5.

Jeneral mo Eria Lidasip

5.0

Fas Toktok

Jisas Kraes, Hem i jif “kona pos” blong Jos blong Hem (Efesas 2:20). Hem i holem evri ki blong prishud. Hem i singaotem ol aposol, mo ol profet blong oli helpem Hem long wok blong God blong fasin blong sevem man mo fasin blong kam olsem wan god. Hem i pasem, long ol wokman ia we Hem i jusum, evriwan long ol ki we oli blong kingdom blong God long wol ia. (Luk long Doktrin mo Ol Kavenan 27:12–13; luk tu long 3.4.1 insaed long hanbuk ia.)

Tru long ol profet mo ol aposol, Lod i singaotem ol man i go long ofis blong Olgeta Seventi blong help long wok blong Hem long ful wol ia (luk long Doktrin mo Ol Kavenan 107:38). Antap long hemia, Prisaeding Bisoprik, Ol Jeneral Ofisa, mo ol nara man mo woman lida oli kasem ol impoten responsabiliti blong helpem wok ia.

Japta ia i tokbaot ol rol blong ol jeneral lida mo ol eria lida insaed long Jos.

5.1

Jeneral Jos Lidasip

Jeneral lidasip blong Jos i tekem evri Jeneral Atoriti mo evri Jeneral Ofisa. Toktok ia, jeneral, i talem se atoriti mo ol responsabiliti we oli go wetem ol koling, oli no stop long ol baondri blong ol ples. Olgeta we oli stap holem ol koling ia, oli lidim, oli tijim, mo oli givhan long ol memba blong Jos raon long wol.

Seksen ia i talem sot ol rol blong Ol Jeneral Atoriti, Ol Jeneral Ofisa, mo ol kaonsel mo ol komiti we oli stap wok insaed long hem.

5.1.1

Ol Jeneral Atoriti

5.1.1.1

Fas Presidensi mo Kworom blong Olgeta Twelef Aposol

Presiden blong Jos. Stat long taem bifo finis i kam, Lod i bin givim daereksen long ol pipol blong Hem tru long ol profet (luk long Amos 3:7; Efesas 4:11–13). Presiden blong Jos i wan profet, sia mo reveleta. Mo tu, hem i senia Aposol. Anda long daereksen blong Lod, hem i prisaed ova long Jos mo hemwan nomo, long wol ia, i gat raet blong yusum evri prishud ki (luk long Matiu 16:16–19; luk tu long 3.4.1.1 insaed long hanbuk ia). Hem i gat atoriti blong kasem revelesen, mo blong talemaot tingting blong God long ful Jos. (Luk long Doktrin mo Ol Kavenan 43:2–3; 107:91–92; 128:11.)

Fas Presidensi. Tru long Presiden blong Jos, Lod i bin singaotem ol kaonsela blong help long wok ia. Presiden mo ol kaonsela blong hem, oli olgeta “trifala Prisaeding Hae Pris … we oli stap olsem wan kworom we i Presidensi blong Jos” (Doktrin mo Ol Kavenan 107:22). Kworom ia, oli singaotem Fas Presidensi. Ol memba blong Fas Presidensi, oli Ol Aposol, mo from hemia, oli ol “spesel witnes” blong nem blong Jisas Kraes (Doktrin mo Ol Kavenan 107:23). Fas Presidensi i prisaed ova mo i lidim ol afea, o wok blong Jos.

Pita, Jemes mo Jon, oli bin stap mekem wok ia long Jos blong bifo. Oli bin stap wetem Sevya long sam sam taem, mo oli bin kasem ol ki blong kingdom. (Luk long Matiu16:18–19; 17:1–5; Mak 14:32–42; Doktrin mo Ol Kavenan 27:12–13; 81:1–2.)

Taem we Presiden blong Jos i ded, Fas Presidensi i nomo stap. Olgeta kaonsela oli gobak long posisen blong tufala folem hamas yia oli stap insaed long Kworom blong Olgeta Twelef Aposol. Anda long daereksen blong senia Aposol, Kworom blong Olgeta Twelef Aposol i lidim Jos. Olsem wan kworom, oli lukluk se wetaem nao bae oli oganaesem Fas Presidensi bakegen. Afta we evriwan i agri long desisen, senia Aposol nao, oli odenem hem olsem niufala Presiden blong Jos, mo hem i singaotem ol kaonsela blong hem.

