7.

Bisoprik

7.1

Bisop mo Ol Kaonsela blong Hem

Bisop nao i holem ol prishud ki blong lidim wok blong Jos insaed long wod (luk long 3.4.1) Hem, wetem tufala kaonsela blong hem, oli stap olsem wan bisoprik. Stek presidensi i stap blong gaedem olgeta. Bisoprik i kea long ol memba blong wod wetem lav long olgeta, mo oli stap helpem olgeta blong kam ol tru man blong stap folem Jisas Kraes (luk long Moronae 7:48).

Bisop mo ol kaonsela blong hem, oli ol hae pris. Sapos oli no ol hae pris taem oli singaotem olgeta, bae oli mas odenem olgeta oli kam hae pris bifo oli setem olgeta apat blong oli givim seves.

Bisop i gat faevfala stamba responsabiliti:

• Hem i prisaeding hae pris insaed long wod.

• Hem i presiden blong Aronik Prishud.

• Hem i jeneral jaj.

• Hem i kodinetem wok blong God blong fasin blong sevem man mo fasin blong kam olsem wan god, insaed long wod, we i tekem tu wok blong stap kea long olgeta we oli stap long nid.

• Hem i lukluk ova ol wok blong kipim ol rekod, lukaotem ol faenens, mo fasin blong yusum mitinghaos.

From se bisop i holem ol ki blong prishud, hem i gat raet blong kasem revelesen long saed blong wod (luk long Doktrin mo Ol Kavenan 128:11). From hemia, i gat samfala responsabiliti we oli blong hemwan nomo. Oli tokbaot olgeta responsabiliti ia insaed long japta ia.

Fasfala mo moa impoten responsabiliti blong bisop, hem i blong kea long jeneresen ia we i stap kam antap insaed long wod blong hem, (ol pikinini, ol yut, mo ol yang singgel adalt). Blong mekem se hem i save lukluk nomo long responsabiliti ia, hem i givimaot plante wok long ol narawan (luk long 4.2.5 Hem i save givimaot wok long ol kaonsela blong hem, klak mo ol asisten klak, eksekutiv sekretari, mo ol lida blong kworom mo ol oganaesesen, mo ol narawan moa.

Sapos bisop i no save mekem ol responsabiliti blong hem, wan kaonsela i save mekem wok long ples blong hem blong sot taem, be, bae i no mekem nomo sapos i gat wan not i stap samples insaed long hanbuk ia, we i talem olsem. Bisop o kaonsela blong hem i toktok wetem stek presiden sapos hem i gat ol kwestin abaot wan kaonsela we i bae i mekem wok long bihaf blong bisop.

7.1.1

Prisaeding Hae Pris

Bisop hem i fasfala lida long saed blong spirit, blong wod. Hem i soem eksampol taem hem i givim seves “wetem wan hat we i tabu” (Mosaea 18:12). Hem i tijim, leftemap tingting mo givim insperesen (luk long Matiu 20:28). Hem i folem olgeta prinsipol blong lidasip olsem we oli stap long Doktrin mo Ol Kavenan 121:34–46.

Wan bisop i wan fetful disaepol blong Jisas Kraes. Hem i stap tru long ol kavenan blong hem. Hem i stap fetful long waef blong hem mo famli blong hem. Hem i stap wan eksampol blong stret mo gud fasin long famli blong hem, long wod, mo long komuniti. (Luk long 1 Timoti 3:2–7.) Ol kaonsela blong hem, oli ol man we oli gat semmak fasin.

Bisop i soem rod mo i givim kaonsel long ol nara lida insaed long wod. Hem i leftemap tingting blong olgeta wetem responsabiliti blong olgeta.

7.1.1.1

Ol Wod Oganaesesen mo Ol Kworom blong Prishud

Bisop i gat responsabiliti blong lukluk ova long ol oganaesesen blong Rilif Sosaeti mo Ol Yang Woman. Hem i givim wok long ol kaonsela blong hem blong oli lukaotem ol oganaesesen blong Sandei Skul, mo blong Praemeri, mo ol nara program blong wod. (Luk long 9.3.1, 11.3.1, 12.3.1, mo 13.2.1.)

