38.

Ol Polisi mo Ol Gaedlaen blong Jos

38.1

Tekpat long Jos

Papa blong yumi we i stap long Heven i lavem ol pikinini blong Hem. “Evriwan i semmak long God,” mo Hem i stap invaetem evriwan blong “kam long hem mo tekem pat long gud fasin blong hem” (2 Nifae 26:33).

Plante taem, oli askem long ol lida mo ol memba blong Jos se huia nao i save go long ol miting blong Jos Ia blong Jisas Kraes blong Ol Lata-dei Sent, huia i save kam ol memba blong Jos, mo huia i save go insaed long wan tempol.

38.1.1

Atendens long Ol Miting blong Jos

Sevya i bin tijim se ol disaepol blong Hem oli mas lavem ol neba blong olgeta (luk long Matiu 22:39). Pol i bin invaetem ol niu konvet blong oli “no moa stap olsem we yufala i strenja, mo yufala i man blong narafala ples. Naoia, yufala i gat raet insaed long ples blong God, olsem ol narafala man blong God nomo. Yufala i insaed long famli blong God finis” (Efesas 2:19)). Sevya i bin tijim tu se ol memba blong Jos oli no mas “sakem wan aot long ol pablik miting … , we [oli] holem long fored blong wol” (Doktrin mo Ol Kavenan 46:3)).

Evriwan i welkam blong stap long sakramen miting, ol nara miting long Sandei, mo ol nara sosol taem blong Jos Ia blong Jisas Kraes Ia blong Ol Lata-dei Sent. Prisaeding ofisa nao i responsibol blong mekemsua se evriwan we oli kam, oli mas gat respek long tabu taem ia.

Olgeta we oli kam, oli no mas stopem o pulumaot tingting long wosip o ol nara stamba tingting blong miting. Bae evriwan i mas folem ol miting blong Jos mo ol samting we oli stap hapen insaed long Jos, folem yia mo fasin we i stap insaed long Jos. Hemia i minim tu se wanwan i mas holemtaet hem blong no gat fasin blong soemaot lav blong hem long patna blong hem long pablik long wan wei we i go tumas, mo i no mas dresap o mekem hem long wan wei we i pulum tumas tingting blong man. Hem i minim tu se bae wan i no save mekem toktok long saed blong politik, o i no save tokbaot fasin we wan i gat long saed blong seks, o ol nara pesonol fasin blong man long wan wei we i mekem se ol miting oli nomo lukluk nomo long Sevya.

Sapos i gat wan fasin we i stap we i no stret, bisop o stek presiden i save givim kaonsel long praevet wetem wan spirit blong lav. Hem i leftemap tingting blong olgeta we fasin blong olgeta i no stret long taem ia, blong oli lukluk nomo blong help blong holemtaet wan spes we i tabu blong evriwan we i stap, mo hem i tokbaot plante moa blong stap wosipim Papa long Heven mo Sevya.

Ol mitinghaos blong Jos, oli stap olsem ol praevet propeti we oli yusum folem ol polisi blong Jos. Olgeta we oli no wantem, o oli no glad blong folem ol gaedlaen ia, bae oli askem olgeta, long wan fasin we i gat respek, blong oli no kam long ol miting blong Jos, o ol samting we Jos i oganaesem.

38.1.2

Stap Kam Wan Memba blong Jos

Blong kam memba insaed long Jos Ia blong Jisas Kraes blong Ol Lata-dei Sent, i stap long ol pipol we oli “kam fored wetem ol hat we oli fulap wetem sore mo ol spirit we oli wantem blong sakem sin,” mo oli wantem blong mekem mo kipim ol tabu kavenan blong baptaes (Doktrin mo Ol Kavenan 20:37).

Blong baptaes blong ol pikinini we oli gat 8 yia i go antap, luk long 38.2.8.2.

38.1.3

Tempol Wosip

Ol tempol oli ol tabu ples blong wosip, we insaed long hem, man i stap kasem ol odinens we i nid blong kasem, mo oli mekem ol tabu kavenan. Long ol memba blong Jos, ol tempol oli ol haos blong God. From tempol i tabu tumas mo from ol kavenan we oli stap mekem insaed, ol memba blong Jos nomo we oli gat wan tempol rekomen we i laef i stap oli save wosip insaed long tempol. Ol memba oli save kasem wan tempol rekomen taem we oli stap fetful blong stap kipim ol komanmen we oli mas kipim, mo taem we oli stap laef folem gospel blong Jisas Kraes. (Luk long japta 26.)

38.1.4

Fasin blong Tekpat mo Ol Blesing blong Ol Memba we Oli No Mared

Evri memba, iven sapos oli neva mared, o oli no gat famli insaed long Jos, oli mas traehad blong gat wan laef insaed long wan famli we i no save finis. Hemia i minim blong stap rere blong sil olsem wan hasban o waef, mo blong kam wan papa mo mama we i gat lav. Long sam, olgeta blesing ia bae oli no save kamtru kasem nekis laef, be stamba gol i semmak long evriwan.

Ol fetful memba we situesen blong olgeta i no letem olgeta blong kasem ol blesing blong mared we i no save finis mo blong kam papa o mama long laef ia, bambae oli kasem evri blesing we God i promes long hem, long ol taem we i no save finis, sapos oli kipim olgeta kavenan blong olgeta we oli bin mekem wetem God (luk long Mosaea 2:41).

38.1.5

Wan Papa o Mama we I No Mared mo I No Kasem 18 Yia Yet

Wan yang man we i no mared, mo i no kasem 18 yia yet, we bae i kam wan papa, i save stap insaed long kworom blong Aronik Prishud, o i save stap insaed long kworom blong ol elda. Desisen ia, yang man ia bae i prea from, mo papa mo mama blong hem, mo bisop blong hem bae oli prea from.

Wan yang woman we i no mared, mo i no kasem 18 yia yet, we bae i kam wan mama, i save stap insaed long Ol Yang Woman, o insaed long Rilif Sosaeti. Desisen ia, yang woman ia bae i prea from, mo papa mo mama blong hem mo bisop blong hem bae oli prea from.

Taem oli stap tekem desisen ia, yut ia, papa mo mama blong hem, mo ol lida blong hem oli lukluk long olgeta samting ia:

• Sapos yut ia i tekpat long ol klas mo aktiviti blong ol yut, bae pikinini ia i no mas go wetem hem.

• Ol yut we oli bigwan smol we oli jusum blong lukaotem pikinini blong olgeta, bae i gud moa sapos oli welkamem olgeta long kworom blong ol elda, o insaed long Rilif Sosaeti.

38.2

Ol Polisi blong Ol Odinens mo Ol Blesing

Japta ia i givim ol polisi long saed blong ol odinens mo ol blesing. Sam long ol polisi ia, oli lukluk long sam spesel situesen. Ol jeneral infomesen abaot ol odinens mo ol blesing, i stap long japta 18. Infomesen abaot ol tempol odinens, i stap insaed long ol japta 27 mo 28.

38.2.1

Stap Intepretem Ol Odinens mo Ol Blesing I Go long Wan Nara Lanwis

Hem i impoten blong man o woman ia we i kasem wan odinens o wan blesing, blong hem i andastanem wanem nao oli talem. Sapos i nid, wan prisaeding lida i save askem wan blong talem mining blong odinens o blesing ia i go long wan lanwis we, hem we i kasem, bae i andastanem. Hemia i tekem tu saen lanwis intepretesen.

Sapos wan man o woman we i stap kasem wan odinens o blesing, i no save harem gud samting o sora i fas, hem i save yusum wan voes-i go long-teks ap. Olgeta we sora i fas, o oli no save harem gud samting, oli save yusum tu fasin blong toktok tru long saen lanwis, o voes-i go long-teks ap blong andastanem ol blesing we oli givim long ol famli memba blong olgeta.

Blong infomesen abaot ol translesen we oli raetem blong ol petriakel blesing, luk long 38.2.10.5. Blong kasem infomesen abaot saen lanwis intepretesen blong ol petriakel blesing, luk long 38.2.10.6.

38.2.2

Ol Foto, Ol Rekoding, mo Raeting blong Ol Odinens mo Ol Blesing

Ol odinens mo ol blesing oli tabu. From risen ia, i no mas gat wan i tekem ol foto, o mekem ol vidio rekoding blong ol odinens, ol blesing, o ol seves blong baptaes.

Wan famli i save mekem wan odio rekoding, mo i save raetem blesing blong papa. Ol blesing ia, oli tokbaot olgeta long 18.14.1.

Ol petriakel blesing, oli stap raetemdaon olgeta. Blong mekem hemia i hapen, petriak o wan we i stap raet blong hem, i mekem wan odio rekoding blong blesing.

Oli no mas rekodem o raetemdaon ol narafala odinens mo blesing.

Blong gat moa infomesen blong stap serem ol odinens onlaen, luk long 38.2.3.

38.2.3

Soem Ol Odinens Onlaen

Taem we i posibol, olgeta we oli wantem luk wan odinens i hapen, oli mas traehad blong go olgetawan. Taem we ol memba mo ol fren oli kam tugeta from wan odinens, bae oli filim paoa blong Spirit, mo felosip wetem wanwan long olgeta.

Be, taem wan stret famli i no save kam hemwan, bae bisop o stek presiden i save givim raet blong oli soem odinens ia long hem onlaen. Blong soem onlaen, oli save givim raet, eksampol, taem we stret famli ia:

• I stap laef long wan ples we oli longwe, o oli no gat janis blong kasem transpot o travel.

• I gat ol jalenj blong helt long bodi, tingting, o filing.

• Oli sarem hem from sefti o oli putum olgeta i stap long wan kea bilding, o long hospital.

• I nidim saen lanwis intepretesen.

• I givim seves long wan ful taem misin. (Misin presiden i mas apruvum hemia.)

Bisop i save givim raet blong oli soem onlaen ol bebi blesing, ol konfemesen, mo ol odinesen long Aronik Prishud. Stek presiden i save givim raet blong oli soem onlaen ol odinesen long Melkesedek Prishud, mo taem we oli setem apat ol misinari.

Oli no save soem odinens blong sakramen onlaen. Sapos oli soem wan sakramen miting tru long intanet, bae oli stopem intanet long taem ia we oli blesem mo pasem sakramen. Bisop i save givim raet long wan pris o wan we i holem Melkesedek Prishud blong blesem mo pasem sakramen ia fes tu fes long olgeta we oli no save kam long miting ia (luk long 18.9.1

Ol odinens tru long intanet o onlaen, oli no mas pulumaot tingting blong wan blong filim Spirit. Plante taem, bae oli yusum wan lektronik tul nomo. Wod o stek teknoloji speselis nao i wok long ol tul ia. Tugeta, tul ia mo hem we i wajem, oli no mas pulum ae blong man.

Ol odinens we oli soem onlaen, oli mas dilitim stret bifo en blong nekis dei blong miting ia.

38.2.4

Ol Odinens blong Olgeta we Oli Gat Disabiliti long Tingting

Taem oli stap tingting se bae oli mekem ol odinens blong wan we i gat disabiliti long tingting, man o woman ia, ol prishud lida mo papa mo mama o olgeta we oli gat raet folem loa blong lukaot long hem (taem i gat), mo ol lida, oli kaonsel o toktok tugeta. Oli prea mo lukluk long wanem hem we i gat disabiliti i wantem, o hamas hem i andastanem samting. Oli no mas blokem ol odinens long wan man o woman sapos hem i klin inaf, sapos hem i wantem kasem olgeta, o sapos hem i soem se hem i responsibol mo i akaontebol inaf.

Bisop i save toktok wetem stek presiden sapos hem i gat kwestin abaot sam spesifik man o woman. Stek presiden i save toktok i go long Ofis blong Fas Presidensi sapos i nid.

Olgeta we oli gat disabiliti we i mekem se oli no akaontebol, o oli no save ansa from aksen blong olgeta, “Lod i sevem olgeta oli go long selestial kingdom blong heven” (Doktrin mo Ol Kavenan 137:10). From risen ia, i no nid blong oli mekem ol odinens long olgeta o blong olgeta. Wan eksepsen nomo i stap i blong mekem siling blong olgeta long papa mo mama blong olgeta, sapos oli no bon insaed long kavenan.

Blong kasem moa infomesen abaot wei blong mekem ol odinens ia blong olgeta we oli gat ol disabiliti long tingting, luk long olgeta ia:

• Blong baptaes mo konfemesen 38.2.8.1

• Blong odinesen long wan prishud ofis 38.2.9.7

• Blong wan petriakel blesing 38.2.10.1

• Blong tempol endaomen mo tempol siling, 27.2.1.3 mo 27.3.1.2

38.2.5

Stap Mekem Ol Odinens mo Ol Blesing: I Kam long, mo blong Olgeta we Oli Gat Disabiliti long Bodi

Olgeta we oli gat ol disabiliti long bodi, olsem taem wan i lusum han o leg blong hem, taem wan i paralaes, taem wan i nomo save harem samting, olgeta ia, oli save mekem mo oli save kasem ol odinens mo ol blesing. Ol lida oli mekem ol samting oli rere blong mekem se olgeta man o woman ia oli save tekpat olsem we i posibol. Sapos ol lida oli gat ol kwestin we oli no save stretem, nao stek presiden i kontaktem Ofis blong Fas Presidensi.

Olgeta we sora i fas, o oli no save harem gud samting, oli save toktok tru long saen lanwis taem we oli stap mekem o kasem wan odinens o blesing. Wan prishud lida, we i lukluk ova wan odinens i meksua se hem we i kasem odinens ia i andastanem tru long wan intepreta, o tru long wan nara wei (luk long 38.2.1).

38.2.6

Mekem Ol Odinens Oli Ofisol o Oli Laef

Infomesen we i stap daon ia, i givim ol risen from wanem bae wan odinens i no gud, o i no laef. Hem i talem tu olsem wanem blong mekem wan odinens i ofisol, o i laef.

Long sam kes, bae oli mas mekembak odinens ia. Taem hemia i hapen, klak i raetemdaon niufala dei long membasip rekod, iven sapos i no go stret wetem ol deit blong ol nara odinens.

38.2.6.1

Oli No Krietem Wan Membasip Rekod o Yia blong Hem I Nogat o I No Stret

Long saed blong stamba tingting blong kipim ol rekod, oli tekem se wan odinens i nogud i stap, o i no laef i stap sapos oli no raetemdaon yia, o sapos yia we oli raetem i no stret long membasip rekod. Antap long hemia, wan baptaes i no laef i stap sapos oli oli no krietem wan membasip rekod. Oli save mekem se odinens ia i laef bakegen sapos wan memba i soem orijinol setifiket we oli bin givim taem we oli bin mekem odinens ia. Wetem setifiket ia, bisop i save givim raet long wan klak blong i stretem membasip rekod.

Sapos oli no save faenem setifiket, bae oli save mekem odinens ia i laef bakegen tru long testemoni blong tu pipol we oli bin witnesem taem ia. Tufala witnes ia, i mas olsem:

• I gat 8 yia o moa taem we oli bin mekem odinens ia.

• I bin luk mo harem odinens ia.

• I mas ol memba blong rekod blong Jos long tetaem ia we oli givim testemoni blong olgeta.

• I mas raetemdaon testemoni blong tufala, mo tufala i talem, (1) ful deit we oli bin mekem odinens ia, o (2) yia we i bin hapen mo nem blong man ia we i bin mekem odinens ia.

• I mas saenem testemoni blong hem long fored blong wan memba blong bisoprik o stek presidensi.

Wetem testemoni ia, bisop i save givim raet long wan klak blong i krietem o apdeitem membasip rekod. Afta long hemia, testemoni ia we oli raetem, oli save sakemaot.

Sapos oli no save faenem setifiket, o ol witnes, nao bae oli mas mekem odinens ia bakegen nomo.

Sapos wan memba i bin kasem ol nara odinens afta we hem i bin kasem wan odinens we i no laef i stap, nao bae Fas Presidensi i mas apruvum o mekem odinens ia i laef. Blong askem hemia, bae stek presiden i sendem wan leta i go long Ofis blong Fas Presidensi.

38.2.6.2

Ol Odinens we Oli Kasem be I No Folem Stret Oda

Wan odinens i nogud i stap, o i no laef i stap sapos wan i kasem be i no folem stret oda blong hem. Eksampol, endaomen blong wan memba we i wan man, i no laef i stap sapos hem i kasem endaomen bifo hem i kasem Melkesedek Prishud. Be, Fas Presidensi i mas apruvum wan odinens we i bin hapen olsem. Blong askem hemia, bae stek presiden i sendem wan leta i go long Ofis blong Fas Presidensi.

38.2.6.3

Oli Mekem Odinens Bifo Stret Yia blong Hem

Wan odinens i nogud i stap, o i no laef i stap sapos wan i kasem bifo hem i kasem stret yia blong hem. Eksampol, wan baptaes i no laef i stap sapos oli bin mekem bifo boe o gel ia i gat 8 yia.

Sapos oli no bin mekem eni nara odinens folem odinens ia we i no laef i stap, nao bae oli mas mekem bakegen nomo. Sapos wan i bin kasem ol nara odinens afta, ol odinens ia mo odinens we i no laef i stap, bae Fas Presidensi i mas apruvum o mekem odinens ia i laef. Blong askem hemia, bae stek presiden i sendem wan leta i go long Ofis blong Fas Presidensi.

38.2.6.4

Odinens we Oli Mekem be I No Tru long Stret Atoriti

Wan odinens i no laef i stap sapos hem i we mekem odinens ia, i nogat stret prishud atoriti. Eksampol, wan konfemesen i no laef i stap sapos hem we i mekem, i no bin kasem Melkesedek Prishud. Semmak, hem i no laef i stap sapos hem we i mekem, i no kasem Melkesedek Prishud long stret oda blong hem, o sapos hem i no bin kasem stret raet (luk long 38.2.6.2; luk tu long 32.17).

Sapos oli no bin mekem eni nara odinens folem odinens ia we i no laef i stap, nao bae oli mas mekem bakegen nomo, mo wan we i gat stret atoriti nao bae i mekem. Sapos wan i bin kasem ol nara odinens afta, ol odinens ia mo odinens we i no laef i stap, bae Fas Presidensi i mas apruvum o mekem odinens ia i laef. Blong askem hemia, bae stek presiden i sendem wan leta i go long Ofis blong Fas Presidensi. Long sam kes, Fas Presidensi bae i save givim instraksen se bae oli mekem ol odinens ia bakegen.

38.2.7

Stap Givim Ol Nem mo Blesing long Ol Pikinini

Blong kasem ol jeneral Infomesen abaot fasin blong givim nem mo blesing long ol pikinini, luk long 18.6.

38.2.7.1

Ol Bebi we Oli Sik Bigwan

Sapos wan niubon i sik bigwan, wan we i kasem Melkesedek Prishud i save givim nem mo blesing insaed long hospital, o insaed long hom. Man ia i no nidim raet we i kam long bisop. Afta we oli givim blesing, hem i talem long Bisop kwiktaem blong mekem se oli save krietem wan membasip rekod blong pikinini ia.

38.2.7.2

Ol Pikinini we Papa mo Mama blong Olgeta Oli No Mared (Hemia i tekem Olgeta We Oli Divos tu)

Oli save blesem wan pikinini taem bisop i kasem raet tru toktok nomo long papa mo mama, o wan we i gat raet blong lukaot long pikinini ia. I no nidim blong kasem raet blong wan papa o mama o hem we i lukaotem pikinini, we i no gat raet folem loa blong no agri long blesing ia.

38.2.7.3

Ol Pikinini We Papa mo Mama blong Olgeta Oli No Ol Memba blong Jos

Samtaem, papa o mama, o wan we i gat raet folem loa, blong lukaot long wan pikinini, i save askem blong oli blesem wan pikinini iven sapos oli no ol memba blong Jos. Sapos hemia i hapen, bisop i kasem raet, long toktok, we i kam long tugeta, papa mo mama, o olgeta we oli gat raet blong lukaot long pikinini. I no nidim blong kasem raet blong wan papa o mama o hem we i lukaotem yangfala, we i no gat raet folem loa blong no agri long blesing ia.

Bisop i eksplenem se:

• Bae oli krietem wan membasip rekod blong pikinini ia.

• Ol memba blong wod bae oli kontaktem olgeta wanwan taem.

• Hem o ol nara lida blong wod bae oli proposem se bae pikinini i rere blong kasem baptaes taem bae hem i stap kam kolosap blong gat 8 yia.

38.2.8

Baptaes mo Konfemesen

Blong gat ol jeneral infomesen long saed blong baptaes mo konfemesen, luk long 18.7 mo 18.8.

38.2.8.1

Olgeta we Oli Gat Disabiliti long Tingting

Wan pikinini wei gat wan disabiliti long saed blong tingting i save kasem baptaes mo konfemesen nomo sapos hem i save stap akaontebol inaf. Hem i mas save andastanem mo kipim ol kavenan blong baptaes.

Bisop i stap holem ol ki blong baptaes blong boe o gel, man o woman ia, sapos hem i:

• Wan memba blong rekod we i gat 8 yia i go antap.

• Hem i gat 8 yia mo hem i gat papa o mama, o wan we i gat raet blong lukaot long hem, i wan memba blong Jos (luk long 18.7.1.1).

Hem ia, we i gat 8 yia o moa, papa mo mama blong hem, mo hem we i gat raet blong lukaot long hem (taem i gat), mo bisop, oli toktok tugeta blong faenemaot sapos hem we i gat disabiliti ia i sapos blong kasem baptaes o konfemesen.

Sapos hem ia i wan fiuja konvet, misin presiden i holem ol ki blong baptaes blong hem (luk long 18.7.1.2). Long kes ia, ol misinari oli talemaot hemia long misin presiden. Misin presiden i kaonsel wetem hem ia we i gat disabiliti, papa mo mama blong hem, mo hem we i gat raet blong lukaot long hem (taem i gat), blong faenemaot sapos hem i sapos blong kasem baptaes o konfemesen. Sapos bisop i savegud man o woman ia, bae misin presiden i save askem tingting blong hem.

Olgeta we oli no akaontebol, oli no nid blong kasem baptaes, mo hemia, i nomata se hem i gat hamas yia (luk long Doktrin mo Ol Kavenan 29:46–50 mo 38.2.4 insaed long hanbuk ia).

Blong gat moa infomesen abaot ol membasip rekod blong ol man mo woman we maet oli no akaontebol, luk long 33.6.10.

38.2.8.2

Olgeta we Oli No Kasem 18 Yia Yet

Wan we i no gat raet blong mekem samting blong hemwan yet, olsem we ol lokol loa oli talem, i save kasem baptaes taem nomo oli folem ol kondisen ia:

1. Papa mo mama o olgeta we oli gat raet folem loa blong lukaot wan, i givim raet. I no nidim blong kasem raet blong wan papa o mama o hem we i lukaotem yangfala, we i no gat raet folem loa blong no agri long baptaes ia. I nidim apruvol blong Fas Presidensi long ol eksepsen.

   Hem we i mekem intaviu blong baptaes mo konfemesen i askem blong oli raetem wan leta we i talem se oli agri sapos hem i filim se bae i help blong stopem fasin blong no andastanem gud wanem we i stap. Long sam ples, bae oli mas raetem wan leta blong talem se oli agri. Ol lida blong misin mo blong eria oli save givim sam help long ples ia.

   Papa mo mama o olgeta we oli gat raet folem loa blong lukaot wan, i mas andastanem doktrin we bae oli tijim long pikinini blong olgeta. Mo tu, oli mas wantem blong sapotem pikinini blong olgeta blong mekem mo kipim kavenan ia blong baptaes.

2. Hem we i lidim intaviu i faenemaot tru long Spirit se pikinini ia i andastanem kavenan blong baptaes ia. Hem i mas filim gud long hemwan se pikinini ia i stap traehad blong kipim kavenan ia taem hem i stap obei long olgeta komanmen, mo tu, taem hem i stap atendem ol miting blong Jos.

Sapos wan pikinini i stap yusum nem blong step-papa blong hem, pikinini ia i save kasem baptaes mo konfemesen, wetem nem ia. Hemia bae i olsem, iven sapos oli no bin adoptem hem folem loa. Be, long membasip rekod mo setifiket blong baptaes mo konfemesen blong hem, bae oli mas raetemdaon nem blong pikinini ia folem loa, o olsem we ol lokol loa (gavman) o kastom i putum i stap.

38.2.8.3

Olgeta we Oli Mared

Wan we i mared finis, i mas gat raet blong hasban o waef blong hem bifo hem i baptaes.

38.2.8.4

Olgeta we Oli Laef Tugeta be Oli No Mared

Wan kapol we oli stap laef tugeta, be oli no mared, oli mas komitim olgeta blong laef folem loa blong jastiti bifo tufala i save baptaes. Hem ia i tekem tu blong stap praktisim fet blong save sakem sin, olsem we i stap long Doktrin mo Ol Kavenan 20:37. Hem i tekem tu blong nomo stap laef tugeta, o long kes blong wan man mo wan woman,

38.2.8.5

Ol Man o Woman we Oli Karemaot Jos Membasip long Olgeta, o Oli Sakemaot Membasip

Olgeta man o woman we oli bin karemaot Jos membasip long olgeta, o oli bin sakemaot membasip blong olgeta, bae oli save tekembak olgeta tru long baptaes mo konfemesen. Oli no tekem olgeta se oli ol konvet. Ol misinari oli no mekem intaviu long olgeta blong oli kasem baptaes. Blong ol instraksen, luk long 32.16.

38.2.8.6

Ol Situesen we I Nidim Raet we I Kam long Misin Presiden o Fas Presidensi

I nidim blong gat raet we i kam long misin presiden bifo wan i save kasem baptaes sapos hem i bin mekem wan o moa long ol samting:

• Hem i mekem wan series kraem (luk long 38.2.8.7).

• I tekpat long wan abosen (luk long 38.6.1).

Long ol kes olsem, misin presiden nao i intaviu long man o woman ia. Sapos i nid, misin presiden i save givim raet long wan long tufala kaonsela blong hem blong mekem intaviu ia. Hem i givim raet ia i seperet, i blong wanwan intaviu. Kaonsela we i mekem intaviu ia, i givim ripot i go long misin presiden, misin presiden i save givim raet, o i save blokem blong baptaes mo konfemesen ia i tekples.

I nidim blong gat apruvol we i kam long Fas Presidensi bifo wan i save kasem baptaes mo konfemesen sapos hem i bin mekem wan o moa long ol samting:

• I bin kilimded man bifo finis (luk long 38.2.8.7).

• I bin mekem wan kraem we i go wetem rabis fasin long saed blong seks (luk long 38.2.8.7).

• I stap long probesen blong loa naoia, o i aot long kalabus folem kondisen we Kot i putum long hem, hemia folem eni series o aksen agensem loa (we plante taem oli stap sarem olgeta blong wan yia o moa long kalabus) o eni kraem we i go wetem rabis fasin long saed blong seks (luk long 38.2.8.7).

• I bin tekpat o stap insaed long praktis blong maredem fulap woman o maredem fulap man long semtaem (luk long 38.2.8.8).

Blong kasem gaed abaot fasin blong baptaesem mo konfemem wanwan man o woman we oli talem se oli transjenda, luk long 38.2.8.9.

Sapos wan i wantem kasem baptaes blong fas taem, misin presiden bae i intaviu long hem. Sapos hem i filim se man o woman ia i klin inaf mo sapos hem i agri blong man o woman i kasem baptaes, bae hem i putum wan rikwes blong oli apruvum i go long Fas Presidensi; blong mekem hemia, bae hem i yusum RLK.

Sapos man o woman ia i wan foma memba we i wantem kambak long Jos, bisop mo stek presiden bae i intaviu long hem. Oli folem ol instraksen we oli stap long 32.16. Sapos tufala i filim se man o woman ia i klin inaf mo sapos tufala i agri blong man o woman i kasem baptaes, bae stek presiden i putum wan rikwes blong oli apruvum i go long Fas Presidensi; blong mekem hemia, bae tufala i yusum RLK.

Eni rikwes we i go long Fas Presidensi i mas gat evri impoten ditel olsem we ol intaviu i talemaot.

Luk long 6.2.3 abaot responsabiliti blong stek (o misin presiden) taem oli stap putum ol rikwes i go long Fas Presidensi.

38.2.8.7

Olgeta we Kot I Faenem Olgeta Oli Rong From Oli Mekem Ol Kraem

Olgeta we Kot i faenem olgeta oli rong from oli mekem ol kraem, bae oli no save kasem baptaes mo konfemesen kasem taem we oli flatem taem blong olgeta long kalabus. Hemia i tru blong ol konvet, mo blong olgeta we oli wantem kambak insaed long jos.

Olgeta man o woman we Kot i faenem olgeta oli rong from ol bigfala kraem, o eni kraem we i long saed blong seks, bae i no save baptaes mo kasem konfemesen kasem taem we oli bin finisim taem blong olgeta long kalabus o taem we oli putum olgeta kalabus folem ol kondisen. Fas Presidensi nomo i save givim raet blong wan eksepsen (luk long 38.2.8.6). Olgeta man o woman ia, oli leftemap tingting blong olgeta blong wok kolosap wetem ol lokol prishud lida. Oli traehad blong mekem evri samting we oli save mekem blong kasem help we i kam long Sevya blong helpem olgeta blong kam klin inaf blong kasem baptaes mo konfemesen.

Ol fultaem misinari oli no mas tijim ol pipol we oli stap long kalabus.

Wan we Kot i faenem hem se hem i rong from hem i kilimded wan man o wan kraem we i go wetem rabis fasin long saed blong seks, bae i no save kasem baptaes sapos Fas Presidensi i no givim raet from (luk long 38.2.8.6). Hemia i tru semmak long wan we i bin konfes se hem i bin kilim man i ded, iven sapos konfes toktok ia i bin kamaot long wan praevet storian wetem wan prishud lida. Olsem we oli yusum long ples ia, fasin blong kilim man i ded i no tekem abosen, o polis o militeri aksen we i bin hapen long taem blong diuti.

Sapos wan i wantem kasem baptaes blong fas taem, misin presiden i folem ol instraksen long 38.2.8.6. Sapos man o woman ia i wan foma memba we i wantem kambak long Jos, bisop mo stek presiden i folem ol instraksen insaed long semmak seksen (luk tu long 32.16

38.2.8.8

Ol Adalt we Oli Stap Praktisim Fasin blong Maredem Fulap Woman o Man long Semtaem

Wan adalt, we bifo i kam, hem i stap leftemap tingting blong man, i bin tijim, o bin stap praktisim fasin blong gat fulap woman o man long semtaem, i mas kasem apruvol blong Fas Presidensi fastaem, bifo hem i save kasem baptaes.

Sapos wan i wantem kasem baptaes blong fas taem, misin presiden i folem ol instraksen long 38.2.8.6. Sapos wan i wan foma memba we i wantem kambak long Jos, bisop o stek presiden i folem ol instraksen insaed long 38.2.8.6 (luk tu long 32.16).

Insaed long rikwes ia, i mas tokbaot wanem man o woman ia i bin stap mekem bifo i kam long saed blong fasin blong maredem fulap woman o man long semtaem. Rikwes ia i mas tokbaot tu olsem wanem hem i bin sakem sin, mo wanem i famli situesen blong hem naoia.

38.2.8.9

Wanwan Man o Woman we Oli Talem se Oli Transjenda

Ol baptaes mo konfemesen, oli kasem folem seks we wan i gat taem hem i bon i kam long wol ia. Wanwan man o woman we i klin inaf we i no stap gohed long operesen, i no stap tekem meresin, o i no gat sosol jenis long laef blong hem we i defren long seks we hem i bon wetem, i save kasem baptaes mo konfemesen. (Blong kasem mining blong sosol jenis long laef, luk long 38.6.23.)

Eni eksepsen long polisi ia, bae nidim blong Fas Presidensi i apruvum. Blong rikwestem apruvol, misin presiden, o stek presiden nao i mekem intaviu blong wan we i gat 8 yia. Sapos hem i filim se man o woman ia i klin inaf mo sapos hem i agri blong man o woman i kasem baptaes mo konfemesen, bae hem i putum wan rikwes blong oli apruvum i go long Fas Presidensi; blong mekem hemia, bae hem i yusum (RLK).

Sapos Fas Presidensi i no apruvum baptaes mo konfemesen, hem we i bin jenisim seks blong hem, bae hem i no save kasem prishud, wan tempol rekomen o sam koling blong Jos. Be, man o woman ia i save tekpat insaed long Jos long sam nara wei.

Wanwan man o woman we oli bin gat ol sosol jenis long laef blong olgeta mo afta oli jenis i gobak long seks blong olgeta we oli bin bon i kam long wol wetem, mo oli klin inaf mo oli komitim olgetawan blong stap obei long ol komanmen blong God, oli save baptaes mo kasem konfemesen.

Ol misin presiden, o ol stek presiden blong wan pikinini i gat eit yia, oli save tokbaot ol situesen blong wanwan man o woman wetem bigfala kea, mo wetem lav we i olsem blong Kraes. Oli nidim blong kasem kansel long Eria Presidensi.

Blong kasem moa infomesen, luk long 38.6.23.

38.2.9

Prishud Odinesen

Blong gat ol jeneral infomesen long saed blong ol prishud odinesen ia, luk long 18.10.

