8.

Kworom blong Ol Elda

8.1

Stamba Tingting mo Oganaesesen

Melkesedek Prishud i helpem ol pikinini blong God blong oli rere blong gobak stap wetem Hem, long ples blong Hem. Melkesedek Prishud i “holem ol ki blong evri blesing blong jos long saed blong spirit” (Doktrin mo Ol Kavenan 107:18).

Ol ofis blong Melkesedek Prishud oli: elda, hae pris, petriak, Seventi, mo Aposol. Insaed long japta ia i gat ol infomesen abaot ol elda, mo abaot ol kworom blong ol elda.

8.1.1

Stamba Tingting

Ol man we oli gat 18 yia o moa, we oli klin inaf, oli save kasem Melkesedek Prishud, mo oli odenem olgeta long ofis blong elda. Wan we i wan man we oli odenem hem long ofis ia, i mekem wan tabu kavenan blong helpem God blong mekem wok blong Hem i kamtru (luk long Doktrin mo Ol Kavenan 84:33–44).

Wanwan elda i pat blong wan grup blong ol man we oli holem prishud, we oli oganaesem olgeta insaed long wanem oli singaotem wan kworom blong ol elda. Ol memba blong kworom blong ol elda, oli wok tugeta blong help blong mekem wok blong God blong fasin blong sevem man mo fasin blong kam olsem wan god, i hapen. Oli givim seves long ol narawan, oli mekem ol prishud diuti, oli bildimap yuniti, mo oli lan mo laef folem doktrin.

8.1.2

Membasip Insaed long Kworom blong Ol Elda

Wanwan wod i gat wan kworom blong ol elda. Insaed long kworom ia, i gat olgeta brata ia:

• Evri elda insaed long wod.

• Evri fiuja elda insaed long wod (luk long 8.4).

• Evri hae pris insaed long wod, be i no olgeta we oli stap givim seves insaed long wan stek presidensi, insaed long wan bisoprik, long wan hae kaonsel, o olsem wan petriak. Olgeta lida ia, oli ol memba blong stek hae pris kworom. Blong kasem moa infomesen abaot stek hae pris kworom, luk long 6.2.1.1.

Wan yang man i save stat blong go long ol miting blong kworom blong ol elda taem hem i kasem 18 yia, iven sapos oli no odenem hem yet olsem wan elda. Hem i kaonsel o toktok wetem papa mo mama blong hem, mo wetem bisop blong mekem desisen ia. Taem hem i kasem 19 yia, o bifo hem i aot long hom blong go long yunivesiti o go long wan misin, oli mas odenem hem i kam wan elda sapos hem i klin inaf. Luk long 10.6.

Ol mared man we oli no kasem 18 yia yet, oli ol fiuja elda, mo tu, oli memba blong kworom blong Ol Elda.

Blong gat moa infomesen abaot ol papa we oli gat pikinini be oli no mared mo oli no kasem 18 yia yet, luk long 38.1.5.

8.1.3

Stretem Samting Folem Ol Lokol Nid

Samfala wod, oli gat bigfala namba blong ol man we oli holem Melkesedek Prishud. Long ol wod ia, stek presidensi i save oganaesem wan moa kworom blong ol elda (luk long Doktrin mo Ol Kavenan 107:89). Wanwan kworom i gat presidensi blong hem. Sapos i posibol, wanwan kworom i gat ol memba we yia mo eksperiens blong olgeta oli defdefren.

8.2

Stap Tekpat long Wok blong God blong Fasin blong Sevem Man mo Fasin blong Kam Olsem Wan God

God i stap invaetem evriwan blong oli go long Kraes mo tekpat insaed long wok blong Hem blong fasin blong sevem man mo fasin blong kam olsem wan god taem:

• Yumi stap laef folem gospel blong Jisas Kraes.

• Yumi stap kea long olgeta we oli stap long nid.

• Yumi stap invaetem evriwan blong akseptem gospel.

• Yumi stap joenem ol famli blong taem we i no save finis.

