9.

Rilif Sosaeti

9.1

Stamba Tingting mo Oganaesesen

Rilif Sosaeti i helpem ol pikinini blong God blong rere blong gobak stap wetem Hem, long ples blong Hem. Olsem ol gel blong papa mo mama long heven, ol memba blong Rilif Sosaeti oli “eksplenem ol skripja,” oli “askem strong long jos” blong mekem samting, oli leftemap hat blong man, mo oli “ holemtaet ol kavenan” we oli bin mekem. (Doktrin mo Ol Kavenan 25:7, 13).

9.1.1

Stamba Tingting

Rilif Sosaeti i wan tabu oganaesesen we oli stanemap blong evri adalt woman insaed long Jos. Profet Josef Smit i bin tijim se stamba tingting blong Rilif Sosaeti hem i blong sevem ol sol mo help long taem blong safaring. Hem i talem se Jos Ia blong Jisas Kraes i no bin oganaes fulwan kasem taem we oli oganaesem ol sista.

Ol memba blong Rilif Sosaeti oli wok tugeta blong help blong mekem wok blong God blong fasin blong sevem man mo fasin blong kam olsem wan god, i hapen. Oli givim seves long ol narafala man, oli mekem ol kavenan responsabiliti blong olgeta, oli bildimap yuniti, mo oli lanem mo stap laef folem doktrin.

Moto blong Rilif Sosaeti hem i “Bigfala lav i neva sot” (1 Korin 13:8). Moto ia i kamaot long sil blong Rilif Sosaeti.

9.1.2

Membasip Insaed long Rilif Sosaeti

Rilif Sosaeti i wan laeftaem ples blong stap olsem sista. Evri adalt sista, we oli gat 18 yia i go antap, oli memba blong Rilif Sosaeti. Oli ol memba iven taem we oli no save go long ol Rilif Sosaeti miting.

Wan yang woman i save kam long Rilif Sosaeti taem hem i kasem 18 yia. Hem i kaonsel o toktok wetem papa mo mama blong hem, mo wetem bisop abaot stret taem blong muv. Taem yang woman ia i kasem 19 yia, o bifo hem i aot long hom blong go long yunivesiti o go long wan misin, hem i sapos blong tekpat long Rilif Sosaeti.

Ol mared woman we oli no kasem 18 yia yet, olgeta tu, oli ol memba blong Rilif Sosaeti.

Blong gat moa infomesen abaot ol mama we oli gat pikinini be oli no mared mo oli no kasem 18 yia yet, luk long 38.1.5.

9.1.3

Stretem Samting Folem Ol Lokol Nid

Samfala wod, oli gat bigfala namba blong ol adalt woman. Long ol wod ia, bisop mo stek presiden i save givim raet blong oli gat moa long wan Rilif Sosaeti insaed long wan wod. Wanwan Rilif Sosaeti i gat presidensi blong hem. Sapos i posibol, wanwan Rilif Sosaeti i gat ol memba we yia mo eksperiens blong olgeta oli defdefren.

9.2

Stap Tekpat long Wok blong God blong Fasin blong Sevem Man mo Fasin blong Kam Olsem Wan God

God i stap invaetem evriwan blong oli go long Kraes mo tekpat insaed long wok blong Hem blong fasin blong sevem man mo fasin blong kam olsem wan god taem:

• Yumi stap laef folem gospel blong Jisas Kraes.

• Yumi stap kea long olgeta we oli stap long nid.

• Yumi stap invaetem evriwan blong akseptem gospel.

• Yumi stap joenem ol famli blong taem we i no save finis.

Ol lida blong Rilif Sosaeti, oli mekem plan blong holem ol Sandei miting, ol aktiviti, ol givhan wok, seves, mo ol nara wok ia blong helpem ol woman blong tekpat long wok blong God blong fasin blong sevem man mo fasin blong kam olsem wan god. Ol memba blong Rilif Sosaeti mo kworom blong ol elda, oli joen wan blong help blong mekem wok ia i hapen.

