Imahe

scenes of people participating in ordinances

Nabugkos ngadto sa Manluluwas pinaagi sa mga Pakigsaad ug mga Ordinansa

Kini nga instruksiyon sa pagpangulo gipaila atol sa miting sa pagpangulo sa kinatibuk-ang komperensiya sa Abril 2021.

Gilatid nga mga Pagbansay alang sa mga Konseho sa Area, Coordinating, Misyon, Stake, Ward, ug Branch

Atol niini nga instruksiyon, imong makita ug madungog ang mga kasinatian sa mga anak sa atong Langitnong Amahan gikan sa managlahing dapit diha sa dalan sa pagkabugkos ngadto sa Manluluwas pinaagi sa mga pakigsaad ug sa mga ordinansa. Imong madungog kon sa unsang paagi nga ang paghigugma, pagpaambit, ug pagdapit nakatabang sa ilang pag-uswag diha sa dalan sa pakigsaad nga adunay hingpit nga kalipay. Mahimo nimong mahibaloan kon sa unsang paagi nga ang pagpaambit sa ebanghelyo, ang buhat sa templo ug family history, ug ang pag-alima niadtong mga nanginahanglan ang tanan mahinungdanon. Apan ang mas importante, imong mamatikdan kon sa unsang paagi nga kining tanan nga butang “hiusahon … ubos sa pagpangulo ni Kristo” (Mga Taga-Efeso 1:10).

Hugna sa Kinabuhi 1: Kabataan

Tan-awa ang video diin anaa si Presidente Joy D. Jones ug ang kabataan, ug dayon hisgoti unsay imong adtoon ug buhaton aron matabangan ang kabataan nga mabugkos ang ilang kaugalingon ngadto sa Manluluwas diha sa dalan sa pakigsaad.

Unsa ang gitudlo sa Espiritu kanato samtang nagtan-aw kita niini nga video?
Sa unsang paagi nga ang mga baroganan sa paghigugma, pagpaambit, ug pagdapit makatabang sa mga bata samtang maningkamot sila sa pagpaambit sa ebanghelyo?
Sa unsang paagi nga ang pagserbisyo makatabang sa kabataan nga magpabilin diha sa dalan sa pakigsaad human sa bunyag?

Imahe

batang babaye nagbasa ngadto sa mga ginikanan diha sa sopa

Hugna sa Kinabuhi 2: Kabatan-onan

Tan-awa ang video diin anaa si Presidente Bonnie H. Cordon ug si Presidente Stephen J. Lund ug ang kabatan-onan ug dayon hisgoti unsay imong adtoon ug buhaton aron matabangan ang kabatan-onan nga mabugkos ang ilang kaugalingon ngadto sa Manluluwas diha sa dalan sa pakigsaad.

Sa unsang paagi nga kita makatabang sa kabatan-onan nga makatuman sa ilang mga pakigsaad sa bunyag ug maandam alang sa sunod nga lakang subay sa dalan sa pakigsaad?
Sa unsang paagi nga ang mga baroganan sa paghigugma, pagpaambit, ug pagdapit makatabang sa kabataan nga makaapil sa buhat sa templo ug sa family history?
Sa unsang paagi nga kita makatabang sa mga kabataan nga mobati og paglaom ug pagkahisakop samtang sila nabugkos ngadto sa Manluluwas?

Hugna sa Kinabuhi 3: Young Adult

Tan-awa ang video diin anaa si Presidente Mark L. Pace ug ang mga young adult, ug dayon hisgoti unsay imong adtoon ug buhaton aron matabangan ang mga young adult nga mabugkos ang ilang kaugalingon ngadto sa Manluluwas diha sa dalan sa pakigsaad.

Unsa ang atong nakat-onan gikan sa paghigugma, pagpaambit, ug pagdapit nga gitanyag sa uban ngari kanato?
Sa unsang paagi nga kita makatabang sa mga young adult aron mobati og paglaom ug pagkahisakop samtang magpalambo sila sa pagbarog sa kinaugalingong pagpaningkamot ug pagserbisyo sa uban? Sa unsang paagi nga kita makatabang nila aron mahibalo nga sila gikinahanglan diha sa Simbahan sa Ginoo?
Unsa ang papel nga gidala sa makahuloganong mga kalihokan sa Simbahan ug maamumahong mga lider diha sa pagbugkos sa mga young adult ngadto sa Manluluwas?