Kworom blong Olgeta Twelef Aposol Long taem bifo, Jisas Kraes i bin singaotem olgeta Twelef Aposol blong oli help blong lidim Jos blong Hem (luk long Luk 6:12–13; Efesas 4:11–13; 1 Nifae 13:40). Long taem blong yumi, tedei, Lod i singaotem ol man tru long Presiden blong Jos blong oli odenem olgeta olsem Ol Aposol, mo blong oli givim seves insaed long Kworom blong Olgeta Twelef Aposol (luk long Doktrin mo Ol Kavenan 18:26–28). Kworom ia i mekem wok anda long daereksen blong Fas Presidensi blong bildimap mo rulum Jos long evri nesen (luk long Doktrin mo Ol Kavenan 107:33). Ol memba blong Olgeta Twelef oli taltalemaot gospel long ful wol (luk long Matiu 28:19–20; Doktrin mo Ol Kavenan 107:35).

Wanwan Aposol i holem evri ki blong kingdom, mo i yusum olgeta ki ia anda long daereksen blong Presiden blong Jos (luk long Doktrin mo Ol Kavenan 112:30–32). Olgeta Twelef Aposol oli “ol spesel witnes” blong nem blong Jisas Kraes (Doktrin mo Ol Kavenan 107:23; luk tu long 27:12). Oli stap witnes long ful wol se Hem i hae, mo Laef Bakegen long Ded i tru (luk long Ol Wok 1:8, 22; 4:33; Doktrin mo Ol Kavenan 76:22–24).

Ol Aposol oli givim seves fultaem insaed long Jos blong ful laef blong olgeta we i stap (luk long Matiu 4:18–22).

Kaonsel blong Fas Presidensi mo Kworom blong Olgeta Twelef Aposol. Evri memba blong Fas Presidensi mo Kworom blong Olgeta Twelef Aposol oli ol profet, sia, mo reveleta. Tugeta, oli stap olsem Kaonsel blong Fas Presidensi mo Kworom blong Olgeta Twelef Aposol. Anda long daereksen blong Lod mo tru long wan voes we i fulwan, kaonsel ia i gat atoriti blong talemaot mo intepretem doktrin, mo blong stanemap polisi blong Jos (luk long Doktrin mo Ol Kavenan 1:38; 107:27–31).

5.1.1.2

Blong Olgeta Seventi

Ofis blong Olgeta Seventi insaed long Melkesedek Prishud, oli tokbaot insaed long tugeta ia: insaed long OlTesteman mo insaed long Niu Testeman (luk long Eksodas 24:1, 9–10; Namba 11:16–17, 24–25; Luk 10:1, 17). Tedei, oli Ol Jeneral Atoriti Seventi, mo Ol Eria Seventi (luk long 5.2.2). Oli mekem wok anda long ol ki mo daereksen blong Kworom blong Olgeta Twelef Aposol. Oli helpem Olgeta Twelef blong bildimap mo rulum Jos long evri nesen (luk long Doktrin mo Ol Kavenan 107:34–35, 38).

Presidensi blong Olgeta Seventi. I gat seven memba blong Olgeta Seventi, we oli singaotem olsem ol presiden blong oli prisaed ova evri memba blong Olgeta Seventi. Oli jusum wan long olgeta seven presiden blong hem i prisaed ova long ol narafala sikis. Oli stap olsem Presidensi blong Olgeta Seventi. (Luk long Ol Wok 6:2–6; Doktrin mo Ol Kavenan 107:93–94; 124:138.)

Ol Jeneral Atoriti Seventi. Ol Jeneral Atoriti Seventi, Fas Presidensi nao i singaotem olgeta blong stap olsem ol spesel witnes we oli testifae abaot nem blong Jisas Kraes, mo oli tijim gospel long ful wol (luk long Doktrin mo Ol Kavenan 107:25; 124:139).

Ol Jeneral Atoriti Seventi oli givim seves fultaem insaed long Jos. Plante taem oli stap rilisim olgeta taem oli kasem 70 yia, mo oli karem emeritus posisen. Nomata we oli holemtaet ofis ia olsem Seventi, oli nomo prisaed long ol miting.

Ol Kworom blong Olgeta Seventi. Ol memba blong Olgeta Seventi, wetem olgeta Eria Seventi, oli oganaesem olgeta long ol kworom. Presidensi blong Olgeta Seventi i prisaed ova long ol kworom ia. Namba blong ol memba blong Olgeta Seventi mo ol kworom blong Olgeta Seventi i save go antap, i folem hamas Jos i stap gro i kam bigwan. (Luk long Doktrin mo Ol Kavenan 107:95–96; 124:138–39).

5.1.1.3

Prisaeding Bisoprik

Insaed long Prisaeding Bisoprik, i gat Prisaeding Bisop mo tufala kaonsela blong hem. Wanwan memba blong Prisaeding Bisoprik i wan Jeneral Atoriti, mo oli holem ofis blong bisop. Fas Presidensi nao i singaotem olgeta, mo oli wok anda long daereksen blong olgeta.