Blong gat moa infomesen abaot wok blong God blong fasin blong sevem man mo mekem oli kam olsem wan god, stadi long japta 1

9.2.1

Stap Laef Folem Gospel blong Jisas Kraes

Ol lida blong Rilif Sosaeti oli sapotem ol memba blong stap laef folem gospel blong Jisas Kraes. Oli tokbaot plante fasin blong praktisim fet, stap sakem sin, kam moa indipenden long laef, mo stap mekem ol kavenan wetem God taem oli kasem ol odinens. Ol odinens olsem, i tekem tu, tempol endaomen. Luk long 1.2.1.

9.2.1.1

Stap Leftemap Tingting blong Lanem Samting long Hom

Taem we ol memba oli stap lanem mo stap laef folem gospel long hom, jenis blong olgeta long Papa long Heven mo Jisas Kraes, i kam dip moa. Ol lida blong Rilif Sosaeti oli leftemap tingting blong ol sista blong oli stadi long ol skripja mo ol toktok blong ol profet we oli stap laef; oli mekem hemia olgetawan, mo wetem ol famli blong olgeta. Kam Folem Mi mo ol nara risos oli save givim moa help long stadi blong olgeta.

Ol haos naet oli wan impoten rod blong lanem gospel insaed long hom. Plante taem, oli stap holem olgeta evri wik long Sandei, Mandei naet, o long wan nara taem. Oli sapos blong gat ol prea, ol stadi long gospel, ol testemoni, ol singsing mo ol gudfala aktiviti.

9.2.1.2

Stap Lanem Gospel Insaed long Ol Miting blong Rilif Sosaeti

Ol Rilif Sosaeti oli mit long ol Sandei from olgeta stamba tingting ia:

• Mekem fet i kam strong moa.

• Bildimap yuniti.

• Mekem ol famli mo hom oli kam strong moa.

• Kodinetem wok blong helpem God long wok blong Hem blong fasin blong sevem man mo fasin blong kam olsem wan god insaed long wod.

Ol miting, oli holem olgeta long nambatu mo nambafo Sandei blong wanwan manis. Oli blong 50 minit. Presidensi blong Rilif Sosaeti i mekem plan blong ol miting ia. Wan memba blong presidensi i lidim.

Miting i stat wetem prea. Afta wan memba blong presidensi bae i lidim ol sista blong oli kaonsel tugeta blong faef kasem ten minit, abaot ol jalenj, ol nid, mo ol janis. Blong stap lukluk moa long Sevya long taem blong kaonsel ia, bae i helpem ol sista blong bildimap ol testemoni, kasem ol tempol odinens, kipim ol kavenan, mo bildimap fasin blong stap olsem wan disaepol. Rilif Sosaeti presidensi i jusum ol topik we bae oli kaonsel long hem folem ol nid blong ol sista.

Afta long hemia, oli mas givim inaf taem blong givim instraksen mo toktok raon long gospel long wan wei we i gat mining. Oli mas lukluk moa long ol topik blong wan o moa toktok blong jeneral konfrens we i jes pas. Rilif Sosaeti presidensi i prea mo jusum ol mesej blong konfrens blong ol sista oli toktok raon long hem. Oli mekem ol seleksen ia folem ol nid blong ol sista.

Oli save singsing ol hym blong sapotem wan lesen.

Ol miting oli mas en wetem wan prea.

Rilif Sosaeti mo kworom blong ol elda i save kombaen wanwan taem blong wan Sandei lesen. Bisoprik mo presidensi blong Rilif Sosaeti mo kworom blong ol elda, i kodinetem ol miting ia.

Blong kasem sam moa infomesen, luk long “To Sit in Council.”

