Joen long Sevya tru long Ol Kavenan mo Ol Odinens
Trening Aotlaen blong Ol Eria, Kodineting, Misin, Stek, Wod mo Branj Kaonsel
Long taem blong instraksen ia, bambae yufala i luk mo harem ol eksperiens blong ol pikinini blong Papa long Heven we oli stap long ol defdefren ples long rod ia blong stap kam joen long Sevya tru long ol kavenan mo ol odinens. Bambae yufala i harem olsem wanem fasin blong, stap lavem, stap serem, mo stap invaetem man i bin helpem olgeta blong progres long kavenan rod ia wetem wan glad. Bae yufala i save luksave olsem wanem blong stap serem gospel, blong stap mekem wok blong tempol mo famli histri, mo blong stap kea long olgeta we oli stap long nid, evri samting ia i plei wan pat. Be antap long evri samting ia, bambae yufala i save luksave olsem wanem, evri samting ia, oli “putum evri samting i kam joen wanples long Kraes” (Efesas 1:10).
Laef Taem 1: Ol Pikinini
Wajem vidio wetem Presiden Joy D. Jones mo ol pikinini mo afta, toktok raon long wanem bae yufala i go mo mekem blong helpem ol pikinini blong oli fasem olgeta long Sevya taem oli stap long kavenan rod ia.
-
?Wanem nao Spirit i tijim yumi taem yumi bin stap wajem vidio ia?
-
?Olsem wanem ol prinsipol ia blong lavem man, serem samting, mo invaetem man i helpem ol pikinini taem oli stap traehad blong serem gospel ia?
-
?Olsem wanem seves i save helpem ol pikinini blong stap long kavenan rod afta long baptaes?
Laef Taem 2: Ol Yut
Wajem vidio wetem Presiden Bonnie H. Cordon mo Presiden Stephen J. Lund mo ol yut, mo afta, toktok raon long wanem bae yufala i go mo mekem blong helpem ol yut blong oli fasem olgeta long Sevya taem oli stap long kavenan rod ia.
-
?Olsem wanem yumi save helpem ol yut blong oli kipim ol kavenan blong olgeta blong baptaes taem oli stap tekem nekis step folem rod ia blong kavenan?
-
?Olsem wanem ol prinsipol ia blong lavem man, serem samting, mo invaetem man i helpem ol yut blong oli tekpat long wok ia blong tempol mo famli histri?
-
?Olsem wanem nao yumi save helpem ol yut blong oli filim hop mo filim se oli pat taem oli kam blong fasem olgeta long Sevya?
Laef Taem 3: Ol Yang Adalt
Wajem vidio wetem Presiden Mark L. Pace mo ol yang adalt, mo afta, toktok raon long wanem bae yufala i go mo mekem blong helpem ol yang adalt blong oli fasem olgeta long Sevya taem oli stap long kavenan rod ia.
-
?Wanem moa yumi lanem aot long fasin blong stap lavem man, serem samting mo invaetem man, taem ol narawan oli mekem hemia long yumi?
-
?Olsem wanem nao yumi save helpem ol yang adalt blong oli filim hop mo filim se oli pat taem oli kam blong gat moa paoa blong dipen long olgetawan mo givim seves long ol narawan? ?Olsem wanem nao yumi save helpem olgeta blong oli save se oli nidim olgeta insaed long Jos ia blong Lod?
-
?Wanem rol nao, ol aktiviti blong Jos we oli gat mining, mo ol lida we oli kea oli plei blong mekem ol yang adalt oli fas long Sevya?
Laef Taem 4: Ol Adalt
Wajem vidio wetem Presiden Jean B. Bingham mo ol adalt, mo afta, toktok raon long wanem bae yufala i go mo mekem blong helpem ol adalt blong oli fasem olgeta long Sevya taem oli stap long kavenan rod ia.
-
?Olsem wanem ol kavenan blong yumi oli tekem hiling i kam insaed long laef blong yumi, mo oli helpem yumi blong stap long rod ia—iven long ol taem we oli had tumas?
-
?Wanem wei nao yumi faenem blong helpem ol memba blong oli mekem olgeta oli fas, mo mekem ol narawan oli fas long Sevya tru long ol kavenan mo ol odinens?
-
?Olsem wanem we, taem yumi stap developem fasin blong dipen long yumiwan long saed blong spirit, hem i helpem yumi blong lavem man, serem samting mo invaetem man?
Ol Risos blong Ol Eria, Kodineting, Misin, Stek, Wod Mo Branj Kaonsel
Blong Ol Pikinini mo Ol Yut
Bigfala Lukluk long Program blong Ol Pikinini mo Ol Yut
Program blong Ol Pikinini mo Ol Yut, oli raetem long wan wei blong mekem se, jeneresen we i stap kam antap i kam strong moa long fet blong olgeta long Jisas Kraes, mo blong i helpem ol pikinini, ol yut, mo famli blong olgeta, blong oli progres folem rod ia blong kavenan taem oli stap kam fesem ol jalenj blong laef. Hem i helpem ol pikinini mo ol yut long ol traehad blong olgeta blong tekpat long wok ia blong mekem Isrel i kam tugeta wanples, mo blong mekem wok ia blong fasin blong sevem man mo fasin blong kam olsem wan god i hapen long evri dei laef blong olgeta. Program ia, senta blong hem i long hom mo jos i sapotem.