38.2.9.1

Ol Niu Memba

Taem wan brata i kasem baptaes mo konfemesen, hem i save kasem wan odinesen long wan ofis insaed long Aronik Prishud sapos bae hem i gat 12 yia bifo long en blong yia. Bisop i intaviu long hem stret afta long konfemesen blong hem, we plante taem i bifo wan wik i pas. Wan memba blong Bisoprik i presentem hem long sakramen miting blong ol memba blong wod oli save sastenem odinesen blong hem we oli stap proposem (luk long 18.10.3). Afta, oli no save odenem hem long stret ofis:

• Dikon, sapos bae hem i kasem 12 o 13 yia bifo en blong yia

• Tija, sapos bae hem i kasem 14 o 15 yia bifo en blong yia

• Pris, sapos bae hem i kasem 16 yia i go antap bifo en blong yia; sapos hem i gat 19 yia o moa, oli save tekem tu se bae hem i wan fiuja elda (luk long 38.2.9.3)

Wan niu memba i save kasem Melkesedek Prishud mo kasem odinesen olsem wan elda, taem we:

• Hem i gat 18 yia o moa.

• Hem i givim seves olsem wan pris (i no gat namba blong yia).

• Hem i gat inaf andastaning long saed blong gospel.

• Hem i soem se hem i klin inaf.

Ol niu brata we oli jes baptaes, oli no odenem olgeta long dei ia we oli kasem baptaes o konfemesen. Fastaem, bisop i nidim blong mekem intaviu wetem hem, mo ol memba blong wod oli mas sastenem hem.

Oli no sapos blong seftem dei blong baptaes blong ol memba blong famli i go kasem taem we papa i save kasem prishud mo mekem baptaes ia hemwan.

38.2.9.2

Ol Yang Man we Papa mo Mama blong Olgeta Oli No Mared (Hemia i tekem Olgeta We Oli Divos tu)

Oli save odenem wan yang man i go long ol ofis blong Aronik Prishud taem bisop i kasem raet, long toktok long papa mo mama, o wan we i gat raet blong lukaot long yang man ia. I no nidim blong kasem raet blong wan papa o mama o hem we i lukaotem yangfala, we i no gat raet folem loa blong no agri long odinesen ia.

Sapos wan yang man i stap yusum famli nem blong step-papa blong hem, nao oli save odenem hem wetem nem ia. Hemia bae i olsem, iven sapos oli no bin adoptem hem folem loa. Be, nem blong yang man ia we i folem loa, olsem we lokol loa o kastom i talem, nem ia nao bae oli mas raetemdaon long setifiket blong odinesen.

38.2.9.3

Ol Fiuja Elda

Wan fiuja elda i wan we i wan man, we i memba blong Jos, we i gat 19 yia i go antap, we i no kasem yet Melkesedek Prishud. Ol brata we oli mared finis, we oli no kasem 19 yia yet, mo oli no kasem Melkesedek Prishud yet, olgeta tu, oli ol fiuja elda.

Anda long daereksen blong bisop, presidensi blong kworom blong ol elda i wok kolosap wetem ol fiuja elda blong helpem olgeta blong kasem Melkesedek Prishud. Sapos wan fiuja elda i no wan pris, oli mas odenem hem i kam wan pris stret long taem ia we hem i kam klin inaf blong kasem. Hem i no nid blong oli odenem hem i kam wan dikon o tija faswan. Oli save odenem hem i kam wan elda taem hem i developem inaf save long saed blong gospel, mo hem i soemaot se hem i klin inaf. Bisop o stek presiden i holem wan intaviu wetem hem blong skelem hemia (luk long 31.2.6).

Blong gat moa infomesen blong stap helpem ol fiuja elda blong stap rere blong kasem Melkesedek Prishud, luk long 8.4.

38.2.9.4

Ol Brata we Oli Jenisim Wod long Las Yia I Kam

Samtaem, wan brata we i bin laef long wan wod, we i no kasem wan yia yet, i nid o i wantem blong oli odenem hem long wan ofis blong Melkesedek Prishud. Long kes olsem, bisop o wan kaonsela we hem i givim wok ia long hem, i kontaktem hem we i bisop blong memba ia fastaem, blong i askem sapos i gat eni problem long saed blong stap klin inaf, we bae i nidim blong hem i lukluk long hem. Sapos wan kaonsela i faenemaot se i gat wan konfidensiol infomesen i stap, nao hem i stopem storian ia. Hem i talemaot long bisop blong hem blong kontaktem bisop blong fastaem, bifo hem i mekem intaviu.

38.2.9.5

Ol Brata Insaed long Ol Yang Singgel Adalt Wod mo Ol Singgel Adalt Wod

Ol man we oli gat 18 yia o moa, we oli klin inaf, mo oli stap insaed long ol yang singgel adalt wod mo ol singgel adalt wod, oli mas odenem olgeta oli kam elda. Ol brata we oli no odenem olgeta i kam elda, oli pat blong kworom blong ol elda olsem ol fiuja elda.

38.2.9.6

Ol Man we Oli Stap long Militeri long Ol Ples we I Gat Wo, o Ol Ples we Oli Stap Olgetawan

Plante taem, wan man we i stap long militeri o ami, oli mekem intaviu blong hem, mo oli odenem hem insaed long wod we membasip rekod blong hem i stap long hem. Be, maet hemia i no posibol sapos militeri man ia i stap mekem wok long solwota blong wan longfala taem, o i stap mekem wok long wan ples we i gat wo, o i stap long wan ples we i stap longwe o i stap hemwan. Long ol kes olsem, militeri man ia i mit wetem grup lida blong ol memba long ami seves. Sapos grup lida i filim se militeri man ia i rere blong kasem odinesen, hem i givim wan leta we i sendem nem blong militeri man ia i go long prisaeding lida blong Jos yunit ia we i lukluk ova long grup blong ol seves memba ia. (Sapos i no gat wan yunit blong Jos, hem i givim leta ia i go long Eria Presidensi.) Lida ia i kontaktem bisop blong militeri man ia long homwod, blong talem se i tru se man ia i klin inaf.

Long saed blong odinesen i go long ol ofis long Aronik Prishud, prisaeding lida i save givim raet long grup lida ia, o wan Lata-dei Sent japlen blong intaviu long militeri man ia mo i lukluk ova long odinesen. Long saed blong odinesen i go long ol ofis blong elda, stek presiden, misin presiden, o Eria presidensi i save givim raet long wan Lata-dei Sent japlen blong intaviu long militeri man ia mo i lukluk ova long odinesen. Evri odinesen, oli mas sastenem olgeta o oli mas pasem o mekem i kam ofisol, olsem we oli eksplenem insaed long 18.10.3.

38.2.9.7

Ol Brata we Oli Gat Disabiliti long Tingting

Wan we i wan man, mo i wan memba blong Jos mo hem i gat wan disabiliti long tingting, papa mo mama blong hem (taem i gat), mo bisop, oli toktok tugeta blong faenemaot sapos hem we i gat disabiliti ia i sapos blong kasem prishud o no. Oli kaonsel abaot wanem we man ia i wantem, mo sapos man ia i haremsave wanem hem i prishud mo wanem nao ol responsabiliti blong hem.

Olgeta we oli kasem prishud, we oli gat ol disabiliti olsem, bae oli mas helpem olgeta blong mekem se oli save mekem fulwan ol prishud diuti we oli gat, olsem we i posibol.

38.2.9.8

Ol Brata we Oli Karembak Olgeta tru long Baptaes mo Konfemesen

Taem i gat wan man we i no bin kasem endaomen blong hem bifo, i kambak insaed long Jos tru long baptaes mo konfemesen, bae oli save odenem hem stret afta. Oli odenem hem long prishud ofis we hem i bin holem taem we oli bin karemaot membasip blong hem, o taem we hem i bin sakemaot membasip blong hem.

Sapos wan memba olsem i bin kasem endaomen blong hem bifo, nao oli no odenem hem long wan ofis blong prishud. Be, oli putumbak hem long ofis we hem i bin stap long hem bifo, tru long odinesen blong putumbak ol blesing.

Blong gat moa infomesen mo instraksen, luk long 32.17.

38.2.9.9

Wanwan Man o Woman we Oli Talem se Oli Transjenda

Prishud odinesen oli kasem folem seks we wan i gat taem hem i bon i kam long wol ia. Wan memba we i wan man, we i klin inaf, we i no tekem meresin, o i no operetem hem, o i no gat sosol jenis long laef blong hem we i defren long seks we hem i bon wetem, i save kasem prishud mo praktisim prishud. (Blong kasem mining blong sosol jenis long laef, luk long 38.6.23.)

Ol memba we oli man we oli bin gat ol sosol jenis long laef blong olgeta mo afta oli jenis i gobak long seks blong olgeta we oli bin bon i kam long wol wetem, mo oli klin inaf mo oli komitim olgetawan blong stap obei long ol komanmen blong God, oli save kasem mo yusum prishud.

Ol bisop oli kaonsel wetem stek presiden blong tokbaot ol situesen blong wanwan man wetem bigfala kea, mo wetem lav we i olsem blong Kraes. Ol stek mo misin presiden oli mas lukaotem kaonsel we i kam long Eria Presidensi.

Blong kasem moa infomesen, luk long 38.6.23.

38.2.10

Ol Petriakel Blesing

Blong gat ol jeneral infomesen long saed blong ol petriakel blesing, luk long:

• Seksen 18.17 blong handbuk ia.

• Infomesen mo Ol Tingting blong Ol Petriak.

• Wol Lidasip Trening Miting: Petriak.

38.2.10.1

Ol Memba we Oli Gat Disabiliti long Tingting

Wan memba we hem i gat wan disabiliti long tingting, bae papa mo mama blong hem, o hem we i lukaot long hem folem loa (taem i gat), mo bisop, oli toktok tugeta blong faenemaot sapos bae hem i kasem wan petriakel blesing o no. Oli tingting long wanem memba i wantem mo sapos hem i gat wan besik paoa blong save andastanem blesing ia. Sapos i olsem, wan memba blong bisoprik i save givim wan Petriakel Blesing Rekomen. Ol instraksen oli stap long 18.17.

38.2.10.2

Ol Misinari

Wan petriakel blesing i save stap olsem wan stamba blong paoa long saed blong spirit long wan misinari, Sapos i posibol, wan memba i mas kasem wan petriakel blesing bifo hem i statem misinari seves blong hem. Taem we i no posibol, hem i save kasem wan petriakel blesing blong hem long taem blong misin blong hem. Misin presiden i mekem intaviu long misinari mo i rere long Rekomen blong Kasem Wan Petriakel Blesing. Ol instraksen oli stap long 18.17.

Wan misinari long wan misinari trening senta (MTS), i save kasem wan petriakel blesing nomo sapos i folem evri kondisen ia:

• Misinari i kam long wan eria we i no gat petriak we i save givim wan blesing long stret hom lanwis blong misinari ia.

• Misinari bae i go long wan misin we i no gat petriak long hem we i save givim wan blesing long hom lanwis blong misinari.

• Wan petriak we i stap kolosap long MTS i save givim blesing long hom lanwis blong misinari ia.

38.2.10.3

Ol Memba we Bae Oli Joen long Militeri

Wan petriakel blesing i save stap olsem wan stamba blong paoa long saed blong spirit long wan memba we i stap long militeri. Sapos i posibol, wan memba we i klin inaf, i mas kasem wan petriakel blesing bifo hem i go insaed blong statem ami diuti blong hem.

Sapos i no posibol, memba ia i save kasem wan petriakel blesing long taem we hem i stap long diuti stesen blong hem. Wan memba blong bisoprik i mekem intaviu long memba ia mo i rere long Rekomen blong Kasem Wan Petriakel Blesing. Ol instraksen oli stap long 18.17.

Blong gat moa infomesen, stek presiden i save kontaktem Ofis blong Kworom blong Olgeta Twelef long [e-mail].

38.2.10.4

Ol Memba we Oli Laef Aotsaed long Stek blong Petriak

Plante taem, wan memba i kasem wan petriakel blesing long wan petriak insaed long stek blong hem nomo. Be, wan memba i save kasem wan blesing long wan petriak long wan nara stek sapos:

• Hem i kamaot long stret laen blong petriak ia (pikinini, apupikinini, o smol apupikinini) tru long stret bladlaen, o tru long adopsen.

• Hem i stap laef insaed long wan stek we i no gat wan petriak we i mekem wok.

• Hem i laef insaed long wan distrik.

• Hem i no stap toktok semfala lanwis olsem lanwis blong stek petriak, mo i gat wan petriak long wan stek kolosap we i toktok lanwis blong memba ia.

Long wanwan kes ia, wan memba blong bisoprik o branj presiden i intaviu long memba ia olsem oli tokbaot long 18.17. Wan memba blong stek presidensi blong petriak, mo wan memba blong stek o misin presidensi blong hem we bae i kasem blesing bae i mas apruvum rekomen ia tru long Patriarchal Blessing System.

38.2.10.5

Translesen blong Ol Petriakel Blesing

Insperesen mo mining blong wan petriakel blesing i had blong talem tru long translesen. From risen ia, ol memba oli mas kasem blesing blong olgeta long lanwis we bae oli andastanem gud. Jos i no givim ol translesen we oli raetem, blong ol petriakel blesing.

Oli no leftemap tingting blong ol memba blong oli transletem ol petriakel blesing. Be, samtaem, wan memba i nidim blong oli transletem wan blesing i go long wan lanwis we hem i andastanem. Memba ia i save faenem wan memba blong Jos we hem i trastem, we i save mekem translesen ia blong hem. Memba ia, i mas jusum gud wan transleta we i gat skil long lanwis, we i save andastanem se blesing ia i wan blesing long saed blong spirit, mo i mas kipim blesing ia i konfidensiol. Ol translesen blong ol blesing ia, oli no stap holemtaet wan kopi long hedkwota blong Jos.

Wan stek presiden i save askem wan brael (stael raeting blong olgeta we oli blaen) pepa raeting blong petriakel blesing. Hem kontaktem Ofis blong Kworom blong Olgeta Twelef Aposol long [e-mail].

38.2.10.6

Ol Saen Lanwis Intepretesen blong Ol Petriakel Blesing

Sapos wan memba i no save harem samting, o i faenem i had blong harem samting, bae oli save intepretem petriakel blesing blong hem long saen lanwis. Memba i faenem wan intepreta. Bae i gud moa sapos, memba ia, i wan memba blong Jos we hem i trastem mo i klin inaf, we i save andastanem doktrin mining blong ol petriakel blesing. Be, sapos oli no save faenem wan memba blong Jos, bae wan narawan we i save mekem, i save mekem intepretesen.

38.2.10.7

Ol Nambatu Petriakel Blesing

Long sam situesen we i no hapen oltaem, wan memba we i klin inaf i save askem wan nambatu petriakel blesing. Be, plante taem, bae oli no leftemap tingting blong hemia i hapen, mo maet bae oli no save apruvum rikwes ia. Sapos wan memba i gat wan impoten risen blong mekem kaen rikwes ia, hem i save tokbaot wetem bisop. Sapos bisop i filim se i nid blong gat wan nambatu blesing, hem i rere long wan Rekomen blong Kasem Wan Petriakel Blesing. Ol instraksen oli stap long 18.17.

Stek presiden i mekem wan intaviu mo i ridim fasfala blesing wetem hem. Sapos hem i filim se i nidim wan nambatu blesing, stek hem i askem apruvol long Ofis blong Kworom blong Olgeta Twelef Apostles” long [e-mail].

Stek presiden i talemaot desisen blong Ofis blong Kworom blong Olgeta Twelef Aposol long hem we bae i kasem blesing ia, mo tu, long petriak. Sapos oli apruvum rikwes, stek presiden i apruvum rekomen insaed long Petriakel Blesing Sistem. Stek presiden i talemaot tu long hem we bae i kasem blesing se, nambatu blesing ia, bae i tekem ples blong fasfala blesing ia. Afta long hemia, petriak i save givim nambatu petriakel blesing.

38.3

Sivil o Gavman Mared

Ol lida blong Jos oli leftemap tingting blong ol memba blong oli kwalifae blong mared insaed long tempol, mo mared mo sil insaed long wan tempol. Sapos ol lokol loa oli letem, ol lida blong Jos oli save mekem ol sivil mared ia long ol situesen olsem:

• Ol kapol i plan blong mared insaed long wan tempol, be loa i no luksave tempol mared.

• Wan kapol bae i mared insaed long wan tempol, be wan sivil mared bae i helpem papa mo mama, o ol stret memba blong famli blong filim se olgeta tu oli pat.

• Blong go long wan tempol, bae i no posibol blong wan longfala taem.

• Wan kapol i no stap plan blong mared insaed long wan tempol.

Wan sivil mared i laef kasem taem we kapol ia i ded. Hem i no laef i stap afta long laef long wol ia.

Ol sivil mared, bae oli mas mekem olgeta i folem ol loa blong ples we mared ia i tekem ples long hem.

Sivil mared mo ol nara seremoni blong relijin we oli go wetem, bae oli no save mekem long wan Sabat dei. Mo oli no save tekem ples long ol taem we oli no stret tumas.

Wan bisop i mas toktok wetem stek presiden blong hem sapos hem i gat ol kwestin abaot sivil mared we oli no faenem ansa insaed long seksen ia. Stek presiden i save daerektem ol kwestin i go long Ofis blong Fas Presidensi.

38.3.1

Huia i Save Mekem wan Sivil o Gavman Mared

Taem we lokol loa i letem, olgeta ofisa blong Jos we oli stap givim seves, oli save mekem wok folem koling blong olgeta blong oli save mekem wan sivil mared seremoni.

• Misin presiden

• Stek presiden

• Distrik presiden

• Bisop

• Branj presiden

Ol Jos ofisa ia oli save mekem wan sivil mared nomo, bitwin wan man mo wan woman. Oli mas folem evri kondisen ia:

• Woman we bae i mared, o man we bae i mared, i wan memba blong Jos, o i gat wan deit blong kasem baptaes.

• Membasip rekod blong woman we bae i mared, o blong man we bae i mared, i stap, o bambae i stap afta long baptaes, insaed long Jos yunit blong ofisa ia we i stap prisaed.

• Jos ofisa ia, i gat raet folem loa, blong i mekem wan sivil o gavman mared insaed long eria ia we bae mared ia i tekples long hem.

Ol Lata-dei Sent japlen we oli stap long militeri diuti oli save mekem ol sivil mared, mo oli no nidim blong kasem wan apruvol.

Ol japlen we oli givim wok long olgeta blong stap long Risev o Nasonal Gad Yunit oli mas kasem raet long Jos Militeri Rilesen mo Japlen Seves Divisen blong oli save mekem wan sivil mared. Luk long kontak infomesen long 38.9.10.

Ol japlen we oli no ol militeri japlen we oli givim seves long olgeta oganaesesen ia, oli mas kasem raet long Jos Militeri Rilesen mo Japlen Seves Divisen bifo oli save mekem wan sivil mared:

• Ol hospital

• Ol oganaesesen we oli lukaot long ol olfala o olgeta we bae oli ded

• Ol haos kea senta

• Ol kalabus

• Ol boda patrol

• Ol polis o faea dipatmen

Ol japlen we oli ritae finis, oli no gat raet blong mekem ol sivil mared, olsem ol japlen.

Olgeta we oli mekem ol mared, we oli mekem wok ia folem koling olsem ol lida blong Jos, o olsem ol japlen, oli mas yusum ol gaedlaen insaed long seksen ia. Mo tu, oli mas folem evri samting we loa i askem olgeta.

Oli no tekem ol Lata-dei Sent japlen olsem ol prisaeding Jos ofisa sapos nomo oli stap olsem wan stek presiden, wan bisop, o wan branj presiden. Taem we wan japlen, we i no wan prisaeding Jos ofisa, i mekem wan sivil mared, hem i stap olsem wan we i ripresentem gavman, o wan nara sivil oganaesesen we hem i wok anda long hem. Long wei ia nao, toktok blong seremoni blong sivil mared i jenis smol blong olgeta japlen ia, olsem we oli putum i stap long 38.3.6.

Ol Lata-dei Sent Japlen ia oli save mekem wan sivil mared nomo bitwin wan man mo wan woman .

Ol ofisa blong Jos mo ol japlen we oli mekem ol sivil mared blong ol memba blong Jos, oli mas givim stret mared infomesen i go long klak blong wod, o blong branj. Klak i apdeitem ol membasip rekod.

Wan ofisa blong Jos o wan japlen we i mekem wan sivil mared anda long paoa blong hem long Jos, i no save akseptem blong oli pem hem.

38.3.2

Sivil Mared blong Ol Memba blong Ol Narafala Yunit

Wan ofisa blong Jos i no save mekem wan mared blong ol memba blong Jos taem we membasip rekod blong woman we bae i mared, o man we bae i mared, i no stap insaed long jos yunit ia we ofisa we i prisaed i stap long hem (luk long 38.3.1). I posibol blong no folem rul ia taem oli ol Lata-dei Sent japlen o ol Jos ofisa we oli stap olsem ol gavman ofisol.

38.3.3

Sivil Mared blong Olgeta we Oli No Ol Memba blong Jos

Wan ofisa blong Jos i no save mekem wan mared taem we woman we bae i mared mo man we bae i mared, oli no memba blong Jos. Be hem i save mekem nomo sapos wan long tufala, o tufala tugeta i gat wan deit blong kasem baptaes insaed long Jos. I posibol blong no folem rul ia taem oli ol Lata-dei Sent japlen o ol Jos ofisa we oli stap olsem ol gavman ofisol.

38.3.4

Ol Sivil Mared we Oli Holem insaed long Ol Bilding blong Jos

Wan seremoni blong mared, i save tekem ples insaed long bilding blong Jos, sapos i no stopem taemtebol blong ol miting blong Jos. Ol mared oli no save tekples long Sabat, o long Mandei naet. Ol mared we oli stap holem insaed long ol bilding blong Jos, oli mas simpol mo i gat hae respek long hem. Miusik i mas ol tabu miusik, i gat respek, mo i givim glad.

Ol mared ia, bae oli save mekem insaed long japel, insaed long aktiviti rum, o eni nara rum we i stret. Oli no save holem lafet blong mared insaed long japel, be nomo sapos ples ia, oli yusum olsem wan rum blong holem plante defren aktiviti. Ol mared, oli mas folem ol gaedlaen blong fasin blong yusum mitinghaos long stret fasin (luk long 35.5.3).

Jos i no letem blong oli yusum ol mitinghaos blong hem o ol nara propeti blong Jos, blong yusum blong mekem eni nara stamba tingting we i go wetem ol sem seks mared, ol mared blong olgeta we oli maredem fulap man o woman, o ol nara mared we oli no stret wetem doktrin o polisi blong Jos.

Long sam kes nomo we i no save hapen oltaem, bae bisop i save letem blong oli yusum bilding blong Jos blong mekem wan mared we wan narawan we i no wan Jos ofisa i mekem mared, o blong olgeta we oli no ol memba blong Jos. Hem i kaonsel fastaem wetem stek presiden. Hem i kaonsel wetem man we bae i mekem mared blong mekemsua se hem i andastanem ol gaedlaen insaed long seksen ia. Wan memba blong stek o wod kaonsel i go long mared ia blong meksua se oli yusum mo kea long bilding long wan stret fasin.

Bisop i save givim raet blong oli soem mared ia onlaen, taem oli mekem mared insaed long wan bilding blong Jos (luk long 29.7).

38.3.5

Ol Sivil Mared we Wan Pablik Ofisol i Mas Mekem o Oli Mas Mekem long Wan Pablik Ples

Long sam ples, loa i talem se mared seremoni, wan pablik ofisa i mas mekem mared ia. Sam oli askem se seremoni ia i tekples insaed long wan pablik bilding o wan nara pablik ples. Long ol kes olsem, wan prishud ofisa we i gat raet bae i save holem wan sot kam tugeta afta long sivil mared ia. Long kam tugeta ia, hem i givim kaonsel long kapol.

38.3.6

Seremoni blong Sivil o Gavman Mared

Mared i tabu mo oli mas givim ona long hem mo oli mas tekem se i tabu. Mared blong ol memba blong Jos, we oli mekem aotsaed long tempol, i mas soem spirit blong komitmen mo glad.

Sapos nomo oli talemaot, infomesen insaed long seksen ia i blong ol Lata-dei Sent Japlen, mo tu, ol Jos ofisa.

Bifo hem i mekem wan sivil mared, wan ofisa blong Jos i save givim sam advaes long hao nao ol promes blong mared oli tabu tumas. Hem i save givim sam moa advaes olsem we Spirit i talem.

Blong mekem wan sivil mared, ofisa blong Jos ia i toktok long kapol ia mo i talem: “Plis yutufala i holem raet han blong wanwan long yutufala.” Afta hem i talem: “[ful nem blong man we i mared mo ful nem blong woman we i mared], yu tekem raet han blong narawan olsem wan token blong ol kavenan we bae yu mekem naoia, long fes blong God mo olgeta witnes ia.” (Kapol i save jusum o talem nem blong ol witnes ia bifo taem.)

Afta, ofisa i toktok long man we bae i mared, mo i askem: “[Ful nem blong man we bae i mared], ?yu yu tekem [ful nem blong woman we bae i mared] olsem waef blong yu, we yu maredem folem loa, mo folem tingting mo joes blong yu, yu yu mekem tabu promes ia, olsem kompanion mo hasban blong hem folem loa, se bae yu hang long hem mo i no wan narawan moa; se bae yu folem evri loa, mekem evri responsabiliti, mo samting we yu mas mekem folem tabu loa blong mared; mo bae yu yu lavem hem, givim ona mo respek long hem, mo bae yu lukaotgud hem wetem lav kasem en blong laef blong yutufala long wol ia?”

Man we bae i mared i ansa, i talem “Yes” o “Yes mi mekem.”

Afta, ofisa i toktok long woman we bae i mared, mo i askem: “[Ful nem blong woman we bae i mared], ?yu yu tekem [ful nem blong man we bae i mared] olsem hasban blong yu, we yu maredem folem loa, mo folem tingting mo joes blong yu, yu yu mekem tabu promes ia, olsem kompanion mo waef blong hem folem loa, se bae yu hang long hem mo i no wan narawan moa; se bae yu folem evri loa, mekem evri responsabiliti mo samting we yu mas mekem folem tabu loa blong mared; mo bae yu yu lavem hem, givim ona mo respek long hem, mo bae yu lukaotgud hem wetem lav kasem en blong laef blong yutufala long wol ia?”

Woman we bae i mared i ansa, i talem “Yes” o “Yes mi mekem.”

Nao, ofisa blong Jos i toktok long kapol, mo i talem, “Tru long paoa we atoriti blong loa i givim long mi olsem wan elda blong Jos Ia blong Jisas Kraes blong Ol Lata-dei Sent, mi talemaot se yu, [nem blong man we bae i mared] mo yu, [nem blong woman we bae i mared], i hasban mo waef, folem loa mo olsem we loa i letem, blong ful taem we bae yutufala i laef long wol ia.”

[Narafala toktok blong wan japlen we i no stap olsem wan prisaeding ofisa blong Jos i save talem: “Tru long paoa we atoriti blong loa i givim long mi olsem wan japlen insaed long [branj o sivil oganaesesen], mi talemaot se yu, [nem blong man we bae i mared] mo yu, [nem blong woman we bae i mared], i hasban mo waef, folem loa mo olsem we loa i letem, blong ful taem we bae yutufala i laef long wol ia.”]

“Bae God i blesem mared blong yutufala wetem glad long laen blong yutufala, mo wan longfala laef blong stap hapi tugeta, mo bae Hem i blesem yutufala blong kipim ol tabu promes we yutufala i bin mekem. Olgeta blesing ia, mi askem blong i stap wetem yutufala, long nem blong Lod Jisas Kraes, amen.”

Invitesen ia blong tufala i kis olsem hasban mo waef i stap long tufala, o i folem ol fasin blong kalja.

38.4

Ol Siling Polisi

Ol memba blong Jos oli mekem ol tabu kavenan wetem God taem we oli kasem ol tempol odinens. Ol siling odinens blong tempol oli mekem ol famli oli kam wan blong taem we i no save finis taem ol memba oli traehad blong ona long ol kavenan we oli stap mekem taem oli kasem odinens ia. Ol siling odinens, i gat:

• Siling blong hasban mo waef.

• Siling blong ol pikinini long papa mo mama.

38.4.1

Siling blong Wan Hasban mo Waef

Tebol andanit ia i eksplenem weaples blong faenem ol polisi blong siling blong wan hasban mo waef.

Nid	Seksen
Nid Mi mared folem loa blong gavman nomo mo mi wantem sil long hasban o waef blong mi.	Seksen 38.4.1.1
Nid Mi divos long waef o hasban blong mi, mo mi wantem sil long hasban o waef we mi stap wetem naoia.	Seksen 38.4.1.2
Nid Hasban o waef we mi bin sil wetem hem, i ded. ?Hu nao bae mi save sil wetem naoia?	Seksen 38.4.1.3
Nid ?Mi save sil i go long wan we i ded finis we mi bin stap laef wetem be mitufala i no mared folem loa?	Seksen 38.4.1.4
Nid Mi nidim blong askem blong oli kanselem wan siling, o blong oli kliarem siling.	Seksen 38.4.1.5
Nid Mi nid blong oli karemaot wan stop agensem tempol siling.	Seksen 38.4.1.6
Nid Hasban o waef mo mi, mitufala i mared insaed long tempol blong taem blong wol ia nomo. ?Bae mitufala i save sil long wan narawan bakegen?	Seksen 38.4.1.7
Nid ?Hu nao bae famli memba blong mi we i ded bae i sil long hem?	Seksen 38.4.1.8
Nid ?Divos i mekem wanem long siling blong mi?	Seksen 38.4.1.9
Nid ?Wanem nao ol gud o nogud saed blong stap kanselem wan siling?	Seksen 38.4.1.10
Nid ?Fasin blong sakemaot o karemaot membasip blong Jos, i mekem wanem long siling blong mi?	Seksen 38.4.1.11

Ol memba oli mas toktok wetem bisop blong olgeta sapos oli gat ol kwestin abaot ol siling polisi we ansa blong hem i no stap insaed long seksen ia. Bisop i kontaktem stek presiden sapos hem i gat ol kwestin. Stek presiden i kontaktem Ofis blong Fas Presidensi sapos hem i gat ol kwestin.

Ol memba we oli gat sam wari long saed blong tabu fasin blong siling odinens ia mo famli blong olgeta, mo ol rilesensip blong olgeta wetem ol waef o hasban blong olgeta, oli leftemap tingting blong olgeta blong trastem Lod mo askem kamfot blong Hem. Papa long Heven bae i mekem sua se wanwan man o woman i kasem evri blesing folem ol joes mo tingting blong hat blong hem.

38.4.1.1

Siling blong Ol Memba we Oli Laef I Stap Afta long Sivil o Gavman Mared

Wan man mo woman we tufala i bin mared long sivil o gavman mared, tufala i save sil insaed long tempol stret afta sapos ol situesen i letem, mo sapos oli folem olgeta kondisen ia:

• Tufala i bin ol memba blong Jos blong wan ful yia (luk long 27.3.1 mo 27.2.1).

• Tufala i rere mo tufala i klin inaf.

Taem oli givim ol tempol rekomen blong wan kapol i sil, ol prishud lida oli meksua se sivil mared ia, i laef i stap folem loa. Luk long 26.3 mo 27.3.

38.4.1.2

Siling blong Ol Memba we Oli Laef I Stap Afta long Divos

Ol Woman. Wan woman we i laef i stap, i save sil long wan hasban nomo long wan taem. Sapos hem i sil long wan hasban, mo afta, hem i divos, oli mas kanselem siling ia bifo hem i save sil long wan nara man taem hem i stap laef (luk long 38.4.1.5).

Wan woman we i laef i stap, we i no mared yet o sil long wan nara man, bae i save sil long wan hasban we i ded, iven sapos tufala i bin divos long laef long wol ia. Hem i mas kasem wan leta we i givim raet long hem; raet ia i kam long wido blong foma hasban blong hem (sapos i gat wan).

Luk long japta 28 blong gat moa infomesen long saed blong fasin blong mekem ol odinens blong wan hasban o waef we i ded finis.

Ol Man. Sapos wan hasban mo waef i bin sil, mo afta, tufala i divos, man ia i mas askem blong kliarem siling bifo hem i save silim hem long wan nara woman (luk long 38.4.1.5). I nid blong wan i kliarem siling iven sapos (1) oli bin kanselem siling blong bifo, o (2) waef we hem i divosem, i ded finis.

I nid blong kliarem siling sapos nomo wan man i divos long woman we hem i bin sil laswan wetem. Eksampol: sapos wan man i bin kliarem siling blong hem blong hem i save sil long nambatu waef blong hem afta long wan divos, mo nambatu waef blong hem i ded, bae hem i no nid blong i kliarem siling blong hem wan moa taem blong hem i save sil bakegen.

Wan man we i laef i stap, bae i save sil long wan waef we i ded, iven sapos tufala i bin divos long laef long wol ia. Faswan, hem i mas kasem wan leta we i givim raet long hem; raet ia i kam long wido blong foma waef blong hem (sapos i gat wan). Sapos hem i mared, hem i kasem wan leta we i kam long waef blong hem blong naoia, we i givim raet long hem; sapos waef blong hem i stap laef yet.

Luk long japta 28 blong gat moa infomesen long saed blong fasin blong mekem ol odinens blong wan hasban o waef we i ded finis.

38.4.1.3

Siling blong Ol Memba we Oli Laef I Stap Afta long Ded blong Hasban o Waef

Ol Woman. Afta we wan hasban mo waef, tufala i bin sil, mo hasban i ded, woman ia bae i no save sil long wan nara man; be bae hem i mas kanselem fasfala siling ia nomo (luk long 38.4.1.5).

Wan woman we i laef i stap, we i no mared i stap, o i no sil yet long wan nara man, bae i save sil wetem wan hasban we i ded finis (luk long 38.4.1.8). Sapos mared ia i bin en long wan divos, luk long 38.4.1.2.

Wan woman we i laef i stap, we i mared i stap, bae i no save sil long wan hasban blong hem we i ded sapos Fas Presidensi i no apruvum fastaem.

