Chan ru roksinkil li hu a’in

Eb’ li jalam-uuch sa’ li hu a’in k’uub’anb’ileb’ sa’ waqib’ tasal: Li Najter Chaq’rab’, Li Ak’ Chaq’rab’, Lix hu laj Mormon, Resilal li Iglees, Li evangelio chi k’anjelanb’il, ut eb’ li profeet re roso’jikeb’ li kutan. Naru taawoksiheb’ li jalam-uuch a’in re tzolok ut re k’utuk sa’ li ochoch malaj sa’ li iglees. Wan sa’ li tusulal chirub’el a’in xch’olob’ankil li junjunq jalam-uuch ut eb’ li raqal reheb’ li loq’laj hu nachal wi’ jo’ ajwi’ jalaneb’ chik li hu naru te’oksimanq re tzolok ut aatinak chirixeb’ li jalam-uuch. Xtz’ilb’aleb’ rix li raqal reheb’ li loq’laj hu jo’eb’ ajwi’ xkomoneb’ chik li hu tixnimob’resi aanawom chirix li kik’ulman sa’ li jalam-uuch ut eb’ li na’leb’ re li evangelio li neke’k’utman. K’oxlaheb’ li na’leb’ a’in chirix roksinkileb’ li jalam-uuch ut eb’ li ch’olob’anel aatin:

• Kanab’eb’ li komon chi sik’ok sa’eb’ li loq’laj hu malaj xkomoneb’ chik li hu neke’aatinak chik chirix li junjunq jalam-uuch. Patz’ reheb’ naq te’rileb’ ru malaj te’xye resileb’ li raqal ut li hu a’an naq yooqex chi aatinak chirix li jalam-uuch.

• Patz’ reheb’ li komon sa’ li junkab’al malaj li tzoleb’aal na te’xch’olob’ k’a’ru neke’ril sa’ junaq jalam-uuch malaj k’a’ru neke’reek’a chirix a’an. K’a’ruheb’ li na’leb’ re li evangelio li neke’k’utman sa’ li jalam-uuch? Chan ru naru taqoksi sa’ li qayu’am anajwan?

• Kanab’eb’ li komon chirilb’aleb’ li jalam-uuch sa’ junesal. Maare te’xsik’ ru wiib’ reheb’ li jalam-uuch re rilb’al li k’a’ru juntaq’eet ut li k’a’ru jalan sa’eb’ li jalam-uuch a’an. Lix na’leb’eb’ ut lix patz’omeb’ chirix li neke’ril naru tixtikib’ jun aatinak chirixeb’ li loq’laj hu ut eb’ li na’leb’ re li evangelio.

Xkomoneb’ chik li jalam-uuch re li evangelio, jo’ ajwi’ li na’leb’ chirix chan ru roksinkil li hu a’in, naru te’tawmanq sa’ LDS.org.