Ol lida blong kworom blong ol elda, oli mekem plan blong holem ol Sandei miting, ol aktiviti, ol givhan wok, seves, mo ol nara wok blong helpem ol brata blong tekpat long wok blong God blong fasin blong sevem man mo hemia blong kam olsem wan god. Ol memba blong kworom blong ol elda mo blong Rilif Sosaeti, oli joen wan blong help blong mekem wok ia i hapen.

Blong gat moa infomesen abaot wok blong God blong fasin blong sevem man mo fasin blong kam olsem wan god, stadi long japta 1.

8.2.1

Stap Laef Folem Gospel blong Jisas Kraes

Ol lida blong kworom blong ol elda oli sapotem ol memba blong stap laef folem gospel blong Jisas Kraes. Oli tokbaot plante fasin blong praktisim fet, stap sakem sin, kam moa indipenden long laef, mo stap mekem ol kavenan wetem God taem oli kasem ol odinens. Ol odinens olsem, i tekem tu, tempol endaomen. Luk long 1.2.1.

8.2.1.1

Stap Lanem Gospel long Hom

Taem we ol memba oli stap lanem mo stap laef folem gospel long hom, jenis blong olgeta long Papa long Heven mo Jisas Kraes, i kam dip moa. Ol lida blong kworom blong ol elda oli leftemap tingting blong ol brata blong oli stadi long ol skripja mo ol toktok blong ol profet we oli stap laef; oli mekem hemia wetem wanwan man mo woman, mo wetem ol famli blong olgeta. Kam Folem Mi mo ol nara risos oli save givim moa help long stadi blong olgeta.

Ol haos naet oli wan impoten rod blong lanem gospel insaed long hom. Plante taem, oli stap holem olgeta evri wik long Sandei, Mandei naet, o long wan nara taem. Oli sapos blong gat ol prea, ol stadi long gospel, ol testemoni, ol singsing mo ol gudfala aktiviti.

8.2.1.2

Stap Lanem Gospel insaed long Ol Miting blong Kworom

Ol kworom blong ol elda oli mit long ol Sandei blong olgeta stamba tingting ia:

• Mekem fet i kam strong moa.

• Bildimap yuniti.

• Mekem ol famli mo hom oli kam strong moa.

• Kodinetem wok blong helpem God long wok blong Hem blong fasin blong sevem man mo fasin blong kam olsem wan god insaed long wod.

Ol miting, oli holem olgeta long nambatu mo nambafo Sandei blong wanwan manis. Oli blong 50 minit. Presidensi blong kworom blong ol elda oli mekem plan blong ol miting ia. Wan memba blong presidensi i lidim.

Miting i stat wetem prea. Afta wan memba blong presidensi bae i lidim ol memba blong kworom blong oli kaonsel tugeta blong faef kasem ten minit, abaot ol jalenj, ol nid, mo ol janis. Blong stap lukluk moa long Sevya long taem blong kaonsel ia, bae i helpem ol memba blong kworom blong bildimap ol testemoni, kasem ol tempol odinens, kipim ol kavenan, mo bildimap fasin blong stap olsem wan disaepol. Presidensi blong kworom blong ol elda i jusum ol topik we bae oli kaonsel long hem folem ol nid blong ol memba blong kworom.

Afta long hemia, oli mas givim inaf taem blong givim instraksen mo toktok raon long gospel long wan wei we i gat mining. Oli mas lukluk moa long ol topik blong wan o moa toktok blong jeneral konfrens we i jes pas. Presidensi blong kworom blong ol elda oli prea mo jusum ol mesej blong konfrens blong ol memba blong kworom oli toktok raon long hem. Oli mekem ol seleksen ia folem ol nid blong ol memba.

Oli save singsing ol hym blong sapotem wan lesen.

Ol miting oli mas en wetem wan prea.

Kworom blong Ol Elda mo Rilif Sosaeti i save kombaen wanwan taem blong wan Sandei lesen. Bisoprik mo presidensi blong kworom blong ol elda mo Rilif Sosaeti, i kodinetem ol miting ia.

