“9. Aualofa,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2024).
“9. Aualofa,” Tusitaulima Aoao.
Ata
o ni tamaitai o loo suesue i tusitusiga paia
9.
Aualofa
9.1
Faamoemoega ma le Faatulagaga
O le Aualofa e fesoasoani i fanau a le Atua e sauniuni ai e toe foi atu i Lona afio’aga. I le avea ai ma afafine o ni matua faalelagi, e “faamalamalama atu e [sui auai o le Aualofa] ia tusitusiga paia,” “apoapoai atu i le ekalesia,” e “sii a’e i luga loto, ma “pipii i feagaiga [latou te] osia” (Mataupu Faavae ma Feagaiga 25:7, 13).
9.1.1
Faamoemoega
O le Aualofa o se faalapotopotoga na faatuina faalelagi mo tamaitai matutua uma i le Ekalesia. Na aoao mai e le Perofeta o Iosefa Samita e faapea, o le faamoemoega o le Aualofa o le lavea’i o agaga ma faamāmā i mafatiaga. Na ia ta’ua e faapea sa le’i atoa le faatulagaina o le Ekalesia a Iesu Keriso se’ia oo ina ua faatulagaina ia tuafafine.
E galulue faatasi sui auai o le Aualofa e fesoasoani e faataunuu le galuega a le Atua mo le faaolataga ma le faaeaga. Latou te auauna atu i isi, faataunuu ia tiutetauave o le feagaiga, fausia le lotogatasi, ma a’oa’o ma ola i a’oa’oga faavae.
O le mau tau’ave a le Aualofa o le “E le uma le alofa” (1 Korinito 13:8). O loo atagia mai lenei mau tau’ave i le faamaufaailoga a le Aualofa.
Ata
Faamaufaailoga a le Aualofa
9.1.2
Avea ma Tagata Auai i le Aualofa
O le Aualofa o se usoga mo le olaga atoa. O tuafafine matutua uma ua ta’i 18 tausaga ma matutua atu, o sui auai o le Aualofa. O i latou o sui auai tusa lava pe le mafai ona latou auai mai i fonotaga a le Aualofa.
E mafai ona amata auai atu se tamaitai talavou i le Aualofa pe a atoa lona 18. E talanoa o ia ma ona matua ma le epikopo e uiga i le taimi e auai ai. E oo atu i le 19 tausaga pe o le a tuua foi le aiga, e pei o le alu i se iunivesite pe auauna atu i se misiona, e ao ona auai o ia i le Aualofa.
O tamaitai e i lalo o le 18 tausaga a ua faaipoipo, o ni sui auai foi ia o le Aualofa.
Mo faamatalaga e uiga i matua e le’i faaipoipo e i lalo o le 18 tausaga, tagai i le 38.1.5.
O nisi uarota e toatele na’ua le aofai o tamaitai matutua e malolosi. O uarota nei, e mafai e le epikopo ma le peresitene o le siteki ona faataga le faia o ni Aualofa e sili atu ma le tasi. E tofu le Aualofa ma lona lava au peresitene. Afai e mafai, e tatau i Aualofa taitasi ona i ai ni sui auai e eseese tausaga o le matutua ma poto masani.
9.2
Auai i le Faatinoina o le Galuega a le Atua mo le Faaolataga ma le Faaeaga
Ua valaaulia e le Atua tagata uma e o mai ia Keriso ma auai i le faatinoina o Lana galuega mo le faaolataga ma le faaeaga e ala i le:
Ola i le talalelei a Iesu Keriso.
Tausiga o i latou e le tagolima.
Valaaulia tagata uma ia talia le talalelei.
Tuufaatasia o aiga mo le faavavau.
E fuafua e taitai o le Aualofa ia fonotaga o le Aso Sa, gaoioiga, auaunaga, galuega fesoasoani, ma isi fegalegaleaiga e fesoasoani ai i tamaitai ia auai i le faatinoga o le galuega a le Atua mo le faaolataga ma le faaeaga. E galulue faatasi sui auai o le Aualofa ma le korama a toeaina i le lotogatasi e fesoasoani e faataunuu lenei galuega.