9.2.1.3

Ol Aktiviti

Ol presidensi blong Rilif Sosaeti oli mekem plan blong holem sam aktiviti. Presiden i lukluk ova long ol aktiviti. Hem i save askem wan kaonsela, o wan nara sista blong oli tekem step blong mekem plan mo mekem ol aktiviti ia oli hapen (luk long 9.3.4). Ol presidensi oli toktok raon long ol aktiviti wetem bisop olsem pat blong planing blong olgeta.

Ol aktiviti oli sapos blong mekem ol tingting blong hat blong ol sista, i kam moa strong blong mekem mo kipim ol kavenan mo givim ol janis long olgeta blong kam tugeta mo givim seves tugeta. Ol aktiviti oli sapos blong help blong winim ol stamba tingting blong Rilif Sosaeti (luk long 9.1 mo 9.1.1). Blong kasem moa infomesen abaot ol Rilif Sosaeti aktiviti, luk long 6.7.1.

9.2.2

Stap Kea long Olgeta long Nid

Olsem ol man we i folem Jisas Kraes, ol sista oli gat responsabiliti blong go aot luk ol memba wetem lav long olgeta we oli stap long nid. Wanwan mo olsem wan Rilif Sosaeti, oli lukaot blong givim seves long ol narawan insaed long wod mo komuniti. Long ples we i gat, JustServe.org i givim sam janis blong mekem komuniti seves.

Blong kasem moa infomesen long wei we ol memba blong Rilif Sosaeti mo kworom blong ol elda oli kea long olgeta we oli stap long nid, luk long 22.6.2.

9.2.2.1

Wok blong Givhan

Wok blong givhan i blong stap kea long ol narafala man olsem we Sevya bae i mekem. Ol sista oli kasem ol givhan wok ia tru long Rilif Sosaeti presidensi. Blong kasem moa infomesen, luk long japta 21.

9.2.2.2

Sot Taem Nid

Ol givhan sista oli lukaotem blong oli andastanem gud, mo oli givim ansa long ol nid blong olgeta we oli givim seves long olgeta. Sam memba, maet oli nidim help blong sot taem, olsem long taem blong sik, taem pikinini i bon i kam long wol ia, long taem blong ded, blong wan i lusum wok, mo ol nara situesen.

Taem we i nid, ol givhan sista oli askem presidensi blong Rilif Sosaeti blong oli help. Presidensi blong Rilif Sosaeti i save askem blong oli singaotem wan seves kodineta blong hem i oganaesem ol gudfala hadwok ia (luk long 9.3.4).

Rilif Sosaeti mo kworom blong ol elda, oli kodinetem ol hadwok blong lukluk long ol nid we oli blong sot taem (luk long 22.3.2). Bisop i save givim help wetem fas ofring sapos i nid.

Long sam ples, ol bisop oli gat joes ia blong givim, long ol memba we oli gat nid, wan oda fom blong bisop, blong oli save go karem kaekae mo ol nara besik samting. Plante taem, bisop i givim wok long presiden blong Rilif Sosaeti, blong hem i mas mit wetem ol memba mo fulumap wan oda fom. Be, hem i lukluk tu blong givim wok long presiden blong kworom blong ol elda. Oli save givim wok long wan kaonsela insaed long Rilif Sosaeti, mo insaed long presidensi blong kworom blong ol elda, sapos presiden i no stap. Lida we i kasem wok ia, i sendem fom we oli komplitim i go long bisop blong hem i apruvum.

Blong kasem moa infomesen, luk long 22.6.2 mo “Welfea Risos” insaed long Ol Risos blong Ol Lida mo Klak.

9.2.2.3

Ol Longtaem Nid mo Fasin blong Indipenden Laef

Anda long daereksen blong bisop, ol presidensi blong Rilif Sosaeti mo olgeta blong kworom blong ol elda oli helpem ol memba we oli gat ol longtaem nid, mo ol nid blong oli stap dipen long olgetawan. Oli tijim ol prinsipol blong fasin blong gat indipenden laef long saed blong laef long wol ia, mo tu long saed blong spirit. Luk long japta 22 mo “Indipenden Laef” insaed long Gospel Laebri Ap.