Blong kasem sam moa infomesen, luk long “To Sit in Council.”

8.2.1.3

Ol Aktiviti

Ol presidensi blong kworom blong ol elda oli mekem plan blong holem sam aktiviti. Presiden i lukluk ova long ol aktiviti. Hem i save askem wan kaonsela, o wan nara memba blong kworom blong oli tekem step blong mekem plan mo kareaot ol aktiviti ia (luk long 8.3.5). Ol presidensi oli toktok raon long ol aktiviti wetem bisop olsem pat blong planing blong olgeta.

Ol aktiviti oli sapos blong mekem ol tingting blong hat blong ol memba blong kworom, i kam moa strong blong mekem mo kipim ol kavenan mo givim ol janis long olgeta blong kam tugeta mo givim seves tugeta. Ol aktiviti oli sapos blong help blong winim ol stamba tingting blong kworom blong ol elda (luk long 8.1 mo 8.1.1).

8.2.2

Stap Kea long Olgeta long Nid

Olsem ol man we i folem Jisas Kraes, ol memba blong kworom blong ol elda oli gat responsabiliti blong go aot luk ol memba wetem lav long olgeta we oli stap long nid. Wanwan mo olsem wan kworom, oli lukaot blong givim seves long ol narawan insaed long wod mo komuniti. Long ples we i gat, JustServe.org i givim sam janis blong mekem komuniti seves.

Blong kasem moa infomesen long wei we ol memba blong kworom blong ol elda mo Rilif Sosaeti oli kea long olgeta we oli stap long nid, luk long 22.6.2.

8.2.2.1

Wok blong Givhan

Wok blong givhan i blong stap kea long ol narafala man olsem we Sevya bae i mekem. Ol memba blong kworom blong ol elda oli kasem ol givhan wok we kworom presidensi i givimaot long olgeta. Blong kasem moa infomesen, luk long japta 21.

8.2.2.2

Sot Taem Nid

Ol givhan brata oli lukaotem blong oli andastanem gud, mo oli givim ansa long ol nid blong olgeta we oli givim seves long olgeta. Sam memba, maet oli nidim help blong sot taem, olsem long taem blong sik, taem pikinini i bon i kam long wol ia, long taem blong ded, blong wan i lusum wok, mo ol nara situesen.

Taem we i nid, ol givhan brata oli askem presidensi blong kworom blong ol elda blong oli help. Mo, wetem raet blong bisop, presidensi blong kworom blong ol elda i save singaotem wan seves kodineta blong hem i oganaesem ol gudfala hadwok ia (luk long 8.3.5).

Kworom blong ol elda mo Rilif Sosaeti, oli kodinetem ol hadwok blong lukluk long ol nid we oli blong sot taem (luk long 22.3.2). Bisop i save givim help wetem fas ofring sapos i nid.

Long sam ples, ol bisop oli gat joes ia blong givim, long ol memba we oli gat nid, wan oda fom blong bisop, blong oli save go karem kaekae mo ol nara besik samting. Plante taem, bisop i givim wok long presiden blong Rilif Sosaeti, blong hem i mas mit wetem ol memba mo fulumap wan oda fom. Be, hem i lukluk tu blong givim wok long presiden blong kworom blong ol elda. Oli save givim wok long wan kaonsela insaed long Rilif Sosaeti, mo insaed long presidensi blong kworom blong ol elda, sapos presiden i no stap. Lida we i kasem wok ia, i sendem fom we oli komplitim i go long bisop blong hem i apruvum.

Blong kasem moa infomesen, luk long 22.6.2 mo “Welfea Risos” insaed long Risos blong Ol Lida mo Klak.

8.2.2.3

Ol Longtaem Nid mo Fasin blong Indipenden Laef

Olsem we bisop i kodinetem, ol presidensi blong kworom blong ol elda mo Rilif Sosaeti oli helpem ol memba we oli gat ol longtaem nid mo ol nid blong oli stap dipen long olgetawan. Oli tijim ol prinsipol blong fasin blong gat indipenden laef long saed blong laef long wol ia, mo tu long saed blong spirit. Luk long japta 22 mo “Indipenden Laef” insaed long Gospel Laebri Ap.