Long saed blong ol responsabiliti blong bisop long saed blong Aronik Prishud, oli putum long aotlaen long 7.1.2. Ol responsabiliti we i go wetem ol kworom blong ol elda, oli stap long aotlaen long 8.3.1

Bisop i lidim tu ol presiden blong kworom blong ol elda mo hemia blong Rilif Sosaeti blong lukluk ova long wok blong givhan. Hem i miting wetem tufala presiden ia tugeta, wan taem long wan kwota blong lukluk long ol nid blong wanwan man, woman mo famli (luk long 21.2).

7.1.1.2

Ol Odinens mo Ol Blesing

Bisop i lidim fasin blong mekem ol wok long saed blong olgeta odinens mo blesing ia insaed long wod:

• Sakramen

• Stap givim nem mo blesing long ol pikinini

• Baptaes mo konfemesen blong ol pikinini blong rekod we oli gat 8 yia (long saed blong olgeta we oli gat disabiliti long tingting, luk long 38.2.8.1; blong ol konvet, luk long 31.2.3.2)

• Wok blong givim Aronik Prishud mo odinesen long ol ofis blong dikon, tija, mo pris

Blong gat moa infomesen abaot ol odinens mo ol blesing, luk long japta 18.

7.1.1.3

Ol Kaonsel mo Ol Miting

Bisop i lidim wod kaonsel mo wod yut kaonsel (luk long 29.2.5 mo 29.2.6). Hem i yusum ol kaonsel ia blong help blong kodinetem wok blong God blong fasin blong sevem man mo fasin blong kam olsem wan god, insaed long wod. Hem i givimaot plante long ol wok ia long ol narawan, mo hem i stap folemap ol wok we hem i stap givimaot (luk long 4.2.5).

Bisop i stap invaetem ol lida blong oli kaonsel, o toktok tugeta, abaot wei blong bildimap paoa long saed blong spirit, mo bildimap yuniti insaed long wod. Hem i leftemap tingting blong evri memba blong kaonsel blong lukaotem insperesen mo blong oli tekpat long ol toktok storian. (Luk long Doktrin mo Ol Kavenan 88:122; luk tu long 4.4 insaed long hanbuk ia.)

Bisoprik i mekem plan blong ol sakramen miting mo ol nara miting blong wod we oli putum long wan lis long japta 29. Bisop i prisaed long ol wod miting ia sapos nomo wan memba blong stek presidensi, wan Eria Seventi long eria blong hem, o wan Jeneral Atoriti i kam atendem miting ia. Ol kaonsela blong hem oli save lidim ol miting ia. Oli save prisaed tu sapos bisop i no stap.

7.1.1.4

Ol Koling mo Ol Rilis

Ol responsabiliti blong bisop long saed blong ol koling mo ol rilis, oli putumaot gud olgeta long aotlaen long japta 30. Hem i save givim wok long ol kaonsela blong hem, blong givimaot ol koling mo mekem ol rilis, olsem we oli putum insaed long aotlaen long 30.8.

7.1.2

Presiden blong Aronik Prishud

“Bisoprik, hem i presidensi blong Aronik Prishud, mo i holem ol ki mo atoriti blong prishud ia” (Doktrin mo Ol Kavenan 107:15; luk tu long ves 20). Bisop i gat olgeta responsabiliti ia olsem wan presiden blong Aronik Prishud insaed long wod. Ol kaonsela blong hem oli stap helpem hem.

• Sapotem ol papa mo mama blong oli tijim ol yut. Helpem ol yut blong oli fetful blong givim seves, blong oli mekem mo kipim ol tabu kavenan, blong oli rere blong kasem olgeta odinens blong tempol. Helpem ol yang man blong oli rere blong oli odenem olgeta long ol ofis blong prishud, mo blong oli givim seves long ol fultaem misin. Sapos ol yang woman oli wantem givim seves long ol fultaem misin, helpem olgeta blong oli rere. Program ia blong Ol Pikinini mo Ol Yut i save help long ol traehad wok ia (luk long ChildrenandYouth.ChurchofJesusChrist.org.)