Ol Hop blong Jeneresen Ia we I Stap Kam Antap
Program ia blong Ol Pikinini mo Ol Yut, i stap helpem jeneresen ia we i stap kam antap blong i gro long plante rod, we i tekem tu, revelesen, fridom blong mekem joes, mo ol rilesensip. Wanwan man mo woman i lanem blong kasem, mo tekem aksen folem ol revelesen we i blong olgetawan taem oli stap praktisim fridom blong mekem joes ia, mo taem oli stap jusum ol janis blong olgetawan, blong oli save groap. Hemia i hapen tu taem we ol yut oli save lanem blong lidim taem long ol kworom mo long ol klas presidensi. Oli bildimap ol rilesensip blong olgeta wetem ol famli blong olgeta, ol lida blong olgeta, mo ol narawan we oli gat semmak yia olsem olgeta, taem oli stap wok mo givim seves tugeta, mo taem oli kam blong save se oli blong wan grup, mo oli nidim olgeta long wok ia blong Lod.
?Weaples Nao Bae Yumi Stat Tedei?
Mifala i stap invaetem ol pikinini, ol yut, mo ol papa mo mama, mo ol lida blong olgeta blong oli komitim olgeta, o oli komitim olgeta bakegen blong kam moa olsem Sevya taem we yumi stap tekpat long wok ia blong Hem. !Ol traehad ia oli no nid blong oli mas strong tumas! Hemia sam simpol samting blong stat wetem:
Papa mo Mama
-
Karem famli blong yu i kam tugeta blong stadi long gospel. Kam Folem Mi risos, oli save help. Maet bae yu save tingting blong gat ol toktok storian abaot ol topik olsem, ol kavenan, revelesen, fridom blong mekem joes, mo ol petriakel blesing.
-
Mekem wan plan blong wan famli aktiviti. ?Olsem wanem yu save stap sef mo semtaem givim seves long wan long wan ples raonabaot long ples we yu stap laef long hem, o long komuniti blong yu? Long ples we i stap, JustServe i save helpem yu blong faenem ol aedia.
-
Mit yutufalawan wetem wanwan blong boe mo gel blong yutufala. Toktok raon long wanem oli intres long hem mo tokbaot olsem wanem oli wantem gro i kam antap. Helpem mo sapotem olgeta wetem divelopmen blong olgeta. Tokbaot wanem gol oli putum, o wantem blong wok long hem.
Ol Praemeri Lida
-
Yufala i mas save situesen blong ol pikinini long hom blong olgeta, mo yufala i lukaotem revelesen blong helpem olgeta olsem wanwan boe mo gel.
-
Stat blong holem ol Sandei miting mo Ol Praemeri aktiviti, fes tu fes, o onlaen (taem we i sef mo oli givim raet from).
-
!No wari blong stap joenem ol gol mo ol aktiviti blong wanwan! Lukluk nomo blong joen wetem olgeta mo blesem ol pikinini mo ol famli blong olgeta—speseli taem oli nidim mo oli stap askem help.
Ol adalt lida blong ol yut
-
Stat blong holem ol Sandei miting mo Ol Praemeri aktiviti, fes tu fes, o onlaen (taem we i sef mo oli givim raet from). Leftemap tingting blong ol yut blong oli lanem baehat niufala stamba toktok blong Ol Yang Woman, mo hemia blong Aronik Prishud, mo oli statem klas wetem.
-
Singaotem, setem apat, mo givim paoa long wanwan presidensi blong kworom mo klas. Helpem olgeta blong holem ol presidensi miting oltaem, mo blong oli mekem plan mo lidim ol Sandei miting mo ol aktiviti. Holem ol wod yut kaonsel, mo leftemap tingting blong oli tekpat long misinari wok mo tempol mo famli histri wok kodineting miting. Tijim maen mo sapotem ol presidensi olsem we i nid, mo meksua blong no tekova. Helpem ol presidensi blong oli lanem ol lidasip skil mo yusum ol risos blong presidensi blong kworom mo presidensi blong klas.
-
Mekem plan mo holem ol yut kamp, mo ol yut konfrens long 2021, mo folem gud ol sefti gaedlaen.
-
!No wari blong stap joenem ol gol mo ol aktiviti blong wanwan! Putum paoa blong yu blong stap joenem ol yut wetem olgetawan bakegen. Maet yu save help tu blong mekem ol presidensi blong kworom mo hemia blong klas blong oli joenem ol aktiviti wetem ol nid blong ol yut.
Blong kasem moa infomesen, luk long ChildrenandYouth.ChurchofJesusChrist.org.