Mo nisi faamatalaga e uiga i le galuega a le Atua mo le faaolataga ma le faaeaga, suesue le mataupu 1.
9.2.1
Ola i le Talalelei a Iesu Keriso
E lagolagoina e taitai o le Aualofa ia tagata ia ola i le talalelei a Iesu Keriso. Latou te faamamafa atu le faaaogaina o le faatuatua, salamo, faateleina o le ola-tutoatasi, ma le osia o feagaiga ma le Atua e ala i le mauaina o sauniga. O na sauniga e aofia ai faaeega paia o le malumalu. Tagai i le 1.2.1.
9.2.1.1
Aoaoina o le Talalelei i le Aiga
Pe a oo ina a’oa’o e tagata o le au paia le talalelei ma ola ai i le aiga, e loloto lo latou liua i le Tama Faalelagi ma Iesu Keriso. E faamalosiau e taitai o le Aualofa le usoga ia suesue e le tagata lava ia faapea ma o latou aiga ia tusitusiga paia ma upu a perofeta soifua. O le Sau, Mulimuli Mai ia te A’u ma isi punaoa e mafai ona faaopoopo ia latou suesuega.
O afiafi faaleaiga o se auala taua lea e a’oa’o ai le talalelei i le aiga. E masani ona faia faalevaiaso i Aso Sa, o afiafi o Aso Gafua, po o se isi taimi. E mafai ona aofia ai tatalo, suesuega o le talalelei, molimau, pesepesega, ma gaoioiga malie.
9.2.1.2
Aoaoina o le Talalelei i Fonotaga a le Aualofa
E potopoto Aualofa i Aso Sa mo faamoemoega nei:
Faamalolosia le faatuatua.
Fausia le lotogatasi.
Faamalolosia aiga ma auaiga.
Faamaopoopo taumafaiga e fesoasoani ai i le Atua i Lana galuega o le faaolataga ma le faaeaga i le uarota.
O sauniga e faia i Aso Sa lona lua ma le lona fa o le masina. E 50 minute le umi. O le au peresitene o le Aualofa e fuafuaina nei sauniga. O se tasi o le au peresitene e taitai.
E amata le sauniga i le tatalo. Ona taitai lea e se sui o le au peresitene ia tuafafine i le fefautuaai faatasi mo le lima i le sefulu minute e uiga i luitau talafeagai, manaoga, ma avanoa. O le taulai atu i le Faaola i lenei fautuaga o le a fesoasoani i tuafafine e fausia ai molimau, maua sauniga o le malumalu, tausia feagaiga, ma faateleina ai lo latou avea ma soo. E filifili e le au peresitene o le Aualofa ia autu e fefautuaai ai e tusa ai ma manaoga o tuafafine.
Ona tuu atu lea o se taimi ia lava mo se a’oa’oga anoa ma talatalanoaga o le talalelei. E ao ona i ai le taulaiga i autu mai se lauga se tasi pe sili atu foi mai le konafesi aoao aupito lata mai. E filifili ma le agaga tatalo e le au peresitene o le Aualofa ia savali o le konafesi mo tuafafine e talanoaina. Latou te faia nei filifiliga e faavae i manaoga o tuafafine.
E mafai ona lagiina viiga e faalautele ai se lesona.
E ao ona faai’u ia fonotaga i se tatalo.
E mafai ona tuufaatasia le Aualofa ma le korama a toeaina i nisi taimi mo se lesona i le Aso Sa. O nei fonotaga e faamaopoopoina e le au epikopo ma au peresitene o le Aualofa ma korama a toeaina.
O au peresitene o le Aualofa e mafai ona fuafuaina ia gaoioiga. E vaavaaia e le peresitene ia gaoioiga. E mafai ona fesili o ia i se fesoasoani po o se isi tuafafine e taitai i le fuafuaina ma le faafoeina o na gaoioiga (tagai i le 9.3.4). E talanoaina e au peresitene ia gaoioiga faatasi ai ma le epikopo o se vaega o la latou fuafuaga.