Sapos wan man o woman, o famli i nidim help, ol presiden blong kworom blong ol elda mo Rilif Sosaeti oli toktok tugeta anda long daereksen blong bisop abaot wei blong help (luk long 22.4).

presiden blong kworom blong ol elda, Rilif Sosaeti presiden, o wan nara lida i helpem man, woman o famli ia blong mekem wan Plan blong Indipenden Laef. Ol givhan brata o sista oli save help tu wetem plan ia. Plante taem, ol nara memba blong kworom blong ol elda o Rilif Sosaeti oli gat ol skil ia, o oli gat eksperiens ia we i save help. Evriwan we oli help, oli mas holemtaet infomesen i konfidensiol i stap. Blong moa infomesen, luk long 22.3.3 mo 22.8.

8.2.2.4

Taem Wan Memba blong Wod I Ded

Taem wan memba blong wod i ded, ol presidensi blong kworom mo Rilif Sosaeti oli givim kamfot mo help. Anda long gaed blong bisop, oli save help wetem fenerol.

Sapos i posibol, ol man o ol woman ia we oli bin endao finis, oli save putum ol tempol klos long olgeta blong haedem bodi blong olgeta., o blong bonem bodi blong olgeta. Bodi blong wan we i wan man, bae waef blong hem i save putum klos blong hem, o wan memba blong famli we i wan man mo i endao i save putum klos long hem. Sapos i no gat wan memba blong famli i stap, o bae i no wantem blong dresemap bodi blong wan man we i endao, nao bisop i givim wok long presiden blong kworom blong ol elda blong i invaetem wan man we i endao blong i dresemap bodi ia, o i lukluk se oli dresemap hem i stret. Blong kasem moa infomesen, luk long 38.5.10

Presidensi blong kworom blong ol elda mo hemia blong Rilif Sosaeti, ol givhan brata mo sista, mo ol narawan, oli gogohed blong givim kamfot mo help afta long fenerol.

8.2.3

Stap Invaetem Evriwan blong Akseptem Gospel

Olgeta man we oli holem Melkesedek Prishud, oli gat wan diuti ia blong invaetem evriwan blong kasem olgeta blesing blong gospel blong Jisas Kraes (luk long Doktrin mo Ol Kavenan 53:3). Oli mekem hemia taem oli serem gospel, taem oli mekem ol niu memba oli kam strong moa, mo taem oli go luk mo toktok wetem olgeta we oli lesaktiv. Luk long 23.2 mo 23.3.

Insaed long miting blong presidensi mo kworom, presidensi blong kworom blong ol elda i toktok raon long ol wei we ol brata oli save invaetem evriwan blong kasem ol blesing blong gospel. Luk long 23.1.1, 23.1.2, mo 23.1.3.

Presiden blong kworom blong ol elda i givim wok long wan memba blong presidensi blong help blong lidim ol wok blong serem gospel insaed long wod. Hem i wok wetem memba blong presidensi blong Rilif Sosaeti we oli givim wok ia long hem blong oli kodinetem ol wok ia (luk long 23.6.2).

Memba ia blong kworom presidensi blong ol elda i save mekem rol ia blong wod misin lida. Sapos bisoprik i singaotem wan wod misin lida, memba ia blong presidensi i lukluk ova long wok ia blong hem. Luk long 23.6.1 mo 23.6.3.

Wod misin lida, we maet i wan memba blong kworom presidensi blong ol elda, i lidim ol kodinesen miting ia evri wik. Stamba tingting blong ol miting ia, hem i blong kodinetem wok blong invaetem evriwan blong kasem olgeta blesing blong gospel. Ol memba blong Rilif Sosaeti we oli kasem wok ia, mo ol memba blong kworom presidensi blong ol elda we oli kasem wok ia, ol wod misinari, wan asisten blong kworom blong ol pris, mo wan memba blong presidensi blong klas blong Ol Yang Woman, klas ia blong ol yang woman we yia blong olgeta i moa bigwan, mo ol fultaem misinari, oli stap insaed long ol miting ia. Luk long 23.4.