Prisaeding Bisoprik i lukaotem ol mata blong laef long wol ia, olsem welfea o gudlaef, ol faenens, ol bilding, mo ol yumaniterian wok, hemia blong ful Jos (luk long Doktrin mo Ol Kavenan 107:68). Mo tu, oli stap tijim gospel mo oli bildimap kingdom blong God raon long wol.

5.1.2

Ol Jeneral Ofisa

Fas Presidensi i singaotem ol woman mo ol man blong oli stap olsem Ol Jeneral Presidensi blong olgeta oganaesesen blong Jos ia:

• Rilif Sosaeti

• Ol Yang Man

• Ol Yang Woman

• Praemeri

• Sandei Skul

Olgeta Jeneral Ofisa ia, oli givim seves anda long daereksen blong Fas Presidensi, Kworom blong Olgeta Twelef Aposol, mo ol Jeneral Atoriti Seventi we oli jusum olgeta. Plante taem bae oli givim seves blong faef yia.

Ol Jeneral Ofisa, oli save gat olgeta responsabiliti ia:

• Oli stap tij mo testifae abaot Jisas Kraes mo gospel blong Hem.

• Oli givim seves olsem ol memba blong jeneral Jos kaonsel mo ol komiti olsem we oli givim wok long olgeta.

• Oli mekem ol wok we oli givimaot long olgeta raon long wol blong oli givhan long ol memba.

• Oli givim kaonsel long saed blong kurikulom, ol program, mo ol risos blong ol oganaesesen blong olgeta.

• Oli givim kaonsel long jeneral oganaesesen kaonsel blong olgeta (luk long nekis paragraf).

• Oli givim instraksen mo sapot ol eria oganaesesen advaesa, we oli givim seves anda long daereksen blong Ol Eria Presidensi blong olgeta (luk long 5.2.5.1).

Wanwan jeneral oganaesesen blong Jos oli save gat wan kaonsel blong helpem Presidensi.

5.2

Eria Lidasip

Jos, oli oganaesem folem ol eria blong ol ples mo oli kavremap ful wol. Seksen ia, i talem sot abaot lidasip blong Jos long ol eria ia.

5.2.1

Eria Presidensi

Ol samting ia we oli wantem luk se bae yu yu holemtaet mo leftemap, Fas Presidensi mo Kworom blong Olgeta Twelef Aposol nao oli apruvum, mo oli stap tu insaed long ol standet ia. Tufala kaonsela, we oli ol Jeneral Atoriti Seventi o ol Eria Seventi, oli gat wok ia blong helpem presiden.

Eria Presidensi i prisaed ova, mo oli kaonsel wetem ol stek mo misin presiden insaed long eria. Oli sapotem tu ol tempol presiden mo ol metron. Taem oli kaonsel wetem ol memba blong Kworom blong Olgeta Twelef Aposol mo wetem Presidensi blong Olgeta Seventi, we oli ripot i gobak long olgeta, oli disaed olsem wanem blong yusum jeneral polisi mo daereksen blong Jos blong lukluk long ol nid long eria blong olgeta.

Ol memba blong Eria Presidensi oli travel insaed long eria we oli givim blong oli givhan long hem, blong oli tij, mo blong oli leftemap tingting blong ol lokol lida, ol misinari, mo ol memba blong Jos. Wan memba blong Olgeta Twelef, tru long insperesen i givim wok long hem, mo profet nao i singaotem hem.

5.2.2

Ol Eria Seventi

Ol Eria Seventi, Fas Presidensi nao i singaotem olgeta blong stap olsem ol spesel witnes we oli testifae abaot nem blong Jisas Kraes, mo oli tijim gospel long ful wol (luk long Doktrin mo Ol Kavenan 107:25; 124:139). Oli stap wok anda long daereksen blong Eria Presidensi, oli helpem Olgeta Twelef blong stap bildimap mo stap rulum Jos long eria blong olgeta.

Ol Eria Seventi oli no singaotem olgeta long fultaem seves. Plante taem bae oli givim seves blong faef yia. Plante taem oli stap kasem wok blong givim seves long eria we oli stap laef long hem (luk long Doktrin mo Ol Kavenan 107:38, 98). Oli stap sastenem ol Eria Seventi long ol jeneral konfrens.

Wanwan Eria Seventi i pat blong wan kworom blong Olgeta Seventi. Ol kworom ia, oli oganaesem olgeta folem ol ples. Olsem ol memba blong ol kworom ia, ol Eria Seventi ia, Presidensi blong Olgeta Seventi nao i prisaed ova long olgeta.

Ol Eria Seventi oli wok mo oli kaonsel tugeta wetem ol lokol lida blong Jos blong helpem olgeta blong mekem ol responsabiliti blong olgeta. Oli save givim wok long Ol Eria Seventi blong:

• Oli givim seves long eria kaonsel (luk long 5.2.3).