O gaoioiga e tatau ona faamalolosia ai manaoga o tuafafine e osia ma tausia feagaiga ma tuuina atu ia i latou avanoa e faapotopoto ai ma auauna faatasi ai. E tatau ona fesoasoani gaoioiga e faataunuu ai faamoemoega o le Aualofa (tagai i le 9.1 ma le 9.1.1). Mo faamatalaga e uiga i gaoioiga a le Aualofa a le siteki, tagai i le 6.7.1.
9.2.2
Tausiga o i Latou e Lē Tagolima
I le avea ai ma soo o Iesu Keriso, ua i ai i tuafafine se tiutetauave e aapa atu ma le alofa ia i latou e manaomia le fesoasoani. Taitoatasi ma i le avea ai foi o se Aualofa, latou te sailia auala e auauna atu ai i isi i le uarota ma nuu. I nofoaga e maua ai, o le JustServe.org o loo fautuaina mai ai ni avanoa mo auaunaga i nuu.
Mo nisi faamatalaga e uiga i auala e tausia ai e sui auai o le Aualofa ma le korama a toeaina i latou e le tagolima, tagai i le 22.6.2.
Ata
fafine o loo tiliva faatauga
9.2.2.1
Auaunaga
O le auaunaga o le tausiga lea o isi e pei ona faia e le Faaola. E maua e tuafafine ia tofitofiga o auaunaga mai le au peresitene o le Aualofa. Mo ni isi faamatalaga, tagai i le mataupu 21.
9.2.2.2
Manaoga mo se Taimi Puupuu
O tuafafine o auaunaga e saili ia malamalama ma tali atu i manaoga o e latou te auauna i ai. E ono manaomia e tagata se fesoasoani mo se taimi puupuu, i le taimi o ma’i, pepe fou e fananau mai, maliu, leai o ni galuega, ma isi tulaga.
Pe a oo ina manaomia, e fesili atu tuafafine o auaunaga i le au peresitene o le Aualofa mo se fesoasoani. E mafai e le au peresitene ona fautuaina atu e valaau se taitai faamaopoopo mo galuega fesoasoani e faatulagaina nei taumafaiga (tagai i le 9.3.4).
E faamaopoopo e le Aualofa ma le korama a toeaina ia taumafaiga e taulima manaoga mo se taimi puupuu (tagai i le 22.3.2). E mafai e le epikopo ona tuuina atu se fesoasoani mai le taulaga anapogi pe a manaomia ai.
I ni isi nofoaga, e i ai i le epikopo le filifiliga e tuu atu ai i tagata lē tagolima o le au paia se oka a le epikopo mo meaai ma isi oloa masani. E masani ona tofi e le epikopo le peresitene o le Aualofa e asiasi i tagata o le au paia ma faatumu le fomu o le oka. Peitai, e mafai foi ona ia tofia le peresitene o le korama a toeaina. E mafai ona valaaulia se fesoasoani o le au peresitene o le Aualofa po o le korama a toeaina, pe afai e le o avanoa le peresitene. E tuuina atu e le taitai ua tofia le fomu ua mae’a ona faatumu i le epikopo mo lana faamaoniga.
Mo nisi faamatalaga, tagai i le 22.6.2 ma le “Punaoa o Uelefea” i le Punaoa mo Taitai ma Failautusi.
9.2.2.3
Manaoga mo se Taimi Umi ma le Ola-Tutoatasi
E pei ona faamaopoopoina ai e le epikopo, e fesoasoani au peresitene o le Aualofa ma le korama a toeaina i tagata o le au paia i manaoga mo se taimi umi ma le ola-tutoatasi. Latou te a’oa’o atu mataupu faavae o le ola-tutoatasi faaletino ma faaleagaga. Tagai i le mataupu 22 ma le “Ola-Tutoatasi” i le polokalama o le Gospel Library.