8.2.4

Stap Joenem Ol Famli blong Taem we I No Save Finis

Olgeta we oli holem Melkesedek Prishud oli sapotem ol memba long wok ia blong yunaetem ol famli blong taem we i no save finis. Hemia i tekem tu:

• Blong stap mekem ol kavenan wetem God taem yumi kasem ol odinens we i tekem tu, tempol endaomen.

• Blong stap mekem tempol mo famli histri wok (luk long 1.2.4).

Insaed long miting blong presidensi mo kworom, presidensi blong kworom blong ol elda i toktok raon long ol wei we ol brata oli save tekpat long ol efot ia.

Ol presidensi memba oli mekem ol plan tu long ol wei blong helpem ol memba blong mekem andastaning blong olgeta i kam moa bigwan, mo hat blong olgeta we i wantem blong kasem ol tabu odinens mo mekem ol kavenan wetem God insaed long tempol. Oli leftemap tingting blong ol brata blong wosip insaed long tempol, plante taem olsem we i posibol.

Presidensi i leftemap tingting blong ol memba blong kworom blong lanem abaot famli histri blong olgeta. Oli helpem ol niu memba mo ol memba we oli stap kambak bakegen long Jos, ol elda we oli jes odenem olgeta, mo ol niu misinari we oli jes singaotem olgeta, blong oli faenem mo rere long ol nem blong bubu we oli ded finis, blong save mekem ol tempol odinens blong olgeta.

Presiden blong kworom blong ol elda i givim wok long wan memba blong presidensi blong help blong lidim wok blong tempol mo famli histri insaed long wod. Hem i wok wetem memba blong presidensi blong Rilif Sosaeti we i kasem wok ia, blong i kodinetem ol wok ia.

Memba ia blong kworom presidensi blong ol elda i save mekem rol ia blong lida blong wod tempol mo famli histri wok. Sapos bisoprik i singaotem wan lida blong tempol mo famli histri wok, memba ia blong presidensi i lukluk ova long wok ia blong hem. Luk long 25.2.2.

Wod tempol mo famli histri lida, we maet i wan memba blong kworom presidensi blong ol elda, i lidim ol kodinesen miting blong wok blong tempol mo famli histri (luk long 25.2.7). Ol miting ia, oli holem olgeta oltaem. Mo tu, insaed i gat memba blong presidensi blong Rilif Sosaeti we i kasem wok ia, wan asisten blong kworom blong ol pris, wan memba blong presidensi blong klas blong Ol Yang Woman, mo tempol mo famli histri konsalten.

8.3

Ol Lida blong Kworom blong Ol Elda

8.3.1

Stek Presidensi mo Ol Bisop

Presiden blong kworom blong ol elda bae i ripot i go stret long stek presidensi. Hem i mit wetem wan memba blong presidensi blong kasem daereksen mo ripot long saed blong ol responsabiliti blong hem.

Presiden blong kworom blong ol elda i kasem toktok blong i gaedem hem, we i kam long bisop, we i stap olsem prisaeding ofisa insaed long wod. Oli mit oltaem. Oli toktok raon long ol efot blong olgeta long wok blong God blong fasin blong sevem man mo fasin blong kam olsem wan god, mo oli tokbaot tu seves blong ol givhan brata. Mo tu, oli toktok raon long (1) progres mo ol nid blong ol memba blong wod, mo (2) ol miting blong kworom blong ol elda, ol instraksen mo ol aktiviti.

8.3.2

Hae Kaonsela

Stek presidensi i givim wok long wan hae kaonsela blong ripresentem olgeta long wanwan kworom blong ol elda. Ol responsabiliti blong hem, oli stap long 6.5.

