang mga luna nga kadalitan og pagkaon diha sa mga meetinghouse sa Simbahan dili alang sa pag-andam sa pagkaon o pagluto gawas kon kini kabahin sa leksiyon, demonstrasyon, o ubang panudlo. Kon idalit ang pagkaon diha sa gambalay o sa mga nataran, kinahaanglan nga andamon kini sa laing dapit ug dad-on ngadto sa meetinghouse, diin kini ipadayon nga init o bugnaw hangtod nga kini idalit.

35.4.19

Mga Karatula

Ang ngalan sa Simbahan kinahanglang ipakita sa tanang meetinghouse ug sa ubang mga gambalay sa Simbahan gamit ang giaprobahan nga pinulongan ug logo. Kinahanglan kining ibutang diha sa gambalay. Ubos sa pipila ka kondisyon, ang ngalan sa Simbahan mahimo usab nga ipahimutang diha sa nataran gamit ang nagbarog nga karatula.

35.4.20

Tipiganan

Ang bugtong tipiganan nga gitugotan sa mga meetinghouse mao ang alang sa mga butang sa pagmentinar ug ubang giaprobahan nga mga suplay ug ekipo. Ang mga suplay sa welfare ug ubang ingon nga mga butang dili mahimong tipigan diha sa mga meetinghouse.

Ang mga materyal sama sa gasolina, propane, mga posporo, ug himan sa pagkamping kinahanglan nga tipigan sa mga gambalay nga nahimulag sa meetinghouse.

Ang mga awto, mga sakyanan nga panglingaw-lingaw, ug ubang personal nga ekipo dili mahimong tipigan diha sa luna nga gipanag-iya sa Simbahan.

35.4.21

Paggamit sa mga Meetinghouse sa gawas sa mga Utlanan sa Stake

Ang tanang meetinghouse nga anaa sa resonable nga gilay-on sa usa ka ward kinahanglan gamiton sa tukmang gidaghanon sa mogamit subay sa desinyo niini sa dili pa ihatag ang dugang nga mga pasilidad. Kon gikinahanglan, ang mga kapangulohan sa stake, sa pagpakigkonsulta sa Kapangulohan sa Area, mahimong mopagamit sa mga ward nga mogamit sa mga meetinghouse sa kasikbit nga stake. Sobra sa usa ka stake ang mahimong mogamit sa stake center kon kini nahimutang sa duol.

35.4.22

Mga Kasal ug mga Salo-salo sa Kasal

Ang usa ka seremonya o salo-salo sa kasal mahimong ipahigayon diha sa gambalay sa Simbahan kon dili kini makasamok sa eskedyul sa naandan nga mga kalihokan sa Simbahan. Hinoon, kining mga salo-salo dili ipahigayon diha sa chapel gawas kon kini usa ka dapit nga alang sa daghang katuyoan [multipurpose chapel]. Ang mga kasal ug mga salo-salo kinahanglang dili ipahigayon sa Igpapahulay o sa mga gabii sa Lunes.

Ang Simbahan dili motugot nga gamiton ang mga meetinghouse o ubang kabtangan niini alang sa mga seremonya, mga salo-salo, o ubang mga kalihokan nga may kalabotan sa mga kaminyoon sa sama og sekso.

Kadtong kinsa nagdumala sa salo-salo sa kasal mao ang responsable sa paglimpyo sa mga dapit nga ilang gigamit diha sa gambalay.