Afai e i ai se tagata po o se aiga e manaomia le fesoasoani, e fefautuaai faatasi ia peresitene o le Aualofa ma le korama a toeaina, e pei ona faamaopoopoina ai e le epikopo, e uiga i auala e fesoasoani ai (tagai i le 22.4).
O le peresitene o le Aualofa, peresitene o le korama a toeaina, po o se isi taitai e fesoasoani i le tagata po o le aiga e atia’e se Fuafuaga mo le Ola-Tutoatasi. E mafai foi ona fesoasoani ia tuafafine po o uso o auaunaga i le fuafuaga. E tele taimi, e i ai tomai po o le poto masani o isi tagata o le Aualofa po o le korama a toeaina e mafai ona fesoasoani. O i latou uma e fesoasoani, latou te taulimaina faamatalaga ma le le faalauaiteleina. Mo nisi faamatalaga, tagai i le 22.3.3 ma le 22.8.
9.2.2.4
Pe A Maliu se Tagata o le Uarota
Pe a maliu se tagata o le uarota, o au peresitene o le Aualofa ma le korama a toeaina e ofoina atu le faamafanafanaga ma le fesoasoani. I lalo o le taitaiga a le epikopo, e mafai ona latou fesoasoani i le falelauasiga.
Afai e mafai, o tagata ua maliliu o e sa maua faaeega paia, e falelauasi pe susunuina i laei o le malumalu. O le tino o se tamaitai e mafai ona faaofuina e lona toalua po o se tamaitai o le aiga ua maua faaeega paia. Afai e le o avanoa se tagata o le aiga pe le manao foi e faaofu le tino o se tamaitai ua maua faaeega paia, e mafai e le epikopo ona talosaga i le peresitene o le Aualofa e valaaulia se tamaitai ua maua faaeega paia e faaofu le tino pe vaai le faaofuga. Mo nisi faamatalaga, tagai i le 38.5.10.
O au peresitene o le Aualofa ma le korama a toeaina, o uso ma tuafafine o auaunaga, ma isi e faaauau pea ona ofoina atu le faamafanafanaga ma le fesoasoani pe a maea le falelauasiga.
9.2.3
Valaaulia Tagata Uma e Talia le Talalelei
Ua i ai i sui auai o le Aualofa se tiutetauave e valaaulia tagata uma ia maua faamanuiaga o le talalelei a Iesu Keriso (tagai i le Mosaea 18:9). Latou te faia lenei mea e ala i le faasoa atu o le talalelei, faamalolosia tagata fou o le au paia, ma aapa atu ia i latou o e ua le toaaga mai. Tagai i le 23.2 ma le 23.3.
I fonotaga a le au peresitene o le Aualofa, e talanoaina e le au peresitene o le Aualofa ia auala e mafai ai e tuafafine ona valaaulia tagata uma ia maua faamanuiaga o le talalelei. (Tagai i le 23.1.1, 23.1.2, ma le 23.1.3.
E tofi e le peresitene o le Aualofa se tasi o le au peresitene e fesoasoani e taitai taumafaiga e faasoa atu le talalelei i le uarota. E galulue faatasi o ia ma le sui ua tofia o le au peresitene o le korama a toeaina e faamaopoopo nei taumafaiga (tagai i le 23.6.2).
O le sui ua tofia o le au peresitene o le Aualofa e auai i fonotaga faamaopoopo faalevaiaso e faamaopoopo ai le valaaulia o tagata uma ia maua faamanuiaga o le talalelei. O le taitai misiona o le uarota, o sē atonu o se tasi o le au peresitene o le korama a toeaina, e taitaia nei fonotaga. O faifeautalai o le uarota, se fesoasoani i le korama a ositaulaga, se sui auai o le au peresitene o le vasega aupito matutua o Tamaitai Talavou, ma faifeautalai faamisiona e auai. Tagai i le 23.4.
9.2.4
Tuufaatasia o Aiga mo le Faavavau
E lagolago e sui auai o le Aualofa ia tagata o le au paia i le tuufaatasia o aiga mo le faavavau. Ua aofia ai i lenei mea:
Osia o feagaiga ma le Atua e ala i le mauaina o sauniga, e aofia ai faaeega paia o le malumalu.