8.3.3

Presidensi blong Kworom blong Ol Elda

8.3.3.1

Stap Singaotem Presidensi blong Kworom blong Ol Elda

Afta we hem i toktok wetem bisop, stek presiden i singaotem wan elda o wan hae pris blong i stap olsem presiden blong kworom blong ol elda.

Sapos yunit i bigwan inaf, presiden blong kworom blong ol elda i givim nem blong wan o tu elda o hae pris, i go long stek presiden, blong hem i singaotem olgeta olsem ol kaonsela blong hem. Presiden blong kworom i mekem hemia afta we hem i toktok wetem bisop. Stek presidensi i tingting long ol nem ia we oli givim i kam. Wan memba blong stek presidensi o hae kaonsel i givim koling ia.

Evri nem blong singaotem ol memba blong ol presidensi blong kworom blong ol elda, i mas gat apruvol blong stek presidensi mo hae kaonsel.

Wan memba blong stek presidensi i presentem ol memba blong presidensi blong kworom blong ol elda long wan sakramen miting blong oli sastenem olgeta. Stek presidensi i save givim wok tu long wan hae kaonsela blong i mekem hemia.

Wan memba blong stek presidensi i presentem ol brata ia we oli singaotem olgeta long ol nara koling blong kworom, blong oli sastenem olgeta long wan miting blong kworom (luk long 8.3.4 mo 8.3.5).

Stek presiden i setem apat presiden blong kworom blong ol elda, mo i givim hem ol ki we i go wetem koling ia. Blong gat moa infomesen long saed blong ol ki ia, luk long 3.4.1. Wan memba blong stek presidensi, o hae kaonsel i setem apat ol kaonsela ia.

8.3.3.2

Ol Responsabiliti

Presiden blong kworom blong ol elda i gat olgeta responsabiliti ia. Ol kaonsela blong hem oli stap helpem hem.

• I stap olsem wan memba blong wod kaonsel. Hem i givim seves olsem (1) wan memba blong kaonsel we i stap help blong lukluk long ol nid insaed long wod, mo blong faenem ol ansa, mo (2) olsem wan ripresentativ blong kworom blong ol elda (luk long 29.2.5).

• Oli lidim ol hadwok blong kworom blong tekpat long wok blong God blong fasin blong sevem man mo hemia blong kam olsem wan god (luk long japta 1).

• I oganaesem mo lukluk ova long seves blong ol givhan brata. I kodinetem ol givhan wok wetem presidensi blong Rilif Sosaeti, mo oli mit wan taem long kwota, o moa. I lukaotem apruvol blong bisop long saed blong ol givhan wok ia. I holem ol givhan intaviu, wan taem long wan kwota, o moa. Luk long japta 21.

• Anda long gaed blong bisop, kaonsel wetem ol adalt memba blong wod (luk long 31.1 mo 31.3). Bisop nomo i givim advaes long ol memba blong wod long saed blong ol mata we i abaot fasin blong stap klin inaf, abius, mo givim raet blong yusum fast ofring mane. Luk long Kaonseling Risos. Blong gat moa infomesen abaot abius, luk long 38.6.2.

• Wetem presidensi blong Rilif Sosaeti, hem i helpem ol efot insaed long wod blong invaetem evriwan blong kasem ol blesing blong gospel (luk long 8.2.3 mo 9.2.3). Hem i lukluk ova long wod misin lida sapos oli singaotem wan i stap.

• Wetem presidensi blong Rilif Sosaeti, hem i help blong lidim wok blong tempol mo famli histri insaed long wod (luk long 8.2.4 mo 9.2.4). Hem i lukluk ova long lida blong wod tempol mo famli histri wok, sapos oli singaotem wan.

• Hem i kodinetem ol efot blong kworom blong ol elda blong mekem ol yang adalt brata oli kam strong moa, tugeta olgeta we oli singgel mo olgeta we oli mared. Oli save givim wok long wan kaonsela blong i givim seves wetem ol yang singgel adalt (luk long 14.1.2.2).

• Hem i mit wetem wanwan memba blong kworom wan taem long wan yia, o moa. Hem i toktok raon long ol diuti blong prishud, mo gudlaef blong memba ia mo famli blong hem.