Blong Ol Adalt
YSA Ples blong Kam Tugeta
Fas Presidensi i bin givim raet blong samfala eria blong oli putum samfala ples blong kam tugeta blong ol yang singgel adalt, hemia folem ol nid long eria. Wan ples blong kam tugeta, hem i wan ples we oli jusum insaed long wan bilding we i stap finis (olsem wan mitinghaos o wan institiut bilding), i wan ples we ol yang singgel adalt mo ol fren blong olgeta oli save kam tugeta blong tekpat long sam o evriwan blong ol samting ia (folem ol lokol nid mo risos):
-
Edukesen blong Relijin, mo wei blong lanem gospel (we i tekem institiut tu)
-
Seves mo ol sosol aktiviti
-
Tempol mo famli histri aktiviti
-
Indipenden laef mo edukesen janis
-
Misinari mo komuniti seves
-
Ol narafala program blong Jos
Eni ples blong kam tugeta long hem, bae Eria Presidensi i mas apruvum mo ol stek presiden mo ol bisop i lukaot long hem.
Blong Stap Singaotem Ol Yang Singgel Adalt mo Ol Singgel Adalt
Ol las jenis long polisi mo ol samting we oli mekem i klia, oli stretem sam poen we memba i no andastanem gud, mo i stretem ol kastom long saed blong ol limit blong ol janis blong ol singgel memba blong givim seves long Jos ia blong Lod. Olgeta jenis long ol polisi ia, mo sam moa samting we oli mekem i klia moa, we Fas Presidensi mo Kworom blong Olgeta Twelef Aposol oli apruvum, oli stap insaed long Jeneral Hanbuk, mo i eksplenem se ol yang singgel adalt, mo ol singgel adalt, oli save kasem blesing, mo oli save blesem ol narawan tru long plante koling, mo tu, ol koling olsem ol lida blong stek mo wod. Ol semfala polisi ia, naoia, oli mas yusum long evri yunit blong Jos, wetem hemia ol yunit blong ol yang singgel adalt mo ol singgel adalt. Ol limit we oli putum long ol yang singgel adalt, mo ol singgel adalt blong oli no stap givim seves long ol stek presidensi, ol bisoprik, mo ol stek Rilif Sosaeti presidensi long ol yang singgel adalt mo singgel adalt yunit, naoia, oli karemaot olgeta.
Ol singgel memba oli save givim seves long ol lidasip posisen, we i tekem tu ol wod mo stek oganaesesen presidensi, ol presidensi blong kworom blong ol elda, ol kaonsela blong ol bisoprik, ol hae kaonsela mo ol kaonsela blong ol stek presidensi.
Nidim mo Welkamem Evriwan—Lavem, Serem, mo Invaetem
Taem ol memba oli gat hadtaem blong filim se oli pat samples, samtaem ol lida mo ol narawan, oli no minim, be oli talem sam samting we i mekem se ol memba ia oli rili biliv nao se oli no gat ples, o oli no nidim olgeta.
Taem yumi stap tingbaot ol trutok ia abaot fasin blong lavem man, serem samting mo invaetem man, bae i save helpem yumi blong welkamem evriwan oli kam long aktiviti, kam blong felosip, mo kam pat insaed long Jos Ia blong Jisas Kraes.
-
Wanwan man o woman i wan pikinini blong God we God i lavem hem, mo hem i gat wan tabu fasin mo wan tabu fiuja. Antap long ol blesing ia we oli no save finis we Hem i stap promesem long olgeta we oli stap fetful, Hem i wantem blesem ol pikinini blong Hem naoia long laef ia.
-
Wanwan pikinini blong God, oli nidim hem long wok ia blong bildimap kingdom blong Hem.
-
Blong helpem wan blong i filim se hem i pat, mo oli nidim hem, i stat wetem lav. Lisin blong save andastanem eksperiens blong hem. No ting se yu yu save finis, o yu andastanem finis.
-
Yumi no gat ol ansa long evri kwestin we yumi, o ol narawan oli stap fesem long laef ia. Eksampol: yumi no save ol risen from wanem wan i stap fesem wan kaen jalenj ia.
-
Gat wan open tingting mo no jajem man. Welkamem wanwan man o woman, long eni ples we man o woman ia i stap long hem long wokbaot ia blong hem. Openem han mo talem yu glad blong help, mo lukluk nomo long trutok ia, se, wanwan, God i nidim hem insaed long Jos.
-
Sapos yu mestem mo yu talem wan samting we i mekem man i harem nogud, no faenem eskius; go talem sore, mo afta, askem fogivnes mo kam gud moa nekis taem.
Blong kasem ol infomesen abaot fasin blong helpem ol memba we oli stap long ol spesifik situesen, luk long CounselingResources.ChurchofJesusChrist.org
Olsem Wanem Fasin blong Jenisim Laef I Bin Lidim Wan long Wan “Skwad blong Ol Brata”
Ol Prinsipol blong Lavem, Serem, mo Invaetem Man
Ol Blesing We Oli Promesem Taem Yumi Lavem, Serem mo Invaetem Man