Hugna sa Kinabuhi 4: Mga Hamtong

Tan-awa ang video diin anaa si Presidente Jean B. Bingham ug ang mga hamtong, ug dayon hisgoti unsay imong adtoon ug buhaton aron matabangan ang mga hamtong nga mabugkos ang ilang kaugalingon ngadto sa Manluluwas diha sa dalan sa pakigsaad.

Sa unsang paagi nga ang atong mga pakigsaad magdala og pagkaayo ug magtabang kanato nga magpabilin diha sa dalan—bisan sa lisod nga mga panahon?
Unsa nga mga paagi ang atong nakita aron makatabang sa mga miyembro nga mabugkos ang ilang kaugalingon ug ang uban ngadto sa Manluluwas pinaagi sa mga pakigsaad ug mga ordinansa?
Sa unsang paagi nga ang pagpalambo og espirituhanong pagbarog sa kinaugalingong pagpaningkamot makatabang kanato sa paghigugma, pagpaambit, ug pagdapit?

Mga kapanguhaan alang sa mga Konseho sa Area, Coordinating, Misyon, Stake, Ward, ug Branch

Alang sa Kabataan ug Kabatan-onan

Kinatibuk-ang Pagpasabot alang sa Kabataan ug Kabatan-onan

Ang programa alang sa Kabataan ug Kabatan-onan gituyo aron sa paglig-on sa pagtuo sa nagtubo nga henerasyon diha ni Jesukristo ug pagtabang sa kabataan ug kabatan-onan, ug sa ilang mga pamilya nga molambo subay sa dalan sa pakigsaad samtang mag-atubang sila og mga hagit sa kinabuhi. Makatabang kini sa kabataan ug kabatan-onan sa ilang mga paningkamot nga makaapil sa pagpundok sa Israel ug sa buhat sa kaluwasan ug kahimayaan sa inadlaw-adlaw nilang pagpakabuhi. Nasentro kini diha sa panimalay ug gisuportahan sa simbahan.

Imahe

pamilya nga nagbaktas

Mga Gilaoman alang sa Nagtubo nga Henerasyon

Ang Kabataan ug Kabatan-onan makatabang sa bag-o nga henerasyon nga molambo sa daghang paagi, lakip na ang pinaagi sa pagpadayag, kabubut-on, ug mga pakigrelasyon. Ang mga indibidwal makakat-on sa pagdawat ug paglihok sa personal nga pagpadayag samtang mogamit sila sa kabubut-on ug mopili og mga oportunidad sa pagpalambo sa ilang kaugalingon. Mahitabo usab kini samtang ang mga batan-on makakat-on sa pagdumala diha sa mga kapangulohan sa korum ug sa klase. Mapalambo nila ang mga relasyon uban sa ilang mga pamilya, sa ilang mga lider, ug sa uban nga ilang kaedad samtang magtambayayong sila sa pagtrabaho ug pagserbisyo ug mahibalo nga sila nahisakop ug gikinahanglan sa buhat sa Ginoo.

Asa man Gayod Kita Magsugod Karon?

Among dapiton ang kabataan, kabatan-onan ug ang ilang mga ginikanan ug ang mga lider sa pagpasalig o pagpasalig og usab aron mahimong mas mahisama sa Manluluwas pinaagi sa pag-apil sa Iyang buhat. Kini nga mga paningkamot dili kinahanglan nga lisod! Aniay pipila ka sayon nga mga dapit aron makasugod:

Mga Ginikanan

Pundoka ang inyong pamilya alang sa pagtuon sa ebanghelyo. Ang mga kapanguhaan sa Dali, Sunod Kanako makatabang. Pwede ninyong ikonsiderar ang paghimo og mga paghisgot mahitungod sa mga hilisgotan sama sa mga pakigsaad, pagpadayag, kabubut-on, ug patriyarkal nga mga panalangin.
Pagplano og usa ka kalihokan sa pamilya. Sa unsang paagi kaha kamo nga sa luwas nga paagi makaserbisyo og tawo sa inyong kasilinganan o komunidad? Kon aduna, ang JustServe makatabang kaninyo sa pagpangita og mga ideya.
Sa tinagsa-tagsa nga paagi makig-istorya sa anak nga lalaki ug anak nga babaye. Hisgoti ang ilang mga interes ug istoryahi unsay ilang gustong paagi aron molambo. Tabangi ug suportahi sila sa ilang personal nga kalamboan. Hisgoti kon unsang mga tumong ang ila nang nahimo o gustong lihokon.