Luk long japta 28 blong gat moa infomesen long saed blong fasin blong mekem ol odinens blong wan hasban o waef we i ded finis.

Ol Man. Sapos wan hasban mo waef i bin sil, mo waef i ded, man i save sil wetem wan nara woman, sapos woman ia i no sil finis wetem wan narafala man. Long situesen olsem, man i no nid blong kliarem siling blong hem tru long Fas Presidensi, be nomo sapos hem i bin divos long fasfala waef blong hem bifo hem i ded (luk long 38.4.1.2).

Wan man we i laef i stap, bae i save sil long wan waef we i ded, sapos woman ia i no sil long wan nara man taem hem i laef. Sapos woman ia i bin sil long wan nara hasban taem hem i stap laef, evri man we woman ia i maredem oli mas ded bifo eni nara man i save sil i go long hem (luk long 38.4.1.8). Sapos mared ia i bin en long wan divos, luk long 38.4.1.2

Bifo hem i sil long waef blong hem we i ded, wan man we i mared i mas kasem wan leta we i givim raet long hem; raet ia i kam long waef blong hem blong naoia, sapos hem i laef yet.

Luk long japta 28 blong gat moa infomesen long saed blong fasin blong mekem ol odinens blong wan hasban o waef we i ded finis.

38.4.1.4

Siling blong wan Memba We I Laef Yet i go long wan Man o Woman we i Ded Finis we Hem I bin Stap Laef Wetem

Ol Woman. Olsem wan eksepsen, wan woman we i laef i stap, we i no mared i stap, o i no sil long wan nara man, bae i save sil wetem man we hem i stap laef wetem we i ded finis. Oli save tingting long eksepsen ia nomo sapos, rilesensip blong tufala i bin kolosap gud mo i bin stap longtaem inaf blong soem se yes, tufala i save mekem evri samting ia:

• Stap fetful long wanwan long tufala long wan rilesensip we bae i no jenis.

• Mekem evri responsabiliti long saed blong mared long wanwan long tufala.

• Mekem evri responsabiliti blong wan papa mo mama long eni pikinini we tufala i bin gat.

Sapos stek presiden blong memba ia i filim sua abaot eksepsen ia, bae hem i sendem wan rikwes i go long Ofis blong Fas Presidensi.

Ol Man. Olsem wan eksepsen, wan man we i laef i stap, bae i save sil long wan woman we tufala i stap laef tugeta we i ded, sapos woman ia i no sil long wan nara man taem hem i laef. Oli save tingting long eksepsen ia nomo sapos, rilesensip blong tufala i bin kolosap gud mo i bin stap longtaem inaf blong soem se yes, tufala i save mekem evri samting ia:

• Stap fetful long wanwan long tufala long wan rilesensip we bae i no jenis.

• Mekem evri responsabiliti long saed blong mared long wanwan long tufala.

• Mekem evri responsabiliti blong wan papa mo mama long eni pikinini we tufala i bin gat.

Bifo hem i sil long woman we i ded, wan man we i mared i mas kasem wan leta we i givim raet long hem; leta ia i kam long waef blong hem blong naoia, sapos hem i laef yet.

Sapos stek presiden blong memba ia i filim sua abaot eksepsen ia, bae hem i sendem wan rikwes i go long Ofis blong Fas Presidensi.

38.4.1.5

Askem blong Kanselem Siling o Kliarem Siling

Luk long 38.4.1.2 blong gat moa infomesen abaot siling blong ol memba we oli laef i stap afta long wan divos. Luk long 38.4.1.3 blong kasem sam infomesen abaot siling blong ol memba we oli laef i stap afta we hasban o waef i ded.

Ol memba, i nomata jenda blong olgeta, oli save askem blong kanselem siling iven sapos oli no rere blong sil long wan narawan. Wan memba blong Jos, we i wan man, i mas kliarem siling blong hem blong save sil long wan nara woman afta long wan divos.

Rod blong askem blong kanselem o blong kliarem siling, oli putum long aotlaen daon ia.

1. Memba ia i toktok wetem bisop blong hem abaot rikwes ia.

2. Bisop i meksua se:

   1. Divos hem i faenol.

   2. Memba ia, i folem evri samting we loa i askem long hem long saed blong sapot blong pikinini mo waef o hasban, we i go wetem divos ia.

3. Sapos bisop i sendem nem i go blong kanselem o blong kliarem siling, nao bae hem i:

   1. Fulumap wan aplikesen i go long Fas Presidensi long bihaf blong memba tru long Ol Risos blong Ol Lida mo Klak (RLK) Ol lida we oli no gat rod blong yusum RLK bae oli yusum wan pepa kopi blong fom ia blong Aplikesen long Fas Presidensi. Fom ia i stap wetem Ofis blong Ol Konfidensiol Rekod we i stap long ol hedkwota blong Jos.

   2. Sendem aplikesen ia i go long stek presiden.

4. Stek presiden i mit wetem memba ia. Stek presiden i jekem se:

   1. Divos hem i faenol.

   2. Memba ia, i folem evri samting we loa i askem long hem long saed blong sapot blong pikinini mo waef o hasban, we i go wetem divos ia.

5. Sapos stek presiden i sendem wan rikwes blong oli kanselem wan siling, o blong oli kliarem wan siling, nao hem i mas sendem wan aplikesen fom i go long Fas Presidensi mo yusum RLK. Luk long 6.2.3 abaot responsabiliti blong stek presiden taem oli stap putum ol rikwes i go long Fas Presidensi.

6. Sapos oli apruvum rikwes ia, Fas Presidensi i givim wan leta we i talem se oli givim raet blong kanselem siling ia, o kliarem siling ia.

7. Afta we hem i kasem leta ia, memba ia i save putum wan apoenmen blong gat wan siling long tempol. Memba ia i presentem leta ia long tempol.

Luk long 38.4.1.9.

38.4.1.6

Karemaot Wan Kondisen we I Blokem Tempol Siling

Sapos wan i mekem adaltri taem hem i mared yet long wan we hem i bin sil wetem, i no save sil long patna ia we hem i mekem adaltri wetem, kasem taem Fas Presidensi i givim raet blong siling ia i hapen.

Wan kapol i save askem raet ia blong sil afta we tufala i mared blong faef yia. Rod blong mekem wan rikwes blong karemaot wan kondisen we i blokem wan tempol siling, oli putum i stap long aotlaen andanit ia.

1. Kapol ia i mit wetem bisop mo stek presiden blong tufala.

2. Sapos ol lida ia oli filim se bae oli karemaot kondisen ia, oli raetem ol leta i go long Fas Presidensi wetem rekomendesen blong olgeta. Leta blong olgeta i mas talemaot olsem wanem kapol ia i klin inaf, mo sapos mared blong tufala i stap strong blong ol faef yia i pas. Luk long 6.2.3 abaot responsabiliti blong stek presiden taem oli stap putum ol rikwes i go long Fas Presidensi.

3. Kapol ia tu, tufala i raetem wan leta blong rikwes i go long Fas Presidensi.

4. Stek presiden i sendem evriwan long ol leta ia i go long Fas Presidensi. Hem i save sendem wan rikwes wetem wan aplikesen blong kanselem wan siling o kliarem siling (luk long 38.4.1.5).

5. Sapos oli apruvum rikwes ia, Fas Presidensi i givim wan leta we i talem se kondisen ia we i blokem tempol siling ia, oli karemaot.

6. Afta we kapol ia i kasem leta ia, tufala i save putum wan apoenmen blong save go sil. Tufala i presentem leta ia long tempol.

38.4.1.7

Siling Afta Wan Tempol Mared blong Taem blong Laef Ia Nomo

Ol kapol we oli bin mared insaed long wan tempol blong taem blong laef ia nomo, plante taem, oli no stap sil afta. Blong wan siling olsem i hapen, woman i mas kasem, fastaem, long Fas Presidensi, leta we i kanselem fas siling blong hem. Sapos bisop mo stek presiden i filim se i gat inaf risen blong askem blong oli kanselem wan siling, stek presiden i save sendem wan aplikesen i go long Fas Presidensi; oli yusum RLKblong mekem hemia. Luk long 6.2.3 abaot responsabiliti blong stek presiden taem oli stap putum ol rikwes i go long Fas Presidensi.

Ol mared we oli blong taem blong laef long wol ia nomo, oli nomo stap mekem insaed long tempol (luk long 27.3.3

38.4.1.8

Siling blong Ol Man O Woman we Oli Ded Finis

Ol Woman we Oli Ded Finis. Wan woman we i ded finis, oli save silim hem long evri man we hem i bin maredem olgeta folem loa long taem blong laef blong hem. Tebol we i kam afta i soem taem we ol siling bae oli hapen.

Hem i no sil long wan hasban taem hem i laef	Hem i save sil long evri man we i laef o ded we hem i bin maredem taem hem i laef. Sapos man ia i laef, waef blong hem (sapos hem i mared) i mas raetem wan leta we i givim raet blong hem (luk long 38.4.1.3). Sapos man ia i ded, wido woman blong hem (sapos i gat) i mas raetem wan leta we i givim raet blong hem.
Hem i sil long wan hasban taem hem i laef	Evri hasban blong hem i mas ded bifo hem i save sil i go long ol nara man we hem i bin maredem. Hemia i tekem tu ol hasban we hem i bin divosem olgeta. Wanwan wido woman blong ol man we oli ded (sapos i gat) i mas raetem wan leta we i givim raet blong hem.

Ol Man we Oli Ded Finis. Wan man we i ded finis, oli save silim hem long evri woman we hem i bin maredem olgeta folem loa long taem blong laef blong hem sapos (1) ol woman ia oli ded finis, o (2) sapos oli laef i stap, oli no mared long wan i stap, mo oli no sil long wan nara man (luk long 38.4.1.3).

Bifo wan man we i ded i save sil long wan woman we i ded we hem i bin maredem taem hem i laef, wido man blong woman ia (sapos i gat) i mas raetem wan leta we i givim raet blong hem.

Ol Kapol we Oli Ded Finis be Oli Bin Divos. Ol kapol we oli ded finis, be oli bin divos, oli save silim olgeta tru long proksi wok, blong mekem se ol pikinini tu oli save sil long tufala. Luk long 28.3.5 sapos oli bin karemaot Jos membasip long hasban o waef ia, o sapos wan long tufala i bin sakemaot membasip.

Oli nidim blong Fas Presidensi i apruvum siling blong wan kapol we i ded finis we tufala i bin kasem raet blong oli kanselem siling long taem we tufala i laef yet i stap.

38.4.1.9

Risal blong Divos

Sapos wan kapol i sil, mo afta i divos, ol blesing blong siling ia oli gohed blong laef i stap blong wanwan we i stap klin inaf (luk long 38.4.1.5 mo 38.4.1.10). Wan memba we i gohed blong stap fetful long ol tempol kavenan blong hem, bambae i kasem evri blesing we i blong hemwan, we oli promesem insaed long tempol, iven sapos patna blong hem i bin brekem ol kavenan, o i kamaot long mared ia. God i promesem ol boe mo gel blong Hem we oli fetful blong oli gat pis mo paoa long laef ia mo laef we i no save finis long wol we bae i kam.

Luk long 38.4.2.1 blong gat infomesen abaot ol pikinini we oli bon afta long wan divos.

38.4.1.10

Ol Risal blong Kanselem Siling

Taem wan siling i gohed blong stap, wan memba we i fetful long ol tempol kavenan, bambae i kasem ol blesing blong hemwan, we oli bin promesem long hem insaed long tempol. Bae hem i tru olsem, iven sapos hasban o waef i bin brekem ol kavenan, o i kamaot long mared ia. Antap long hemia, God bae i no fosem wan man blong gohed blong stap long wan siling rilesensip truaot long taem we i no save finis, agensem tingting blong hem. Papa long Heven bae i mekem sua se wanwan man o woman i kasem evri blesing folem ol joes mo tingting blong hat blong hem.

Taem we Fas Presidensi i akseptem blong kanselem wan siling, ol blesing we oli go wetem siling ia, oli nomo gat paoa.

Eni pikinini we i bon i kam long wol ia long wan woman afta we oli kanselem siling blong hem wetem foma hasban blong hem, oli no bon insaed long kavenan, be nomo sapos woman ia i sil long wan nara man bifo pikinini i bon i kam long wol.

Ol prishud lida oli toktok wetem ol memba we oli stap askem blong oli kanselem wan siling blong helpem olgeta blong oli andastanem olgeta prinsipol ia. Ol lokol lida oli mas givim mo akseptem fridom blong mekem joes blong wanwan memba long saed blong ol desisen ia.

38.4.1.11

Ol Risal blong Sakemaot Membasip, o Karemaot Membasip blong Jos

Afta we wan kapol i bin sil long wan tempol, sapos wan long tufala i sakemaot membasip blong Jos, o sapos oli karemaot membasip blong Jos long hem, bae ol tempol blesing ia tu, oli karemaot. Be, ol blesing blong siling odinens blong patna blong memba ia mo ol pikinini, oli laef i stap sapos oli stap fetful.

Eni pikinini we i bon long wan kapol afta we wan o tugeta i sakemaot membasip blong tufala, o oli karemaot membasip blong Jos blong wan long tufala, oli no bon insaed long kavenan. Luk long 38.4.2.8.

38.4.2

Stap Silim Ol Pikinini long Papa mo Mama

Ol papa mo mama tufala i mas sil long tufala bifo ol pikinini oli sil i go long tufala (luk long 38.4.1).

Ol memba oli mas toktok wetem bisop blong olgeta sapos oli gat ol kwestin abaot ol siling polisi we ansa blong hem i no stap insaed long seksen ia. Bisop i kontaktem stek presiden sapos hem i gat ol kwestin. Stek presiden i kontaktem Ofis blong Fas Presidensi sapos hem i gat ol kwestin.

Ol memba we oli gat sam wari long saed blong tabu fasin blong siling odinens ia mo ol famli rilesensip we i go wetem siling ia, oli leftemap tingting blong olgeta blong trastem Lod mo askem kamfot blong Hem. Papa long Heven bae i mekem sua se wanwan man o woman i kasem evri blesing folem ol joes mo tingting blong hat blong hem.

38.4.2.1

Ol Pikinini we Oli Bon Insaed long Kavenan

Ol pikinini we oli bon afta we mama blong olgeta i sil long wan hasban insaed long wan tempol, oli bon insaed long kavenan blong siling ia. Oli no nid blong oli kasem odinens blong silim olgeta long papa mo mama blong olgeta.

Samtaem, wan woman we i bin sil long wan man, afta, hem i gat ol pikinini wetem wan nara man. Taem hemia i hapen, ol pikinini ia oli bon insaed long kavenan blong woman ia we i sil i no longtaem i pas, be nomo sapos oli bon i kam long wol ia (1) afta we siling ia i kansel, o (2) afta we oli karemaot membasip from memba i sakemaot, o oli karemaot long Jos.

38.4.2.2

Ol Pikinini we Oli No Bon Insaed long Kavenan

Ol pikinini we oli no bon insaed long kavenan oli save kam pat blong wan famli we i no save finis taem oli sil wetem:

• Stret papa mo mama we i bonem olgeta.

• Papa mo mama we i adoptem olgeta.

• Stret papa o mama we bonem olgeta, o papa o mama we i adoptem olgeta, mo wan step papa o mama (luk long 38.4.2.5).

Ol pikinini ia oli kasem sem blesing olsem se oli bon insaed long kavenan.

Stap silim ol pikinini we oli laef i go long ol papa mo mama we oli laef. Wan pikinini we i laef i stap i save sil long wan papa mo mama nomo—wan hasban mo waef. Sapos papa mo mama oli laef, oli mas mared mo sil long tufala.

Luk long 27.4.1 blong gat moa infomesen abaot fasin blong givimaot ol tempol rekomen blong ol pikinini we oli sil long papa mo mama blong olgeta.

Ol memba we oli gat 21 yia i go antap, oli mas endao blong oli sil long papa mo mama blong olgeta (luk long 26.4.4).

Stap silim ol pikinini we oli laef long ol papa mo mama we oli ded finis. Wan pikinini we i laef i stap i save sil long wan papa mo mama nomo. Papa mo mama i mas sil long tufala bifo ol pikinini oli sil i go long tufala.

Wan memba we i wan adalt taem papa mo mama blong hem i ded, bae oli sil long papa mo mama ia. Olsem we oli yusum long ples ia, toktok ia papa mo mama i minim papa mo mama we i bonem ol pikinini, papa mo mama we i adoptem pikinini, o wan papa o mama we i bonem pikinini mo wan step papa o mama.

Tebol long ples ia i soem ol siling opsen we i stap blong wan man o woman taem papa o mama blong hem i ded taem hem i no kasem 18 yia yet o i no save tekem responsabiliti from hem i gat ol disabiliti long saed blong tingting.

Situesen	Ol Opsen
Pikinini we i no kasem 18 yia yet.	Sil long papa mo mama we i adoptem hem, o hem we i lukaot long pikinini folem loa Wet kasem taem hem i wan adalt afta, jusum blong sil long (1) papa mo mama we i ded o long (2) papa mo mama we i adoptem hem, o hem we i lukaot long pikinini folem loa
Man o woman we i no save tekem responsabiliti from hem i gat ol disabiliti long saed blong tingting	Sil long papa mo mama we i adoptem hem, o hem we i stap lukaot long hem folem loa

Luk long 27.4.1 blong gat moa infomesen abaot fasin blong givimaot ol tempol rekomen blong ol pikinini we oli sil long papa mo mama blong olgeta.

Ol memba we oli gat 21 yia i go antap, oli mas endao blong oli sil long papa mo mama blong olgeta (luk long 26.4.4).

Stap silim ol pikinini we oli ded finis i go long ol papa mo mama (we oli laef o ded finis). Wan we i ded finis, plante taem bae i sil long papa mo mama blong hem we tufala i bonem hem i kam long wol, o bae i sil long papa mo mama we tufala i adoptem hem. Be, wan pikinini we i ded finis, bae i save sil long:

• Stret mama mo step-papa blong hem.

• Stret papa mo step-mama blong hem.

• Papa mo mama we tufala i lukaot long hem, o long ol bubu we oli resemap pikinini ia (luk long 38.4.2.4).

• Wan kapol we i gat tingting blong adoptem wan pikinini be oli no bin save finisim adopsen bifo pikinini i ded (luk long 38.4.2.4).

Oli save mekem ol siling ia iven sapos wan pikinini we i ded finis, i sil finis long papa mo mama blong hem we tufala i bonem hem i kam long wol, o i sil long papa mo mama we tufala i adoptem hem. Ol siling i go long ol papa mo mama we oli no bonem olgeta i kam long wol ia, o i go long ol papa mo mama we oli no adoptem olgeta, long ol situesen we oli no olsem olgeta we oli stap long lis antap ia, bae i nid blong gat apruvol blong Fas Presidensi.

38.4.2.3

Ol Pikinini we Oli Adoptem Olgeta o Ol Pikinini we Oli Stap Lukaotem Olgeta, we Oli Laef Yet I Stap

Ol pikinini we oli laef i stap, we oli bon insaed long kavenan, o oli bin silim olgeta long papa mo mama, oli no save sil long eni nara papa mo mama sapos Fas Presidensi i no givim raet from.

Ol pikinini we oli laef i stap, we oli adoptem olgeta folem loa, mo oli no bon insaed long kavenan, o oli no bin sil long wan nara papa mo mama, bae oli save sil long papa mo mama we i adoptem olgeta, afta nomo we Kot i givim las jajmen blong adopsen. Wan kopi blong Oda blong Adopsen, oli mas soem long tempol. Wan oda blong Kot we i givim raet blong lukaotem pikinini i no inaf blong kliarem siling ia. I no gat nid blong faenemaot huia stret papa mo mama blong ol pikinini ia.

Fas Presidensi i nid blong givim raet long wan memba we i laef i stap blong hem i sil wetem papa mo mama we i lukaot long hem olsem stret pikinini blong tufala. Hemia i wan mas iven sapos oli no save huia stret papa mo mama blong pikinini we oli stap lukaotem. Stek presiden nao i mekem ol kaen rikwes ia; oli mekem hemia long RLK (luk long 6.2.3).

38.4.2.4

Ol Pikinini we Oli Adoptem o Stap Lukaotem Olsem Pikinini blong Olgeta, We Oli Ded

Wan man o woman we oli adoptem hem mo i ded finis, plante taem bae oli silim hem long papa mo mama blong hem we tufala i adoptem hem.

Wan pikinini we oli lukaot long hem, we i ded finis, oli silim hem long stret papa mo mama blong hem, we tufala i bonem hem i kam long wol ia.

38.4.2.5

Siling blong Ol Pikinini we Oli Laef, I Go long Wan Papa o Mama o Wan Step-Papa o Mama

Ol pikinini we oli no kasem eitin yia yet, mo ol pikinini we oli no akaontebol. Ol pikinini we oli no kasem eitin yia yet, we oli laef i stap, mo ol pikinini we oli no akaontebol from oli gat disabiliti long tingting, bae oli save sil long wan stret papa o mama blong olgeta wetem wan step-papa o mama, sapos nomo oli folem evri kondisen ia:

• Pikinini i no bon insaed long kavenan, o i no bin sil bifo.

• Pikinini ia, i no gat wan nara papa o mama i adoptem hem.

• Nara stret papa o mama blong hem i givim wan leta we hem i saenem, we i talem se hem i agri blong siling ia i tekem ples. Wan oda blong Kot we i givim raet blong lukaotem pikinini i no inaf blong kliarem siling ia. Leta we i givim raet i mas yusum ol toktok we i kolosap semmak long hemia:

  “Mi, [nem blong stret papa o mama], i givim raet blong [nem blong pikinini, o nem blong ol pikinini] oli sil insaed long tempol, i go long [nem blong papa mo mama]. Mi andastanem se siling ia i wan seremoni blong relijin mo i no go wetem loa.”

  Leta ia, oli presentem long tempol bifo siling i hapen.

Sapos nara stret papa o mama i ded finis, o sapos oli bin karemaot ol raet blong wan olsem papa o mama tru long rod blong loa, bae i no nidim blong gat wan leta blong agri. Long semmak fasin, i no nidim wan leta we i givim raet sapos pikinini ia i wan adalt long ples we hem i laef long hem.

Sapos nara stret papa o mama, oli no faenem hem afta we oli bin traehad blong faenem hem mo oli no faenem hem, nao i no nidim wan leta blong givim raet. Long kes olsem, bisop o stek presiden i talem se i tru, tru long rod blong jekem ol kondisen ia, se i bin gat ol hadwok we oli bin folem blong faenem papa o mama we i lus, be i no wokaot. Sapos stret papa o mama i kamkamaot afta long hemia, bae oli save luklukbak long siling ia.

Ol pikinini we oli adalt. Wan adalt memba we i laef i stap, i save sil long wan stret papa o mama wetem wan step mama o step-papa, hemia sapos memba ia i no bin bon long kavenan, o sapos hem i no bin sil long papa mo mama bifo.

Ol memba we oli gat 21 yia o moa, oli mas kasem endaomen bifo oli sil long wan stret papa o mama mo wan step mama o step papa.

Ol memba we oli mared, we oli no kasem 21 yia yet, oli no nid blong oli kasem endaomen blong oli sil long wan stret papa o mama mo wan step mama o step-papa. Be, oli mas gat wan tempol rekomen we i laef blong save sil long papa mo mama (luk long 26.4.4

Luk long 27.4.1 blong gat moa infomesen abaot fasin blong givimaot ol tempol rekomen blong ol pikinini we oli sil long papa mo mama blong olgeta.

38.4.2.6

Ol Pikinini we Oli Bon Tru long Fasin blong Putum Bebet blong Man Insaed long Bel blong Mama, o I Bon Insaed long Glas

Ol pikinini we oli bon we oli bin putum bebet blong hasban insaed long bel blong mama, o oli mekem bebi i bon insaed long glas, oli bon insaed long kavenan sapos papa mo mama blong olgeta oli sil finis. Sapos ol pikinini oli bon bifo papa mo mama blong olgeta oli sil, nao oli save sil long papa mo mama blong olgeta afta we tufala i sil long tufala.

38.4.2.7

Ol Pikinini we Oli Bon long Wan Nara Mama we I Karem Olgeta long Bel

Sapos wan pikinini i stap long bel blong nara mama mo i bon i kam long wol ia, nao stek presiden i sendem mata ia i go long Ofis blong Fas Presidensi (luk long 38.6.22).

38.4.2.8

Wanem Ples Ol Pikinini Oli Stap long Hem Taem Oli Kanselem o Sakemaot Wan Siling

Ol fetful pikinini we oli bon insaed long kavenan o oli sil i go long papa mo mama blong olgeta, oli holemtaet ol blesing ia blong papa mo mama we i no save finis. Hemia i tru iven sapos:

• Oli kanselem siling blong papa mo mama blong olgeta afta.

• Afta bae oli karemaot Jos membasip blong papa o mama, o tufala i sakemaot membasip blong Jos.

Ol pikinini we oli bon afta we siling blong papa mo mama blong olgeta i kansel o oli sakemaot, oli no bon insaed long kavenan. Ol pikinini ia, oli save sil long papa mo mama blong olgeta afta we oli putumbak ol tempol blesing blong papa mo mama blong olgeta (sapos i posibol) mo afta we oli karemaot eni samting we i kam blokem rod blong hemia i hapen.

38.5

Ol Tempol Klos mo Ol Gamen

38.5.1

Tempol Klos

Long taem blong endaomen mo ol siling odinens insaed long tempol, ol memba blong Jos oli stap wetem ol waet klos. Ol woman oli werem olgeta waet klos ia: wan dres we han blong hem i longwan, o han blong hem i tri kwota; o (wan sket mo blong top we i gat longfala han o han blong hem i tri kwota), ol stoking o ol sopsop stoking, mo ol sus o sus we oli pusum leg long hem nomo.

Ol man oli werem olgeta waet klos ia: wan sot we i gat long han, wan nektae o botae, longfala traoses, stoking, mo sus o sus we oli pusum leg long hem.

Long taem blong endaomen mo ol siling odinens, ol memba oli werem sam moa klos blong seremoni antap long waet klos we oli stap werem.

38.5.2

Kasem Ol Tempol Klos mo Ol Gamen

Ol lida blong wod mo stek oli leftemap tingting blong ol memba we oli endao blong oli pem o gat tempol klos we i blong olgetawan nomo. Oli save pem tempol klos mo gamen long wan Jos Distribusen stoa, o long store.ChurchofJesusChrist.org. Ol klak blong stek mo wok oli save helpem ol memba blong oli oda long ol klos ia.

Bisop i save yusum ol mane blong fas ofring blong helpem ol memba we oli stap long nid blong pem ol klos blong tempol mo ol gamen (luk long japta 22).

Samfala tempol oli gat ol tempol klos tu blong man i rentem olgeta. Sapos wan tempol i no gat klos blong man i rentem, ol memba oli nid blong tekem ol tempol klos blong olgeta i kam wetem olgeta. Luk long temples.ChurchofJesusChrist.org blong lanem sapos wan tempol i gat klos blong man i rentem o nogat.

Ol tempol oli gat wan sot saplae blong tempol klos we ol fultaem misinari oli save yusum. Oli no pem wan fi blong yusum ol tempol klos ia taem oli stap long ol misinari trening senta, mo taem oli gat raet blong tekpat long ol tempol odinens taem oli stap long misin fil. Sapos i nid, ol klos ia, bae ol misinari oli save yusum taem oli stap kasem endaomen blong olgeta bakegen.

I gat gamen long ol defdefren kaen materiol mo stael, we i tekem tu blong ol woman we oli gat bel o stap givim titi long pikinini (store.ChurchofJesusChrist.org).

Ol memba we oli nidim gamen long wan saes we i nogat i stap, oli save kontaktem speselis blong klos blong mekem wan spesel oda. Kontak infomesen i stap long store.ChurchofJesusChrist.org/contactus.

Blong gat infomesen blong traem ol gamen bifo we yu pem, luk long store.ChurchofJesusChrist.org.

38.5.3

Ol Gamen mo Ol Tempol Klos blong Olgeta Memba we Oli Gat Disabiliti o Oli Nogud long Sam Kaliko

Oli save pem ol spesel oda blong gamen blong ol memba we oli mas slip long bed nomo, oli gat ol strong disabiliti, o oli nogud long samfala kaliko o gamen (luk long “Ol Gamen mo Ol Tabu Klos,” store.ChurchofJesusChrist.org).

I gat ol longfala klos blong tempol we oli mekem olgeta oli sot moa blong ol memba we oli stap long ol wiljea, o oli gat ol narafala nid (luk long store.ChurchofJesusChrist.org).

38.5.4

Stap Mekem Ol Klos blong Tempol

Ol memba oli no mekem ol klos blong tempol seremoni, o ol gamen blong tempol.

38.5.5

Stap Werem Gamen

Fas Presidensi i bin givim gaed ia abaot fasin blong stap werem gamen:

“Ol gamen blong tabu prishud oli rimaenem yumi long vel we i stap insaed long tempol, mo vel ia hem i simbol we i ripresentem Jisas Kraes. Taem yu stap putum gamen blong yu, yu stap putum gamen ia olsem wan tabu saen blong Jisas Kraes. Blong stap werem ol gamen, hem i wan saen blong soemaot komitmen blong insaed blong yuwan blong folem Sevya Jisas Kraes. Ol gamen oli rimaenem yu tu, long ol tempol kavenan blong yu. Yu mas werem gamen long dei mo long naet long ful laef blong yu long wol ia. Taem yu karemaot gamen blong ol aktiviti we bae hem i no stret blong werem gamen, yu mas putum bak kwik taem afta we ol aktiviti i finis. Taem we yu kipim ol kavenan blong yu, we i tekem tu tabu janis ia blong werem gamen folem ol instraksen we oli givim longtaem yu mekem odinens ia blong fastaem, bae yu kasem bigfala akses long bigfala sore,proteksen mo paoa we i kam long Sevya.”

Gamen, oli mas werem andanit long klos we i stap aotsaed. Hem i joes blong wanwan sapos wan i wantem werem ol nara smol klos andanit long gamen blong tempol.

Ol memba oli no mas jenisim stael blong gamen blong i go stret wetem ol stael blong ol nara klos.

Ol memba oli no mas stap soem gamen long ol fasin we i no stret, long olgeta we oli no andastanem mining blong hem.

Luk long 26.3.3.

38.5.6

Stap Lukaot long Gamen

Gamen i wan tabu saen blong Jisas Kraes. Wei we yumi stap kea long ol gamen blong yumi i mas soem se hem i wan tabu saen.

Ol memba oli save somap ol gamen we oli brokbrok be oli no mas jenisim orijinol disaen blong hem. Be, sapos wan mak i kamaot o nogat fulwan, ol memba oli mas pem niu gamen.

38.5.7

Stap Werem Gamen long Militeri, Faea Seves, Ol Wok blong Loa, o wan Ejensi We I Semmak

Ol gaedlaen insaed long seksen ia i aplae long ol memba we oli endao, we oli gat ol spesifik yunifom we oli nidim blong werem taem oli stap wok:

• Insaed long militeri.

• Ol man blong faetem faea.

• Ol ofisa blong mekem man i folem loa.

• Ol sekiuriti ejen blong gavman.

Taem i posibol, ol memba ia oli mas werem gamen i semmak long eni nara memba. Be, oli mas traem blong no soemaot gamen long ol fasin we i no stret long olgeta we oli no andastanem mining blong hem, blong oli luk. Ol memba oli mas dipen long Spirit i lidim olgeta blong yusum gud tingting, kwaet fasin mo waes tingting. Long sam situesen, maet i moa gud blong livim gamen i stap long saed smol taem, mo werem bakegen taem situesen i stret. Be, sapos i wan smol samting, mo i mekem se wan i no wantem werem gamen nomo, hemia i no wan eskius blong no werem gamen mo putum i stap long saed.

Samtaem, ol rul blong seves i mekem se wan memba i no save werem gamen. Long ol kes olsem, hemia i no spolem ples we memba ia i gat long relijin blong hem. Lod i lukluk moa long hat mo wan maen we i wantem mekem samting (luk long Doktrin mo Ol Kavenan 64:34). Sapos memba ia i gohed blong stap klin inaf, bae hem i stil kasem ol blesing we i go wetem fasin blong werem gamen. Sapos ol memba oli no save werem gamen, oli mas werem bakegen stret afta we situesen blong olgeta i letem.

Ol memba insaed long ol oganaesesen ia oli mas lukluk wanwan dipatmen blong olgeta blong oli save ol spesifik rul long saed blong gamen, olsem kala o stael blong neklaen. Ol memba ia oli save sendem stael klos we oganaesesen blong olgeta i apruvum, we i go wetem ol gaedlaen blong gamen i go long Beehive Clothing blong oli makem olsem ol gamen we oli apruvum. Ol gaedlaen mo sam moa instraksen oli stap insaed long Ol Gamen Gaedlaen blong Militeri, Ol Wok blong Loa, mo Ol Man blong Faea Seves.

38.5.8

Ol Medikol Kondisen We I Save Stopem Ol Memba blong Wetem Gamen

Taem i posibol, ol memba we oli gat ol medikol kondisen, oli mas werem gamen i semmak long eni nara memba.

Oli save pem ol spesel oda blong gamen blong ol memba we oli gat ol medikol kondisen o yusum ol medikol divaes. Ol memba we oli nidim ol spesel oda blong gamen oli save kontaktem speselis blong klos blong mekem wan oda. Kontak infomesen i stap long store.ChurchofJesusChrist.org/contactus.

Sam medikol kondisen o medikol divaes i save mekem i had blong ol memba blong werem wan o tugeta pat blong gamen. Ol memba oli mas lukaotem gaed blong Spirit long ol situesen olsem. Long sam situesen, maet i moa gud blong livim gamen i stap long saed smol taem, mo werem bakegen taem situesen i stret.