Faia o galuega faalemalumalu ma talafaasolopito o aiga (tagai i le 1.2.4).
I fonotaga a le au peresitene o le Aualofa ma fonotaga a le Aualofa, e talanoaina e le au peresitene o le Aualofa ia auala e mafai e le usoga a tamaitai ona auai i le faatinoga o nei taumafaiga. E fuafua foi e sui auai o le au peresitene ni auala e fesoasoani ai i tagata o le ekalesia ia faateleina lo latou malamalama ma le manao ia maua sauniga paia ma osia feagaiga ma le Atua i totonu o le malumalu. Latou te fautuaina tuafafine e tapuai soo i le malumalu i nofoaga e mafai ai.
E fautuaina e le au peresitene ia tuafafine e aoao e uiga i o latou talafaasolopito o aiga. Latou te fesoasoani i tagata fou ma tagata ua toe foi mai, tagata fou o le Aualofa, ma faifeautalai faatoa valaauina e saili ma saunia igoa o tuaa mo sauniga o le malumalu.
E tofi e le peresitene o le Aualofa se tasi o le au peresitene e fesoasoani e taitai le galuega faalemalumalu ma talafaasolopito o aiga i le uarota. E galulue faatasi o ia ma le sui ua tofia o le au peresitene o le korama a toeaina e faamaopoopo nei taumafaiga (tagai i le 25.2.2).
O le sui ua tofia o le au peresitene o le Aualofa e auai i fonotaga faamaopoopo e faamaopoopo ai le galuega faalemalumalu ma talafaasolopito o aiga. O nei fonotaga e faia e le aunoa. O le taitai mo malumalu ma talafaasolopito o aiga a le uarota, o sē atonu o se sui o le au peresitene o le korama a le au toeaina, e taitaia fonotaga faamaopoopo o le malumalu ma talafaasolopito o aiga (tagai i le 25.2.7). E faaaofia ai foi se fesoasoani i le korama a ositaulaga, se tasi o le au peresitene o le vasega aupito matutua o Tamaitai Talavou, ma faufautua o malumalu ma talafaasolopito o aiga.
9.3
Taitai o le Aualofa
9.3.1
Epikopo
A itiiti e ta’i masina ma fono le epikopo ma le peresitene o le Aualofa. La te talanoaina le galuega a le Atua mo le faaolataga ma le faaeaga, e aofia ai galuega a tuafafine o auaunaga. La te talanoaina foi (1) le agaigai i luma ma manaoga o tuafafine o le uarota ma (2) fonotaga a le Aualofa, aoaoga, ma gaoioiga.
9.3.2
Au Peresitene o le Aualofa
9.3.2.1
Valaauina o se Au Peresitene o le Aualofa
E valaau e le epikopo se tamaitai e avea ma peresitene o le Aualofa a le uarota. Afai e lava le telē o le iunite, na te fautua atu [i le epikopo] se tamaitai se toatasi pe toalua e avea ma ona fesoasoani. E iloiloina e le au epikopo ē na ia fautuaina atu ma tuuina atu ia valaauga.
E tuuina atu e se sui o le au epikopo ia sui o le au peresitene i se sauniga faamanatuga mo le lagolagoina. O le epikopo na te vaetofiaina le peresitene o le Aualofa. Soo se tasi o le au epikopo e vaetofiaina ona fesoasoani.
O ni isi iunite laiti e ono le i ai se peresitene o Tamaitai Talavou po o le Peraimeri. I iunite nei, e mafai e le peresitene o le Aualofa ona fesoasoani i matua e fuafua ia a’oa’oga mo le autalavou ma tamaiti.
9.3.2.2
Tiutetauave
O tiutetauave nei o le peresitene o le Aualofa. E lagolago atu ona fesoasoani ia te ia.