• Lukluk ova long ol kworom blong Aronik Prishud mo Ol Yang Woman klas. Bisop i presiden blong kworom blong ol pris (luk long Doktrin mo Ol Kavenan 107:87–88). Fas kaonsela i gat responsabiliti blong lukaotem kworom blong ol tija. Seken kaonsela i gat responsabiliti blong lukaotem kworom blong ol dikon. Blong gat moa infomesen abaot lidasip blong kworom blong Aronik Prishud, luk long 10.3, 10.4, mo 10.5.

• Kaonsel wetem presiden blong Ol Yang Woman blong wod. Bisop i no givim responsabiliti ia long wan kaonsela blong hem. Bisop mo ol kaonsela blong hem, oli tekpat oltaem long Ol Yang Woman miting, seves mo aktiviti. (Luk long 11.3.1.)

• Oli mit oltaem wetem wanwan yut. Blong save ol gaedlaen long saed blong ol miting ia, luk long 31.3.1.

• I sapotem ol famli mo ol lida blong Praemeri, mo ol tija long ol hadwok blong olgeta blong helpem ol pikinini blong mekem mo kipim ol kavenan blong olgeta (luk long japta 12

7.1.3

Jeneral Jaj

Bisop i jeneral jaj insaed long wod (luk long Doktrin mo Ol Kavenan 107:71–74). Hem i traehad blong folem eksampol blong Sevya olsem wan jaj we i stret mo gud (luk long 3 Nifae 27:27). Hem i gat olgeta responsabiliti ia:

• Helpem ol yut mo ol adalt blong oli kwalifae blong kasem mo stap klin inaf blong holem wan tempol rekomen.

• I mekem ol intaviu olsem we i stap long aotlaen long 31.2. I save givim raet tu long ol kaonsela blong hem blong lidim samfala intaviu (luk long 31.2.2). Blong kasem samfala gaedlaen, luk long 31.1.

• Hem i mit wetem ol memba blong wod we oli stap lukaotem help long saed blong spirit, we oli gat ol hevi problem blong olgetawan, o, we oli mekem ol series sin; hem i helpem olgeta blong yusum hiling paoa blong Jisas Kraes. Bisop i save askem ol kaonsela blong hem, presiden blong kworom blong ol elda mo presiden blong Rilif Sosaeti, mo ol narawan blong oli mit wetem ol memba blong wod abaot samfala mata. Be, bisop nomo i givim advaes long ol memba blong wod long saed blong ol mata we i abaot fasin blong stap klin inaf, abius, mo givim raet blong yusum fast ofring mane. Blong kasem samfala gaedlaen, luk long 31.1.

• Anda long daereksen blong stek presiden, hem i holem ol membasip kaonsel olsem we i nid. Blong kasem samfala gaedlaen, luk long japta 32.

7.1.4

Kodinetem Wok blong God blong Fasin blong Sevem Man mo Fasin blong Kam Olsem Wan god, Insaed long Wod

Bisop i kodinetem wok blong God blong fasin blong sevem man mo fasin blong kam olsem wan god, insaed long wod (luk long japta 1 Ol kaonsela blong hem mo ol nara lida, oli helpem hem.

Bisop i helpem ol memba blong oli laef folem gospel. Hem i helpem olgeta blong mekem fet blong olgeta long Papa long Heven mo long Jisas Kraes, mo long Atonmen blong Hem, i kam strong moa (luk long Doktrin mo Ol Kavenan 20:29). Hem i tijim olgeta blong prea mo stadi long ol skripja. Hem i invaetem olgeta blong mekem ol kavenan taem oli kasem ol odinens blong fasin blong sevem man mo fasin blong kam olsem wan god. Hem i leftemap tingting blong olgeta blong kipim ol kavenan blong olgeta.

Bisop i mekem ol memba blong Jos oli kam strong moa. Hem i leftemap tingting blong ol famli blong gat famli prea oltaem, mo blong oli lanem gospel tugeta, mo long taem blong haos naet tu. Hem i tijim olgeta blong oli lavem mo oli givim seves long wanwan long olgeta. Hem i tijim olgeta tru long toktok, mo tu, tru long eksampol, se i posibol blong mekem ol koling blong Jos, mo semtaem, tekem kea long ol responsabiliti blong famli. Hem i meksua se ol aktiviti blong Jos oli sapotem ol traehad blong ol papa mo mama blong resemap ol pikinini long stret mo gud fasin.