Taem wan memba i no save werem gamen from wan medikol kondisen o divaes, hemia i no save spolem ples we memba ia i stap long hem long relijin blong hem. Lod i lukluk moa long hat mo wan maen we i wantem mekem samting (luk long Doktrin mo Ol Kavenan 64:34). Sapos memba ia i gohed blong stap klin inaf, bae hem i kasem ol blesing we i go wetem fasin blong werem gamen.

38.5.9

Sakem Ol Gamen blong Ol Klos blong Seremoni blong Tempol

Blong sakem ol tempol gamen we oli olfala finis, ol memba oli mas katemaot mo sakem ol mak. Ol memba oli katem haf kaliko we i stap blong mekem se oli no luksave se hem i wan gamen. Haf klos we i stap, oli save sakem.

Blong sakem ol klos blong seremoni long tempol we oli olfala tumas, ol memba bae oli katem klos ia long wan wei blong mekem se bae oli no luksave se oli bin yusum fastaem olsem wan tempol klos. Afta oli save sakem klos ia.

Ol memba oli save givim ol gamen mo ol klos blong tempol we oli stap long ol gud kondisen i go long ol nara memba we oli endao. Ol memba oli no mas givim ol gamen, o ol klos blong seremoni blong tempol i go long ol sekenhan stoa, ol stoahaos blong bisop, ol tempol, o ol nara jareti oganaesesen.

38.5.10

Tempol Klos blong Berem Dedman

Sapos i posibol, ol man o woman ia oli endao finis, oli save putum ol tempol klos long hem blong berem hem, o bonem ded bodi blong hem. Sapos ol kastom blong kalja o fasin blong berem man i mekem se hemia i no stret blong mekem, o i had blong mekem, nao bae oli foldem klos mo oli putum i stap long saed blong bodi.

Ol memba nomo we oli bin endao long laef ia bae oli save berem o bonem ded bodi blong olgeta wetem ol tempol klos. Wan we i endao we i bin stop blong werem gamen bifo hem i ded, bae oli save berem hem, o bonem ded bodi blong hem we i werem ol tempol klos sapos famli i askem.

Be, wan we oli no putumbak ol blesing long hem afta we oli sakemaot membasip blong Jos, o afta we hem i tekemaot membasip blong Jos, bae oli no save berem o bonem ded bodi blong hem wetem ol tempol klos.

Wan man o woman we i bin endao long laef ia mo i bin kilimded hemwan bakegen, bae oli save berem hem o bonem ded bodi blong hem we i werem ol tempol klos.

Ol tempol klos we oli yusum blong berem man o bonem ded bodi, i no nid blong hem i niu, be i no mas brokbrok mo i mas klin. Oli save yusum stret tempol klos blong memba ia.

Wan memba we bae oli berem hem o bonem ded bodi blong hem we i werem ol tempol klos blong hem, bae wan memba blong famli we i endao, we i sem seks olsem hem o man o woman blong hem bae i dresemap hem. Sapos i no gat wan memba blong famli i stap, o bae i no wantem blong dresemap bodi blong wan man we i endao, nao bisop i givim wok long presiden blong kworom blong ol elda blong i invaetem wan man we i endao blong i dresemap bodi ia, o i lukluk se oli dresemap hem i stret. Sapos i no gat wan memba blong famli i stap, o bae i no wantem blong dresemap bodi blong wan woman we i endao, nao bisop i askem presiden blong Rilif Sosaeti blong i invaetem wan woman we i endao blong i dresemap bodi ia, o i lukluk se oli dresemap hem i stret. Ol lida oli meksua se wok ia oli givim long wan we bae i no talem no blong mekem wok ia.

Bodi blong wan we i wan man, oli dresemap hem long ol gamen blong tempol, mo antap oli mekem hem i werem ol waet klos ia: wan sot we i gat long han, wan nektae o botae, longfala traoses, stoking, mo sus o sus we oli pusum leg long hem. Bodi blong wan woman, oli dresemap hem long ol gamen blong tempol mo antap oli mekem hem i werem ol waet klos ia: wan dres we han blong hem i longwan, o han blong hem i tri kwota; o (wan sket mo blong top we i gat longfala han o han blong hem i tri kwota), ol stoking o ol sopsop stoking, mo ol sus o sus we oli pusum leg long hem nomo.

Ol klos blong seremoni blong tempol, bae oli putum long bodi ia olsem we oli stap givim instraksen from long endaomen. Oli putum rob (longfala klos) long solda long raetsaed, mo oli fasem wetem smol rop long lefsaed blong wes blong bodi. Epron, oli fasem raon long wes blong bodi. Sas (o bigfala strap) oli putum raon long wes blong bodi mo oli fasem wetem wan bo we bae i stap antap long hip blong bodi long lefsaed. Hat blong man, bae oli putum long saed blong bodi blong hem kasem taem we i taem blong klosem kofin, o wanem we oli putum bodi long hem. Oli putum hat long tetaem ia, mo bo blong hat i stap ova long sora long lefsaed. Vel blong wan woman, bae oli putum gud long pilo long baksaed blong hed blong hem. Bae oli kavremap fes blong wan woman bifo oli berem o bonem ded bodi blong hem, olsem we famli i talemaot.

Long samfala eria, bae i gat wan man o kampani nomo we i gat laesens o raet blong oli handelem bodi blong wan we i ded. Long ol kes olsem, wan memba blong famli we i endao, o wan we i endao, we bisop i invaetem hem, o Rilif Sosaeti presiden i givim wok ia long hem, i meksua se oli putum klos ia long stret fasin long bodi blong man o woman we i ded.

Long sam kantri, bae loa i askem blong oli dresemap bodi blong man o woman wetem ol klos we oli stap brokbrok hariap afta we oli berem olgeta. Ol tempol klos ia we oli save brokbrok hariap, oli stap long store.ChurchofJesusChrist.org.

Long ol eria we i had blong kasem ol tempol klos long stret taem blong oli berem man, ol stek presiden oli mas kipim wetem olgeta, oltaem tu ful set blong mediom saes klos; hemia wan blong ol man mo wan blong ol woman.

Sapos i no gat tempol klos i stap, wan memba we i ded we i endao, oli dresemap hem long gamen o long sam nara klos we i stret.

38.6

Ol Polisi long Saed blong Ol Fasin blong Laef

I gat sam polisi insaed long seksen ia, we i tokbaot ol mata we Jos i “no leftemap tingting” blong man blong folem. Plante taem, ol memba blong Jos oli no fesem ol strong kondisen long membasip blong olgeta from sam desisen abaot ol mata ia. Be, evri pipol, long en, oli mas ansa long God from ol desisen blong olgeta.

38.6.1

Abosen

Lod i givim komanmen se: “Yu no mas kilim man i ded, mo yu no mas mekem eni samting we i semmak long hemia” (D&K 59:6 Jos i agensem fasin blong jusum blong kilimded bebi taem i stap yet long bel blong mama from sam risen we i blong wanwan man o woman, o blong mekem se sosol laef blong man i gud. Ol memba oli no mas gat wan abosen, o mekem wan abosen, o mekem rod, o pem, o agri, o leftemap tingting blong wan blong kasem wan abosen, o blong kilim bebi taem i stap yet long bel blong mama. Ol taem nomo we hemia i posibol i taem we:

• Woman i gat bel from oli fosem hem tru long rep o fasin blong inses (taem wan memba blong famli i tekem stret memba blong famli bakegen).

• Wan dokta we i gat raet, i talem se laef o helt blong mama i stap long bigfala denja.

• Wan dokta we i gat raet, i talem se smol bebi ia, we i smol nomo yet i stap i gat plante problem mo bae i no letem bebi ia blong i laef afta we hem i bon i kam long wol ia.

Be, iven, ol risen antap ia oli no wan stret risen o eskius blong mekem wan abosen. Abosen i wan series problem. Oli save tingting long hem nomo afta we ol pipol we oli responsibol oli kasem konfemesen we i kam tru long prea. Ol memba oli save kaonsel wetem bisop blong olgeta olsem pat blong planing blong olgeta.

Ol prisaeding ofisa oli lukaotgud blong luklukgud long situesen sapos wan memba blong Jos i bin tekpat long wan abosen. Maet bae i nid blong holem wan membasip kaonsel sapos wan memba i gat wan abosen, i mekem wan abosen, o i mekem rod blong wan i gat abosen, o i pem fi blong wan i gat abosen, o i leftemap tingting blong wan blong gat wan abosen (luk long 32.6.2.5). Be, i no nid blong holem wan membasip kaonsel sapos wan memba i bin tekpat o gat wan abosen bifo hem i baptaes. Mo tu, i no nid blong holem wan membasip kaonsel, o putum ol kondisen long membasip sapos i gat wan memba we i bin gat o tekpat long wan abosen from eni long ol trifala risen olsem we oli stap long aotlaen long stat blong seksen ia.

Ol bisop oli sendem ol kwestin long saed blong ol spesifik kes i go long stek presiden. Stek presiden i save askem ol kwestin blong hem long Ofis blong Fas Presidensi sapos i nid.

Folem wanem we Lod i bin talemaot finis tru long revelesen, wan i save sakem sin from, mo i save kasem fogivnes from sin ia blong gat o tekpat long abosen.

38.6.2

Abius

Abius, i taem oli tritim nogud, o taem we oli no wantem save nating long narawan long wan wei we i mekem se wan i kasem kil o harem nogud long bodi, long saed blong seks, long filing, o long saed blong mane. Ples we Jos i stanap long hem, i we, abius, oli no save akseptem eni kaen wei blong hem. Olgeta we oli stap abiusum ol waef o hasban blong olgeta, oli stap abiusum ol nara memba blong famli, o eni narawan, i stap brekem ol loa blong God mo ol loa blong man.

Evri memba, speseli ol papa mo mama, mo ol lida, oli leftemap tingting blong olgeta blong oli mas openem ae mo tingting, mo lukaotgud, mo mekem evri samting we oli save mekem blong protektem ol pikinini mo ol narawan agensem fasin blong abius. Sapos ol memba oli kam blong save abaot sam kes blong abius, oli mas ripotem i go long ol gavman atoriti mo oli mas toktok wetem bisop. Ol lida blong Jos oli mas tekem ol ripot blong abius oli series, mo neva bae oli tingting nating long olgeta, o no wantem save long olgeta ripot ia.

Evri adalt we oli wok wetem ol pikinini o ol yut, oli mas finisim proteksen trening blong ol pikinini mo ol yut, hemia bifo wan manis i pas afta we oli sastenem olgeta (luk long ProtectingChildren.ChurchofJesusChrist.org Oli mas ripitim trening ia evri tri yia.

Taem abius i hapen, faswan mo kwik responsabiliti blong ol lida blong Jos, hem i blong helpem olgeta ia we oli bin abiusum olgeta, mo blong protektem olgeta we oli no strong blong oli no save fesem fiuja abius. Ol lida oli neva mas leftemap tingting blong wan blong gohed blong stap insaed long wan hom o situesen we i gat abius long hem, o i no sef.

38.6.2.1

Abius Help Laen

Long sam kantri, Jos i stanemap wan konfidensiol abius help laen blong helpem ol stek presiden mo ol bisop. Ol lida ia, oli mas ring kwiktaem long help laen ia abaot evri situesen we wan i bin kasem abius long hem—o i stap long denja blong oli abiusum hem. Oli mas ringim help laen ia tu taem oli kam blong save se wan memba i lukluk, i pem, o i serem ponografi we i yusum ol pikinini.

Help laen ia i stap blong ol bisop mo ol stek presiden oli yusum blong ring long hem 24 aoa long wan dei, 7 dei long wan wik. Kontak infomesen i stap andanit ia.

• Long Yunaeted Stet mo Kanada, telefon namba hem i 1-801-240-1911 o 1-800-453-3860, ekstensen 2-1911.

• Yunaeted Kingdom: 0800 970 6757

• Aerlan: 1800 937 546

• Ol Kantri long Yurop Sentrol Eria: [phone] o [e-mail]

• Ostrelia: 02 9841 5454 (sapos yu stap insaed long kantri ia)

• Niu Silan: 09 488 5592 (sapos yu stap insaed long kantri ia)

Ol bisop mo ol stek presiden oli mas ring long help laen taem oli stap dil wetem ol situesen we i gat eni kaen abius long hem. Ol profesonol pipol long saed blong loa mo helt (klinik) bae oli save ansarem ol kwestin blong olgeta. Ol profesonol ia, bambae oli save givim instraksen tu long wei blong:

• Helpem ol viktim, mo hao blong help blong protektem olgeta blong oli no kasem moa abius.

• Help blong protektem olgeta we oli save kam ol viktim.

• Folem loa blong mekem ripot long saed blong abius.

Jos i komitim hem blong obei long loa long saed blong ripot blong abius (luk long 38.6.2.7). Ol loa oli defren folem ples, mo plante long ol lida blong Jos oli no ol ekspet long saed blong loa. From hemia, i nid blong ol bisop mo ol stek presiden oli mas ring long help laen blong mekem responsabiliti blong olgeta blong ripotem abius.

Wan bisop i mas givim notis tu long stek presiden blong hem abaot ol kes blong abius.

Long sam kantri, we oli no gat ol help laen, wan bisop we i kam blong save abaot wan abius i mas kontaktem stek presiden blong hem. Stek presiden i mas askem sam tingting long eria loa kaonsel blong eria ofis. Mo tu, oli leftemap tingting blong hem blong toktok long ol wokman blong Famli Seves, o wetem maneja blong welfea mo indipenden laef we i stap long eria ofis.

38.6.2.2

Stap Givim Kaonsel long Ol Kes blong Abius

Ol viktim blong abius, plante taem oli harem nogud mo safa bigwan. Ol stek presiden mo ol bisop oli lukluk long olgeta wetem lav mo sore, mo oli save andastanem filing blong olgeta ia. Oli givim kaonseling long saed blong spirit mo sapot blong helpem ol viktim blong winim ol nogud saed blong abius.

Samtaem, ol viktim ia oli gat ol filing blong sem, o filing se oli rong. Olgeta viktim ia, oli no rong long wan sin. Ol lida oli helpem olgeta mo ol famli blong olgeta blong oli andastanem lav blong God mo hiling ia we i kam tru long Jisas Kraes mo Atonmen blong Hem (luk long Alma 15:8; 3 Nifae 17:9).

Ol stek presiden mo ol bisop oli mas helpem olgeta we oli stap mekem abius, blong oli sakem sin mo oli stopem ol abius fasin blong olgeta. Sapos wan adalt i bin brekem loa long saed blong seks, mo i mekem hemia agensem wan pikinini, nao fasin ia, ating bae i had blong hem i jenisim. Rod ia blong sakem sin bae i tekem wan longfala taem. Luk long 38.6.2.3.

Ol stek presiden mo ol bisop, oli mas kea mo lukaot gud taem oli wok wetem ol famli blong ol viktim blong abius mo olgeta we oli mekem abius.

Sam help blong save givim kaonsel long ol viktim mo olgeta we oli stap mekem rabis wok ia, i stap long Abuse: How to Help.

Antap long help blong ol lida blong Jos we i kam tru long insperesen, olgeta we oli ol viktim, olgeta we oli stap mekem abius, mo famli blong olgeta, maet oli nidim sam profesonol kaonseling. Blong kasem moa infomesen, luk long 31.3.6.

Blong kasem sam infomesen abaot wanem ol bisop mo ol stek presiden oli mas mekem taem oli kam blong save abaot eni kaen blong abius, luk long 38.6.2.1. Blong kasem moa infomesen long saed blong fasin blong givim kaonsel o advaes long ol kes blong seks abius, rep, o ol nara wei blong givim kil long saed blong seks, luk long 38.6.18.2.

Luk tu long FamilyServices.ChurchofJesusChrist.org.

38.6.2.3

Abius blong Pikinini o Yut

Abius blong wan pikinini o yut speseli, i wan series sin (luk long Luk 17:2). Olsem we oli yusum long ples ia, abius blong pikinini o yut, i minim olgeta samting ia:

• Abius long bodi: Blong givim bigfala kil long bodi tru long vaelens long bodi. Sam kil, bae man i no save luk wetem ae.

• Abius long seks, o yusum pikinini: Blong gat eni kaen seks wetem wan pikinini o yut, o minim blong letem, o blong helpem ol narawan blong gat kaen aktiviti ia. Olsem we oli yusum long ples ia, abius long seks i no tekem fasin blong tu (2) yangfala we tufala i no gat 18 yia, mo yia blong tufala i kolkolosap, we tufala i agri blong gat seks.

• Abius long filing: Stap yusum ol aksen o ol toktok blong spolem nogud fasin blong wan pikinini o yut i gat respek long hemwan, o i ting se hem i nating nomo. Hemia i minim blong gogohed blong swea, yusum hem, mo tok nogud long hem long wan wei blong mekem hem i sem o daonem hem. Hem i minim tu blong no wantem save nating long pikinini o yut.

• Pikinini Ponografi: Luk long 38.6.6.

Sapos wan bisop o stek presiden i kam blong save, o i ting we wan i stap abiusum wan pikinini o yut, kwiktaem hem i folem ol instraksen long 38.6.2.1. Mo tu, hem i tekem aksen blong help blong protektem hem agensem sam fiuja abius.

I nid blong holem wan Jos membasip kaonsel mo raetemdaon wan not long membasip sapos wan adalt memba i abiusum wan pikinini o wan yut olsem we oli eksplenem long seksen ia. Mo tu, luk long 32.6.1.1 mo 38.6.2.5.

Fasin blong buli, o fos bitwin ol pikinini o yut we oli gat semsemmak yia, ol lida blong wod oli mas lukluk long hemia. Oli no holem wan membasip kaonsel.

38.6.2.4

Abiusum Waef o Hasban o Wan Narafala Adalt

Fasin blong abiusum hasban o waef, o wan nara adalt i save hapen long plante defren wei. Hemia i tekem abius long bodi, long seks, long filing mo long saed blong mane. Ol adalt we oli olfala, oli no strong o no save difendem olgeta, o oli gat disabiliti, samtaem oli stap long wan hae risk blong oli fesem abius.

Plante taem, i no gat wan mining nomo blong abius we oli save yusum long evri situesen. Be, i gat plante level blong talemaot hamas nao fasin blong abius i nogud. Level ia i stat long fasin blong yusum ol strong toktok wanwan taem i go kasem fasin blong givim kil.

Sapos wan bisop o stek presiden i kam blong save abaot abius blong wan waef o hasban, o wan nara adalt, kwiktaem nomo hem i mas folem ol instraksen we oli stap long 38.6.2.1. Mo tu, hem i tekem aksen blong help blong protektem hem agensem sam fiuja abius.

Ol lida oli lukaotem daereksen blong Tabu Spirit blong faenemaot sapos i nid blong gat praevet kaonseling, o i nid blong gat wan membasip kaonsel, hemia folem situesen we i stap blong lukluk long abius we i stap. Mo tu, oli save kaonsel wetem stret prishud lida blong olgeta abaot wanem i stret ples blong tokbaot hemia. Be nomata hemia, eni abius blong wan waef o hasban, o wan nara adalt we i go kasem ol level andanit ia, bae i nid blong holem wan membasip kaonsel.

• Abius long saed blong bodi: Blong givim bigfala kil long bodi tru long vaelens long bodi. Sam kil, bae man i no save luk wetem ae.

• Abius long saed blong seks: Luk long ol situesen we oli tokbaot gud long 38.6.18.3.

• Abius long saed blong filing: Stap yusum ol aksen o ol toktok blong spolem nogud wan blong hem i nomo gat respek long hemwan, o i ting se hem i nating nomo. Hemia i minim blong gogohed blong swea, yusum hem, mo tok nogud long hem long wan wei blong mekem hem i sem o daonem hem.

• Abius long saed blong mane: Blong stap profite long wan long saed blong mane. Hemia i tekem tu, fasin we i no folem loa, o fasin we wan i yusum propeti, mane o ol nara impoten samting blong wan narawan, be hem i no kasem raet blong mekem. Hem i save tekem tu fasin blong giaman blong kasem paoa long saed blong mane ova long wan narawan. Hem i save tekem tu fasin blong yusum paoa blong mane blong yusum fos long narawan. Luk tu long 32.6.1.3.

38.6.2.5

Ol Koling blong Jos, Ol Tempol Rekomen, mo Ol Not long Membasip Rekod

Ol memba we oli bin abiusum ol narawan, oli no mas kasem ol koling blong Jos, mo maet oli no save gat wan tempol rekomen kasem taem we oli sakem sin mo oli karemaot evri kondisen long Jos membasip blong olgeta.

Sapos wan i bin abiusum wan pikinini o yut long saed blong seks, o i mekem series abius long wan pikinini o yut long bodi o filing blong hem, bambae oli hangem wan not long membasip rekod blong hem. Hem i no mas kasem eni koling o wok, we bae i mekem se hem i stap kolosap long ol pikinini mo ol yut. Hemia i minim tu se bae hem i no save kasem wan givhan wok blong lukaotem wan famli we i gat yut o pikinini insaed long hom ia. Mo tu, i minim se hem i no save gat wan yut olsem givhan kompanion blong hem. Ol kondisen ia, bae oli mas stap nomo kasem taem we Fas Presidensi i givim raet blong oli karemaot not ia. Luk long 32.14.5 blong kasem ol infomesen long saed blong fasin blong hangem not long membasip rekod.

38.6.2.6

Ol Stek mo Wod Kaonsel

Insaed long ol stek mo wod kaonsel miting, ol stek presidensi mo ol bisoprik oli luklukbak oltaem ol polisi mo gaedlaen long saed blong fasin blong stopem mo fesem abius. Oli tijim ol stamba mesej long seksen blong Abius long Laef Help insaed long Gospel Laebri. Oli invaetem blong ol memba blong kaonsel oli toktok raon long hem. Ol lida mo ol memba blong kaonsel oli lukaotem blong Spirit i lidim olgeta taem oli stap tijim mo toktok raon long topik ia we i series.

Ol memba blong kaonsel oli mas finisim tu trening abaot proteksen blong ol pikinini mo ol yut (luk long 38.6.2

38.6.2.7

Ol Mata blong Loa we Oli Go Wetem Ol Kes blong Abius

Sapos konfidensiol infomesen i soemaot se ol abius aktiviti blong wan memba i agensem loa we i stap, bae bisop o stek presiden i mas askem strong memba ia blong ripotem olgeta aktiviti ia long ol wokman we oli meksua se man i folem loa, o ol nara stret gavman atoriti. Bisop o stek presiden i save kasem infomesen ia abaot wanem i nid blong mekem blong save mekem wan lokol ripot tru long help laen blong Jos we i stap (luk long 38.6.2.1). Sapos ol memba oli gat kwestin abaot wanem i nid blong mekem blong putum ripot, hem i leftemap tingting blong olgeta blong askem advaes long saed blong loa long wan we i kwalifae from.

Ol lida mo ol memba blong Jos oli mas mekem evri wok we oli mas mekem long saed blong loa blong mas ripotem abius i go long ol sivil atoriti. Long sam ples, ol lida mo ol tija we oli wok wetem ol pikinini mo ol yut, oli tekem olgeta olsem “ol ofisol ripota o ofisol man blong mekem ripot,” mo oli mas ripotem abius long ol atoriti blong loa. Semmak, long plante ples, eniwan we i kam blong save abaot wan abius, i mas ripotem i go long ol atoriti blong loa. Ol bisop mo ol stek presiden oli mas ringim help laen blong kasem ol ditel abaot ol ofisol wokman blong givim ripot, mo ol nara samting we loa i putum blong mas folem long saed blong fasin blong ripotem abius. Polisi blong Jos i blong stap obei long loa.

38.6.3

Karem Bebi we I No blong Stret Hasban blong Yu

Luk long 38.6.9.

38.6.4

Famli Planing

Fasin blong gat seks bitwin hasban mo waef, hem i stap wetem tingting se bae hem i wan naesfala samting, mo i tabu. God i odenem blong oli krietem ol pikinini, mo blong hasban mo waef, tufala i sosoemaot lav long wanwan long tufala (luk long 2.1.2).

Hem i wan spesel janis blong ol mared kapol we oli save karem pikinini, blong oli givim wan bodi blong mit mo bun long ol spirit pikinini blong God, we tufala i gat responsabiliti blong fidim mo lukaotem (luk long 2.1.3). Desisen ia blong hamas pikinini blong gat, mo wetaem blong gat ol pikinini ia, i wan desisen we i blong papa mo mama nomo mo i praevet. Hem i wan desisen we i gud blong lego long kapol mo Lod. Ol memba blong Jos oli no mas jajem wanwan long yumi long saed ia.

Jos i no leftemap tingting blong yusum fasin blong katemaot rod blong mekem bebi olsem wan wei blong kontrolem fasin blong bonem pikinini i kam long wol. Ol fasin blong operetem man blong stopem man blong gat pikinini, i tekem fasin blong katemaot rod blong mekem bebi long bodi blong man, mo long bodi blong woman. Be, desisen ia i wan mata blong wanwan man o woman, mo hasban mo waef nao i prea mo mekem jajmen se oli nidim hemia o no. Ol kapol oli kaonsel tugeta wetem yuniti, mo tufala i askem Spirit blong i konfemem long tufala blong mekem desisen ia.

Samtaem, i nid blong katem rod blong gat bebi tru long operesen from sam helt risen. Ol memba oli save kasem kaonseling long ol profesonol helt dokta.

38.6.5

Jastiti mo Fasin blong Stap Tru long Waef o Hasban

Loa blong Lod long saed blong jastiti o fasin blong stap klin long saed blong seks hem i:

• Blong no gat eni rilesen long saed blong seks aotsaed long wan mared folem loa bitwin wan man o wan woman.

• Blong stap tru long waef o hasban insaed long mared.

Fasin blong gat seks bitwin hasban mo waef, hem i stap wetem tingting se bae hem i wan naesfala samting, mo i tabu. God i odenem blong oli krietem ol pikinini, mo blong hasban mo waef, tufala i sosoemaot lav long wanwan long tufala.

Wan man mo wan woman nomo, we tufala i gat raet folem loa, mo tufala i mared folem loa olsem hasban mo waef, tufala i save gat ol rilesen long saed blong seks. Long ae blong God, fasin blong stap klin long saed blong seks, hem i impoten tumas. Ol fasin blong brekem loa blong jastiti, oli series tumas (luk long Eksodas 20:14; Matiu 5:28; Alma 39:5). Ol fasin ia blong brekem loa blong jastiti, i tekem tu fasin blong no yusum gud tabu paoa ia we God i bin givim blong krietem laef.

Bae i nid blong holem wan Jos membasip kaonsel sapos wan memba i:

• Gat wan seks rilesen aotsaed long mared folem loa bitwin wan man mo wan woman olsem adaltri, gat seks bifo mared, sem seks rilesen, mo storian long saed blong seks onlaen o long fon (luk long 32.6.2).

• Stap long wan kaen mared ia o wan kaen patnasip we i aotsaed long wan mared folem loa, bitwin wan man mo wan woman, olsem fasin blong stap laef tugeta be no mared, ol sivil yunion mo patnasip, mo sem seks mared.

• Yusum ponografi bigwan o wetem fasin blong no gat kontrol, we i prapa spolem mared blong memba o i spolem famli blong hem (luk long 38.6.13

Desisen ia blong holem o no holem wan membasip kaonsel long ol situesen ia, bae i dipen long plante situesen we i stap (luk long 32.7). Eksampol, i nidim moa blong gat wan kaonsel blong helpem wan memba blong sakem sin sapos hem i bin brekem ol tempol kavenan o sapos hem i wokem ripitim sin ia.

Luk long 32.6.1.2 blong faenem wetaem nao i mas gat wan kaonsel blong lukluk long ol sin long saed blong seks.

Long samfala kes, praevet kaonseling mo ol kondisen we oli no strong long membasip, bae i inaf blong helpem man o woman ia blong sakem sin (luk long 32.8

38.6.6

Pikinini Ponografi

Jos i agensem eni kaen ponografi we i yusum pikinini. Sapos wan bisop o stek presiden i kam blong save se wan memba i stap insaed long pikinini ponografi, kwiktaem nomo hem i mas folem ol instraksen we oli stap long 38.6.2.1.

I nid blong holem wan Jos membasip kaonsel mo raetemdaon wan not long membasip sapos wan memba i mekem, i serem, i holem, o i ripripitim wok blong stap lukluk ol ponografi pikja blong ol pikinini (luk long 32.6.1.2 mo 32.14.5). Gaedlaen ia, plante taem oli no yusum long ol pikinini o ol yut we oli gat semfala yia we oli stap serem ol seks pikja abaot olgetawan o ol narawan. Praevet kaonseling mo ol kondisen we oli no strong long membasip, bae i inaf blong yusum long ol situesen olsem.

Blong kasem moa advaes, luk long 38.6.13.

38.6.7

Stap Donetem Bebet blong Man o Eg blong Woman

Paten ia we i stap, blong wan hasban mo waef, tufala i givim bodi long ol spirit pikinini blong God, i wan samting we God i putum i stap 2.1.3). From risen ia, Jos i no leftemap tingting blong oli stap donetem bebet blong man o eg blong woman. Be, hemia i wan mata blong wanwan man o woman we i givim hemia, blong hem i disaed long hem wetem prea. Luk long 38.6.9. Jos i no leftemap tingting tu blong salem bebet blong man blong mekem bebi (spem), o eg blong woman.

38.6.8

Fasin blong Katemaot Sam Pat blong Praevet Pat blong Bodi blong Woman

Jos i agensem fasin blong oli katemaot sam pat long praevet o tabu pat blong bodi blong ol woman.

38.6.9

Ol Tritmen blong Wan I Save Gat Bebi

Paten ia we i stap, blong wan hasban mo waef, tufala i givim bodi long ol spirit pikinini blong God, i wan samting we God i putum i stap 2.1.3). Taem we i nid, teknoloji we i help blong mekem bebi i bon, bae i save helpem wan mared woman mo man wetem stret mo gud tingting blong tufala blong gat ol pikinini. Teknoloji ia, i tekem tu fasin blong putum bebet blong man insaed long bel blong mama, mo fasin blong mekem bebi i bon insaed long glas.

Jos i no leftemap tingting nating blong yusum fasin blong tekem spem blong narafala man o eg blong narafala woman blong mekem bebi i bon long glas; oli mas yusum spem blong hasban mo eg blong waef nomo. Be, hemia i wan mata blong wanwan man o woman we tufala i mared folem loa blong tufala i disaed long hem wetem prea.

Blong gat infomesen abaot siling blong ol pikinini we oli bon tru long fasin blong putum bebet blong man insaed long bel blong mama, o i bon insaed long glas 38.4.2.6.

Luk tu long “Adoption” (Topics and Questions, topics.ChurchofJesusChrist.org).

38.6.10

Inses

Jos i agensem eni kaen wei blong inses. Olsem we oli yusum long ples ia, inses, i seks rilesen bitwin:

• Wan papa wetem wan pikinini blong hem, wan mama wetem wan pikinini blong hem.

• Wan bubuman wetem wan apupikinini blong hem, wan bubuwoman wetem wan pikinini blong hem.

• Wan brata wetem stret sista blong hem, o sista wetem stret brata blong hem.

• Wan anggel wetem nis blong hem, o wan anti wetem nefiu blong hem.

Olsem we oli yusum long ples ia, pikinini, apupikinini, brata o sista, nis, mo nefiu i minim olgeta we oli bonem i kam long wol ia, olgeta we oli adoptem, olgeta we oli gat sem papa o mama, o olgeta we oli lukaotem olgeta insaed long famli blong wan longfala taem. Inses i save hapen bitwin 2 we tufala i no gat 18 yia yet, wan adalt mo wan we i no gat 18 yia yet, o 2 adalt. Sapos wan stek presiden i gat kwestin, se, wan rilesensip ia i wan inses o no folem ol lokol loa, hem i mas askem help long Ofis blong Fas Presidensi.

Taem we wan we i no gat 18 yia yet i wan viktim blong inses, bisop o stek presiden i singaotem abius help laen blong Jos long ol kantri we i gat wan laen olsem i stap (luk long 38.6.2.1 Long ol nara kantri, stek presiden i mas lukaotem advaes long eria loa kaonsel we i stap long eria ofis. Mo tu, oli leftemap tingting blong hem blong toktok wetem ol wokman blong Famli Seves, o wetem maneja blong welfea mo indipenden laef we i stap long eria ofis.

I nid blong holem wan Jos membasip kaonsel mo raetemdaon wan not long membasip sapos wan memba i mekem inses (luk long 32.6.1.2 mo 32.14.5). Kolosap oltaem, taem i gat inses, bae i nid blong Jos i karemaot membasip blong wan man o woman we i mekem hemia.

Sapos wan we i no gat 18 yia yet i mekem fasin blong inses, stek presiden i kontaktem Ofis blong Fas Presidensi blong save wanem blong mekem.

Ol viktim blong inses, plante taem oli harem nogud mo safa bigwan. Ol lida oli luklukgud long olgeta wetem lav mo sore, mo oli save andastanem filing blong olgeta ia. Oli givim sapot long saed blong spirit mo kaonseling blong helpem ol viktim blong winim ol nogud saed blong inses.

Samtaem, ol viktim ia oli gat ol filing blong sem, o filing se oli rong. Olgeta viktim ia, oli no rong long wan sin. Ol lida oli helpem olgeta mo ol famli blong olgeta blong oli andastanem lav blong God mo hiling ia we i kam tru long Jisas Kraes mo Atonmen blong Hem (luk long Alma 15:8; 3 Nifae 17:9).

Antap long help blong ol lida blong Jos we i kam tru long insperesen, olgeta we oli ol viktim mo famli blong olgeta, maet oli nidim sam profesonol kaonseling. Blong kasem moa infomesen, luk long 38.6.18.2.

