Pasiuna Gikan sa Unang Kapangulohan

Tulo ka bulan human maorganisar ang Simbahan, ang Ginoo, pinaagi ni Propeta Joseph Smith, mitudlo sa asawa ni Joseph, nga si Emma, sa pagpili og sagrado nga mga himno alang sa Simbahan: “Kay ang akong kalag mahimuot sa awit sa kasingkasing oo, ang awit sa mga matarung mao ang usa ka pag-ampo ngari kanako, ug pagatubagon uban sa usa ka panalangin diha sa ilang mga ulo” (D&P 25:12).

Karon, 150 ka tuig human ang unang himno namantala sa Simbahan, gikalipay namoang pagpresentar niini nga pagbag-o. Daghang mga himno nga makita diha sa atong orihinal nga hymnbook ug sa nagsunod nga mga edisyon gilakip usab, isip bag-ong nadugang nga mga himno. Ang tanan gipili gayud aron makab-ot ang nagkadaiyang panginahanglan sa mga miyembro sa Simbahan karon sa tibuok kalibutan.

Mga Musika Panahon sa Atong mga Miting sa Simbahan

Ang makadasig nga mga musika usa ka mahinungdanon nga bahin sa atong mga miting sa simbahan. Ang himno modapit sa Espiritu sa Ginoo, momugna og usa ka matinahuron nga pagbati, mohiusa kanato nga mga miyembro, ug mohatag nato og paagi sa paghatag og mga pagdayeg ngadto sa Ginoo.

Pipila sa talagsaon nga mga sermon gisangyaw pinaagi sa pagkanta og mga himno.Ang mga himno modala kanato ngadto sa paghinulsol ug maayong mga buhat, molig-on sapagpamatuod ug sa pagtuo, mohupay sa nanagluya, mohupay sa nagmasulub-on, ug modasig kanato sa paglahutay hangtud sa katapusan.

Nanghinaut kaming makakita nga magkadaghan ang pagpanganta sa himno diha saatong mga kongregasyon. Among giawhag ang tanang miyembro, hilig man sa musika odili, sa pag-apil kanamo sa pagpanganta sa mga himno. Nanghinaut kami nga ang mga lider, mga magtutudlo, ug mga miyembro nga tawagon sa pagpamulong nga mopakli kanunay sa hymnbook aron makakita sa mga sermon nga uban sa gahum ug katahum gipresentar diha sa mga bersikulo.

Ang mga Santos sa Ulahing mga Adlaw adunay dugay na nga tradisyon sa pagpanganta sa choir. Ang matag ward ug branch sa Simbahan kinahanglang adunay choir nga mopasundayag kanunay. Giawhag namo ang mga choir nga mogamit sa hymnbook nga maoy una nila nga kapanguhaan.

Mga Musika diha sa Atong mga Panimalay

Ang musika adunay dili pinugngan nga gahum alang sa pagtandog sa mga pamilya ngadto sa mas hataas nga espiritwalidad ug debosyon sa ebanghelyo. Ang mga Santos sa Ulahing mga Adlaw kinahanglang mopuno sa ilang mga panimalay og maanindot nga musika.

Ania kanato ang usa ka hymnbook alang sa panimalay ingon man alang sa simbahan. Manghinaut kami nga ang hymnbook makakuha og maayo nga dapit kauban sa mga kasulatan ug uban pang mga basahon sa relihiyon diha sa atong mga panimalay. Ang mga himno makadala sa mga pamilya og usa ka diwa sa katahum ug kalinaw ug makaawhag og gugma ug panaghiusa tali sa mga sakop sa pamilya.

Tudloi ang inyong mga anak nga ilang maganahan pag-ayo ang mga himno. Kantaha kini sa Adlawng Igpapahulay, sa home evening, panahon sa pagtuon sa kasulatan, ug panahon sa pag-ampo. Pagkanta-kanta samtang kamo nagtrabaho, sa inyong pagdula, ug samtang kamo grupo nga nagbiyahe. Kantaha ang mga himno isip pangpakatulog sa paglig-on sa inyong pagtuo ug sa gagmay ninyong mga bata.

Mga Musika diha sa Atong Personal nga mga Kinabuhi

Agi og dugang sa pagpanalangin kanato isip miyembro sa Simbahan ug sa pamilya, ang mga himno dako kaayo og ikatabang kanato isip mga indibidwal. Ang mga himno makabayaw sa atong mga espiritu, mohatag kanato og kaisug, ug modala kanato ngadto sa matarung nga buhat. Mopuno kini sa atong mga kalag uban sa langitnon nga mga panghunahuna ug mohatag kanato og usa ka espiritu sa kalinaw.

Ang mga himno makatabang usab kanato nga makasagubang sa mga pagtintal sa kaaway. Awhagon ko kamo sa pagsag-ulo sa inyong paborito nga mga himno ug tun-i ang mga kasulatan ang may kalabutan niini. Unya, kon ang dili maayong mga hunahuna mosulod sa imong hunahuna, pagkanta-kanta og himno sa imong kaugalingon, pulihan ang dautan sa maayo.

Memoryahon nato kini ug pamalandungi kini, i-recite ug kantaha kini, ug moambit sailang espirituhanon nga sustansya. “Hinumdumi nga ang awit sa mga matarung mao ang usa ka pag-ampo ngadto sa atong Amahan nga Langitnon, ug kini pagatubagon uban sa usa ka panalangin diha sa [inyong] mga ulo.”

Ang Unang Kapangulohan