Antap long wok blong stap helpem ol memba blong stap laef folem gospel, bisop i gat ol narafala responsabiliti blong kodinetem wok blong God blong fasin blong sevem man mo fasin blong kam olsem wan god, insaed long wod. Eksampol:

• Hem i helpem olgeta we oli ol man blong oli odenem olgeta i go long ol ofis blong prishud.

• Hem i lidim ol wok blong kea long olgeta we oli stap long nid insaed long wod (luk long 7.1.4.1 mo 22.2.1).

• Hem i gaedem presidensi blong kworom blong ol elda mo hemia blong Rilif Sosaeti, taem oli stap lidim ol wok blong givhan insaed long wod (luk long 21.2.1).

• Hem i kodinetem wok blong presiden blong kworom blong ol elda mo hemia blong Rilif Sosaeti taem oli stap lidim ol hadwok blong wod blong serem gospel mo blong mekem ol memba we oli niu, mo olgeta we oli kambak, oli kam strong moa (luk long 23.1).

• Hem i kodinetem ol hadwok blong presidensi blong kworom blong ol elda mo hemia blong Rilif Sosaeti taem oli stap lidim wok blong tempol mo famli histri insaed long wod (luk long 25.2).

• Hem i helpem ol memba blong oli kasem wan tempol rekomen, mo ol odinens blong tempol (luk long 27.1).

7.1.4.1

Stap Lidim Ol Hadwok blong Kea long Olgeta we Oli Gat Ol Nid blong Laef Ia

Bisop i gat tabu wok ia blong go lukaotem mo kea long olgeta we oli gat nid long laef ia (luk long Doktrin mo Ol Kavenan 84:112). Hem i givimaot plante long wok ia i go long presidensi blong Rilif Sosaeti mo hemia blong kworom blong ol elda.

Be, samfala diuti, bisop nomo i save mekem. Eksampol: hem i talemaot wanem kaen help, amaon blong help, mo kasem wetaem bae hem i givim help we Jos i stap givim. Taem hem i mekem olsem, plante taem hem i toktok wetem presiden blong Rilif Sosaeti mo presiden blong kworom blong ol elda. Blong gat moa infomesen, luk long 22.4 mo 22.5.

Ol memba blong bisoprik oli tijim ol prinsipol blong stap kea long olgeta we oli stap long nid mo ol prinsipol blong bildimap fasin blong dipen long yuwan (luk long 22.1). Mo tu, oli tijim loa blong livim kakae (luk long 22.2.2). Oli lukluk ova long wok ia blong putum tugeta ol fas ofring (luk long 34.3.2).

Bisop i givim instraksen long ol nara lida blong wod long saed blong ol responsabiliti blong olgeta blong stap kea long olgeta we oli stap long nid. Mo tu, hem i lidim wod kaonsel long ol hadwok ia.

Blong kasem moa infomesen long wei we bisop i kea long olgeta we oli stap long nid, luk long 22.6.1

7.1.5

Ol Rekod, Ol Faenens, mo Mitinghaos

Bisop i lukluk ova long ol rekod, ol ripot, ol faenens, mo mitinghaos blong wod. Hemia i tekem tu responsabiliti blong hem blong tijim loa blong taeting mo loa blong lego kaekae mo blong mekem taeting dikleresen (luk long 34.3.1.2; luk tu long Doktrin mo Ol Kavenan 107:68).

Bisop i save givim plante long ol wok blong ol rekod mo faenens i go long ol kaonsela mo ol klak blong hem. Hem i save givim wok long wan long ol kaonsela blong hem blong stap olsem wod bilding ripresentativ, o hem i save singaotem wan nara memba blong i mekem hemia.

Blong gat moa infomesen abaot ol rekod, luk long japta 33 Blong gat moa infomesen abaot ol faenens, we i tekem taeting tu, luk long japta 34. Blong gat moa infomesen abaot ol mitinghaos, luk long japta 35

7.2

Wanem I Defren Bitwin Ol Branj Presidensi mo Ol Bisoprik

Insaed long wan branj, i gat wan we i holem Melkesedek Prishud, we oli singaotem hem olsem branj presiden. Hem i holem ol ki blong prishud we i nid blong prisaed (luk long 3.4.1.1). Hem, wetem ol kaonsela blong hem, oli givim seves plante olsem wan bisoprik, be, wetem olgeta samting ia we oli defren i stap:

• Wan branj presiden, hem i stap stap olsem wan elda, o wan hae pris. Wan bisop, hem i mas wan hae pris.

