famli i stap wokbaot aotsaed

?Olsem wanem nao bae mi toktok long pikinini blong mi abaot helti fasin long saed blong seks?

Fulap papa mo mama oli no sua o fil sem blong tokbaot fasin blong seks long ol pikinini blong olgeta, o oli fraet se, blong stap tokbaot fasin blong seks bae i wekemap fasin blong olgeta blong seks. Trutok i we, sapos yu no tokbaot fasin blong seks long ol pikinini blong yu, bae oli lanem hemia long wan nara ples. Blong stap gat ol storian ia sam sam taem wetem ol pikinini blong yu abaot ol impoten topik olsem blong stap gat ol helti fasin long saed blong seks, yu stap helpem olgeta blong oli andastanem se oli save trastem mo toktok long yu.

Hem i nomol fasin blong plante pikinini oli lukaotem blong save, mo oli wantem blong andastanem ol nomol filing ia we God i givim we oli stap eksperiensem. Yu save rere long yuwan blong toktok wetem ol pikinini blong yu abaot fasin blong seks taem yu stap tingbaot taem we yu bin gat semmak yia olsem olgeta. ?Wanem nao sam long ol filing we yu bin eksperiensem? ?Wanem ol tingting, ol kwestin, o ol wari we yu bin gat? ?Wea ples nao yu bin lukaotem infomesen? ?Wanem nao yu hop se yu bin harem o oli bin tijim long yu?

Hem i oraet sapos yu no filim sua abaot olsem wanem blong handelem gud ol storian ia. Yu save yusum fasin blong yu ia blong fraet mo no sua blong bildim rilesensip blong yu wetem ol pikinini blong yu. Ol pikinini oli save filim lav blong yu taem yu ones mo stap toktok wetem tru hat long olgeta, nomata se yu stap filim fraet o no filim gud tumas.

Blong leftemap tingting blong storian ia, yu save:

• Statem taem ol pikinini blong yu oli yang mo stap singaotem ol pat blong bodi long stret nem blong olgeta. Hemia bae tijim ol pikinini abaot bodi blong olgeta mo i givim olgeta stret toktok we oli nidim blong stap helti mo save ol samting.

• Mekem ol pikinini blong yu oli save se oli save askem yu eni kwestin, mo traem blong no sek o mekem oli sem long ol kwestin mo ol konfesen blong olgeta. Stap glad se oli stap toktok long yu, soem lav mo sapot long olgeta mo traem bes blong stap toktok wetem olgeta.

• No yusum ol parabol o saen blong tokbaot fasin blong seks. Ol pikinini oli nidim blong oli soem mo talem ol infomesen long wan wei we i stret mo ones. Eksampol, sam yut oli talem ol lesen blong stap brekem loa blong jastiti i olsem blong kakae swing kom o wan kakae we oli pasem raon long wan man i go long narafala raon long rum, we i mekem se man i nomo laekem. Nomata se tingting biaen long eksampol ia i gud, fulap taem ol kaen parabol olsem i stap leftemap fraet long fasin blong seks o ol filing blong tingdaon o tingdaon long yuwan we i mekem yu ting se yu nomo save stretem yuwan.

• Gat ol haos naet lesen long ol topik we i go wetem fasin blong seks mo letem ol pikinini oli tijim taem oli filim se oli rere. Ol topik i save tekem tu ol jenis long saed blong bodi taem yu kam bigwan, bodi i luk olsem wanem, mo ol gud saed blong fasin blong seks.

• Toktok raon abaot olsem wanem blong stap eksperiensem ol filing blong seks mo ol filing blong wantem seks i nomol. Ol pikinini oli no nid blong tekem aksen folem ol filing ia, be oli nid blong luksave mo save long hem. Hemia i minim blong luksave ol filing ia long saed blong seks be i no blong jajem no gud olgeta. Ol stadi i soem se blong stap praktisim fasin blong luksave samting, i save helpem ol pikinini blong mekem ol moa gud joes we i go wetem ol gol mo ol valiu blong olgeta.

• No traem blong mekem wan no gud fes o kros taem pikinini i stap tajem hemwan o yut we i talemaot se hem i stap tajtajem hemwan. Olsem wanem ol papa mo mama oli tekem aksen long ol kaen fasin ia i afektem olsem wanem ol pikinini mo ol yut oli filim abaot olgetawan mo fasin blong olgeta long seks.

• Tijim ol pikinini blong yu long stamba tingting biaen long ol standet we i go wetem ol rilesensip mo fasin blong seks. Taem yu stap tijim ol standet ia mo ol risen from wanem oli gat bigfala valiu, tingbaot se hem i impoten blong mekem hemia long wan fasin we bae i no mekem wan i sem o fraet.¹

Not

1. Ol poen ia oli kwotem mo karemaot long toktok blong Laura M. Padilla-Walker mo Meg O. Jankovich “How, When, and Why: Talking to Your Children about Sexuality,” Liahona, Aug. 2020.