E auauna atu o ia i le aufono a le uarota. E avea o ia o (1) se sui auai o le aufono e fesoasoani e talanoaina manaoga i totonu o le uarota, ma sue ni vaifofo ma (2) o se sui o le Aualofa (tagai i le 29.2.5).
Taitaia taumafaiga a le Aualofa e auai i le faatinoina o le galuega a le Atua mo le faaolataga ma le faaeaga (tagai i le mataupu 1).
Faatulaga ma vaavaaia le galuega a tuafafine o auaunaga. E faamaopoopoa ma le au peresitene o le korama a toeaina ia tofitofiga o le auaunaga, e fono e le itiiti ifo ma le faalekuata. Sailia le faamaoniga a le epikopo mo tofitofiga o auaunaga. Faia faatalanoaga mo auaunaga e le itiiti ifo ma le faalekuata. Tagai i le mataupu 21.
I lalo o le taitaiga a le epikopo, ia fefautuaai ma tagata matutua o le uarota (tagai i le 31.1 ma le 31.3). E na’o le epikopo e fautuaina tagata o le uarota e uiga i mataupu o le agavaa, sauaga, ma le faamaoniga e faaaoga ai tupe o le taulaga anapogi. Tagai i Punaoa mo Fautuaga. Mo faamatalaga e uiga i le sauaina, tagai i le 38.6.2.
Faatasi ai ma le au peresitene o le korama a toeaina, e fesoasoani e taitai ia taumafaiga i le uarota e valaaulia ai tagata uma ia maua faamanuiaga o le talalelei (tagai i le 8.2.3 ma le 9.2.3).
Faatasi ai ma le au peresitene o le korama a toeaina, e fesoasoani e taitai le galuega faalemalumalu ma talafaasolopito o aiga i le uarota (tagai i le 8.2.4 ma le 9.2.4).
E faamaopoopoa taumafaiga a le Aualofa e faamalolosia tuafafine talavou matutua i le uarota, o ē nofofua ma ē ua faaipoipo. E mafai ona tofia se tasi o fesoasoani e auauna atu faatasi ma talavou nofofua matutua (tagai i le 14.1.2.2).
E feiloai ma sui auai taitasi o le Aualofa ia le itiiti ifo ma le faatasi i le tausaga. E talanoaina le soifua manuia o le tuafafine ma lona aiga.
Aoao atu i tuafafine o latou tiutetauave ma faamanuiaga o le feagaiga, e aofia ai faamanuiaga e sau mai le mana o le perisitua a le Atua (tagai i le 3.5 ma le 3.6). Fesoasoani ia i latou ia malamalama i le mana, puipuiga, taitaiga, olioli, ma le filemu lea e oo mai i le atiina ae o se sootaga o le feagaiga ma le Tama Faalelagi ma Iesu Keriso.
E vaavaaia ma fesoasoani e faaleleia atili le a’oa’o atu i le Aualofa (tagai i le mataupu 17).
E fuafuaina ma taitai fonotaga a le Aualofa.
Vaavaaia gaoioiga a le Aualofa (tagai i le 9.2.1.3).
Fesoasoani i tamaitai talavou ia sauniuni e auai i le Aualofa (tagai i le 9.4).
Vaavaaia ia faamaumauga, lipoti, ma mea tautupe a le Aualofa (tagai i le LCR.ChurchofJesusChrist.org). E mafai ona fesoasoani atu i ai se failautusi (tagai i le 9.3.3).
O le au peresitene o le Aualofa a le siteki e a’oa’oina le au peresitene o le Aualofa a le uarota e uiga i nei tiutetauave. E mafai ona latou faia lenei mea i le taimi o fonotaga faaleautaitai a le siteki, fonotaga a le au peresitene o le Aualofa a uarota, ma asiasiga patino ma peresitene o Aualofa (tagai i le 29.3.4).
E ala i lona tofiga, e lagolago atu ai le peresitene o le Aualofa i le epikopo i le taulai atu i le autalavou ma i ona tiutetauave iloga.