38.6.11

Mekem Bebi I Bon long Glas

Luk long 38.6.9.

38.6.12

Nogud Paoa

“Wanem we i kam long God, i laet” (Doktrin mo Ol Kavenan 50:24). Wanem i yusum nogud paoa, i lukluk nomo long wanem we i tudak mo i lidim man long giaman samting. Hem i prapa spolem fet o bilif long Kraes.

Ol samting o fasin we i yusum nogud paoa, i tekem tu fasin blong wosipim Setan. Hem i tekem ol blak majik aktiviti we oli no go stret wetem gospel blong Jisas Kraes. Ol kaen aktiviti olsem (be i no stop long olgeta ia) fasin blong talem fiuja laef long saed blong mane, ol strong nogud tok, mo ol hiling praktis we oli olsem ol kopi long prishud paoa blong God (luk long Moronae 7:11–17).

Ol memba blong Jos oli no mas stap insaed long eni wei blong wosip long Setan, o oli no mas joen long eni wei wetem samting we i blong praktis blong tudak, o i yusum nogud paoa. Oli no mas tokbaot nomo, kaen tudak ia, long ol storian, o long ol miting blong Jos.

38.6.13

Ponografi

Jos i agensem eni kaen ponografi. Fasin blong stap yusum eni kaen ponografi i prapa spolem laef blong wanwan man, woman mo famli, mo sosaeti tu. Mo tu, hem i ronemaot Spirit blong Lod. Ol memba blong Jos oli mas stap longwe long eni kaen tul blong ponografi, mo oli mas agensem wok blong stap mekem prodak blong ponografi, agensem blong wok blong stap serem mo yusum ponografi.

Jos i givim olgeta risos ia blong helpem olgeta pipol we ponografi i spolem laef blong olgeta.

• AddressingPornography.ChurchofJesusChrist.org

• AddictionRecovery.ChurchofJesusChrist.org

• Helping Those Who Struggle with Pornography (buklet)

• Let Virtue Garnish Thy Thoughts (buklet)

Ol stek presiden mo ol bisop oli givim sapot tu long ol memba blong famli folem nid we i stap.

Sam oli no lukaotem ponografi mo no gat tingting ia blong wantem lukluk o yusum . Blong minim blong yusum ponografi i save spolem man mo woman— nomata sapos hem i hapen wanwan taem o fulap taem.

Plante taem, praevet kaonseling mo ol kondisen we oli no strong long membasip bae oli inaf blong helpem wan i sakem sin ia blong stap yusum ponografi (luk long 32.8). Oli no stap holem tumas ol membasip kaonsel. Be, maet i nid blong holem wan kaonsel blong wan we i stap yusum bigwan ponografi, o wan we i gat fasin blong no gat kontrol blong yus blong ponografi we i prapa spolem mared blong memba o i spolem famli (luk long 38.6.5.) I nid blong holem wan kaonsel mo raetemdaon wan not long membasip sapos wan memba i mekem, i serem, i holem, o i ripripitim blong stap lukluk ol ponografi pikja blong ol pikinini (luk long 38.6.6).

Antap long help blong ol lida blong Jos we i kam tru long insperesen, maet sam memba oli nidim sam profesonol kaonseling. Ol lida oli save kontaktem Famli Seves blong kasem help sapos i nidim. Luk long 31.3.6 blong kasem kontak infomesen.

38.6.14

Fasin blong No Gat Jastis

Evri pipol oli ol pikinini blong God. Evriwan oli ol brata mo sista we oli pat blong tabu famli blong Hem (luk long “Famli: Wan Ofisol Toktok I Go long Wol”). “Bifo we bifo olgeta, God i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol.” (Ol Wok 17:26). “Evriwan i semmak long God (2 Nifae 26:33). “Wan man i gudfala long lukluk blong hem semmak olsem narafala man” (Jekob 2:21).

Fasin blong no gat jastis i no go wetem toktok blong God we i kam tru long revelesen. Se God i glad o no long yu, bae i dipen nomo long hamas hat mo tingting yu givim long Hem mo long ol komanmen blong Hem, be i no from kala blong skin blong yu ia, o ol narafala fasin.

Jos i stap singaotem evri pipol blong lego fogud ol fasin mo ol aksen we i no givim jastis long eni grup o long eni man o woman. Ol memba blong Jos oli mas soem rod, stap lidim wok ia blong promotem respek long evri pikinini blong God. Ol memba oli folem komanmen blong Sevya blong lavem ol narafala man (luk long Matiu 22:35–39). Oli stap traehad blong oli stap olsem ol gud man mo woman long evri narawan, mo oli sakemaot eni kaen fasin blong no givim jastis. Hemia i tekem fasin blong no gat jastis folem kala blong skin, folem kantri, sitisensip, traeb, jenda (se wan i man o woman), yia, disabiliti, faenens o mane, bilif blong relijin, o no gat bilif, mo sapos wan i laekem man o woman.

38.6.15

Filing long Wan we I Sem Seks mo Fasin blong Olgeta we Oli Gat Sem Seks

Jos i stap leftemap tingting blong ol famli mo ol memba blong openem han wetem kea, lav, respek long olgeta ia we oli filim se oli laekem olgeta we oli gat sem seks olsem olgeta. Jos i tokbaot plante fasin blong andastanem man insaed long sosaeti, we i soem ol tijing blong Jos abaot fasin blong stap kaen, fasin blong akseptem man, fasin blong gat lav long ol narawan, mo gat respek long evri kaen man. Jos i no stanap long eni saed blong talem wanem i mekem se i gat fasin blong man i laekem wan narawan we i semmak seks olsem hem.

Ol komanmen blong God oli putum tabu, o blokem evri fasin o aksen we oli no klin long saed blong seks, i nomata long saed blong man wetem woman, o long saed blong sem seks. Ol lida blong Jos oli givim advaes long ol memba we oli stap brekem loa blong jastiti. Ol lida oli helpem olgeta blong oli gat wan klia andastaning abaot fet long Jisas Kraes mo Atonmen blong Hem, rod ia blong fasin blong sakem sin, mo stamba tingting blong laef long wol ia. Ol fasin o aksen we oli no folem loa blong jastiti bae i save kam wan risen blong stap holem wan Jos membasip kaonsel (luk long 38.6.5). Man i save kasem fogivnes long hemia tru long fasin blong sakem sin wetem tru tingting.

Gat filing long wan we i semmak seks i no wan sin. Ol memba we oli stap gat ol filing ia mo oli no folem o mekem folem ol filing ia, oli stap laef folem plan blong Papa long Heven we i gat long ol pikinini blong Hem, mo folem doktrin blong Jos. Ol lida oli sapotem mo leftemap tingting blong olgeta blong oli mekem olsem blong laef folem ol komanmen blong Lod. Ol memba we oli gat ol filing ia oli save kasem ol koling blong Jos, gat ol tempol rekomen, mo kasem ol odinens blong tempol sapos oli klin inaf. Olgeta memba blong Jos we oli ol man, oli save kasem mo yusum prishud.

Evri memba we oli stap kipim ol kavenan blong olgeta, bambae oli kasem ol blesing we Hem i promesem long ol taem we i no save finis, hemia nomata situesen blong olgeta i letem olgeta blong kasem ol blesing blong mared we i no save finis, o blong stap olsem wan papa o wan mama long laef ia (luk long Mosaea 2:41).

Jos i givim olgeta risos ia blong andastanem gud moa, mo blong sapotem ol pipol we, fasin blong laekem wan we i semmak seks, i stap spolem laef blong olgeta.

• “Same-Sex Attraction,” Topics and Questions, topics.ChurchofJesusChrist.org

• “Filing long Wan we I Sem Seks mo Fasin blong Olgeta we Oli Gat Sem Seks,” Help long Laef, ChurchofJesusChrist.org

Antap long help blong ol lida blong Jos we i kam tru long insperesen, ol memba oli save go lukaotem sam profesonol kaonseling. Ol lida oli save kontaktem Famli Seves blong kasem help. Luk long 31.3.6 blong kasem kontak infomesen.

38.6.16

Sem Seks Mared

Olsem wan doktrin prinsipol we i stanap long ol skripja, Jos i talemaot bakegen, se i tru, se mared bitwin man mo woman i stamba blong plan blong Krieta, blong ol pikinini blong Hem oli save gobak stap long ples blong olgeta kasem taem we i no save finis. Jos i talemaot bakegen, se i tru, se loa blong God i talem se mining blong mared, hem i yunion bitwin wan man mo wan woman we tufala i mared long loa mo folem loa.

Wan man mo wan woman nomo, we tufala i gat raet folem loa, mo tufala i mared folem loa olsem hasban mo waef, tufala i save gat ol rilesen long saed blong seks. Ol nara fasin blong gat seks, wetem hemia we i bitwin olgeta we oli gat sem seks, oli ol sin, mo oli daonem tabu institusen ia, we i famli, we God i krietem.

38.6.17

Edukesen long saed blong Seks

Wok blong tijim pikinini long saed blong seks, i foldaon faswan long solda blong papa mo mama. Ol papa mo mama, oli mas gat storian oltaem, we oli klia, oli ones wetem ol pikinini blong olgeta abaot fasin blong gat seks we i helti, mo i stret mo gud. Ol kaen storian ia oli mas:

• Stret wetem yia blong pikinini mo hamas hem i andastanem samting.

• Helpem ol pikinini blong rere blong gat hapines long mared mo holem loa blong jastiti (luk long 2.1.2).

• Tokbaot ol denja blong ponografi, nid blong stap longwe long hem, mo olsem wanem blong fesem taem i kamkamaot long olgeta.

Blong gat moa infomesen, luk long “Sex Education and Behavior” (Topics and Questions, topics.ChurchofJesusChrist.org).

Olsem pat blong responsabiliti blong olgeta blong tijim ol pikinini blong olgeta, ol papa mo mama oli mas save gud long wanem oli stap tijim ol pikinini long saed blong seks long skul, mo ol papa mo mama oli mas gat moa paoa ova long edukesen ia long ol pikinini. Ol papa mo mama oli tijim ol prinsipol we oli stret, mo oli sapotem tijing long skul we i go stret wetem gospel.

38.6.18

Abius long saed blong Seks, Rep, mo Ol Nara Wei blong Givim Kil long saed blong Seks

Jos i agensem abius long saed blong seks. Olsem we oli yusum long ples ia, toktok ia, abius long saed blong seks, mining blong hem i wan fasin we wan i minim blong mekem seks wetem wan narawan, be narawan ia i no wantem. Fasin blong gat seks wetem wan we i no givim raet, o i no save givim raet blong hem, folem loa, bae oli tekem se i fasin blong abius long saed blong seks. Abius long saed blong seks i save hapen tu wetem wan waef, o wan hasban, o long wan deiting rilesensip. Blong gat moa infomesen abaot abius long saed blong seks long wan pikinini o wan yut, luk long 38.6.2.3

Abius long saed blong seks i kavremap plante defren kaen aksen, stat long rabis toktok i go kasem rep, mo ol nara wei blong givim kil long saed blong seks. Abius ia i save hapen long bodi, tru long toktok, mo long eni nara wei. Blong kasem moa help long saed blong fasin blong givim kaonsel o advaes long ol kes blong seks abius, rep, o ol nara wei blong givim kil long saed blong seks, luk long 38.6.18.2.

Sapos ol memba oli ting, o oli kam blong save abaot wan abius long saed blong seks, oli tekem aksen blong protektem ol viktim mo ol narawan kwiktaem olsem we i posibol. Hemia i minim tu blong talemaot long ol sivil o gavman atoriti, mo blong talemaot long bisop o long stek presiden. Sapos wan i abiusum wan pikinini, ol memba oli mas folem ol instraksen we oli stap long 38.6.2.

38.6.18.1

Abius Help Laen

Sapos wan bisop o wan stek presiden i kam blong save abaot wan abius long saed blong seks, rep, o wan nara wei blong givim kil long saed blong seks, hem i ringim abius help laen blong Jos long ol kantri we i gat seves ia (luk long 38.6.2.1 blong kasem kontak infomesen). Ol profesonol pipol long saed blong loa mo helt (klinik) bae oli save ansarem ol kwestin blong olgeta. Ol profesonol ia, bambae oli save givim instraksen tu long wei blong:

• Helpem ol viktim, mo hao blong help blong protektem olgeta blong oli kasem moa abius.

• Help blong protektem olgeta we oli save kam ol viktim.

• Folem loa blong mekem ripot long saed blong abius.

Long sam kantri we oli no gat ol help laen, wan bisop we i kam blong save abaot wan abius i mas kontaktem stek presiden blong hem. Stek presiden i mas askem sam tingting long eria loa kaonsel blong eria ofis. Mo tu, oli leftemap tingting blong hem blong toktok long ol wokman blong Famli Seves, o wetem maneja blong welfea mo indipenden laef we i stap long eria ofis.

38.6.18.2

Givim Advaes o Kaonseling blong Olgeta we oli Viktim blong Abius long saed blong Seks, Rep, mo Ol Nara Wei blong Givim Kil long saed blong Seks

Ol viktim blong abius long saed blong seks, rep, o ol nara wei blong givim kil long saed blong seks, plante taem oli safa long ol bigfala trabol. Taem we oli toktok wetem tras long wan bisop o stek presiden, nao bae bisop o stek presiden ia bae i help wetem filing blong lav mo sore long hat, mo wetem fasin blong andastanem samting. Bisop o stek presiden i givim kaonseling long saed blong spirit mo sapot blong helpem ol viktim blong winim ol nogud saed blong abius. Hem i ringim abius help laen blong Jos blong kasem help long ol ples we hemia i (luk long 38.6.18.1).

Samtaem, ol viktim ia oli gat ol filing blong sem, o filing se oli rong. Olgeta viktim ia, oli no rong long wan sin. Ol lida oli no blemem viktim. Oli helpem ol viktim mo ol famli blong olgeta blong oli andastanem lav ia blong God mo hiling we i kam tru long Jisas Kraes mo Atonmen blong Hem (luk long Alma 15:8; 3 Nifae 17:9).

Ol memba oli save jusum blong serem infomesen abaot abius o kil, be ol lida oli no mas askem tumas samting long ditel. Hemia i save spolem ol viktim.

Antap long help blong ol lida blong Jos we i kam tru long insperesen, olgeta we oli ol viktim mo famli blong olgeta, maet oli nidim sam profesonol kaonseling. Blong kasem moa infomesen, luk long 31.3.6.

38.6.18.3

Ol Membasip Kaonsel

Bae i nid blong holem wan membasip kaonsel blong wan we i spolem nogud wan long saed blong seks, o i abiusum wan. I nid blong holem wan membasip kaonsel sapos wan memba i mekem rep, o sapos Kot i faenem hem i rong blong mekem wan rabis fasin long saed blong seks (luk long 32.6.1.1).

Oli mas holem wan kaonsel tu taem i gat fasin blong gat seks wetem wan adalt we i no strong o i no save difendem hemwan. Olsem we oli yusum long ples ia, toktok ia, wan adalt we i no strong o i no save difendem hemwan, i wan we, from se hem i gat limit long bodi o tingting blong hem, hem i no save agri blong gat seks, o i no save wanem ia i stap hapen.

Blong lukluk long ol nara wei blong abius long saed blong seks, ol lida oli mas lukaotem help blong Spirit blong lidim olgeta blong save sapos bae oli givim praevet kaonseling, o bae oli mas holem wan membasip kaonsel (luk long 32.6.2.2 mo 32.8). Long ol kes we i bigwan tumas, bae i nid blong holem wan kaonsel. Ol lida oli save toktok wetem stret prishud lida blong olgeta abaot wanem i stret blong mekem.

Sapos ol kondisen long membasip i risal blong wan membasip kaonsel we oli holem from wan abius long saed blong seks, oli mas raetem wan not long rekod blong memba ia.

Blong kasem moa infomesen long saed blong fasin blong givim kaonsel o advaes long ol kes blong abius, luk long 38.6.2.2 Blong kasem moa infomesen long saed blong fasin blong givim kaonsel o advaes long ol viktim blong kil long saed blong seks, luk long 38.6.18.2.

38.6.19

Ol Singgel Papa o Mama wetem Wan Bebi we Bae I Bon

Ol memba blong Jos we oli singgel mo oli gat bel, oli stap leftemap tingting blong olgeta blong oli go luk bisop blong olgeta. Insaed long Yunaeted Stet mo Kanada, ol lida oli save kontaktem ofis blong Famli Seves blong kasem sam help ia:

• Toktok wetem ol lida blong Jos.

• Givim kaonseling long wan singgel mama we i gat bel, mo famli blong hem.

I no nid blong bisop i sendem nem i go blong memba i kasem seves ia. I no gat fi blong pem. Luk long 31.3.6 blong Ol Famli Seves kontak infomesen.

Long sam nara eria, ol lida oli save kontaktem ol wokman blong Famli Seves, o maneja blong welfea mo indipenden laef; hemia oli mekem tru long eria ofis blong olgeta.

I gat ol help blong givim kaonsel long ol mama we oli singgel mo gat bel, we oli stap long “Unwed Pregnancy” (Topics and Questions, topics.ChurchofJesusChrist.org).

38.6.20

Fasin blong Man i Kilim Hemwan Bakegen

Laef long wol ia, hem i wan bigfala presen we i kam long God mo hem i rong blong tekemaot laef blong yuwan bakegen. Jos i sapotem bigwan fasin blong lukaot gud blong man i no kilim hemwan bakegen Blong kasem infomesen long saed blong wei blong helpem wan we i stap wantem tekemaot laef blong hemwan, o wan we i harem nogud from i traem blong tekemaot laef blong hem, luk long suicide.ChurchofJesusChrist.org.

Plante pipol we oli gat tingting blong tekemaot laef blong olgeta, oli wantem blong kasem help long saed blong bodi, tingting, filing mo so long saed blong spirit. Ol kaen pipol olsem, oli nidim lav, help, mo sapot we i kam long famli, ol lida blong Jos, mo ol profesonol we oli kwalifae.

Bisop i givim eklesiastik sapot taem hem i faenem se wan memba i stap tingting long fasin blong kilim ded hemwan bakegen. Mo tu, hem i helpem memba ia kwiktaem blong kasem profesonol help. Hem i leftemap tingting tu blong man o woman ia blong hem i kasem ol profesonol help.

Plante taem oli no save stopem wan we i wantem kilimded hemwan bakegen, nomata long ol bes efot blong olgeta we yumi lavem, ol lida mo ol profesonol. Fasin ia i livim hat i brok, nogud filing, mo ol kwestin we i no gat ansa long olgeta ia we yumi lavem olgeta, mo ol narawan. Ol lida oli mas givim advaes mo kaonsel wetem famli. Oli givim fidim man mo mekem sapot. Famli tu i nidim profesonol sapot mo kaonseling.

Hem i no raet blong wan i kilimded hemwan bakegen. Be, God nomo i save jajem ol tingting, ol aksen, mo mak blong wan we bae i akaontebol long hem (luk long 1 Samuel 16:7; Doktrin mo Ol Kavenan 137:9).

Famli ia, i storian wetem bisop, mo i disaed long weaples mo wanem kaen fenerol seves bae i tekples blong man o woman ia we i ded. Famli ia i save jusum blong yusum ol bilding blong Jos. Sapos man o woman ia i bin endao finis, oli save putum ol tempol klos long hem blong berem o bonem ded bodi blong hem.

Olgeta we oli lusum wan we oli lavem hem we i bin tekemaot laef blong hem, oli save faenem hop mo hiling long Jisas Kraes mo long Atonmen blong Hem.

Blong kasem infomesen abaot fasin blong stopem fasin blong wan i kilimded hemwan, mo fasin blong givhan, luk long suicide.ChurchofJesusChrist.org.

38.6.21

Katemaot Rod blong Mekem Bebi (Long Man tu)

Luk long 38.6.4.

38.6.22

Karem Bebi blong Narawan long Bel

Paten ia we i stap, blong wan hasban mo waef, tufala i givim bodi long ol spirit pikinini blong God, i wan samting we God i putum i stap 2.1.3). From risen ia, Jos i no leftemap tingting blong oli stap karem bebi blong wan narawan long bel. Be, hemia i wan praevet mata we i stap blong hasban mo waef i disaed long hem tru long prea.

Ol pikinini we oli bon long wan mama we i karem olgeta nomo long bel blong olgeta, oli no bon insaed long kavenan. Afta we oli bon i kam long wol ia, oli save sil long wan papa mo mama sapos nomo Fas Presidensi i givim raet from (luk long 38.4.2.7). Papa mo mama i raetem wan leta i go long Fas Presidensi mo tufala i givim long stek presiden. Sapos hem i sapotem rikwes ia, hem i putum leta i go wetem leta blong hemwan.

38.6.23

Wanwan Man o Woman we Oli Talem se Oli Transjenda

Jenda, o fasin blong stap olsem wan man o wan woman, i wan pat we i nid blong stap insaed long plan ia blong stap hapi we i kam long Papa long Heven (luk long Jenesis 1:27). Mining blong toktok ia, jenda insaed long “Famli: Wan Ofisol Toktok I Go Long Wol” hem i seks we wan i bon i kam wetem long wol ia. (Blong olgeta we seks blong olgeta we oli bon i kam long wol wetem, i no klia, luk long 38.7.7

Sam pipol oli filim se ol filing blong olgeta abaot jenda blong olgeta i no go stret wetem seks blong olgeta we oli bon wetem i kam long wol. Jos i no stanap long eni saed abaot wanem i mekem oli stap gat ol filing ia. Sam we oli eksperiensem ol filing ia oli luk olgetawan olsem transjenda.

Ol man o woman ia, plante taem oli fesem ol hadtaem we i had lelebet. Olgeta—wetem famli mo fren blong olgeta—oli mas tritim olgeta wetem fasin blong lukaotgud long olgeta, wetem fasin we i kaen, wetem lav mo sore, mo wetem wan bigfala lav we i olsem hemia blong Kraes. Yumi evriwan yumi ol pikinini blong God mo yumi gat wan tabu valiu.

Ol odinens blong sevem man mo fasin blong kam olsem wan god, oli kasem folem seks we wan i gat taem hem i bon i kam long wol ia. Blong gat wan gaed abaot olsem wanem blong mekem ol odinens ia, lukluk long:

• Baptaes mo konfemesen (luk long 38.2.8.9)

• Prishud odinesen (luk long 38.2.9.9)

• Ol tempol odinens (luk long 26.5.7)

Wanwan man o woman we i klin inaf we i no bin flatem o i no stap tekem meresin, o i no operetem hem, o i no gat sosol jenis long laef blong hem we i defren long seks we hem i bon wetem, oli save gat evri spesel janis olsem wan memba blong Jos.

Ol lida blong Jos oli givim kaonsel blong no tekem meresin, operesen, o jenisim sosol laef blong olgeta we i defren long seks we oli bon wetem i kam long wol. (Sosol jenis i minim blong wan i stap mekem hemwan mo soemaot hemwan olsem oposit seks we i defren long seks we hem i bon wetem i kam long wol, mo hemia i save tekem tu fasin blong jenisim dresap, mekem gud olgeta, nem blong olgeta, o olsem wanem oli singaot olgeta.) Ol lida oli givim advaes se, taem wan i tekem aksen olsem, bae i mekem se i gat ol kondisen long Jos membasip blong hem. Ol kondisen ia i save stopem wan blong kasem o praktisim prishud, kasem o yusum wan tempol rekomen, mo blong stap givim seves long sam koling blong Jos.

Wanwan man o woman we i jenisim hemwan i gobak long seks we oli bon wetem, i save go long ol sakramen miting mo tekpat long Jos long fulap nara wei. Oli leftemap tingting blong wanwan man o woman ia mo ol famli blong olgeta blong kaonsel wetem ol lokol lida blong olgeta abaot fasin blong tekpat long Jos. Ol lida blong Jos oli tijim ol trutok blong gospel long wan wei olsem hemia blong Kraes. Oli tingting long ol nid blong evriwan we oli pat. Ol seksen blong hanbuk ia—olsem blong go long ol miting mo aktiviti blong Jos (luk long 38.1.1), fasin blong tekpat long famli histri wok (luk long 25.1 mo 25.4), givim seves long ol narawan (luk long 22.2.3), mo sam moa—oli sapos blong gaedem ol lida taem oli kaonsel wetem wanwan man o woman mo ol famli blong olgeta. Blong kasem moa gaed abaot fasin blong tekpat blong wanwan man o woman we oli tekem se oli transjenda, lukluk long ol prinsipol blong givim gaed.

Ol memba we oli bin gat ol sosol jenis long laef blong olgeta mo afta oli jenis i gobak long seks blong olgeta we oli bin bon i kam long wol wetem, mo oli klin inaf mo oli komitim olgetawan blong stap obei long ol komanmen blong God, oli save gat evri spesel janis olsem wan memba blong Jos.

Ol situesen oli save defdefren bigwan aot long wan i go long narawan mo i save jenis folem taem. Ol memba we oli filim se ol filing blong olgeta abaot jenda blong olgeta i no go stret wetem seks blong olgeta we oli bon wetem i kam long wol, o oli tekem olgetawan se oli transjenda, semmak long ol papa mo mama o olgeta we oli lukaot long ol pikinini we oli stap go tru long semmak situesen, oli advaesem olgeta blong kasem kaonsel long bisop blong olgeta. Ol bisop oli kaonsel wetem stek presiden blong tokbaot ol situesen blong wanwan man wetem bigfala kea, mo wetem lav blong Kraes. Ol stek mo misin presiden oli mas lukaotem kaonsel we i kam long Eria Presidensi.

Ol nasonal mo lokol loa oli defdefren folem wanwan man o woman we oli tekem olgetawan se oli transjenda. Long Yunaeted Stet mo Kanada, ol stek presiden mo misin presiden we oli gat ol kwestin abaot ol samting we i nidim long saed blong loa, oli mas kontaktem Jos Ofis blong Jeneral Kaonsel:

1-800-453-3860, ekstensen 2-6301

1-801-240-6301

Blong ol ples aotsaed long Yunaeted Stet mo Kanada, ol lida ia oli mas kontaktem eria loa kaonsel long eria ofis.

Blong gat moa infomesen blong stap andastanem mo sapotem ol man o woman we oli filim se ol filing blong olgeta abaot jenda blong olgeta i no go stret wetem seks blong olgeta we oli bon wetem i kam long wol, o oli tekem olgetawan olsem oli transjenda, luk long “Transjenda” long ChurchofJesusChrist.org.

38.7

Ol Medikol mo Helt Polisi

38.7.1

Ol Otopsi

Oli save mekem wan otopsi sapos famli blong dedman o dedwoman i givim raet, mo sapos otopsi ia i folem loa. Long ol kes we i bigwan tumas, bae i nid blong gat otopsi folem wanem loa i talem.

38.7.2

Berem Bodi o Bonem Bodi

Famli blong dedman o dedwoman i disaed sapos bae oli bonem dedbodi o no, mo oli mas folem eni loa blong gavman long saed blong fasin blong berem o bonem dedbodi. Oli gat respek long ol tingting blong dedman.

Long sam kantri, loa i putum se oli mas bonem ol dedbodi. Long samfala kes, fasin blong berem man i no stret wetem famli, o i sas tumas blong famli i jusum. Long evri kes, bae oli lukaotgud bodi ia wetem respek mo revren. Ol memba oli gat stret save ia se paoa blong laef bakegen long ded, oltaem bae i wok (luk long Alma 11:42–45).

Taem we i posibol, bae oli putum seremoni tempol klos long bodi blong wan memba we i ded, we i bin kasem endaomen finis, taem oli berem o bonem (luk long 38.5.10).

Wan fenerol o wan memori seves i givim wan janis long ol famli blong oli kam wanples mo oli mekem ol famli rilesen mo valiu oli laef mo gohed (luk long 29.5.4).

38.7.3

Ol Pikinini we Oli Ded Bifo Oli Bon

Ol papa mo mama we oli gat wan pikinini we i ded taem hem i bon, oli fesem krae sore wetem wanem oli lusum. Ol lida, ol memba blong famli, mo ol givhan brata mo sista we oli givim i sapot long filing mo spirit help.

Ol papa mo mama oli disaed se bae oli holem ol seves blong tingbaot memori blong olgeta, o mekem hemia long gref nomo.

Ol papa mo mama oli luksave infomesen abaot pikinini long FamilySearch.org. Ol instraksen oli stap long ol websaet.

I nidim blong mekem ol tempol odinens blong ol pikinini we oli ded insaed long bel blong mama. Hemia i no minim se i no gat janis blong wan pikinini we i ded bifo i bon i kam long wol ia blong hem i no pat blong famli long ol taem we oli no save finis. Oli leftemap tingting blong papa mo mama blong trastem Lod mo ol promes blong Hem.

38.7.4

Fasin blong Help blong Kilimded Man we I Sik Bigwan

Laef long wol ia, i wan nambawan presen we i kam long God. Fasin blong help blong kilimded man we i sik bigwan, oli putum se i minim, blong kilimded wan we i sik long wan sik we i no gat meresin from. Wan we i tekpat long fasin ia blong help blong kilimded man we i sik bigwan, wetem fasin blong helpem wan blong kilimded hemwan bakegen, i brekem ol komanmen blong God.

Blong stopem laef o mekem laef i stop blong wan we i stap long en blong laef blong hem, hemia i no blong tekpat long fasin blong kilimded man we i sik bigwan (luk long 38.7.11).

38.7.5

Sik HIV mo AIDS

Ol memba we oli kasem HIV o oli gat AIDS, oli mas tritim olgeta wetem gud fasin mo welkamem olgeta long ol miting mo aktiviti blong Jos. Taem oli stap kam long Jos, oli no putum ol narawan long denja.

38.7.6

Fasin blong Mekem Man I Mekem Samting long Slip blong Hem

Long sam pipol, fasin blong mekem man i mekem samting long slip blong hem, i kam wan joes we tufala i agri long hem. Ol memba oli no mas tekpat long fasin ia blong stap soem olgetawan o blong stap entetenem ol man.

Fasin blong yusum fasin blong mekem man supavisen blong wan dokta blong tritim sik o sam sik long tingting, hemia i wan kwestin we ol stret medikol profesonol oli talem.

38.7.7

Olgeta we Oli No Save Gud Wanem Seks blong Olgeta Taem Oli Bon I Kam long Wol

Long samfala situesen we i no hapen oltaem, bae wan bebi i save bon i kam long wol ia, mo oli no save gud, o i no klia gud se hem i wan boe o hem i wan gel. Papa mo mama, o sam narafala pipol, maet bae oli mas mekem desisen ia blong disaed se pikinini ia bae i wan boe o wan gel, hemia wetem bigfala help blong ol medikol profesonol we oli save gud samting long saed ia. Ol desisen blong gohed wetem wan medikol tritmen o blong gat wan operesen, plante taem, oli mekem long taem we bebi ia i jes bon nomo. Be, desisen ia i save tekem ples samtaem afta, be nomo sapos we i nid blong tekem desisen ia folem helt risen.

I nidim spesel lav mo sore mo waes tingting taem we i gat ol yut o ol adalt we oli bon olsem, oli gotru long sam jalenj long saed blong filing abaot ol desisen we wan i bin tekem taem we oli bin bebi o smol pikinini, mo jenda we oli stap lukluk olgeta long hem.

Ol kwestin abaot ol membasip rekod, prishud odinesen, mo tempol odinens blong ol yut, o ol adalt we oli bon i kam long wol ia we oli no klia long seks blong olgeta, bae oli sendem i go long Ofis blong Fas Presidensi.

38.7.8

Ol Medikol mo Helt Praktis

Blong lukaotem gudfala help blong helt, praktisim fet, mo kasem ol prishud blesing, oli wok tugeta blong hiling, mo oli mekem folem tingting blong Lod.

Ol memba oli no save yusum ol helt o medikol praktis we oli save kwestinim. Ol memba we oli gat ol problem blong helt blong oli toktok wetem stet dokta blong olgeta we oli gat laesens blong wok insaed long kantri blong olgeta.

Antap long fasin blong lukaotem bes help blong dokta, ol memba blong Jos oli sapos blong folem skripja long Jemes 5:14 blong singaotem ol elda blong Jos; mo letem olgeta oli prea ova long hem, oli anoentem hem wetem oel long nem blong Lod.” Oli givim ol prishud blesing blong hilim man; hemia olgeta we oli holem stret ofis long prishud. Oli givim taem man i askem mo oli no mekem man i pem (luk long 18.13).

Oli no leftemap tingting blong ol memba blong askem ol merikel, o hiling we i kam long nara paoa we i kam long wan grup o man we oli klemem se oli gat ol spesel rod blong kasem hiling paoa aotsaed long prea, mo aotsaed long stret wei blong givim ol blesing blong prishud. Ol praktis ia oli singaotem olgeta plante taem ol paoa hiling. I gat ol nara nem tu we oli stap yusum. Ol kaen promes olsem, blong hilim man, plante taem oli givim mo man i pem.

38.7.9

Medikol Maruana

Jos i agensem fasin blong yusum maruana long wan fasin we i no long saed blong tritim helt. Luk long 38.7.14.

Be, oli save yusum maruana olsem meresin taem we oli mitim olgeta kondisen ia:

• Wan dokta we i gat wan laef laesens ia i stap, o wan nara helt provaeda i talem se i nid blong yusum olsem meresin.

• Hem we i tekem i folem hamas mo wei blong tekem maruana. Dokta nao i talem wei blong tekem. Jos i no apruvum blong oli tekem maruana tru long wan tul o veping, be nomo sapos helt atoriti i givim raet folem wan helt situesen.

Jos i agensem fasin blong smokem maruana long wan fasin we i no long saed blong tritim helt.