Sapos wan man o woman, o famli i nidim help, ol presiden blong Rilif Sosaeti mo kworom blong ol elda oli toktok tugeta anda long daereksen blong bisop abaot wei blong help (luk long 22.4).

Presiden blong Rilif Sosaeti, mo hemia blong kworom blong ol elda, o wan nara lida i helpem man, woman o famli ia blong mekem wan Plan blong Indipenden Laef. Ol givhan sista o brata oli save help tu wetem plan ia. Plante taem, ol nara memba blong Rilif Sosaeti o kworom blong ol elda oli gat ol skil ia, o oli gat eksperiens ia we i save help. Evriwan we oli help, oli mas holemtaet infomesen i konfidensiol i stap. Blong moa infomesen, luk long 22.3.3 mo 22.8.

9.2.2.4

Taem Wan Memba blong Wod I Ded

Taem wan memba blong wod i ded, ol presidensi blong Rilif Sosaeti mo hemia blong kworom blong ol elda oli givim kamfot mo help. Anda long gaed blong bisop, oli save help wetem fenerol.

Sapos i posibol, ol man o ol woman ia we oli bin endao finis, oli save putum ol tempol klos long olgeta blong haedem bodi blong olgeta, o blong bonem bodi blong olgeta. Bodi blong wan woman, bae hasban blong hem i save putum klos blong hem, o wan memba blong famli we i wan woman mo i endao i save putum klos long hem. Sapos i no gat wan memba blong famli i stap, o bae i no wantem blong dresemap bodi blong wan woman we i endao, nao bisop i askem presiden blong Rilif Sosaeti blong i invaetem wan woman we i endao blong i dresemap bodi ia, o i lukluk se oli dresemap hem i stret. Blong kasem moa infomesen, luk long 38.5.10.

Ol presidensi blong Rilif Sosaeti mo hemia blong kworom blong ol elda, ol givhan brata mo sista, mo ol narawan, oli gohed blong givim kamfot mo help afta long fenerol.

9.2.3

Stap Invaetem Evriwan blong Akseptem Gospel

Ol memba blong Rilif Sosaeti oli gat wan responsabiliti blong invaetem evriwan blong kasem olgeta blesing blong gospel blong Jisas Kraes (luk long Mosaea 18:9). Oli mekem hemia taem oli serem gospel, taem oli mekem ol niu memba oli kam strong moa, mo taem oli go luk mo toktok wetem olgeta we oli lesaktiv. Luk long 23.2 mo 23.3.

Insaed long miting blong presidensi mo hemia blong Rilif Sosaeti, presidensi blong Rilif Sosaeti i toktok raon long ol wei we ol sista oli save invaetem evriwan blong kasem ol blesing blong gospel. Luk long 23.1.1, 23.1.2, mo 23.1.3.

Presiden blong Rilif Sosaeti i givim wok long wan memba blong presidensi blong help blong lidim ol wok blong serem gospel insaed long wod. Hem i wok wetem memba blong presidensi blong kworom blong ol elda we i kasem wok ia blong oli kodinetem ol wok ia (luk long 23.6.2).

Memba blong presidensi blong Rilif Sosaeti we oli givim wok ia long hem, i tekpat long ol kodinesen miting evri wik blong kodinetem wok blong stap invaetem evriwan blong kasem ol blesing blong gospel. Wod misin lida, we maet i wan memba blong kworom presidensi blong ol elda, i lidim ol miting ia. Ol wod misinari, wan asisten long kworom blong ol pris, wan presidensi memba blong klas blong Ol Yang Woman we oli moa olfala, mo ol fultaem misinari oli kam long ol miting ia. Luk long 23.4.