Ata
fonotaga a le aufono a le uarota
9.3.2.3
Fonotaga a le Au Peresitene
E fono e le aunoa le au peresitene o le Aualofa ma le failautusi. O le peresitene e taitaia nei fonotaga. O le lisi o mataupu e talanoaina e mafai ona aofia ai mea nei:
Fuafua ni auala e faamalolosia ai tuafafine ma o latou aiga.
Fuafua pe faapefea ona fesoasoani e faataunuu le galuega a le Atua mo le faaolataga ma le faaeaga.
Faamaopoopo le galuega faafaifeautalai ma le galuega mo malumalu ma talafaasolopito o aiga.
Tali atu i fautuaga ma tofitofiga mai le epikopo.
Tali atu i tofitofiga mai fonotaga a le aufono a le uarota.
Iloilo ma le agaga tatalo ia tofitofiga o le auaunaga.
Iloilo faamatalaga mai faatalanoaga o auaunaga. Fuafua ni auala e faailoa ai malosiaga ma fesoasoaniga e foia ai manaoga. (Tagai i le mataupu 21.)
Mafaufau i ni tuafafine e galulue i valaauga ma tofiga o le Aualofa.
Fuafua ia fonotaga ma gaoioiga a le Aualofa.
9.3.3
Failautusi
E mafai e le au peresitene o le Aualofa ona fautuaina mai se tuafafine e avea ma failautusi a le Aualofa. E valaauina o ia e se sui o le au epikopo, tuuina atu o ia mo le lagolagoina i le sauniga faamanatuga, ma vaetofia o ia.
O tiutetauave o le failautusi e mafai ona aofia ai mea nei:
Saunia lisi o mataupu talanoaina mo fonotaga a le au peresitene ma fonotaga a le Aualofa.
Tusitusia faamatalaga o fonotaga ma tulitulitatao ia tofitofiga.
Faatulaga taimi o faatalanoaga o auaunaga (tagai i le 21.3).
Saunia ma auina atu ia lipoti faalekuata o le auai ma le aofai o faatalanoaga o auaunaga na fai.
Fesoasoani e tapena se paketi faaletausaga ma tulitulitatao tupe faaalu.
9.3.4
Valaauga Faaopoopo
Atonu o le a aoga ia valaauga faaopoopo nei. E talanoaina e le epikopo ma le peresitene o le Aualofa pe manaomia.
Faiaoga o le Aualofa e faiaoga i sauniga a le Aualofa i Aso Sa.
Se taitai faamaopoopo mo galuega fesoasoani e fesoasoani e fuafua ma faatino ia galuega i tagata e manaomia (tagai i le 9.2.2.2). E mafai foi ona valaau ni fesoasoani ma ni sui auai o le komiti.
Se taitai faamaopoopo mo gaoioiga e fesoasoani e fuafua ma faatino ia gaoioiga a le Aualofa (tagai i le 9.2.1.3). E mafai foi ona valaau ni fesoasoani ma ni sui auai o le komiti.
Failautusi fesoasoani e fesoasoani i le failautusi o le Aualofa.
Failautusi mo auaunaga e faatulagaina ia faatalanoaga o auaunaga ma fesoasoani e tapena ia lipoti faalekuata.
Afai e manaomia nei valaauga ma ni isi, e fautua atu e le au peresitene o le Aualofa ia tuafafine e galulue. Latou te faia nei fautuaga i le au epikopo. Afai e faamaonia e le au epikopo, e valaauina i latou e se tasi o le au epikopo. Na te tuuina atu i latou mo le lagolagoina i le sauniga faamanatuga ma vaetofia i latou.
Pe a manaomia, e mafai e le au peresitene o le Aualofa ona tofia ni tuafafine e fesoasoani i taumafaiga a le Aualofa i isi auala. E le tau valaauina ma vaetofia ia tuafafine i ni tofiga mo se taimi puupuu.
Ata
Vasega a le Aualofa
9.4
Fesoasoani i Tamaitai Talavou ia Sauniuni e Auai i le Aualofa
E galulue le au peresitene o le Aualofa faatasi ma tamaitai talavou, o o latou matua, ma taitai o Tamaitai Talavou e fesoasoani ia saunia tamaitai talavou e auai i le Aualofa.