38.7.10

Fasin blong Givim Ol Pat blong Bodi mo Kasem Pat blong Bodi blong Narafala Man

Fasin blong givim ol pat blong bodi blong yumi, hem i wan aksen we i soem we yu no selfis, mo plante taem, i helpem plante ol man mo ol woman we oli gat ol sik.

Desisen blong wan we i laef blong i donetem pat blong bodi blong hem i go long wan narawan, o blong kasem wan pat blong bodi we oli donetem, bae i mas hapen wetem advaes blong dokta mo wetem prea.

Desisen ia, blong givim raet blong oli tekem ol pat blong bodi long dedbodi blong wan memba blong famli, hemia, we i man, woman o famli blong dedman i disaed long hem.

38.7.11

Mekem Laef I Go Longwan Moa (i tekem tu Laef Sapot)

Taem we strong sik i kasem man, ol memba oli mas praktisim fet blong olgeta long Lod, mo oli mas askem help long olgeta helt atoriti we oli gat raet blong givim kaonsel. Be taem we i nomo gat wan nara rod i stap, be ded nomo, bae oli mas luk hemia olsem wan blesing, mo wetem wan stamba tingting we i stap we i pat blong laef we i no save finis (luk long 2 Nifae 9:6; Alma 42:8).

Ol memba oli no mas filim se oli mas mekem laef i go longwan moa tru long sam wei we i no oraet. Ol desisen ia, hem we i sik i tekem, o ol memba blong famli oli tekem desisen ia. Oli mas askem stret helt advaes mo help blong heven tru long prea.

Ol lida oli soem se oli gat spesel wari mo oli givim ol blesing long olgeta ia we oli stap disaed se, yes o no, bae oli karemaot laef sapot long wan memba blong famli.

38.7.12

Ol Grup blong Givim Paoa long Yuwan

Plante praevet grup mo oganaesesen we oli stap mekem mane, oli gat ol program we oli talem se oli mekem se yu save luksave wanem i stap hapen long laef blong yu, blong yu tingting gud long yuwan bakegen, mo blong yu kam antap long saed blong spirit. Olgeta grup ia, oli stap promesem ol kwik ansa long ol problem we, plante taem, i nidim taem, prea mo traehad blong yuwan blong stretem. I nomata se olgeta we oli tekpat oli save filim se oli harem gud long filing blong olgeta blong smol taem, o oli filim glad, be ol problem blong bifo oli stap kambak, mo i lidim olgeta blong filim nogud moa mo nomo gat hop.

Sam long ol grup ia, oli klemem o talem se Jos o wanwan Jeneral Atoriti i sapotem olgeta. Be, ol toktok ia oli no tru.

Mifala i stap givim woning long ol memba blong Jos se, sam long ol grup ia, oli stap difendem sam kaen tingting olsem, mo oli yusum ol wei we i save spolem man. Plante long ol kaen grup olsem oli mekem man i pem ol fi we oli sas tumas, mo i pusum man blong mekem ol komitmen blong wan longfala taem. Sam oli joenem tugeta ol tingting blong wol ia wetem ol prinsipol blong gospel long sam wei we i save daonem fasin blong gat Spirit mo fet.

Ol lida blong Jos oli no mas pem, mo oli no mas leftemap tingting blong man blong tekpat long, o promotem ol kaen grup o praktis olsem. Oli no save yusum ol bilding blong Jos blong mekem ol kaen aktiviti olsem.

Ol memba we oli gat ol sosol problem mo ol problem long saed blong filing blong olgeta, oli save toktok wetem ol lida blong hem i lidim olgeta i go long ol ples we bae oli save kasem help we oli go stret wetem ol prinsipol blong gospel. Blong kasem moa infomesen, luk long 22.3.4.

38.7.13

Ol Stik Meresin

Ol stik meresin we olgeta medikol profesonol we oli gat raet oli givim, oli protektem helt mo i holemtaet laef. Oli leftemap tingting blong ol memba blong oli putum olgeta long sef ples, oli putum ol pikinini mo komuniti blong olgeta long sef ples tru long fasin blong tekem stik meresin.

Long en, wanwan man mo woman i responsibol blong mekem desisen blong olgetawan abaot stik meresin ia. Sapos ol memba oli gat sam wari, oli mas toktok wetem ol medikol profesonol we oli save mekem gud wok, mo tu, oli askem Tabu Spirit blong i soem rod long olgeta.

Ol fiuja misinari we oli no kasem stik meresin, bae i posibol blong oli putum sam limit long ol wok we oli save mekem long homkantri blong olgeta.

38.7.14

Tok blong Waes mo Ol Helti Praktis

Tok blong Waes i wan komanmen blong God. Papa long Heven i givim ol presen long saed blong spirit blong gud blong ol pikinini blong Hem. Ol profet oli bin mekem i klia se ol tijing we oli stap long Doktrin mo Ol Kavenan 89 i gat fasin blong no tekem tabak, strong drink (alkohol) mo ol hot drink (ti mo kofi).

Ol profet oli bin tijim tu ol memba blong stap longwe long ol samting we oli save spolem man, oli no folem loa, mo oli mekem man oli adik, o i spolem fasin blong save tingting gud.

I gat ol narafala samting we oli save spolem man mo i gat ol praktis we oli save spolem man we oli no tokbaot gud insaed long Tok blong Waes, o ol lida blong Jos oli no tokbaot tumas. Ol memba oli mas yusum waes tingting mo gud jajmen tru long prea blong mekem ol joes blong mekem helt blong olgeta long saed blong bodi, spirit mo filing i kam antap moa.

Aposol Pol i bin talem: “Yufala i save se bodi blong yufala i tempol blong Tabu Spirit we i stap insaed long yufala, we yufala i kasem long God we i no blong yufala?” From se oli pem yu long wan praes: from hemia givim glori long God tru long bodi blong yu, mo tru long spirit blong yu we oli blong God” (1 Korin 6:19–20).

Lod i promesem ol blesing long saed blong spirit mo laef long wol ia long olgeta we oli stap obei long Tok blong Waes mo tru long ol toktok blong help blong ol profet we oli stap laef (luk long Doktrin mo Ol Kavenan 89:18–21).

38.8

Ol Administresen Polisi

38.8.1

Adopsen mo Haos Kea

Blong stap adoptem ol pikinini, mo blong givim wan haos kea long olgeta, i save blesem ol pikinini mo ol famli. Ol famli we oli gat lav, mo oli no save finis, oli save krietem olgeta tru long adopsen. I nomata se ol pikinini oli kam long wan famli tru long adopsen o taem oli bon i kam insaed long famli, hemia i wan ikwol blesing.

Ol memba we oli wantem stap adoptem ol pikinini, o stap olsem wan haos blong stap kea long ol pikinini, oli mas folem stret evriwan evri samting we loa blong kantri blong olgeta i askem, mo tu, ol loa blong gavman we oli stap insaed long mata ia.

Jos i no mekem rod blong adopsen. Be, long Yunaeted Stet mo Kanada, ol lida oli save sendem nem i go long Famli Seves, blong oli save karem sam infomesen. Blong gat kontak infomesen, luk long 31.3.6.

Blong gat infomesen abaot ol fiuja singgel papa o mama, luk long 38.6.19

Blong gat moa infomesen, luk long “Adoption” (Topics and Questions, topics.ChurchofJesusChrist.org).

38.8.2

Fasin blong Giaman long Wan Grup blong Pipol

Fasin blong giaman long wan grup blong pipol i hapen taem wan man i stap yusum tras blong wan narawan blong stilim hem. Hemia i save hapen taem tugeta pipol oli pat blong wan sem grup, olsem Jos. Hem i save hapen tu taem, wan i abiusum posisen blong frensip o tras, olsem wan koling blong Jos, o wan famli rilesensip. Fasin blong giaman long wan grup blong pipol, plante taem, oli mekem blong karem mane.

Ol memba blong Jos oli mas ones long ol samting we oli stap mekem, mo oli mas mekem samting wetem fasin blong stap tru. Fasin blong giaman long wan grup blong pipol, i wan fasin blong sem, we i spolem tras. Olgeta we oli wokem hemia, oli save pas long kot from. Ol memba blong Jos we oli mekem giaman long wan grup blong pipol blong stilim mane, oli save fesem ol strong kondisen long membasip, o oli save karemaot membasip. Luk long 32.6.1.3 mo 32.6.2.3 blong faenem rod long saed blong ol membasip kaonsel blong ol fasin blong stap stil.

Ol memba oli no save talemaot o traem blong talemaot se bisnis dil blong olgeta, Jos o ol lida blong Jos nao oli sponsarem, oli sapotem, o i ripresentem olgeta.

38.8.3

Ol Odiovisuol Tul

Ol odiovisuol tul oli save help blong invaetem Spirit mo leftemap gospel tijing insaed long ol klas mo miting blong Jos. Ol eksampol blong ol tul ia, i gat ol vidio, ol pikja, mo ol miusik rekoding. Blong stap yusum ol tul ia, i neva mas kam olsem wan samting we i pulumaot tingting, i stamba poen blong klas, o miting.

Ol memba oli no mas yusum ol odiovisuol tul long ol sakramen miting, o long jeneral sesen blong stek konfrens. Be, oli save yusum miusik we oli rekodem i stap long ol miting ia, sapos i nid, blong i sapotem ol hym.

Ol memba oli mas obei long ol loa blong kopi raet taem oli yusum ol odiovisuol tul (luk long 38.8.11). Oli mas yusum ol tul ia nomo we oli go stret wetem gospel, mo blong help blong invaetem Spirit.

38.8.4

Ol Signeja mo Foto blong Ol Jeneral Atoriti, Ol Jeneral Ofisa mo Ol Eria Seventi

Ol memba blong Jos oli no mas lukaotem blong karem signeja blong Ol Jeneral Atoriti, Ol Jeneral Ofisa, o Ol Eria Seventi. Mo tu, ol memba oli no mas askem ol lida ia blong oli saenem ol skripja, ol hymbuk, o ol program. Taem hemia i hapen, i karemaot olgeta long tabu koling we oli bin kasem, mo i karemaot olgeta long spirit blong ol miting ia. Hem i save mekem tu se oli no sekhan wetem ol nara memba.

Ol memba oli no mas tekem foto blong Ol Jeneral Atoriti, Ol Jeneral Ofisa o Ol Eria Seventi insaed long ol japel long taem blong ol miting (luk long 29.8).

38.8.5

Ol Bisnis

Ol mitinghaos blong Jos, mo ol nara bilding blong Jos, ol miting blong Jos mo ol klas, mo ol websaet blong Jos mo ol janel blong ol sosol media, oli no save yusum olgeta blong promotem eni bisnis, o bisnis we i no blong Jos.

Ol lis blong ol grup blong Jos mo ol nara infomesen abaot ol memba, oli no mas givim i go long eni bisnis o bisnis we i no blong Jos. Olgeta bisnis ia, i gat olgeta ia (be lis ia i no fulwan), ol bisnis we oli promotem deiting, edukesen, mo ol janis blong kasem wok. Luk long 38.8.31.

38.8.6

Ol Wokman blong Jos

Ol wokman we Jos i stap pem olgeta, oli mas laef folem mo ona long ol standet blong Jos long evri taem. Ol wokman ia blong Jos oli mas folem ol loa blong wok long homples blong olgeta.

Blong statem o gohed blong wok blong Jos, oli mas stap klin inaf blong holem wan tempol rekomen. Wanwan taem, ol ripresentativ blong Jos Manpaoa Risos Dipatmen bae i kontaktem ol stek presiden o ol bisop blong jekem sapos ol wokman ia we jos i stap pem olgeta, o i wantem tekem olgeta long wok, oli klin inaf o no. Ol lida oli mas ansa kwiktaem, o long taem we oli askem.

38.8.7

Ol Magasin blong Jos

Insaed long ol magasin blong Jos, i gat:

• Fren blong ol pikinini.

• Blong Ol Yut Oli Kam Strong blong ol yut.

• Liahona blong ol adalt.

Fas Presidensi i stap leftemap tingting oltaem blong evri memba blong oli ridim ol magasin blong Jos. Ol magasin ia oli save helpem ol memba blong oli lanem gospel ia blong Jisas Kraes, blong oli stadi long ol tijing blong ol profet we oli laef i stap, blong oli filim se oli joen long wan wol jos famli, oli fesem ol jalenj wetem fet, mo oli kam kolosap moa long God.

Ol lida oli helpem ol memba blong kasem ol magasin we yu no nid blong pem:

• Helpem ol memba blong sabskraeb long ol magasin mo riniu sabskripsen blong olgeta long MagazineSubscriptions.ChurchofJesusChrist.org o taem oli sabskraeb from taem oli yusum Ol Risos blong Lida mo Klak.

• Soem long ol memba olsem wanem blong kasem ol samting we i stap insaed long magasin long ChurchofJesusChrist.org, Gospel Laebri ap, mo Stap Laef Folem Gospel ap. Wanem i stap long dijitol, i fri.

• I no longtaem afta we ol niu memba oli baptaes, soem olgeta olsem wanem blong lukluk ol magasin long dijitol o hemia we oli printim.

• Givim wan plan long evri pikinini mo yut we oli stap kam long jos olgetawan, we i no gat papa mo mama o wan we i lukaot long olgeta, taem oli yusum Ol Risos blong Lida mo Klak.

Ol bisop oli save singaotem wan magasin ripresentativ blong helpem ol memba blong save ridim ol magasin ia. O oli save givim wok ia long klak o wod eksekutiv sekretari blong help (luk long 7.3).

Magasin ripresentativ ia, o eksekutiv sekretari i save help tu blong putum tugeta ol stori blong ol eksperiens mo testemoni we i leftemap tingting blong gat fet long ol lokol memba blong serem long ol magasin.

Ol memba oli save manejem sabskripsen long MagazineSubscriptions.ChurchofJesusChrist.org, taem oli yusum Jos akaon blong olgeta. Blong kasem help, ol memba oli save kontaktem wod klak o magasin ripresentativ.

38.8.8

Nem blong Jos, Mak blong Toktok, mo Simbol

Nem, mak blong toktok, mo simbol blong Jos, oli ol ki samting we i soem aedentiti blong Jos. Oli rejistarem olgeta olsem ol tredmak, o oli protektem olgeta raon long wol. Oli yusum olgeta long ol ofisol buk blong Jos, ol nius, mo ol bigfala samting we Jos i oganaesem.

Ol ki aedentiti blong Jos, oli yusum nomo folem ol gaedlaen we oli stap andanit ia.

Nem blong Jos we oli raetem. Ol lokol yunit oli save yusum nem blong Jos we oli raetem (i no mak blong toktok o simbol) taem we oli stap mitim evri kondisen ia:

• Aktiviti o wok ia we oli joenem nem ia long hem, yunit i sponsarem long wan ofisol wei (eksampol, wan sakramen miting program).

• Nem blong lokol yunit, oli yusum fastaem long nem blong Jos (eksampol, Kampo Rosa Branj blong Jos Ia blong Jisas Kraes blong Ol Lata-dei Sent).

• Kaen raeting we oli yusum i no kopi o i semmak long ofisol mak blong toktok blong Jos.

Mak blong toktok mo simbol. Mak blong toktok mo simbol blong Jos (luk long pikja antap ia) oli yusum nomo olsem we Fas Presidensi mo Kworom blong Olgeta Twelef Aposol i apruvum. Oli no save yusum blong flasem samting. Mo tu, oli no save yusum blong yuwan, blong salem samting o blong promotem wan samting.

Sapos yu gat kwestin, yu save sendem i go long:

Intellectual Property Office

50 East North Temple Street

Salt Lake City, UT 84150-0005

Telefon: [phone] o 1-800-453-3860, ekstensen 2-3959

Faks: 1-801-240-1187

Imel: [e-mail]

38.8.9

Ol Komunikesen i go long Ol Stek Presiden mo Ol Bisop we i kam long Ol Wokman blong Jos mo Ol Volontia

Taem ol wokman mo volontia blong Jos oli nidim blong kontaktem wan stek presiden o bisop, bae oli toktok long eksekutiv sekretari blong lida ia, be oli save toktok stret long lida nomo sapos problem i ejen o konfidensiol. Hemia i letem ol stek presiden mo ol bisop blong lukluk moa long ol plante responsabiliti we olgeta nomo i save mekem.

Ol wokman mo volontia blong Jos we i tekem tu ol ripresentativ blong evri dipatmen blong Jos, ol edukesen program mo skul, ol wok blong welfea mo Indipenden laef, mo ol bisnis we oli joen wetem Jos.

Taem oli no singaotem wan eksekutiv sekretari o i no wok fulwan, oli save kontaktem stret wan lida.

38.8.10

Ol Kompiuta

Ol kompiuta mo ol kompiuta program we oli yusum insaed long ol mitinghaos blong Jos, olgeta long Jos hedkwota nao o eria ofis oli lukaotem. Ol lida mo ol memba oli yusum ol risos ia blong sapotem ol stamba tingting blong Jos, we i tekem tu wok blong famli histri.

Evri kompiuta program long ol kompiuta ia, oli mas gat stret laesens blong Jos.

Stek presiden i lukluk ova long ples we bae oli stap long hem, mo hao oli yusum ol kompiuta ia insaed long stek, mo i tekem tu ol kompiuta insaed long ol FamilySearch senta. Stek teknoloji speselis i meksua se oli apdeitem olgeta oltaem, mo oli lukaotem gud olgeta olsem we i stap long aotlaen long 33.10

38.8.11

Ol Tul Wetem Kopi Raet

Kopi raet i wan proteksen, we loa i givim, long olgeta we oli stap krietem ol orijinol wok, mo oli putumaot long wan wei we man i save holem (mo i tekem tu olgeta we oli dijitol i stap) olsem:

• Ol wok we oli raetem, ol miusik, ol drama, ol koregrafi.

• Ol wok blong art, foto, mo kaving.

• Ol wok blong odio, mo ol odiovisuol wok, (olsem ol muvi, ol vidio, ol Sidi, mo ol DVD).

• Ol program o gem blong kompiuta

• Intanet mo ol nara databes.

Ol loa we oli rulum ol wok we man i krietem, mo raet blong save yusum olgeta, bae i save jenis folem wanwan kantri. Ol polisi blong Jos oli putum gud i stap long seksen ia, oli go stret wetem ol intanasonol triti we oli stap yusum long plante kantri. Blong mekem i simpol, seksen ia i tokbaot raet blong wan man we i krietem wan samting olsem “kopi raet.” Be, samfala long ol raet ia, bae oli save olgeta anda long ol defren nem long samfala kantri.

Ol memba blong Jos oli mas folem fulwan evri loa blong kopi raet. Plante taem, ol kopi raet ona nomo oli save givim raet blong yusum ol wok blong olgeta olsem ia:

• Kopi semmak wok

• Seremaot

• Yusum long pablik

• Soem long pablik

• Krietem sam niu wok folem wok blong olgeta

Fasin blong yusum wan wok long eniwan long ol wei ia, be i no gat raet blong kopi raet ona, i agensem polisi blong Jos. Fasin blong yusum ol wok ia olsem, i save putum Jos, o man we i stap yusum i fesem loa.

Sapos wan i yusum wan wok, hem i save se wok ia, wan kopi raet i protektem. Ol buk we oli pablisim, oli gat wan notis blong kopi raet i stap long hem, olsem “© 1959 i kam long John Doe.” (Long saed blong ol saon rekoding, simbol hem i ℗.) Be, oli no nidim wan kopi raet notis blong gat proteksen blong loa. Semmak, sapos wan buk we oli bin printim, oli nomo printim i stap, o oli nomo putum long intanet i stap, i no minim se i no gat kopi raet long hem. Semmak, i no wan risen blong stap mekem ol kopi, blong stap serem, yusum, soem, o mekem sam moa samting we oli no kasem raet from.

Intellectual Property Office (Intelektuol Propeti Ofis blong Jos) (IPO) i stap help blong sendem ol rikwes blong yusum ol kopi raet tul blong Jos o ol program, mo tu, ol tul we Intellectual Reserve, Inc. (IRI) oli gat kopi raet long hem. IRI i wan seperet kampani, we i no mekem mane, we i onem intelektuol propeti we Jos i stap yusum. Blong gat sam infomesen long fasin blong askem yus blong ol tul we Jos i ona long hem, oli save faenem insaed long ia “Kondisen blong Yusum” o, “Terms of Use”, we i stap long ChurchofJesusChrist.org.

Olgeta kwestin ia mo ol ansa ia, oli save helpem ol memba blong oli andastanem mo folem ol loa blong kopi raet taem oli yusum insaed long jos o long hom, ol tul ia we oli gat kopi raet long hem. Sapos ol memba oli gat ol kwestin we oli no gat ansa long ol gaedlaen ia, oli save kontaktem IPO:

Intellectual Property Office

50 East North Temple Street

Salt Lake City, UT 84150-0005

Telefon: [phone] o 1-800-453-3860, ekstensen 2-3959

Faks: 1-801-240-1187

Imel: [e-mail]

?Mi save kopi ol tul blong Jos o no? Sapos oli no talem insaed long ol buk blong Jos, plante taem oli save kopi long hem blong yusum long jos o long hom o wetem famli, be i no blong mekem mane long hem. Ol kondisen blong yusum wan tul, we i stap wetem wan websaet blong Jos o wan ap, i talemaot olsem wanem oli yusum ol tul ia long ol websaet ia, mo hao oli save yusum ol ap ia. Be, bae oli no save mekem kopi long olgeta samting we Jos i mekem, blong salem, sapos i no gat raet we i kam long raeting; raet ia IPO nao i givimaot.

?Mi save kopi long miusik, o no? I gat ol spesel loa blong kopi raet we i go wetem miusik. Wan i save kopi miusik we oli kamaot long olgeta ples ia, blong oli yusum long Jos, hom mo famli, be i no blong mekem mane long hem; be sapos i gat wan notis long hym o singsing, bae oli folem notis ia. Olgeta tul ia we oli save yusum, i gat:

• Ol Hym

• The Children’s Songbooko Singsing Tabu mo Singsing blong Ol Pikinini

• Ol Jos magasin

Blong mekem kopi blong ol miusik we oli printim o rekodem, mo no kasem raet blong ol ona blong ol kopi raet, i agensem ol polisi blong Jos.

?Mi save kopi ol samting we Jos i no ona blong hem? Plante taem, ansa hem i no. Ol kopi raet loa oli rulum yus blong ol tul we onasip i praevet. Plante taem, i gat ol limit i stap we i givim ol kondisen long pablik blong oli folem bifo oli kopi ol tul we i no blong Jos. Ol limit ia, plante taem oli stap putum olgeta long stat blong wan buk o tul. Ol memba oli mas folem fulwan evri loa blong kopi raet.

?Mi save soem wan odiovisuol prodak blong salem long ol aktiviti we Jos i oganaesem. Plante taem, ansa hem i no. Ol memba blong Jos oli no mas brekem ol woning ia mo ol limit ia we oli putum long ol odiovisuol prodak we oli salem olgeta. Hemia i tekem ol muvi, ol nara vidio, mo miusik. Blong stap yusum ol odiovisuol prodak blong salem long ol aktiviti blong Jos, plante taem i minim se wan i mas kasem raet long ol ona blong ol kopi raet ia.

?Bae mi save daonlodem o kopi ol kompiuta program, mo ol nara program blong oli yusum long Jos? Plante taem, ansa hem i no. Ol kompiuta program mo ol nara program, oli no save kopi o daonlodem olgeta sapos evriwan oli pem ol laesens ia long wan stret wei.

?Wanem raet nao wan i nid blong kasem blong presentem ol miusik mo drama? Ol samting we Jos i ona blong ol, o IRI i ona, bae oli save yusum insaed long jos nomo mo i no nidim raet we i kam long ol hedkwota blong Jos. Sapos hem i wan tul we i gat kopi raet long hem, mo Jos i no ona blong hem, ol memba oli mas kasem raet blong ona blong hem, blong yusum evriwan o wan smol pat blong hemia insaed long Jos. Plante taem, ona blong kopi raet ia bae i askem wan smol fi o mane iven sapos i no gat fi blong man i pem long taem blong yusum tul ia. Evri presentesen, i mas gat raet blong ol lokol prishud lida.

38.8.12

Ol Kurikulom Tul

Jos i givim ol tul blong helpem ol memba blong oli lanem mo laef folem gospel blong Jisas Kraes. Olgeta tul ia, i gat ol skripja, ol mesej blong Jeneral Konfrens, ol magasin, ol lesenbuk, ol buk, mo ol nara risos. Ol lida oli leftemap tingting blong ol memba blong oli yusum ol skripja mo ol nara risos taem oli nidim blong stadi long gospel long hom.

Fasin blong stap lanem mo tijim gospel, i mas lukluk nomo long Sevya mo doktrin blong Hem. Blong help blong holemtaet lukluk ia long ol klas blong Jos, ol lida oli meksua se ol tija oli yusum ol tul we Jos i apruvum. Blong gat infomesen abaot ol tul we Jos i apruvum, luk long Ol Instraksen blong Yusum Kurikulom.

38.8.13

Ol Daerektri

Oli leftemap tingting blong ol memba mo ol lida blong oli yusum ol daerektri blong ol memba we Jos i givim. Ol daerektri ia, oli stap insaed long Wod Daerektri mo Map long ChurchofJesusChrist.org mo insaed long ap ia, Members Tools. Mo tu, oli givim ol besik kontak infomesen blong ol memba. Ol memba blong stek mo wod, oli save luk sam moa infomesen we bae i save helpem koling blong olgeta. Ol lida oli save lukluk infomesen ia tu long Ol Risos blong Ol Lida mo Klak.

Ol memba oli gat raet blong blokem dijitol infomesen kontak blong olgeta. Oli mekem olsem taem oli jusum ol level blong praevet laef, insaed long profael blong haos blong olgeta (onlaen).

Ol lida blong stek mo wod oli mas respektem ol praevet laef seting we ol memba oli jusum. Ol lida ia, oli meksua tu se infomesen ia, oli yusum blong ol stamba tingting blong Jos nomo we Jos i apruvum.

Plante taem, i no nid blong printim ol daerektri blong stek mo wod. Sapos ol lida oli talem se i gat wan tru nid i stap blong printim ol daerektri ia, nao bae oli mekem nomo taem oli yusum Wod Daerektri mo Map long ChurchofJesusChrist.org. Ol daerektri ia, i no mas soemaot infomesen ia blong ol memba se oli man, woman, yia blong olgeta, o deit we oli bon long hem.

Ol membasip lis, oli no mas printim blong yusum blong wan samting we i no blong Jos.

38.8.14

Fasin blong Dresap mo Fasin blong Mekem Yu

Oli krietem ol man mo ol woman i folem imej blong God (luk long Jenesis 1:26–27; Ebraham 4:27 Ol bodi blong mit mo bun, oli wan tabu presen.

Oli leftemap tingting blong ol memba blong Jos blong soem respek long bodi ia tru long ol joes we oli mekem blong dresap mo mekem gud olgeta. Wanem i stret, i defdefren folem ol kalja mo ol defren taem. Eksampol, blong sakramen miting, wanwan man o woman i werem bes Sandei Klos we oli gat blong soem respek long Jisas Kraes mo odinens ia blong sakramen (luk long 18.9.3). Semfala prinsipol ia i semmak tu long fasin blong dresap mo mekem yu blong go long tempol (luk long 27.1.5). Ol disaepol blong Jisas Kraes oli save bes wei blong jenisim mo mekem olgeta.

Ol memba mo ol lida oli no mas jajem ol narawan folem wei we oli dresap mo mekem olgeta. Oli mas lavem evri pipol, olsem we Sevya i bin givim komanmen (luk long Matiu 22:39; Jon 13:34–35). Oli mas welkamem evriwan long ol miting mo aktiviti blong Jos ( luk long 38.1.1).

Taem oli stap givim ol tempol rekomen, ol koling blong wod mo stek, ol lida oli lukluk long hamas memba i klin inaf mo oli folem advaes blong Spirit (luk long 26.3, 30.1.1, mo 31.1.1).

38.8.15

Fasin blong Rere we I Ova o Fasin blong Traem blong Laef

Jos i leftemap tingting blong gat wan indipenden laef. Oli leftemap tingting blong ol memba blong oli rere from ol jalenj blong laef, long saed blong spirit mo long saed blong bodi. Luk long 22.1.

Be, ol lida blong Jos oli bin givim advaes agensem fasin blong rere we i go ova tumas, blong save fesem ol strong disasta. Ol kaen efot olsem, samtaem oli singaotem fasin blong traem blong laef. Ol efot ia, blong mas rere, fet i mas pusum yumi blong mekem, be i no fraet.

Ol lida blong Jos oli bin givim advaes blong ol memba blong oli no go mekem kaon blong hivimap kaekae. Be, ol memba oli mas stanemap wan storej blong kaekae long hom mo sevem mane ova long wan longfala taem. Luk long 22.1.4 mo “Food Storage” (Topics and Questions, topics.ChurchofJesusChrist.org).

38.8.16

Dei blong Livim Kakae

Ol memba oli save livim kakae long eni taem. Be sapos no, plante taem oli tekem se fas Sabat blong manis, hem i wan dei blong livim kakae.

A dei blong livim kakae, hem i blong prea, no kakae kaekae mo no drink blong 24 aoa taem (sapos wan i strong long bodi blong mekem), mo blong givim wan fas ofring we i bigwan. Wan fas ofring i wan donesen blong helpem olgeta we oli stap long nid (luk long 22.2.2).

Samtaem, oli holem ol miting raon long wol, o long wanwan ples long fas Sabat blong manis. Taem we hemia i hapen, stek presidensi jusum wan nara Sabat dei blong livim kakae.

38.8.17

Fasin blong Plei Mane mo Ol Loteri

Jos i agensem eni kaen mo i toktok agensem eni fasin blong plei mane. Hemia i tekem tu blong plei mane from spot, mo ol lotri we gavman i sponsarem.

38.8.18

Ol Ges Spika o Ol Instrakta

Long plante long ol miting mo aktiviti blong Jos, ol spika mo olgeta we oli givim instraksen, oli mas pat blong lokol wod o stek ia.

Wan ges spika o wan we i givim instraksen i wan we i no pat blong wod o stek. I nidim apruvol blong bisop bifo oli invaetem wan ges spika i kam long wod miting, o long aktiviti. I nidim blong gat apruvol blong stek presiden blong save invaetem ol spika i kam long ol miting o aktiviti blong stek.

Bisop o stek presiden, i luklukgud long huia ol ges spika o instrakta ia. Maet hemia i minim tu se bae oli mas kontaktem bisop blong man o woman ia.

Bisop o stek presiden i meksua se:

• Presentesen ia oli go stret wetem doktrin blong Jos.

• Presentesen ia i no mas gat ol topik we i olbaot (ol topik oli mas laen wetem ol topik we oli tokbaot insaed long jeneral konfrens).

• Ol ges spika ia o man blong givim instraksen ia, oli no stap pem fi long olgeta, oli no pem ol patisipen, mo oli no askem moa kastoma.

• Mane blong pem transpot blong ol ges spika ia o man blong givim instraksen ia, oli no stap pem; oli no pem wetem ol mane blong bajet, mo oli no pem wetem ol praevet kontribusen.

• Ol presentesen oli mas go wetem ol gaedlaen blong stap yusum ol bilding blong Jos (luk long 35.5).

38.8.19

Imigresen

Plante taem, ol memba we oli stap nomo long homples blong olgeta, oli gat ol janis blong bildimap mo mekem Jos i kam strong long ples we oli stap long hem. Be, blong muv i go long wan nara kantri, i wan joes blong wanwan man.

Ol memba we oli muv i go long wan nara kantri oli mas obei long evri loa we i stap (luk long Doktrin mo Ol Kavenan 58:21).

Ol misinari oli no mas kam fored blong sponsarem ol narawan blong muv i go long nara kantri. Mo tu, oli no mas askem papa mo mama blong olgeta, o ol nara famli, o ol narawan blong mekem olsem.

Jos i no sponsarem imigresen tru long wok insaed long Jos.

Ol memba blong Jos oli givim taem, talen, mo frensip blong olgeta blong welkamem ol man we oli muv i go long ples blong olgeta, mo tu, welkamem ol rifuji olsem ol memba blong komuniti blong olgeta (luk long Matiu 25:35; luk tu long 38.8.35 long hanbuk ia).

38.8.20

Intanet

38.8.20.1

Ol Ofisol Intanet Risos blong Jos

Jos i holemtaet samfala ofisol websaet, blog, mo sosol media akaon. Olgeta risos ia, oli aedentifaem klia olgeta taem oli yusum Mak blong toktok o simbol blong Jos (luk long 38.8.8). Oli folem tu wanem we loa i askem, mo i folem ol polisi blong Jos long saed blong intelektuol propeti, mo praevet laef blong man.

38.8.20.2

Olsem Wanem Ol Memba Oli Yusum Intanet long Ol Koling blong Jos

Ol memba oli no save krietem ol websaet, ol blog, o ol sosol media akaon long bihaf blong Jos, o blong i ofisol ripresentativ blong Jos mo wanem Jos i tingting long hem long saed blong doktrin, polisi, mo fasin blong wok. Be, oli save krietem ol websaet, ol blog, o ol sosol media akaon blong help wetem ol koling blong olgeta. Taem oli mekem olsem, ol memba oli mas folem olgeta gaedlaen ia:

• Stek presiden (blong ol risos blong stek), o bisop (blong ol risos blong wod) i mas apruvum blong oli krietem wan websaet, wan blog, o wan sosol media akaon.

• Oli no save yusum Mak blong toktok o simbol blong Jos, o oli no save kopi o mekem wan semmak long hem (luk long 38.8.8).

• Onlaen risos ia, i mas gat wan stamba tingting biaen long hem, mo i mas gat wan gol, mo i mas tekem stret nem. Nem ia, insaed long hem i save gat nem blong wan wod o wan stek. Be, i no save gat ofisol nem blong Jos.