Mga lider sa Primary

Hibaloi ang mga kahimtang sa panimalay sa mga bata, ug tinguhaa ang pagpadayag sa pagtabang kanila isip mga indibidwal.
Sugdi ang paghimo og mga miting sa Dominggo ug mga kalihokan sa Primary nga magkauban gayod o sa virtual nga paagi (kon luwas ug gitugotan).
Ayaw kabalaka kabahin sa pagkonektar sa mga tinagsa-tagsa nga mga tumong ngadto sa mga kalihokan! Ang imong tutukan mao ang pagkonektar ug pagpanalangin sa kabataan ug sa ilang mga pamilya—ilabi na kon sila nagkinahanglan o mangayo og tabang.

Hamtong nga mga lider sa Kabatan-onan

Sugdi ang paghimo og mga miting sa Dominggo ug mga kalihokan sa korum ug sa klase nga magkauban gayod o sa virtual nga paagi (kon luwas ug gitugotan). Awhaga ang kabatan-onan sa pagmemorya ug pagsugod sa mga miting pinaagi sa bag-ong mga tema sa Young Women ug sa korum sa Aaronic nga Pagkapari.
Motawag, mo-set apart, ug mohatag og katungod sa mga kapangulohan sa korum ug sa klase. Tabangi sila sa paghimo og regular nga mga miting sa kapangulohan ug sa pagplano ug pagdumala sa mga miting sa Dominggo ug mga kalihokan. Mopahigayon og mga konseho sa ward sa kabatan-onan, ug i-awhag ang pag-apil sa koordinasyon nga mga miting sa misyonaryo ug sa templo ug family history. Motudlo ug mosuporta sa mga kapangulohan kon gikinahanglan nga dili mopuli. Motabang sa mga kapangulohan sa pagkat-on og mga kahanas sa pagpangulo gamit ang mga kapanguhaan sa kapangulohan sa korum ug sa klase.
Magplano ug mopahigayon og mga kamping sa kabatan-onan ug komperensiya sa kabatan-onan sa tuig 2021, nga magsunod sa luwas nga mga lagda.
Ayaw kabalaka kabahin sa pagkonektar sa mga tinagsa-tagsa nga mga tumong ngadto sa mga kalihokan! Itutok ang inyong paningkamot nga magkakonektar ang kabatan-onan. Kamo tingali makatabang usab sa mga kapangulohan sa korum ug sa klase sa pagkonektar sa mga kalihokan ngadto sa mga panginahanglan sa kabatan-onan.

Alang sa dugang nga impormasyon, tan-awa sa ChildrenandYouth.ChurchofJesusChrist.org.

Alang sa mga Hamtong

Mga Dapit nga Kapundokan sa mga YSA

Ang Unang Kapangulohan mihatag og pagtugot sa mga area sa pag-establisar og mga dapit nga kapundokan alang sa mga young single adult base sa mga panginahanglan sa area. Ang dapit nga kapundokan usa ka gipili nga lokasyon diha sa anaa nang daan nga pasilidad (sama sa usa ka meetinghouse o gambalay [building] sa institute) diin ang mga young single adult ug ang ilang mga higala mahimong magkapundok aron moapil sa pipila o tanan sa mosunod (base sa lokal nga mga panginahanglan ug mga kapanguhaan):

Pangrelihiyon nga edukasyon ug pagkat-on sa ebanghelyo (lakip na sa institute)
Mga kalihokan nga pangserbisyo ug pangkatilingban
Mga kalihokan sa templo ug sa family history
Mga oportunidad sa pagbarog sa kinaugalingong paningkamot ug edukasyon
Mga kalihokan sa misyonaryo ug pagtabang sa komunidad
Uban pang mga programa sa Simbahan

Ang tanang dapit nga kapundokan kinahanglan nga aprobahan sa Kapangulohan sa Area ug idumala sa mga presidente sa stake ug mga bishop.