9.2.4

Stap Joenem Ol Famli blong Taem we I No Save Finis

Olgeta we oli ol memba blong Rilif Sosaeti oli sapotem ol memba long wok ia blong yunaetem ol famli blong taem we i no save finis. Hemia i tekem tu:

• Blong stap mekem ol kavenan wetem God taem yumi kasem ol odinens we i tekem tu, tempol endaomen.

• Blong stap mekem tempol mo famli histri wok (luk long 1.2.4).

Insaed long miting blong presidensi mo Rilif Sosaeti, presidensi blong Rilif Sosaeti i toktok raon long ol wei we ol sista oli save tekpat long ol efot ia. Ol presidensi memba oli mekem ol plan tu long ol wei blong helpem ol memba blong mekem andastaning blong olgeta i kam moa bigwan, mo hat blong olgeta we i wantem blong kasem ol tabu odinens mo mekem ol kavenan wetem God insaed long tempol. Oli leftemap tingting blong ol sista blong wosip insaed , plante taem olsem we i posibol.

Presidensi i leftemap tingting blong ol sista blong oli lan abaot famli histri blong olgeta. Oli helpem ol niu memba mo ol memba we oli stap kambak bakegen long Jos, ol niu memba blong Rilif Sosaeti, mo ol niu misinari we oli jes singaotem olgeta, blong oli faenem mo rere long ol nem blong ol bubu we oli ded finis, blong save mekem ol tempol odinens blong olgeta.

Presiden blong Rilif Sosaeti i givim wok long wan memba blong presidensi blong help blong lidim wok blong tempol mo famli histri insaed long wod. Hem i wok wetem memba blong presidensi blong kworom blong ol elda we i kasem wok ia blong oli kodinetem ol wok ia (luk long 25.2.2).

Memba blong presidensi blong Rilif Sosaeti we i kasem wok ia, i tekpat long ol kodinesen miting blong kodinetem wok blong tempol mo famli histri. Ol miting ia, oli holem olgeta oltaem. Wod tempol mo famli histri lida, we maet i wan memba blong kworom presidensi blong ol elda, i lidim ol kodinesen miting blong wok blong tempol mo famli histri (luk long 25.2.7). Insaed, i gat tu wan asisten blong kworom blong ol pris, wan memba blong presidensi blong klas blong Ol Yang Woman (klas blong olgeta we oli moa olfala), mo tempol mo famli histri konsalten.

9.3

Ol Lida blong Rilif Sosaeti

9.3.1

Bisop

Bisop i mit wetem Rilif Sosaeti presiden wan taem long wan manis. Oli toktok raon long wok blong God blong fasin blong sevem man, mo fasin blong kam olsem wan god, mo tu, oli toktok raon long seves blong ol givhan sista. Oli toktok tu raon long (1) progres mo ol nid blong ol sista insaed long wod, mo (2) ol miting, ol instraksen mo ol aktiviti blong Rilif Sosaeti.

9.3.2

Rilif Sosaeti Presidensi

9.3.2.1

Stap Singaotem wan Rilif Sosaeti Presidensi

Bisop i singaotem wan adalt woman blong givim seves olsem presiden blong Rilif Sosaeti. Sapos yunit i bigwan inaf, presiden blong Rilif Sosaeti i save givim nem blong wan o tu adalt woman i go long bisoprik blong oli stap olsem ol kaonsela blong hem. Bisoprik i save tingting long ol nem ia, mo oli save givimaot ol koling.

Wan memba blong bisoprik i presentem ol memba blong presidensi long wan sakramen miting blong oli sastenem. Bisop i setem apat presiden blong Rilif Sosaeti. Eni memba blong bisoprik i save setem apat ol kaonsela blong hem.

Sam yunit we oli smol, maet bae oli no gat wan presiden blong Ol Yang Woman o Praemeri. Long ol yunit ia, presiden blong Rilif Sosaeti i save helpem ol papa mo mama blong oli mekem plan blong instraksen blong ol yut mo ol pikinini.

