“36. Tauyavutaki, Veisautaki, kei na Vakatokayacataki ni Tabanilotu Vou,” iVoladusidusi Raraba: Veiqaravi e Na Lotu i Jisu Karisito ni Yalododonu Edaidai (2024).
“36. Tauyavutaki, Veisautaki, kei na Vakatokayacataki ni Tabanilotu Vou,” iVoladusidusi Raraba.
36.
Tauyavutaki, Veisautaki, kei na Vakatokayacataki ni Tabanilotu Vou
36.0
iVakamacala Taumada
O ira na lewe ni Lotu era na okati ki na ivavakoso ni vanua era vakaitikotiko kina (raica na Mosaia 25:17–24). Era gadrevi na ivavakoso oqo me baleta na kena tauyavutaki kei na kena qaravi na cakacaka ni Lotu ena ruku ni lewa dodonu ni matabete. Sa soli vei ira na iliuliu ni vei vavakoso na idola ni matabete me ra vakadonuya na qaravi ni veicakacaka vakalotu ni matabete. Na ivavakoso talega e dau vukei ira na lewenilotu me ra vakaqaqacotaka vakai ira na nodra qarava na Kalou, vulica na ivakavuvuli i Jisu Karisito, ka veiqaravi.
Na ivavakoso ni Lotu (ka dau vakatokai talega me tabanilotu) e oka kina na iteki, tikina, tabanalevu, kei na tabana. Era tauyavutaki, veisautaki, se tini walega ke gadrevi.
Era na cakacaka na iliuliu me vakalevutaki cake na nodra kaukauwa vakayalo na lewenilotu ni bera ni vakaturi me tauyavutaki e dua na tabanilotu vou, se veisau na iyalayala ni dua na tabanilotu. Me qai tauyavutaki ga na tabanilotu vou ni sa kaukauwa vinaka na tabanilotu sa tu rawa.
Me baleta na veitokoni e Amerika kei Kenada, qirita na 1-801-240-1007. Ena taudaku kei Amerika kei Kenada, qirita na valenivolavola ni iwasewase.
36.1
Tauyavutaki se Veisautaki ni iTeki kei na Tikina
E dau tauyavutaki na iteki mai na tikina se na kena wasei na iteki sa tu rawa. E rawa ni vakatura e dua na peresitedi ni iteki se kaulotu na tauyavutaki ni dua na iteki vou. Me vakadeitaka taumada ni na sotava na ivakatagedegede ni yalayala e ra ka vakaraitaki toka oqo.
Veika e Gadrevi me Tauyavu Kina e Dua na iTeki
E dau tauyavutaki na tikina mai na veitabana ena tabana ni kaulotu se mai na dua na iteki sa tu rawa. E sega ni dua na iwiliwili e na kena ivakatagedegede e ra ni lewenilotu se na tabana e gadrevi me tauyavutaki kina e dua na tikina.
Sa dodonu me na tiko ena dua na tikina na ivakatagedegede ni kaukauwa e gadrevi ena dua na iteki ena loma ni ono na vula ke lailai ni bera ni qai vakatura na peresitedi ni kaulotu na kena tauyavu me iteki.
Na iyalayala ni iteki se tikina ena muria na iyalayala ni veitabanilotu e kovuta. Ni vakaturi me veisau na iyalayala ni iteki se tikina se tokitaki e dua na tabanilotu ki na dua na iteki se tikina voleka, me okata kina o peresitedi ni iteki se tabana ni kaulotu na ituvatuva ka cokonaka na vakatutu.
Me na tekivutaka na peresitedi ni iteki se tabana ni kaulotu e dua na vakatutu vou ena “Vakatutu ni iYalayala kei na Veiliutaki.” Kevaka e sega ni rawa ni vakayagataka na ivakarau ena initaneti, e rawa ni lavetaka na fomu pepa ena nona tabaka na isema ka toka ena kena ivakamacala.
Na veivakadonui ni veisau vakaturi me baleta na iteki eratou na solia na Mataveiliutaki Taumada kei na Kuoramu ni iApositolo Le Tinikarua. Vakararaba, na macala ni vakatulewa ena rawa ni taura e walu na macawa mai na ciqomi ni dua na vakatutu.