• Ol memba oli no save talem o traem blong talem se onlaen risos blong olgeta, wanem i stap long websaet, ol pikja, o ol nara tul, se Jos nao i sponsarem, o Jos i agri wetem, o i ripresentem Jos long wan ofisol wei. Be, oli mas raetem wan toktok we i stap talem se hemia i no wan ofisol prodak we Jos i sponsarem.

• Evri samting we oli stap insaed, oli mas stret blong olgeta ia we bae oli ridim, mo oli mas jekem gud evri taem.

• Onlaen risos ia, i mas gat wan kontak infomesen long hem.

• I mas gat moa long wan administreta we bae i responsibol blong onlaen risos ia. Hemia i wan janis blong ol wok oli gogohed taem we koling i jenis, ol pipol we oli gat wok, oli jenis. Mo tu, i mekem se bae i no wan nomo we bae i stap hadwok blong stap apdeitem mo stap jekem risos ia.

• Ol artwok, ol vidio, ol miusik mo ol nara tul we Jos i ona long ol, oli no sapos blong postem be nomo sapos oli putum klia se Terms of Use o “Ol Kondisen blong Yusum” blong wan ofisol websaet blong Jos, o Intelektuol Propeti Ofis nao i givim raet from. Ol samting we oli gat kopi raet long ol, we oli kam long ol nara risos, oli no mas yusum be nomo sapos ona i bin givim raet blong hem long raeting. Blong gat moa infomesen abaot fasin blong yusum ol tul we oli gat kopi raet long ol, luk long 38.8.11.

• Taem oli yusum ol pikja, ol vidio, o infomesen blong wan, i mas gat raet blong ona blong olgeta samting ia. Raet ia, oli save karem tru long wan rilis fom, wan pablik anaonsmen, wan saen we oli postem blong wan spesifik samting we i hapen, o long raeting taem we i nid. Oli mas folem ol loa long saed blong praevet laef long wanwan kantri.

• Ol onlaen risos oli no mas kopi ol tul mo ol samting we oli stap finis long ChurchofJesusChrist.org, long Member Tools, mo log ol nara risos blong Jos.

• Ol lida mo ol misinari oli mas kodinetem ol wok blong blokem ol kopi blong komunikesen.

• Ol onlaen risos, oli mas karemaot olgeta taem oli nomo nid blong stap. Impoten media (olsem ol foto, mo ol vidio) oli mas holemtaet insaed long histri blong wod, o insaed long histri blong stek.

Blong kasem sam moa gaedlaen, luk long internet.ChurchofJesusChrist.org.

38.8.20.3

Fasin blong Yusum Intanet blong Yuwan mo Sosol Media

Intanet mo sosol media, oli gat plante gudfala wei blong yusum olgeta. Long medel blong ol fasin blong yusum tufala samting ia, i gat ol janis blong serem ol testemoni abaot Sevya mo gospel blong Hem we i kambak. Ol blog, ol sosol media, mo ol nara intanet teknoloji i letem blong ol memba oli promotem ol mesej blong pis, hop mo glad we oli kam wetem fet ia long Kraes.

Oli leftemap tingting blong ol memba blong serem ol samting we oli leftemap tingting blong ol man. Oli mas stap tu olsem eksampol blong wan laef wetem gud fasin taem oli toktok wetem ol narawan onlaen, we i tekem wan sosol media tu. Oli mas stap longwe long fasin blong raorao (luk long 3 Nifae 11:29–30; Doktrin mo Ol Kavenan 136:23).

Ol memba oli mas traem blong stap longwe long fasin blong sakem eni nogud toktok agensem ol nara man (luk long 38.6.14). Oli traehad blong gat fasin olsem hemia blong Kraes long fasin blong tritim ol narafala man, hemia long evri taem, mo i tekem tu taem oli stap onlaen, mo oli mas soemaot tru fasin blong gat respek long evri pikinini blong God.

Ol memba oli no mas yusum ol pikja, o yusum o sakem ol toktok we oli stap talem se oli putum laef blong man long denja, ol toktok blong stap buli, i daonem man, i vaelen, o ol nara kaen toktok we i save abiusum man. Sapos i gat ol toktok onlaen we i putum man long denja, o i tokbaot ol fasin we i agensem loa, bae oli mas kontaktem olgeta we oli enfosem loa kwiktaem.

Ol memba oli no mas traem blong talem se mesej blong olgeta oli ripresentem Jos, o Jos nao i sponsarem.

38.8.21

Intanet, Satelaet mo Vidio Tul blong Wok

Ol tul blong Jos blong wok long saed blong intanet, satelaet mo vidio, oli mas yusum nomo blong Jos, be i no blong winim mane. Stek presidensi, o bisoprik i mas givim raet blong oli yusum olgeta.

Ol tul blong wok ia, oli no save yusum blong kasem o rekodem ol program we Jos i no sponsarem. Mo tu, oli no save yusum ol risos blong Jos, olsem ol intanet koneksen, blong kasem o rekodem ol kaen program olsem.

Olgeta pipol nomo we oli trenem olgeta blong yusum ol tul ia, bae oli save yusum olgeta tul ia. Evri tul ia, oli mas lokem gud oli sef i stap taem we oli no yusum olgeta. Oli no save karem ol tul blong wok ia oli go aot long bilding blong yusum long wan praevet stamba tingting.

38.8.22

Ol Loa blong Kantri

Ol memba oli mas obei, givim ona, mo sastenem ol loa long eni kantri we oli stap laef long hem, o travel i go long hem (luk long Doktrin mo Ol Kavenan 58:21–22; Ol Toktok blong Bilif 1:12). Hemia i tekem tu ol loa we i blokem fasin blong mekem misinari wok.

38.8.23

Loa Advaes long Saed blong Ol Mata blong Jos

Taem we i gat nid blong kasem help long saed blong loa from ol mata blong Jos, ol lida oli mas kontaktem Jos loa kaonsel, o loya. Blong kasem ol advaes long saed blong loa long ol situesen olsem long Yunaeted Stet mo Kanada, stek presiden i save kontaktem Jos Ofis blong Jeneral Kaonsel:

1-800-453-3860, ekstensen 2-6301

1-801-240-6301

Blong ol ples aotsaed long Yunaeted Stet mo Kanada, stek presiden i kontaktem eria loa kaonsel long eria ofis.

38.8.23.1

Stap Insaed o Ol Pepa blong Ol Kes long Kot

Ol lida blong Jos oli no sapos blong go insaed long ol sivil o kriminol kes blong ol memba insaed long ol yunit blong olgeta; Oli mas askem advaes fastaem long Jos loa kaonsel. Semfala polisi ia i go wetem fasin blong toktok mo blong raet i go long ol loya, o wokman blong kot, long pepa o long imel.

Ol lida oli mas toktok wetem Jos loa kaonsel, sapos, folem posisen blong olgeta long Jos oli:

• Biliv se oli mas testifae o talem samting long wan kes long loa.

• Bae oli askem olgeta tru long rod blong loa blong oli mas testifae o talem samting long wan kes long loa.

• Oli kasem oda blong mas givim pruf.

• Oli askem olgeta blong givim ol pepa, o infomesen.

• Oli askem olgeta blong toktok wetem ol loya o ol atoriti blong gavman abaot ol kes blong loa we oli stap, mo hemia i tekem tu fasin blong sendem man long sentens, o holem ol hiring blong wan i aot folem wan parol.

Be, ol lida blong Jos, nomata oli gat gud tingting, taem oli serem infomesen long ol kes long Kot, man i save andastanem i rong mo i save spolem man. Kaen wei ia blong serem infomesen, i save mekem ol viktim mo famli blong olgeta oli harem nogud. Taem oli folem ol polisi ia blong Jos, i help tu blong Jos i no go insaed long ol mata blong loa long wan fasin we i no stret.

38.8.23.2

Testemoni long Ol Kes long Kot

Ol lida blong Jos oli no gat raet blong givim testemoni o witnes blong olgeta long bihaf blong Jos long eni kes long Kot sapos oli no gat raet we i kam long Ofis blong Jeneral Kaonsel. Polisi ia, i blong givim ol hiring blong jajmen mo ol hiring blong rilisim man folem wan toktok (parole). Ol lida blong Jos oli no save givim wan toktok, long toktok o long raeting, we bae oli yusum olsem pruf long lidasip paoa we oli gat.

Ol lida blong Jos oli no mas givim tingting, o traem blong talem se eni testemoni we oli givim long wan kes long Kot, i ripresentem posisen blong Jos.

Ol lida blong Jos oli no mas traem blong jenisim testemoni o toktok blong wan witnes long eni kes we i stap long Kot.

Ol kontak infomesen blong yusum long Jos loa kaonsel, oli stap long 38.8.23.

38.8.24

Yus blong Postofis Bokis

Long plante kantri, hem i agensem ol loa blong postofis blong putum eni samting long bokis mo no pem from, hemia long ol postofis bokis blong wanwan haos. Loa ia, i go tu wetem eni tul blong Jos, olsem ol pepa blong seremaot, ol niusleta, o ol anaonsmen. Ol lida blong Jos oli mas givim instraksen long ol memba mo ol misinari blong oli no putum ol samting olsem insaed long ol bokis blong leta long postofis.

38.8.25

Komunikesen blong Ol Memba wetem Jos Hedkwota

Oli no leftemap tingting blong ol memba blong Jos blong oli ring i go, o imel, o raetem ol leta i go long ol Jeneral Atoriti abaot ol poen blong doktrin, o abaot ol samting abaot laef blong olgeta, o blong askem samting. Bae i had tumas blong Ol Jeneral Atoriti oli ansa long wanwan man, hemia blong mekem diuti blong olgeta. Oli leftemap tingting blong ol memba blong oli go luk ol lokol lida blong olgeta, we i tekem tu presiden blong Rilif Sosaeti, o presiden blong kworom blong ol elda, taem oli nidim help long saed blong spirit (luk long 31.3).

Long plante kes, ol leta we i kam long ol memba we oli sendem i go long Ol Jeneral Atoriti, bae oli sendem i gobak long ol lokol lida blong olgeta. Wan stek presiden we oli nidim moa klia toktok o save abaot wan doktrin, o ol nara mata blong Jos, i save raet i go long Fas Presidensi long bihaf blong ol memba blong olgeta.

38.8.26

Fasin blong Memba I Wok

Ol memba blong Jos oli mas lukaotem wok we i go wetem ol prinsipol blong gospel, mo afta, wetem wan klin tingting, oli save askem ol blesing blong Lod. Hemia i wan praevet mata we oli lego nomo i stap long jajmen blong ol memba, mo blong oli mas prea from.

38.8.27

Ol Memba wetem Ol Disabiliti

Oli leftemap tingting blong ol lida mo ol memba blong tokbaot ol nid blong evriwan we oli stap laef insaed long yunit ia blong olgeta. Ol memba wetem ol disabiliti, oli tekem se oli impoten mo oli save tekpat long sam wei we i gat mining. Ol disabiliti, oli long saed blong waes o tingting, long saed blong waes, mo bodi.

Oli leftemap tingting blong ol memba blong Jos blong folem eksampol blong Sevya long saed blong fasin blong stap givim hop, andastaning, mo lav long olgeta we oli disebol. Ol lida oli mas kam blong save olgeta we oli gat ol disabiliti mo oli mas soem se oli gat tru intres mo wari long olgeta.

Ol lida oli faenemaot tu olgeta memba we oli nidim moa kea from se wan papa o mama,waef o hasban, o pikinini, o brata o sista i gat wan disabiliti. Blong kea long wan memba blong famli we i gat wan disabiliti, i save kam wan rod we i jenisim bigwan fasin blong wan mo i bildimap fet.

Ol lida oli lukaotem tu ol memba wetem ol disabiliti we oli stap laef insaed long ol grup hom o ol nara ples, longwe long ol memba blong famli.

38.8.27.1

Mekem Toksave mo Andastaning I Kam Antap

Ol lida, ol tija, mo ol nara memba oli mas wantem blong andastanem disabiliti blong wan mo eni nid we i kam wetem disabiliti ia. Oli save kam blong andastanem moa taem oli toktok wetem hem we i disebol mo ol memba blong famli blong hem. Ol risos oli stap long disability.ChurchofJesusChrist.org.

38.8.27.2

Givim Help

Ol lida oli skelem ol nid blong olgeta we oli gat disabiliti mo olgeta we oli stap givim kea. Ol lida ia oli disaed olsem wanem oli yusum ol risos blong wod o stek blong help blong lukluk long nid we i stap, olsem we i stret blong mekem. Ol lida oli leftemap tingting blong ol memba blong oli givhan mo oli go aot mo luk olgeta ia wetem lav mo frensip.

Bisoprik o stek presidensi i save singaotem wan wod o stek disabiliti speselis blong helpem wanwan man mo woman, ol famli, ol tija mo ol nara lida (luk long 38.8.27.9).

Ol lida oli nid blong faenemaot ol stret komuniti risos we oli save helpem wanwan man, woman we i gat disabiliti mo famli blong olgeta.

Blong kasem moa infomesen long wei blong stap helpem ol memba we oli gat disabiliti, luk long disability.ChurchofJesusChrist.org. Ol lida oli save kontaktem Famli Seves (long ol ples we i gat i stap; luk long 31.3.6 blong gat kontak infomesen).

Ol lida mo memba oli no mas traem blong eksplenem from wanem jalenj blong famli i kam insaed long wan disabiliti. Oli neva mas traem blong talem se disabiliti i wan panismen we i kam long God (luk long Jon 9:2-3) o wan spesel janis.

38.8.27.3

Mekem Ol Odinens

Luk long 38.2.4.

38.8.27.4

Givim Ol Janis blong Givim Seves mo Tekpat

Plante long ol memba we oli gat disabiliti, oli save givim seves long kolosap eni wok insaed long Jos. Ol lida, oli prea, mo lukluk long wanem wanwan i save mekem mo i wantem mekem, i lukluk long ol situesen blong laef, mo afta, i givim ol stret janis blong givim seves. Oli lida oli kaonsel o toktok wetem hem we i gat disabiliti, mo wetem famli blong hem. Oli lukluk long wanem nao wan koling blong Jos bae i mekem long man o woman ia, mo wanem bae i mekem long famli o man o woman we i stap lukaot long hem. (Luk long Doktrin mo Ol Kavenan 46:15.)

Taem oli lukluk long ol wok blong Jos o ol koling blong Jos blong olgeta we oli stap givim kea long ol pipol wetem disabiliti, ol lida oli skelem gud situesen blong wanwan long olgeta we oli stap givim kea.

Ol lida mo ol tija oli sapos blong tekem ol memba wetem ol disabiliti blong oli gat pat insaed long ol miting, ol klas, mo ol aktiviti olsem we i posibol. Ol lesen, ol toktok, mo ol fasin blong tij, oli mas stretem blong i go wetem nid blong wanwan. Blong kasem moa infomesen abaot fasin blong stretem ol lesen, luk long disability.ChurchofJesusChrist.org.

Bisoprik i save invaetem wan memba blong wod blong helpem wan we i gat wan disabiliti, insaed long miting o long aktiviti. Blong wan klas we insaed long hem i gat wan memba wetem disabiliti, bisoprik i save singaotem moa long wan tija. Ol tija oli wok tugeta blong mitim ol nid blong evri memba blong klas.

Sapos wan i no save tekpat long wan miting, klas, o aktiviti, ol lida mo ol tija oli toktok wetem memba mo famli blong hem blong faenemaot sam wei blong lukluk long nid blong memba ia. Stek presiden o bisop i save givim raet blong oganaesem ol spesel klas o program blong ol memba we oli gat disabiliti (luk long 38.8.27.5). Sapos wan i no save kam long ol miting blong Jos, ol lida mo ol tija oli save givim ol lesen tul, ol rekoding, o ol samting blong luk onlaen.

Taem oli soem ol miting onlaen, olsem sakramen miting o fenerol, hem i nomo blong olgeta we oli no save go long ol ples ia (luk long 29.7). Blong gat moa infomesen abaot wei blong tekem mo kaekae sakramen, luk long 18.9.3.

Ol prishud lida oli leftemap tingting blong olgeta we oli man we oli kasem prishud mo oli gat disabiliti, blong tekpat long ol odinens ia, taem we i stret. Stat long manis Jenuware long yia ia we oli kasem 12 yia, olgeta man we oli holem prishud mo ol woman we yia blong olgeta i stat long 12 yia, we oli bin baptaes mo kasem konfemesen mo oli klin inaf, oli save kasem baptaes mo konfemesen blong olgeta we oli ded insaed long wan tempol. Blong luk ol gaedlaen abaot ol memba we oli gat ol disabiliti we oli stap kasem tempol odinens blong olgetawan, luk long 27.2.1.3 mo 27.3.1.2.

38.8.27.5

Stap Oganaesem Ol Spesel Klas, Ol Program mo Ol Yunit

Ol memba we oli gat ol disabiliti o ol spesel nid, oli stap leftemap tingting blong olgeta blong kam long ol miting blong Sandei insaed long wod blong olgeta, be nomo sapos oli stap laef insaed long ol wan bilding we oli stap kea long olgeta, o oli gat wan haos tritmen program we oli stap oganaesem long Jos (luk long 37.6).

Ol yunit mo ol grup. Oli save krietem ol wod o ol branj blong memba we oli gat ol nid we i no olsem ol narawan, olsem ol memba we oli nambut mo oli yusum saen lanwis (luk long 37.1). Bae Fas Presidensi nomo i givim apruvol.

Oli save askem wan wod blong oli lukluk long wan grup blong olgeta we oli gat disabiliti, olsem olgeta we oli yusum saen lanwis. Blong gat infomesen abaot ol membasip rekod blong olgeta we oli stap go long ol yunit o grup olsem, luk long 33.6.11.

Olgeta memba we sora i fas, we oli no laef kolosap long wan yunit blong olgeta we sora i fas, oli save atendem wan onlaen. Oli mas kasem raet blong ol lida blong yunit ia. Ol lokol wod lida oli meksua se ol memba we sora i fas, oli lukaotgud olgeta, mo oli gat janis blong tekem mo kaekae sakramen oltaem.

Ol Klas. Ol memba we oli gat disabiliti oli go long ol Sandei klas wetem ol memba blong wod blong olgeta. Be, taem we i gat nid blong lukluk long ol nid blong ol adalt memba, o ol yut memba we oli gat ol semmak disabiliti, wan wod o stek i save oganaesem ol spesel Sandei Skul klas (luk long 13.3.2).

Program blong olgeta wetem disabiliti. Taem we i nid, blong lukluk long ol nid blong ol adalt memba we oli gat disabiliti long tingting, wan wod, grup blong ol wod, stek, o grup blong ol stek oli save oganaesem wan disabiliti aktiviti program. Program ia, i kam komplitim wok blong givhan, ol Sandei Jos seves, mo ol aktiviti long lokol yunit.

Wan disabiliti aktiviti program i stap givim seves long wanwan we i gat 18 yia i go antap. Bae oli mas mekem evri efot blong tekem insaed ol memba we oli no gat 18 yia, i go insaed long ol wod mo ol stek blong olgeta. Long ol situesen we i no nomol, ol lida oli save gat moa aktiviti blong ol yut, long stat blong yia ia we oli kasem 12 yia.

Taem we i gat plante wod oli tekpat long wan disabiliti aktiviti program, stek presiden i givim wok long wan ejen bisop blong i lukluk ova long hemia. Taem we plante stek oli tekpat, Eria Presidensi i givim wok long wan ejen stek presiden blong i lukluk ova long hemia.

Ejen bisop o ejen stek presiden i toktok wetem ol nara bisop o nara stek presiden we oli tekpat, blong faenemaot olsem wanem bae oli givim mane blong ol program ia.

Disabiliti aktiviti lida. Oli save singaotem ol adalt memba olsem ol disabiliti aktiviti lida. Ol lida ia, oli mekem ol plan mo oli kareaot disabiliti aktiviti program. Oli toktok wetem ol wod mo stek disabiliti speselis (luk long 38.8.27.9) blong invaetem ol memba wetem disabiliti blong tekpat. Oli kaonsel tugeta abaot wei blong mitim ol nid blong ol memba.

Ol disabiliti aktiviti lida, ejen bisop o ejen stek presiden nao i singaotem mo i setem apat olgeta. Wan stek presiden i save givim wok tu long wan hae kaonsela blong i givim seves olsem wan disabiliti aktiviti lida.

Ol lida we oli stap givim seves long olgeta wetem disabiliti, i nomata yia blong olgeta ia we oli gat disabiliti, oli mas komplitim trening we i stap long ProtectingChildren.ChurchofJesusChrist.org. Blong luk sam moa sefti rul blong mas folem, hemia blong ol lida, luk long Ol Aktiviti blong Ol Memba Wetem Disabiliti.

Taem we oli invaetem olgeta, ol disabiliti aktiviti lida oli save go long ol stek mo wod lidasip miting.

Ol gaedlaen blong stap ol disabiliti aktiviti program. Ol disabiliti aktiviti program, oli oganaesem olgeta blong helpem olgeta we oli tekpat long ol, blong oli developem olgeta long saed blong spirit, long saed blong sosol laef, long saed blong bodi, mo long saed blong waes blong olgeta (luk long Luk 2:52). Ol lida oli talem hamas taem nao ol aktiviti ia bae oli tekples. Oli tingting long hamas bae oli tekpat, transpot, mo ol nara situesen.

Bae sam pipol oli no save tekpat from situesen blong olgeta we i had long saed blong medikol, long saed blong bodi, waes, o fasin. Ol lida oli save lukaotem ol nara wei blong givhan long olgeta folem nid blong olgeta.

Ol standet blong taem wan i tekpat mo sefti. I mas gat tu (2) responsibol adalt we oli mas stap oltaem long evri aktiviti. Tufala adalt ia, i save tu man, tu woman, o wan mared kapol. Plante taem, i nidim moa adalt blong lukluk ova long ol aktiviti blong ol memba wetem disabiliti, bitim we i nid blong ol nara aktiviti.

Ol adalt we oli help wetem ol aktiviti oli mas komplitim we i stap long ProtectingChildren.ChurchofJesusChrist.org. Oli mas kasem apruvol blong bisop blong olgeta bifo oli tekpat. Blong luk sam moa sefti rul blong mas folem, luk long “Ol Aktiviti blong Ol Memba Wetem Disabiliti.”

Sapos i gat sam fasin we i no stret, i hapen, hem i stret responsabiliti blong lida blong protektem mo helpem man o woman ia we i stap long denja. Blong kasem moa infomesen abaot wei blong fesem abius we oli ting se i hapen, luk long 38.6.2.1 mo abuse.ChurchofJesusChrist.org.

38.8.27.6

Ol Intepreta blong Ol Memba we Sora i Fas, O Oli No Save Haremgud Samting

Ol memba we sora i fas, o oli no save harem gud samting, oli tekem step blong wok wetem ol lida blong lukluk long ol nid blong komunikesen. Ol memba mo ol lida oli wok tugeta blong meksua se i gat ol intepreta oli stap.

Ol intepreta ia, wetem hem we i stap givim toktok, oli mas stap long wan ples we ol memba oli save luk olgeta.

Long taem blong wan prishud odinens o wan intaviu, intepreta i mas stap kolosap inaf long hem we i mekem odinens o i lidim intaviu. Blong gat moa infomesen long saed blong ol intepretesen blong ol odinens mo ol blesing, luk long 38.2.1.

Sapos i gat inaf intepreta, oli jenis evri 30 minit blong mekem se bae oli no taet.

Blong rere from ol praevet situesen olsem ol praevet intaviu o ol Jos disiplin kaonsel, ol lida oli kaonsel wetem memba we sora blong hem i fas. Sapos memba ia i wantem, ol lida oli save lukaotem wan intepreta we i no wan memba blong famli, hemia blong save holemtaet fasin blong kipim samting i konfidensiol.

Semfala prinsipol ia, bae oli yusum wetem ol memba we sora i fas, o oli no save harem gud samting, mo oli no yusum ol saen lanwis, be oli nidim wan intepreta we i toktok blong helpem olgeta blong ridim maot i muv.

Ol lida oli save oganaesem ol klas long wod o stek blong oli tijim saen lanwis we oli yusum long eria blong olgeta. I gat wan gudfala risos, we oli singaotem Dictionary of Sign Language Terms for The Church of Jesus Christ of Latter-day Saints.

38.8.27.7

Praevet Infomesen

Ol lida oli mas respektem praevet laef blong ol memba wetem disabiliti long taem mo aotsaed long ol lidasip miting we oli stap tokbaot ol nid blong olgeta ia wetem disabiliti. Ol lida oli no mas serem helt situesen o ol nara infomesen sapos oli no kasem raet.

38.8.27.8

Ol Seves Animol

Ol bisop mo stek presiden, bae oli talem sapos oli letem o no blong ol man o woman wetem disabiliti, blong yusum ol dog we oli trenem insaed long ol mitinghaos. Ol nara kaen animol we i tekem tu ol animol we oli stap blong givim sapot long saed blong ol filing (ol animol we i givim kamfot), oli no gat raet blong stap long ol mitinghaos o long ol aktiviti we Jos i mekem, be nomo sapos loa blong kantri i letem. (Olsem oltaem long Yunaeted Stet, i nogat wan loa blong kantri we i blokem Jos blong no letem ol dog we oli trenem blong lukaot long man o ol animol we oli stap givim sapot long filing, long ol haos blong wosip.) Ol bisop mo ol stek presiden oli mekem ol lokol desisen. Oli tekem mo oli tingbaot tu ol nid blong ol man o woman we oli gat disabiliti mo ol nid blong ol narawan long kongregesen.

Blong gat sam moa gaedlaen long fasin blong yusum ol animol we oli trenem blong lukaot man, insaed long ol fasiliti blong Jos, luk long 27.1.3 mo long disability.ChurchofJesusChrist.org.

38.8.27.9

Ol Disabiliti Speselis

Bisoprik o stek presidensi i save singaotem wan wod o stek disabiliti speselis. Ol speselis oli helpem ol memba wetem disabiliti mo olgeta we oli stap kea long olgeta blong oli tekpat long ol miting blong Jos, mo blong oli filim se oli pat.

Speselis ia i givim seves long ol memba mo ol lida, long ol wei ia:

• Oli kam blong save wanwan man o woman wetem disabiliti mo famli blong olgeta.

• Oli fesem ol kwestin mo ol wari, long saed blong disabiliti, we i kam long olgeta we oli givim kea, ol lida, mo ol narawan.

• Oli helpem wanwan man o woman wetem disabiliti blong oli save kasem ol buk, o tul blong Jos, oli save go long ol miting mo ol aktiviti. Hemia i save hapen taem oli yusum teknoloji, mo ol nara wei (luk long 38.8.27.10).

• Oli faenemaot ol janis we i gat mining blong ol memba wetem disabiliti oli givim seves.

• Oli faenemaot ol spesifik nid blong ol famli, mo, taem we i stret, oli faenemaot ol risos long komuniti, wod mo stek.

Speselis i helpem ol memba wetem disabiliti mo olgeta we oli stap kea long olgeta blong oli serem infomesen abaot disabiliti i go long ol narawan.

38.8.27.10

Ol Risos

Ol risos blong ol memba we oli gat disabiliti, blong famli blong olgeta mo olgeta we oli stap kea long olgeta, mo ol risos blong ol lida mo ol tija, oli stap long disability.ChurchofJesusChrist.org. Websaet ia i givim:

• Infomesen blong help blong mekem man i andastanem ol jalenj we olgeta we oli fesem disabiliti oli stap gotru long hem.

• Ol risos blong helpem ol memba we oli gat disabiliti mo famli blong olgeta oli faenem kamfot long gospel blong Jisas Kraes.

• Lis blong ol tul blong Jos we oli stap long ol fomat we ol memba wetem ol disabiliti oli save yusum (luk tu long store.ChurchofJesusChrist.org).

Sapos yu gat kwestin, yu save sendem i go long:

Ol Memba wetem Ol Disabiliti

50 East North Temple Street

Salt Lake City, UT 84150-0024

Telefon: [phone] o 1-800-453-3860, ekstensen 2-2477

Imel: [e-mail]

38.8.28

Stap Givhan long Ol Memba we Oli Fesem Kraem mo Kalabus

Oli leftemap tingting blong ol lida blong Jos blong folem eksampol blong Sevya long saed blong fasin blong stap givim hop, andastaning, mo lav long olgeta we oli fesem kraem, mo olgeta we oli stap long kalabus (luk long Matiu 25:34–36, 40).

Ol stek presiden nao oli givim daereksen long saed blong ol givhan wok long kalabus. Ol efot ia, i tekem wok blong sapotem ol adalt mo ol yut we oli stap long kastodi, o oli jes rilis o kamaot long kalabus. Wok ia, i tekem tu fasin blong stap kea long ol famli mo ol pikinini wetem wan papa, mama o famli we i stap long kalabus.

Ol lida we oli gat wan kalabus insaed long yunit baondri blong olgeta, oli mas tekem ol step blong kam blong save abaot ol givhan janis mo nid we i stap. Blong gat ol risos mo ol gaedlaen, ol lida oli save kontaktem Jos Kalabus Givhan Divisen:

Imel: [e-mail]

Telefon: [phone] or 1-800-453-3860, ekstensen 2-2644

38.8.29

Ol Nara Fet

Plante samting we i givim insperesen, i hae mo tabu, mo i inaf blong i gat hae respek, bae oli faenem tu insaed long ol nara fet o jos. Ol misinari mo ol nara memba oli mas lukaotgud mo mas gat respek long ol bilif mo kastom blong ol nara man. Oli mas stap longwe blong mekem nara man i harem nogud, o spolem tingting blong olgeta.

Ol stek mo misin presiden we oli gat kwestin abaot ol rilesensip wetem ol nara fet o relijin, oli mas kontaktem Eria Presidensi. Ol nara lokol lida we oli gat ol kaen kwestin olsem, oli mas kontaktem stek o misin presiden.

38.8.30

Ol Politik o Gavman Aktiviti

Oli leftemap tingting blong ol memba blong Jos blong oli tekpat long ol afea blong politik mo blong gavman. Long plante kantri, hemia i minim blong:

• Go vot.

• Joenem mo wok insaed long ol politik pati.

• Givim sapot long saed blong faenens.

• Toktok wetem ol ofisol mo ol kandidet blong pati.

• Tekpat long ol protes we oli pisful mo i folem loa.

• Wok long ol ofis we oli ilektem man long hem, o long ol ofis we oli jusum, hemia insaed long ol lokol mo nasonal gavman.

Oli leftemap tingting blong ol memba blong tekpat long ol gudfala wok blong mekem komuniti blong olgeta i kam ol gudfala ples blong stap laef long ol, mo blong stap lukaotem ol famli.

Folem ol lokol loa, oli leftemap tingting blong ol memba blong oli mas rejista blong go vot, mo blong oli stadi gud long ol problem we i stap, mo tu, blong stadi gud long ol kandidet. Ol prinsipol we oli go wetem gospel, oli save faenem olgeta insaed long ol defren pati blong politik. Ol Lata-dei Sent oli gat spesel wok blong lukaotem, mo sapotem ol lida we oli ones, oli gud, mo oli waes (luk long Doktrin mo Ol Kavenan 98:10)

Jos i no tekem saed blong wan pati blong politik, o politik platfom, o kandidet blong wan politik ofis. Jos i no sapotem eni politik pati o kandidet. Mo tu, hem i no givim advaes long ol memba blong hem long wei we oli mas vot.

Long sam eksepsen kes, taem oli tokbaot ol poen long saed blong fasin blong laef, o praktis blong Jos, nao Jos i save toktok mo stanap long wan ples long saed blong ol mata blong politik. Long ol kes olsem, Jos i save statem ol politik toktok blong ripresentem lukluk blong Jos. Fas Presidensi nomo i save givim raet blong:

• Talemaot weaples jos i stanap long hem long saed blong ol fasin blong laef.

• Komitim Jos blong sapotem o agensem wan spesifik loa.

• Stap serem lukluk blong Jos long saed blong ol mata blong loa.

Ol lokol lida blong Jos oli mas oganaesem ol memba blong oli tekpat long ol mata blong politik. Mo tu, ol lida oli no mas traem blong lidim tingting blong wei we ol memba oli tekpat.

Ol memba blong Jos we oli wantem stanap long ileksen o long ol pablik ofis, oli no mas traem blong talem se Jos, o ol lida blong Jos i sapotem olgeta. Ol lida mo ol memba oli mas stap longwe blong mekem ol toktok o mekem ol fasin we man i save tekem se Jos i sapotem wan politik pati, platfom, polisi o kandidet.

Iven sapos hem i stanap samples long saed blong wan mata blong politik, Jos i no stap askem ol ofisol we oli jusum olgeta blong oli vot long wan wei, o blong oli stanap long wan ples. Ol memba we oli ilektem olgeta blong oli kam ol ofisol, oli mekem desisen blong olgetawan. Ol ofisol ia, maet bae oli no save agri wetem wanwan long olgeta, o oli no save agri wetem wan posisen we Jos i stanap long hem. Oli no toktok long bihaf blong Jos.

Ol joes long saed blong politik, o folem grup we wan i joenem, i no mas kam topik blong eni tijing, o fasin blong promotem tingting insaed long wan miting blong Jos. Ol lida oli meksua se ol miting mo ol aktiviti blong Jos oli lukluk nomo long Sevya mo gospel blong Hem.

Ol memba blong Jos oli no mas jajem wanwan long olgeta long saed blong ol mata blong politik. Ol fetful Lata-dei Sent oli save joenem ol defren pati blong politik mo oli save vot long ol defren kandidet. Evriwan i mas filim se oli welkam taem oli stap long eni miting blong Jos.

Ol rekod blong Jos, ol daerektri mo ol semmak tul, bae oli no save yusum blong ol politik tingting.