• Hem i tijim ol memba blong kworom long saed blong prishud diuti blong olgeta (luk long Doktrin mo Ol Kavenan 107:89). Hemia i minim tu blong tijim olgeta olsem wanem blong yusum prishud taem oli stap mekem ol odinens mo ol blesing.

• Helpem ol memba blong kworom blong andastanem paoa, proteksen, daereksen, glad, mo pis we i kam taem oli stap developem wan kavenan rilesensip wetem Papa long Heven mo Jisas Kraes.

• Hem i lukluk ova mo i help blong mekem tijing insaed long kworom i kam gud moa (luk long Japta 17).

• Mekem plan mo lidim ol kworom miting ia.

• Lukluk ova long ol aktiviti blong kworom blong ol elda (luk long 8.2.1.3).

• Helpem ol yang man mo ol fiuja elda blong oli rere blong kasem Melkesedek Prishud (luk long 8.4).

• Hem i lukluk ova long ol rekod blong kworom, ol ripot mo ol faenens (luk long LCR.ChurchofJesusChrist.org). Maet wan sekretari i save help (luk long 8.3.4).

Stek presidensi mo ol memba blong hae kaonsel we oli givim wok long olgeta, oli tijim presidensi blong kworom blong ol elda abaot ol responsabiliti ia. Oli save mekem hemia long taem blong ol stek prishud lidasip miting, ol kworom presidensi miting, o taem oli visitim wanwan wetem ol presiden blong kworom blong ol elda (luk long 29.3.3).

Tru long seves ia, presiden blong kworom blong ol elda i sapotem bisop blong hem i lukluk nomo long ol yut mo long ol responsabiliti we i blong bisop nomo.

8.3.3.3

Presidensi Miting

Presidensi blong kworom blong ol elda mo sekretari oli gat miting evri taem. Presiden i lidim ol miting ia. Hae kaonsela we oli givim wok blong lukaot long kworom ia, oltaem i go long miting ia.

Ajenda ia i save gat olgeta poen ia:

• Mekem plan blong gat sam wei blong mekem ol memba blong kworom oli kam strong moa (mo hemia i tekem tu ol fiuja elda) mo ol famli blong olgeta.

• Mekem plan blong hao blong help blong mekem wok blong God blong fasin blong sevem man mo fasin blong kam olsem wan god, i hapen.

• Kodinetem misinari wok, mo tempol mo famli histri wok.

• Mekem folem ol kaonsel mo ol wok we i kam long bisop mo ol stek lida.

• Mekem ol wok we oli gat blong mekem we i kamaot long ol miting blong wod kaonsel.

• Wetem prea, tingting long ol wok we oli givim long saed blong wok blong givhan.

• Luklukbak long infomesen we i kamaot long ol intaviu blong wok blong givhan. Mekem plan blong faenem wanem mo wea paoa i stap, mo help blong lukluk long ol nid. (luk long japta 21.)

• Lukluk long ol brata blong givim seves long ol koling mo ol wok we oli givimaot.

• Mekem plan blong ol kworom miting mo ol aktiviti.

8.3.4

Sekretari

Wetem raet blong bisop, wan memba blong presidensi blong kworom blong ol elda i save singaotem wan kworom memba blong i stap olsem sekretari blong kworom. Hem i presentem hem blong oli sastenem hem insaed long wan miting blong kworom mo hem i setem hem apat.

Ol responsabiliti blong sekretari, i save gat olgeta ia:

• Rere long ol ajenda blong presidensi miting mo ol miting blong kworom.

• Tekem not long ol miting mo folemap ol wok we oli givimaot.

• Putum taem blong holem ol givhan intaviu (luk long 21.3).

• Rere mo sendem ol kwota ripot blong atendens mo namba blong ol givhan intaviu we oli holem.

• Help blong rere wan yia bajet mo holem wan rekod blong ol mane we oli spendem.