36.2
Tauyavutaki se Veisautaki ni Tabanalevu kei na Tabana ena iTeki
Na tabanalevu kei na tabana ena iteki era tauyavu mai na veitabanilotu sa tu rawa. Me vakatura na peresitedi ni iteki na tauyavutaki ni dua na tabanalevu se tabana vou ena iteki. Mena vakadeitaka taumada ni na sotava na tabanilotu vou na veika e gadrevi ena kena ivakatagedegede e ra ena ituvatuva oqo.
Vei ka e Gadrevi e na Kena iVakatagedegede e Ra me Tauyavu kina e Dua na Tabanalevu se Tabana ena iTeki
E rawa ni vakatura e dua na peresitedi ni iteki me veisau e dua na tabana ki na dua na tabanalevu ni sa sotava na tabanilotu na veika e gadrevi ena kena ivakatagedegede e ra ka sa kunea e dua e rawa ni veiqaravi vakabisopi.
E rawa ni vakatura e dua na peresitedi ni iteki na veisau se na muduki ni tabanalevu kei na tabana ni sa gadrevi dina.
Ena tekivuna e dua na peresitedi ni iteki e dua na vakatutu vou ena “Vakatutu ni iYalayala kei na Veiliutaki.” Kevaka e sega ni rawa ni vakayagataka na ivakarau ena initaneti, e rawa ni lavetaka na fomu pepa ena nona tabaka na isema ka toka ena kena ivakamacala.
Na veivakadonui ni vakatutu me yaco na veisau ena tabanalevu se tabana e lako mai vei iratou na Mataveiliutaki Taumada. Vakararaba, na macala ni vakatulewa ena rawa ni taura e ono na macawa mai na ciqomi ni dua na vakatutu.
36.3
Tauyavutaki se Veisautaki ni Tabana ena Tabana ni Kaulotu
E rawa ni vakatura e dua na peresitedi ni tabana ni kaulotu me tauyavu e dua na tabana vou ni kaulotu. E sega ni gadrevi e dua na iwiliwili lailai duadua ni lewenilotu ena kena tauyavutaki e dua na tabana ena tabana ni kaulotu. Ia, vakararaba na tabana vou e dodonu me tiko kina ke lailai sara e va na lewe ni matabete. Ke lailai sara me dua e lewe ni Matabete i Melikiseteki bulabula, dau saumi ikatini vakadodonu.
Ena tekivutaka e dua na vakatutu vou na peresitedi ni kaulotu ena “Vakatutu ni iYalayala kei na Veiliutaki.” Kevaka e sega ni rawa ni vakayagataka na ivakarau ena initaneti, e rawa ni lavetaka na fomu pepa ena nona tabaka na isema ka toka ena kena ivakamacala.
E rawa ki na Mataveiliutaki ni iWasewase me na vakadonuya se saqata na vakatutu ni dua na peresitedi ni kaulotu me:
-
Tauyavutaki ka vakatokayacataki e dua na tabana vou ena dua na tabana ni kaulotu.
-
Tagutuvi e dua na tabana ena tabana ni kaulotu.
-
Veisautaki na iyalayala ni tabana ena tabana ni kaulotu kevaka e sega ni na yavalata e dua na iteki, tikina, se dua tale na tabana ni kaulotu na veisau.
Sa dodonu me ratou na vakauta na Mataveiliutaki ni iWasewase na vakatutu vakadonui ki na itikotiko liu ni Lotu me cakacakataki ni sa bera ni qai tauyavutaki se veisautaki na tabana ena ivakarau ni Lotu.
E rawa ni tokona na Mataveiliutaki ni iWasewase ia e na sega ni solia na iotioti ni veivakadonui ki na nona vakatutu e dua na peresitedi ni kaulotu me:
-
Tokitaki e dua na tabana ki na dua tale na iteki, tikina, se tabana ni kaulotu.