E saunia foi e taitai ni avanoa faifai pea mo tamaitai talavou ma uso o le Aualofa e atiae ia sootaga. O le galulue faatasi o ni tuafafine a auaunaga o se tasi o auala taua tele e faia ai sootaga.
E fesoasoani taitai i tamaitai talavou ia malamalama i o latou tiutetauave o feagaiga. Pe a aogā le i ai o se tamaitai talavou e auauna atu i se tuafafine patino, e mafai ona tofia o ia o se tuafafine o auaunaga pe a naunau o ia, gafatia, ma ua faatagata matua. E mafai ona tofia o ia e amata i le tausaga e atoa ai lona 14 tausaga. E avea tamaitai talavou o ni soa i tuafafine o le Aualofa (tagai i le 21.2.2).
Pe a oo ina auai ia talavou matutua i le Aualofa, e tuu atu ia i latou e le au peresitene o le Aualofa ia avanoa e galulue ai ma faasoa mai o latou malosiaga. E fesoasoani foi le au peresitene ia i latou e sauniuni e osia ma tausia feagaiga paia o le malumalu (tagai i le 27.1.1).
9.5
Au Taitai o le Aualofa a le Siteki
O le peresitene o le siteki e valaauina ma vaetofiaina se tamaitai e avea ma peresitene o le Aualofa a le Siteki. Afai e lava le telē o le siteki, e na te fautuaina atu se tamaitai se toatasi pe toalua e avea ma fesoasoani ma se isi e avea ma failautusi. O nei tamaitai e valaauina ma vaetofiaina e se tasi o le au peresitene o le siteki po o se fautua maualuga ua tofia. Mo faamatalaga e uiga i tiutetauave o le au peresitene ma le failautusi o le Aualofa a le siteki, tagai i le 6.7.1 ma le 6.7.3.
E fono e le aunoa (a itiiti e ta’i masina) le peresitene o le siteki ma le peresitene po o le au peresitene o le Aualofa a le siteki. Latou te fefautuaai faatasi e uiga i le galuega a le Atua mo le faaolataga ma le faaeaga. Latou te talanoaina foi le (1) alualu i luma ma manaoga o tuafafine i le siteki ma (2) fonotaga, a’oa’oga ma gaoioiga a le Aualofa.
O le au peresitene o le Aualofa a le siteki e a’oa’oina ia au peresitene o Aualofa i uarota i o latou tiutetauave mo auaunaga, galuega faafaifeautalai, ma galuega o malumalu ma talafaasolopito o aiga. Latou te faia lenei mea i lalo o le taitaiga a le au peresitene o le siteki. E tofia ia fautua maualuga e lagolago atu i ai. Tagai i le 23.1 ma le 25.2.
Afai e i ai se komiti o talavou nofofua matutua a le siteki, o se tasi o le au peresitene o le Aualofa a le siteki e auai i le komiti. E tonu foi lena mea pe afai e i ai se komiti a tagata matutua nofofua a le siteki. (Tagai i le 14.1.1.2.)
Ata
o ni tamaitai laufofoga fiafia se toalua.
9.6
Taiala ma Aiaiga Faavae Faaopoopo
9.6.1
Tagata e I Ai Manaoga Faapitoa
O le au peresitene o le Aualofa e tuuina atu se tausiga faapitoa i tagata o le au paia e i ai manaoga faapitoa. Mo faamatalaga e uiga i le fesoasoani i nei tagata, tagai i le disability.ChurchofJesusChrist.org; tagai foi i le 38.8.27 i le tusitaulima lenei.
9.6.2
Tusitusi ma Faitautusi
Pe a manaomia, e galulue le au peresitene o le Aualofa ma le epikopo, au peresitene o le korama a toeaina, ma le aufono a le uarota e fesoasoani i tagata o le au paia e aoao e faitau ma tusitusi.