9.3.2.2

Ol Responsabiliti

Rilif Sosaeti presiden i gat olgeta responsabiliti ia. Ol kaonsela blong hem oli stap helpem hem.

• I stap olsem wan memba blong wod kaonsel. Hem i givim seves olsem (1) wan memba blong kaonsel we i stap help blong lukluk long ol nid insaed long wod, mo blong faenem ol ansa, mo (2) olsem wan ripresentativ blong Rilif Sosaeti (luk long 29.2.5).

• Hem i lidim ol hadwok blong Rilif Sosaeti blong tekpat long wok blong God blong fasin blong sevem man mo hemia blong kam olsem wan god (luk long japta 1).

• Hem i oganaesem mo lukluk ova long seves blong ol givhan sista. Hem i kodinetem ol givhan wok wetem presidensi blong kworom blong ol elda, mo oli mit wan taem long kwota, o moa. I lukaotem apruvol blong bisop long saed blong ol givhan wok ia. I holem ol givhan intaviu, wan taem long wan kwota, o moa. Luk long japta 21.

• Anda long gaed blong bisop, kaonsel wetem ol adalt memba blong wod (luk long 31.1 mo 31.3). Bisop nomo i givim advaes long ol memba blong wod long saed blong ol mata we i abaot fasin blong stap klin inaf, abius, mo givim raet blong yusum fast ofring mane. Luk long Kaonseling Risos. Blong gat moa infomesen abaot abius, luk long 38.6.2.

• Wetem presidensi blong kworom blong ol elda, hem i helpem ol efot insaed long wod blong invaetem evriwan blong kasem ol blesing blong gospel (luk long 8.2.3 mo 9.2.3).

• Wetem presidensi blong kworom blong ol elda, hem i help blong lidim wok blong tempol mo famli histri insaed long wod (luk long 8.2.4 mo 9.2.4).

• Hem i kodinetem ol efot blong Rilif Sosaeti blong mekem ol yang adalt sista insaed long wod oli kam strong moa, tugeta, olgeta we oli singgel mo olgeta we oli mared. Oli save givim wok long wan kaonsela blong i givim seves wetem ol yang singgel adalt (luk long 14.1.2.2).

• Hem i mit wetem wanwan long ol memba blong Rilif Sosaeti wan taem long wan yia, o moa. Hem i toktok raon long gudlaef blong sista ia mo famli blong hem.

• Tijim ol sista abaot ol kavenan responsabiliti mo blesing blong olgeta, we i tekem tu ol blesing we i kam long prishud paoa blong God (luk long 3.5 mo 3.6). Helpem ol sista blong andastanem paoa, proteksen, daereksen, glad, mo pis we i kam taem oli stap developem wan kavenan rilesensip wetem Papa long Heven mo Jisas Kraes.

• Hem i lukluk ova mo i help blong mekem tijing insaed long Rilif Sosaeti i kam gud moa (luk long japta 17).

• Hem i mekem ol plan mo i lidim ol Rilif Sosaeti miting.

• Hem i lukluk ova long ol aktiviti blong Rilif Sosaeti (luk long 9.2.1.3).

• Hem i helpem ol yang woman blong stap rere blong tekpat long Rilif Sosaeti (luk long 9.4).

• Hem i lukluk ova long ol rekod blong Rilif Sosaeti, mo ol ripot mo ol faenens (luk long LCR.ChurchofJesusChrist.org). Maet wan sekretari i save help (luk long 9.3.3).

Presiden blong stek Rilif Sosaeti i tijim wod Rilif Sosaeti abaot ol responsabiliti ia. Oli save mekem hemia long taem blong stek lidasip miting, ol wod Rilif Sosaeti Presidensi miting, mo taem oli visitim wanwan wetem ol Rilif Sosaeti presiden (luk long 29.3.4).

Tru long seves blong hem, presiden blong Rilif Sosaeti i sapotem bisop blong hem blong i lukluk nomo long ol yut mo long ol responsabiliti we i blong bisop nomo.