-
Veisautaka na yaca ni dua na tabana sa tu rawa ena dua na tabana ni kaulotu.
-
Veisautaka na iyalayala ni tabana ena tabana ni kaulotu kevaka e na yavalata e dua na iteki, tikina, se dua tale na tabana ni kaulotu na veisau.
-
Tauyavutaka se veisautaka e dua na tabana ni kaulotu me baleti ira itabagone qase cake se uabula sega ni vakawati; lewenilotu era vosataka edua na vosa ka sega ni vosa ni nodra tabanilotu, lewenilotu era vakayagataka na vosa va-galu; lewenilotu ena veivale ni malumalumu, vanua ni veiqaravi, se valeniveivesu; se o ira na lewenilotu ena mataivalu.
Ena ituvaki vakaoqo, na Mataveiliutaki ni iWasewase ena railesuva na vakatutu, ia kevaka e ratou sa vakadeitaki, e rautou na qai vakauta me kerei na kena veivakadonui. Na vakadonui ni veisau ki na tabana ka vakatututaki tiko ena lako mai vei iratou na Mataveiliutaki Taumada. Vakararaba, na macala ni vakatulewa ena rawa ni taura e ono na macawa mai na ciqomi ni dua na vakatutu.
36.4
Vakatokayacataki ni Tabana ni Lotu
Na yaca ni dua na tabanilotu e dodonu me vukea na kena vakatakilakilataki vei ira ka vakaitikotiko ena vanua o ya. Vakararaba, na yaca ni veitabanilotu sa tiko rawa e sega ni dodonu me veisautaki.
Kevaka e gadrevi me veisau na yaca ni dua na tabanilotu ena vuku ni veisau ena kena iyalayala ni vanua, ena tekivuna na peresitedi ni iteki se tabana ni kaulotu e dua na vakatutu vou ena nona vakayagataka na ivakarau ena initaneti ena Vakatutu ni Yalayala kei na Veiliutaki. Kevaka e sega ni rawa ni vakayagataka na ivakarau ena initaneti, e rawa ni lavetaka na fomu ena pepa ena nona tabaka na isema ka vakaraitaki toka kina.
Na Mataveiliutaki Taumada ga e rawa ni vakadonuya na veivakatutu oqo.
Na Mataveiliutaki ni iWasewase e rawa ni vakadonuya na vakatutu ni kena tauyavutaki ka vakatokayacataki na tabana vou eso ena tabana ni kaulotu (raica na 36.3).
36.4.1
Vakatokayacataki ni iTeki kei na Tikina
Na imatai ni vosa ena yaca ni iteki se tikina sa ikoya e dua vei ira oqo:
-
Na siti e tiko kina na itikotiko liu ni iteki se tikina
-
E dua tale na siti kilai levu vei ira na lewenilotu ena iteki se tikina
-
E dua na ituvaki ni vanua kilai levu ena loma ni iteki se tikina
E Amerika kei Kenada, na ikarua ni vosa sa ikoya na yasana e tiko kina na iteki se tikina. Ena veivanua tale eso, na ikarua ni vosa sa ikoya na yaca ni vanua.