Imahe

mga batan-on nga nag-istoryahanay sa usag usa

Mga Calling alang sa mga Young Single Adult ug mga Single Adult

Ang bag-ong mga kausaban sa polisiya ug mga klaripikasyon naghatag og katin-awan sa mahimong sayop nga mga pagsabot ug mga tradisyon kabahin sa mga limitasyon sa mga oportunidad alang sa dili minyo nga mga miyembro diha sa pagserbisyo sa Simbahan sa Ginoo. Kini nga mga kausaban ug mga klaripikasyon sa polisiya, nga giaprobahan sa Unang Kapangulohan ug sa Korum sa Napulog Duha ug gilakip diha sa Kinatibuk-ang Tamdanan nga Basahon, nagpasabot nga ang mga young single adult ug single adult mahimong mapanalanginan ug makapanalangin sa uban diha sa daghang mga calling, lakip na sa pagkalider sa stake ug ward. Ang mao gihapon nga mga polisiya gigamit na karon diha sa tanang yunit sa Simbahan, lakip na diha sa mga yunit sa young single adult ug single adult. Ang mga restriksyon nga nagdili sa mga young single adult ug sa mga single adult nga moserbisyo sa mga kapangulohan sa stake, mga bishopric, ug sa mga kapangulohan sa Relief Society diha sa mga yunit sa young single adult ug single adult gitangtang na.

Ang dili minyo nga mga miyembro makaserbisyo sa mga posisyon sa pagpangulo lakip sa mga kapangulohan sa organisasyon sa ward ug stake, mga kapangulohan sa korum sa mga elder, mga magtatambag sa bishopric, mga high councilor, ug mga magtatambag sa kapangulohan sa stake.

Ang Pagpanginahanglan ug Pag-abiabi sa Tanan—Paghigugma, Pagpaambit, ug Pagdapit

Kon ang mga miyembro naglisod sa pagbati nga nahisakop, usahay ang mga lider ug ang uban wala tuyoa nga makasulti og mga butang nga naglig-on sa pagtuo niini nga mga miyembro nga sila wala mahiangay o wala kinahanglana.

Imahe

mga batan-on nga nag-istoryahanay sa usag usa

Ang paghinumdom niini nga mga kamatuoran mahitungod sa paghigugma, pagpaambit, ug pagdapit makatabang aron maabiabi ang tanan ngadto sa pagkaaktibo, pagpakigdait, ug pagkahisakop sa Simbahan ni Jesukristo:

Ang matag tawo usa ka pinalangga nga anak sa Dios nga adunay balaang kinaiyahan ug kapalaran. Agi og dugang ngadto sa mahangtoron nga mga panalangin nga Iyang gisaad ngadto sa mga matinud-anon, Siya gusto nga mopanalangin sa Iyang mga anak karon, atol niini nga kinabuhi.
Ang matag anak sa Dios gikinahanglan diha sa buhat sa pagtukod sa Iyang gingharian.
Aron matabangan ang usa ka tawo nga mobati nga siya nahisakop ug gikinahanglan, sugdi pinaagi sa gugma. Paminaw aron makasabot sa iyang mga kasinatian. Ayaw hunahunaa nga ikaw nahibalo nang daan o nakasabot na.
Wala kitay mga tubag sa tanang pangutana nga atong giatubang o giatubang sa uban niini nga kinabuhi. Sama pananglit, wala kita mahibalo sa mga hinungdan nga ang usa ka tawo tingali nag-atubang og partikular nga hagit.
Pagmadayagon ug dili magmahukmanon. Abiabiha ang matag tawo, bisan asa man kanang tawhana sa iyang panaw. Pagtanyag og tabang, ug pagtutok diha sa kamatuoran nga ang matag tawo gikinahanglan diha sa Simbahan.
Kon ikaw sa dili tinuyo nga paagi makasulti og butang nga makapasakit, ayaw pangatarongan; pangayo og pasaylo ug dayon tinguhaa nga mapasaylo ug molambo.

Alang sa impormasyon mahitungod sa pagtabang sa mga miyembro sa piho nga mga kahimtang, tan-awa sa CounselingResources.ChurchofJesusChrist.org.

Giunsa sa Usa ka Pagkakabig sa Pagtubo ngadto sa usa ka Pundok sa Kaigsoonang Lalaki

Mga Baroganan sa Paghigugma, Pagpaambit, ug Pagdapit

Gisaad nga mga Panalangin samtang kita Mohigugma, Mopaambit, ug Modapit