• Oli prisaed long ol kodineting kaonsel miting (luk long 5.2.4).

• Oli prisaed long ol stek konfrens mo oli givim instraksen long ol lida blong stek.

• Oli krietem mo oli oganaesem bakegen ol stek, oli setem apat ol niu stek presidensi, mo oli givim ol ki long stek presiden.

• Kodinetem ol responsabiliti mo ol aktiviti long ful eria (luk long 20.3.3), JustServe.org (long ol ples we i gat), lukluk blong kam oraet afta long disasta, mo ol nara wok we oli givim long olgeta.

• Oli goraon long ol misin mo oli givim instraksen long ol lida mo ol misinari.

• Oli stap olsem wan kaonsela long Eria Presidensi.

Ol Eria Seventi oli prisaed long evri miting blong Jos we oli atendem insaed long eria blong olgeta, be nomo sapos i gat wan Jeneral Atoriti i stap. Be, oli no prisaed ova long evri dei wok blong tempol, misin, o ol stek presiden. Ol presiden ia, oli givim seves anda long daereksen blong Eria Presidensi.

5.2.3

Eria Kaonsel

Long wanwan eria, wan eria kaonsel i miting olsem we i nid (plante taem i wan taem long wan kwota) blong kodinetem wok blong God blong fasin blong sevem man mo fasin blong kam olsem wan god long eria blong olgeta. Eria Presidensi i prisaed ova long eria kaonsel. Insaed long kaonsel ia, i gat Eria Presidensi mo Ol Eria Seventi we oli givim seves insaed long eria ia. Ol narawan oli save tekpat long pat, o evriwan long ol miting blong kaonsel taem we i nid, mo taem we Eria Ol Presidensi i invaetem olgeta.

5.2.4

Kodineting Kaonsel

Eria Presidensi i stanemap ol kodineting kaonsel. Insaed long wanwan kaonsel, i gat ol spesifik stek mo misin insaed long wan eria. Eria Presidensi i givim wok long wan Eria Seventi blong lidim wanwan kaonsel.

Ol stek mo misin presiden oli go long ol kodineting kaonsel miting. Ol tempol presiden, we ol tempol distrik blong olgeta i stap insaed long ol baondri blong kodineting kaonsel, oli stap invaetem olgeta taem we i stret.

Ol narawan oli save tekpat long pat, o evriwan long ol miting taem we i nid, mo taem we Eria Seventi i invaetem olgeta. Ol Eria Seventi oli tingting long distens, famli situesen, mo transpot taem oli mekem ol invitesen ia.

Stamba tingting blong gat ol kodineting kaonsel miting ia, hem i blong helpem stek, misin, mo ol tempol presiden blong oli yusum ol prishud ki blong olgeta long yuniti. Tugeta oli kaonsel abaot mo oli kodinetem ol efot blong helpem ol memba long ol responsabiliti blong olgeta blong tekpat long wok blong God blong fasin blong sevem man mo fasin blong kam olsem wan god.

Eria Seventi i singaotem wan kodineting kaonsel miting i no longtaem afta wanwan kwota eria kaonsel miting (luk long 29.4). Oli save holem sam moa miting sapos i nid.

5.2.5

Ol Eria Koling

Eria Presidensi i save singaotem ol memba blong oli givim seves long ol eria koling blong givhan long Eria Presidensi long ol responsabiliti blong olgeta. Olgeta we oli stap givim seves long ol posisen ia, wan memba blong Eria Presidensi o wan Eria Seventi we i kasem wok ia, i singaotem mo setem apat olgeta. Oli no stap sastenem olgeta.

Ol eksampol blong ol eria koling, i gat eria eksekutiv sekretari, eria odita, eria komunikesen daerekta, eria tempol mo famli histri advaesa, mo eria oganaesesen advaesa.

5.2.5.1

Ol Eria Oganaesesen Advaesa

Aotsaed long Yunaeted Stet mo Kanada, Ol Eria Presidensi oli save singaotem ol woman blong oli givim seves olsem ol eria oganaesesen advaesa. Ol advaesa ia, oli save help blong trenem mo givim instraksen long ol niu stek presidensi blong Rilif Sosaeti, Yang Woman, mo Praemeri, anda long daereksen blong stek presidensi blong ol lida ia (luk long 6.2.1.6). Wan memba blong stek presidensi, o wan hae kaonsela we i kasem wok ia, i atendem trening ia.

Ol eria advaesa oli givim seves anda long daereksen blong Eria Presidensi blong olgeta. Oli kasem moa instraksen oltaem tu we i kam long presidensi blong ol jeneral oganaesesen. Plante taem bae oli givim seves blong tri yia.