Ni sivia e dua na iteki se tikina ena dua na siti, na ikatolu ni vosa sa ikoya e dua na ivakatakilakila ena loma ni tabanilotu. Eso na ivakatakilakila vakatarai me baleta na yaca ni iteki kei na tikina sa koto e ra:
-
iDusidusi ni kabasi (vualiku, ceva, tokalau se ra)
-
Vanua vakaitikotiko se na veitikotiko raraba
-
Na ituvaki ni vanua
Eso na ituvaki ka ivakatakilakila ni vanua era sega ni vakatarai me baleta na yaca ni iteki kei na tikina e sa vakaraitaki toka e ra:
-
Eso tale na yaca ni matanicagi (me vakataka, na cevaira)
-
Yaca ni tamata
Ni tautauvata na yaca ni siti kei na yasana se vanua, ena sega ni cavuti vakarua na yaca. Me kena ivakaraitaki:
-
iTeki na Idaho Falls Taylor Mountain, sega ni iTeki na Idaho Falls Idaho Taylor Mountain
-
iTeki na México City Azteca, sega ni iTeki na México City México Azteca
36.4.2
Vakatokayacataki ni Tabanalevu kei na Tabana
E vakayacani e dua na tabanalevu se tabana ki na dua na ivakatakilakila ni vanua e tu ena loma ni kena iyalayala. Eso na ivakatakilakila ni vanua vakadonui e rawa ni vakayacani kina na tabanalevu kei na tabana sa toka e ra:
-
Siti
-
iTikotiko se yasa ni koro
-
Gaunisala
-
Rara ni Gade
-
Koronivuli
-
Na ituvaki ni vanua
Eso na ivakatakilakila e sega ni vakatarai me vakayacani kina na tabanalevu kei na tabana sa toka e ra:
-
iDusidusi ena kabasi (me vaka na, tokalau se vuaira)
-
Yaca ni tamata
-
Na yaca e yavutaki walega ena irairai (me kena ivakaraitaki, Temple View, Mountain View, se River View)
-
Cokovata e rua na yaca me dua kina na yaca vou
E vakayagataki ga ena yaca ni tabanalevu se tabana na yaca ni dua ga na ivakatakilakila. Kevaka e sivia e dua na tabanalevu se tabana na yaca vakatautauvata, me vakuri kina e dua na matanivika me tiki ni yaca, me vaka na Tabanalevu na Preston 1 kei na Tabanalevu na Preston 2.
Na yaca ni tabanalevu se tabana e dodonu me vaka na vosa ni vanua o ya. Kevaka e sega ni vakayagataki ena ivosavosa na matanivola vaka-Roma, me na dua na ivakadewa ena matanivola vaka-Roma me okati ena ivolakerekere.
36.5
Kena Vakayagataki na Veisau Vakaturi
36.5.1
Veisau ena iTeki kei na Tikina
Na ivola ni veivakadonui ni kena tauyavutaki se tamusuki e dua na iteki se tikina e dau vakaraitaka na tikinisiga me na vakayacori kina na veisau. Me na kakua mada ni kacivaki na tikinisiga oqo me yacova ni sa veitalanoataka oti na kena matailalai o koya na Vakaitutu Raraba e lesi kei na peresitedi ni iteki se tabana ni kaulotu. Ena sega mada ni kacivaki na veisau me yacova na koniferedi ni iteki se tikina.
Ena qai tukutuku ki na itikotiko liu ni Lotu se ki na nona valenivolavola ni iwasease na peresitedi ni iteki se tabana ni kaulotu ni sa caka oti na veisau.
36.5.2
Veisau ena Tabanalevu kei na Tabana
Ni oti nona ciqoma na peresitedi ni iteki se tabana ni kaulotu na veivakadonui me veisau e dua na tabanalevu se tabana, e dodonu me kacivaka ni i vo tu e 90 na siga vei ira na lewenilotu me baleta na nodra laveliga ni veitokoni. Kevaka e gadreva me vakadaroya me sivia na 90 na siga, me na kerea na veivakadonui mai na Valenivolavola ni Mataveiliutaki Taumada.
O ira na peresitedi ni iteki se tabana ni kaulotu era na vakacuruma na vakatutu ena VLV ni sa vakayacori oti na veisau. Me baleta na veivuke e Amerika kei Kenada, qirita na 801-240-6243 se imeli ki na oiservices@ChurchofJesusChrist.org. Ena veivuke e taudaku kei Amerika kei Kenada, veitaratara kei na valenivolavola ni iwasewase. Ena sega mada ni vakadodonutaki na mape kei na tabanilotu me yacova ni ra sa vakaivolatukutukutaki mai na itikotiko liu ni Lotu.
36.6
Parokaramu Taumada ni Tabanilotu
Sa vakarautaka na Lotu na Parokaramu Taumada ni Tabanilotu me vakayagataki ena so na veitabana lalai se vakasoqoni lalai vakadonui ni lewenilotu, ka vakatokai me ilawalawa (raica na 37.7 me baleta na ikuri ni itukutuku baleta na ilawalawa). Ena rawa ni vakadonuya edua na Mataveiliutaki ni iWasewase na vakayagataki ni Parokaramu Taumada ni Tabanilotu ena veiilawalawa se veitabana ka tiko kina na veiituvaki vakaoqo:
-
Se qai tauyavutaki na Lotu.