9.3.2.3

Presidensi Miting

Presidensi blong Rilif Sosaeti mo sekretari oli gat miting evri taem. Presiden i lidim ol miting ia. Ajenda ia i save gat olgeta poen ia:

• Mekem ol plan blong wok long sam wei blong mekem ol sista mo famli blong olgeta oli kam strong moa.

• Mekem plan blong hao blong help blong mekem wok blong God blong fasin blong sevem man mo fasin blong kam olsem wan god.

• Kodinetem misinari wok, mo tempol mo famli histri wok.

• Mekem folem ol advaes mo ol wok we i kam long bisop.

• Mekem ol wok we oli gat blong mekem we i kamaot long ol miting blong wod kaonsel.

• Wetem prea, tingting long ol wok we oli givim long saed blong wok blong givhan.

• Luklukbak long infomesen we i kamaot long ol intaviu blong wok blong givhan. Mekem plan blong faenem wanem mo wea paoa i stap, mo help blong lukluk long ol nid. (luk long japta 21.)

• Lukluk long ol sista blong givim seves long ol Rilif Sosaeti koling mo ol wok we oli givimaot.

• Mekem plan blong ol Rilif Sosaeti miting mo aktiviti.

9.3.3

Sekretari

Presidensi blong Rilif Sosaeti i save givim nem blong wan sista blong givim seves olsem Rilif Sosaeti sekretari. Wan memba blong bisoprik i singaotem hem, i presentem hem blong oli sastenem hem long sakramen miting, mo i setem hem apat.

Ol responsabiliti blong sekretari, i save gat olgeta ia:

• Rere long ol ajenda blong presidensi miting mo ol miting blong Rilif Sosaeti.

• Tekem not long ol miting mo folemap ol wok we oli givimaot.

• Putum taem blong holem ol givhan intaviu (luk long 21.3).

• Rere mo sendem ol kwota ripot blong atendens mo namba blong ol givhan intaviu we oli holem.

• Help blong rere wan yia bajet mo holem wan rekod blong ol mane we oli spendem.

9.3.4

Sam Moa Koling

Ol nara koling ia bae oli save help. Bisop mo presiden blong Rilif Sosaeti i toktok raon sapos i nid blong givimaot moa koling o no.

• Ol tija blong Rilif Sosaeti oli tij long ol Sandei miting.

• Wan seves kodineta i help blong mekem plan mo i mekem ol seves long ol pipol we oli stap long nid oli hapen (luk long 9.2.2.2). Ol asisten mo ol memba blong komiti oli save singaotem olgeta tu long wan koling.

• I gat wan aktiviti kodineta i help blong mekem plan mo mekem ol aktiviti blong Rilif Sosaeti oli hapen (luk long 9.2.1.3). Ol asisten mo ol memba blong komiti oli save singaotem olgeta tu long wan koling.

• Ol asisten sekretari oli helpem sekretari blong Rilif Sosaeti.

• Ol givhan sekretari oli oganaesem ol givhan intaviu mo oli help blong rere ol kwota ripot.

Sapos i nid blong gat ol koling ia mo ol nara koling, presidensi blong Rilif Sosaeti i givim nem blong ol sista blong singaotem olgeta blong givim seves. Oli sendem ol nem ia i go long bisoprik. Sapos bisoprik i apruvum, wan memba blong presidensi blong bisoprik i singaotem olgeta. Hem i presentem olgeta blong oli sastenem olgeta insaed long sakramen miting mo i setem olgeta apat.

Olsem we i nid, presidensi blong Rilif Sosaeti i save givim wok long ol sista blong helpem olgeta wetem ol hadwok blong Rilif Sosaeti long ol nara wei. Ol sista we oli kasem ol wok blong mekem blong sot taem, oli no nidim blong oli singaotem mo setem olgeta apat.