8.3.5

Sam Moa Koling

Ol nara koling ia bae oli save help. Bisop mo presiden blong kworom blong ol elda i toktok raon sapos i nid blong givimaot moa koling o no.

• Ol tija blong kworom blong ol elda i tij long ol Sandei miting blong kworom.

• Wan seves kodineta i help blong mekem plan mo kareaot ol seves long ol pipol we oli stap long nid (luk long 8.2.2.2). Ol asisten mo ol memba blong komiti oli save singaotem olgeta tu long wan koling.

• I gat wan aktiviti kodineta i help blong mekem plan mo kareaot ol aktiviti blong kworom blong ol elda (luk long 8.2.1.3). Ol asisten mo ol memba blong komiti oli save singaotem olgeta tu long wan koling.

• Ol asisten sekretari oli helpem sekretari blong kworom blong ol elda.

• Ol givhan sekretari oli oganaesem ol givhan intaviu mo oli help blong rere ol kwota ripot.

Sapos i nid blong gat ol koling ia mo ol nara koling, presidensi blong kworom oli givim nem blong ol brata blong singaotem blong givim seves. Oli sendem ol nem ia i go long bisoprik. Sapos bisoprik i apruvum, wan memba blong presidensi blong kworom i singaotem olgeta. Hem i presentem olgeta blong oli sastenem olgeta insaed long wan miting blong kworom mo i setem olgeta apat.

Olsem we i nid, presidensi blong kworom blong ol elda i save givim wok long ol brata blong helpem olgeta wetem ol hadwok blong kworom blong ol elda long ol nara wei. Ol brata we oli kasem ol wok blong sot taem, i no nid blong singaotem olgeta mo setem olgeta apat.

8.4

Stap Helpem Ol Fiuja Elda blong Stap Rere blong Kasem Melkesedek Prishud

Wan fiuja elda i wan we i wan man, we i memba blong Jos, we i no kasem Melkesedek Prishud yet, mo (1) hem i gat 19 yia o moa, o (2) i no kasem 19 yia yet mo hem i mared finis.

Blong stap helpem ol fiuja elda ia blong rere blong kasem Melkesedek Prishud i wan long ol fas hae wok blong presidensi blong kworom. Presidensi i givim ol janis long ol fiuja elda ia blong oli givim seves mo oli serem wanem we oli strong long olgeta. Oli mas jusum sam givhan brata we oli givim wok long olgeta nomo blong lukaot long ol fiuja elda ia.

Presidensi blong kworom mo ol givhan brata oli tijim ol fiuja elda ia abaot:

• Strong promes mo kavenan blong prishud (luk long Doktrin mo Ol Kavenan 84:33–44).

• Ol diuti blong wan elda, mo tu, diuti blong givhan (luk long Doktrin mo Ol Kavenan 20:38–45; 42:44; 107:11–12). Ol fiuja elda we oli ol tija o ol pris, oli save givim seves olsem ol givhan brata.

• Ol stamba tingting blong ol odinens mo ol blesing blong prishud, mo olsem wanem blong mekem olgeta odinens ia mo ol blesing ia (luk long japta 18).

• Olsem wanem ol man mo ol woman oli wok tugeta blong mekem wok blong God.

Blong gat moa infomesen abaot ol topik ia, luk long “Melchizedek Priesthood,” “Priesthood,” mo “Women in the Church” (Topics and Questions, topics.ChurchofJesusChrist.org).

Instraksen ia, i save hapen long wanwan, o insaed long wan klas we oli holem aotsaed long ol nomol miting blong Sandei.

Taem we bisop mo stek presiden i talem se wan fiuja elda i rere mo hem i klin inaf, nao oli save odenem hem long Melkesedek Prishud.

8.5

Ol Memba wetem Ol Disabiliti

Presidensi blong kworom blong ol elda bae i givim spesel kea long ol memba we oli gat disabiliti. Blong kasem moa infomesen abaot olsem wanem blong stap helpem ol memba ia, luk long disability.ChurchofJesusChrist.org; luk tu long 38.8.27 insaed long hanbuk ia.