• Oli no setem apat wan branj presiden olsem prisaeding hae pris. Be, hem i prisaed ova long branj mo hem i gat evri responsabiliti ia we oli tokbaot long 7.1.1.

• Hem i no nid blong wan branj presiden i mas mared.

• Ol kaonsela long wan branj presidensi oli no no saenem ol tempol rekomen (luk long 26.3.1

7.3

Wod Eksekutiv Sekretari mo Ol Asisten Wod Eksekutiv Sekretari

Bisoprik i givim nem blong wan we i holem Melkesedek Prishud blong i givim seves olsem wod eksekutiv sekretari. Oli sendem nem ia i go long stek presidensi. Eksekutiv sekretari i mas gat wan tempol rekomen we i laef i stap. Wan memba blong stek presidensi, o wan hae kaonsela we oli givim wok ia long hem nao i singaotem mo setem hem apat.

Eksekutiv sekretari i wok kolosap wetem bisop mo ol kaonsela blong hem, be hem i no wan memba blong bisoprik. Hem i gat olgeta responsabiliti ia:

• Hem i mit wetem bisoprik mo i rere ol ajenda olsem we oli talemaot long hem.

• Hem i wan memba blong wod kaonsel mo hem i atendem ol wod kaonsel miting. Olsem we bisoprik i talem long hem, hem i folemap ol wok we oli givimaot finis long ol miting ia.

• Hem putum taem blong ol apoenmen blong bisoprik.

• Hem i putum taem blong ol yut mo ol adalt oli gat intaviu blong oli riniu tempol rekomen blong olgeta.

• Sapos bisoprik i givim wok ia, hem i kodinetem wok blong wod blong helpem ol memba blong putum oda blong kasem ol magasin blong Jos (luk long 38.8.7).

• Hem i save helpem bisoprik wetem ol wok blong seminari mo institiut, olsem blong helpem ol memba blong wod blong rejista long ol klas (luk long japta 15).

• Hem i kipim wan lis we i apdeit blong ol nem mo adres blong ol memba blong wod we oli stap long militeri. Hem i meksua se ol memba blong wod oli savegud ol memba ia (luk long 38.9.2). Hem i talem tu long stek eksekutiv sekretari taem we i gat ol memba we oli plan blong go insaed long militeri.

• Pasem ol mesej we i kam long ol wokman mo volontia blong Jos i go long ol stret lida long wod, olsem we bisop i givim instraksen blong mekem (luk long 38.8.9).

Oli save singaotem tu (2) asisten wod eksekutiv sekretari, olsem we i nid. Bisoprik nao i givim nem blong olgeta, mo wan memba blong stek presidensi, o wan hae kaonsela we oli givim wok ia long hem nao i singaotem mo setem olgeta apat. Ol brata ia oli mas gat wan tempol rekomen we i laef i stap.

7.4

Wod Klak mo Ol Asisten Wod Klak

Bisop i givim nem blong wan we i holem Melkesedek Prishud blong i givim seves olsem wod klak. Hem i sendem nem ia i go long stek presidensi. Klak i mas gat wan tempol rekomen we i laef i stap. Wan memba blong stek presidensi, o wan hae kaonsela we oli givim wok ia long hem nao i singaotem mo setem hem apat. Hem i wan memba blong wod kaonsel.

Mo tu, oli save singaotem ol asisten wod klak (luk long 33.4.3). Wan memba blong stek presidensi, o wan hae kaonsela we oli givim wok ia long hem nao i singaotem mo setem olgeta apat.

Ol klak oli wok kolosap wetem bisop mo ol kaonsela blong hem, be oli no memba blong bisoprik. Ol responsabiliti ia blong wod klak, mo ol asisten wod klak, oli tokbaot olgeta long 33.4.2 mo 33.4.3.