9.4

Stap Helpem Ol Yang Woman blong Stap Rere blong Joenem Rilif Sosaeti

Rilif Sosaeti presidensi i wok wetem ol yang woman, ol papa mo mama blong olgeta, mo ol lida blong Ol Yang Woman blong helpem ol yang woman blong oli rere blong tekpat long Rilif Sosaeti.

Ol lida ia oli givim ol janis oltaem blong ol yang woman mo ol sista blong Rilif Sosaeti oli stap developem ol rilesensip. Blong stap givim seves olsem ol givhan sista, i wan gudfala wei blong joen wetem ol narawan.

Ol lida oli helpem ol yang woman blong oli andastanem kavenan responsabiliti blong olgeta. Taem bae i help blong gat wan yang woman i givhan long wan sista, oli save givim wok long hem olsem wan givhan sista taem we yang woman ia i glad blong mekem, i save mekem, mo i raep inaf long tingting. Oli save givim wok long hem stat long yia ia we hem i gat 14 yia. Ol yang woman oli stap olsem ol kompanion blong ol Rilif Sosaeti sista (luk long 21.2.2).

Taem we ol yang adalt oli joenem Rilif Sosaeti, presidensi blong Rilif Sosaeti i givim olgeta ol janis blong givim seves mo serem ol samting we oli strong long olgeta. Presidensi ia i helpem olgeta tu blong rere blong mekem mo kipim ol tabu tempol kavenan (luk long 27.1.1).

9.5

Ol Stek Lida blong Rilif Sosaeti

Stek presiden i singaotem mo i setem apat wan sista blong i givim seves olsem presiden blong Rilif Sosaeti. Sapos wan stek i bigwan inaf, presiden blong Rilif Sosaeti i givim nem blong wan o tu adalt woman, blong oli singaotem olsem ol kaonsela blong hem, mo wan narawan blong i stap olsem sekretari. Ol woman ia, oli singaotem olgeta mo oli setem apat olgeta tru long wan memba blong stek presidensi o wan hae kaonsela we i kasem wok ia. Blong kasem infomesen abaot ol responsabiliti blong stek Rilif Sosaeti presidensi mo sekretari, luk long 6.7.1 mo 6.7.3.

Stek presiden i save mit oltaem (wan taem long manis) wetem stek Rilif Sosaeti presiden o presidensi. Oli kaonsel tugeta abaot wok blong God blong fasin blong sevem man mo fasin blong kam olsem wan god. Oli toktok raon tu long (1) progres mo nid blong ol sista insaed long stek, mo (2) ol Rilif Sosaeti miting, instraksen mo ol aktiviti.

Stek Rilif Sosaeti presidensi i givim instraksen long ol presidensi blong Rilif Sosaeti abaot responsabiliti blong olgeta long saed blong givhan, misinari wok mo tempol mo famli histri wok. Oli mekem hemia anda long daereksen blong stek presidensi. Ol hae kaonsela we oli kasem wok blong stap helpem olgeta. Luk long 23.1 mo 25.2.

Sapos stek i gat wan yang singgel adalt komiti, wan memba blong Rilif Sosaeti presidensi i stap insaed long komiti ia. Hemia i tru semmak sapos stek i gat wan stek singgel adalt komiti. (Luk long 14.1.1.2.)

9.6

Sam Moa Gaedlaen mo Polisi

9.6.1

Ol Memba wetem Ol Disabiliti

Presidensi blong Rilif Sosaeti i givim spesel kea long ol memba we oli gat disabiliti. Blong kasem moa infomesen abaot olsem wanem blong stap helpem ol memba ia, luk long disability.ChurchofJesusChrist.org; luk tu long 38.8.27 insaed long hanbuk ia.

9.6.2

Litresi

Olsem we i nid, presidensi blong Rilif Sosaeti i wok wetem bisop, presidensi blong kworom blong ol elda, mo wod kaonsel blong helpem ol memba blong lan blong rid mo raet.