-
Era tu veiyawaki na lewenilotu.
-
E lailai na iwiliwili ni lewenilotu, ka se qai tekivu tarai cake tiko na veiliutaki.
-
O ira na lewenilotu e tiko nodra gadreva vakatabakidua edua na vosa.
-
Era lewe ni mataivalu na lewenilotu (raica na 38.9.4 ena vuna me tauyavutaki kina edua na ilawalawa lewenilotu lewe ni mataivalu).
-
Era tiko na lewenilotu ena vale ni malumalumu, ena parokaramu ni veiqaravi, se valeniveivesu.
Era vakabibitaka na Mataveiliutaki ni iWasewase kei ira na iliuliu tale eso nio ira na tabanilotu era vakayagataka tiko na Parokaramu Taumada ni Tabanilotu mera na kua ni vakalevutaka vakatotolo na mataisoqosoqo, na soqoni, kei na parokaramu. Era na tuberi vakavinaka na veiliutaki ni veiraurau vinaka na ivurevure ni Lotu kei na nodra ituvaki kei na gagadre ni lewenilotu.
Era na wasea talega na iliuliu na ivakavuvuli e ra ki na veilawalawa kei na veitabana ena nodra vakayagataka na Parokaramu Taumada ni Tabanilotu:
-
Vakasaqara na veivakauqeti ni Yalo mo kila na ka me caka kei na sala me caka kina.
-
Vakavulica na ivunau taumada kei na ivakavuvuli ni kosipeli.
-
Vukei ira na lewenilotu (1) mera kila ka ciqoma na cakacaka vakalotu bibi ni matabete ka (2) cakava ka maroroya na veiyalayalati e salavata kaya.
Na veitabanilotu oqo e rawa nira vakayaco soqoni ni Lotu ena dua na vale, dua na vale redetaki, se dua na vale e taukena na Lotu (raica na 35.3). Sa rawa vei iratou na mataveiliutaki ni tabana ni kaulotu, iteki, se tikina me vakarautaka na ivakamacala ni kena tauri ka maroroi edua na vanua ni soqoni me baleta na ilawalawa se tabana.
Kevaka era lewe lailai ga na lewenilotu ena ilawalawa se tabana, era na vakayacora ga na soqoni ni sakaramede kei na dua na gauna ni veidusimaki vakosipeli vei ira kece na lewenilotu. Ena veidusimaki vakosipeli, mera vakayagataka na lewenilotu na ivolanikalou kei na Lako Mai, Mo Muri Au—Me Baleta na iTikotiko kei na Lotu. Kevaka era se bera ni vakadewataki na ivolanikalou ki na vosa era vosataka na lewenilotu, era na vakayagataka na lewenilotu na ivolavakarau ni Gospel Fundamentals (iVakavuvuli Taumada ni Kosipeli) me baleta na veidusimaki ni kosipeli. Ni tubu tiko na Lotu, ena qai vakarautaki e levu tale na ivakadewa ni ivolanikalou, serenilotu kei na sere, kei na mekasini ni Lotu.
Ni tubu tiko na tabanilotu, sa dodonu vei ira na iliuliu ni Lotu me ra tauyavutaka edua na kuoramu ni italatala qase kei na dua na iSoqosoqo ni Veivukei (raica na 8.3.3 kei na 9.3.2). Ni tubu tiko na iwiliwili ni lewenilotu kei na kedra iwiliwili na iliuliu mera na veiliutaki, sa rawa vei peresitedi ni tabana me tauyavutaka na mataisoqosoqo ni kuoramu ni Matabete i Eroni kei na Goneyalewa, Lalai, kei na Matawilivola ni Sigatabu (raica na 10.3, 11.3.2, 12.3.2, kei na 13.2.2).