Oli no save yusum ol bilding blong Jos blong ol samting long saed blong politik. Be, oli save yusum ol bilding blong Jos blong go vot, o blong rejistarem ol man blong vot, sapos i no gat wan nara wei moa (luk long 35.5.6.3).

38.8.31

Praevet Infomesen blong Ol Memba

Ol lida blong Jos oli gat wok ia blong mas protektem praevet laef blong ol memba. Ol rekod blong Jos, ol daerektri mo ol semmak tul, bae wanwan i no save yusum blong hemwan, blong salem samting, o long saed blong politik (luk tu long 38.8.13).

Ol lida blong wod mo stek oli no mas holemtaet o serem ol konfidensiol infomesen blong Jos aotsaed long ol aplikesen, sistem, o intanet seves blong Jos. Ol eksampol blong konfidensiol infomesen blong Jos i tekem ol defren samting ia abaot wan man o woman:

• Situesen blong membasip.

• Ol nid blong laef long wol ia.

• Ol nara praevet infomesen we oli no stap long pablik.

Ol leta we oli kam long wanwan man, woman, o ofis blong gavman, we oli tokbaot ol loa blong praevet data, oli mas sendem kwiktaem i go long Jos Ofis blong Data blong Praevet Laef.

Imel: [e-mail].

Ol lida blong wod mo stek oli no mas ansa long ol leta ia.

Blong luk notis blong Jos long saed blong praevet infomesen, luk long “Privacy Notice” long ChurchofJesusChrist.org. Ol memba oli save askem ol lida blong stek o wod blong helpem olgeta blong luk polisi ia.

38.8.32

Ol Praevet Raeting we Oli Pablisim

Ol memba oli no mas askem long Ol Jeneral Atoriti, Ol Jeneral Ofisa, o Ol Eria Seventi blong oli putum nem blong olgeta long ol buk, o blong oli rekomendem ol buk blong Jos o ol nara raeting blong Jos.

38.8.33

Blong Stap Rekodem, Taepem, o Soem Onlaen Ol Mesej we oli kam long Ol Jeneral Atoriti, Ol Jeneral Ofisa mo Ol Eria Seventi

Ol memba oli no mas rekodem, taepem, o soem onlaen ol mesej we oli kam long Ol Jeneral Atoriti, Ol Jeneral Ofisa, mo Ol Eria Seventi. Be, i gat sam miting we ol lida ia oli givim toktok, we oli save soem onlaen laef anda long daereksen blong bisop o stek presiden. Blong kasem moa infomesen, luk long 29.7

Ol memba oli save rekodem ol brodkas blong ol jeneral konfrens long ol tul long hom, blong oli yusum blong olgetawan, be i no blong salem.

38.8.34

Stap Talem Jos mo Ol Memba blong Jos

Nem blong Jos, Lod Hemwan i bin givim tru revelesen long Profet Joseph Smith long 1838: “Bae olsem ia nao oli mas singaotem jos blong mi long ol las dei, we i Jos Ia blong Jisas Kraes blong Ol Lata-dei Sent” (Doktrin mo Ol Kavenan 115:4). Taem oli stap tokbaot Jos mo ol memba blong Jos long ol wei ia we oli stap andanit ia, i soem wan koneksen bitwin Jisas Kraes mo ol memba blong Jos ia.

Ol refrens blong tokbaot Jos, oli mas yusum ful nem blong Jos taem i posibol. Faswan, oli mas yusum ful nem blong Jos, mo afta, sapos i nidim wan sot toktok, oli save yusum olgeta toktok ia we oli stret gud, mo oli leftemap tingting blong yusum:

• Jos Ia

• Jos Ia blong Jisas Kraes

• Jos ia we i kambak, blong Jisas Kraes

Taem oli tokbaot ol memba blong Jos, bae oli yusum olgeta toktok ia we oli stret gud mo oli laekem moa:

• Ol memba blong Jos Ia blong Jisas Kraes blong Ol Lata-dei Sent

• Lata-dei Sent (hemia i wan nem we Lod i bin givim long ol kavenan pipol blong Hem long ol las dei ia.)

• Ol memba blong Jos Ia blong Jisas Kraes

Blong stap tokbaot o singaotem ol memba blong Jos wetem ol nara taetol, olsem “ol Momon,” o “LDS,” oli no stap leftemap tumas tingting ia.

Momon oli yusum i stret wetem ol nem, olsem Buk blong Momon. Oli yusum tu i stret taem oli tokbaot ol samting blong histri olsem “Momon Wokbaot.”

Toktok ia, “Momon fasin”, Mormonism i no wan stret toktok mo oli no mas yusum. Taem oli tokbaot doktrin, kalja, mo laefstael we i spesel nomo long hemia blong Jos Ia blong Jisas Kraes blong Ol Lata-dei Sent, toktok ia, “gospel we i kambak blong Jisas Kraes,” i wan stret toktok mo mifala i glad blong man i yusum.

38.8.35

Rifuji

Plante pipol oli ronwe long hom blong olgeta blong lukaotem spel aot long vaelens, wo, agens long saed blong relijin, mo ol nara situesen we i putum laef long denja. Olsem pat blong responsabiliti blong olgeta blong stap kea long olgeta we oli stap long nid (luk long Mosaea 4:26), ol memba blong Jos oli givim taem, talen mo frensip blong olgeta blong welkamem ol rifuji olsem ol memba blong komuniti blong olgeta. Luk long Matiu 25:35; ChurchofJesusChrist.org/refugees.

38.8.36

Ol Rikwes blong Faenens Help blong Jos

Ol program we oli stanemap long Jos, oli givim faenens help i go long ol man mo woman we oli gat nid, mo blong lukluk long ol gudfala wok.

Ol help blong Jos we i go long ol memba we oli stap long nid, ol bisop nao oli lukaotem (luk long 22.3.2). Ol bisop oli folem ol prinsipol mo polisi we oli stap finis, mo oli help blong meksua se oli yusum mane ia long wan stret fasin (luk long 22.4 mo 22.5).

Oli leftemap tingting blong ol memba we oli stap long nid blong go toktok wetem bisop blong olgeta, be i no blong kontaktem hedkwota blong Jos, o blong askem mane long ol nara lida blong Jos, o memba blong Jos. Bae bisop i save askem ol lida blong kworom blong ol elda, o blong Rilif Sosaeti, blong help blong skelem nid we i stap.

38.8.37

Ol Stadi blong Lukluk Moa insaed long Jos

Stamba tingting blong Jos i mekem sam stadi, hem i blong putum tugeta samfala stret infomesen blong sapotem ol toktok blong ol jeneral lida blong Jos. Correlation Research Division (CRD) i wan stadi ejensi ia nomo blong Jos blong ranem ol stadi. CRD i save gat kontrak wetem ol nara pati ejensi blong holem ol kaen stadi ia.

Taem we ol man blong stadi we oli gat raet blong jos oli kontaktem ol memba o ol lida, oli givim wan kontak infomesen blong wokman blong CRD. Wokman ia i save ansarem ol kwestin long saed blong stadi.

CRD i lukaot blong protektem aedentiti mo ol ansa blong olgeta we oli tekpat long ol stadi. Ol man mo woman oli gat raet blong no tekpat, mo save mekem olsem eni taem. Oli save jusum blong no ansarem eni kwestin, o no ansarem evri kwestin.

Ol papa mo mama, o olgeta we oli gat raet long ol pikinini, oli mas givim raet bifo oli save invaetem eni pikinini we i no kasem 18 yia yet, blong oli tekpat long wan stadi.

Ol lokol lida oli no mas apruvum eni stadi long saed blong Jos. Hemia i tekem blong yusum ol memba blong save stadi long olgeta.

CRD i folem evri loa blong data blong praevet laef. Ol lokol lida oli mas folem ol loa ia tu, mo oli no mas givim ol praevet infomesen i go long ol man blong stadi o stadi ejensi we oli no kasem raet.

Sam stadi, i tekem infomesen long saed blong ol miting blong Jos. Hemia i tru sapos miting i wanem we stadi ia i lukluk nomo long hem. Long ol kes olsem, CRD bae i wok wetem ol lokol lida blong meksua se taem ol man blong stadi ia oli stap, i no pulumaot tingting long taem blong ol miting.

Blong jekem eni stadi rikwes, kontaktem Correlation Research Division.

Telefon: [phone] o 1-800-453-3860, ekstensen 2-2727

Imel: [e-mail]

38.8.38

Stap Respektem Ol Lokol Rul we I Blokem Fasin blong Serem Gospel

Jos i wok blong mekem komanmen blong Jisas Kraes blong tekem gospel i go long ful wol (luk long Matiu 28:19). Ol misinari oli givim seves nomo long ol kantri we ol lokol gavman oli stap luksave mo welkamem olgeta.

Jos mo ol memba blong hem i mas respektem evri loa mo wanem i nid blong mekem long saed blong ol misinari wok. Eksampol, long sam pat blong wol, oli sendem ol misinari nomo blong givim seves long ol yumaniterian o nara spesel misin. Ol misinari ia, oli no prijim gospel blong man i jenisim laef. Jos i no sendem ol misinari i go long samfala kantri.

38.8.39

Sefti long Ol Welfea mo Indipenden Laef Wok blong Jos

Plante wok blong Jos welfea mo indipenden laef oli gat ol tul mo ol masin we i save givim kil long man sapos oli no yusum gud. Ejen stek presiden (o olgeta we oli givim wok i go long olgeta) mo maneja blong ol wok ia oli mas meksua se ol wokman mo ol volontia oli sef i stap.

Olgeta we oli wok, oli mas kasem instraksen oltaem long saed blong ol sefti rul. Wokples ia, oli mas go jekem oltaem. Ol helt mo sefti rul o samting we i stap, oli mas stretem. Oli mas supavaesem ol projek ia oltaem blong meksua se olgeta we oli wok oli folem ol instraksen, oli yusum ol tul mo ol masin long wan stret fasin, mo oli stap longwe long ol fasin we i save givim kil long olgeta.

Plante taem, olgeta we oli wok long ol operesen ia, oli mas gat 16 yia i go antap. Olgeta we oli yusum ol masin ia oli mas olfala inaf blong save gud samting, oli kasem stret trening, mo oli gat eksperiens blong stap yusum ol tul o masin ia. Ol bigman nomo oli save wok long ol paoa tul ia.

Sapos i gat wan aksiden i hapen, operesen maneja i ripotem i go long ol ples ia:

• Welfare and Self-Reliance Services: 1-801-240-3001 o 1-800-453-3860, ekstensen 2-3001

• Risk Manejmen Dipatmen long Hedkwota blong Jos (luk long 20.7.6.3 blong kasem kontak infomesen)

38.8.40

Ol Skripja

38.8.40.1

Edisen blong Tabu Baebol

Jos i faenemaot ol edisen blong Baebol we oli go stret wetem doktrin blong Lod olsem we i stap insaed long Buk blong Momon, mo insaed long ol revelesen blong tedei (luk long Ol Toktok blong Bilif 1:8). Nao, oli jusum wan edisen blong Baebol, hemia blong plante lanwis we ol memba blong Jos oli toktok long hem.

Long samfala lanwis, Jos i pablisim edisen blong Baebol blong hemwan. Ol edisen blong Jos we oli pablisim, oli folem ol standet toktok blong Baebol. Long samfala eksampol ia i gat:

• King James Version long Inglis.

• Reina-Valera (2009) long Spanis.

• Almeida (2015) long Potugis.

Ol edisen blong Baebol we Jos i pablisim, i tekem ol futnot, ol topik indeks, mo ol nara tul blong stadi.

Taem we i posibol, ol memba oli yusum wan edisen blong Baebol we Jos i jusum, o wan edisen we Jos i pablisim blong yusum insaed long ol klas mo ol miting. Hemia i help blong holemtaet ol samting oli klia long taem blong toktok storian mo i go stret wetem haremsave blong doktrin. Ol nara edisen blong Baebol, oli save help, blong yusum long stadi blong yuwan o long stadi blong skul.

38.8.40.2

Ol Skripja Translesen

Afta, Lod i givim daereksen long ol profet mo ol aposol blong Hem blong holemtaet ol skripja oli stap sef (luk long Doktrin mo Ol Kavenan 42:56). Kaonsel blong Fas Presidensi mo Kworom blong Olgeta Twelef Aposol i wok mo supavaesem gud translesen blong ol skripja blong Jos. Oli yusum ol wokrod we oli apruvum blong folem, blong meksua se doktrin i mas stret gud mo i holemtaet pruf long ol toktok we oli kamaot long fas lanwis.

Ol Eria Presidensi oli sendem ol ofisol rikwes blong ol niu translesen blong ol skripja i go long Jos Korelesen Dipatmen.

38.8.40.3

Ol Skripja wetem Lanwis blong Tedei

Kaonsel blong Fas Presidensi mo Kworom blong Olgeta Twelef Aposol i no givim raet blong transletem, o raetem bakegen ol toktok blong skripja oli kam long lanwis blong tedei, o wan lanwis we i no stret. Kaonsel ia, i no blong ol pablikesen blong Jos we i blong ol pikinini.

38.8.40.4

Gat Akses long Ol Skripja

Ol skripja kopi we oli printim, wetem same edisen blong Baebol, oli stap long ol Jos Distribusen Seves. Ol edisen blong Baebol we Jos i jusum, oli stap tu long ol lokol bukstoa, onlaen, mo long Baebol mobael aplikesen. Lektronik buk mo ol odio rekoding blong ol Jos edisen we oli pablisim mo edisen we sam oli laekem, oli stap long Gospel Laebri ap mo long olskripja.churchofjesuschrist.org. Ol risos ia, oli givim tu ol lis blong ol skripja we oli stap folem ol lanwis.

38.8.41

Askem Infomesen long Ol Tru Sos o Ples

Long wol blong tedei, infomesen i isi blong kasem mo serem. Hemia i save stap olsem wan bigfala blesing blong olgeta we oli lukaotem blong kasem wan edukesen mo kasem infomesen. Be, i gat plante ples blong karem infomesen we i no stret mo i no leftemap tingting. Sam ples oli stap promotem fasin blong no laekem man nating, raorao, fraet, o tingting blong sikret plan we i no gat stamba blong hem (luk long 3 Nifae 11:30; Mosaea 2:32). From hemia, i impoten blong ol memba blong Jos oli mas waes taem oli stap lukaotem trutok.

Ol memba blong Jos oli lukaotem, mo serem ol infomesen we oli gud, oli tru. Oli no tekem ol nius we oli kamaot long toktok blong rod. Advaes blong Tabu Spirit, wetem dip stadi, i save helpem ol memba blong luksave klia wanem i trutok mo wanem i mistek Doktrin mo Ol Kavenan 11:12; 45:57). Long saed blong ol doktrin mo polisi blong Jos, ol ples we oli gat raet blong givim ansa oli ol skripja, ol tijing blong ol profet we oli laef, mo Jeneral Hanbuk.

38.8.42

Semina mo Semmak Kaen Miting

Jos i stap givim woning agensem ol semina mo ol semmak kaen miting we oli stap presentem ol samting olsem:

• Samting we i spolem nem blong man, i daonem man, o oli gat nogud o rabis fasin blong tokbaot ol samting we oli tabu.

• Samting we i save spolem Jos, tekemaot hem long misin blong hem, o spolem gudlaef blong ol memba o lida blong Jos.

Ol memba blong Jos oli no mas letem se weaples olgeta oli stanap long hem, o taetol blong olgeta insaed long Jos, bae oli yusum blong promotem, o traem talem se Jos i agri wetem ol kaen kam tugeta ia.

Blong gat moa infomesen, luk long 35.5, 38.6.12, mo 38.7.8. Luk tu long Jekob 6:12

38.8.43

Sapotem Ol Memba long Hospital, mo Ol Kea Senta

Ol lida blong oli givim sapot long ol memba we oli stap long ol hospital, mo ol kea senta insaed long ol yunit blong olgeta. Oli folem ol gaedlaen we ol ples ia oli putum i stap.

Blong gat moa infomesen abaot fasin blong blesem mo pasem sakramen long ol memba we oli stap long ples olsem, luk long 18.9.1. Blong kasem moa infomesen blong stap krietem wan wod, o branj, luk long 37.6.

38.8.44

Aktiviti we Oli Pem From

Ol lida blong wod mo stek oli meksua se ol lokol aktiviti blong Jos oli no spolem rod blong Jos i fri mo i no pem ol takis. Blong kasem samfala gaedlaen, luk long 34.8.1.

38.8.45

Ol Takis

Ol memba blong Jos oli mas obei long ol loa long saed blong takis, hemia insaed long kantri ia we oli stap laef long hem (luk tu long Ol Toktok blong Bilif 1:12; Doktrin mo Ol Kavenan 134:5). Ol memba we oli no agri wetem ol loa blong takis, oli save jalenjem ol loa ia folem wei we loa blong kantri blong olgeta i letem.

Ol memba blong Jos we oli agensem loa mo ol tijing blong Jos sapos oli:

• Minim blong no folem, o no wantem pem ol takis we i nid blong pem.

• Mekem ol raorao nating blong no pem, o ronwe long takis.

• No wantem mekem folem wan jajmen blong kot long saed blong takis we i askem olgeta blong pem ol takis.

Ol memba ia bae oli no save kasem wan tempol rekomen. Bae oli no save singaotem olgeta tu long ol lidasip posisen insaed long Jos.

I nid blong holem wan Jos membasip kaonsel sapos Kot i faenem se wan memba i rong from hem i brekem loa taem hem i brekem ol loa blong takis (luk long 32.6.1.5).

38.8.46

Ol Polisi blong Travel

Wan man mo wan woman, tufala i no mas travel tugeta tufala wan blong go long ol aktiviti blong Jos, ol miting, o wok we oli givim, be nomo sapos tufala i mared, o sapos tufala tugeta i singgel. Blong gat moa ditel long saed blong ol polisi blong travel, luk long 20.7.7.

38.9

Militeri Rilesen Seves mo Seves blong Ol Japlen

Ol stek presiden mo ol bisop oli help blong mekem se evri blesing blong wan we i tekpat long Jos, i stap long ol memba we oli stap wok long militeri. Ol jos militeri rilesen mo japlen program blong Jos, i gat:

• Sapot we i kam long ol stek mo ol wod.

• Jos orientesen blong ol memba we oli go insaed long militeri seves.

• Oganaesesen blong ol wod, ol branj, o ol Lata-dei Sent seves memba grup.

• Endosmen o apruvol blong ol Lata-dei Sent japlen, mo sapot we i kam long olgeta.

• Infomesen long hao blong werem gamen taem wan i stap long militeri.

• Sapot we i kam long ol senia misinari kapol we oli kasem wok blong stap long ol militeri ples we jos i jusum.

38.9.1

Stek Militeri Rilesen Lidasip

Sapos ol ples we militeri i stap long hem, o ol memba we oli stap long militeri oli stap insaed long wan stek, stek presidensi i gat responsabiliti olsem we oli putum i stap long seksen ia. Sapos ol ples we militeri i stap long hem, i stap long wan misin, be i no long wan stek, nao bae misin presiden nao i mekem olgeta responsabiliti ia.

Wan memba blong stek presidensi i lukluk ova ol militeri rilesen insaed long stek. Hem i save singaotem wan man o woman blong givim seves olsem militeri rilesen speselis. Memba ia i no nidim blong gat wan militeri eksperiens. Hem i mekem sua se oli givim ol risos blong sapotem ol memba blong militeri long stek. Hemia i tekem tu blong militeri seves orientesen (luk long 38.9.3).

38.9.1.1

Ol Jos Seves long Ol Ples we I Gat Militeri long Hem

Sapos oli stap holem ol seves blong Jos long militeri ples, presiden blong wan stek we militeri ples i stap long hem, bae i oganaesem wan long olgeta yunit ia blong olgeta we oli stap long militeri mo ol famli blong olgeta (luk long 38.9.4):

• Wan wod wetem wan bisoprik (taem we Fas Presidensi i givim raet from)

• Wan branj wetem branj presidensi

• Wan seves memba grup wetem wan seves memba grup lida mo ol asisten blong hem

Stek presiden i singaotem mo i setem apat mo i lukluk ova long ol lida blong ol yunit ia. Ol stek presiden oli givim long ol lida kontak infomesen blong Militeri Rilesen mo Japlen Seves Divisen. Hem i save jusum wan wod blong sapotem wanwan seves memba grup.

Stek presiden i wok wetem Militeri Rilesen mo Japlen Seves Divisen blong givim wan leta blong apoenmen long wanwan bisop, branj presiden, o grup lida. Leta ia i givim aotlaen blong ol responsabiliti blong hem mo i givim raet long hem blong hem i prisaed ova long yunit ia, mo blong hem i lidim ol miting. Bae oli mas givim wan kopi blong leta ia i go long japlen blong militeri ples ia.

Militeri blong Yunaeted Stet, i nidim blong i gat wan japlen i stap we i mekem ol administresen wok blong lukluk long eni seves blong relijin we oli holem long wan militeri ples. Sapos i gat wan Lata-dei Sent japlen long militeri ples ia, plante taem, bae japlen i mekem ol kaen wok ia blong lukluk ova long wan yunit blong Jos we i stap mit long ples ia. Japlen i no prisaed long ol wosip seves be nomo sapos hem i bisop, branj presiden, o grup lida. Be, oli putum se bae hem i blong kam mo tekpat.

Wan memba blong stek presidensi i kodinetem wok wetem senia japlen long wanwan militeri ples insaed long stek. Hem i meksua se ol bisop blong ol wok we baondri blong olgeta i kavremap ol ples we militeri oli stap long hem, oli mekem semmak. Ol lida, ia, oli letem japlen i save abaot ol miting taemtebol blong wod, ples blong mit, mo huia blong kontaktem. Japlen i save givim infomesen ia long ol memba, long ples we militeri i stap long hem.

38.9.1.2

Ol Lata-dei Sent Japlen Insaed long Ol Stek

Stek presiden i gat wan intaviu, wan taem long wan yia, wetem wanwan Lata-dei Sent japlen we i stap laef insaed long stek. Hem i faenemaot sapos japlen i laef gud mo i klin inaf blong givim seves ia. Mo tu, stek presiden i mekem wan seperet intaviu, wetem waef blong wanwan japlen, wan taem long wan yia.

Ol Lata japlen mo waef blong olgeta, i sapos blong gat ol koling long wod o long stek. Wan japlen we i holem Melkesedek Prishud i save givim seves long ol lidasip koling, olsem insaed long hae kaonsel, o blong prisaed long wan militeri wod, branj, o seves memba grup. Be, koling ia i no save blokem hem long ol militeri diuti blong hem.

Ol japlen oli save helpem stek presiden long ol wei ia:

• Oli givim ripot long ol stek kaonsel miting abaot ol miting blong ol Jos Yunit we oli stap long militeri ples. Ol ripot ia, i gat infomesen abaot ol niu memba mo olgeta memba we oli kambak.

• Hem i save stap olsem man we i save pasem toktok bitwin ol militeri lida mo stek presiden.

• Hem i save helpem stek presiden tu blong faenem ol memba insaed long militeri blong singaotem olsem ol seves memba grup lida.

• Hem i help wetem ol efot blong mekem ol niu memba mo ol memba we oli kambak long Jos, we oli stap long militeri, oli kam strong bakegen.

• Hem i helpem ol memba insaed long militeri blong oli rere blong kasem ol tabu odinens mo kipim ol kavenan blong olgeta.

38.9.2

Wod Militeri Rilesen Lidasip

Wan memba blong bisoprik i mit wetem ol memba blong wod bifo oli aot i go long militeri seves. Hem i meksua se oli gat wan janis blong go long wan Jos orientesen bifo oli go wok long militeri (luk long 38.9.3).

Blong gat infomesen abaot ol membasip rekod blong wan memba we i joen long ami, luk long 33.6.9. I gat sam memba we oli givim wok long olgeta blong go long ol ples we oli stap longwe o stap olgetawan, o oli go long wan ples we i gat wo long hem. Long ol kes olsem, bisop i kontaktem Jos Militeri mo Japlen Seves Divisen blong i lidim hem long saed blong ol membasip rekod (luk long 38.9.10).

Ol lida insaed long homwod oli mas toktok o raet plante taem wetem wanwan memba blong wod we i stap longwe long militeri seves.

Bisop i kodinetem wok wetem senia japlen long wanwan militeri ples insaed long wod.

38.9.3

Militeri Seves Orientesen

Militeri seves orientesen i helpem ol memba we oli go insaed mo wok long militeri, blong save wanem bae i hapen long saed blong ol seves blong Jos mo ol aktiviti blong militeri. Hem i tijim olgeta tu abaot olsem wanem blong mekem fet blong olgeta i kam moa strong mo holemtaet ol kavenan blong olgeta long taem blong militeri seves.

Wan memba blong stek presidensi o bisoprik i singaotem wan militeri seves instrakta blong givim orientesen. I moa gud sapos instrakta ia i gat sam eksperiens long ami finis. Long ol ples we i no gat wan instrakta we i kwalifae, stek presiden i o bisop i kontaktem Militeri Rilesen mo Japlen Seves Divisen blong i kasem help.

Blong moa infomesen, luk seksen blong “Militeri Seves Orientesen” long pej blong Ol Militeri Memba blong Jos.

38.9.4

Ol Jos Yunit blong Ol Memba long Ami

Ol memba insaed long ami o militeri, plante taem oli tekpat long ol wod we oli stap kolosap long bes, o stesen blong olgeta. Be, folem ol situesen ia, bae stek o misin presiden i save oganaesem wan wod, branj, o seves memba grup blong olgeta wokman blong ami wetem ol famli blong olgeta, long stesen nomo:

• I no gat wan wod we i stap kolosap long militeri stesen long hem.

• Ol ami wokman we oli no andastanem lanwis we oli toktok long lokol wod.

• Ol ami wokman oli no save aot long militeri bes o stesen blong olgeta, from se trening o wok i no letem olgeta blong aot.

• Militeri yunit blong memba, oli sendem o bae oli sendem i go long wan ples we i gat wan long olgeta samting ia:

  • Jos i no oganaes.

  • Lokol Jos yunit i no save tekem ol memba from wan nara lanwis.

  • Atendens long lokol miting i no posibol.

• Ol memba oli pat blong Risev Gad o Nasonal Gad Yunit, mo oli tekpat long ol dril o yia trening eksasaes.

Ol wod mo ol branj long ol militeri stesen, oli bin krietem olgeta folem ol fasin blong wok we oli putum i stap long japta 37.

Plante taem, oli stanemap ol wod mo ol branj blong sapotem tugeta, ol memba long militeri mo ol famli blong olgeta. Oli save stanemap wan wod mo branj blong sapotem ol memba long militeri iven sapos i no gat famli blong olgeta. Ol yunit olsem, oli save stanemap olgeta blong ol memba oli save go long ol besik o strong trening long wan ples we i stap longwe. Militeri i no stap letem ol memba blong Jos we oli no joen long ami blong oli pat blong wan wod o wan branj we i yusum ol bilding blong ami.

Sapos namba blong ol memba o sapos ol nara situesen we i stap, i no givim inaf risen from wanem bae oli mas krietem wan wod o branj long ami stesen, nao stek o misin presiden i save stanemap wan seves memba grup. Wan seves memba grup i wan smol yunit blong Jos we i holem ol miting blong Jos, mo i lukaot long ol memba. Grup lida i no holem ol ki blong prishud. From hemia, hem i no gat raet blong kasem ol taeting mo ol ofring, i no gat raet blong givim kaonsel abaot ol bigfala fasin blong brekem loa, i no gat raet blong stopem ol janis we i kam wetem membasip, o mekem ol nara diuti we i nidim ol ki blong wokem olgeta (luk long 37.7).

Blong kasem infomesen abaot ol grup blong seves memba, luk long “Faenem wan Ples o Lida blong Jos” mo ol seksen blong “Infomesen blong Ol Grup Lida” insaed long pej blong Ol Militeri Memba blong Jos.

Taem oli stanemap wan Jos yunit long wan militeri stesen, yunit lida i kodinetem wok wetem senia japlen blong save arenjem ol taem blong miting, mo fasin blong yusum ol bilding blong militeri stesen. Sapos i no gat wan japlen we oli putum blong lukaot long stesen ia, stek presiden i toktok wetem komanding ofisa.

38.9.5

Ol Grup Lida long Ol Eria we Oli Stap Longwe o long Ol Ples blong Wo

Plante taem, stek o misin presiden i singaotem mo setem apat ol seves memba grup lida. Be, maet bae hemia i no posibol from ples we i longwe, o i ples blong wo. From se wan grup lida i no kasem ol prishud ki wetem koling ia blong hem, hem i oraet blong oli jusum o givim wok ia long hem, be oli no setem hem apat. Prishud lida we i responsibol long eria, i save jusum wan man we i kasem Melkesedek Prishud mo i klin inaf blong i stap olsem grup lida. Faswan, hem i jekem se man ia i klin inaf; hem i mekem hemia wetem bisop mo stek presiden. Sapos i gat wan Lata-dei Sent japlen insaed long eria, prishud lida i save givim raet long hem blong singaotem, mo setem apat wan grup lida.

Ol lida blong ol seves memba grup long ol ples we oli stap olgetawan nomo, oli save kasem ol saplae mo ol buk blong Jos taem oli kontaktem Militeri Rilesen mo Japlen Seves Divisen blong Jos(luk long 38.9.10).

Samtaem wan seves memba we oli sendem hem i go, i stap hemwan mo i no save luk o toktok long ol nara memba blong Jos. Sapos seves memba ia i holem Melkesedek Prishud, o i wan pris long Aronik Prishud, bisop blong hem i save givim raet long hem blong i blesem mo pasem, mo tekem mo kaekae sakramen. Sapos i gat moa bitim wan memba we oli sendem hem long diuti long wan ples, oli singaotem wan grup lida.

Jos Militeri Rilesen mo Japlen Seves Divisen, bae i mas kasem wan notis taem oli singaotem wan grup lida. Bae oli sendem wan leta blong apoenmen i go long hem (luk long 38.9.1.1).

38.9.6

Misinari Seves mo Wok blong Mas Mekem long Ami

Long ol kantri we, blong mekem militeri seves i wan mas, ol memba blong Jos oli mas finisim militeri seves blong olgeta bifo oli save go long wan misin. Long sam kantri, bae oli save letem blong militeri seves ia i tekem ples afta long misinari seves. Ol stek presiden mo ol bisop oli mas kam blong save gud wanem wan i mas mekem long homkantri blong mekem so oli save givim stret advaes long ol memba. Ol memba we oli stap givim seves long Risev, o long Nasonal Gad, bae oli save go long misin nomo afta we oli flatem fulwan besik mo strong trening.

Blong moa infomesen, luk seksen blong “Misinari Seves mo Wok blong Mas Mekem long Ami” long pej blong Ol Militeri Memba blong Jos.

38.9.7

Ol Lata-dei Sent Japlen

Jos Militeri Rilesen mo Japlen Seves i givim apruvol long wan ples nomo blong ol man mo ol woman japlen we oli stap wok long ol defren ples long gavman, mo ol ples we oli no blong gavman. Olgeta ples ia i tekem:

• Militeri.

• Ol hospital

• Ol oganaesesen we oli lukaot long ol olfala o olgeta we bae oli ded.

• Ol kalabus.

• Ol senta we oli holemtaet man.

• Ol polis o faea dipatmen.

• Ol boda patrol.

• Ol oganaesesen blong ol sivik mo veteran.

• Ol kolej mo Yunivesiti.

Wanwan oganaesesen i stanemap edukesen mo seves standet blong ol japlen. Plante oganaesesen oli nidim blong Jos i apruvum olgeta bifo eniwan i save givim seves olsem wan Lata-dei Sent Japlen. Jos Militeri Rilesen mo Japlen Seves Divisen, i stap apruvum evri Lata-dei Sent japlen. Ol leta we i apruvum we i kam long ol bisop mo ol stek presiden i no inaf mo oli no sapos blong givim.

Ol Lata-dei Sent Japlen

• Oli givim seves long ol pipol blong evri fet, wetem ol Lata-dei Sent tu.

• Oli meksua se wanwan i gat fridom blong relijin.

• Oli help blong lukluk long ol nid blong saed blong relijin blong olgeta we oli stap long ami.

Blong gat moa infomesen, luk long “Ol Lata-dei Sent Japlen” on ChurchofJesusChrist.org.

38.9.8

Stap Werem Gamen long Militeri

Luk long 38.5.7.

38.9.9

Senia Misinari Kapol

Ol militeri kapol we oli ritae finis, oli save singaotem olgeta blong oli stap olsem ol militeri rilesen misinari long ol ami bes we Jos i jusum. Oli helpem ol lokol prishud lida blong mekem ol niu memba mo ol memba we oli kambak, blong oli kam strong moa. Oli givim sapot tu long ol famli blong ol memba we oli sendem olgeta i go long diuti seves. Sapot ia i hapen long ol taem we famli i seperet.

38.9.10

Ol Nara Infomesen

Blong gat moa infomesen abaot ol membasip rekod blong ol seves memba, luk long 33.6.9.

Blong gat moa infomesen abaot ol petriakel blesing blong ol seves memba, luk long 38.2.10.3.

Blong gat moa infomesen abaot fasin blong odenem ol seves memba we oli stap long ol ples we oli stap longwe mo olgetawan, luk long 38.2.9.6.

Blong gat moa infomesen abaot fasin blong givim ol tempol rekomen long ol ples we oli stap longwe mo olgetawan, luk long 26.3.2

Sapos ol lida blong Jos oli gat kwestin abaot ol militeri rilesen, oli save kontaktem:

Military Relations and Chaplain Services Division

50 East North Temple Street, Room 2411

Salt Lake City, UT 84150-0024

Telefon: [phone]

Imel: [e-mail]